28 თებერვალს, 12:00 საათზე, „საქართველოს რეფორმების ასოციაცია“ (GRASS) პრესკონფერენციას გამართავს. თემა: უკრაინაში მიმდინარე ომთან დაკავშირებულ დეზინფორმაციას, რომელიც Facebook-ზე ვრცელდება, Factcheck.ge გადაამოწმებს. მისამართი: თბილისი, დ. აღმაშენებლის გამზირი #189

თბილისი. საქართველოს სახალხო დამცველი და მისი აპარატი გმობს რუსეთის ღია, ფართომასშტაბიან აგრესიას დამოუკიდებელი, მშვიდობიანი და დემოკრატიული უკრაინის წინააღმდეგ. „რუსეთის მიერ უკრაინაში შეჭრა და შეიარაღებული კონფლიქტის დაწყება არის მიუღებელი აგრესიის აქტი, რომელიც არღვევს საერთაშორისო და ჰუმანიტარული სამართლის ნორმებს. ომი დამანგრეველია და იგი ნებისმიერ შემთხვევაში გამოიწვევს ადამიანის უფლებათა არნახული მასშტაბით დარღვევებს. ამ მძიმე წუთებში ჩვენ ვდგავართ მოძმე უკრაინელი ხალხის გვერდით და ვლოცულობთ მათთვის“.  სრულად... წყარო: ombudsman.ge

თბილისი. ადამიანის უფლებათა ცენტრმა გამოაქვეყნა ანგარიში: „კონფლიქტით დაზარალებული ეთნიკურად ოსი მოქალაქეების ქონებრივი რესტიტუციის და მოქალაქეობის დაბრუნების პროცესის სამართლებრივი ანალიზი“. „წინამდებარე ანგარიშში გამოკვეთილია ორი მნიშვნელოვანი პრობლემა, რაც უკავშირდება ეთნიკურად ოსი პირებისთვის საქართველოს მოქალაქეობის მინიჭების პროცესს და საქართველოს პარლამენტის მიერ 2006 წელს მიღებული კანონის - „ყოფილ სამხრეთ ოსეთის ავტონომიურ ოლქში კონფლიქტის შედეგად საქართველოს ტერიტორიაზე დაზარალებულთა ქონებრივი რესტიტუციისა და კომპენსაციის შესახებ“ აღუსრულებლობას“. ანგარიში... წყარო: hrc.ge

თბილისი. კოალიცია ინფორმაციის სანდოობისთვის, უკრაინაში მიმდინარე მოვლენებთან დაკავშირებით განცხადებას ავრცელებს. „არსებული გამოწვევების და საინფორმაციო ომის საფრთხის გათვალისწინებით, მივმართავთ საქართველოს ხელისუფლებას: 90 დღით შეუზღუდოს მაუწყებლობა ყველა პროპაგანდისტულ რუსულ სატელევიზიო არხს. საქართველოს პარლამენტმა მიიღოს უკრაინის მხარდამჭერი განახლებული რეზოლუცია და აღმასრულებელ დონეზე გადაიდგას უკრაინის მხარდამჭერი ქმედითი ნაბიჯები“. სრულად... წყარო: კოალიციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) სოლიდარობას უცხადებს უკრაინას. „უკრაინა რუსული აგრესიის მსხვერპლი კიდევ ერთხელ გახდა. რუსეთის ფედერაციის მიერ დაწყებული საომარი მოქმედებები უხეშად არღვევს საერთაშორისო სამართლის ნორმებს და ძირს უთხრის მშვიდობას არა მხოლოდ უკრაინაში, არამედ მთლიანად რეგიონსა და მსოფლიოში.“ ორგანიზაცია მოუწოდებს ხელისუფლებას ქმედითი ნაბიჯები გადადგას ეროვნული უსაფრთხოების მიმართულებით. სრულად... წყარო: ორგანიზაციის გვერდი სოციალურ ქსელში

კახეთი. სოციალური სამართლიანობის ცენტრი წარმოგიდგენთ პოდკასტების ციკლს „დაკარგული ხმები“. ორგანიზაცია ამ პოდკასტებში გვთავაზობს იმ სოციალური ჯგუფებისა და ადამიანთა ისტორიებს, რომელთა ხმები საზოგადოებას სუსტად, ან საერთოდ არ ესმის. „პოდკასტი პანკისის ხეობას და პანკისიდან მიგრირებულ ადამიანებს ეხება. ჩვენი სტუმრები არიან პანკისიდან ევროპის სხვადასხვა ქვეყანაში მიგრაციაში მყოფი ადამიანები. ამ ეპიზოდის მიზანია მოკლედ აღწეროს ბოლო წლებში პანკისში განვითარებული მოვლენები, ქარტეხილები და ახლანდელი რეალობა“. სრულად... წყარო: socialjustice.org.ge

თბილისი. საქართველოს პრო ბონო ქსელი 2015 წელს დაარსდა. ის საქართველოში მოქმედი იმ კომპანიების არაფორმალური გაერთიანებაა, რომლებიც საკუთარ ექსპერტიზასა და პროფესიულ რესურსს საზოგადოების საკეთილდღეოდ იყენებენ. პრო ბონო ქსელში 22 კომპანიაა გაწევრიანებული. ქსელი „საქართველოს სტრატეგიული კვლევებისა და განვითარების ცენტრის“ ინიციატივით დაარსდა და CSRDG მას შემდეგ საქმიანობის საექსპერტო და ადმინისტრაციულ მხარდაჭერას კოორდინირებს. პრო ბონო საქმიანობას მხარს უჭერს ევროკავშირი და კონრად ადენაუერის ფონდი (KAS). სრულად... წყარო: ორგანიზაციის გვერდი სოციალურ ქსელში

25 თებერვალს, 11:00 საათზე, ადამიანის უფლებათა ცენტრი ანგარიშის „კონფლიქტით დაზარალებული ეთნიკურად ოსი მოქალაქეების ქონებრივი რესტიტუციის და მოქალაქეობის დაბრუნების პროცესის სამართლებრივი ანალიზი“ ონლაინ პრეზენტაციას გამართავს. სრულად...

თბილისი. სოციალური სამართლიანობის ცენტრი სოლიდარობას უცხადებს უკრაინელ ხალხს. „სამწუხაროდ, არსებულმა გლობალურმა პოლიტიკამ ამ ომის შეკავება ვერ შეძლო და რუსეთის წინააღმდეგ დაანონსებული ეკონომიკური სანქციები საკმარისი ბერკეტი არ აღმოჩნდა ომის შესაჩერებლად. დღეს როგორც არასდროს მნიშვნელოვანია საერთაშორისო ორგანიზაციების და სახელმწიფოების კონსოლიდირება მშვიდობისთვის და რუსული სამხედრო ინტერვენციების დაუყოვნებელი შეჩერებისთვის ძირეული პოლიტიკური ნაბიჯების გადადგმა“. ორგანიზაცია მოუწოდებს საქართველოს ხელისუფლებას ამ პროცესში პრინციპული პოზიციები დაიჭიროს სუვერენული სახელმწიფოს და ხალხის ინტერესების დასაცავად და მიიღოს ყველა ჰუმანიტარული ზომა ომის მდგომარეობაში მყოფი ადამიანების მხარდასაჭერად. სრულად... წყარო: socialjustice.org.ge

საქართველო. 16-21 თებერვალს, ინფორმაციის თავისუფლების განვითარების ინსტიტუტმა (IDFI) ლანჩხუთის და ამბროლაურის მერიების, ასევე მათ დაქვემდებარებაში მყოფი იურიდიული პირების თანამშრომლებისთვის გამჭვირვალობის, ანგარიშვალდებულებისა და კეთილსინდისიერების საკითხებზე ონლაინ ტრენინგი ჩაატარა. „ტრენინგი მიზნად ისახავდა საჯარო მოხელეთა ცნობიერების ამაღლებას, აგრეთვე, ანტიკორუფციული მექანიზმების მიმართულებით მათი შესაძლებლობების გაძლიერებას“. სრულად... წყარო: idfi.ge

თბილისი. სოციალური სამართლიანობის ცენტრი წარმოგიდგენთ პოდკასტების ციკლს „დაკარგული ხმები“. ამ პოდკასტებში ორგანიზაცია გთავაზობთ იმ სოციალური ჯგუფებისა და ადამიანთა ისტორიებს, რომელთა ხმები საზოგადოებას სუსტად, ან საერთოდ არ ესმის. „დღევანდელი პოდკასტი ტრანსგენდერ ქალებს ეხება. ჩვენი სტუმარია ლიკა, ტრანსგენდერი ქალი, რომლის სახელი და ხმაც, ანონიმურობის დაცვის მიზნით, შეცვლილია. ვიმედოვნებთ, რომ ამ და მომდევნო პოდკასტებში გაჟღერებული ხმები და ისტორიები ერთი მხრივ, ადამიანებისთვის საკუთარი პრობლემებისა და წუხილების გაზიარების, მეორე მხრივ კი პოლიტიკის ცვლილებების ხელშემწყობი გახდება“. სრულად... წყარო: socialjustice.org.ge

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

იმერეთი. 26 თებერვალს, განათლების განვითარების და დასაქმების ცენტრი, მეტყველების განვითარებისა და კორექციის ცენტრთან „ლოგომედთან“ და ბაღდათის მუნიციპალიტეტის მერიასთან თანამშრომლობით, ბაღდათში ბავშვებსა და ზრდასრულებს უფასო გამოკვლევებს შესთავაზებს მეტყველების დარღვევათა სრული დიაგნოსტირებისთვის. სრულად... წყარო: ორგანიზაციის გვერდი სოციალურ ქსელში

აჭარა. თავისუფალ ჟურნალისტთა სახლმა ჭვანის ახალგაზრდული ცენტრის მოხალისეებისთვის კიდევ ერთი ახალი ონლაინ კურსი „სამოქალაქო საზოგადოება“ დაიწყო. კურსის მიზანია ახალგაზრდებში ცნობიერების ამაღლების ხელშეწყობა სამოქალაქო საზოგადოებასთან დაკავშირებულ საკითებზე. პირველ ონლაინ შეხვედრა ჩაატარა გამომცემელმა, ფილოლოგიის დოქტორმა და გადაცემა „ბიბლიოთეკას“ წამყვანმა, მარი კორინთელმა. სასაუბრო თემა იყო: მე და საზოგადოება, რა როლი გვაკისრია საზოგადოების ზრდასა და განვითარებაში. სრულად... წყარო: ორგანიზაციის გვერდი სოციალურ ქსელში

შიდა ქართლი. 22 თებერვალს „საზოგადოება ბილიკში“ შიდა ქართლის რეგიონული ჰაბის ფარგლებში ახალგაზრდული კლუბის წევრებისათვის ჩატარდა ტრენინგი თემაზე „ეფექტური კომუნიკაცია“. ტრენინგის მიზანი იყო ახალგაზრდების კომუნიკაციის უნარ-ჩვევების განვითარება და გაუმჯობესება. ტრენინგი განხორციელდა პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ (2021-2025) ფარგლებში. პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად - საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად... წყარო: ორგანიზაციის გვერდი სოციალურ ქსელში

თბილისი. „ფონდი ტასო“ სოლიდარობას უცხადებს უკრაინასა და უკრაინელ ხალხს. „ჩვენთვის ნებისმიერი ქვეყნის სუვერენიტეტისა და ტერიტორიული მთლიანობის საფრთხის წინაშე დაყენება ყოვლად მიუღებელია და ვგმობთ ყოველგვარ განზრახვას, რომელიც საფრთხეს უქმნის მსოფლიო მშვიდობასა და უსაფრთხოებას”. სრულად... წყარო: ორგანიზაციის გვერდი სოციალურ ქსელში

24 თებერვალს, 20:00 საათზე, MAC Georgia კონკურსის მონაწილეებს გიწვევთ Zoom შეხვედრაზე, რომელსაც ოჯახებისა და თემის სერვისების კოორდინატორი და კონკურსის ჟიურის წევრი - დიანა ჯანაშია გაუძღვება. სრულად...

24 თებერვალს, 19:00 საათზე, ანტიკორუფციული მოძრაობა საბჭოთა ოკუპაციიდან 101 წლის თავზე, რესპუბლიკის მოედნიდან ავტომობილების კოლონებით აწყობს მსვლელობას კოჯორში იუნკერთა მემორიალისკენ. მისამართი: თბილისი, რესპუბლიკის მოედანი (ყოფ. ვარდების მოედანი).

24 თებერვალს, 17:00 საათზე, გაიმართება ონლაინ შეხვედრა. თემა: როგორ გავაკეთოთ კარგი პიჩი. სრულად...

24 თებერვალს, 15:00 საათზე, გაიმართება ფილმის „სოლისტი“ ჩვენება. სრულად...

24 თებერვალს, 11:00 საათზე, სასტუმრო „რუმსში“ დემოკრატიის კვლევის ინსტიტუტი ანგარიშის „რელიგიური ორგანიზაციებისა და სასულიერო პირების წინასაარჩევნო პროცესში მონაწილეობის მონიტორინგი“ პრეზენტაციას გამართავს. მისამართი: თბილისი, მერაბ კოსტავას 14

24 თებერვალსს, 10:00 საათზე, ინფორმაციის თავისუფლების განვითარების ინსტიტუტი (IDFI) და სახელმწიფო ინსპექტორის სამსახური, ნიდერლანდების სამეფოს საელჩოს მხარდაჭერით, პროექტის „პერსონალურ მონაცემთა დაცვის მხარდაჭერა საქართველოში“ დახურვის ღონისძიებას გამართავს. მისამართი: თბილისი, კოსტავას ქ. 14, სასტუმრო „სტამბა“