სახალხო დამცველი გენერალური ინსპექციების მუშაობას კვლავ არაეფექტიანად მიიჩნევს
თბილისი. სახალხო დამცველი აცხადებს, რომ შინაგან საქმეთა სამინისტროს გენერალური ინსპექციისა და სპეციალური პენიტენციური სამსახურის მონიტორინგის დეპარტამენტის მუშაობა კვლავ არსებითი ხარვეზებით გრძელდება.
„საქმეთა ანალიზმა აჩვენა, რომ უფლებადარღვევის სავარაუდო ფაქტებზე სპეციალური პენიტენციური სამსახურის მონიტორინგის დეპარტამენტსა და შინაგან საქმეთა სამინისტროს გენერალურ ინსპექციაში სამსახურებრივი შემოწმება არაჯეროვნად ჩატარდა, რამაც ხელი შეუშალა განმცხადებლების მიერ მითითებული კანონდარღვევების შესწავლასა და გამოვლენას. საგამოძიებო უწყებების გენერალური ინსპექციები სრულფასოვნად არ იკვლევენ მოქალაქეთა საჩივრებს, სავარაუდო უფლებადარღვევის ფაქტების გამოსავლენად არ მოიპოვებენ ნეიტრალურ მტკიცებულებებს და ძირითად შემთხვევებში შემოიფარგლებიან მხოლოდ სავარაუდო კანონდამრღვევი თანამშრომლების გამოკითხვით, რომლებიც ცხადია, უარყოფენ მათი მხრიდან კანონის დარღვევის ფაქტებს“, - აღნიშნავს სახალხო დამცველი.
წყარო: ombudsman.ge
