თბილისი. 25 ნოემბერი ქალთა მიმართ ძალადობის აღმოფხვრის საერთაშორისო დღეა. „ქალთა მიმართ ძალადობა ფართოდ გავრცელებული პრობლემაა. საქართველოში ყოველი ხუთი ქალიდან ერთს ერთხელ მაინც გამოუცდია სექსუალური ძალადობა ან/და სექსუალური შევიწროება, მათ შორის ბავშვობაში". სრულად... წყარო: eu4georgia.eu

თბილისი. სოციალური სამართლიანობის ცენტრი ეხმიანება ირაკლი ღარიბაშვილის განცხადებას ნარკოპოლიტიკის გამკაცრების შესახებ. „მივიჩნევთ, რომ უკიდურესად პრობლემურია პრემიერ-მინისტრის მხრიდან რეპრესიასა და დასჯაზე ორიენტირებულ რიტორიკის გამოყენება. პრემიერ-მინისტრის განცხადება, ზრუნვაზე ორიენტირებული პოლიტიკის წახალისების ნაცვლად, ნარკომომხმარებლების სტიგმატიზებას და საზოგადოებისგან კიდევ უფრო გარიყვას იწვევს, ხოლო ე.წ. სააფთიაქო ნარკომანიის ჭრილში გამოთქმული მოსაზრებები პრობლემის საფუძვლების აღმოფხვრისკენ არ არის მიმართული“, ნათქვამია განცხადებაში. სრულად... წყარო: socialjustice.org.ge

თბილისი. საფარის ინფორმაციით, ჟურნალისტური ეთიკის ქარტიამ დააკმაყოფილა ორგანიზაციის საჩივარი: „საფარი ნატო გოგელიას წინააღმდეგ“. „საქმე ეხება პედოფილიის შემთხვევას, რომლის გაშუქების დროსაც, ჟურნალისტმა სავარაუდო მსხვერპლის იდენტიფიცირების სტანდარტები არ დაიცვა და ამბავი მსხვერპლის მეზობლებშიც კი გაავრცელა“. სრულად... წყარო: sapari.ge

თბილისი. 3-10 დეკემბერს ილიას სახელმწიფო უნივერსიტეტი აღმოსავლეთ-დასავლეთის მართვის ინსტიტუტის პროგრამასთან „კანონის უზენაესობის მხარდაჭერა საქართველოში” (USAID/PROLoG) თანამშრომლობით უმასპინძლებს ადამიანის უფლებების სამართლის საუნივერსიტეტო კვირეული 2021-ის რამდენიმე ღონისძიებას. წყარო: ილიაუნის გვერდი სოციალურ ქსელში

თბილისი. ორგანიზაცია „საფარი“ აქვეყნებს კვლევას: უფლებადამცველების საჭიროებების კვლევა საქართველოში. „უფლებადამცველები უმნიშვნელოვანეს როლს ასრულებენ დემოკრატიზაციის პროცესში და ხშირად ძალადობას, პატიმრობას, წამებას, დეფამაციას, სამუშაო სივრციდან გარიყვას, გადაადგილების თავისუფლების შეზღუდვას, ზოგიერთ ქვეყანაში კი სიკვდილსა და იძულებით გაუჩინარებას გამოცდიან ხოლმე. ბოლო წლების განმავლობაში, ისინი უამრავი რისკისა და საფრთხის წინაშე დგანან. ხშირ შემთხვევაში, უფლებადამცველების მიმართ არსებული საფრთხეები შემთხვევითი არ არის; უმეტეს შემთხვევაში, ძალადობრივი თავდასხმები განზრახ და კარგად დაგეგმილი პასუხია მათ საქმიანობაზე. ეს გამოწვევები ადამიანის უფლებათა დამცველების ყოველდღიური მუშაობისას უსაფრთხოების სრულყოფილი და დინამიკური სტრატეგიების დანერგვას საჭიროებს. უფლებადამცველს რომ უბრალო რჩევა მისცეს ვინმემ, „რომ თავს გაუფრთხილდეს“, საკმარისი აღარ არის. საჭიროა მათი უსაფრთხოების კარგი მენეჯმენტი და კონკრეტული სტრატეგია“. სრულად... წყარო: sapari.ge

თბილისი. სოციალური სამართლიანობის ცენტრი აქვეყნებს ანალიტიკურ დოკუმენტს: დეკრეტული შვებულება 2020 წლის შრომის რეფორმამდე და მის შემდეგ. „დასაქმებულთათვის უმთავრეს პრობლემა დეკრეტული შვებულების ანაზღაურებაა, რომელიც მთელი დეკრეტული შვებულების განმავლობაში სახელმწიფოს მხრიდან გასაცემ ერთჯერად 1 000 ლარს ითვალისწინებს. მინიმალური ანაზღაურების პირობებში, ცხადია მშობელი ბავშვის მოვლის ღირსეულ უზრუნველყოფას ვერ ახერხებს, რაც საბოლოოდ დეკრეტული შვებულების არასრულად გამოყენებაში, სამსახურში მაქსიმალურად სწრაფად დაბრუნებასა და პრაქტიკულად, დეკრეტული შვებულების უფლების შეზღუდვაში გამოიხატება. 2020 წლის რეფორმამ ბავშვის მამას ბავშვის მოვლის გამო შვებულების აღების შესაძლებლობა მისცა, თუმცა დღესდღეობით ბავშვის დედასა და მამას დეკრეტული შვებულების ერთდროულად გამოყენების საშუალება არ აქვთ. შრომის რეფორმის მცირე პოზიტიური ცვლილებების მიუხედავად, დეკრეტული შვებულების საკანონმდებლო სტანდარტი ღირსეული შრომის უფლების სათანადო დაცვას, აღსრულებასა და დასაქმებულთა თანასწორობის უზრუნველყოფას კვლავ ვერ ხერხებს“. სრულად... წყარო: socialjustice.org.ge

თბილისი. 2021 წლის 15 ნოემბრიდან საქართველოს სახალხო დამცველი პირველად შეუდგა ომბუდსმენის საერთაშორისო ინსტიტუტის (IOI) მსოფლიოს მმართველი საბჭოს წევრის უფლებამოსილების განხორციელებას. საბჭოში სახალხო დამცველის აპარატი ევროპის რეგიონის წარმომადგენელი იქნება, რომლის წევრადაც იგი 2019 წელს აირჩიეს. მსოფლიოს მმართველი საბჭო აკონტროლებს ორგანიზაციის საქმიანობას და იღებს გადაწყვეტილებებს მისი მომავალი აქტივობების თაობაზე. სრულად... წყარო: ombudsman.ge

თბილისი. „სამართლიანი არჩევნების“ ცნობით, ორგანიზაციის დახმარებით, ორი მოქალაქე სამახურში აღდგა და იძულებითი განაცდური აუნაზღაურდა. „მოსარჩეელეების განმარტებით, მათი სავარაუდო პოლიტიკური დევნა მას შემდეგ დაიწყო, რაც დმანისის მუნიციპალიტეტის მერს, გიორგი ტატუაშვილს წინასაარჩევნო კამპანიაში ჩართვაზე უარი უთხრეს. გადაწყვეტილება დაუსაბუთებელი და სამართლებრივი საფუძვლების სათანადო გამოკვლევის გარეშე იყო მიღებული". ორგანიზაცია აგრძელებს უკანონოდ გათავისუფლებული პირების უფასო იურიდიულ დახმარებას სრულად... წყარო: ორგანიზაციის გვერდი სოციალურ ქსელში

თბილისი. საქართველოს სამოქალაქო საზოგადოების ორგანიზაციების ნაწილი შეშფოთებულია ხელისუფლების წარმომადგენლების მხრიდან საქართველოს სახალხო დამცველის მიმართ გახშირებული თავდასხმების გამო. „სახალხო დამცველი წარმოადგენს ერთადერთ დამოუკიდებელ კონსტიტუციურ ინსტიტუტს, რომელსაც სახელმწიფო მიტაცების პირობებში მმართველი პარტია ვერ აკონტროლებს. ომბუდსმენის საქმიანობა ყველა მიუკერძოებელი შემფასებლის მიერ აღიარებულია, როგორც დამოუკიდებელი და მაღალპროფესიონალური. აშშ-ის სახელმწიფო დეპარტამენტის, ევროპარლამენტარებისა და ამნესტი ინთერნეიშენალის ბოლო განცხადებებიც სწორედ ამის დასტურია. ხელმომწერი ორგანიზაციები, მოვუწოდებთ ხელისუფლებას შეწყვიტოს თავდასხმები სახალხო დამცველის მისამართით და შექმნას ყველა პირობა კონსტიტუციური ორგანოს შეუფერხებელი საქმიანობისთვის“, ნათქვამია ერთობლივ განცხადებაში. სრულად... წყარო: osgf.ge

კახეთი. ორგანიზაციებმა „ცვლილებები თანაბარი უფლებებისათვის“ და „კოალიცია დამოუკიდებელი ცხოვრებისათვის“ კახეთში მოქმედ ადვოკატებთან გაეროს შეზღუდული შესაძლებლობის მქონე პირთა უფლებების კონვენციის თემაზე ორდღიანი ტრენინგი ჩაატარეს. „შეხვედრები ევროკავშირის პროექტის, „სამოქალაქო საზოგადოება შეზღუდული შესაძლებლობის მქონე პირთა უფლებებისთვის“, ფარგლებში გაიმართა და მას 28 ადვოკატი დაესწრო“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციისა და სოციალური სამართლიანობის ცენტის ინფორმაციით, კულტურის, სპორტისა და ახალგაზრდობის მინისტრად თეა წულუკიანის დანიშვნის შემდეგ ეროვნულ მუზეუმსა და მის დაქვემდებარებაში არსებულ დაწესებულებებში მასშტაბური საშტატო ცვლილება დაიწყო, რის შედეგადაც 10 თანამშრომელი თანამდებობიდან გათავისუფლდა. „მიგვაჩნია, რომ პროცესმა არა მხოლოდ ხელმძღვანელობისთვის არასასურველი კადრების ჩამოშორების სახე მიიღო, არამედ გამოაჩინა ისიც, რომ ამ გადაწყვეტილებების მიზანი სამუზეუმო სფეროს კონტროლი და ცენზურაა. ორი დასაქმებულის ინტერესს სოციალური სამართლიანობის ცენტრი და ახალგაზრდა იურისტთა ასოციაცია იცავს. ორგანიზაციებმა უკვე მიმართეს თბილისის საქალაქო სასამართლოს და თანამდებობიდან გათავისუფლების ბათილად ცნობა, ტოლფას თანამდებობებზე აღდგენა და ერთ-ერთის შემთხვევაში განსხვავებული მოსაზრებების გამო პირდაპირი დისკრიმინაციის დადგენა მოითხოვეს“, ნათქვამია განცხადებაში. სრულად... წყარო: gyla.ge

თბილისი. სოციალური სამართლიანობის ცენტრმა მოამზადა ბროშურა, რომლის მიზანია საზოგადოების ინფორმირება ნარკოტიკებთან დაკავშირებით არსებულ სამართლებრივ შეზღუდვებსა და სასჯელებზე. „ნარკოპოლიტიკის სფეროში, ბოლო წლებში, საკონსტიტუციო სასამართლოს მიერ მიღებული გადაწყვეტილებების საფუძველზე, ლიბერალური მიდგომების დანერგვისკენ მიმართული არაერთი საკანონმდებლო ცვლილება განხორციელდა. ცვლილებები შეეხო, მათ შორის, მარიხუანის მოხმარების რეგულირებას. თუმცა, სამწუხაროდ, საზოგადოების აღქმები ნარკოტიკულ დანაშაულებსა თუ სამართალდარღვევებთან მიმართებით, ხშირად არ ემთხვევა მოქმედ კანონმდებლობას“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. „უფლებები საქართველოს“ ცნობით, ორგანიზაციის დახმარებით, ეგვიპტის მოქალაქემ ბინადრობის ნებართვასთან დაკავშირებული სასამართლო დავა მოიგო. სრულად... წყარო: ორგანიზაციის გვერდი სოციალურ ქსელში

თბილისი. 2021 წლის მარტიდან საქართველოს ახალგაზრდა იურისტთა ასოციაციამ (საია) საქართველოს სახალხო დამცველის აპარატთან თანამშრომლობით და USAID/PROLoG-ის მხარდაჭერით, დაიწყო საპილოტე პროექტის განხორციელება, რომლის მიზანიც პატიმრებისათვის სამართლებრივი დახმარების გაწევა იყო. „წინასწარ შემუშავებული კრიტერიუმების შესაბამისად, ჯამში შეირჩა 10 პატიმრის საქმე, რომელთა მიმართაც გამოყენებული იყო დისციპლინური პასუხისმგებლობის სხვადასხვა ზომა. სასამართლოში წარმომადგენლობას საია ახორციელებდა. ამ დროისთვის რუსთავისა და თბილისის საქალაქო სასამართლოებში უკვე დასრულდა 5 საქმის განხილვა. ხუთივე საქმეზე სასამართლოებმა დააკმაყოფილეს სასარჩელო მოთხოვნები და შესაბამისად, უკანონოდ იქნა ცნობილი კონკრეტული პენიტენციური დაწესებულებების მიერ პატიმრებისთვის დისციპლინური პასუხისმგებლობის დაკისრება. დანარჩენ ხუთ საქმეზე სასამართლო განხილვა ჯერჯერობით გრძელდება. სახალხო დამცველის აპარატი და საია იმედოვნებენ, რომ ეს საპილოტე პროექტი და მიღწეული დადებითი შედეგები, სასამართლოს მიერ დადგენილი სტანდარტები პოზიტიურ გავლენას მოახდენს პენიტენციურ დაწესებულებებში პატიმართა მიმართ დისციპლინური პასუხისმგებლობის გამოყენების არსებულ პრაქტიკაზე“. სრულად... წყარო: ombudsman.ge

საქართველოს ახალგაზრდა იურისტთა ასოციაციის საერთაშორისო სამართალწარმოების გუნდის ხელმძღვანელმა, თამარ ონიანმა, მონაწილეობა მიიღო ევროპის საბჭოს მინისტრთა კომიტეტისა და მომჩივანთა წარმომადგენლებისა თუ არასამათავრობო ორგანიზაციების ერთობლივ შეხვედრაში. შეხვედრაზე ორგანიზაციის წარმომადგენელმა მინისტრთა კომიტეტს გააცნო იდენტობის ჯგუფის საქმეების აღსრულების მდგომარეობა, და, დამატებით, ასევე, მიმოიხილა 2021 წლის 05 ივლისს განვითარებული ძალადობრივი მოვლენები. სრულად... წყარო: gyla.ge

თბილისი. ომბუდსმენი „ქართული ოცნების“ თავმჯდომარის, ირაკლი კობახიძის „მუქარის შემცველ განცხადებებს“ ეხმაურება. „კობახიძე საუბრობს სახალხო დამცველის და მის მიერ მოწვეული ექიმების შესაძლო პასუხისმგებლობასთან დაკავშირებით. აღნიშნული რიტორიკა სცილდება სამართლებრივ ჩარჩოს, წარმოადგენს დამოუკიდებელ კონსტიტუციურ ორგანოზე და მის ექსპერტებზე თავდასხმისა და დაშინების მცდელობას და ეწინააღმდეგება ადამიანის უფლებების ეროვნულ და საერთაშორისო ვალდებულებებს.  მოვუწოდებთ გაერთიანებული ერების ორგანიზაციის, ევროპის საბჭოს, ეუთო/ოდირის, საქართველოში აკრედიტებულ დიპლომატიურ მისიებსა და ომბუდს გაერთიანებებს, შეისწავლონ აღნიშნული ფაქტი და თავიანთი მანდატის ფარგლებში შესაბამისი შეფასება მისცენ მას“, ნათქვამია სახალხო დამცველის განცხადებაში. სრულად... წყარო: ombudsman.ge

თბილისი. სოციალური სამართლიანობის ცენტრი ინფორმაციით, 18 ნოემბერს ეკონომიკისა და მდგრადი განვითარების სამინისტრომ რელიგიურ ორგანიზაციას - არარეგისტრირებული კავშირი „იმამ ალის მეჩეთი“, უარი უთხრა მარნეულში მდებარე მეჩეთის სარგებლობაში გადაცემაზე. „სამინისტრომ ეს გადაწყვეტილება კვლავ იმ უსამართლო და დისკრიმინაციულ არგუმენტაციას დააფუძნა, რომ მუსლიმ თემში მხოლოდ სსიპ „სრულიად საქართველოს მუსლიმთა სამმართველოა“ (შემდგომში სამმართველო) სახელმწიფოს მიერ აღიარებული ის რელიგიური ორგანიზაცია, რომელსაც ისტორიულ რელიგიურ ნაგებობებზე უფლებების მოპოვებისა და სახელმწიფოსთან სამართლებრივ ურთიერთობებში შესვლის ლეგიტიმაცია აქვს. იმ პირობებში, როდესაც სამმართველოს იმამ ალის მეჩეთთან არც სამართლებრივი და არც ფაქტობრივი კავშირი არ აქვს, ეს გადაწყვეტილება რელიგიის თავისუფლების სფეროში სახელმწიფოს თვითნებური და დისკრიმინაციული ჩარევის კიდევ ერთ მაგალითს წარმოადგენს“. სრულად... წყარო: socialjustice.org.ge

კახეთი. ორგანიზაციები „ცვლილებები თანაბარი უფლებებისათვის” და „კოალიცია დამოუკიდებელი ცხოვრებისათვის” „ლაგოდეხის დამოუკიდებელი ცხოვრების ცენტრთან“ ერთად, ლაგოდეხის კაბალის თემის შეზღუდული შესაძლებლობის მქონე წევრებს შეხვდნენ. „შეხვედრაზე თემის წევრებმა არსებულ ბარიერებსა და პრობლემებზე ისაუბრეს და მათი მოგვარების გზები განიხილეს“.  სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, ორგანიზაციამ საცხოვრისის სფეროში უზენაეს სასამართლოში მნიშვნელოვანი დავა მოიგო. „სასამართლომ გაიზიარა წინა ინსტანციის სასამართლოების გადაწყვეტილებები, არ დააკმაყოფილა თბილისის მუნიციპალიტეტის მერიის საჩივარი და განაცხადა, რომ ერთ ადამიანზე მხოლოდ 6.4 კვ.მ საცხოვრებელი ფართის გამოყოფა სათანადო საცხოვრებლის უფლების დარღვევაა“. სრულად... წყარო: socialjustice.org.ge

თბილისი. სახალხო დამცველმა ნინო ლომჯარიამ გამოაქვეყნა მიეს მიერ შექმნილი სპეციალისტთა/ექსპერტთა ჯგუფის დასკვნა მიხეილ სააკაშვილის სამედიცინო მდგომარეობის მონიტორინგის შედეგებზე. დასკვნის თანახმად, მესამე პრეზიდენტის ჯანმრთელობის მდგომარეობა კრიტიკულია. „პაციენტის მდგომარეობის კრიტიკულობიდან გამომდინარე, მისი მკურნალობის გაგრძელება დაუყოვნებლივ რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში, კერძოდ, ინტენსიური თერაპიის განყოფილებაში, რის პირობებსაც მე-18 დაწესებულების კლინიკა არ აკმაყოფილებს“. სრულად... წყარო: ომბუდსმენის გვერდი სოციალურ ქსელში

თბილისი. ღია საზოგადოების ფონდის ფინანსური მხარდაჭერით, მარიამ ნატროშვილმა შეაგროვა უსახლკაროდ დარჩენილი ადამიანების ზეპირი ისტორიები და წიგნად გამოსცა. „საქართველოში თავზე ჭერიდან უსახლკარობამდე ერთი ნაბიჯი, ერთი ამბავია. აქ თავმოყრილი ამბების გმირების ნაწილს ერთ დროს სახლი ჰქონდათ, დღეს კი თავშესაფარში ცხოვრობენ. ეს ამბები იქ შევაგროვეთ. ქალაქის ნაპირებზე გაფანტული თავშესაფრები ბევრ ერთმანეთისგან განსხვავებულ და თან ერთნაირ ამბავს იტევს“. წიგნი... წყარო: ღია საზოგადოების ფონდი გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) მიიჩნევს, რომ მიხეილ სააკაშვილის საქმეთა განხილვა ამ დრომდე ბრალდებულის სამართლიანი სასამართლოს უფლების უგულებელყოფით მიმდინარეობს. „აღნიშნული აზიანებს, როგორც ბრალდებულის უფლებრივ მდგომარეობას, ისე სასამართლოს რეპუტაციასა და სასამართლო სხდომის საქვეყნოობის პრინციპს, ასევე ამკვიდრებს საფრთხის შემცველ პრეცედენტს“. სრულად... წყარო: idfi.ge