EMC თამარ მეარაყიშვილისთვის ბრალდებების მოხსნას ეხმიანება
თბილისი. „ადამიანის უფლებების სწავლებისა და მონიტორინგის ცენტრი“ (EMC) de facto ცხინვალის დაქვემდებარებში მყოფი ახალგორის რაიონულმა სასამართლოს მიერ ახალგორელი აქტივისტის, თამარ მეარაყიშვილსთვის ყველა ბრალდების მოხსნას ეხმიანება.
„მიუხედავად ორი წლის განმავლობაში ფიზიკური და ეკონომიკური იზოლაციისა, შევიწროვებისა, გადაადგილების თავისუფლების შეზღუდვის და სხვა ფუნდამენტური უფლებების სისტემური დარღვევისა, თამარმა მეორედ შეძლო დაემტკიცებინა პროკურატურის ბრალდებების უსაფუძვლობა. ცხადია, de facto პროკურატურას რჩება ახალგორის სასამართლოს მიერ მიღებული გადაწყვეტილების ზემდგომ სასამართლო ინსტანციებში გასაჩივრების შესაძლებლობა. ამ მექანიზმს პროკურატურა გამოიყენებს თუ არა, ამ დრომდე უცნობია“, - აღნიშნულია გამოხმაურებაში, - „მნიშვნელოვანია, რომ ადგილობრივმა de facto ხელისუფლებამ შეწყვიტოს თამარის დევნის პრაქტიკა. არსებითია, თამარს დაუბრუნდეს პირადობის დამადასტურებელი დოკუმენტები და შეძლოს გადაადგილების თავისუფლებით სარგებლობა“.
წყარო: ორგანიზაციის ვებგვერდი
