სასამართლომ ბათუმის ბულვარში 19-სართულიანი სასტუმრო „ამბასადორის“ მშენებლობა არ შეაჩერა
თბილისი. 5 აპრილს გამართულ სხდომაზე, ბათუმის საქალაქო სასამართლომ არ დააკმაყოფილა „სოციალური სამართლიანობის ცენტრის“ (ყოფილი EMC) და “საზოგადოება ბათომის” მოთხოვნა, შეჩერებულიყო 19-სართულიანი (3 სართული - მიწის ქვეშ) სასტუმროს მშენებლობა კულტურული მემკვიდრეობის ძეგლის - ბათუმის ბულვარის - ტერიტორიაზე.
„სოციალური სამართლიანობის ცენტრში“ მიაჩნიათ, რომ ამ გადაწყვეტილებით სასამართლომ ვერ შეძლო საჯარო ინტერესის დაცვის სადარაჯოზე დადგომა, აღმასრულებელი ხელისუფლების თვითნებური გადაწყვეტილებების რეალური შეკავება და კონტროლი. „სოციალური სამართლიანობის ცენტრი“, “საზოგადოება ბათომის” სახელით, მიღებულ განჩინებას ქუთაისის სააპელაციო სასამართლოში გაასაჩივრებს.
წყარო: ორგანიზაციის ვებგვერდი
