ქვემო ქართლი. 28 ოქტომბერს სამოქალაქო ინტეგრაციის ფონდის ორგანიზებით პროექტი „სამოქალაქო საზოგადოების ინიციატივა“ ფარგლებში, გაიმართა შეხვედრა დმანისის მუნიციპალიტეტის სპორტისა და ახალგაზრდობის საქმეთა სამსახურის ხელმძღვანელთან ქალბატონ ნინო ომიაძესა და ადგილობრივ ახალგაზრდა აქტივისტებს შორის. შეხვედრაზე ისაუბრეს ადგილობრივი ახალგაზრდების წინაშე არსებული გამოწვევებისა და პრობლემების შესახებ და ახალგაზრდული პოლიტიკის მართვასა და კოორდინაციაზე მუნიციპალურ დონეზე. შეხვედრა განხორციელდა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივის ფარგლებში, რომელსაც ახორციელებს კონსორციუმი კონრად ადენაუერის ფონდის (KAS) ხელმძღვანელობით. სრულად... წყარო: ორგანიზაციის გვერდი სოციალურ ქსელში

თბილისი. 2022 წლის 2 ნოემბერის თბილისის სააპელაციო სასამართლომ გამოაცხადა განაჩენი ტელეკომპანია „რუსთავი 2-ის“ ყოფილი დირექტორის, ამჟამად „მთავარი არხის“ დამფუძნებლის და გენერალური დირექტორის ნიკა გვარამიას საქმეზე და გვარამია პატიმრობაში დატოვა. „სააპელაციო სასამართლოს მიერ დღეს მიღებული გადაწყვეტილება ეწინააღმდეგება ევროკომისიის მიერ საქართველოსთვის სტატუსის მისაღებად დაწესებულ მოთხოვნებს პლურალისტური მედია გარემოსა და დამოუკიდებელი და მიუკერძოებელი სასამართლოს შესახებ. ნიკა გვარამიას საქმე მოხვდა საქართველოში მედიის თავისუფლებისა და ჟურნალისტების უსაფრთხოების შესახებ ევროპარლამენტის მიერ მიღებულ რეზოლუციაშიც. სასამართლოს ამ გადაწყვეტილებამ საქართველო კიდევ უფრო დააშორა ევროკავშირის კანდიდატის სტატუსს და ბუნდოვანი გადახადა ჩვენი ქვეყნის ევროპული მომავალი. არსებულ კრიტიკულ სიტუაციაში კიდევ ერთხელ მოვუწოდებთ საქართველოს პრეზიდენტს, შეიწყალოს ნიკა გვარამია და დადებითი როლი შეასრულოს ევროპის კავშირში ინტეგრაციის პროცესში“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

კახეთი. 9-10 ნოემბერს, საქართველოს სტრატეგიული კვლევებისა და განვითარების ცენტრის ორგანიზებით, „სათემო ლიდერთა ფორუმი“ გაიმართება. ფორუმი წლების განმავლობაში ჩამოყალიბდა, როგორც სათემო ორგანიზაციების ინფორმირების, განვითარების და საინტერესო პარტნიორობის დაწყების პლატფორმა. შესაბამისად, ორმაგად მნიშვნელოვანია, რომ ღონისძიება 2-წლიანი ონლაინ ფორმატის შემდეგ, ცოცხალ რეჟიმში გაიმართება. წლევანდელ ფორუმზე დამსწრე საზოგადოებას ექნება საშუალება: მოისმინოს სხვადასხვა სათემო ორგანიზაციის გამოცდილება; სათემო პროექტების სოციალური გავლენის კვლევის შედეგები; გახდეს მონაწილე 2020-2021 წლების საუკეთესო სათემო ინიციატივის დაჯილდოების პროცესის. ფორუმის მეორე დღე მიეძღვნება სათემო ორგანიზაციებისათვის საინტერესო ინტერაქტიულ სესიებს სხვადასხვა მნიშვნელოვან თემებზე. ფორუმზე დასასწრებად გაიარეთ რეგისტრაცია 7 ოქტომბრის ჩათვლით, 18:00 საათამდე... სრულად... გაიცანით პანელური დისკუსიის მონაწილეები... წყარო: ორგანიზაციის გვერდი სოციალურ ქსელში

გურია. ახალგაზრდა პედაგოგთა კავშირის სკოლის მხარდამჭერთა პროგრამის ფარგლებში, შემოქმედის საჯარო სკოლაში იდეებისა და მეწარმეობის ლაბორატორიის წევრები მწერალ არჩილ ქიქოძეს შეხვდნენ. შეხვედრაზე განიხილეს ლიტერატურული პრემია „ლიტერაზე“ ნომინირებული წლის საუკეთესო რომანი „სამხრეთული სპილო“, რომელიც სასკოლო პროგრამაშია შესული. შეხვედრაზე მოზარდებს შესაძლებლობა ჰქონდათ დაესვათ წიგნთან დაკავშირებული მათთვის საინტერესო შეკითხვები. ავტორთან შეხვედრა განხორციელდა სკოლის მენტორის - ვახუშტი მენაბდის აქტიური მხარდაჭრითა და ჩართულობით. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს ინფორმაციით, 2 ნოემბერს, თბილისის სააპელაციო სასამართლომ „რუსთავი 2”-ის ყოფილი დირექტორისა და „მთავარი არხის” დამფუძნებლის, ნიკა გვარამიას მიმართ გამამტყუნებელი განაჩენი გამოიტანა. ნიკა გვარამია დამნაშავედ ცნეს უფლებამოსილების ბოროტად გამოყენებაში (ორი ეპიზოდი - ე.წ. რეკლამის გაყიდვის საქმე და ე.წ. ავტომანქანის საქმე). საბოლოო სასჯელის სახედ მას 3 წლითა და 6 თვის ვადით თავისუფლების აღკვეთა განესაზღვრა. ორგანიზაციის შეფასებით, საქმის მასალებისა და პროცესებზე დაკვირვების საფუძველზე შეგვიძლია დავასკვნათ, რომ  აღნიშნული საქმე პოლიტიკურად არის მოტივირებული, რომლის მიზანი ნიკა გვარამიას დასჯა და კრიტიკული ტელეკომპანიის საქმიანობის შეფერხებაა. „მნიშვნელოვანი ხარვეზებით განხორციელებული მართლმსაჯულება, რომელიც ზიანს აყენებს მედია გარემოს და ზოგადად, ადამიანის უფლებებისა და თავისუფლებების დაცვის სტანდარტებს, კიდევ უფრო აღრმავებს პოლარიზაციას, აცდენილია ევროკავშირის 12-პუნქტიანი მოთხოვნების სულისკვეთებას და ხელს უშლის სტაბილურ დემოკრატიულ განვითარებას“, ნათქვამია განცხადებაში. სრულად... წყარო: transparency.ge

სამეგრელო-ზემო სვანეთი. სამცხე-ჯავახეთის რეგიონული ჰაბის ხელშეწყობით, ახალციხის ზრდასრულთა განათლების ცენტრი სასწავლო ვიზიტით სამეგრელო-ზემო სვანეთის რეგიონის ორ არასამთავრობო ორგანიზაციას: სენაკის სათემო განათლების ცენტრს და სოფლის მეურნეობის განვითარების ასოციაციას (AFAD) ესტუმრა. ვიზიტის მიზანი იყო არასამთავრობო ორგანიზაციების გამოცდილების, გამოწვევებისა და შესაძლებლობების გაზიარება. გაცვლითი პროგრამა დაიგეგმა, პროექტ „სამოქალაქო საზოგადოების ინიციატივა“-ს ფარგლებში, რომელსაც ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციასთან ერთად - საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციისა და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად... წყარო: ორგანიზაციის გვერდი სოციალურ ქსელში

რეგიონები. სამართლიანი არჩევნების (ISFED) სოციალური მედიის მონიტორინგის გუნდმა ზუგდიდში, ბოლნისსა და ქუთაისში ადგილობრივ არასამთავრობო და მედია ორგანიზაციების წარმომადგენლებთან შეხვედრები გამართა. შეხვედრებზე განიხილეს სოციალურ მედიის მონიტორინგის ძირითადი მიგნებები, როგორ იყენებენ დაინტერესებული პირები სოციალური მედიის პლატფორმებს პოლიტიკური მიზნებისათვის და ფართო საინფორმაციო კამპანიების გატარებისთვის; მიმდინარე პროპაგანდისტული გზავნილები, ანტიდასავლური კამპანია და მასში ჩართული აქტორები. შეხვედრაზე ასევე იმსჯელეს დეზინფორმაციულ ნარატივებთან გამკლავების გზებზე. სრულად... წყარო: ორგანიზაციის გვერდი სოციალურ ქსელში

აჭარა. საერთაშორისო გამჭვირვალობა - საქართველომ ქობულეთში ახალგაზრდებთან შეხვედრა გამართა. შეხვედრის თემა იყო: როგორ ვებრძოლოთ ევროკავშირის კანდიდატი ქვეყნის სტატუსთან დაკავშირებულ დეზინფორმაციას და ანტიდასავლურ პროპაგანდას? რა ნაბიჯებია გადასადგმელი სტატუსის მისაღებად? ბათუმში, თავისუფალი სივრცე/Free Space-ში, საინტერესო დისკუსია მოჰყვა კიდევ ერთ შეხვედრას, სადაც ბესო სოლომანაშვილის ახალი ფილმის „ბოსტანი კონფლიქტის ზონაში“ ჩვენება გაიმართა. სრულად... წყარო: ორგანიზაციის გვერდი სოციალურ ქსელში

აჭარა. „საერთაშორისო გამჭვირვალობა - საქართველომ” შეისწავლა აჭარის ავტონომიური რესპუბლიკის უმაღლესი საბჭოს და მთავრობის თანამდებობის პირების მიერ 2021-2022 წლებში შევსებული დეკლარაციები და 39%-ში ხარვეზები გამოავლინა. კვლევის შედეგად დადგინდა რომ: 62 მოქმედი თანამდებობის პირიდან დეკლარაცია ხარვეზებით 24-მა შეავსო. მათგან 12-მა თანამდებობის პირმა დეკლარაციაში არ მიუთითა მისი ან/და მისი ოჯახის წევრის საკუთრებაში არსებული უძრავი ქონება. 12 თანამდებობის პირს არ აქვს დეკლარირებული მისი ან/და მისი ოჯახის წევრის მონაწილეობა სამეწარმეო საქმიანობაში - წილების ფლობა და საწარმოს ხელმძღვანელობა. 11 თანამდებობის პირს არ გადაუცია წილის მართვის უფლება სხვა პირისათვის. 4 თანამდებობის პირს დეკლარაციაში არ მიუთითებია თანამდებობაზე ყოფნის პერიოდში მიღებული შრომის ანაზღაურება. 3-მა პირმა თანამდებობაზე ყოფნისას მიიღო შემოსავლები აკრძალული/ნებადაურთველი საქმიანობიდან. 2-მა თანამდებობის პირმა - უმაღლესი საბჭოს წევრებმა, ილია ვერძაძემ და ფრიდონ ფუტკარაძემ გამოასწორეს ჩვენს 2019 წლის კვლევაში მითითებული ხარვეზები, ხოლო მთავრობის თავმჯდომარემ, თორნიკე რიჟვაძემ არ გაითვალისწინა 2020 წლის კვლევაში ნახსენები ხარვეზი.  ორგანიზაციამ მიმართა საჯარო სამსახურის ბიუროს, წარმოდგენილი ინფორმაციის საფუძველზე, შეისწავლოს კვლევაში აღნიშნული პირების ქონებრივი მდგომარეობის დეკლარაციები სათანადო რეაგირების მიზნით. სრულად... წყარო: transparency.ge

2 ნოემბერს, 16:30 საათზე, საქართველოს რეგიონული განვითარებისა და ინფრასტრუქტურის მინისტრის მოადგილე მზია გიორგობიანი, USAID-ის ადმინისტრატორის მოადგილე ერინ მაქქეისთან ერთად ოფიციალურად გახსნის USAID-ის ადგილობრივი თვითმმართველობის პროგრამას. სრულად... მისამართი: თბილისი, შოთა რუსთაველის გამზ. #7, ქართული სახვითი ხელოვნების მუზეუმი, (საკონფერენციო დარბაზი)

2 ნოემბერს, 16:00 საათზე, საქართველოს მწერალთა სახლში (ივ. მაჩაბლის 13, თბილისი), არასამთავრობო ორგანიზაცია „კავკასიური მოზაიკა“, გაერთიანებული სამეფოსა და გაეროს განვითარების პროგრამის (UNDP) ხელშეწყობით წარადგენს ქართულ-ოსურ გამოცემებს, რომლებიც ქართველი და ოსი მკვლევარების თანამშრომლობის შედეგად შეიქმნა. სრულად... მისამართი: თბილისი, ივ. მაჩაბლის #13

თბილისი. 31 ოქტომბერს, საერთაშორისო გამჭვირვალობა - საქართველომ ქართული პოლიტიკური პარტიების, ადგილობრივი და საერთაშორისო ორგანიზაციების, ცესკოს წევრების, ასევე საელჩოების წარმომადგენელთა მონაწილეობით პარტიების დაფინანსების საკითხებზე დისკუსია გამართა. დისკუსია შეეხო იმ გამოწვევებს, რაც პოლიტიკური ფინანსებზე ზედამხედველობისა და გამჭვირვალობის, ასევე პარტიების ფინანსების მოძიების, რუსული გავლენებისა თუ „შავი“ ფულის არსებობის კუთხით დგას ქვეყანაში. სამუშაო შეხვედრის მონაწილეებმა პრობლემების მოგვარების შესაძლო გზებზეც გამოთქვეს საინტერესო მოსაზრებები. ღონისძიება  ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით ჩატარდა. სრულად... წყარო: ორგანიზაციის გვერდი სოციალურ ქსელში

თბილისი. სამი არასამთავრობო ორგანიზაცია - სოციალური სამართლიანობის ცენტრი, საია და მწვანე ალტერნატივა აქვეყნებს შეფასებას, სახელმწიფო კომისიის მიერ ითხვისის შესახებ მომზადებულ დასკვნაზე. როგორც საზოგადოებისთვის ცნობილია, მიმდინარე წლის მარტში ჭიათურის მუნიციპალიტეტის სოფელ ითხვისში, სახლების ჩაქცევის შემდეგ საქართველოს მთავრობის განკარგულების საფუძველზე, შეიქმნა უწყებათაშორისი კომისია, რომელსაც ამ პროცესების გამომწვევი მიზეზების შესწავლა და „სტიქიის“ არეალში მოქცეული მოსახლეობის იდენტიფიცირება დაევალა. კომისიის დასკვნა, რომელიც 10 ოქტომბრითაა დათარიღებული, მოსახლეობის ნაწილისთვის ხელმისაწვდომი ოქტომბრის შუა რიცხვებში გახდა. ორგანიზაციების შეფასებით, დასკვნა ითხვისელების ღირსეული განსახლების გარანტიებს ვერ ქმნის შემდეგი მიზეზების გამო: •    კომისიას არ შეუფასებია, რა ბედი უნდა ეწიოს სოფელს/უბანს - უნდა მოხდეს მთლიანი თემის განსახლება და განხორციელდეს წიაღის მოპოვება, თუ არსებობს მოლოდინი, რომ დანარჩენი მცხოვრებლებისთვის სოფელში დარჩენა უსაფრთხოა; •    ბუნდოვანია რა სტანდარტებით, წესებით და რა ვადებში მოხდება დაზარალებულების განსახლება. ამ ეტაპზე მხოლოდ სახლების საბაზრო ღირებულება ფასდება, რაც, სავარაუდოდ, საკმარისი ვერ იქნება ახალი საცხოვრებელი სახლების ასაგებად; •    დასკვნის მიხედვით, შეისწავლეს მხოლოდ 106 ოჯახის მდგომარეობა, თუმცა კომისია არ მსჯელობს იმაზე, თუ რატომ არ შეფასდა დამატებით ის საცხოვრისებიც, რომლებიც ასევე ექცევა მიწის ჩაქცევის არეალში და სავარაუდოდ, არც ეს სახლებია ბოლომდე უსაფრთხო; •    კომისია გამოყოფს მნიშვნელოვანი და ნაკლები დაზიანების მქონე ნაგებობებს და ამბობს, რომ პირველ რიგში უნდა მოხდეს მნიშვნელოვნად დაზიანებულ სახლში მცხოვრები მოსახლეობის განსახლება. თუმცა გაურკვეველია, კონკრეტულად რა კრიტერიუმებით მიაკუთვნა კომისიამ სახლები ნაკლებად დაზიანებულ, ან მნიშვნელოვნად დაზიანებულ კატეგორიებს. სრულად... წყარო: www.gyla.ge

თბილისი. საერთაშორისო გამჭვირვალობა - საქართველოს ინფორმაციით, 26 ოქტომბერს საქართველოს პარლამენტში იურიდიულ საკითხთა კომიტეტის მიერ დაინიცირდა კანონპროექტი, რომელიც ახალი სტრუქტურის - სსიპ „ანტიკორუფციული ბიუროს“ შექმნას ითვალისწინებს. კანონპროექტის ავტორების გაცხადებული მიზანია, შესრულდეს საქართველოსთვის ევროკავშირის წევრობის კანდიდატის სტატუსის მისანიჭებლად ევროკომისიის მიერ გაცემული 12 რეკომენდაციის მე-4 პუნქტი. კანონპროექტის მიხედვით, ახალი უწყების ფუნქცია იქნება კორუფციის წინააღმდეგ ბრძოლის ხელშეწყობა, რასაც ის განახორციელებს ანტიკორუფციული პოლიტიკის განმსაზღვრელი დოკუმენტების შექმნით, მათი აღსრულების კოორდინაციითა და ზედამხედველობით. ბიუროს ხელმძღვანელს საქართველოს პრემიერ-მინისტრი დანიშნავს. „საერთაშორისო გამჭვირვალობა - საქართველოს“ შეფასებით, შემოთავაზებული რეფორმა არ პასუხობს ევროკომისიის მიერ გაცემულ მე-4 რეკომენდაციას, რომელიც ქვეყანას სთხოვს: „გააძლიეროს ანტიკორუფციული სააგენტოს დამოუკიდებლობა, რომელიც თავს მოუყრის ყველა საკვანძო ანტიკორუფციულ ფუნქციას; განსაკუთრებით კი, საგულდაგულოდ გადაჭრას მაღალი დონის კორუფციის შემთხვევები“. ორგანიზაციის აზრით, დაგეგმილი რეფორმა არ მოიცავს არც სხვადასხვა საკვანძო ანტიკორუფციული ფუნქციის თავმოყრას, არც რეალური დამოუკიდებლობის გარანტიის შექმნას და არც მაღალი დონის კორუფციის შემთხვევების წინააღმდეგ ბრძოლას. ის გულისხმობს, მხოლოდ და მხოლოდ, მთავრობის ადმინისტრაციაში ამჟამად არსებული ეროვნული ანტიკორუფციული საბჭოს სამდივნოს ფუნქციების ცალკე სსიპ-ად გამოყოფას, რაც აცდენილია ევროკომისიის მოთხოვნას. სრულად... წყარო: transparency.ge

თბილისი. ილია ჭავჭავაძის ლიტერატურულ-მემორიალურ მუზეუმში, ქალთა საინფორმაციო ცენტრის ორგანიზებით, პროექტის „შერჩეულ მუნიციპალიტეტში გენდერული თანასწორობის მეინსტრიმინგი და ხელშეწყობა“ შემაჯამებელი შეხვედრა გაიმართა. შემაჯამებელი შეხვედრის მიზანი იყო ადგილობრივ დონეზე, გენდერული თანასწორობის ინტეგრაციის შესახებ დასკვნებისა და შედეგების წარდგენა/განხილვა, კარგი პრაქტიკების გაზიარება, გენდერული თანასწორობის ხელშეწყობის პროცესში გამოწვევებისა და დაბრკოლებების განხილვა, მიღწეული შედეგების შეჯამება და მდგრადობის უზრუნველყოფა. შეხვედრაში მონაწილეობდნენ ცენტრალური და ადგილობრივი ხელისუფლების წარმომადგენლები/გადაწყვეტილების მიმღები პირები, მათ შორის, პარლამენტის მუდმივმოქმედი გენდერული თანასწორობის საბჭოს თავმჯდომარე, ნინო წილოსანი და საბჭოს წევრი - ანა ნაცვლიშვილი, ასევე, მუნიციპალიტეტებში გენდერული თანასწორობის საკითხებზე პასუხისმგებელი პირები. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ცნობით, 26 ოქტომბერს გამოქვეყნდა მსოფლიოს სამართლის პროექტის (World Justice Project) კანონის უზენაესობის გლობალური ინდექსი. ის 8 კრიტერიუმს მოიცავს და ყოველწლიურად ქვეყნდება. ამ კრიტერიუმებით კანონის უზენაესობის კუთხით სახელმწიფოების მდგომარეობა ფასდება. აღნიშნულ ანალიზში მიმოხილულია საქართველოს შედეგები კანონის უზენაესობის გლობალურ ინდექსში 2022 წლის მდგომარეობით, შედარებულია ქვეყნის შედეგები წინა წლების მაჩვენებლებთან, და რეგიონის სხვა ქვეყნებთან. წლევანდელი შედეგებით, საქართველოს ქულა შემცირდა - 0.61 ქულიდან 0.60-მდე ჩამოვიდა. მართალია, საქართველო რეგიონულ რეიტინგში, 14 ქვეყანას შორის პირველ პოზიციაზეა, მაგრამ ქვეყნის პროგრესი ბოლო წლებში შეჩერდა. საქართველო იმ ქვეყნებს შორის მოხვდა, რომელთა მაჩვენებლები 2015 წლის შემდეგ შემცირდა. ამის საპირისპიროდ, რეგიონში მოლდოვამ, უკრაინამ, ყაზახეთმა და უზბეკეთმა ბოლო წლებში გაუმჯობესების ტენდენცია აჩვენეს. სრულად... წყარო: idfi.ge

გურია. 26 ოქტომბერს ოზურგეთის სწავლებისა და დასაქმების ხელშეწყობის ცენტრში დაიწყო სამეწარმეო უნარების ერთთვიანი კურსი მესამე ნაკადისთვის. განხილულ საკითხებს შორის იყო: ბიზნესი იდეების გენერირება; ბიზნეს გეგმის შემადგენელი კომპონენტები. რა უნარებსა და თვისებებს უნდა ფლობდეს მეწარმე; ინტერპერსონალური კომუნიკაცია. კლიენტის საჭიროებების დადგენა; დამაჯერებელი და პოზიტიური ენა. ეფექტური შეთავაზება; არავერბალური კომუნიკაცია და სხვ. სამეწარმეო კურსი ტარდება პროექტის „უნარების განვითარება და დასაქმების ინოვაციური შესაძლებლობები საქართველოს რეგიონული განვითარებისთვის“ ფარგლებში, რომელსაც ახორციელებს საქართველოს სტრატეგიული კვლევებისა და განვითარების ცენტრი (CSRDG), ახალგაზრდა პედაგოგთა კავშირსა და საქართველოს სამოქალაქო განვითარების ასოციაციასთან ერთად, გურიის, კახეთისა და ქვემო ქართლის რეგიონში. პროექტის ფინანსური მხარდამჭერია ევროკავშირის დელეგაცია საქართველოში. სრულად... წყარო: ორგანიზაციის გვერდი სოციალურ ქსელში

1 ნოემბერს, 17:00 საათზე, გაეროს განვითარების პროგრამის (UNDP) ვირტუალური პლატფორმა - ქართული გამოგონებების მუზეუმი, გიწვევთ კონკურსის „ენერგოეფექტური სახალხო გამოგონებები“-ს დაჯილდოებაზე. სრულად...

1 ნოემბერს, 13:00 საათზე, სასტუმრო „ქორთიარდ მერიოტში“ (თავისუფლების მოედანი №4) სოციალური სამართლიანობის ცენტრი გიწვევთ საჯარო დისკუსიაზე „რას ნიშნავს სახელმწიფო კომისიის დასკვნა ითხვისისთვის და მოპოვებით დაზარებული სხვა თემებისთვის?“ სრულად...

1 ნოემბერს, 12:30 საათზე, სასტუმრო „ქორთიარდ მარიოტში“ „სოციალური სამართლიანობის ცენტრი“ საჯარო ღონისძიებას გამართავს და მწვანე ალტერნატივასთან და საიასთან ერთად ითხვისის შესახებ სახლმწიფო კომისიის მიერ მომზადებულ დასკვნაზე შეფასებას წარმოადგენს. მისამართი: თბილისი, თავისუფლების მოედანი #4

თბილისი. ნახეთ USAID-ის ხელშეწყობით შექმნილი ანიმაციური სერიები და გაეცანით ინფორმაციას აქტიური მოქალაქეობის შესახებ. დღეს წარმოდგენილია სერია, რომელიც ხელისუფლების კონტროლს ეხება. ანიმაციური სერიები შეიქმნა USAID-ის სამოქალაქო განათლების კამპანიის ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. ფონდი „ტასოს“ ცნობით, ოქტომბერი ძუძუს კიბოს შესახებ ცნობიერების ამაღლების თვეა. ეს თვე 1985  წლიდან ყოველწლიურად აღინიშნება და ეძღვნება დაავადებას გადარჩენილ პაციენტებს, დაავადების შედეგად გარდაცვლილთა ხსოვნას და იმ პროგრესის მხარდაჭერას, რომელსაც მსოფლიომ მიაღწია ძუძუს კიბოს დამარცხებაში. „ძუძუს კიბოს რისკ-ფაქტორების შესახებ ცნობიერების ამაღლება ხაზს უსვამს რეგულარული სკრინინგის მნიშვნელობას 40 წლის ასაკიდან ან იმ ასაკიდან, რომელიც შეესაბამება ქალის პირად რისკებს. ძუძუს კიბოს შესახებ ცნობიერების ამაღლების სიმბოლო ვარდისფერი ბაფთაა“. სრულად... წყარო: ორგანიზაციის გვერდი სოციალურ ქსელში