აჭარა. საერთაშორისო გამჭვირვალობა - საქართველოს უფასო იურიდიული მომსახურების შედეგად, მოქალაქემ შეძლო, მრავალწლიანი ცდის შემდეგ, მიწის ნაკვეთი და მასზე მოწყობილი საკალმახე მეურნეობა საკუთრებაში დაერეგისტრირებინა.  წყარო: ორგანიზაციის გვერდი სოციალურ ქსელში

ქვემო-ქართლი. სოციალური სამართლიანობის ცენტრი აქვეყნებს ორგანიზაციის მიერ მომზადებული კვლევის დოკუმენტს, რომელშიც შეფასებულია დმანისში, 2021 წლის მაისში მომხდარი დაპირისპირება. „აშკარაა, რომ ინკლუზიური, თანასწორი და სამართლიანი სოციალური თუ პოლიტიკური გარემოს მშენებლობის პროცესში ხელისუფლებების მიერ წლების განმავლობაში გამოვლენილი გულგრილობა, ქმნის მაღალ რისკებს თემთა შორის სოციალური იზოლაციისთვის და კონფლიქტებისთვის. ამ რისკების მძიმე შედეგები კი სახელმწიფოს მხრიდან ჯეროვნად შეფასებული არ არის და ის ყოველ ჯერზე პრობლემის არაღიარების ინსტინქტსა და მიდგომას მიმართავს. თემის ლიდერებში განცდა, რომ კონფლიქტი ამოიწურა და გადაიჭრა არ არსებობს და ყველა გამოკითხული ადამიანი სუსტ ნდობას ავლენდა 17 მაისს მომხდარი შერიგების სიმბოლური პროცესის მიმართ. მათი თქმით, ისინი შერიგების პროცესში მონაწილე პირებს არც კი იცნობენ და თავად ეს ფაქტიც აჩვენებს, თუ რამდენად გამქრალია პოლიტიკური და სამოქალაქო ცხოვრება დმანისის მუნიციპალიტეტში. ამის მიუხედავად, ამ პროცესში ფუნდამენტურად მნიშვნელოვანია ის გარემოება, რომ ადგილობრივი თემების ლიდერები იზიარებენ მათ მიერ დაშვებულ შეცდომებს, თემთა შორის ნდობის, მშვიდობის მშენებლობას და ეს მდგომარეობა თუ მოლოდინები სახელმწიფოს მხრიდან დროულ აღიარებას, გამოყენებასა და მხარდაჭერას საჭიროებს“. სრულად... წყარო: socialjustice.org.ge

თბილისი. „უფლებები საქართველო“ აქვეყნებს საერთაშორისო სამართლის ექსპერტის, ნანა მჭედლიძის ვლოგპოსტს თემაზე - „გამოხატვის თავისუფლება ღირებულებების კონფლიქტში“.                                               წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი შეშფოთებას გამოთქვამს, რომ  5-6 ივლისის ძალადობის გამოძიება არაეფექტიანია. ორგანიზაციის განცხადებით, 1 თვის გასვლის შემდეგაც 5-6 ივლისს, თბილისის ქუჩებში ექსტრემისტული ჯგუფების მიერ ორგანიზებული მასობრივი, კოლექტიური ძალადობის ფაქტებზე მიმდინარე გამოძიება არაეფექტიანი რჩება. „ამ დრომდე საგამოძიებო ორგანოებმა არა მხოლოდ ძალადობის ჩამდენი ინდივიდუალური პირების სრულყოფილი იდენტიფიცირება არ მოახდინეს, არამედ მასობრივი ძალადობის ორგანიზატორების პასუხისმგებლობაც არ გამოკვეთეს და ძალადობის ორგანიზების მიმართულებებით გამოძიებაც პასიურია და სუსტი“. სრულად... წყარო: socialjustice.org.ge

თბილისი. ომბუდსმენის ინფორმაციით, მცხეთის მუნიციპალიტეტის ერთ-ერთი საჯარო სკოლის დირექტორი 2020 წელს განმეორებით აღარ დაინიშნა დირექტორის მოვალეობის შემსრულებლად, მისი პოზიცია კი სხვა პირმა დაიკავა. განმცხადებელი ამბობს, რომ მისი გათავისუფლება ოპოზიციური პარტიის მხარდამჭერი შვილისა და მეუღლის პოლიტიკურ საქმიანობას უკავშირდება. „სახალხო დამცველის შეფასებით, საგანმანათლებლო სისტემის პოლიტიზებისა და პირთა შესაძლო დისკრიმინაციული საფუძვლით გათავისუფლების მომატებული რისკის გათვალისწინებით, ეჭვს იწვევს, რომ განმცხადებლის დაკავებულ თანამდებობაზე განმეორებით არდანიშვნა დროში დაემთხვა მეუღლისა და შვილის პოლიტიკურ აქტიურობას. ამასთან, მოპასუხემ ვერ წარმოადგინა რეალური გამამართლებელი საფუძველი, რომელიც განმცხადებლის მიერ წარმოდგენილი ინფორმაციის საფუძველზე წარმოშობილი დისკრიმინაციული ქმედების განხორციელების ვარაუდს გააქარწყლებდა“.  სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაცია (საია) მიიჩნევს, რომ იმ პირობებში, როდესაც ლუკა სირაძის საქმეზე ჯერ კიდევ არსებობს არაერთი პასუხგაუცემელი კითხვა და ოჯახი ელოდება საქმის სრულყოფილ, სამართლიან გამოძიებას, მსჯავრდებული გამომძიებლის გათავისუფლება პროცესების მიმართ უნდობლობას იწვევს. „მოვლენების ამგვარი განვითარება აჩენს განცდას, რომ სახელმწიფო ინსტიტუტები შემწყნარებელნი არიან სამართალდამცავთა მიმართ ჩადენილი დანაშაულის მიმართ, რომელსაც უდიდესი ტრაგედია მოჰყვა“. სრულად... წყარო: gyla.ge

თბილისი. ტოლერანტობისა და მრავალფეროვნების ინსტიტუტის (TDI) ინფორმაციით, ჯანდაცვის მინისტრის ბრძანებით, 22 ივლისიდან ამოქმედდა რეგულაცია, რომელიც საშუალებას აძლევს საქართველოში მყოფ უცხოელებს, ისარგებლონ იმუნიზაციის სახელმწიფო პროგრამით და ჩაიტარონ COVID-19-ის საწინააღმდეგო ვაქცინაცია. თუმცა, ბრძანება ითვალისწინებს კონკრეტულ პირობებს და ის ვრცელდება მხოლოდ უცხოელ ბენეფიციართა გარკვეულ ჯგუფზე. რეგულაციის მიხედვით, ვაქცინაციას ვერ შეძლებენ უსაბუთოდ მყოფი უცხოელები, ასევე, უცხოელი პირები, რომლებიც საქართველოში კანონიერად იმყოფებიან, თუმცა ბოლო სამი თვის განმავლობაში, საქართველოში კანონიერად ყოფნის უზრუნველყოფის მიზნით, მოუხდათ საქართველოს საზღვრის გადაკვეთა და კვლავ შემოსვლა. ამასთან ერთად, კვლავ უცვლელი რჩება ინდოელი სტუდენტების მიმართ შეზღუდვა, რომელიც საქართველოში შემოსვლას შესაძლებელს ხდის მხოლოდ ჩარტერული რეისით. მეორეს მხრივ, კი ჩარტერული რეისები არ ან შეზღუდული რაოდენობით ორგანიზდება და სტუდენტები ვერ ახერხებენ სასწავლებლად საქართველოში დაბრუნებას. ორგანიზაციები მოუწოდებენ საქართველოს მთავრობას და პანდემიის საკითხებზე შექმნილ უწყებათაშორის საკოორდინაციო საბჭოს, მოიხსნას ზემოთხსენებული შეზღუდვები, რომელიც ზღუდავს ადამიანის უფლებებს, საფრთხეს უქმნის მათ სიცოცხლეს და ქმნის ვირუსის გავრცელების რისკს. განცხადებას უერთდება „უფლებები საქართველო“. სრულად... წყარო: tdi.ge

თბილისი. „უფლებები საქართველო“ აქვეყნებს სახელმზღვანელოს: ადამიანის უფლებების და კრიზისის ჟურნალისტიკა: დამხმარე სახელმძღვანელო ტრენერებისთვის. „ტრენერების დამხმარე სახელმძღვანელო შეიცავს რეკომენდაციებს, ინფორმაციულ მასალებს, ვიდეოინსტრუქციებს და თემატური სავარჯიშოებს, და ქმნის უნიკალურ შესაძლებლობას ადამიანის უფლებების და კრიზისის ჟურნალისტიკით დაინტერესებული პირებისათვის, დამოუკიდებლად დაგეგმონ და ჩაატარონ ტრენინგი ან სხვა ფორმატის საინფორმაციო შეხვედრა. რაც შეეხება სატრენინგო მოდულს, მისი მიზნია, ერთი მხრივ, ხელი შეუწყოს დარგის სპეციალისტების პროფესიონალიზმის ზრდას და, მეორე მხრივ, საზოგადოებას მიეწოდოს ისეთი ინფორმაცია, რომლის მოძიების, დამუშავებისა და გავრცელების ეტაპებზე დაცული იქნება ადამიანის უფლებები, თუ კრიზისების გაშუქების სტანდარტები“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. 4 აგვისტოს საქართველოს სახალხო დამცველმა წარადგინა სპეციალური ანგარიში „ბავშვზე სექსუალური ძალადობისა და სექსუალური ექსპლუატაციის დანაშაულებზე მართლმსაჯულების განხორციელება კვლევა და მონიტორინგი“. „სპეციალური ანგარიში წარმოაჩენს ბავშვზე სექსუალური ძალადობისა და სექსუალური ექსპლოატაციის დანაშაულებზე როგორც სამართლებრივი რეგულირების კუთხით, ისე პრაქტიკაში არსებულ გამოწვევებს. მათ შორის, დანაშაულის გამოვლენის, მართლმსაჯულების განხორციელებისა და არასრულწლოვანისა და მისი ოჯახის სარეაბილიტაციო და მხარდამჭერი ღონისძიებებით უზრუნველყოფის საკითხებს“. სრულად... წყარო: ombudsman.ge

თბილისი. „სამართლიანი არჩენები”, 2021 წლის წინასაარჩევნო პერიოდში, სავარაუდო პოლიტიკური ნიშნით, სამსახურიდან გათავისუფლებულ პირებს სამართლებრივ დახმარებას გაუწევს. ორგანიზაციამ დისკრიმინაციული ნიშნით სამსახურიდან გათავისუფლებულ პირთა ინტერესების დაცვის მიზნით საერთო სასამართლოებში რამდენიმე სარჩელი წარადგინა. „სამართლიანი არჩევნები“ გააგრძელებს დისკრიმინაციული მოტივით სამსახურიდან გათავისუფლებული პირების უფასო იურიდიულ დახმარებას. „თუ მიიჩნევთ, რომ სამსახურიდან პოლიტიკური ნიშნით გაგათავისუფლეს; დაგვირეკეთ ან მოგვწერეთ: 0 800 100 143 info@isfed.ge ISFED-ის იურისტები მთელი ქვეყნის მასშტაბით გაგიწევენ სამართლებრივ დახმარებასა და კონსულტაციას“. სრულად... წყარო: ორგანიზაციის გვერდი სოციალურ ქსელში

თბილისი. 3 აგვისტოს პერსონალურ მონაცემთა დაცვის თემაზე ინფორმაციის თავისუფლების განვითარების ინსტიტუტსა (IDFI) და სახელმწიფო ინსპექტორის სამსახურის ერთობლივი საზაფხულო სკოლის გახსნითი ღონისძიება გაიმართა. „სკოლის ფარგლებში მონაწილეები გაეცნობიან პერსონალურ მონაცემთა დაცვასთან დაკავშირებით აქტუალურ საკითხებს“. სრულად... წყარო: idfi.ge

თბილისი. სახალხო დამცველი 1 აგვისტოს, ტელეკომპანია მთავარი არხის დირექტორის ნიკა გვარამიას მიერ, ამავე არხის ეთერით გავრცელებულ ე.წ. ოპერატიულ კრებსებს ეხმიანება, რომელიც, გვარამიას განცხადებით, სახელმწიფო უსაფრთხოების სამსახურის მიერ პოლიტიკოსებზე, არასამთავრობო ორგანიზაციებზე, სასულიერო პირებზე, ჟურნალისტებზე, დიპლომატებზე, ბიზნესმენებსა და საჯარო მოხელეებზე თვალთვალს ასახავს. „სახალხო დამცველი მოუწოდებს საქართველოს პარლამენტს, გამოიყენოს მის ხელთ არსებული საზედამხედველო მექანიზმები ფარული მიყურადების მოქმედი სისტემის შესამოწმებლად. ასევე აუცილებელია საკანონმდებლო ზედამხედველობის გაძლიერება და მეტი ინსტრუმენტისა და მექანიზმის შემოტანა, საკონსტიტუციო სასამართლოს 2016 წლის 14 აპრილის გადაწყვეტილების შესაბამისად. ფარული აუდიო და ვიდეოჩანაწერების, მათ შორის, პირადი ცხოვრების ამსახველი მასალის გავრცელების მძიმე პრაქტიკის გათვალისწინებით, სახალხო დამცველი ასევე იმედოვნებს, რომ საკონსტიტუციო სასამართლო უახლოეს მომავალში მიიღებს გადაწყვეტილებას, რომლითაც კიდევ ერთხელ დადასტურდება ხსენებული რისკების არსებობა და მათზე მყისიერი სამართლებრივი რეაგირების აუცილებლობა“. სრულად... წყარო: ombudsman.ge

თბილისი. საქართველოს სახალხო დამცველი აქვეყნებს სპეციალურ ანგარიშს: „ბავშვზე სექსუალური ძალადობისა და სექსუალური ექპლოატაციის დანაშაულებზე მართლმსაჯულების განხორციელება“. „კვლევის შედეგებმა ცხადყო, რომ ეროვნული კანონმდებლობა ბავშვზე სექსუალური ძალადობის და სექსუალური ექპლოატაციის შესახებ კვლავ არ შეესაბამება ადამიანის უფლებათა იმ სავალდებულო ინსტრუმენტებს, რომელთა მონაწილეც საქართველოა.  მნიშვნელოვან პრობლემად რჩება ბავშვზე სექსუალური ძალადობის დანაშაულების დროული გამოვლენა/აღკვეთა, მართლმსაჯულების სათანადო განხორციელება, ბავშვის საჭიროებებზე მორგებული გარემოს უზრუნველყოფა და მათი მეორეული ვიქტიმიზაციისგან დაცვა. ასევე, სახელმწიფოს არ გააჩნია კონკრეტულად სექსუალური ძალადობის მსხვერპლი ბავშვების რეაბილიტაციასა და მხარდაჭერაზე ორიენტირებული სერვისები“. სრულად... წყარო: ombudsman.ge

თბილისი. ომბუდსმენი აცხადებს, რომ თბილისში მცხოვრები აზერბაიჯანელი ბლოგერი ჰუსეინ ბაკიხანოვი ორჯერ დაუკავშირდა სახალხო დამცველის ოფისს.  პირველად მას განუმარტეს საერთაშორისო დაცვის სტატუსის მოპოვების პროცედურები, ასევე მიუთითეს ის ორგანიზაციები, რომლებიც მსგავს შემთხვევებში პირებს უფასო იურიდულ დახმარებას უწევენ. მეორე კომუნიკაცია მისი გარდაცვალების დღეს შედგა. ბლოგერი მის მიმართ განხორციელებული ძალადობის ფაქტზე საუბრობდა და ამ შემთხვევაშიც, აპარატის მხრიდან მას სამართლებრივი დახმარების გამწევი ორგანიზაციების საკონტაქტო ინფორმაცია გაუზიარეს და შესთავაზეს, რომ იმ შემთხვევაში თუ სამართალდამცავი ორგანოები დაარღვევდნენ მის უფლებებს, შეეძლო განცხადებით მოემართა. ომბუდსმენის აპარატმა ჰუსეინ ბაკიხანოვის გარდაცვალების საქმის შესწავლა დაიწყო. სრულად... წყარო: ombudsman.ge

თბილისი. სამოქალაქო საზოგადოების ორგანიზაციები მიიჩნევენ, რომ ხელისუფლება სახელმწიფო უსაფრთხოების სამსახურს ტოტალური კონტროლის მექანიზმად იყენებს. „სახელმწიფო უსაფრთხოების სამსახურის საქმიანობის შესახებ, მთავარი არხის ეთერში გასული მასალა კიდევ ერთხელ მიუთითებს ქვეყანაში არსებულ მასობრივი კონტროლის და ადამიანის უფლებების შელახვის უმძიმეს პრაქტიკაზე. მყიფე დემოკრატიის, მძიმე პოლიტიკური კრიზისების ფონზე, სახელმწიფო უსაფრთოხების სამსახური ჩამოყალიბდა ქვეყანაში მკაცრად პოლიტიზირებულ, გავლენიანი პოლიტიკური ფიგურების ინტერესების სადარაჯოზე მყოფ უწყებად, რომელიც კონკრეტული ჯგუფის პოლიტიკური ძალაუფლების შენარჩუნებას, თვალთვალით, დაშინების და შანტაჟის ინსტრუმენტით ცდილობს“, ნათქვამია ერთობლივ განცხადებაში. სრულად... წყარო: gyla.ge

სამცხე-ჯავახეთი. 29 ივლისს „დემოკრატიული ჩართულობის ცენტრების ქსელის“ ახალციხის ოფისის ორგანიზებით გაიმართა საინფორმაციო შეხვედრა თემაზე: „პერსონალური მონაცემების დაცვა“.  „შეხვედრის მიზანი იყო ცნობიერების ამაღლება პერსონალური მონაცემების, კანონის შესაბამისად მონაცემების დამუშავების საკითხებთან დაკავშირებით, ასევე არასრულწლოვანთა მონაცემების და COVID–19-ის წინააღმდეგ ბრძოლის პროცესში პერსონალურ მონაცემთა დამუშავებაზე“.                          წყარო: ორგანიზაციის გვერდი სოციალურ ქსელში

თბილისი. ღია საზოგადოების ფონდის მხარდაჭერით, საქართველოს დემოკრატიული ინიციატივამ, საქართველოს ახალგაზრდა იურისტთა ასოციაციამ, სოციალური სამართლიანობის ცენტრმა, უფლებები საქართველო-მ და ადამიანის უფლებათა ცენტრმა დაიწყეს ერთობლივი პროექტი „დახმარების ქსელი აქტივისტებისათვის“. „პროექტის მოკლევადიანი მიზანია სამოქალაქო აქტივისტების დაცვა უკანონო დევნისგან, რაც, თავის მხრივ, უზრუნველყოფს სამოქალაქო აქტივიზმისა და შეკრებისა და გამოხატვის თავისუფლების რეალიზებისთვის უფრო ხელსაყრელ გარემოს“. სრულად... წყარო: უფლებები საქართველოს გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) მიმართვის საფუძველზე, ომბუდსმენმა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს (შემდეგში - ჯანდაცვის სამინისტროს) მხრიდან ირიბი დისკრიმინაციის ფაქტი დაადგინა. „ეტლით მოსარგებლე ორსულმა ქალმა ერთ-ერთ კერძო კლინიკას მიმართა, რათა სახელმწიფოს მიერ „დედათა და ბავშვთა ჯანმრთელობის“ სახელმწიფო პროგრამით გათვალისწინებული უფასო მომსახურება მიეღო. კლინიკა სრულად მიუწვდომელი იყო, კერძოდ, შენობას არ ჰქონდა პანდუსი, ასევე, ექიმის კაბინეტამდე მისასვლელი გზა კიბით იყო დაკავშირებული, საპირფარეშოთი სარგებლობა ეტლით მოსარგებლისთვის სრულიად შეუძლებელი იყო”. სრულად... წყარო: phr.ge

თბილისი. გაეცანით ტოლერანტობისა და მრავალფეროვნების ცენტრის (TDI) ანგარიშს: უცხოელთა უფლებრივი მდგომარეობა საქართველოში პანდემიის პირობებში და მის მიღმა. ანგარიში მიმოიხილავს 2020 წლისა და 2021 წლის ივნისამდე პერიოდს და ეხმაურება შემდეგ საკითხებს: უცხოელთა უფლებები და გამოწვევები კოვიდ 19-ის პანდემიის პირობებში; საქართველოში ბინადრობის ნებართვის მიღების საკითხები, კანონმდებლობა და პრაქტიკა; სახელმწიფო პოლიტიკა საქართველოში თავშესაფრის მაძიებლების მიმართ; რასობრივი დისკრიმინაციის დანაშაულის გამოძიების სუს-ის დაქვემდებარების პრობლემა; ბინადრობის ნებართვაზე უარის სტატისტუკრი მონაცემები; რასობირვი შეუწყნარებლობით ჩადენილი დანაშაულების გამოძიების სტატისტიკა; ანგარიში ქართულად... ანგარიში მომზადდა TDI-ს პროექტის ფარგლებში, რომელიც მხარდაჭერილია USAID-PROLoG - Promoting Rule of Law in Georgia Activity-ს მიერ. წყარო: ორგანიზაციის გვერდი სოციალურ ქსელში

თბილისი. სახალხო დამცველის აპარატისა და გაეროს ლტოლვილთა უმაღლესი კომისრის წარმომადგენლობის ერთობლივი პროექტის ფარგლებში „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ ანგარიშის პრეზენტაცია გაიმართა. „ანგარიშში საუბარია უცხოელთა, მათ შორის მიგრანტთა, თავშესაფრის მაძიებელთა, საერთაშორისო დაცვის და მოქალაქეობის არმქონე პირთა მდგომარეობაზე საქართველოში, სახალხო დამცველის წარმომადგენლების მიერ ჩატარებული მონიტორინგის შედეგებზე, პოზიტიურ ტენდენციებსა და გამოწვევებზე“. სრულად... წყარო: ombudsman.ge

თბილისი. ომბუდსმენის მიიჩნევს, რომ „საგანგაშოა ბოლო პერიოდში ჟურნალისტური საქმიანობის ხელშეშლისა, ჟურნალისტების ფიზიკური და სიტყვიერი შეურაცხყოფის შემთხვევების ზრდა, რამაც 5 ივლისის ძალადობრივი მოვლენების შემდგომ, ფაქტობრივად ყოველდღიური ხასიათი მიიღო“. სახალხო დამცველი მოუწოდებს სამართალდამცავ ორგანოებს და პოლიტიკური თანამდებობის პირებს დროულად მოახდინონ რეაგირება 5-6 ივლისს და შემდგომ პერიოდში გამოვლენილ დანაშაულებრივ ქმედებებზე და არ დაუშვან ჟურნალისტებზე ძალადობა... სრულად... წყარო: ombudsman.ge

თბილისი. სოციალური სამართლიანობის ცენტრი აქვეყნებს ორგანიზაციის იურისტის თეო ფირანიშვილის მოსაზრებას თუ რა პრობლემებს აწყდებიან საქართველოში ეთნიკური უმცირესობები, როდესაც პოლიტიკური მონაწილეობის იდეაზე ვსაუბრობთ. „ერთ-ერთი მიზეზი დომინანტური პოლიტიკური ელიტის დამოკიდებულებებია, რომ, თითქოს, ეს ადამიანები საქართველოში უცხოები და სტუმრები არიან“. წყარო: socialjustice.org.ge