თბილისი. აქტივისტები სხვადასხვა თემიდან საუბრობენ სოლიდარობის პლატფორმაზე, რომელიც 2019 წელს შეიქმნა და აერთიანებს საქართველოს სხვადასხვა ეთნიკურ და რელიგიურ ჯგუფს. „სოლიდარობის პლატფორმა არის სივრცე, სადაც ჩვენ ვცდილობთ, დავინახოთ ამ ჯგუფების შეხების წერტილები, ვსაუბრობთ ჩვენს ყოფაზე და იმ ექსკლუზიურ გამოცდილებებზე, რომელიც შეიძლება განსაკუთრებით მწვავედ იდგეს საქართველოს სხვადასხვა ეთნიკური და რელიგიური ჯგუფებისთვის“. სრულად... წყარო: socialjustice.org.ge

თბილისი. „უფლებები საქართველოს“ დახმარებით, ირანის მოქალაქემ თბილისის სააპელაციო სასამართლოში დავა მოიგო. „თბილისის სააპელაციო სასამართლოში მიმდინარე დავისას ბენეფიციარის ინტერესებს იცავდა  „უფლებები საქართველოს“ იურისტი მარიამ მაღრაძე, IOM-ის პროექტის - „COVID-19 და მიგრანტების საჭიროებები სამხრეთ კავკასიაში“ ფარგლებში, რომელიც ხორციელდება მოსახლეობის, ლტოლვილთა და მიგრაციის ბიუროს მხარდაჭერით“. თუ ხართ მიგრანტი და მიგაჩნიათ, რომ საჭიროებთ იურიდიულ დახმარებას, დაუკავშირდით ორგანიზაციას ნომერზე: (+995) 577 28 22 77. სრულად... წყარო: ორგანიზაციის გვერდი სოციალურ ქსელში

თბილისი. Საქართველოს სახალხო დამცველი აქვეყნებს სპეციალურ ანგარიშს თანასწორობის შესახებ, რომელიც 2021 წლის ტენდენციებს აჯამებს. სრულად... წყარო: ombudsman.ge

კახეთი. საქართველოს ახალგაზრდა იურისტთა ასოციაციის ინფორმაციით, რეორგანიზაციის გამო შტატების შემცირების მოტივით სამსახურიდან გათავისუფლებულმა პირმა თელავის მუნიციპალიტეტის მერიას დავა მოუგო. მის ინტერესებს საია იცავდა.  „სამივე ინსტანციის სასამართლომ მიიჩნია, რომ სამსახურიდან გათავისუფლება არ შეესაბამებოდა კანონის მოთხოვნებს, შესაბამისად, თელავის მუნიციპალიტეტის მერიას დაევალა გათავისუფლებული თანამშრომლის ტოლფას თანამდებობაზე აღდგენა და 2018 წლის 30 იანვრიდან სამსახურში აღდგენის დღემდე იძულებითი განაცდური ხელფასის ანაზღაურება“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის ინფორმაციით, ევროპულმა სასამართლომ დაადგინა, რომ მომჩივნის მიმართ პოლიციელთა მხრიდან განხორციელდა არასათანადო მოპყრობა და ამ ფაქტზე მიმდინარე გამოძიება არ იყო სრულყოფილი. „გამოძიების ინტერესების მიღმა დარჩა მომჩივნისთვის მიყენებული ისეთი მძიმე დაზიანება, როგორიცაა ნეკნების მოტეხილობა, რაც საქმის მასალებში წარმოდგენილი ექსპერტიზის დასკვნით დასტურდებოდა. მიუხედავად აღნიშნულისა, არცერთ პოლიციელს არ წაეყენა ბრალი აღნიშნულ ფაქტზე. დამატებით, სასამართლომ არასათანადო მოპყრობის საქმეებზე საგამოძიებო პროცესის ფარგლებში დროული სამედიცინო გამოკვლევის/ექსპერტიზის საჭიროებაზე კიდევ ერთხელ გაამახვილა ყურადღება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. კოალიცია თანასწორობისთვის აქვეყნებს რიგით მეექვსე ანგარიშს, რომელიც აფასებს 2021 წელს საქართველოში ცალკეულ ჯგუფთა თანასწორობის უფლების რეალიზებისა და დისკრიმინაციასთან ბრძოლის კუთხით არსებულ მდგომარეობას. „ანგარიშში გაანალიზებულია 2021 წლის ტენდენციები, რომელმაც გავლენა იქონია ცალკეულ ჯგუფთა უფლებრივ მდგომარეობაზე, კერძოდ, ის წინგადადგმული ნაბიჯები და არსებული გამოწვევები, რომელიც უკავშირდება სახელმწიფოს ანტიდისკრიმინაციულ პოლიტიკას, ანტიდისკრიმინაციულ კანონმდებლობას, პრაქტიკას და მოწყვლადი ჯგუფების ყოველდღიურ ყოფას“. სრულად... წყარო: equalitycoalition.ge

თბილისი. 28 აპრილს, საქართველოს სახალხო დამცველისა და გაეროს მოსახლეობის ფონდის (UNFPA) საქართველოს ოფისის თანამშრომლობით, საქართველოში არადომინანტი ეთნიკური ჯგუფის წარმომადგენელი ქალებისა და გოგოების უფლებრივ საკითხებთან დაკავშირებით შეხვედრა გაიმართა, სადაც ორი სპეციალური ანგარიში წარმოადგინეს. „ერთი ანგარიში ეხება ეთნიკური უმცირესობის წარმომადგენელი ქალებისა და გოგოების სექსუალური და რეპროდუქციული ჯანმრთელობის საკითხებსა და უფლებრივ მდგომარეობას; მეორე ანგარიშში კი ქვემო ქართლში ადრეული/ბავშვობის ასაკში ქორწინების საზიანო პრაქტიკისა და არსებული განწყობების შესახებ კვლევის ძირითადი მიგნებებია განხილული. კვლევამ აჩვენა, რომ რიგი სოციალურ-კულტურული ფაქტორები, უპირატესად კი, გენდერული ნორმები და სექსუალობასთან დაკავშირებული სტიგმა, ხშირად იწვევს არადომინანტი ეთნიკური ჯგუფების წარმომადგენელი ქალებისა და გოგოების სექსუალური და რეპროდუქციული ჯანმრთელობის უფლების დარღვევას. ამას ემატება ინფორმაციის ნაკლებობა, რომელსაც კიდევ უფრო ამწვავებს ენობრივი ბარიერი“. სრულად... წყარო: www.ombudsman.ge

თბილისი. საქართველოს დემოკრატიული ინიციატივას ინფორმაციით, რამდენიმე წუთის წინ თბილისის საქალაქო სასამართლოს მოსამართლე ზაალ მარუაშვილმა დააკმაყოფილა ნინო წილოსანის სარჩელი შოთა დიღმელაშვილის წინააღმდეგ.  „სასამართლოს გადაწყვეტილებით, შოთა დიღმელაშვილის მიერ გავრცელებული განცხადება, რომ ნინო წილოსანი არის შპს „სანოს“ მფარველი, ე.წ „კრიშა”, ცილისმწამებლურია და არღვევს მის პატივსა და ღირსებას. მიღებული გადაწყვეტილება ცხადყოფს, რომ ხელისუფლება აგრძელებს ქვეყანაში კრიტიკული მოსაზრებების ჩახშობას“, ნათქვამია ორგანიზაციის განცხადებაში. ორგანიზაცია გააგრძელებს შოთა დიღმელაშვილის ინტერესების დაცვას ზემდგომ ინსტანციებში. სრულად... წყარო: gdi.ge

თბილისი. სოციალური სამართლიანობის ცენტრის ინფორმაციით, 28 აპრილს თბილისის სახელმწიფო უნივერსიტეტის პირველი კორპუსის ეზოში სტუდენტების საპროტესტო აქცია გაიმართა. „შეგახსენებთ, რომ თსუ სწავლების ონლაინ რეჟიმს წყვეტს და სტუდენტებს აუდიტორიაში დაბრუნებას სთხოვს. თუმცა სტუდენტთა დიდი ნაწილისთვის სემესტრის დასრულებამდე დარჩენილი რამდენიმე კვირის თბილისში გატარება მნიშვნელოვან ფინანსურ ხარჯს უკავშირდება. მათ დასარჩენი არსად აქვთ და ამიტომ, აუდიტორიებში დაბრუნებას და სწავლის ამ ფორმით გაგრძელებას ვერ შეძლებენ“. სრულად... წყარო: ორგანიზაციის გვერდი სოციალურ ქსელში

თბილისი. დემოკრატიის კვლევის ინტიტუტი და ადამიანის უფლებათა ცენტრი ერთობლივი პროექტის ფარგლებში ძალადობის მსხვერპლ ბავშვებს უფასო იურიდიულ დახმარებას სთავაზობენ. კონსულტაციები განკუთვნილია ძალადობის მსხვერპლი ყველა მოზარდისთვის. გთხოვთ, დაურეკოთ იურისტებს მობილურ ტელეფონებზე: 593 75 54 44; 555 78 77 55; სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი სოლიდარობას უცხადებს თბილისის სახელმწიფო უნივერსიტეტის სტუდენტებს. 28 აპრილს, 19:00 საათზე თბილისის სახელმწიფო უნივერსიტეტის ეზოში სტუდენტები აქციას გამართავენ. „თსუ 2 მაისიდან სწავლების ონლაინ რეჟიმს წყვეტს და სტუდენტებს აუდიტორიაში დაბრუნებას სთხოვს. თუმცა უნივერსიტეტის სტუდენტთა დიდი ნაწილისთვის სემესტრის დასრულებამდე დარჩენილი რამდენიმე კვირის თბილისში გატარება მნიშვნელოვან ხარჯებს უკავშირდება, ხოლო ბევრი მათგანი აცხადებს, რომ სემესტრის დასრულებამდე აუდიტორიაში დაბრუნებას ვერ შეძლებს. მიუხედავად ამ პრობლემების გაჟღერებისა, უნივერსიტეტის ადმინისტრაცია გადაწყვეტილებას არც ცვლის და არც ასაბუთებს, სტუდენტების წუხილებს კი უპასუხოდ ტოვებს. თსუ-ს გადაწყვეტილება უნივერსიტეტის სოციალურად გულგრილი პოლიტიკის კიდევ ერთი მაგალითია, რაც განსაკუთრებით ნათლად პანდემიურ ვითარებაში გამოჩნდა“, ნათქვამია ორგანიზაციის განცხადებაში. სრულად... წყარო: socialjustice.org.ge

თბილისი. ღია საზოგადოების ფონდის ინფორმაციით, 27 აპრილს საქართველოს სახალხო დამცველის ეგიდით შექმნილმა ალტერნატიულმა სამედიცინო კონსილიუმმა მიხეილ სააკაშვილის ჯანმრთელობის მდგომარეობის შესახებ დასკვნა გამოაქვეყნა, რომლის თანახმად მესამე პრეზიდენტის მდგომარეობა დამძიმებულია. არასამთავრობო ორგანიზაციები სახელმწიფოს მიხეილ სააკაშვილისთვის ადეკვატური სამედიცინო დახმარების გაწევის თხოვნით მიმართავენ. ამავეს ავალდებულებს სახელმწიფოს საქართველოს კონსტიტუცია და საერთაშორისო სამართლებრივი კონვენციები. განცხადება სრულად... წყარო: osgf.ge

თბილისი. 28 აპრილს სამუშაო ადგილებზე გარდაცვლილ და დაშავებულ მშრომელთა საერთაშორისო დღე აღინიშნება. სოციალური სამართლიანობის ცენტრის ინფორმაციით, ბოლო წლებში, საქართველოში სამუშაო ადგილებზე გარდაცვლილთა რიცხვი იკლებს, რაც სავარაუდოდ, შრომის პოლიტიკის ეტაპობრივი რეფორმირების შედეგია. „მიუხედავად კლების დინამიკისა, ქვეყანაში სურათი კვლავ მძიმეა, ბოლო ათ წელიწადში სამუშაო ადგილზე 1 800-მდე მშრომელი დაშავდა, 500-ზე მეტი კი გარდაიცვალა. პრობლემურია, სამუშაო ადგილებზე მომხდარი უბედური შემთხვევების საქმეთა გამოძიებაც. არაეფექტიანი სისხლისსამართლებრივი რეაგირება დამსაქმებელ კომპანიებში დაუსჯელობის სინდრომს ქმნის და თავიდან ვერ ირიდებს ტრაგედიათა ჯაჭვს“.  სრულად... წყარო: socialjustice.org.ge

თბილისი. პარტნიორობა ადამიანის უფლებებისთვის (PHR) გუნდი წარმოგიდგენთ პლატფორმას „ბავშვთა უფლებების სივრცე“. „ჩვენს გუნდს მიაჩნია, რომ სასამართლო გადაწყვეტილებები ის საზოგადოებრივი სიკეთეა, რომლითაც ყველამ უნდა ისარგებლოს. სწორედ ამ მიზნით შეიქმნა ეს გვერდი. აქ PHR-ის ყველა სამართლებრივი გამარჯვების ამსახველი გადაწყვეტილება იტვირთება, პერსონალური მონაცემების დაცვით. PHR-ის გუნდს სჯერა, რომ ბავშვები, ქალები და შეზღუდული შესაძლებლობის მქონე პირები უკეთესად დაიცავენ თავის უფლებებს თუ, მათ ექნებათ ის გადაწყვეტილებები, რამაც მნიშვნელოვანი ცვლილება გამოიწვია ადამიანის უფლებების კუთხით საქართველოში“. ვებგვერდი შექმნილია ღია საზოგადოების ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი მკვლევარი, გიორგი ცინცაძე ითხვისში არსებულ მძიმე მდგომარეობაზე საუბრობს. წყარო: socialjustice.org.ge

აჭარა. საქართველოს ახალგაზრდა იურისტთა ასოციაციის (საია) აჭარის ფილიალი 2022 წლის პირველ მარტს, ბათუმში, აჭარის ავტონომიური რესპუბლიკის მთავრობის სახლთან მიმდინარე აქციისას დაკავებული 8 პირის ინტერესებს იცავდა. აქცია უკრაინაში რუსული აგრესიის შედეგად განვითარებულ მოვლენებს ეხებოდა. აქციის მიმდინარეობისას, პოლიციამ 8 პირი დააკავა წვრილმანი ხულიგნობისა და პოლიციის კანონიერი მოთხოვნისადმი დაუმორჩილებლობის საფუძვლით. „ბათუმის საქალაქო სასამართლომ საქმეები სხვადასხვა დროს განიხილა და მათგან 4 პირის მიმართ შეწყვიტა საქმის წარმოება ადმინისტრაციული სამართალდარღვევის არარსებობის გამო, 1 პირის მიმართ გამოიყენა სიტყვიერი შენიშვნა, ხოლო სამი პირი - დააჯარიმა“. ამ საქმეებს ორგანიზაცია „ღია საზოგადოების ფონდის“ მიერ დაფინანსებული პროექტის - „იურიდიული დახმარების ქსელი აქტივისტებისათვის“ ფარგლებში აწარმოებდა. სრულად... წყარო: gyla.ge

თბილისი. არასამთავრობო ორგანიზაციების ნაწილი კრიტიკულად აფასებს სისხლის სამართლის საპროცესო კოდექსში საპარლამენტო უმრავლესობის წევრების მიერ ინიცირებულ ცვლილებებს. „კანონპროექტით შესაძლებელი ხდება სისხლის სამართლის კოდექსის არაერთი მუხლით მიმდინარე გამოძიების შემთხვევაში მოქალაქეებს უვადოდ უსმინონ და მათ ამის შესახებ არ შეატყობინონ. მაშინ, როდესაც არ არსებობს კანონით გათვალისწინებული კონტროლის ეფექტიანი მექანიზმი, შემოთავაზებული ცვლილებები არსებითად აუარესებს ადამიანის პირადი ცხოვრების დაცულობის სტანდარტს და შესაძლებელს ხდის საგამოძიებო უწყებების მხრიდან უვადო ფარული მოსმენების განხორციელებას“, ნათქვამია განცხადებაში. სრულად... განცხადებაზე ხელმომწერი ორგანიზაციები მოუწოდებენ საკანონმდებლო ორგანოს, არ დაუჭიროს ინიცირებულ რედაქციას მხარი. წყარო: socialjustice.org.ge

თბილისი. საქართველოს ახალგაზრდა იურისტთა ასოციაციამ საქართველოს პარლამენტში ალტერნატიული ანგარიშები წარადგინა. დოკუმენტებში საია ადამიანის უფლებათა ევროპული სასამართლოს მიერ საქართველოს წინააღმდეგ გამოტანილი გადაწყვეტილებებისა და განჩინებების აღსრულების მიზნით სახელმწიფოს მიერ გატარებულ ზოგად ღონისძიებებს აფასებს და, დამატებით, სახელმწიფოს კონკრეტული ნაბიჯების გადადგმისკენ მოუწოდებს. სრულად... წყარო: gyla.ge

თბილისი. „საერთაშორისო გამჭვირვალობა-საქართველომ“ სარჩელით მიმართა თბილისის საქალაქო სასამართლოს 2021 წლის 5 ივლისის მოვლენების დროს ტელეკომპანიების „მთავარის“, „ფორმულასა“ და „TV პირველის“, ასევე On.ge-ს დაზარალებული 24 ჟურნალისტის უფლებების დასაცავად, რომელთა წინაშეც სახელმწიფომ არ შეასრულა მასზე კონსტიტუციით დაკისრებული ვალდებულება და არ უზრუნველყო მათი უსაფრთხო საქმიანობა. სრულად... წყარო: transparency.ge

თბილისი. სოციალური სამართლიანობის ცენტრი, ახალგაზრდა იურისტთა ასოციაცია მწვანე ალტერნატივა და საქართველოს მწვანეთა მოძრაობა/დედამიწის მეგობრები საქართველო განცხადების თანახმად, საგანგაშოა, რომ ითხვისის შესახებ გეოლოგიურ დასკვნაში „ჯორჯიან მანგანეზის” პასუხისმგებლობა არ იკვეთება. დასკვნის მიხედვით, ითხვისში შექმნილი ვითარების გამომწვევ მიზეზად კი რამდენიმე ფაქტორი სახელდება: გასული საუკუნის სამოცდაათიან და ოთხმოციან წლებში განხორციელებული სამთო-მოპოვებითი სამუშაოები; რთული გეოლოგიური პირობები; უხვი ატმოსფერული ნალექი და სეისმური ბიძგები. „დღეს ითხვისში საცხოვრებლად უვარგისია უკვე ათამდე სახლი, ხოლო სხვები უკიდურესად ავარიულია. მეურნეობის შენარჩუნებისა და პირუტყვის მოსავლელად მოსახლეების ნაწილს ჯერაც უწევს საცხოვრებლად საშიშ ზონებში ყოველდღიურად დაბრუნება, ნაწილი კი აგრძელებს ავარიულ შენობებში, ნგრევის საფრთხის ქვეშ ცხოვრებას. უცნობია ისიც, თუ რამდენად დგას ითხვისის და ჭიათურის სხვა სოფლების მოსახლეობა მსგავსი საფრთხის წინაშე - ამ საკითხის შესწავლას სრულყოფილი, გამჭირვალე და ცოდნაზე დაფუძნებული კვლევა სჭირდება, სახელმწიფო უწყებების მხრიდან კი საკუთარი პასუხისმგებლობის აღიარება“. სრულად... წყარო: socialjustice.org.ge

თბილისი. საქართველოს დემოკრატიული ინიციატივას (GDI) ინფორმაციით, აშშ-ს სახელმწიფო დეპარტამენტმა 2022 წლის 12 აპრილს გამოაქვეყნა 2021 წლის ანგარიში საქართველოში ადამიანის უფლებების მდგომარეობის შესახებ. ანგარიშში აშშ-ს სახელმწიფო დეპარტამენტმა მნიშვნელოვანი ყურადღება გაამახვილა საქართველოს კომუნიკაციების ეროვნული კომისიის საქმიანობაზე და ამ კუთხით მმართველი პარტიის გავლენებზე მიუთითა. ორგანიზაციის ცნობით, მათი დაკვირვების შედეგები თანხვედრაშია დეპარტამენტის შეფასებასთან. მთელი წლის განმავლობაში გამოიკვეთა არაერთი მაგალითი, როდესაც კომისია ცდილობდა კრიტიკულად განწყობილი მედიის შეზღუდვას. სრულად... წყარო: ორგანიზაციის გვერდი სოციალურ ქსელში

თბილისი. გაეროს განვითარების პროგრამა (UNDP) და დიდი ბრიტანეთის მთავრობა ხელს უწყობენ სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს სერვისის დიზაინისა და მიწოდების გაუმჯობესებაში. 15 აპრილს გამართულ შეხვედრაზე სამოქალაქო საზოგადოებისა და დონორი ორგანიზაციების წარმომადგენლებმა, და ექსპერტებმა ექვსთვიანი პროექტის შედეგები და მიღწევები შეაჯამეს. ინიციატივა განხორციელდა ინოვაციებისა და რეფორმების ცენტრის მიერ გაეროს განვითარების პროგრამისა (UNDP) და ბრიტანეთის მთავრობის ხელშეწყობით. სრულად... წყარო: ორგანიზაციის გვერდი სოციალურ ქსელში