თბილისი. ინფორმაციის თავისუფლების განვითარების ინსტიტუტმა ბლოგპოსტი - „შსს-ის მინისტრის Facebook გვერდის თავისებურებანი" - გამოაქვეყნა. „საქართველოს შინაგან საქმეთა მინისტრის, ალექსანდრე ჭიკაიძის Facebook-ის გვერდის გადახედვისას შეიმჩნევა მხოლოდ დადებითი შინაარსის კომენტარების სიჭარბის ტენდენცია. აღნიშნული ბოლო დროს განხილვების საფუძველიც გახდა სოციალურ ქსელებში. ჩვენ დავინტერესდით ამ ფაქტით და შევეცადეთ გადაგვემოწმებინა ამ კომენტარების ავტორების პერსონალური Facebook გვერდები. მონიტორინგმა აჩვენა, რომ დიდი ალბათობით, ეს მომხმარებლები ერთი ადამიანის ან ადამიანთა ჯგუფის მიერაა შექმნილი და მართული. ცხადი ხდება აგრეთვე ის, რომ კომენტარების დამწერთა უმეტესობა აღნიშნულ Facebook ანგარიშს პირადი ინტერესებისთვის არ იყენებს და მხოლოდ კონკრეტული მიზნებისთვის აქვს შექმნილი", ნათვამია ბლოგპოსტში.

წყარო: eparticipationge.wordpress.com