აჭარა. 5 ივნისს, ბათუმის თეატრთან, ორგანიზციების „არტ ვეისა" და „ცვლილებები თანაბარი უფლებებისათვის" – ინიციატივით სამოქალაქო აქცია გაიმართა, სახელწოდებით – „გახსენი პანდუსი". აქციის მიზანი გასულ კვირას დაფიქსირებული ფაქტის – შშმ პირის მიმართ დისკრიმინაციის – გაპროტესტება იყო. შეკრებილმა ახალგაზრდებმა საზოგადოებრივი ტრანსპორტის მძღოლებს თავიანთი ვალდებულების კეთილსინდისიერად შესრულებისკენ მოუწოდეს. ასევე, ავტობუსის მგზავრებს მიმართეს თხოვნით, სამომავლოდ თუ მძღოლის მხრიდან მსგავსი ქცევა განმეორდება ცხელ ხაზზე დაუყონებლივ დარეკონ და შეუერთდნენ შშმ პირების უფლებების დაცვის ადვოკატირების კამპანიას.