თბილისი. საქართველოს ახალგაზრდა იურისტთა ასოციაციამ უზენაესი სასამართლოს პლენუმის მონიტორინგის ანგარიში მოამზადა.  „ანგარიშში პლენუმის საქმიანობის მარეგულირებელი ნორმებია შესწავლილი და საანგარიშო პერიოდში (2021 წლის იანვარი - 2022 წლის დეკემბერი) მათი იმპლემენტაციის მონიტორინგის შედეგად, ძირითადი ხარვეზებია გამოვლენილი. ასევე, შესაბამისი რეკომენდაციებია შემუშავებული“. სრულად... წყარო: gyla.ge

თბილისი. „ხელოვნება ცოცხალი და დამოუკიდებელია!“ - სამართლიანი არჩევნებისა და დემოკრატიის საერთაშორისო საზოგადოება (ISFED) არტისტ სანდრო სულაბერიძეს მხარდაჭერას უცხადებს. ორგანიზაცია მიიჩნევს, რომ სანდრო სულაბერიძის მიმართ ქურდობის მუხლით საქმის წარმოების დაწყება მიუღებელია და არტისტის გამოხატვის თავისუფლების ზღუდავს. სამართლიანმა არჩევნებმა კულტურის სამინისტროში მიმდინარე საკადრო წმენდის შესახებ ვიდეო მოამზადა, რომელშიც ყოფილი თანამშრომლები საკუთარი გამოცდილებას იხსენებენ. ფოტო... წყარო: ორგანიზაციის გვერდი სოციალურ ქსელში

თბილისი. სახალხო დამცველის აპარატმა 30-მდე შეტყობინება მიიღო სხვადასხვა საქონლისა და მომსახურების მიღებაზე საქართველოს მოქალაქეების წვდომის შეზღუდვის ფაქტებზე.  განცხადების თანახმად, განსაკუთრებით პრობლემური იყო შემთხვევა, როდესაც, სავარაუდოდ, ე.წ. სამაკლერო საქმიანობით დაკავებულმა პირმა ბათუმში ბინის გაყიდვის თაობაზე რუსულ ენაზე გამოქვეყნებულ განცხადებაში მიუთითა, რომ ბინა ქართველებზე არ გაიყიდება. „საქართველოს კანონმდებლობა მოქალაქეობის, ეროვნებისა თუ სხვა ნიშნით დისკრიმინაციას კრძალავს ყველა სფეროში, მათ შორის, კერძო სამართლებრივ ურთიერთობებში. ამდენად, საჯაროდ ხელმისაწვდომი შეთავაზებებით სარგებლობაზე უარი, არარაციონალური, დისკრიმინაციული საფუძვლებით, დაუშვებელია ქირავნობით საკითხებთან დაკავშირებითაც. სახალხო დამცველის აპარატი უძრავი ქონების აგენტებსა და მომსახურების გამწევ სხვა პირებსა თუ ორგანიზაციებს მოუწოდებს, თავი შეიკავონ ნებისმიერი ნიშნით დისკრიმინაციული მოპყრობისგან და საქმიანობა თანასწორობის პრინციპის დაცვით წარმართონ, მათ შორის, საბინაო სფეროშიც.  ამავე დროს, სახალხო დამცველის აპარატი მზად არის შეისწავლოს სავარაუდო დისკრიმინაციის ყველა შემთხვევა მსგავსი მომართვის და სავარაუდო დისკრიმინაციის ჩამდენი პირის იდენტიფიცირების შემთხვევაში“. სრულად... წყარო: ომბუდსმენის გვერდი სოციალურ ქსელში

იმერეთი. სამართლიანი არჩევნების და დემოკრატიის საერთაშორისო საზოგადოების ინფორმაციით (ISFED) ტყიბულის მაგისტრატმა სასამართლომ „სამართლიანი არჩევნების” დაცვის ქვეშ მყოფი კიდევ ერთი საჯარო მოხელის, ლელა კახიძის სასარჩელო მოთხოვნები სამსახურიდან გათავისუფლებისა და მოხელეთა რეზერვში ჩარიცხვის ბრძანებების ბათილად ცნობის შესახებ დააკმაყოფილა. ტყიბულის მუნიციპალიტეტის მერიას დაევალა გარემოებების სრულყოფილად შესწავლისა და გამოკვლევის საფუძველზე  გადაწყვეტილების მიღება. „სამართლიანი არჩევნები”, USAID სამართლის უზენაესობის პროგრამისა და ღია საზოგადოების ფონდის მხარდაჭერით, ახორციელებს სტრატეგიული სამართალწარმოების პროექტს, რომლის ფარგლებშიც უფასო იურიდიულ დახმარებას უწევს სამსახურიდან სავარაუდო პოლიტიკური  ნიშნით გათავისუფლებულ პირებს. განცხადება სრულად... წყარო: isfed.ge

თბილისი. საქართველოს სახალხო დამცველი ეხმიანება ბოლო დროს არასათანადო სახელფასო ანაზღაურებასთან დაკავშირებით სხვადასხვა სექტორში დასაქმებულ პირთა გახშირებულ საპროტესტო გამოსვლებს (სასწრაფო სამედიცინო დახმარების ექიმების და მძღოლების პროტესტი), (კომპანია „ბოლტის“, „ვოლტის“ და „გლოვოს“ კურიერების აქცია) და (ტელეკომპანია„ფორმულას“ ოპერატორების საპროტესტო აქცია).  მნიშვნელოვანია, დამსაქმებლებმა გააცნობიერონ, რომ შრომის ღირსეული ანაზღაურების უფლება შრომითი უფლების განუყოფელი ნაწილია და მასზე მნიშვნელოვნად არის დამოკიდებული ადამიანის ღირსეული ცხოვრება. გასათვალისწინებელია, რომ ევროპის სოციალური ქარტია, რომლის ხელშემკვრელ მხარეს წარმოადგენს საქართველოც, აღიარებს ყველა მუშაკის უფლებას, ჰქონდეს სათანადო სამართლიანი ანაზღაურება, რაც უზრუნველყოფს მათი და მათი ოჯახების ცხოვრების ღირსეულ დონეს. სრულად... წყარო: ომბუდსმენის გვერდი სოციალურ ქსელში

ქალთა მიმართ დისკრიმინაციის აღმოფხვრის კომიტეტის (CEDAW) წევრებსა და საქართველოდან, ქალთა უფლებებზე მომუშავე არასამთავრობო ორგანიზაციების წარმომადგენლებს შორის დახურული შეხვედრა ჩატარდა.  7 თებერვლის ოფიციალურ საჯარო შეხვედრაზე სამოქალაქო სექტორის წარმომადგენლებმა საქართველოში ქალთა უფლებების კუთხით არსებული გამოწვევების შესახებ ისაუბრა. წყარო: ქალთა საინფორმაციო ცენტრის გვერდი სოციალურ ქსელში

თბილისი. საზოგადოების ცნობიერების ამაღლების მიზნით, საგზაო უსაფრთხოებისა და წესების დაცვის აუცილებლობაზე, საქართველოს რეგიონული განვითარებისა და ინფრასტრუქტურის სამინისტრო, საქართველოს შინაგან საქმეთა სამინისტროსთან ერთად, იწყებს კამპანიას: „უკეთესი და უსაფრთხო გზები საქართველოსთვის“. ევროკავშირი ევროპის საინვესტიციო ბანკთან (EIB) ერთად მხარს უჭერს აღნიშნულ კამპანიას საქართველოში საგზაო შემთხვევების შემცირებისა და საგზაო უსაფრთხოების გაუმჯობესების მიზნით. სრულად... წყარო: www.eeas.europa.eu

თბილისი. ხელმომწერი ორგანიზაციები, კიდევ ერთხელ ეხმიანებიან საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობის უკიდურესად დამძიმებას. „მოვუწოდებთ სასამართლოს, გაითვალისწინოს დარგის სპეციალისტთა დასკვნები და უმოკლეს ვადაში, მიიღოს ადამიანის უფლებების სტანდარტების შესაბამისი გადაწყვეტილება. ასევე, მოვუწოდებთ საერთაშორისო თანამეგობრობას, გამოიყენონ მათ ხელთ არსებული ყველა საშუალება, რათა თავიდან იქნას აცილებული ადამიანის სიცოცხლისა და ჯანმრთელობისთვის მიყენებული გამოუსწორებელი ზიანი და საქართველოს სახელმწიფოს პოლიტიკური კოლაფსი“, ნათქვამია ერთობლივ განცხადებაში. ვრცლად… წყარო: idfi.ge

თბილისი. პარტნიორობა ადამიანის უფლებებისთვის (PHR) ცნობით, არსებობს მცდარი წინასწარი განწყობა და სტერეოტიპული შეხედულებები იმის შესახებ, რომ შშმ პირებზე განხორციელებული ძალადობა მათი ფანტაზიის ნაყოფია, რომ მათ არ შეუძლიათ ფაქტების სწორად აღქმა, ინფორმაციის დამახსოვრება-გადმოცემა... ამ სტერეოტიპებს სტატისტიკა და მეცნიერება არ ადასტურებს. „მიუხედავად იმისა, რომ სახელმწიფოს კანონმდებლობით ევალება ამ მცდარი სტერეოტიპების აღმოფხვრა და შშმ პირთათვის მართლმსაჯულების უფლებით დაუბრკოლებლად სარგებლობის უზრუნველყოფა, სისხლის სამართლის საპროცესო კოდექსში თავად გვთავაზობს დისკრიმინაციულ კანონის ნორმას. საქართველოს სისხლის სამართლის საპროცესო კოდექსის 50-ე მუხლის თანახმად: „არ შეიძლება გამოიკითხოს ან მოწმედ დაიკითხოს შეზღუდული შესაძლებლობის მქონე ის პირი, რომელსაც შესაძლებლობის შეზღუდვის გამო არ შეუძლია სწორად აღიქვას, დაიმახსოვროს და აღიდგინოს საქმისათვის მნიშვნელობის მქონე გარემოებები და მიაწოდოს ინფორმაცია ან მისცეს ჩვენება““. ორგანიზაცია იცავს შეზღუდული შესაძლებლობის მქონე დებს, ეკას და მაკას (სახელები შეცვლილია), რომლებიც ნათესავის მხრიდან სექსუალური ძალადობის მსხვერპლნი გახდნენ. წაიკითხეთ დების გამოცდილების შესახებ, რომლებსაც ფსიქოლოგიურ-ფსიქიატრიული ექსპერტიზა ჩაუტარდათ და სამწუხაროდ, დასკვნის თანახმად, ვერ გაირკვა გოგონებმა სექსუალური ძალადობის შედეგად განიცადეს თუ არა ტკივილი, აღიქვეს და გადმოსცეს თუ არა ფაქტები სწორად... წყარო: phr.ge

სამეგრელო. გაეროს ბავშვთა ფონდი ბავშვზე მორგებული ქალაქების ინიციატივის ფარგლებში, მხარს უჭერს ქალაქ ფოთის მერიას, რათა ფოთი ბავშვზე მორგებული ქალაქი გახდეს. 2 თებერვალს გაეროს ბავშვთა ფონდის წარმომადგენელი, ღასან ხალილი ქალაქ ფოთს ეწვია და გამართა შეხვედრები ქალაქის მერიის, მუნიციპალიტეტისა და საგანმანათლებლო დაწესებულებების თანამშრომლებთან, ბავშვებთან და სამოქალაქო საზოგადოების წარმომადგენლებთან. შეხვედრებზე განიხილეს ბავშვთა უფლებები, ასევე ის ნაბიჯები, რომელთა გადადგმის შემდეგაც ფოთი შეძლებს გახდეს ბავშვზე მეტად მორგებული ქალაქი. სრულად... წყარო: ორგანიზაციის გვერდი სოციალურ ქსელში

თბილისი. ქალთა საინფორმაციო ცენტრის ცნობით, ამერიკის შეერთებული შტატების სახელმწიფო დეპარტამენტმა ნინო ლომჯარიას და მის გუნდს ადამიანის უფლებათა დამცველის ყოველწლიური გლობალური ჯილდო გადასცა. „მადლობა, რომ მუშაობდით და მუშაობთ რომ, ააშენოთ დემოკრატიული სახელმწიფო, რომელიც „თანხვედრაშია მოქალაქეების ევროატლანტიკურ მისწრაფებასთან!“, აღნიშნულია განცხადებაში. სრულად... წყარო: ქსც-ის გვერდი სოციალურ ქსელში

კახეთი. „უფლებები საქართველოს“ და „ლელიანის ზრდასრულთა განათლების ცენტრის“ ინიციატივით, ლაგოდეხის მუნიციპალიტეტში ახალგაზრდებმა ეთნიკური უმცირესობების უფლებების დაცვის საინიციატივო ჯგუფი შექმნეს.  „საინიციატივო ჯგუფის მიზანია, ლაგოდეხის მუნიციპალიტეტში მცხოვრები ეთნიკური უმცირესობების საზოგადოებრივ-პოლიტიკურ ცხოვრებაში ინტეგრაცია და  უფლებების დაცვა. ამ მიზნით, ახალგაზრდები აქტიურად იმუშავებენ ეთნიკური უმცირესობების უფლებებთან დაკავშირებული პრობლემების იდენტიფიცირებაზე, დაგეგმავენ და განახორციელებენ სხვადასხვა ღონისძიებას და ინიციატივებს, მოამზადებენ პეტიციებს“.  ახალგაზრდული საინიციატივო ჯგუფი შეიქმნა ომისა და მშვიდობის გაშუქების ინსტიტუტის (IWPR) პროექტის ფარგლებში, რომელიც გაერთიანებული სამეფოს მთავრობის მხარდაჭერით ხორციელდება. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გიზიარებთ ანალიტიკურ დოკუმენტს, რომელშიც გაანალიზებულია საქართველოში ზეგანაკვეთური სამუშაოს მახასიათებლები და მის ანაზღაურებასთან დაკავშირებული პრაქტიკები. „კვლევამ ცხადყო, რომ მშრომელთა ყოველდღიურ საქმიანობაში სხვადასხვა ფორმით იკვეთება ზეგანაკვეთურ შრომასთან დაკავშირებული დარღვევები, რაც არსებით გავლენას ახდენს დასაქმებულთა უფლებრივ მდგომარეობაზე. ზეგანაკვეთური შრომის აუნაზღაურებლობის მასშტაბური ხასიათი და მისი უარყოფითი გავლენა მშრომელთა ცხოვრების ხარისხზე სახელმწიფოს მხრიდან ეფექტიან ღონისძიებებს საჭიროებს“. სრულად... წყარო: socialjustice.org.ge

თბილისი. ადამიანის უფლებათა ცენტრმა ანგარიშის პრეზენტაცია გამართა. ანგარიში „ადამიანის უფლებების მდგომარეობა საქართველოში, 2022“ აფასებს ადამიანის უფლებათა მდგომარეობას და მოიცავს საკვანძო მიმართულებებს ადამიანის უფლებათა ისეთ სფეროებში, როგორიც არის: კანონის წინაშე თანასწორობა, გამოხატვისა და სიტყვის თავისუფლება, სასამართლო სისტემა, ადამიანის უფლებები პენიტენციურ დაწესებულებებში, ოკუპაცია და მისი შედეგები ადამიანის უფლებრივ მდგომარეობაზე, მედიის თავისუფლების საკითხები, შშმ პირთა მდგომარეობა, LGBTQI+ პირთა უფლებები, ქალთა მიმართ ძალადობის, მათ შორის - ოჯახში ძალადობის ფაქტები, რელიგიურ და ეთნიკურ უმცირესობათა უფლებები, სიძულვილით მოტივირებული დანაშაულები და ა.შ. ანგარიშის მიზანია, შეაფასოს სახელმწიფოს სხვადასხვა უწყებების ქმედება ადამიანის უფლებათა დაცვის ჭრილში, როგორც პოზიტიური, ასევე, ნეგატიური ვალდებულებების ნაწილში, მათ შორის - მათი რეაგირების ხარისხი უფლებების დარღვევებზე, მართლმსაჯულების ეფექტიანობა და საკანონმდებლო თუ სისტემური ცვლილებები, რაც მიმართული უნდა იყოს საქართველოში ადამიანის უფლებების დაცვის საერთაშორისო სტანდარტების დამკვიდრებისკენ. იხ. ანგარიში... წყარო: hrc.ge

თბილისი. „უფლებები საქართველო“ უფასო სამართლებრივ დახმარებას სთავაზობს გენდერული და ოჯახში ძალადობის მსხვერპლებს. სამართლებრივი დახმარებისათვის შეგიძლიათ დაგვიკავშირდეთ ცხელ ხაზზე: 577541655, ან მიმართოთ ორგანიზაციის ოფისებს შემდეგ რეგიონებში: კახეთი: თელავის სამართლებრივი დახმარების ცენტრი (მის: არსენიშვილის №2) ზემო იმერეთი: ჭიათურის სამართლებრივი დახმარების ცენტრი (მის: წერეთლის №1) რაჭა-ლეჩხუმ-ქვემო სვანეთი: ამბროლაური სამართლებრივი დახმარების ცენტრი (მის: აღმაშენებლის №24) სამართლებრივი დახმარება ხორციელდება პროექტის „გენდერული და ოჯახში ძალადობის მსხვერპლთა მხარდაჭერა“ ფარგლებში, ევროკავშირისა და ASB საქართველოს მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) ინფორმაციით, მამინაცვალმა, რომელიც არასრულწლოვან გერზე წლების განმავლობაში სექსუალურად ძალადობდა, მის მიმართ სისხლის სამართლის გამამტყუნებელი განაჩენის დადგომამდე რამდენიმე დღით ადრე, გერისთვის ქონების წართმევა გადაწყვიტა. მან სასამართლოს ბინის ჩუქების ხელშეკრულების ბათილობა მოითხოვა. „2021 წელს, მამინაცვალმა გერს ბინა აჩუქა. თუმცა, მას შემდეგ რაც გერმა სექსუალური ძალადობის გამო უჩივლა, გერის დასჯა (ბინის წართმევა და გერის ქუჩაში დატოვება) მოისურვა. საქმეში PHR-ის ადვოკატები ჩაერთნენ. სასამართლომ სექსუალური ძალადობის მსხვერპლის პოზიცია გაიზიარა და მოძალადეს ჩუქების ხელშეკრულების გაუქმების გზით, ეკონომიკური ძალადობის განხორციელების შესაძლებლობაზე უარი უთხრა“. სრულად... წყარო: phr.ge

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, კულტურის, სპორტისა და ახალგაზრდობის სამინისტროსა და მინისტრ თეა წულუკიანის მითითებით, გრძელდება კულტურის სფეროდან არასასურველი კადრების დევნა. ეს პოლიტიკა, ამჯერად, გამოვლინდა თეატრისა და კინოს სახელმწიფო უნივერსიტეტშიც, რომლის ადმინისტრაციის ხელმძღვანელი, რუსუდან თევზაძე აიძულეს დაეტოვებინა თანამდებობა. ორგანიზაცია გეგმავს, რუსუდან თევზაძის ინტერესების დასაცავად, მიმართოს სახალხო დამცველს და მოითხოვოს მის მიმართ დისკრიმინაციის ფაქტის დადგენა. „სამართლიანი არჩევნები“, USAID-ის სამართლის უზენაესობის პროგრამა მხარდაჭერით, ახორციელებს სტრატეგიული სამართალწარმოების პროექტს, რომლის ფარგლებშიც უფასო იურიდიულ დახმარებას უწევს სამსახურიდან სავარაუდო პოლიტიკური  ნიშნით გათავისუფლებულ პირებს. სრულად... წყარო: isfed.ge

ქვემო ქართლი. 21 იანვარს, საქართველოს დემოკრატიული ინიციატივა (GDI) მარნეულის მუნიციპალიტეტში მცხოვრებ ახალგაზრდებს შეხვდა.  შეხვედრაზე იურისტმა, „დემოკრატიის მცველების“ თავმჯდომარე გიორგი მშვენიერაძემ ახალგაზრდებთან ლექცია/დისკუსიის ფარგლებში განიხილა რელიგიის თავისუფლებისა და სეკულარიზმის საკითხები. შეხვედრა გაიმართა USAID-ის პროგრამა “ერთიანობა მრავალფეროვნებაშია” ფარგლებში, რომელსაც ახორციელებს  საქართველოს გაეროს ასოციაცია, აშშ-ის საერთაშორისო განვითარების სააგენტოს (USAID) ფინანსური მხარდაჭერით. სრულად... წყარო: gdi.ge

თბილისი. სოციალური სამართლიანობის ცენტრი ვიდეოში გიყვებათ ორ ქალზე, ლია ჩლაჩიძეზე და ქეთი ბებიაშვილზე, რომლებსაც უმნიშვნელოვანესი წვლილი შეაქვთ მშვიდობის მშენებლობის პროცესში. „ქალბატონი ლია ერგნეთში, საოკუპაციო ხაზიდან 200 მეტრში ცხოვრობს. როგორც თავად ამბობს, ამ სოფელში ცხოვრება დენთის კასრზე ცხოვრებას ჰგავს, რადგან არასოდეს იცი, როდის რა მოხდება. ქეთი ბებიაშვილი კი გორში საიას ოფისს ხელმძღვანელობს და მნიშვნელოვან დახმარებას უწევს მათ შორის კონფლიქტით დაზარალებულ, საზღვრისპირას მცხოვრებ ქალებს. მისი თქმით, სულ უფრო ბუნდოვანი ხდება, რა ხედვა აქვს სახელმწიფოს ერთი მხრივ, ზოგადად სამშვიდობო პოლიტიკასთან დაკავშირებით და მეორე მხრივ კი, ადმინისტრაციულ საზღვართან ახლოს მცხოვრები მოსახლეობის საჭიროებებთან მიმართებით“. სრულად... წყარო: socialjustice.org.ge

თბილისი. 19 იანვარს სტრასბურგის სასამართლომ მაჩალიკაშვილის საქმეზე გადაწყვეტილება გამოაქვეყნა. სოციალური სამართლიანობის ცენტრის ცნობით, ამ გადაწყვეტილებით ნაწილობრივ დაკმაყოფილდა განმცხადებლების მოთხოვნა და დადგინდა სიცოცხლის უფლების პროცედურული დარღვევა მაჩალიკაშვილის სიცოცხლის ხელყოფის საქმეზე ჩატარებულ გამოძიებაში გამოვლენილი ფუნდამენტური დარღვევების გამო. დიდწილად სწორედ გამოძიებაში არსებული ხარვეზები გახდა იმის მიზეზი, რომ სასამართლომ, ვერ უპასუხა საკვანძო კითხვას - იყო თუ არა თემირლანის წინააღმდეგ გამოყენებული ძალა არაპროპორციული, და შესაბამისად, ვერ შეძლო სიცოცხლის უფლების შინაარსობრივი დარღვევის აღიარება. ორგანიზაცია გთავაზობთ გადაწყვეტილების მიმოხილვას, რომელშიც წარმოდგენილია სასამართლოს შეფასება ყველა საკვანძო საკითხზე...  სრულად... წყარო: socialjustice.org.ge

კახეთი. სოციალური სამართლიანობის ცენტრი ღრმა მწუხარებას გამოთქვამს, წუხელ, საგარეჯოში მომხდარი უმძიმესი დანაშაულის გამო და უსამძიმრებს დაღუპული მშვიდობიანი მოქალაქეების და პოლიციელის ოჯახებს. დაჭრილებს კი გამოჯანმრთელებას უსურვებს.  „სამართლებრივი საკითხების მიღმა, მნიშვნელოვანია მომხდარ ტრაგედიასთან დაკავშირებით, დავსვათ კითხვები, რომლებიც ამგვარი ძალადობის სტრუქტურულ მიზეზებს შეიძლება ხსნიდეს, მათ შორის:   როგორია ყოფილი სამხედრო პირების სოციალური დაცვის გარანტიები და როგორ მუშაობს ფსიქო-სოციალური მხარდაჭერის პროგრამები მათი საჭიროებების საპასუხოდ? ამ კონკრეტულ შემთხვევაში თავდაცვის სამინისტროს ჰქონდა თუ არა შეფასებული ყოფილი სამხედრო პირის მდგომარეობა და რა ზომები მიიღო მისი ქცევის მართვისთვის? ჰქონდა თუ არა/უნდა ჰქონოდა თუ არა თავდაცვის სამინისტროს და პოლიციას მისგან მომდინარე რისკების შესახებ ინფორმაცია და რამდენად ეფექტიანი იყო მათ მიერ მიღებული პრევენციული ზომები ამ შემთხვევაში?  ეს შემთხვევა თავდაცვის სექტორში დასაქმებული ადამიანებისა და ყოფილი სამხედროების მიმართ სოციალური პოლიტიკისა და ფსიქო-სოციალური მხარდაჭერის პროგრამების გაძლიერების საფუძველი უნდა გახდეს და იმედი გვაქვს, რომ სახელმწიფო, სამოქალაქო და პოლიტიკური ჯგუფები დისკუსიებსა და სამუშაოებს სწორედ ამ მიმართულებით წარმართავენ“. სრულად... წყარო: ორგანიზაციის გვერდი სოციალურ ქსელში ფოტო: რადიო თავისუფლება

თბილისი. სოციალური სამართლიანობის ცენტრის ინფორმაციით, იუსტიციის სამინისტროს განცხადება, თემირლან მაჩალიკაშვილის საქმეზე ადამიანის უფლებათა ევროპული სასამართლოს მიერ მიღებული გადაწყვეტილების შესახებ მანიპულაციურია. ორგანიზაცია წინამდებარე განცხადებაში წარმოადგენს იუსტიციის სამინისტროს ოფიციალური განმარტებების კრიტიკას. სრულად... წყარო: socialjustice.org.ge