თბილისი. სახალხო დამცველი 1 აგვისტოს, ტელეკომპანია მთავარი არხის დირექტორის ნიკა გვარამიას მიერ, ამავე არხის ეთერით გავრცელებულ ე.წ. ოპერატიულ კრებსებს ეხმიანება, რომელიც, გვარამიას განცხადებით, სახელმწიფო უსაფრთხოების სამსახურის მიერ პოლიტიკოსებზე, არასამთავრობო ორგანიზაციებზე, სასულიერო პირებზე, ჟურნალისტებზე, დიპლომატებზე, ბიზნესმენებსა და საჯარო მოხელეებზე თვალთვალს ასახავს. „სახალხო დამცველი მოუწოდებს საქართველოს პარლამენტს, გამოიყენოს მის ხელთ არსებული საზედამხედველო მექანიზმები ფარული მიყურადების მოქმედი სისტემის შესამოწმებლად. ასევე აუცილებელია საკანონმდებლო ზედამხედველობის გაძლიერება და მეტი ინსტრუმენტისა და მექანიზმის შემოტანა, საკონსტიტუციო სასამართლოს 2016 წლის 14 აპრილის გადაწყვეტილების შესაბამისად. ფარული აუდიო და ვიდეოჩანაწერების, მათ შორის, პირადი ცხოვრების ამსახველი მასალის გავრცელების მძიმე პრაქტიკის გათვალისწინებით, სახალხო დამცველი ასევე იმედოვნებს, რომ საკონსტიტუციო სასამართლო უახლოეს მომავალში მიიღებს გადაწყვეტილებას, რომლითაც კიდევ ერთხელ დადასტურდება ხსენებული რისკების არსებობა და მათზე მყისიერი სამართლებრივი რეაგირების აუცილებლობა“. სრულად... წყარო: ombudsman.ge

თბილისი. საქართველოს სახალხო დამცველი აქვეყნებს სპეციალურ ანგარიშს: „ბავშვზე სექსუალური ძალადობისა და სექსუალური ექპლოატაციის დანაშაულებზე მართლმსაჯულების განხორციელება“. „კვლევის შედეგებმა ცხადყო, რომ ეროვნული კანონმდებლობა ბავშვზე სექსუალური ძალადობის და სექსუალური ექპლოატაციის შესახებ კვლავ არ შეესაბამება ადამიანის უფლებათა იმ სავალდებულო ინსტრუმენტებს, რომელთა მონაწილეც საქართველოა.  მნიშვნელოვან პრობლემად რჩება ბავშვზე სექსუალური ძალადობის დანაშაულების დროული გამოვლენა/აღკვეთა, მართლმსაჯულების სათანადო განხორციელება, ბავშვის საჭიროებებზე მორგებული გარემოს უზრუნველყოფა და მათი მეორეული ვიქტიმიზაციისგან დაცვა. ასევე, სახელმწიფოს არ გააჩნია კონკრეტულად სექსუალური ძალადობის მსხვერპლი ბავშვების რეაბილიტაციასა და მხარდაჭერაზე ორიენტირებული სერვისები“. სრულად... წყარო: ombudsman.ge

თბილისი. ომბუდსმენი აცხადებს, რომ თბილისში მცხოვრები აზერბაიჯანელი ბლოგერი ჰუსეინ ბაკიხანოვი ორჯერ დაუკავშირდა სახალხო დამცველის ოფისს.  პირველად მას განუმარტეს საერთაშორისო დაცვის სტატუსის მოპოვების პროცედურები, ასევე მიუთითეს ის ორგანიზაციები, რომლებიც მსგავს შემთხვევებში პირებს უფასო იურიდულ დახმარებას უწევენ. მეორე კომუნიკაცია მისი გარდაცვალების დღეს შედგა. ბლოგერი მის მიმართ განხორციელებული ძალადობის ფაქტზე საუბრობდა და ამ შემთხვევაშიც, აპარატის მხრიდან მას სამართლებრივი დახმარების გამწევი ორგანიზაციების საკონტაქტო ინფორმაცია გაუზიარეს და შესთავაზეს, რომ იმ შემთხვევაში თუ სამართალდამცავი ორგანოები დაარღვევდნენ მის უფლებებს, შეეძლო განცხადებით მოემართა. ომბუდსმენის აპარატმა ჰუსეინ ბაკიხანოვის გარდაცვალების საქმის შესწავლა დაიწყო. სრულად... წყარო: ombudsman.ge

თბილისი. სამოქალაქო საზოგადოების ორგანიზაციები მიიჩნევენ, რომ ხელისუფლება სახელმწიფო უსაფრთხოების სამსახურს ტოტალური კონტროლის მექანიზმად იყენებს. „სახელმწიფო უსაფრთხოების სამსახურის საქმიანობის შესახებ, მთავარი არხის ეთერში გასული მასალა კიდევ ერთხელ მიუთითებს ქვეყანაში არსებულ მასობრივი კონტროლის და ადამიანის უფლებების შელახვის უმძიმეს პრაქტიკაზე. მყიფე დემოკრატიის, მძიმე პოლიტიკური კრიზისების ფონზე, სახელმწიფო უსაფრთოხების სამსახური ჩამოყალიბდა ქვეყანაში მკაცრად პოლიტიზირებულ, გავლენიანი პოლიტიკური ფიგურების ინტერესების სადარაჯოზე მყოფ უწყებად, რომელიც კონკრეტული ჯგუფის პოლიტიკური ძალაუფლების შენარჩუნებას, თვალთვალით, დაშინების და შანტაჟის ინსტრუმენტით ცდილობს“, ნათქვამია ერთობლივ განცხადებაში. სრულად... წყარო: gyla.ge

სამცხე-ჯავახეთი. 29 ივლისს „დემოკრატიული ჩართულობის ცენტრების ქსელის“ ახალციხის ოფისის ორგანიზებით გაიმართა საინფორმაციო შეხვედრა თემაზე: „პერსონალური მონაცემების დაცვა“.  „შეხვედრის მიზანი იყო ცნობიერების ამაღლება პერსონალური მონაცემების, კანონის შესაბამისად მონაცემების დამუშავების საკითხებთან დაკავშირებით, ასევე არასრულწლოვანთა მონაცემების და COVID–19-ის წინააღმდეგ ბრძოლის პროცესში პერსონალურ მონაცემთა დამუშავებაზე“.                          წყარო: ორგანიზაციის გვერდი სოციალურ ქსელში

თბილისი. ღია საზოგადოების ფონდის მხარდაჭერით, საქართველოს დემოკრატიული ინიციატივამ, საქართველოს ახალგაზრდა იურისტთა ასოციაციამ, სოციალური სამართლიანობის ცენტრმა, უფლებები საქართველო-მ და ადამიანის უფლებათა ცენტრმა დაიწყეს ერთობლივი პროექტი „დახმარების ქსელი აქტივისტებისათვის“. „პროექტის მოკლევადიანი მიზანია სამოქალაქო აქტივისტების დაცვა უკანონო დევნისგან, რაც, თავის მხრივ, უზრუნველყოფს სამოქალაქო აქტივიზმისა და შეკრებისა და გამოხატვის თავისუფლების რეალიზებისთვის უფრო ხელსაყრელ გარემოს“. სრულად... წყარო: უფლებები საქართველოს გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) მიმართვის საფუძველზე, ომბუდსმენმა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს (შემდეგში - ჯანდაცვის სამინისტროს) მხრიდან ირიბი დისკრიმინაციის ფაქტი დაადგინა. „ეტლით მოსარგებლე ორსულმა ქალმა ერთ-ერთ კერძო კლინიკას მიმართა, რათა სახელმწიფოს მიერ „დედათა და ბავშვთა ჯანმრთელობის“ სახელმწიფო პროგრამით გათვალისწინებული უფასო მომსახურება მიეღო. კლინიკა სრულად მიუწვდომელი იყო, კერძოდ, შენობას არ ჰქონდა პანდუსი, ასევე, ექიმის კაბინეტამდე მისასვლელი გზა კიბით იყო დაკავშირებული, საპირფარეშოთი სარგებლობა ეტლით მოსარგებლისთვის სრულიად შეუძლებელი იყო”. სრულად... წყარო: phr.ge

თბილისი. გაეცანით ტოლერანტობისა და მრავალფეროვნების ცენტრის (TDI) ანგარიშს: უცხოელთა უფლებრივი მდგომარეობა საქართველოში პანდემიის პირობებში და მის მიღმა. ანგარიში მიმოიხილავს 2020 წლისა და 2021 წლის ივნისამდე პერიოდს და ეხმაურება შემდეგ საკითხებს: უცხოელთა უფლებები და გამოწვევები კოვიდ 19-ის პანდემიის პირობებში; საქართველოში ბინადრობის ნებართვის მიღების საკითხები, კანონმდებლობა და პრაქტიკა; სახელმწიფო პოლიტიკა საქართველოში თავშესაფრის მაძიებლების მიმართ; რასობრივი დისკრიმინაციის დანაშაულის გამოძიების სუს-ის დაქვემდებარების პრობლემა; ბინადრობის ნებართვაზე უარის სტატისტუკრი მონაცემები; რასობირვი შეუწყნარებლობით ჩადენილი დანაშაულების გამოძიების სტატისტიკა; ანგარიში ქართულად... ანგარიში მომზადდა TDI-ს პროექტის ფარგლებში, რომელიც მხარდაჭერილია USAID-PROLoG - Promoting Rule of Law in Georgia Activity-ს მიერ. წყარო: ორგანიზაციის გვერდი სოციალურ ქსელში

თბილისი. სახალხო დამცველის აპარატისა და გაეროს ლტოლვილთა უმაღლესი კომისრის წარმომადგენლობის ერთობლივი პროექტის ფარგლებში „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ ანგარიშის პრეზენტაცია გაიმართა. „ანგარიშში საუბარია უცხოელთა, მათ შორის მიგრანტთა, თავშესაფრის მაძიებელთა, საერთაშორისო დაცვის და მოქალაქეობის არმქონე პირთა მდგომარეობაზე საქართველოში, სახალხო დამცველის წარმომადგენლების მიერ ჩატარებული მონიტორინგის შედეგებზე, პოზიტიურ ტენდენციებსა და გამოწვევებზე“. სრულად... წყარო: ombudsman.ge

თბილისი. ომბუდსმენის მიიჩნევს, რომ „საგანგაშოა ბოლო პერიოდში ჟურნალისტური საქმიანობის ხელშეშლისა, ჟურნალისტების ფიზიკური და სიტყვიერი შეურაცხყოფის შემთხვევების ზრდა, რამაც 5 ივლისის ძალადობრივი მოვლენების შემდგომ, ფაქტობრივად ყოველდღიური ხასიათი მიიღო“. სახალხო დამცველი მოუწოდებს სამართალდამცავ ორგანოებს და პოლიტიკური თანამდებობის პირებს დროულად მოახდინონ რეაგირება 5-6 ივლისს და შემდგომ პერიოდში გამოვლენილ დანაშაულებრივ ქმედებებზე და არ დაუშვან ჟურნალისტებზე ძალადობა... სრულად... წყარო: ombudsman.ge

თბილისი. სოციალური სამართლიანობის ცენტრი აქვეყნებს ორგანიზაციის იურისტის თეო ფირანიშვილის მოსაზრებას თუ რა პრობლემებს აწყდებიან საქართველოში ეთნიკური უმცირესობები, როდესაც პოლიტიკური მონაწილეობის იდეაზე ვსაუბრობთ. „ერთ-ერთი მიზეზი დომინანტური პოლიტიკური ელიტის დამოკიდებულებებია, რომ, თითქოს, ეს ადამიანები საქართველოში უცხოები და სტუმრები არიან“. წყარო: socialjustice.org.ge

თბილისი. სოციალური სამართლიანობის ცენტრი აქვეყნებს ორგანიზაციის მკვლევრის, ქამრან მამედლის მოსაზრებას, რეალურად, რა უშლით ხელს ეთნიკურ უმცირესობებს, იყვნენ პოლიტიკურ ცხოვრებაში აქტიურად ჩართულნი. „არ წარმოთქმული და მწარე სიმართლე არის შემდეგი: ჩვენს ქვეყანაში უმცირესობები დანახულნი არიან, როგორც მეორეხარისხოვანი მოქალაქეები, რომლებიც ნაკლებად ცივილიზებულად, ნაკლებად განათლებულად და კულტურულად არიან მონიშნულნი“. წყარო: socialjustice.org.ge

თბილისი. სოციალური სამართლიანობის ცენტრმა ოჯახის წევრების მომართვის საფუძველზე შეისწავლა ნამახვანჰესის მშენებლობის საწინააღმდეგო აქციაზე დაკავებული ძმები წულუკიძეების, ძმები ჭელიძეებისა და მათი ნათესავების, ასევე ელდარ ანთაძის სისხლის სამართლის საქმე და წარმოადგენს მითითებული საქმის სამართლებრივ შეფასებას. ორგანიზაცია მიიჩნევს, რომ „წარდგენილი ბრალდება აშკარად დაუსაბუთებელია, პროკურატურამ ვერ შეკრიბა ნეიტრალური და სანდო მტკიცებულებები საქმეზე და საპროცესო დარღვევები და ბრალდებული პირების რელიგიურ და საჯარო საქმიანობასთან დაკავშირებული კითხვები საქმეში სხვა, თვითნებური ინტერესის არსებობის შესახებ ეჭვებს ავლენს“. სრულად... წყარო: socialjustice.org.ge

აჭარა. ტოლერანტობისა და მრავალფეროვნების ცენტრის ინფორმაციით, ბათუმის მერია აგრძელებს მუსლიმი თემის რელიგიური უფლებებისა და საჭიროებების უგულებელყოფას და ბათუმში ახალი მეჩეთის მშენებლობის საკითხზე ორი ინსტანციის სასამართლოს ადამიანის უფლებებისა და თანასწორობის დაცვაზე მიმართული გადაწყვეტილების შემდეგაც, პროცესის გაჭიანურებას ცდილობს.  „ბათუმში ახალი მეჩეთის მშენებლობის პროცესის ხელშეშლა მთლიანობაში რელიგიის თავისუფლების სფეროში სახელწიფოს დისკრიმინაციულ პოლიტიკას ავლენს, რომელიც უკვე წლებია არადომინანტური რელიგიური გაერთიანებების და მათი უფლებების და საჭიროებების დემონსტრაციულ უგულებელყოფას, იერარქიზებასა და არაღიარების ახდენს. სასამართლოში „ბათუმში ახალი მეჩეთის მშენებლობის ფონდის“ ინტერესებს ტოლერანტობის და მრავალფეროვნების ინსტიტუტი (TDI) და სოციალური სამართლიანობის ცენტრი (ყოფილი EMC) იცავენ“. სრულად... წყარო: tdi.ge

სამცხე-ჯავახეთი. სოციალური სამართლიანობის ცენტრი (ყოფილი EMC) გთავაზობთ კოტე ჩაჩიბაიას და ტიგრან ტარზიანის სტატიას - „ათასობით ადამიანი ჯავახეთიდან საქართველოს მოქალაქეობის აღდგენის მოლოდინში“. „ჯავახეთში ნებისმიერ სოფელში თუ ქალაქში მოსახლეობასთან გასაუბრების დროს, ერთ-ერთ პრობლემად საქართველოს მოქალაქეობის დაკარგვა სახელდება. საქართველოს მოქალაქეობის დაკარგვის მიზეზი მოსახლეობისთვის სოციალური სიდუხჭირე იყო, თუმცა ის ადამიანები, რომლებიც საქართველოს მოქალაქეობის გარეშე დარჩნენ კიდევ უფრო მძიმე სოციალურ მდგომარეობაში აღმოჩნდნენ. პრობლემა განსაკუთრებით მწვავეა ასაკში მყოფი ადამიანებისთვის, რომლებისთვისაც საქართველოს მოქალაქეობის აღდგენა ფინანსურ თუ იურიდიულ ბარიერებთან ერთად, ქართული ენის არცოდნის გამო კიდევ უფრო რთულია“. სრულად... წყარო: socialjustice.org.ge

თბილისი. საქართველოს საზოგადოებრივი ორგანიზაციების და პოლიტიკური პარტიების ნაწილი პარლამენტის თავმჯდომარეს - კახა კუჭავას წერილით მიმართავენ. „ადამიანის უფლებებზე მომუშავე ორგანიზაციები და აქტივისტები მრავალი წელია ვიბრძვით გენდერული თანასწორობისათვის. 2021 წლის 18 ივლისს შალვა პაპუშვილის და ირაკლი ზარქუას მიერ პოლიტიკოსი ქალების მიმართ განხორციელებული ძალადობა აზრს უკარგავს თანასწორობისთვის ბრძოლაში მიღწეულ წარმატებას. მიუღებელია პარლამენტის თავმჯდომარის დუმილი და უმოქმედობა აღნიშნულ პრობლემაზე, უფრო მეტიც, ეს ძალადობას ახალისებს. მოგიწოდებთ, გამოიყენოთ თქვენს ხელთ არსებული ყველა მექანიზმი ადეკვატური რეაგირებისათვის, რათა მოძალადე პარლამენტის წევრებმა - შალვა პაპუაშვილმა და ირაკლი ზარქუამ, სათანადო პასუხი აგონ ქალი დეპუტატების მიმართ გამოვლენილი შეურაცხმყოფელი და ძალადობრივი ქმედებების გამო“, ნათქვამია ერთობლივ განცხადებაში. სრულად... წყარო: transparency.ge

თბილისი. ორგანიზაციამ „უფლებები საქართველო“ გამოხატვის თავისუფლებასთან დაკავშირებული საკანონმდებლო ცვლილებების პროექტი ადვოკატებს გააცნო. „შემუშავებული საკანონმდებლო წინადადებები უკავშირდება „მაუწყებლობის შესახებ“ საქართველოს კანონში დაინტერესებული პირის ცნების გადახედვას, ასევე ჟურნალისტთა პროფესიულ საქმიანობაში უკანონო ხელის შეშლის დანაშაულებრივი შემადგენლობის გაფართოებასა და ჟურნალისტური წყაროს კონფიდენციალობის დაცვის დამატებით გარანტიებს“. სრულად... წყარო: rights.ge

თბილისი. გაეროს ქალთა ორგანიზაცია და თბილისის სახელმწიფო უნივერსიტეტის ეკონომიკის საერთასორისო სკოლა (ISET) ახალ, ერთობლივ კვლევას აქვეყნებს საქართველოში დასაქმებული დედების შრომითი უფლებების შესახებ. „საქართველოში დასაქმებული ქალების მხოლოდ 3%-ს აქვს კანონით მინიჭებული უფლება, ისარგებლოს დედობის სრულად ანაზღაურებადი შვებულებით. გამონაკლისია შემთხვევები, როდესაც დამსაქმებელი დამატებით ანაზღაურებას მათ საკუთარი სურვილით უხდის. დედობის შვებულების სახელმწიფო კომპენსაცია კი თვეში 167 ლარია, რაც საარსებო მინიმუმზე ნაკლებია. კვლევის შედეგები ცხადყოფს, რომ საქართველოს შრომის კანონმდებლობა დასაქმებულთა სხვადასხვა ჯგუფისთვის განსხვავებულ სტანდარტებს აწესებს. ბავშვის მოვლის ანაზღაურებადი შვებულებაც ქალებისა და კაცებისთვის არათანაბრადაა ხელმისაწვდომი, რის გამოც პროფესიულ საქმიანობას უმეტესად ქალები თმობენ. ოჯახის საქმეებზე პასუხისმგებლობის აღებაც ძირითადად ქალებს უწევთ, ამიტომ რეპროდუქციულ ასაკში ისინი არაპროდუქტიულ თანამშრომლებად და ნაკლებად მიმზიდველ კადრად განიხილებიან. საბოლოოდ, ეს გარემოებები სამუშაო ძალაში ქალთა მონაწილეობაზე ნეგატიურად აისახება“. სრულად... წყარო: georgia.unwomen.org

თბილისი. „უფლებები საქართველოს“ დახმარებით, ყოფილმა ლექტორმა, დავით ნიჟარაძემ, რომელიც თბილისის სახელმწიფო უნივერსიტეტს (თსუ) დისკრიმინაციაში ადანაშაულებდა, უნივერსიტეტის წინააღმდეგ სასამართლოში დავა მოიგო. „თბილისის საქალაქო სასამართლომ თავისი გადაწყვეტილებით დაადასტურა, რომ თსუ, განსხვავებული მოსაზრებების გამოხატვის გამო, დავით ნიჟარაძეს დისკრიმინაციულად მოეპყრო. შესაბამისად, სასამართლომ უნივერსიტეტს ლექტორის სასარგებლოდ, მატერიალური და მორალური ზიანის ასანაზღაურებლად, 4350 ლარის გადახდა დააკისრა“. სრულად... წყარო: rights.ge

თბილისი. ომბუდსმენის ორგანიზებით გაიმართა ონლაინ კონფერენცია ომბუდსმენთა/ადამიანის უფლებათა ეროვნული ინსტიტუტების როლის შესახებ ხანდაზმულთა უფლებების დაცვის საკითხებში. „კონფერენციის მიზანი იყო რეგიონში ხანდაზმული ადამიანების უფლებების შესახებ ინფორმირებულობის ამაღლება, ადამიანის უფლებათა ეროვნული ინსტიტუტების წინაშე არსებული გამოწვევებისა და როლის განხილვა და ხანდაზმულთა უფლებების დაცვის საკითხებში გამოცდილების გაზიარება“. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაცია (საია) 2021 წლის 5-6 ივლისს განვითარებული ძალადობრივი მოვლენების შედეგად დაზარალებული პირების უფლებების დაცვას განაგრძობს. ამ დროისთვის 20 პირიდან, რომელთა ინტერესებსაც საია იცავს, 15 პირია დაზარალებულად ცნობილი. „აღსანიშნავია, რომ საგამოძიებო ორგანოს ამ დრომდე არ მოუხდენია ძალადობრივ ქმედებებში ჩართული ყველა პირის იდენტიფიცირება, ასევე, სისხლისსამართლებრივი დევნა არ არის დაწყებული ორგანიზატორთან მიმართებით“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, რუსთავის მუნიციპალიტეტის მერიის ჯანმრთელობის დაცვისა და სოციალური მხარდაჭერის სამსახურის პირველადი სტრუქტურული ერთეულის ხელმძღვანელი - ნინო ქვირია აცხადებს, რომ სამსახურიდან გათავისუფლების მიზნით, მას მიზანმიმართულად დევნიდნენ და ხელოვნურად შეუქმნეს გათავისუფლების საფუძველი. 16 ივლისს, მერის ბრძანების საფუძველზე იგი გათავისუფლდა თანამდებობიდან. ორგანიზაცია იცავს ნინო ქვირიას ინტერსებს და გეგმავს სამართლებრივი დაცვის მექანიზმების გამოყენებას, რათა დადგინდეს მისი პოლიტიკური ნიშნით სამსახურიდან გათავისუფლება. სრულად... წყარო: isfed.ge