ქვემო ქართლი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, რუსთავის საქალაქო სასამართლოში მორიგებით დასრულდა სამსახურიდან უკანონოდ გათავისუფლებული, ხ.ჯ.-ს დავა და ა(ა)იპ ,,ქალაქ რუსთავის სახელოვნებო, სპორტისა და ახალგაზრდობის განვითარების ცენტრს“ ხ.ჯ.-ს გათავისუფლების გამო კომპენსაციის გადახდა დაეკისრა, 5 თვის ხელფასის ოდენობით. სრულად... წყარო: isfed.ge

თბილისი. საზოგადოებრივი ორგანიზაციები ეხმაურებიან ბათუმის მუნიციპალიტეტის მერიის ავტორობით საქართველოს სივრცითი დაგეგმარების, არქიტექტურულ და სამშენებლო კოდექსში ინიცირებულ ცვლილებებს პარლამენტში. „მივიჩნევთ, რომ საკანონმდებლო ცვლილებების პაკეტი შეიცავს ქალაქ ბათუმის ქაოტური განაშენიანების პრობლემის კიდევ უფრო გაუარესების საფრთხეს. ქმნის ბათუმის მერიის მიერ დაუსაბუთებელი, პოტენციურად კორუფციული გადაწყვეტილებების მიღების რისკებს; სამშენებლო სექტორს სამშენებლო კომპანიებისათვის განსაკუთრებული პრივილეგიების მინიჭების გზით სამშენებლო რეგულაციებიდან თავის არიდების საშუალებას აძლევს“. სრულად... წყარო: socialjustice.org.ge

თბილისი. საქართველოს სტრატეგიისა და განვითარების ცენტრმა (GCSD) განვითარებისა და დიპლომატიის ინსტიტუტთან თანამშრომლობის მემორანდუმი გააფორმა. მემორანდუმი მიზნად ისახავს აკადემიური პროგრამების, სასწავლო კურსებისა და კვლევითი პროექტების დანერგვას, ასევე ექსპერტების გაცვლას სხვადასხვა აკადემიური ღონისძიების ფარგლებში. სრულად... წყარო: ორგანიზაციის გვერდი სოციალურ ქსელში

კახეთი. საქართველოს სამოქალაქო განვითარების ასოციაცია - საგა-ს ინფორმაციით, 21 ივნისს, ქალაქ თელავში, დასაქმების  ფორუმი გაიმართა.                                   ფორუმზე 35 მცირე, საშუალო და მსხვილი კომპანია იყო წარმოდგენილი 120-მდე ვაკანსიით, დასაქმებისა და სტაჟირებისათვის. დასაქმების ფორუმი ჩატარდა ევროკავშირის დაფინანსებით და მისი ორგანიზატორები იყვნენ საქართველოს სტრატეგიული კვლევებისა და განვითარების ცენტრი  (CSRDG), კახეთის სამხარეო განვითარების ცენტრი / Kakheti Area Development Center-KADC, პროექტი „უნარების გაძლიერება და დასაქმების ინოვაციური შესაძლებლობები საქართველოს რეგიონული განვითარებისთვის“, Education Development and Employment Center (EDEC), თელავის განათლების, განვითარების და დასაქმების ცენტრი (TEDEC), პროექტი „სწავლა, წვრთნა, მიღწევა და კავშირების დამყარება დასაქმებისთვის! (ისწავლე დასაქმებისთვის!) LEARN“, დასაქმების ხელშეწყობის სახელმწიფო სააგენტო  (SESA). სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი  წარმოგიდგენთ ახალ სამაგიდო კვლევას „სისტემური მედიამრავალფეროვნება“. „კვლევა ეფუძნება რამდენიმე საერთაშორისო მედიასაშუალების სტრატეგიული დოკუმენტების ანალიზს და მასში მიმოხილულია ის საუკეთესო პრაქტიკა, რაც ამ მედიასაშუალებებს მრავალფეროვნების მიმართულებით აქვთ, როგორც მედიაგაშუქების, ისე ორგანიზაციული მოწყობის მიმართულებით. კვლევის მიზანია შექმნას რეფლექსიის სივრცე საქართველოში მომუშავე მედიაპროფესიონალებისთვის, რათა ეთნიკური, რელიგიური, და ენობრივი მრავალფეროვნება გახდეს არა ერთჯერადი, არამედ მუდმივად განახლებადი ინიციატივა“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) საქართველოს ეროვნულ მუზეუმში მკვლევართა დაშვების წესს საკონსტიტუციო სასამართლოში ასაჩივრებს. საია-მ ეკატერინე კიკნაძის სახელით კულტურის, სპორტისა და ახალგაზრდობის მინისტრის წინააღმდეგ კონსტიტუციური სარჩელით საკონსტიტუციო სასამართლოს მიმართა. გასაჩივრებული ნორმა განსაზღვრავს საქართველოს ეროვნულ მუზეუმში კვლევითი საქმიანობის მიზნებისთვის მკვლევართა დაშვების წესს. კერძოდ, ეროვნული მუზეუმის სამუზეუმო ფონდებში კვლევითი საქმიანობის მიზნებისთვის დაინტერესებულ პირთა დაშვება შესაძლებელია მუზეუმის დირექტორატის გადაწყვეტილებით, რომელიც უნდა ეცნობოს სამინისტროს. სრულად... წყარო: gyla.ge

გურია. 20 ივნისს „ახალგაზრდა პედაგოგთა კავშირის“ ორგანიზებით ჩატარდა კვლევის - „მშობლების შრომით მიგრაციის ზეგავლენა მათი არასრულწლოვანი შვილების აღზრდისა და განვითარების ფაქტორებზე“ საბოლოო ანგარიშის პრეზენტაცია. „შეხვედრაზე დამსწრე აუდიტორია შეთანხმდა, რომ კვლევის რეკომენდაციების შემუშავების მიზნით შეიქმნება სამუშაო ჯგუფი, რომელიც ასევე ჩაერთვება შემუშავებული რეკომენდაციების ადვოკატირების პროცესებში. კვლევის ანგარიში უახლოეს მომავალში გამოქვეყნდება ორგანიზაციის ვებ-გვერდზე. კვლევა განხორციელდა „ახალგაზრდა პედაგოგთა კავშირის“ მიერ   პროექტის „უკეთესი მომავლისთვის“ ფარგლებში ორგანიზაცია Brot für die Welt-ის ფინანსური მხარდაჭერით“. სრულად... წყარო: ორგანიზაციის გვერდი სოციალურ ქსელში

თბილისი. თუ ხართ შეზღუდული შესაძლებლობის მქონე პირი და თვლით, რომ თქვენი უფლებები შეზღუდული შესაძლებლობის, გენდერული ან ეთნიკური ნიშნით ირღვევა, დაუკავშირდით კოალიციას დამოუკიდებელი ცხოვრებისთვის.: თბილისი: 591 06 02 02 აჭარა: 591 08 02 02 კახეთი: 591 02 06 06 სრულად... წყარო: ორგანიზაციის გვერდი სოციალურ ქსელში

სამეგრელო. 21 ივნისს, ზუგდიდში, „საერთაშორისო გამჭვირვალობა - საქართველოს“ წარმომადგენლებმა ტრენინგი ჩაატარეს თემაზე: „რუსული ეკონომიკური გავლენები საქართველოში - არსებული მითები და ღია მონაცემების საშუალებით სინამდვილის დადგენა“. „ტრენინგის მონაწილეები დეტალურად გაეცნენ ბიზნეს რეესტრის, სტატისტიკის ეროვნული სააგენტოს, ეროვნული ბანკის ღია მონაცემების ბაზებსა და სხვა ვებგვერდებს, რომელთა საშუალებითაც ისინი რუსეთზე ეკონომიკური დამოკიდებულების შესახებ გავრცელებული ინფორმაციის გადამოწმებას შეძლებენ“. ტრენინგი ჩატარდა წამყვანი საერთაშორისო ორგანიზაცია „საერთაშორისო მედიის მხარდაჭერის“ IMS (International Media Support) პროექტის ფარგლებში. სრულად... წყარო: ორგანიზაციის გვერდი სოციალურ ქსელში

22 ივნისს, 19:00 საათზე, ილიას სახელმწიფო უნივერსიტეტში კიევის ტარას შევჩენკოს სახელობის ეროვნული უნივერსიტეტის პროფესორი ელენა შევჩენკო წაიკითხავს საჯარო ლექციას თემაზე: „უკრაინის ურთიერთობა საერთაშორისო ორგანიზაციებსა და სამხედრო ალიანსებთან“. სრულად...

22 ივნისს, 18:00 საათზე, მშობლის სკივრის ორგანიზებით, გაიმართება პირდაპირი ჩართვა თემაზე: სავალდებულო ანალიზები ბავშვებისთვის. სრულად...

22 ივნისს, 11:00 საათზე, დემოკრატიის კვლევის ინსტიტუტი (DRI) სასტუმრო „თბილისი მარიოტში“ სამუშაო შეხვედრას გამართავს და შუალედურ ანგარიშს „უსაფრთხოების სექტორზე საპარლამენტო კონტროლის მნიშვნელობა და არსებული გამოწვევები“ წარადგენს. DRI-ის კვლევა ასევე მიმოიხილავს სუს-ის 2021 წლის საქმიანობის ანგარიშს. სამუშაო შეხვედრას დაესწრებიან პოლიტიკური პარტიისა და სამოქალაქო სექტორის წარმომადგენლები. მისამართი: თბილისი, შ. რუსთაველის #13

თბილისი. რონდელის ფონდი აქვეყნებს კახა გოგოლაშვილის ბლოგპოსტს: კანდიდატის სტატუსის მომლოდინე საქართველო ევროპულ პერსპექტივას მიიღებს, რაზე გვაქვს სანერვიულო. „აუცილებელია, რომ ჩვენმა მთავრობამ დაუყოვნებლივ აღიაროს ევროკომისიის მიერ წარმოდგენილი პირობები, გამოხატოს სრული მზადყოფნა მათი დაკმაყოფილებისთვის. იმ შემთხვევაში, თუკი მთავრობა მათ არ ეთანხმება, ნებისმიერი დისკუსიის გამართვა ამის გარშემო აზრს  მოკლებულია. ჯერ არ ყოფილა შემთხვევა, რომ ევროკომისიას გაემართოს მოლაპარაკებები პირობების შემსუბუქებასთან დაკავშირებით. ამიტომ, თუ მთავრობა არ ეთანხმება და უარს ამბობს იმუშაოს წაყენებული პირობების დასაკმაყოფილებლად, გამომდინარე ქვეყნის ევროპული ინტეგრაციის კონსტიტუციური ვალდებულებიდან, მან უნდა დათმოს საკუთარი უფლებამოსილება. ამის შემდგომ უნდა დაინიშნოს ახალი მთავრობა, რომელიც აიღებს პირობების შესრულების ვალდებულებას. ეს მინიმალისტური სცენარია, რომელიც არ გულისხმობს ახალ არჩევნებსა და ხელისუფლების ცვლილებას. ცვლილება, თუ ეს საჭირო გახდა, ძალიან სწრაფად უნდა განხორციელდეს და ახალმა მთავრობამ მყისიერად და ეფექტურად დაიწყოს ევროკომისიის პირობების შესრულებაზე მუშაობა“, ნათქვამია ბლოგპოსტში. სრულად... წყარო: gfsis.org.ge

სამეგრელო. საქართველოს ახალგაზრდა იურისტთა ასოციაცია (საია) ზუგდიდის ოფისი იცავდა  აფხაზეთიდან იძულებით გადაადგილებული  პირის ინტერესებს, რომელიც დევნილთა, ეკომიგრანტთა და საარსებო წყაროებით უზრუნველყოფის სააგენტოს ედავებოდა საცხოვრებლით დაკმაყოფილების საკითხზე. კერძოდ, მოსარჩელე ასაჩივრებდა იმ გადაწყვეტილებას, რომლითაც უარი უთხრეს საცხოვრებლის გადაცემაზე. სამივე ინსტანციის სასამართლოში დავა დევნილის სასარგებლოდ გადაწყდა. მოპასუხე მხარეს დაევალა ახალი აქტის გამოცემა, რომლითაც აფხაზეთიდან იძულებით გადაადგილებული  ოჯახი საცხოვრებელს მიიღებს. სრულად... წყარო: gyla.ge

თბილისი. სოციალური სამართლიანობის ცენტრი აქვეყნებს ნინო ხარატიშვილის სტატიას: ვინაა მშრომელი? - ვან დერ ლინდენი შრომის განსაზღვრების შესახებ. „მარსელ ვან დერ ლინდენი არის სოციალური მოძრაობების ისტორიის პროფესორი ამსტერდამის უნივერსიტეტში. იგი იყო საერთაშორისო სოციალური ისტორიის ასოციაციის პრეზიდენტი 2005 წლიდან 2020 წლამდე. დღეს ის იკავებს უფროსი მკვლევრის პოზიციას სოციალური ისტორიის საერთაშორისო ინსტიტუტში. თავის წიგნში „მსოფლიოს მშრომელები - ესეები გლობალური შრომის ისტორიისთვის“ ვან დერ ლინდენი გვთავაზობს შრომის ისტორიის ახლებურ, მოდერნიზაციის მიდგომისგან დაშორებულ გაგებას, რომელიც უნდა იყოს ინკლუზიური, დაცლილი ევროცენტრიზმისგან და მეთოდოლოგიური ნაციონალიზმისგან. იგი არ ცდილობს ამომწურავ პასუხებამდე მისვლას, არამედ გვიჩვენებს შრომის ისტორიის ახლებურ, ამბიციურ ინტერპრეტაციას გლობალურ პერსპექტივაში და სახავს ახალ ორიენტირებს დარგის მკვლევრებისთვის კაპიტალიზმში შრომის და შრომითი ურთიერთობების გადააზრებისთვის“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (GYLA) მხარს უჭერს საქართველოს ევროკავშირში გაწევრიანებას და მოუწოდებს ხელისუფლებას, ოპოზიციურ პარტიებსა და პასუხისმგებელ სახელმწიფო ინსტიტუტებს, გამოიყენონ ეს შანსი, სწრაფად და ეფექტიანად გაატარონ ევროკავშირის მიერ შემოთავაზებული რეფორმები კანდიდატის სტატუსის მოსაპოვებლად და ასოცირების ტრიოში კუთვნილი ადგილის დასაკავებლად. საია მზად არის, თავისი მანდატის ფარგლებში, აქტიურად ჩაერთოს რეფორმების განხორციელებაში და გაუზიაროს ყველა მონაწილეს წლების განმავლობაში დაგროვებული ცოდნა და გამოცდილება. სრულად... წყარო: gyla.ge

თბილისი. 18 ივნისს, მწერალთა სახლში, სოციალური სამართლიანობის ცენტრმა გამართა საჯარო დისკუსია - „რელიგია, პოლიტიკა, ყოველდღიურობა”. დისკუსიის მიზანი იყო მართლმადიდებელი ეკლესიის პოლიტიკური და სოციალური გავლენების შესახებ ნახევრად აკადემიური და საზოგადოებრივი განხილვების წახალისება. ვრცლად დისკუსიის შესახებ... წყარო: ორგანიზაციის გვერდი სოციალურ ქსელში

ინფორმაციის თავისუფლების განვითარების ინსტიტუტის (IDFI) წარმომადგენლებმა, ევრაზიის აკადემიური ანტიკორუფციული ქსელის ფარგლებში ორგანიზებული პოდკასტის (UNCHAINED podcast) ფარგლებში საქართველოში ანტიკორუფციული რეფორმების მდგრადობის საკითხი განიხილეს. „მიუხედავად იმისა, რომ საქართველო უკანასკნელი 15 წლის განმავლობაში იყო ლიდერი აღმოსავლეთ პარტნიორობის ქვეყნებში ანტიკორუფციული რეფორმების განხორციელების თვალსაზრისით, საქართველოს ანტიკორუფციული მაჩვენებლები უარესდება. სამოქალაქო საზოგადოება თანხმდება, რომ  მნიშვნელოვანია ანტიკორუფციული რეფორმების გაგრძელება და საერთაშორისო ორგანიზაციების რეკომენდაციების შესრულება.” სრულად... წყარო: ორგანიზაციის გვერდი სოციალურ ქსელში

მცხეთა-მთიანეთი. 14 ივნისს დუშეთში, ცენტრალურ სკვერში, განათლების განვითარების და დასაქმების ცენტრის და მცხეთა-მთიანეთის რეგიონული ჰაბის ორგანიზებით მოხალისეობის რეგიონული ფორუმი გაიმართა. ფორუმის მიზანია მოხალისეობის კულტურის პოპულარიზაცია, მოხალისეების მიმღებ ორგანიზაციებსა და მოხალისეობით დაინტერესებულ პირებს შორის კომუნიკაციის ხელშეწყობა, ახალგაზრდული საბჭოების როლისა და საქმიანობის პოპულარიზაცია. ასევე, საზოგადოებრივი ორგანიზაციების ცნობადობის გაზრდა საზოგადოებაში და სამოქალაქო აქტივიზმის პოპულარიზაცია. ფორუმს ესწრებოდა შტეფან მალერიუსი, რეგიონული პროგრამის „პოლიტიკური დიალოგი სამხრეთ კავკასია“ ხელმძღვანელი, კონრად ადენაუერის ფონდი.  საგამოფენო სივრცეში წარმოდგენილი იყო მცხეთა-მთიანეთის რეგიონის სათემო და სამოქალაქო საზოგადოების ორგანიზაციები. ფორუმზე მცხეთა-მთიანეთის მოხალისეობის კვირეულის საინიციატივო ჯგუფებმა საკუთარი აქტივობები წარადგინეს, გამოვლინდა საუკეთესო მოხალისეობრივი აქტივობა (წეროვნის დევნილთა დასახლების საინიციატივო ჯგუფი - მიუსაფარ ცხოველებზე ზრუნვა) და გადაეცათ 150 ევროს ღირებულების პრიზი. შეხვედრაზე გამოვლინდნენ ესეების კონკურსის „მოხალისეობა და აქტიური მოქალაქეობა“ გამარჯვებულები (ნატო გაბარაშვილი, საბა მანაქანაშვილი, დარეჯან ტურაშვილი), რომლებიც წიგნის ვაუჩერებით დაჯილდოვდნენ.  მცხეთა-მთიანეთის რეგიონულმა ჰაბმა საუკეთესო პარტნიორობისათვის სიმბოლური ჯილდო გადასცა ევროკავშირის სადამკვირებლო მისიის მცხეთის რეგიონულ ოფისს, სოფლად თემთა განვითარების სააგენტოსა და განათლების განვითარების და დასაქმების ცენტრს. ფორუმზე გაიმართა ახალგაზრდული კონკურსის „ეს ქვეყანა შენია“ პრეზენტაცია და ილიას სახელმწიფო უნივერსიტეტის პროფესორის გიორგი მელაძის საჯარო ლექცია თემაზე „სამოქალაქო აქტივიზმი“. ფორუმში მონაწილეობდნენ, მცხეთა-მთიანეთის  რეგიონში მოქმედი სათემო და სამოქალაქო საზოგადოების ორგანიზაციები, ახალგაზრდული საინიციატივო ჯგუფები, სამოქალაქო განათლების პედაგოგები, ახალგაზრდები, პროფესიული სასწავლებლები, დღის ცენტრები, რეგიონში მოქმედი საერთაშორისო ორგანიზაციები. მცხეთა-მთიანეთის რეგიონული ჰაბი განსაკუთრებულ მადლობას უხდის მოხალისებს,  რომლებმაც სრულიად უსასყიდლოდ მთელი დღის განმავლობაში  დაუღალავად იშრომეს და მნიშვნელოვანი წვლილი შეიტანეს ფორუმის წარმატებით განხორციელებაში. მოხალისეობის რეგიონული ფორუმი გაიმართა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად...  წყარო: პროექტის გვერდი სოციალურ ქსელში

21 ივნისს, 14:00 (CET) (საქართველოს დროით 16:00 საათზე) მიგრაციის პოლიტიკის განვითარების საერთაშორისო ცენტრის (ICMPD) თანამშრომლები, ყველა დაინტერესებული ორგანიზაციისთვის ჩაატარებენ საინფორმაციო საკონსულტაციო ონლაინ შეხვედრას. შეხვედრა შეეხება ევროკავშირის მიერ დაფინანსებული „განვითარებაზე მიგრაციის გავლენის გაძლიერება საქართველოში“ (STREAMinG) - პროექტის ფარგლებში გამოცხადებულ საგრანტო კონკურსთან დაკავშირებულ ტექნიკურ და ადმინისტრაციულ დეტალებს. შეხვედრაში მონაწილეობისთვის გთხოვთ გამოიყენოთ შემდეგი ბმული... საგრანტო კონკურსის შესახებ დეტალური ინფორმაცია, ხელმისაწვდომია ინგლისურ ენაზე, შემდეგ ბმულზე...

21 ივნისს, 12:00-დან 16:00 საათამდე, კახეთში, თელავის ვაჟა-ფშაველას სახელობის პროფესიულ სახელმწიფო დრამატულ თეატრში დასაქმების ფორუმი გაიმართება. სრულად...

იმერეთი. სოციალური სამართლიანობის ცენტრი გთავაზობთ ვიდეოს, სადაც საუბარი კიდევ ერთხელ შეეხება ჭიათურას და ამ რეგიონში მადნის მოპოვების შესახებ დისკუსიის განახლებას. რა მოხდა ითხვისში? როგორია ჭიათურაში მანგანუმის მოპოვების ისტორია, ბუნება და გეოგრაფია? როგორ ჩამოყალიბდა რეგიონში სოციალურად და ეკოლოგიურად უპასუხისმგებლო რეჟიმი? რა შეცვალა სპეციალური მმართველის დანიშვნამ და რა გამოსავალი არსებობს ამ მდგომარეობიდან? ორგანიზაცია მკვლევართან, გიორგი ცინცაძესთან ერთად პასუხებს გასცემს ამ კითხვებს. სრულად... წყარო: socialjustice.org.ge