2 ივნისს, 11:00 საათზე, პროექტის „სამოქალაქო საზოგადოების ინიციატივა“ ფარგლებში, იმერეთის რეგიონული ჰაბის - ადგილობრივი დემოკრატიის სააგენტო საქართველოსა (LDA) და განათლების განვითარებისა და დასაქმების ცენტრის (EDEC) ორგანიზებით ჩატარდება სამოქალაქო საზოგადოების რეგიონული ფორუმი. სრულად...

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, თბილისის საქალაქო სასამართლომ დააკმაყოფილა მოქალაქის სარჩელი, რომელის ინტერესებსაც ISFED იცავდა და ბათილად ცნო მისი გათავისუფლების შესახებ ბრძანება, ხოლო ა(ა)იპ „თბილისის საბავშვო ბაგა-ბაღების მართვის სააგენტო“-ს დააკისრა მოსარჩელის გათავისუფლებიდან სასამართლო გადაწყვეტილების აღსრულებამდე იძულებითი განაცდურის ანაზღაურება, ასევე, სამსახურში აღდგენის სანაცვლოდ კომპენსაციის გადახდა. თუ მიიჩნევთ, რომ სამსახურიდან პოლიტიკური ნიშნით გაგათავისუფლეს, დაურეკეთ ან მისწერეთ ორგანიზაციას: 0 800 100 143; info@isfed.ge სრულად... წყარო: isfed.ge

თბილისი. განცხადებაზე ხელმომწერი ორგანიზაციები - კავშირი „საფარი”, პარტნიორობა ადამიანის უფლებებისთვის (PHR) და სოციალური სამართლიანობის ცენტრი, ეხმიანებიან ნინოწმინდის მზრუნველობამოკლებულ ბავშვთა პანსიონის ყოფილ აღსაზრდელთა უფლების სისტემური დარღვევის უმძიმეს გამოცდილებას. ორგანიზაციები გამოხატავენ შეშფოთებას, რომ პანსიონატში შექმნილი კრიზისიდან 1 წლის შემდეგაც, ბავშვთა მიმართ ინსტიტუციური ძალადობის ფაქტებზე დაწყებულ გამოძიებას შედეგი არ მოჰყოლია და არც რელიგიური პანსიონების დეინსტიტუციონალიზების რეფორმის პროცესი დაწყებულა. ხელმომწერი ორგანიზაციები ნინოწმინდის პანსიონის 11 ბენეფიციარის ინტერესებს იცავენ გამოძიების წინაშე და სწორედ ამ საქმეებიდან გამომდინარე აფასებენ გამოძიების პროცესს. სრულად... წყარო: socialjustice.org.ge

გურია. საქართველოს გაეროს ასოციაციის ცნობით, 8 ივნისს, 10:30-დან 14:00 საათამდე, გურიაში, ოზურგეთის ფოლკლორის ცენტრში გაიმართება -  დასაქმების ფორუმი ოზურგეთში. ფორუმის მიზანია ხელი შეუწყოს ახალგაზრდების, იძულებით გადაადგილებული პირების, სამუშაო გამოცდილების არმქონე, ხანგრძლივი პერიოდის განმავლობაში უმუშევარ პირებისა და სხვა მოწყვლადი ჯგუფების დასაქმებას. დასაქმების ფორუმი ტარდება ევროკავშირის დაფინანსებით და მისი ორგანიზატორები არიან ინოვაციებისა და ცვლილებების ინსტიტუტი (ICI) Institute for Change and Innovation • ინოვაციების და ცვლილებების ინსტიტუტი, პროექტი „უნარები დასაქმებისა და თანამშრომლობისთვის - პერსპექტივები საქართველოს რეგიონებისთვის (SECTORs)“,  განათლების განვითარების და დასაქმების ცენტრი (EDEC) Education Development and Employment Center პროექტი „სწავლა, წვრთნა, მიღწევა და კავშირების დამყარება დასაქმებისთვის! (ისწავლე დასაქმებისთვის!) LEARN“; საქართველოს გაეროს ასოციაცია (UNAG) UNA Georgia პროექტი „ცოდნისა და უნარების განვითარების ქსელებისა და პლატფორმების გაძლიერება (LINKS)”; დასაქმების ხელშეწყობის სახელმწიფო სააგენტო (SESA) დასაქმების ხელშეწყობის სახელმწიფო სააგენტო. თუ ხართ სამუშაოს მაძიებელი და გსურთ ფორუმში მონაწილეობა გაიარეთ რეგისტრაცია ბმულზე... წყარო: ორგანიზაციის გვერდი სოციალურ ქსელში

აჭარა. „საერთაშორისო გამჭვირვალობა - საქართველოს” ინფორმაციით, ორგანიზაციის სამოქალაქო საბჭოებმა 14 მაისს აჭარის განათლების, კულტურისა და სპორტის სამინისტროს ხულოს მუნიციპალიტეტის სოფელ ბოძაურის საჯარო სკოლის შენობის რეაბილიტაციის მოთხოვნით მიმართეს. სკოლას სჭირდება სპორტული და სამკითხველო დარბაზები, სტანდარტების შესაბამისად მოწყობილი შშმ პირთა შესასვლელი, კომპიუტერული კლასისა და ლაბორატორიების განახლება. ორგანიზაციამ 27 მაისს სამინისტროსგან მიიღო წერილი, რომ 2023 წლის ბიუჯეტის დაგეგმვისას აღნიშნული საჭიროებების გადაჭრის საკითხს გაითვალისწინებს. საერთაშორისო გამჭვირვალობა - საქართველო მიესალმება სამინისტროს პოზიციას და მოუწოდებს მას, საპროექტო წინადადების მომზადების პროცესში მაქსიმალურად ჩართონ სკოლის ადმინისტრაცია და ადგილობრივი თემი. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველო“ უფასო სამართლებრივ დახმარებას სთავაზობს გენდერული და ოჯახში ძალადობის მსხვერპლებს. სამართლებრივი დახმარებისათვის შეგიძლიათ დაუკავშირდეთ ორგანიზაციას ცხელ ხაზზე: 577541655, ან მიმართოთ ოფისებს შემდეგ რეგიონებში: კახეთი, ზემო იმერეთი, რაჭა-ლეჩხუმ-ქვემო სვანეთი. სრულად... სამართლებრივი დახმარება ხორციელდება პროექტის  „გენდერული და ოჯახში ძალადობის მსხვერპლთა მხარდაჭერა“ ფარგლებში, ევროკავშირისა და ASB საქართველოს მხარდაჭერით. წყარო: ორგანიზაციის გვერდი სოციალურ ქსელში

თბილისი. ბავშვთა ჰოსპისი „ციცინათელა“ გაზის ტარიფის მოსალოდნელ გაძვირებას ეხმაურება. ჰოსპისი დიდი ხანია წუხს და აჟღერებს ინფორმაციას, რომ კომუნალურ გადასახადებს ბიზნესის ტარიფით იხდის, რადგან კანონის თანახმად, არაკომერციული იურიდიული პირი ბიზნესთანაა გათანაბრებული. „არ დაგვიტოვებია არცერთი სახელმწიფო ინსტიტუცია, ვისაც ეს ეხება და არ მივმართეთ. თუ არ მოხდება აღნიშნული ტარიფის გადახედვა საქველმოქმედო სტატუსის მქონე ორგანიზაციებისთვის (შშმ პირთა დღის ცენტრები, ოჯახური ტიპის საცხოვრისები და სხვა), სამწუხაროდ უმეტესი ნაწილი ვერ შეძლებს ფუნქციონირებას“, ნათქვამია განცხადებაში. სრულად... წყარო: ჰოსპისის გვერდი სოციალურ ქსელში

თბილისი. საქართველოს სახალხო დამცველი აქვეყნებს განცხადებას ბავშვთა დაცვის საერთაშორისო დღესთან დაკავშირებით. განცხადების თანახმად, ქვეყანაში ბავშვის უფლებების სათანადო დაცვის უზრუნველყოფის მიზნით, აუცილებელია: ბავშვთა კეთილდღეობაზე ორიენტირებული მხარდამჭერი პროგრამებისა და სერვისების ეფექტიანობის გაზრდა, დამატებითი მიზნობრივი პროგრამების შემუშავება და მათი გეოგრაფიული ხელმისაწვდომობის უზრუნველყოფა; დეინსტიტუციონალიზაციის პროცესის დროული და ეფექტიანი წარმართვა, რომლის ფარგლებშიც თითოეული ბავშვისთვის უზრუნველყოფილი იქნება ოჯახთან მაქსიმალურად მიახლოებული და უსაფრთხო გარემო. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაცია აქვეყნებს განცხადებას ბავშვთა დაცვის მსოფლიო დღესთან დაკავშირებით. „ეს დღე დამატებით კიდევ ერთი შეხსენებაა სახელმწიფოსთვის იმ ქმედითი ნაბიჯების გადადგმის აუცილებლობაზე, რომელიც ბავშვთა უფლებების მაღალი სტანდარტით დაცვას უზრუნველყოფს“. სრულად... წყარო: gyla.ge

თბილისი. პლატფორმა „მშობლის სკივრის“ ინფორმაციით, მსოფლიო ჯანდაცვის ორგანიზაცია 31 მაისს აღინიშნავს დღეს - „მსოფლიო თამბაქოს გარეშე“. „ბავშვის ასაკისა და განვითარების დონის შესაბამისად, აუხსენით მათ, რომ თამბაქო იწვევს მიჩვევას და მასზე დამოკიდებულების ჩამოყალიბებას, რომ იგი აზიანებს ფილტვებს, გულს და სხეულის სხვა ნაწილებს. უარყოფით გავლენას ახდენს გარეგნობაზე, რადგან იწვევს ნაადრევი ნაოჭების გაჩენას და კბილების სიყვითლეს“. სრულად... წყარო: პლატფორმის გვერდი სოციალურ ქსელში

1 ივნისს, 17:00 საათზე, პლატფორმა „მშობლის სკივრის“ ორგანიზებით, ადვოკატები - ანა არგანაშვილი და ანა აბაშიძე, ისაუბრებენ თემაზე: ბავშვთა დაცვის მექანიზმები საქართველოში და მის ფარგლებს გარეთ. სრულად...

1 ივნისს, 11:00 საათზე სოციალური სამართლიანობის ცენტრი გიწვევთ კონფერენციაზე: „განათლების პოლიტიკის სისტემური გამოწვევები და არადომინანტური ეთნიკური ჯგუფები“. სრულად...

თბილისი. საქართველოს საკონსტიტუციო სასამართლომ 2022 წლის 20 მაისის განჩინებით არსებითად განსახილველად არ მიიღო საიას სარჩელი - „მაცაცო ტეფნაძე საქართველოს მთავრობის წინააღმდეგ“. „განმარტებიდან გამომდინარე, თითოეული ადმინისტრაციული ორგანო ვალდებულია, საჯარო მოხელის შეფასების მიზნით შექმნილი კომისიის გადაწყვეტილება მიიღოს შესაფასებელი მოხელის საქმიანობის სფეროს მცოდნე ექსპერტის/სპეციალისტის დახმარებით. წინააღმდეგ შემთხვევაში, მიღებული გადაწყვეტილება იქნება კონსტიტუციის საწინააღმდეგო“. ორგანიზაცია არ იზიარებს სასამართლოს არგუმენტს საქმის არსებითად განსახილველად მიუღებლობასთან დაკავშირებით. სრულად... წყარო: gyla.ge

თბილისი. ქართული საზოგადოების წარმომადგენლები, სამოქალაქო ინიციატივის „გადადგი ნაბიჯი ევროპისკენ“ ეგიდით ევროკავშირს ელჩს კარლ ჰარცელს შეხვდნენ და ევროკომისიის პრეზიდენტის სახელზე წერილი გადასცეს. წერილის ავტორები ურსულა ფონ დერ ლაიენს თხოვნით მიმართავენ, მხარი დაუჭიროს საქართველოს ევროკავშირში წევრობის კანდიდატობის განაცხადს, რამეთუ კანდიდატის სტატუსის მინიჭება ქართველი ხალხის ევროპული მისწრაფების აღიარება იქნება და დააჩქარებს ქვეყნის წინსვლას ყველა მნიშვნელოვანი მიმართულებით. „გამოვთქვამთ იმედს, რომ ივნისში საქართველო, მოლდოვასა და უკრაინასთან ერთად, ევროკავშირის კანდიდატი ქვეყნის სტატუსს მოიპოვებს და ამ სამი ქვეყნის ისტორიაში ამით ახალი ეტაპი დაიწყება“. სრულად... წყარო: transparency.ge

მცხეთა-მთიანეთი. 30 მაისს, „ფონდი ტასოს“ გუნდის წევრები დუშეთის მუნიციპალიტეტის მერს და მერიის წარმომადგენლებს შეხვდნენ. სამუშაო შეხვედრის მიზანი იყო დუშეთის მუნიციპალიტეტში ახალი სამიზნე თემების/სოფლების შერჩევა და გენდერული ბიუჯეტირების მიმართულებით სამომავლო გეგმების განსაზღვრა. პროექტი ხორციელდება გაეროს ქალთა ორგანიზაციასთან, კახეთის რეგიონალური განვითარების ფონდსა და ქეა საერთაშორისო კავკასიაში პარტნიორობით. პროექტის მხარდამჭერია შვეიცარიის განვითარების და თანამშრომლობისა (SDC) და ავსტრიის განვითარების თანამშრომლობის (ADC) სააგენტოების მიერ. სრულად... წყარო: ორგანიზაციის გვერდი სოციალურ ქსელში

თბილისი. „კოალიცია თანასწორობისთვის“ თბილისში ტრანსგენდერ ქალებზე ჯგუფური თავდასხმის ფაქტს ეხმაურება. ღამის საათებში ტრანსგენდერ ქალს სამი პიროვნება დაესხა თავს. ქალმა მოახერხა სახლში დაბრუნება. რამდენიმე წუთში კი საცხოვრებელთან 20-მდე ადამიანი შეიკრიბა, რომლებმაც ქვები და სხვადასხვა საგნები დაუშინეს სახლს, ტრანსგენდერ ქალებს და ბინის მეპატრონეს კი სიცოცხლის მოსპობით ემუქრებოდნენ. კოალიციის ინფორმაციით, შემთხვევის ადგილზე მისულმა პოლიციამ თავდამსხმელები შემთხვევის ადგილიდან განარიდა, თუმცა არ დაუკავებია. ასევე, მყისიერად არ მომხდარა საგამოძიებო მოქმედებების (გამოკითხვა, შემთხვევის ადგილის დათვალიერება და სხვა) ჩატარება. საგამოძიებო მოქმედებები მხოლოდ მედიის მიერ საქმის გაშუქებისა და უფლებადამცველების ჩართვის შემდეგ დაიგეგმა და ამ დრომდე გრძელდება. კოალიცია თანასწორობისთვის მოუწოდებს, საქართველოს შინაგან საქმეთა სამინისტროს და გენერალურ პროკურატურას: ეფექტურად გამოიძიოს ტრანსგენდერ ქალებზე თავდასხმის ფაქტი... უზრუნველყოს მსხვერპლი ქალების უსაფრთხოება და დაიცვას პოტენციური ძალადობისგან. გააძლიეროს სიძულვილით მოტივირებული დანაშაულების წინააღმდეგ ბრძოლის პოლიტიკა ამგვარი დანაშაულის ეფექტიანი და სისტემური პრევენციის მიმართულებით. სრულად... წყარო: www.equalitycoalition.ge

თბილისი. პლატფორმა „მშობლის სკივრის“ დღევანდელი პირდაპირი ჩართვის განმავლობაში ყურადღება დაეთმობა რეაბილიტაცია-ადაპტაციის ეროვნულ ცენტრსა და მის სერვისებს. კონკრეტულად, მოგეწოდებათ ინფორმაცია რეაბილიტაციის პროგრამაზე, ასევე, პროთეზების და ორთეზების მომსახურებაზე. სრულად... წყარო: პლატფორმის გვერდი სოციალურ ქსელში

ალბანეთი. 23-27 მაისს, ალბანეთში, ქალაქ ბერატში, ევროკავშირისა და კონრად ადენაუერის ფონდის ორგანიზებით, ისტორიკოსებს შორის დიალოგის პლატფორმის (Platform for Dialogue Between Historians) პირველი შეხვედრა გაიმართა. შეხვედრაზე განიხილეს ისტორიკოსის, როგორც მედიუმის როლი საზოგადოებასა და ხელისუფლებას შორის, გარდამავალი სამართლიანობის პერიოდში და იმ ქვეყნებში, რომლებსაც ტრავმული უახლესი წარსული აქვთ. აზერბაიჯანის, სომხეთისა და საქართველოს წარმომადგენლებმა ისაუბრეს საკუთარ და მეზობელ ქვეყნებში ისტორიის სახელმძღვანელოების რევიზიაზე, რათა შეფასდეს - როგორ არის წარმოჩენილი ზოგიერთი ისეთი საკითხი, რომელზეც ამ ქვეყნებს შორის საერთო აზრი არ არსებობს. ანტონ ვაჭარაძე შეხვედრაზე წარსდგა მოხსენებით - „საარქივო ღიაობა ყოფილ საბჭოთა რესპუბლიკებსა და აღმოსავლეთის ბლოკის ქვეყნებში“. სრულად... წყარო: idfi.ge

იმერეთი. ადგილობრივი დემოკრატიის სააგენტო საქართველომ (LDA Georgia) პროექტის „სამოქალაქო საზოგადოების ინიციატივა“ ფარგლებში სამიზნე მუნიციპალიტეტებში არსებული სამოქალაქო საზოგადოებრივი ორგანიზაციის წარმომადგენლებისა და აქტიური მოქალაქეებისათვის ჩაატარა ტრენინგი ადვოკატირების როლის, მნიშვნელობის, ეტაპებისა და მეთოდების  შესახებ. ტრენინგი ტარდება პროექტის „სამოქალაქო საზოგადოების ინიციატივის“ ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო საბიუჯეტო პარტნიორობის“ (IBP) გლობალური ანგარიშის მიხედვით, 2021 წლის „ღია ბიუჯეტის ინდექსში“ საქართველომ 100 შესაძლებელი ქულიდან 87 ქულა მიიღო, რაც 2019 წელთან შედარებით (81 ქულა), წინსვლაა. საერთაშორისო გამჭვირვალობა - საქართველოს ინფორმაციით, ამ მაჩვენებლით 120 ქვეყნის მსოფლიო რეიტინგში საქართველო პირველ ადგილზე გავიდა, მაშინ როდესაც 2019-ის კვლევის შედეგებით იგი მე-5 ადგილზე იყო. ორგანიზაციის ცნობით, საქართველოს კვლავ აქვს გამოწვევები საბიუჯეტო პროცესში მოქალაქეების ჩართულობის კუთხით. კერძოდ, 100 შესაძლებელი ქულიდან საბიუჯეტო პროცესებში მოქალაქეთა ჩართულობის უზრუნველყოფის მხრივ საქართველომ 44 ქულა (მსოფლიოში მე-4 ადგილი) მიიღო, ბიუჯეტზე ზედამხედველობის მხრივ კი - 74 ქულა (21-ე ადგილი). სრულად... წყარო: transparency.ge

რეგიონები. USAID-ის სამოქალაქო ჩართულობის პროგრამამ თებერვალში საქართველოს 5 რეგიონში (ქვემო ქართლი, კახეთი, შიდა ქართლი, იმერეთი, გურია) ჩაატარა ფოკუს ჯგუფის კვლევა იმ პრობლემების გამოსავლენად, რაც ხალხს ყველაზე მეტად აწუხებს განათლების, სოციალური დაცვისა და ჯანდაცვის სფეროებში. ჯანდაცვის სფეროში ყველაზე ხშირად დასახელებული პრობლემები იხილეთ სლაიდზე. ამ ეტაპზე, გამოცხადებულია საგრანტო კონკურსი, რომელიც კვლევისა და ადვოკატირების გზით ჯანდაცვის, განათლების და სოციალური დაცვის სფეროში პრიორიტეტული საკითხების მოგვარებას ისახავს მიზნად. სრულად... წყარო: პროგრამის გვერდი სოციალურ ქსელში

31 მაისს, 14:30 საათზე, ევროკავშირის ელჩს, კარლ ჰარცელს სამოქალაქო ინიციატივის „გადადგი ნაბიჯი ევროპისკენ“ წარმომადგენლები გადასცემენ ევროკავშირის კანდიდატის სტატუსის საქართველოსთვის მინიჭების შესახებ წერილს, რომლის ადრესატიც არის ევროკომისიის პრეზიდენტი, ურსულა ფონ დერ ლაიენი. წერილის გადაცემა შედგება მისამართზე: ჭავჭავაძის 64, (ევროკავშირის საელჩო საქართველოში)