აჭარა. 26 სექტემბერს, მშვიდობის ფესტივალის ფარგლებში, ქობულეთის კინოთეატრში „მშვიდობის ბანაკის" შემაჯამებელი საღამო გაიმართა. ირაკლი კაკაბაძის პიესის მიხედვით, ახმეტელის თეატრის მსახიობებმა სპექტაკლი „დედა კურაჟი'' დადგეს. 5 დღის განმავლობაში სხვადასხვა ქვეყნის კონფლიქტებზე მომუშავე ახალგაზრდების დავალება პიესის ტრაგიკული დასასრულის შეცვლა და ოპტიმისტური გამოსავლის პოვნა იყო. მონაწილეებმა იდეები მოკლემეტრაჟიან ფილმებში ასახეს. საღამოზე 7 ფილმი უჩვენეს, მათგან კი პირველი სამი ადგილი სპეციალურად შერჩეულმა ჟიურიმ გამოავლინა. პროექტის ყველა მონაწილეს სერტიფიკატები გადაეცა. პროექტი ბავშვთა და ახალგაზრდობის განვითარების ფონდმა დააფინანსა.