სამეგრელო. საქართველოს ახალგაზრდა იურისტთა ასოციაციის ინფორმაციით, აფხაზეთიდან დევნილ ოჯახს, რომელიც სიცოცხლისა და ჯანმრთელობისთვის შეუთავსებელ სივრცეში ცხოვრობდა, დევნილთა, ეკომიგრანტთა და საარსებო წყაროებით უზრუნველყოფის სააგენტომ უარი უთხრა საცხოვრებელი ფართით დაკმაყოფილებაზე.  საია-ს ზუგდიდის ოფისის დახმარებით ოჯახმა გაასაჩივრა გადაწყვეტილება და სამივე ინსტანციის სასამართლოში დავა დევნილი ოჯახის სასარგებლოდ დასრულდა. სრულად... წყარო: www.gyla.ge

თბილისი. საქართველოს დემოკრატიული ინიციატივა (GDI) წარმოგიდგენთ ყოველწლიურ ანგარიშს, რომელშიც თემატურად განხილულია ადამიანის უფლებათა დაცვის კუთხით საქართველოში 2022 წელს არსებული მდგომარეობა. „2022 წელს საქართველოში გაგრძელდა ადამიანის უფლებათა დაცვის და დემოკრატიის ხარისხის გაუარესება, მზარდია ავტორიტარიზმის ნიშნები. ეროვნული მდგომარეობის რეგრესს მიუთითებს ისიც, რომ საქართველომ ვერ მიიღო ევროკავშირის კანდიდატობის სტატუსი, რომელიც  დიდწილად ქვეყანაში  სწორედ ადამიანის უფლებების დაცვის ხარისხსა და სტაბილური დემოკრატიის მაღალ სტანდარტზეა დამოკიდებული.  ხსენებული უკუსვლა განსაკუთრებით საგანგაშოა მსოფლიოში დემოკრატიის წინააღმდეგ ავტოკრატიის მზარდი ტენდენციის ფონზე. ამ კონტექსტში მნიშვნელოვანია უკრაინაში რუსეთის მიერ წარმოებული ომი და  საქართველოში ხელისუფლების წარმომადგენელთა განცხადებების თანხვედრა რუსულ ნარატივებთან. მსოფლიოს უსაფრთხოების არქიტექტურის მასშტაბური ცვლილების ფონზე, საქართველოს შიგნით მიმდინარე პროცესები განსაკუთრებულ ყურადღებას და ძალისხმევას მოითხოვს, რათა საქართველომ არ დაკარგოს შესაძლებლობა იყოს უსაფრთხო, სტაბილური და ეკონომიკურად ძლიერი დასავლური სამყაროს ნაწილი“. ანგარიში... წყარო: gdi.ge

თბილისი. ღირსეული შრომის პლატფორმა ეხმიანება ბათუმის საქალაქო სასამართლოში 3 სოციალური მუშაკის საქმის განხილვის გაჭიანურებას და მოუწოდებს სასამართლოს, დროულად განიხილოს მათი შრომითი დავები. „როგორც საზოგადოებისათვის ცნობილია, 2020 წლის 29 იანვარს სოციალური მომსახურების სააგენტოს 33 სოციალურ მუშაკს (მათ შორის უფროს სოციალურ მუშაკებს) რეორგანიზაციის შედეგად შეუწყდა შრომითი ხელშეკრულება, თუმცა, მათმა დიდმა ნაწილმა შრომითი სამართლებრივი დავა, უკანონო გათავისუფლების წინააღმდეგ, უკვე წარმატებით დაასრულა. ამ პრაქტიკისაგან განსხვავებით, ბათუმის საქალაქო სასამართლოს წარმოებაში არსებული სამი სოციალური მუშაკის შრომითი დავის განხილვა ამ დრომდე არ მომხდარა. მათ ახალგაზრდა იურისტთა ასოციაციის (საია-ს) აჭარის ფილიალის დახმარებით სარჩელით სასამართლოს ჯერ კიდევ 2020 წლის 11 მარტს მიმართეს. მოქმედი საპროცესო კანონმდებლობის შესაბამისად, სასამართლო შრომითი დავებს განცხადების მიღების დღიდან არაუგვიანეს 1 თვის ვადაში განიხილავს, თუმცა სარჩელის შეტანის შემდეგ რამდენიმე წლის გასვლის შემდეგაც მათ საქმეზე სასამართლო სხდომა ამ დრომდე არ არის ჩანიშნული“. სრულად... წყარო: socialjustice.org.ge

თბილისი. ორგანიზაცია „მირაბალდები“ მორიგ საინფორმაციო პოსტს აქვეყნებს ძალადობის მსხვერპლის მიმართ საზოგადოების დამოკიდებულებაზე. „ერთ-ერთი მთავარი მიზეზი, რის გამოც დუმს ძალადობის მსხვერპლი, საზოგადოების მხრიდან აგრესიული, ცინიკური, არაემპათიური და ზოგჯერ აბსურდული დამოკიდებულებაა.  ძალადობაგამოვლილ ადამიანს ხშირად ესმის მსგავსი შინაარსის შეკითხვები/კომენტარები: რა გეცვა? გააკეთე რამე თავის დასაცავად? იყვირე? მთვრალი ხომ არ იყავი? მაშინვე რატომ არ წახვედი პოლიციაში? არ მჯერა, რომ შენი ქმარი/შეყვარებული ამას იზამდა, ალბათ, აზვიადებ; უნდა მოითმინო, ბავშვით სად წახვალ? მთვრალი იყო და რატომ გააღიზიანე? უნდა ვიცოდეთ, რომ ყველა ასეთი რეაქცია არის ძალადობის, გაუპატიურების კულტურის წახალისება და მხარდაჭერა. ამის ნაცვლად, ძალადობაგამოვლილ ადამიანს უნდა ვუთხრათ/ვკითხოთ: მე მჯერა შენი და მხარს გიჭერ! თავს როგორ გრძნობ? რა შემიძლია შენთვის გავაკეთო? ძალადობაზე ლაპარაკი სირცხვილი არ არის - სირცხვილი ძალადობაა“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, საქართველოს შეზღუდული შესაძლებლობის მქონე პირთა ქსელი მთავრობას მიმართავს და პრემიერთან შეხვედრას ითხოვს. „შშმ პირთა მოსაზრებებისა და შშმ პირთა უფლებების კომიტეტის რეკომენდაციების უგულებელყოფის გამო, შშმ პირთა უფლებების კონვენციის იმპლემენტაციის უწყებათაშორისი საკოორდინაციო კომიტეტის მუშაობიდან ერთი წლის შემდეგ, შესაძლებელია ითქვას, რომ იგი ვერ ასრულებს იმ ფუნქციას, რისთვისაც შეიქმნა. ვერ ახორციელებს ქმედით ღონისძიებებს, ვერ უზრუნველყოფს სექტორებს/უწყებებს შორის კოორდინირებას და ვერ ახდენს სისტემური საკითხების ინიცირებას. რაც მთავარია, ვერ უზრუნველყოფს შშმ პირთა და მათი წარმომადგენლობითი ორგანიზაციების ეფექტურ და სრულ ჩართულობას შშმ პირთა უფლებების კომიტეტის მე-7 ზოგადი კომენტარის (შშმ პირების, მათ შორის, ბავშვების მონაწილეობა კონვენციის იმპლემენტაციასა და მონიტორინგში, წარმომადგენელი ორგანიზაციების მეშვეობით) მოთხოვნათა შესაბამისად“, ნათქვამია განცხადებაში. სრულად... წყარო: socialjustice.org.ge

თბილისი. უფლებები საქართველო აქვეყნებს საინფორმაციო პოსტს: როგორ უნდა დაიცვას სახელმწიფომ მსხვერპლი ხელახალი ტრავმირებისგან? სამართალდამცავი სისტემის ან/და სასამართლო ხელისუფლების წარმომადგენლების ქცევა, ხშირად, მსხვერპლის ხელახალ ტრავმირებას იწვევს.  ქალთა მიმართ და ოჯახში ძალადობის მსხვერპლის ხელახალი ტრავმირების თავიდან ასაცილებლად, მნიშვნელოვანია: მსხვერპლმა სახელმწიფოსგან მიიღოს დაცვის, დახმარებისა და მხარდაჭერის სათანადო მომსახურებები, რათა ძალადობასთან გამკლავება და ტრავმის დაძლევა შეძლოს; პოლიციელები, პროკურორები და მოსამართლეები სათანადო მგრძნობელობითა და გულისხმიერებით მოეკიდონ ქალთა მიმართ და ოჯახში ძალადობის საქმეებს; ქალთა მიმართ და ოჯახში ძალადობის საქმეებზე რეაგირება მსხვერპლზე ორიენტირებული მიდგომით, მისი ჭეშმარიტი ინტერესის გათვალისწინებითა და კონფიდენციალურობის დაცვით მოხდეს; მართლმსაჯულების ორგანოებმა აღმოფხვრან სტერეოტიპული დამოკიდებულებები და მსხვერპლის მიმართ გამოიჩინონ ნდობა. სრულად... წყარო: ორგანიზაციის გვერდი სოციალურ ქსელში

თბილისი. ორგანიზაცია „მირაბალდების“ ცნობით, მოქალაქეთა დიდმა ნაწილმა არ იცის, რომ საქართველოს ხუთ ქალაქში (თბილისში, გორში, სიღნაღში, ქუთაისსა და ბათუმში) არსებობს ოჯახში ძალადობის მსხვერპლთა სახელმწიფო თავშესაფრები. აუცილებელია, ვიცოდეთ: ძალადობის ფაქტის არსებობის შემთხვევაში პოლიცია ვალდებულია მსხვერპლის მოთხოვნით ან მისი თანხმობით, უზრუნველყოს მსხვერპლისა და მასზე დამოკიდებული პირის თავშესაფარში გადაყვანა. მსხვერპლს/სავარაუდო მსხვერპლს, საქართველოს კანონმდებლობით დადგენილი წესით, აქვს უფლება: ისარგებლოს თავშესაფრით და იქ არსებული მომსახურებით; თავშესაფარში მსხვერპლის მოთავსება ხდება 3 თვემდე ვადით. საჭიროების შემთხვევაში, ეს ვადა გაგრძელდება თავშესაფრის წესდებით (შინაგანაწესით) დადგენილი წესით. თავშესაფარში მოთავსების ვადის ამოწურვის შემდეგ, მსხვერპლის მიმართ საფრთხის არსებობის შემთხვევაში, თავშესაფრის ადმინისტრაცია ვალდებულია აცნობოს სამართალდამცავ ორგანოებს შემდგომი რეაგირების უზრუნველსაყოფად. სრულად... წყარო: ორგანიზაციის გვერდი სოციალურ ქსელში

ბარბარე ჯორჯაძის სახელობის 2022 წლის პრემია, ქალთა უფლებადამცველ, ახალგაზრდა იურისტთა ასოციაციის კახეთის ოფისის ხელმძღვანელს, მარეხ მგალობლიშვილს გადაეცა. საია ულოცავს ორგანიზაციის ერთგულ თანამშრომელს მნიშვნელოვანი პრემიის მიღებას. მარეხი წლებია საია-ს კახეთის ოფისს ხელმძღვანელობს და ადამიანის უფლებების დასაცავად იბრძვის.  პრემია კახეთის რეგიონული განვითარების ფონდმა 2021 წელს დააფუძნა და მისი მიზანია რეგიონში მომუშავე ქალთა უფლებადამცველების წახალისება მოხდეს. სრულად... წყარო: ორგანიზაციის გვერდი სოციალურ ქსელში

თბილისი. 5 დეკემბერს 19:00 საათზე, თბილისის თავისუფალი უნივერსიტეტის სამართლის სკოლა, USAID სამართლის უზენაესობის პროგრამის მხარდაჭერით, ადამიანის უფლებების საუნივერსიტეტო კვირეულის ფარგლებში საჯარო ლექციას გამართავს თემაზე „საქართველოს საკონსტიტუციო სასამართლოში მიმდინარე სტრატეგიული სამართალწარმოების საქმეების მიმოხილვა“. დამატებითი ინფორმაციისთვის იხ. ბმული... წყარო: თავისუფალი უნივერსიტეტის გვერდი სოციალურ ქსელში

თბილისი. ამ წუთებში, სოციალური სამართლიანობის ცენტრი საჯარო დისკუსიას მართავს თემაზე: „სასამართლოს ლეგიტიმაცია და კანონის უზენაესობა კრიტიკული გააზრება”.  დისკუსიის თემატიკასთან დაკავშირებით იხილეთ შემდეგი ანალიტიკური დოკუმენტები: „ლეგიტიმაცია და ნდობა - რას ეფუძნება სასამართლოს ძალაუფლება?”... „როგორ გვესმის კანონის უზენაესობა?“... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის ინფორმაციით, 1 დეკემბერს, ადამიანის უფლებათა ევროპულმა სასამართლომ სამი ტრანსგენდერი კაცის საქმეზე ადამიანის უფლებათა ევროპული კონვენციის მე-8 მუხლის (პირადი და ოჯახური ცხოვრების დაცულობის უფლება) დარღვევა დაადგინა. „განმცხადებლებმა ვერ შეძლეს, რომ საქართველოში საკუთარი გენდერის სამართლებრივი აღიარებისთვის მიეღწიათ და პირადობის დამადასტურებელ დოკუმენტებში სქესის შესახებ ჩანაწერი მათი გენდერული იდენტობის შესაბამისად შეეცვალათ“. საქმის დამატებითი დეტალები იხილეთ ბმულზე... წყარო: www.gyla.ge

თბილისი. ორგანიზაციამ „უფლებები საქართველო“ საკონსტიტუციო სასამართლოს კონსტიტუციური სარჩელით მიმართა და მოითხოვა, არაკონსტიტუციურად იქნას ცნობილი საქართველოს სისხლის სამართლის საპროცესო კოდექსის 226-ე მუხლის 1-ლი ნაწილი, რომელიც სისხლის სამართლის კოდექსის 108-ე და 109-ე მუხლით გათვალისწინებული დაუმთავრებელი დანაშაულისთვის ბრალდებულ პირთა მიმართ გამორიცხავს ნაფიც მსაჯულთა სასამართლოს განსჯადობას. სრულად... წყარო: ორგანიზაციის გვერდი სოციალურ ქსელში

თბილისი. ორგანიზაცია „მირაბალდები“ ნებისმიერი შინაარსის სექსუალური ქმედების წინ გაცნობიერებული თანხმობის მნიშვნელობის შესახებ პოსტს აზიარებს. საინფორმაციო პოსტის თანახმად: სექსუალური შინაარსის მქონე ნებისმიერი ქმედება უნდა განხორციელდეს მხოლოდ ორივე მხარის თანხმობის შემთხვევაში. თანხმობის გაცემის დროს ადამიანი უნდა იყოს ისეთ მდგომარეობაში, რომ აცნობიერებდეს ქმედების შინაარსს, მასშტაბს და მოსალოდნელ შედეგებს. არაერთი გასართობი ღონისძიება დღეს ქალებისთვის/გოგოებისთვის წარმოადგენს საფრთხეს, რადგან ხშირად მათგან თანხმობის მიღება ხდება მაშინ, როცა ისინი არაფხიზელ მდგომარეობაში იმყოფებიან. არაფხიზელ მდგომარეობაში ყოფნა არ არის დანაშაული, დანაშაული არის სექსუალური შევიწროება/ძალადობა/გაუპატიურება. გახსოვდეთ, ალკოჰოლის/ნარკოტიკების ზემოქმედების ქვეშ თანხმობა ვერ ჩაითვლება რეალურად, როცა: ადამიანი ბორძიკობს, ეცემა და არ შეუძლია დამოუკიდებლად დგომა ან სიარული ვერ მეტყველებს გამართულად და მისი სიტყვები არ არის მკაფიოდ/გასაგებად გამოთქმული ვერ ახერხებს თვალებით ფოკუსირებას და ვერ აღიქვამს, სად იმყოფება არ გრძნობს თავს კარგად: აქვს თავბრუსხვევის შეგრძნება, გული ერევა და ა.შ. სძინავს ან უგონო მდგომარეობაშია სრულად... წყარო: ორგანიზაციის გვერდი სოციალურ ქსელში

თბილისი. ღირსეული შრომის პლატფორმა ეხმიანება თბილისის სატრანსპორტო კომპანიის დამოუკიდებელი პროფესიული კავშირის „ერთობა 2013”-ის მიერ კოლექტიურ შრომითი დავის ანონსს და სოლიდარობას უცხადებს მეტროს თანამშრომელთა სამართლიან მოთხოვნას შრომის ანაზღაურების ზრდასთან დაკავშირებით. სრულად... წყარო: socialjustice.org.ge

თბილისი. უფლებები საქართველოს ცნობით, ქალთა მიმართ ძალადობის ან/და ოჯახში ძალადობის ფაქტზე ოპერატიული რეაგირებისთვის, მსხვერპლის დაცვისა და მოძალადის გარკვეული მოქმედებების შეზღუდვის უზრუნველსაყოფად, შესაძლებელია პოლიციელის მიერ დროებითი ღონისძიების სახით შემაკავებელი ორდერის გამოცემა. შემაკავებელი ორდერის გამოცემისას: პოლიციელმა სწორად უნდა შეაფასოს ქალის მიმართ ძალადობის ან/და ოჯახში ძალადობის განმეორების რისკი და, რისკის სიმძიმის მიხედვით, მიიღოს გადაწყვეტილება შემაკავებელი ორდერის გამოცემის შესახებ; ძალადობის განმეორების რეალური საფრთხის არსებობისას, მაღალი რისკის მოძალადეებს, შემაკავებელი ორდერის გამოცემასთან ერთად ელექტრონული ზედამხედველობა უნდა დაუწესდეთ. ელექტრონული ზედამხედველობის განხორციელებისას, GPS სისტემით პოლიციამ უნდა გააკონტროლოს მოძალადის გადაადგილება, რაც ამცირებს მსხვერპლთან მისი მიახლოების საფრთხეს. სრულად... წყარო: ორგანიზაციის გვერდი სოციალურ ქსელში

თბილისი. მაკლეინის ასოციაცია აქვეყნებს სტატიას: როგორ ვასწავლოთ ბავშვს რომ არ იყოს ბულინგის პასიური დამკვირვებელი. „ბულინგი, იგივე ჩაგვრა, ბავშვობისა და მოზარდობის პერიოდისათვის დამახასიათებელი მოვლენაა, რომელსაც ყველა ადამიანი ერთხელ მაინც შესწრებია. პირველ რიგში, ბავშვთან ერთად განსაზღვრეთ რა არის ბულინგი და რა ფორმით შეიძლება ვლინდებოდეს იგი. ნათლად აუხსენით, რომ ბულინგი შეიძლება გამოვლინდეს როგორც ფიზიკური ჩაგვრის, ისე სიტყვიერი შეურაცხყოფის სახით, რიგ შემთხვევებში კი შეიძლება მიმართული იყოს ადამიანის გარიყვის, მისი რეპუტაციის შელახვის და სოციალურ იზოლაციისკენ. მოიყვანეთ შესაბამისი მაგალითებიც. თუ ბავშვს შეეძლება ბულინგის ამოცნობა, მას შეეძლება ჩარევა და საჭიროების შემთხვევაში, დახმარების თხოვნაც“. სრულად... წყარო: macgeorgia.org

კახეთი. 28 ნოემბერს, თელავის სახელმწიფო უნივერსიტეტში, ორგანიზაცია „უფლებები საქართველომ“, USAID სამართლის უზენაესობის პროგრამის მხარდაჭერით, ქალთა მიმართ ძალადობის და ოჯახში ძალადობის საკითხებზე საჯარო ლექცია გამართა.  საჯარო ლექცია გენდერული ძალადობის წინააღმდეგ მიმართული 16-დღიანი გლობალური კამპანიის ნაწილია, რომელიც “Let’s End Femicide” სლოგანით მიმდინარეობს. სრულად იხ. კახეთის ხმის  წყარო: ორგანიზაციის გვერდი სოციალურ ქსელში

თბილისი. „უფლებები საქართველოს“ მოთხოვნით სასამართლომ დროებითი განკარგულება გამოსცა. 2022 წლის 25 ნოემბერს, სამტრედიის რაიონულმა სასამართლომ, სრულად დააკმაყოფილა „უფლებები საქართველოს“ მოთხოვნა და არასრულწლოვანს აღარ დასჭირდება მოძალადე მამის ნებართვა იმისათვის, რომ ისწავლოს სკოლაში, დედის და თავისი ადგილსამყოფლის მიხედვით. „უფლებები საქართველო“ ამ საქმეს USAID სამართლის უზენაესობის პროგრამის მხარდაჭერით აწარმოებს. „სიტყვებით ვერ აღვწერ იმ ემოციასა და ბედნიერებას, რაც პროცესზე, სასამართლოს მიერ გადაწყვეტილების გამოცხადების დროს მქონდა. დიდი სიხარულია, მოძალადე მამასთან რომ არ მომიწევს ბავშვის განათლებასთან დაკავშირებული საკითხების შეთანხმება. ბედნიერი ვარ, რომ დღეიდან, ბავშვისთვის განათლების მიცემა დამოუკიდებლად შემიძლია“, - ყვება არასრულწლოვნის დედა. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გიზიარებთ მარიამ ბრეგვაძის კვლევას: მედიკამენტების ეკონომიკური ხელმისაწვდომობის უფლებრივი და ეკონომიკური განზომილებები. „საქართველოს მოსახლეობის კატასტროფული დანახარჯების უდიდეს წილს მედიკამენტები წარმოადგენს. ქვეყანა დღემდე იმ ქვეყნების ვიწრო წრეშია, რომლებიც წამლების ფასებს ამა თუ იმ ფორმით არ არეგულირებენ. მართალია, პრობლემა აღიარეს თავად პოლიტიკოსებმა, საპარლამენტო კომიტეტებმა და რელევანტურმა სახელმწიფო ორგანოებმა, თუმცა კომპლექსური ხედვა ამ საკითხზე დღემდე არ არსებობს და არც ქმედითი ნაბიჯები გადადგმულა“. სრულად... წყარო: socialjustice.org.ge

თბილისი. სამოქალაქო საზოგადოების ორგანიზაციები ეხმიანებიან საქართველოს მესამე პრეზიდენტის, მიხეილ სააკაშვილის ჯანმრთელობის მნიშვნელოვან გაუარესებას და მიიჩნევენ, რომ მისი შემდგომი მკურნალობის საკითხი უნდა გადაწყდეს არა პოლიტიკური მიზანშეწონილების, არამედ მხოლოდ ადამიანის სიცოცხლისა და ჯანმრთელობის დაცვის სტანდარტების გათვალისწინებით. სრულად... წყარო: osgf.ge ფოტო: OC Media

თბილისი. 25 ნოემბერს მსოფლიოში ქალთა მიმართ ძალადობის აღმოფხვრის საერთაშორისო დღე აღინიშნება, რომელიც მიზნად ისახავს საზოგადოების ცნობიერების ამაღლებას, არსებული გამოწვევების აღიარებას და სამომავლო სტრატეგიების დასახვას ძალადობის წინააღმდეგ ბრძოლისთვის. ამასთან, ამ დღით იხსნება  16 დღიანი გლობალური კამპანია გენდერული ძალადობის წინააღმდეგ.  საკანონმდებლო თუ ინსტიტუციური ცვლილებების მიუხედავად, საქართველოში ქალის მიმართ და ოჯახში ძალადობა კვლავ მნიშვნელოვან გამოწვევად რჩება. პრევენციის, დროული გამოვლენის და შემთხვევებზე ეფექტიანი რეაგირების მიმართულებით დღემდე არაერთი პრობლემა არსებობს. შესაბამისად, ომბუდსმენი მოუწოდებს საქართველოს პარლამენტს, ცენტრალურ და ადგილობრივ ხელისუფლებას, პრიორიტეტად დაისახოს შემდგომი ღონისძიებების გატარება:  დაიხვეწოს სექსუალური ძალადობის კანონმდებლობა და საერთაშორისო სტანდარტების შესაბამისად, სექსუალური ძალადობის დეფინიცია დაეფუძნოს მსხვერპლის თავისუფალი, ნამდვილი და ნებაყოფლობითი თანხმობის არარსებობას; გენდერული თანასწორობის საკითხების ინტეგრირება მოხდეს ყველა ტიპის სწავლებაში და დაიგეგმოს ცნობიერების ამაღლების კამპანიები გენდერული თანასწორობისა და ოჯახში ძალადობის საკითხებზე საზოგადოების ცნობიერების ამაღლების მიზნით;  დამტკიცდეს ქალთა მიმართ ან/და ოჯახში ძალადობის მსხვერპლთა გამოვლენის, მათი დაცვის, დახმარებისა და რეაბილიტაციის ეროვნული რეფერირების პროცედურების დოკუმენტი; დაიგეგმოს შესაბამისი პროექტები და პროგრამები ქალთა ეკონომიკური გაძლიერების ხელშესაწყობად. სრულად... წყარო: ორგანიზაციის გვერდი სოციალურ ქსელში

თბილისი. ილიას სახელმწიფო უნივერსიტეტის ადამიანის უფლებათა მიმართულება USAID სამართლის უზენაესობის პროგრამასთან თანამშრომლობით უერთდება გენდერული ძალადობის აღმოფხვრის 16-დღიან გლობალურ კამპანიას. კამპანია, რომელიც 25 ნოემბრიდან 10 დეკემბრის ჩათვლით გაგრძელდება და მოიცავს სხვადასხვა აქტივობას, რომელთა მიზანი ქალებისა და გოგოების მიმართ ძალადობის საკითხებზე საზოგადოების ცნობიერების ამაღლებაა. კამპანიის ფარგლებში ილიას სახელმწიფო უნივერსიტეტის სამართლის სკოლის ადამიანის უფლებათა მიმართულება რამდენიმე ღონისძიებას გამართავს: დისკუსია „რა უნდა ვიცოდეთ სექსუალური ძალადობის შესახებ?“ დრო: 25 ნოემბერი, 17:00 საათი ადგილმდებარეობა: კლუბი KHIDI (ჰეიდარ ალიევის მარჯვენა სანაპირო) ფილმის „განსაწმენდელი“ ჩვენება და დისკუსია დრო: 26 ნოემბერი, 14:00 საათი ადგილმდებარეობა: წიგნის სახლი „ლიგამუსი“ (ი. ჭავჭავაძის გამზ. N3) Სოკრატეს კლუბის დისკუსია „თვითმკვლელობამდე მიყვანა, როგორც ფემიციდის ფორმა“ დრო: 30 ნოემბერი, 19:00 საათი ადგილმდებარეობა: წიგნის სახლი „ლიგამუსი“, ილიას სახელმწიფო უნივერსიტეტი (ი. ჭავჭავაძის გამზ. N32). პანელური დისკუსია „ძალადობის მსხვერპლის გამოხატვის თავისუფლებით სარგებლობა“ დრო:7 დეკემბერი, 19:00 საათი ადგილმდებარეობა: წიგნის სახლი „ლიგამუსი“, ილიას სახელმწიფო უნივერსიტეტი (ი. ჭავჭავაძის გამზ. N32). Საჯარო ლექცია „ქართველთა შორის Წერა-კითხვის გამავრცელებელი საზოგადოების წევრი ქალები” დრო: 8 დეკემბერი, 18:00 საათი ადგილმდებარეობა: ოთახი B201, ილიას სახელმწიფო უნივერსიტეტი (ი. ჭავჭავაძის გამზ. N32) სრულად... წყარო: უნივერსიტეტის გვერდი სოციალურ ქსელში