შიდა ქართლი. 15 აპრილს, კასპის სკოლა გიმნაზიის საკლასო პროექტის – „ჯანსაღ სხეულში ჯანსაღი სულია!" ფარგლებში გიმნაზიის მე-10 კლასის მოსწავლეების ინიციატივითა და კასპის მუნიციპალიტეტის სპორტის დაწესებულებების გაერთიანების მხარდაჭერით, კასპის სკოლებს შორის ჩატარდა ჩემპიონატი კალათბურთში ვაჟებს შორის.
აღნიშნულ ტურნირში მონაწილეობა მიიღეს სოფლების დოესის, ქვემო ჭალის, კასპის მე-2 სკოლების და სკოლა გიმნაზიის გუნდებმა. შეჯიბრი საინტერესოდ წარიმართა. ფინალში ერთმანეთს კასპის სკოლა-გიმნაზიისა და ქვემო ჭალის გუნდები შეხვდნენ. გამარჯვებულს - სკოლა-გიმნაზიის გუნდს გარდამავალი თასი გადაეცა, ხოლო საუკეთესო მოთამაშეები საჩუქრებით დააჯილდოვეს.
ღონისძიება ჩატარდა პროგრამის „მომავლის თაობა" ფარგლებში, რომელსაც ახორციელებს PH International, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით და საქართველოს განათლებისა და მეცნიერების სამინისტროს მხარდაჭერით. შიდა ქართლის რეგიონში პროგრამის პარტნიორია საზოგადოება „ბილიკი".