თბილისი. 14 ივნისს, საქართველოში შეზღუდული შესაძლებლობის მქონე პირთა უფლებების დაცვის დღე აღნიშნება. ამ დღის მიზანია შშმ პირთა შესახებ საზოგადოების ცნობიერების ამაღლება და ამ პირთა უფლებრივ მდგომარეობაზე კიდევ ერთხელ ყურადღების გამახვილება. საქართველოს სახალხო დამცველის თანახმად, მიუხედავად იმისა, რომ გასულ პერიოდში სახელმწიფოს მიერ გარკვეული პოზიტიური ნაბიჯები გადაიდგა, ქვეყანაში ჯერ კიდევ პრობლემურია შშმ პირთა უფლებების სრული და ეფექტიანი დაცვა. ომბუდსმენი მოუწოდებს სახელმწიფოს, გადადგას ქმედითი ნაბიჯები ქვეყანაში შეზღუდული შესაძლებლობის მქონე პირთა უფლებების სათანადოდ რეალიზების, საზოგადოებრივი ცნობიერების ამაღლებისა და ინკლუზიური საზოგადოების ჩამოყალიბების უზრუნველსაყოფად. სრულად... წყარო: ombudsman.ge

თბილისი. სამოქალაქო საზოგადოების ორგანიზაციები ეხმიანებიან 12 ივნისს ტელეკომპანია „პირველი“-ს ეთერში გასულ სიუჟეტს, რომელიც 5 ივლისის ძალადობრივი მოვლენების დაგეგმვასა და აღსრულებაში სახელმწიფო უსაფრთხოების სამსახურის თანამშრომლების სავარაუდო მონაწილეობას აღწერს. „ამ დრომდე 2021 წლის 5 ივლისს მომხდარი მასობრივი ძალადობა საპოლიციო უმოქმედობისა და ჟურნალისტებისა და აქტივისტების დასაცავად სახელმწიფოს დემონსტრაციული პასიურობის განსაკუთრებულ შემთხვევად ფასდებოდა, თუმცა 12 ივნისს გასაჯაროებული ინფორმაცია ქმნის კიდევ უფრო სახიფათო და შემაშფოთებელ დაშვებას, რომ მასობრივი ძალადობის დაგეგმვისა და პროცესების მართვის უკან სახელმწიფო უსაფრთხოების სამსახური შესაძლოა იდგეს“. სრულად... წყარო: idfi.ge ფოტო: სოციალური სამართლიანობის ცენტრი

თბილისი. 14 ივნისი საქართველოში შეზღუდული შესაძლებლობების მქონე პირთა უფლებების დაცვის დღეა. სოციალური სამართლიანობის ცენტრი წარმოგიდგენთ ანალიტიკურ დოკუმენტს - საქართველოს ფსიქიკური ჯანმრთელობის ახალი სტრატეგია - მნიშვნელოვანი რეფორმების წინაპირობა? დოკუმენტის მიზანია, შეაფასოს ფსიქიკური ჯანმრთელობის ახალი სტრატეგიის  შინაარსი, ასევე, აღნიშნული ინსტრუმენტით სახელმწიფოს მიერ აღებული ვალდებულებების არსი და გასცეს პასუხი კითხვას, თუ რამდენად შეიძლება იყოს სტრატეგიის დოკუმენტი ფსიქიკური ჯანმრთელობის სფეროში მნიშვნელოვანი გარდაქმნების განხორციელების წინაპირობა. სრულად... წყარო: socialjustice.org.ge

თბილისი. „საერთაშორისო გამჭვირვალობა - საქართველო“ (TI Georgia) აქვეყნებს 2021 წლის ანგარიშს, სადაც ორგანიზაცია გაწეული სამუშაოების და მნიშვნელოვანი მოვლენების შესახებ გიყვებათ. სრულად... წყარო: transparency.ge

ქვემო-ქართლი. ევროკავშირის მიერ მხარდაჭერილი პროექტის „ეს წალკაა“ ფარგლებში, რომელსაც კავკასიის გარემოსდაცვითი არასამთავრობო ორგანიზაციების ქსელი (CENN) ახორციელებს პარტნიორ ორგანიზაციებთან ერთად, წალკაში ფესტივალი გაიმართა. ფესტივალი ორგანიზებული იყო საქართველოს ფერმერთა ასოციაციის, CENN-ისა და წალკის ადგილობრივი განვითარების ჯგუფის მიერ. ფესტივალის მიზანი იყო წალკის მუნიციპალიტეტის შესახებ ცნობიერების ამაღლება. ფესტივალმა უზრუნველყო ახალგაზრდების, ადგილობრივი მეწარმეების, სახელმწიფო სტრუქტურების წარმომადგენლების, ორგანიზატორებისა და სხვა სტუმრების წალკაში, ერთ სივრცეში შეკრება და გამოცდილებისა და ცოდნის გაზიარება. სრულად... წყარო: eu4georgia.eu

14 ივნისს, 15:00 საათზე, „საქართველოს დემოკრატიული ინიციატივა“ (GDI) და „სოციალური სამართლიანობის ცენტრი“ (SJC), სამოქალაქო საზოგადოების ინიციატივის „გადადგი ნაბიჯი ევროპისკენ“ ფარგლებში მართლმსაჯულების საკითხებზე საჯარო დისკუსიას გამართავს. სრულად... მისამართი: თბილისი, საქართველოს უნივერსიტეტის IV კორპუსი, მე-5 სართული #519 ოთახი.

14 ივნისს, 12:00 საათზე, სასტუმრო რუმსში (დარბაზი „გარდენ ჰოლი“), „ევროპის ფონდის“ კვლევის - „საქართველოს მედია გარემოს შეფასება, 2021“ პრეზენტაცია გაიმართება. მისამართი: თბილისი, მ. კოსტავას #14

14 ივნისს, 15:30 საათზე, დუშეთში, ცენტრალურ პარკში ევროკავშირის მიერ მხარდაჭერილი პროექტის „სამოქალაქო საზოგადოების ინიციატივა“ ფარგლებში, განათლების განვითარების და დასაქმების ცენტრის (EDEC) და მცხეთა-მთიანეთის რეგიონული ჰაბის ორგანიზებით, მოხალისეობის რეგიონული ფორუმი გაიმართება. სრულად...

თბილისი. საქართველოს პოლიტიკის ინსტიტუტი (GIP) აქვეყნებს ნინო სამხარაძის ბლოგპოსტს: საზოგადოების მხარდაჭერა ევროინტეგრაციის მიმართ: რა ელის საქართველოს კანდიდატის სტატუსს მიღმა. „მაშინ, როცა ორ კვირაზე ნაკლებ დროში მოსახლეობა ბრიუსელიდან ისტორიულ გადაწყვეტილებას ელის, საზოგადოების სტაბილური მხარდაჭერა ევროინტეგრაციული პროცესის მიმართ არაერთი საფრთხის წინაშე დგება. ეს საფრთხეები კიდევ უფრო მომძლავრდება იმ შემთხვევაში, თუ საქართველო შესაძლებლობების ამ კონკრეტული ფანჯრის მიღმა დარჩება. ახლა საქართველოსთვის სასიცოცხლოდ მნიშვნელოვანია კანდიდატის სტატუსის მინიჭება, რათა შენარჩუნდეს და გაძლიერდეს საზოგადოებრივი მობილიზაცია სამომავლო დემოკრატიული რეფორმებისთვის ბრძოლისთვის“. სრულად... წყარო: gip.ge

სამეგრელო-ზემო სვანეთი. განათლების განვითარებისა და დასაქმების ცენტრის (EDEC) და სამეგრელო-ზემო სვანეთის რეგიონული ჰაბის „ათინათის“ ორგანიზებით, 24 ივნისს, 14:00-18:00 საათამდე, ზუგდიდში, ტექნოპარკში (ლაღიძის ქუჩა #2) გაიმართება მოხალისეობის რეგიონული ფორუმი 2022. „ფორუმის მასშტაბებიდან გამომდინარე ვიწვევთ მოხალისეებს (ასაკი შეზღუდული არ არის!), რომლებიც დაეხმარებიან ფორუმის საორგანიზაციო გუნდს. მსურველებს შეუძლიათ გამოთქვან მზაობა პოსტის კომენტარების სახით 2022 წლის 17 ივნისის ჩათვლით. ფორუმის მიზანი არის მოხალისეობის კულტურის პოპულარიზება და სამოქალაქო საზოგადოების გაძლიერება. ფორუმი იმართება პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში, რომელიც ხორციელდება ევროკავშირისა (EU) და კონრად ადენაუერის ფონდის (KAS) მხარდაჭერით“. სრულად...  წყარო: ჰაბის გვერდი სოციალურ ქსელში

თბილისი. ორგანიზაცია „ კივიტას გეორგიკა“ გიზიარებთ ბავშვზე ფიზიკური და ემოციური ძალადობის ნიშნების შესახებ ინფორმაციას. ინფოგრაფიკა მომზადებულია პროექტის „საქართველოსა და სომხეთში მშობლების მიგრაციით გამოწვეული გავლენის შემცირების“ ფარგლებში; პროექტი ხორციელდება შვეიცარიის განვითარებისა და თანამშრომლობის სააგენტოს (SDC) ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 7-9 ივნისს, თბილისში, ევროკავშირის გლობალურმა ინიციატივამ „ფულის გათეთრებისა და ტერორიზმის დაფინანსების წინააღმდეგ ბრძოლის“ შესახებ (AML/CFT Global Facility) რეგიონული ღონისძიება გამართა. „ღონისძიების მთავარი საკითხი იყო - უკრაინაში რუსეთის შეჭრის გავლენა აღმოსავლეთ პარტნიორობის ქვეყნებში მოქმედ არასამთავრობო ორგანიზაციებზე, ფულის გათეთრებისა და ტერორიზმის დაფინანსების წინააღმდეგ ბრძოლის ინიციატივების ჭრილში. რეგიონულ შეხვედრაზე მომხსენებლებმა და მონაწილეებმა სამი დღის განმავლობაში განიხილეს რა გამოწვევები წარმოიშვა რეგიონში სამოქალაქო საზოგადოების წევრებისთვის რუსეთის უკრაინაში შეჭრის შემდეგ, როგორ უნდა უპასუხონ არასამთავრობო ორგანიზაციებმა შექმნილ გამოწვევებს, როგორ უნდა განახორციელონ ჰუმანიტარული დახმარება და უზრუნველყონ გამჭვირვალობა“. სრულად... წყარო: idfi.ge

თბილისი. კავშირი „საფარი“ გვიზიარებს ინფორმაციას ბიჭებში პუბერტატის შესახებ. „პუბერტატი რამდენიმეწლიანი პროცესია, როდესაც ბავშვის სხეული ზრდასრულის სხეულად ტრანსფორმირდება. შესაძლოა, თქვენს ბავშვს ბევრი შეკითხვა ჰქონდეს პუბერტატზე, ან არ ჰქონდეს შეკითხვები, მაგრამ მაინც მნიშვნელოვანია, შევამზადოთ იმ სხეულებრივი ცვლილებებისთვის, რომელიც მას მოელის. ბავშვთა მიმართ სექსუალური ძალადობის შემთხვევაში, დაგვირეკე: 032 230 76 03 მომზადებულია „საფარის“ მიერ, გაეროს მოსახლეობის ფონდთან (UNFPA) პარტნიორობით, გაეროს ერთობლივი პროგრამის „გენდერული თანასწორობისთვის“ ფარგლებში, რომელიც ხორციელდება შვედეთის მთავრობის ფინანსური მხარდაჭერით“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიული კვლევებისა და განვითარების ცენტრის (CSRDG) ინფორმაციით, საქართველოს პრო ბონოქსელის დახმარებით ბიზნეს კომპანიებმა მოახერხეს CSR პროგრამებში ჩაერთოთ პრო ბონო სერვისები და სამოქალაქო სექტორთან თანამშრომლობით მნიშვნელოვანი სოციალური ცვლილებებისათვის მიეღწიათ. ორგანიზაციის ცნობით, ქსელის მუშაობის წლებში საზოგადოებრივი ორგანიზაციებისათვის 188 პრობლემა გადაიჭრა. პრო ბონო ქსელი დაფუძნდა CSRDG-ის მიერ და მის საქმიანობას მხარს უჭერს ევროკავშირი და კონრად ადენაუერის ფონდი (KAS). სრულად... წყარო: ორგანიზაციის გვერდი სოციალურ ქსელში

იმერეთი. ქუთაისის კულტურულ-ახალგაზრდულ ცენტრში საინფორმაციო შეხვედრა გაიმართა ქალთა ქონებრივი უფლებების შესახებ. „შეხვედრას ესწრებოდნენ ცენტრის 60+ ასაკის ქალთა კლუბის წევრები. „საფარის“ იურისტი იმერეთის რეგიონში, თეონა გოგლიჩაძე მათ ესაუბრა მემკვიდრეობის უფლებისა და მისი განხორციელების შესაძლებლობებზე. გარდა კანონმდებლობისა, შეხვედრაზე განიხილეს მემკვიდრეობის მიღების პრაქტიკა ჩვენს საზოგადოებაში - როცა, ჩვეულებრივ, ოჯახის ქონების მემკვიდრედ ბიჭი შვილები ითვლებიან. ასევე, ტრადიციები და ის კულტურული გამოწვევები, რის გამოც ქალებს ქონების ფლობისა და მემკვიდრეობის მიღების უფლება ეზღუდებათ“. სრულად... წყარო: sapari.ge

თბილისი. საქართველოს სტრატეგიისა და საერთაშორისო ურთიერთობების კვლევის ცენტრი აქვეყნებს ალექსანდრე რონდელის ლექციას, სადაც ის საუბრობს რუსეთის მცდელობაზე შეინარჩუნოს გავლენა კავკასიაზე და ხელი შეუშალოს რეგიონის ქვეყნებს შეურთდნენ ევროპულ და ევრო-ატლანტიკურ სტრუქტურებს. ორგანიზაციის ცნობით, ლექცია 2013 წელს, ჯორჯთაუნის უნივერსიტეტის ევრაზიის, რუსეთისა და აღმოსავლეთ ევროპის სწავლებათა ცენტრში გაიმართა. სრულად...  წყარო: ორგანიზაციის გვერდი სოციალურ ქსელში

თბილისი. საზოგადოებრივი ორგანიზაციები ეხმიანებიან ევროპული პარლამენტის კრიტიკული რეზოლუციის საპასუხოდ მმართველი პარტიის წარმომადგენლის განცხადებას, რომ საქართველომ უარი უნდა თქვას ევროკავშირის კანდიდატი ქვეყნის სტატუსზე, თუ მას უსამართლო პირობებით მიიღებს, რაც მოგვიანებით პრემიერ-მინისტრი ღარიბაშვილის მხრიდან ევროკავშირის კანდიდატი ქვეყნის სტატუსის სიმბოლურ მნიშვნელობაზე ხაზგასმით გაგრძელდა. „მიგვაჩნია, რომ მსგავსი ტიპის უპასუხისმგებლო და სახიფათო განცხადებები არამხოლოდ უკიდურესად აზარალებს ქვეყნის ევროინტეგრაციის პროცესს და ეწინააღმდეგება საქართველოს კონსტიტუციას, არამედ სერიოზული საფრთხის ქვეშ აყენებს საქართველოს მოსახლეობის აბსოლუტური უმრავლესობის გაცხადებულ ევროპულ არჩევანს“, ნათქვამია განცხადებაში. სრულად...  წყარო: rights.ge

თბილისი. სამოქალაქო ინიციატივა „გადადგი ნაბიჯი ევროპისკენ“ ევროპარლამენტის რეზოლუციას ეხმაურება. „გვსურს გამოვეხმაუროთ 9 ივნისს ევროპარლამენტის მიერ საქართველოზე მიღებულ რეზოლუციას და ერთი დღით ადრე გამართულ დებატებს, სადაც ყველა პოლიტიკური ჯგუფი ერთიანი იყო შეფასებაში, რომ საქართველოს მოქმედი მთავრობის პირობებში ჩვენს ქვეყანაში დემოკრატიის უკუსვლაა, თუმცა ამის მიუხედავად, ქართველი ხალხი იმსახურებს ევროპულ მომავალს. ამასთანავე, 9 ივნისს ევროპარლამენტის პოლიტიკური ჯგუფების ლიდერებმა ერთობლივ განცხადებაში, წევრი ქვეყნების მთავრობებს 23-24 ივნისს დაგეგმილი ევროპული საბჭოს უმნიშვნელოვანესი შეხვედრის წინ მოუწოდეს, რომ ევროკავშირის კანდიდატის სტატუსი მიანიჭონ უკრაინას და მოლდოვას, ხოლო საქართველო ცალკე მოიხსენიეს და მიმართეს, რომ „იმუშაონ საქართველოსთვის იმავე სტატუსის მინიჭებაზე, ქართველი ხალხის ლეგიტიმური მისწრაფებების შესასრულებლად“. ხელისუფლებამ, ანტიევროპული და ქვეყნისთვის საზიანო რეაქციების ნაცვლად, დაუყოვნებლივ უნდა წამოიწყოს ინკლუზიური პროცესი და შექმნას ძირეული რეფორმების განსახორციელებლად მოკლე დროში გაწერილი დღის წესრიგი, რომელიც რეზოლუციაში ასახული პრობლემების სწრაფ მოგვარებას უზრუნველყოფს. ასევე, გადადგას კონკრეტული ნაბიჯები იმის სადემონსტრაციოდ, რომ ასრულებს ქართველი ხალხის დაკვეთას, რომლის 80%-ზე მეტი წლების მანძილზე სტაბილურად უჭერს მხარს და ცალსახად და მკაფიოდ სურს ევროკავშირში ჩვენი ქვეყნის გაწევრიანება. ჩვენ, ჩვენის მხრივ, დაგროვილი ექპერტიზით და რეფორმების მზა კონცეფციებით მზად ვართ ხელი შევუწყოთ პროცესს, რომელიც ჩვენი ხალხის ევროპულ მომავალს და კანდიდატის სტატუსის მიღებას რეალისტურს გახდის“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველოს“ დახმარებით, ირანის მოქალაქემ თბილისის საქალაქო სასამართლოში დავა მოიგო. სასამართლოში ბენეფიციარის ინტერესებს იცავდა „უფლებები საქართველოს“ იურისტი მარიამ მაღრაძე IOM-ის პროექტის - „COVID-19“ და მიგრანტების საჭიროებები სამხრეთ კავკასიაში“ ფარგლებში, რომელიც ხორციელდება მოსახლეობის, ლტოლვილთა და მიგრაციის ბიუროს მხარდაჭერით. თუ ხართ მიგრანტი და მიგაჩნიათ, რომ საჭიროებთ იურიდიულ დახმარებას, დაუკავშირდით ორგანიზაციას: +995 577 28 22 77 სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) ინფორმაციით, 10 ივნისს, პირველი ინსტანციის სასამართლომ საქმეზე გამოაცხადა გადაწყვეტილება, რომლის მიხედვითაც სასამართლომ ეკა კვესიტაძის სამსახურიდან გათავისუფლება მიიჩნია კანონიერად და სამაუწყებლო კომპანიას დააკისრა მხოლოდ ნამუშევარი პერიოდის სახელფასო ანაზღაურების გადახდა. მოსარჩელეს კი სამაუწყებლო კომპანიის სასარგებლოდ დაეკისრა 25 000 ლარის გადახდა შრომითი ხელშეკრულების პირობების დარღვევის გამო, რაც გულისხმობდა ჟურნალისტის ახლადშექმნილ სამაუწყებლო კომპანიაში („მთავარი არხი“) მუშაობის გაგრძელებას. საიას პოზიციით, ორგანიზაციისთვის სრულიად მიუღებელია სასამართლოს მიერ გადაწყვეტილების გამოცხადებისას გაჟღერებული პოზიციები. მას შემდეგ, რაც მხარეს ჩაბარდება დასაბუთებული გადაწყვეტილება, მოსარჩელე მას გაასაჩივრებს სააპელაციო წესით. სრულად...  წყარო: gyla.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 9 ივნისი, არქივების საერთაშორისო საბჭოს (ICA) მიერ დაფუძნებული - „არქივების საერთაშორისო დღეა“. IDFI წარმოგიდგენთ ორგანიზაციის მიერ თავმოყრილ საარქივო დოკუმენტებს, ე.წ. „სტალინურ სიებს“, რომლის საფუძველზეც საქართველოში 3,600-ზე მეტი ადამიანი ემსხვერპლა რეპრესიებს, მათ შორის უმეტესობა გასამართლდა „პირველი კატეგორიით“ და მიესაჯა დახვრეტა და ქონების კონფისკაცია. საარქივო დოკუმენტები მოიცავს 1937 წლის 31 მაისიდან - 1938 წლის 12 სექტემბრამდე პერიოდს და მათში ჩამოთვლილია ის პირები, რომლებიც დაექვემდებარნენ დახვრეტას ან სხვადასხვა ვადით გადასახლებას. 13-დან 11 სიას უშუალოდ სტალინი აწერს ხელს. სრულად... წყარო: historyproject.ge

სამცხე-ჯავახეთი. 31 მაისს, ახალციხეში სამოქალაქო კამპანია ეს ქვეყანა შენია-ს ფარგლებში, ახალგაზრდებთან საჯარო შეხვედრა გაიმართა. შეხვედრაზე, გიორგი მშვენიერაძე, ნინო ზაუტაშვილი და მარიამ მჭედლიშვილი, ახალგაზრდებს ესაუბრნენ სამოქალაქო საზოგადოებაზე, სამოქალაქო ღირებულებებზე და საზოგადოებრივი ორგანიზაციების საქმიანობაზე. შეხვედრაზე ასევე გამოცხადდა უკვე ტრადიციული კონკურსი „ეს ქვეყანა შენია“, რომლის მიზანია ახალგაზრდების სამოქალაქო პასუხისმგებლობის გაზრდა, აქტივიზმის ხელშეწყობა და ახალგაზრდების წახალისება ჩაერთონ ქვეყანაში სამოქალაქო საზოგადოების გაძლიერებაში. სამოქალაქო კამპანია „ეს ქვეყანა შენია“ მიმდინარეობს ევროკავშირისა და კონრად ადენაუერის ფონდის მხარდაჭერით, პროექტის „სამოქალაქო საზოგადოების ინიციატივა:  მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში. პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად - საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად...  წყარო: ორგანიზაციის გვერდი სოციალურ ქსელში