თბილისი. ორგანიზაცია „უფლებები საქართველომ“ 2022 წლის დეკემბრიდან დაიწყო ახალი პროექტი, რომლის ფარგლებშიც უკრაინის მოქალაქეებს სთავაზობს უფასო სამართლებრივ დახმარებას. პროექტის მიზანია: უკრაინის მოქალაქეების უფლებების დაცვა უფასო სამართლებრივი დახმარების გზით; უკრაინის მოქალაქეებისთვის ხელმისაწვდომ სერვისებსა და ადამიანის უფლებათა დაცვის მექანიზმებზე ცნობიერების ამაღლება; უკრაინის მოქალაქეების უფლებების დაცვა შესაძლებელი გახდა ევროკავშირის მიერ დაფინანსებული პროექტის „სტაბილური სამოქალაქო საზოგადოება და მედია პასუხობს უკრაინის ომს“ ფარგლებში, რომელსაც ჩეხური არასამთავრობო ორგანიზაცია „ფიფლ ინ ნიდ“, პრაღის სამოქალაქო საზოგადოების ცენტრსა და ნიდერლანდების ჰელსინკის კომიტეტთან თანამშრომლობით ახორციელებს. სრულად... წყარო: ორგანიზაციის გვერდი სოციალურ ქსელში

თბილისი. „საფარი“ გიზიარებთ ორგანიზაციის მკვლევრის გიორგი ურჩუხიშვილის ვიდეოს, რომელშიც მშობლის მიერ შვილისთვის ალიმენტის გადახდის ვალდებულებაზეა საუბარი. საფარის კვლევის მიგნებების თანახმად, მამები ალიმენტის გადასახადისგან თავის არიდებას უამრავი ხერხით ცდილობენ. მათ ზურგს უმაგრებთ დამკვიდრებული კულტურული ნორმები, საზოგადოება, ქალები კი სრულიად მარტო რჩებიან შვილის აღზრდის პროცესში. „შვილზე ზრუნვაზე უარის თქმა ცუდ მშობლობას ნიშნავს, ალიმენტის არგადახდა კი - ეკონომიკურ ძალადობას“. პროექტი ხორციელდება ეროვნულ-დემოკრატიული ინსტიტუტის (NDI) მხარდაჭერით და დიდი ბრიტანეთის UK aid-ის ფინანსური ხელშეწყობით. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ (საია) 2023 წლის 5 და 9 იანვარს პარტნიორ ორგანიზაციებთან ერთად გაეროს ქალთა მიმართ დისკრიმინაციის აღმოფხვრის კომიტეტს 2 ალტერნატიული ანგარიში წარუდგინა. პირველი ანგარიში მოიცავს სექსუალური ძალადობის თაობაზე კანონმდებლობაში და პრაქტიკაში არსებული მდგომარეობის შეფასებასა და ხარვეზებს, ასევე, წარმოდგენილია რეკომენდაციები. მეორე ანგარიში კი მოიცავს ქალი პატიმრის უფლებრივ მდგომარეობას პენიტენციურ დაწესებულებაში. დოკუმენტში ძირითადად ყურადღება გამახვილებულია ორ საკითხზე: 1.  ქალი პატიმრების პირველადი შესახლების, ასევე, დაწესებულებიდან გაყვანის და დაწესებულებაში დაბრუნების დროს მათი სრული გაშიშვლების და ბუქნების გაკეთების პრაქტიკაზე, რომელიც ეწინააღმდეგება ადამიანის უფლებათა სამართლით დადგენილ საერთაშორისო სტანდარტს. 2. პატიმრების მიერ ჯეროვან ჯანდაცვაზე ხელმისაწვდომობის საკითხს. სრულად... წყარო: www.gyla.ge

თბილისი. საქართველოს ახალგაზრდა იურისტთა ასოციაცია აქვეყნებს თამარ ონიანის ბლოგპოსტს ECODEFENCE AND OTHERS v. RUSSIA. ნაშრომში საუბარია თუ როგორ დაიწყო და აღასრულა საკანონმდებლო გზით უფლებადამცველების დევნა რუსეთმა. ავტორი მოკლედ მიმოიხილავს, თუ როგორ გამოაცხადეს რუსეთში „აგენტებად“ არასამთავრობო ორგანიზაციები, რომელთაც საბოლოოდ საქმიანობის შეწყვეტა მოუწიათ. ამავე ბლოგპოსტში გაეცნობით, ევროპული სასამართლოს პრეცედენტულ გადაწყვეტილებას.  „ნებისმიერი შეზღუდვა, რომელიც თავისი არსით, არასამთავრობო ორგანიზაციის ჯეროვანი საქმიანობისთვის იმგვარი პირობების შექმნას დაისახავს მიზნად, რომელიც საბოლოო ჯამში გავლენას მოახდენს მის ეფექტიან ფუნქციონირებასა თუ, საერთოდ, არსებობაზე, რა თქმა უნდა, ძირს უთხრის, არა მხოლოდ, კონსტიტუციას, კონვენციას, არამედ, წარმოადგენს რეალურ საფრთხეს თითოეული ადამიანისთვის, რასაც გავლენა აუცილებლად ცხოვრების ყველა სფეროზე ექნება, გამონაკლისის გარეშე“. სრულად... წყარო: www.gyla.ge

თბილისი. ღირსეული შრომის პლატფორმა აქვეყნებს კვლევას: საცხოვრებელი ხელფასი საქართველოში. „საცხოვრებელი ხელფასი არის ხელფასის ის ოდენობა, რომელიც ფარავს მშრომელთა ღირსეული ცხოვრებისათვის აუცილებელ და ძირითად საჭიროებებს... მისი გამომუშავებისათვის მშრომელებს არ უნდა სჭირდებოდეთ ზეგანაკვეთური შრომა - საცხოვრებელი ხელფასის მიღება შესაძლებელი უნდა იყოს ერთ სამუშაოზე დასაქმების შემთხვევაშიც. 2022 წლის ოქტომბერში Wage Indicator Foundation-ის გამოთვლებით, საცხოვრებელი ხელფასი საქართველოში, ყოველთვიურად 1770 ლარი უნდა იყოს. სამწუხაროდ, საქართველოში არსებული ხელფასები ამჟამად საცხოვრებელ ხელფასზე გაცილებით დაბალია. კანონმდებლობით განსაზღვრული მინიმალური ხელფასი თვეში 20 ლარია და 1999 წლის შემდეგ არ განახლებულა. სახელმწიფოს მონაცემების თანახმად, მედიანური ხელფასი - თანხა, რომელიც მშრომელებს ორ თანაბარ ჯგუფად ყოფს – 2021 წლისთვის თვეში 900 ლარი იყო. ეს ნიშნავს, რომ დასაქმებულთა 50% ამ თანხაზე ნაკლებს იღებს. საშუალო ხელფასიც კი 2021 წელს, თვეში მხოლოდ 1305 ლარი იყო, რაც საცხოვრებელ ხელფასზე გაცილებით დაბალია“, ნათქვამია მასალაში. სრულად... წყარო: shroma.ge

თბილისი. საქართველოს სახალხო დამცველის აპარატმა სამუშაო შეხვედრა გამართა საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის, გენდერული თანასწორობის მუდმივმოქმედი საპარლამეტო საბჭოსა და ბავშვის უფლებათა დაცვის მუდმივმოქმედი საპარლამენტო საბჭოს წარმომადგენლებთან. სამუშაო შეხვედრაზე ომბუდსმენის მოვალეობის შემსრულებელმა თამარ გვარამაძემ სახალხო დამცველის მანდატსა და საქმიანობის სპეციფიკაზე ისაუბრა, ასევე დამსწრეებს მიაწოდა ინფორმაცია 2020-2022 წლებში აპარატის მიერ მომზადებული სპეციალური ანგარიშების თაობაზე. საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ მიხეილ სარჯველაძემ ადამიანის უფლებების დაცვის გაუმჯობესების მიზნით მომავალში თანამშრომლობის გაღრმავების მნიშვნელობას გაუსვა ხაზი. სრულად... წყარო: სახალხო დამცველის გვერდი სოციალურ ქსელში

თბილისი. პარტნიორობა ადამიანის უფლებებისთვის აქვეყნებს ესმა იმერლიშვილის ბლოგპოსტს: მენსტრუაცია და შეზღუდული შესაძლებლობები. „შეზღუდული შესაძლებლობის მქონე ქალები და გოგოები, მთელი მსოფლიოს მასშტაბით, ხშირად ვერ ახერხებენ საკუთარი მენსტრუაციული ჯანმრთელობის მართვას, რაც გამოიხატება ინფორმაციის ნაკლებობაში, მენსტრუაციის ჰიგიენის მართვისთვის საჭირო საშუალებებზე არასათანადო წვდომაში და სხეულის ავტონომიისა და რეპროდუქციული უფლების დარღვევაში. ყოველივე ამას, სხვადასხვა სოციალურ-კულტურული, ეკონომიკური და სტრუქტურული ფაქტორები უდევს საფუძვლად. წინამდებარე დოკუმენტი მენსტრუაციული ჰიგიენის მართვის მნიშვნელოვან ასპექტებს მიმოიხილავს და მიუხედავად იმისა, რომ თითოეული საკვანძო საკითხის სიღრმისეულ დისკუსიას ვერ ახდენს, იმედს ვიტოვებთ, რომ მკითხველისთვის ინფორმაციის იმ დოზით მიწოდებას უზრუნველყოფს, რაც საკითხისადმი შემდგომი დაინტერესებისა და ყოველდღიურ ცხოვრებაში არსებული პრობლემების იდენტიფიცირებაში დაეხმარება“. სრულად... წყარო: phr.ge

თბილისი. საქართველოს ახალგაზრდა იურისტთა ასოციაცია (საია) აქტიურადაა ჩართული „ღირსეული შრომის პლატფორმის“ საქმიანობაში, რომელიც აერთიანებს დამოუკიდებელ პროფესიულ კავშირებს, ადამიანის უფლებათა დამცველ ორგანიზაციებსა და აქტივისტებს. ორგანიზაცია გიზიარებთ 2022 წლის კვლევას „მოპარული ხელფასი საქართველოში - შრომითი უფლებების დარღვევის ფინანსური გავლენა მშრომელთა უფლებებზე“.  კვლევა... საია-მ ასევე მოამზადა კვლევა „შრომითი უფლებები საჯარო სამსახურში: სამინისტროები და თვითმმართველი ქალაქები“. დოკუმენტში მოცემულია საჯარო სამსახურში შრომითი უფლებების მომწესრიგებელი სამართლებრივი ნორმების შედარებითი ანალიზი. კვლევა... ორგანიზაციის 2022 წლის საქმიანობის ანგარიში... წყარო: ორგანიზაციის გვერდი სოციალურ ქსელში

თბილისი. ომბუდსმენის აპარატი ეხმიანება სოციალურ ქსელში გავრცელებულ ინფორმაციას ქუჩაში მცხოვრები ან/და მომუშავე ბავშვების მიერ განხორციელებული სავარაუდო დანაშაულებრივი ქმედებების შესახებ. გავრცელებულ კადრებში ასევე, ჩანს თუ როგორ გადარბიან ბავშვები საავტომობილო გზაზე სამართალდამცავებისგან გაქცევის მიზნით, რაც საფრთხის შემცველია, როგორც უპირატესად მათი სიცოცხლისა და ჯანმრთელობისთვის, ასევე საკმაოდ დატვირთული საგზაო მოძრაობის სხვა მონაწილეებისთვის, იქნებიან ეს მძღოლები, მგზავრები თუ ქვეითად მოსიარულე პირები.  „საქართველოში ასეულებით ბავშვის ყოველდღიურობას წარმოადგენს მძიმე რეალობა, რასაც ქუჩაში ცხოვრება და მუშაობა ჰქვია. ბავშვების ამ რეალობისგან დასაცავად აუცილებელია, უწყებებს შორის კოორდინირებული მუშაობით,  სახელმწიფომ დროულად დაგეგმოს და გაატაროს კონკრეტული პრევენციული ღონისძიებები, მათ შორის დანაშაულის პრევენციის კუთხით;  დანერგოს ქუჩაში მცხოვრები, მომუშავე თუ შემწეობის მთხოვნელი ბავშვების რეაბილიტაციასა და რესოციალიზაციაზე ორიენტირებული დამატებითი სერვისები, რაც ხელს შეუწყობს ბავშვების რთული ან/და ანტისოციალური ქცევის პოზიტიურ მართვას, უზრუნველყოფს მათი ქუჩაში დაბრუნების პრევენციას.  საქართველოს სახალხო დამცველის აპარატი გამოთქვამს სრულ მზაობას - წარმართოს მჭიდრო თანამშრომლობა ყველა შესაბამის უწყებასთან და წარუდგინოს მათ დამატებითი რეკომენდაციები მიუსაფარ ბავშვებთან დაკავშირებულ საკითხებზე რეაგირებისა და შესაბამისი მექანიზმების გაუმჯობესების მიზნით“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, თამარ მეარაყიშვილის საქმეზე 5 წლის შემდეგ გამოძიება საბოლოოდ შეწყდა. „დე ფაქტო პროკურატურის აღნიშნული დადგენილება, ერთი შეხედვით, 2017 წლიდან თამარ მეარაყიშვილის წინააღმდეგ მიმდინარე უკანონო და დაუსაბუთებელი სისხლის სამართლებრივი დევნის დასრულების პოზიტიურ ნიშანს შეიცავს. თუმცა იმის გამო, რომ „პროკურატურის“ გადაწყვეტილების ტექსტი პირდაპირ უთითებს თამარ მეარაყიშვილისგან დე ფაქტო პასპორტების ამოღების სამართლებრივი პროცედურის დაწყების შესახებ, ის კვლავ ტოვებს მისთვის დე ფაქტო მოქალაქეობის ჩამორთმევის რისკებს, რაც მთლიანობაში ახალგორში მცხოვრები ქართველების სამართლებრივ სტატუსს დე-ფაქტო ადმინისტაციის პირობებში ხდის სადავოს“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. დემოკრატიისა და მართლმსაჯულების ინსტიტუტი დანაშაულის მსხვერპლ არასრულწლოვანთა უფლებების შესახებ პოლიტიკის დოკუმენტს აქვეყნებს. დოკუმენტში მოყვანილი რეკომენდაციების თანახმად, დანაშაულის მსხვერპლი ბავშვების უფლებების დაცვისათვის აუცილებელია: გაუმჯობესდეს საკანონმდებლო რეგულაციები და აღმოიფხვრას არსებული ხარვეზები; გაძლიერდეს უწყებათაშორისი და სექტორთაშორისი კოორდინაცია; შეიქმნას ერთიანი მონაცემთა შეგროვებასა და ანალიზის სისტემა; შემუშავდეს დანაშაულის მსხვერპლი ბავშვების რისკებისა და საჭიროებების ინდივიდუალური შეფასების სისტემა; შემუშავდეს ახალი და გაუმჯობესდეს არსებული სერვისები; გაუმჯობესდეს ზიანის ანაზღაურების, კომპენსაციისა და რესტიტუციის მექანიზმები; აღდგენითი მართლმსაჯულების პროგრამები გამოყენებულ იქნას, როგორც დაზარალებულთა სერვისები.  პოლიტიკის დოკუმენტს დეტალურად შეგიძლიათ გაეცნოთ აქ... დოკუმენტი მომზადებულია დემოკრატიისა და მართლმსაჯულების ინსტიტუტის პროექტის „არასრულწლოვან დაზარალებულთა უფლებების გაძლიერება საქართველოში“ ფარგლებში, რომელიც ევროკავშირის აღმოსავლეთ პარტნიორობის სამოქალაქო საზოგადოების გაძლიერების პროგრამის დაფინანსებით განხორციელდა. წყარო: ორგანიზაციის გვერდი სოციალურ ქსელში

თბილისი. სახალხო დამცველის აპარატი ეხმიანება ბოლო დროს, პოლიტიკური ოპონირებისას გაკეთებულ მიმართვებს, რასაც სავარაუდოდ, ადგილი ჰქონდა საქართველოს პარლამენტში და ასევე, საჯაროდ გაკეთებულ განცხადებებს, რაც ცალსახად ეწინააღმდეგება ბავშვის უფლებებსა და ინტერესებს. „პოლიტიკური დისკუსიის წარმართვისას მოვუწოდებთ ყველას, მათ შორის პარლამენტარებს,  გამოიჩინონ მაღალი პასუხისმგებლობა, არ დაუშვან ერთმანეთის ოჯახის წევრების, მათ შორის, არასრულწლოვანების ნეგატიურ კონტექსტში მოხსენიება და თავად უპირატესად იყვნენ თითოეული ბავშვის უფლებების დაცვის გარანტი. დამატებით, მოვუწოდებთ  საქართველოს პარლამენტს, პარლამენტის წევრის ეთიკის კოდექსით გათვალისწინებული დარღვევების შესწავლის, მონიტორინგისა და აღნიშნულზე ეფექტიანი რეაგირების მიზნით აამოქმედოს ეთიკის საბჭო“. სრულად... წყარო: ombudsman.ge

სამცხე-ჯავახეთი. შეზღუდული შესაძლებლობის მქონე პირთა საერთაშორისო დღესთან დაკავშირებით, USAID-ის პროგრამა „ერთიანობა მრავალფეროვნებაშია“, მონაწილეები კამილიელთა სარეაბილიტაციო ცენტრის ახალციხის ფილიალს ესტუმრნენ. პროგრამას ახორციელებს საქართველოს გაეროს ასოციაცია USAID/Georgia-ას ფინანსური მხარდაჭერით. პროგრამის პარტნიორი ახალციხესა და ახალქალაქში საზოგადოებრივი ორგანიზაცია დემოკრატ მესხთა კავშირია. სრულად... წყარო: ორგანიზაციის გვერდი სოციალურ ქსელში

თბილისი. 17 დეკემბერს, „საქართველოს დემოკრატიული ინიციატივა“ 10 წლის გახდა. GDI 2012 წელს დაარსდა და ამ ხნის განმავლობაში მუდმივად იდგა ისეთი ღირებულებების დაცვის სადარაჯოზე, როგორიცაა: ადამიანის უფლებები, კანონის უზენაესობა და დემოკრატიული განვითარება. სრულად... წყარო: ორგანიზაციის გვერდი სოციალურ ქსელში

თბილისი. სახალხო დამცველის აპარატი განცხადებას ავრცელებს მიხეილ სააკაშვილის პალატის ვიდეო ჩანაწერის გავრცელებასთან დაკავშირებით. „მიხეილ სააკაშვილის ჯანმრთელობისა და უფლებრივი მდგომარეობის მიმართ არსებული მაღალი საზოგადოებრივი ინტერესის მიუხედავად, სპეციალური პენიტენციური სამსახურის ამ ეტაპზე ხელმისაწვდომი ოფიციალური განმარტების გათვალისწინებით, სახალხო დამცველის აპარატი მიიჩნევს, რომ კადრების გავრცელების მიმართ ლეგიტიმური მიზნის არსებობა, მათ შორის საზოგადოების მაღალი ინტერესის დაკმაყოფილება, ისევე როგორც ამ გადაწყვეტილების პროპორციულობა და ადეკვატურობა ვერ დასტურდება. ლეგიტიმური მიზნის არსებობის შემთხვევაშიც კი, ჯანმრთელობის მდგომარეობის ამსახველი ინფორმაციის გასაჯაროებისას მნიშვნელოვანია ბალანსის დაცვა საჯარო ინტერესსა და პირის პირადი ცხოვრების ხელშეუხებლობის, პერსონალურ მონაცემთა დაცვის უფლებებს შორის“, ნათქვამია განცხადებაში. სრულად... წყარო: ombudsman.ge

თბილისი. 13 დეკემბერს გაიმართა კონფერენცია „ღირსება, თავისუფლება და სამართლიანობა ყველასთვის“, რომელშიც საქართველოს მთავრობის, პარლამენტის, უფლებადამცველი ორგანიზაციებისა და საერთაშორისო პარტნიორების წარმომადგენლები ჩაერთნენ. კონფერენცია გახსნეს მიხეილ სარჯველაძემ, ადამიანის  უფლებებისა და სამოქალაქო ინტეგრაციის საპარლამენტო კომიტეტის თავმჯდომარემ, და ნიკო თათულაშვილმა, საქართველოს პრემიერ-მინისტრის მრჩეველმა ადამიანის უფლებების საკითხებში. შეხვედრამ თავი მოუყარა გადაწყვეტილების მიმღებებს, სამოქალაქო საზოგადოებას და უფლებადამცველებს, რათა განეხილათ საქართველოში ადამიანის უფლებებთან დაკავშირებული გამოწვევები. კონფერენციის მთავარი მიზანი იყო საქართველოს მხარდაჭერა თანასწორი და სამართლიანი საზოგადოების განვითარებისკენ წინსვლაში. სრულად... წყარო: www.eeas.europa.eu

თბილისი. სამოქალაქო საზოგადოების ორგანიზაციები საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობის უკიდურესად დამძიმების ფაქტს განცხადებით ეხმაურებიან. „უკიდურესად აღმაშფოთებელი და ცინიკურია მმართველი პარტიის მაღალჩინოსანთა განცხადებები, რომელიც პატიმრის სიკვდილის შესაძლებლობას სრული გულგრილობით ეკიდება. კერძოდ, საქართველოს პრემიერ-მინისტრმა განაცხადა, რომ მიხეილ სააკაშვილის სიცოცხლე „უფალს აბარია“ და „მასზე პასუხისმგებლობას ვერ აიღებს“. მმართველი პარტია დღემდე არ აღიარებს  სააკაშვილის მდგომარეობის დამძიმებას, რიგი წევრები კი სააკაშვილის სიკვდილს, შეიძლება ითქვას, სიხარულითაც ელოდებიან. მიგვაჩნია, რომ ნებისმიერი პატიმრის სიცოცხლისა და ჯანმრთელობის მიმართ მსგავსი დამოკიდებულება კატეგორიულად შეუსაბამოა როგორც საქართველოსა და საერთაშორისო სამართალთან, ასევე ევროკავშირის წევრობის პოლიტიკურ მიზანთან. მიხეილ სააკაშვილის ჯანმრთელობის მდგომარეობის კიდევ უფრო დამძიმება და ლეტალური შედეგის დადგომა იქნება არამხოლოდ ადამიანის უფლებების უმძიმესი დარღვევა, არამედ პოლიტიკური კოლაფსიც, რომელიც საქართველოს რეპუტაციას გამოუსწორებელ ზიანს მიაყენებს“. ხელმომწერი ორგანიზაციები მოუწოდებენ ხელისუფლებას, ჯეროვნად გაიაზროს სახელმწიფოს ვალდებულებები ადამიანის ძირითადი უფლებების სფეროში, შეწყვიტოს გულგრილი დამოკიდებულება მიხეილ სააკაშვილის ჯანმრთელობის მძიმე მდგომარეობისადმი და იტვირთოს პასუხისმგებლობა მისი სიცოცხლისა და ჯანმრთელობის გადასარჩენად. სრულად... წყარო: www.gyla.ge

გურია. ადამიანის უფლებების საერთაშორისო დღესთან დაკავშირებით, ახალგაზრდა პედაგოგთა კავშირის ახალგაზრდული ცენტრის წევრების მონაწილეობით ჩატარდა ტრენინგი თემაზე: ადამიანის უფლებები და თავისუფლება.  შეხვედრას უძღვებოდა ომბუდსმენის აპარატის გურიის რეგიონის წარმომადგენელი თამარ ოგანოვა.  სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) მთელი წლის განმავლობაში აქტიურად აგრძელებდა მუშაობას ადამიანის უფლებათა დასაცავად, როგორც სამართალწარმოების, ასევე მონიტორინგის, ადვოკატირებისა და საკანონმდებლო პროცესში ჩართულობის გზით. საია ყოველწლიურად აფასებს ქვეყანაში ადამიანის უფლებათა დაცვის მდგომარეობას და წარუდგენს მას საზოგადოებას. ორგანიზაციის შეფასებით, 2022 წელი ადამიანის უფლებათა დაცვის თვალსაზრისით კვლავაც გამოწვევებით სავსე იყო და ქვეყანაში გაგრძელდა დემოკრატიული უკუსვლა. ამ წლის უმთავრესი თემა ევროკავშირისგან კანდიდატის სტატუსის მოსაპოვებლად გადმოცემული 12 პირობის შესრულება იყო. ამ დრომდე პრობლემურია ამ პირობებიდან მნიშვნელოვანი ნაწილის შესრულების საკითხი, როგორც ადამიანის უფლებების დაცვის, ისე ინსტიტუციური რეფორმების მიმართულებით. წარმოდგენილ დოკუმენტში დეტალურად არის აღწერილი ადამიანის უფლებათა სფეროში არსებული ის ძირითადი გამოწვევები, რომელიც საია-მ 2022 წლის განმავლობაში გამოავლინა. სრულად... წყარო: gyla.ge

თბილისი. სოციალური სამართლიანობის ცენტრი აქვეყნებს 2022 წლის შეფასებას, რომელიც ეხება კონფლიქტების ტრანფორმაციასა და ადამიანის უფლებებს კონფლიქტის რეგიონებში. ორგანიზაციის შეფასებით, წელსაც კონფლიქტების ტრანსფორმაციის, ისევე როგორც კონფლიქტის რეგიონებში და გამყოფი ხაზის სოფლებში ადამიანის უფლებათა დაცვის მიმართულებით ხელშესახები პოზიტიური ცვლილებები არ გვქონია. ახალი გეოპოლიტიკური და პოლიტიკური კონტექსტები, რომელიც უკრაინაში რუსეთის ომის შემდეგ შეიქმნა, არ გამხდარა საქართველოს ხელისუფლებისთვის ოკუპაციისა და კონფლიქტების თემაზე არსებითად ახალი პოლიტიკის და ინიციატივების დაწყების საფუძველი. სრულად... წყარო: socialjustice.org.ge

აჭარა. 3 დეკემბერს, შეზღუდული შესაძლებლობების მქონე პირთა უფლებების დაცვის დღეს, 10 პარტნიორი სკოლის მონაწილეობით შექმნილი სამოქალაქო ქსელის წევრებისთვის, შშმ პირთა გამოწვევების თემაზე ონლაინ - ტრენინგი ჩატარდა.    ტრენინგს უძღვებოდა ორგაზანიციის „ცვლილებები თანაბარი უფლებებისთვის“ თავმჯდომარე თომა კაკაბაძე. მონაწილეები გაეცნენ სხვადასხვა ტერმინების განმარტებას, ისაუბრეს შშმ პირთა მიმართ დღეს არსებულ მიდგომებსა და საერთაშორისო გამოცდილებაზე. ასევე, განიხილეს საქართველოში არსებული რეალობა, გამოწვევები და მათი გადაჭრის შესაძლო გზები. სრულად... წყარო: ორგანიზაციის გვერდი სოციალურ ქსელში

თბილისი. ორგანიზაცია „ახალგაზრდა ადვოკატების“ ცნობით, „ტოტალ შარმისა“ და კლინიკის ექიმ კონსტანტინე სულამანიძის წინააღმდეგ პრეტენზიებს კიდევ ერთი მოქალაქე გამოთქვამს, რომელსაც კლინიკაში კონსტანტინე სულამანიძის მიერ გაუკეთდა ცხვირის პლასტიკური ოპერაცია, პაციენტს არასწორად ჩატარებული ოპერაციის შედეგად განუვითარდა მძიმე სუნთქვითი პრობლემები, ჩამოუყალიბდა მეორადი კეხი. კლინიკამ დაშვებული შეცდომების გამოსწორების მიზნით, პაციენტს ხელახალი ოპერაცია უსასყიდლოდ შესთავაზა, რამაც პირველი ოპერაციის დროს დაშვებული შედეგები ვერ აღმოფხვრა. მხარე კლინიკისგან მორალური და მატერიალური ზიანის ანაზღაურებას მოითხოვს, რაც მომავალი საოპერაციო ხარჯების დაფარვას უნდა მოხმარდეს. სრულად... წყარო: www.barristers.ge