თბილისი. სახალხო დამცველი ნინო ლომჯარია ეუთო/ოდირის საარჩევნო სადამკვირვებლო მისიის ხელმძღვანელს ალბერტ იონსონს შეხვდა. შეხვედრაზე წინასაარჩევნო პერიოდში გამოვლენილი დარღვევები, ოპოზიციურ პარტიებზე განხორციელებული ზეწოლის ფაქტები, პოლიტიკური ნიშნით გათავისუფლების სავარაუდო შემთხვევები და სამართალდამცავთა მხრიდან არაეფექტური რეაგირების ფაქტები განიხილეს. სრულად...  წყარო: ორგანიზაციის ვებგვერდი

თბილისი. „საქართველოს დემოკრატიული ინიციატივა“ იურიდიულ დახმარებას გაუწევს მათ, ვინც მედიაში ახალხან გავრცელებულ ფარულ ჩანაწერებში ფიგურირებს.  „როგორც ცნობილი გახდა, სახელმწიფო უსაფრთხოების სამსახურიდან გამოჟონილ ათასობით ფაილში ფიგურირებს არაერთი ჟურნალისტი, სამოქალაქო აქტივისტი და სხვა პირი, რომელთა მიმართაც მიმდინარეობდა ფარული მიყურადება და მოსმენა“, - აღნიშნულია ორგანიზაციის მიერ გავრცელებულ ინფორმაციაში, - „GDI მზადაა დაეხმაროს ნებისმიერ პირს ინდივიდუალური განცხადების მომზადებაში და გაუწიოს კონსულტაცია“.  სრულად...   წყარო: ორგანიზაციის ვებგვერდი

თბილისი. მედიაში გავრცელებულ უკანონო მოსმენების ამსახველ ინფორმაციასთან დაკავშირებით, ტოლერანტობისა და მრავალფეროვნების ინსტიტუტი განცხადებას აქვეყნებს.  „13 სექტემბერს მედიასა და ინტერნეტში გავრცელებული ინფორმაცია სახელმწიფო უსაფრთხოების სამსახურის მიერ მასშტაბური უკანონო ფარული მოსმენისა და თვალთვალის ფაქტების შესახებ უკიდურესად საგანგაშოა. ხელისუფლების მიერ მოქალაქეების ტოტალური კონტროლი, უკანონო მოსმენა, პირადი ცხოვრების შესახებ მოპოვებული მასალების მოპოვება და დამუშავება არღვევს ადამიანის ფუნდამენტურ უფლებებს, ხელჰყოფს პირადი ცხოვრების ხელშეუვალობას და სახელწიფო ინსტიტუტების სრულ კოლაფსს ავლენს“, - ვკითხულობთ განცხადებაში, - „გასაჯაროებული ინფორმაციით ხელისუფლება უსმენს არასამთავრობო ორგანიზაციებს, ჟურნალისტებს, პოლიტიკურ ოპოზიციას, რელიგიურ გაერთიანებებს - როგორც საპატრიარქოს, ასევე არადომინანტურ რელიგიურ ჯგუფებს, აგროვებს და ინახავს მათ პირად საუბრებს, მიმოწერას, სხვადასხვა ტიპის კომუნიკაციის შესახებ ინფორმაციას. მასალები შეიცავს ადამიანების პირადი ცხოვრების, მათი ოჯახის წევრების, ახლობლებისა და სხვა ადამიანებთან ურთიერთობის შესახებ ინფორმაციას“.  სრულად...   წყარო: ორგანიზაციის ვებგვერდი

თბილისი. „საქართველოს დემოკრატიული ინიციატოვა“ პირადი ცხოვრების შესახებ სხვადასხვა არხის ეთერში გასულ მასალებს ეხმიანება.  „სხვადასხვა ტელეკომპანიის ეთერში გავრცელებულმა ინფორმაციამ სახელმწიფო უსაფრთხოების სამსახურის მიერ სასულიერო პირების, ჟურნალისტების, მასწავლებლებისა და დიპლომატიური კორპუსის წარმომადგენლების სავარაუდო უკანონო ფარული თვალთვალისა და მიყურადების ფაქტების შესახებ, კიდევ უფრო გაამყარა საზოგადოებაში არსებული ეჭვები ქვეყანაში ადამიანის კერძო სფეროში უკანონოდ ჩარევის მძიმე პრაქტიკის არსებობის თაობაზე. გავრცელებული ინფორმაცია მეტყველებს იმაზე, რომ სუს-ის კონტროლის და მეთვალყურეობისგან ქვეყანაში არც ერთი ჯგუფი, პირთა წრე, ინდივიდი არ არის დაცული“, - ნათქვამია ორგანიზაციის მიერ გავრცელებულ განცხადებაში.  სრულად...   წყარო: ორგანიზაციის ვებგვერდი

თბილისი. სოციალური სამართლიანობის ცენტრი ეხმიანება სახელმწიფო უსაფრთხოების სამსახურის უკანონო მუშაობის მამხილებელ სავარაუდო ფაქტებს და მიიჩნევს, რომ გავრცელებული მასალა ადამიანების უკანონო, რეგულარული და ტოტალური მოსმენისა და თვალთვალის უმძიმეს პრაქტიკას აჩვენებს.  „ჩვენი შეფასებით, ეს ფაქტი პირადი ცხოვრების ხელშეუხებლობის უხეში ხელყოფაა და ძირს უთხრის ქვეყნის დემოკრატიური განვითარების შესაძლებლობებს”, - აღნიშნულია ორგანიზაციის მიერ გავცელებულ განცხაეებაში, - „სოციალური სამართლიანობის ცენტრი მოუწოდებს, საქართველოს პარლამენტს: შეიქმნას საგამოძიებო კომისია, რომელიც გამოიკვლევს სუს-ის მხრიდან სავარაუდო მასობრივი უკანონო მიყურადებისა და ადამიანის უფლებების უხეში დარღვევის ფაქტებს; დაიწყოს მსჯელობა სუს-ის ფუნდამენტურ რეფორმაზე, მისი ჭარბი ძალაუფლების დეკონცენტრაციასა და ანგარიშვალდებულების მექანიზმების გაზრდაზე; საქართველოს პროკურატურას: მიმდინარე ფაქტებზე დაუყოვნებლივ დაიწყოს დროული, ეფექტიანი და დამოუკიდებელი გამოძიება და საზოგადოებას მიაწოდოს ინფორმაცია გამოძიების პროგრესისა და შედეგების შესახებ“.  სრულად...   წყარო: ორგანიზაციის ვებგვერდი

თბილისი. 2021 წლის 13 სექტემბერს სახალხო დამცველმა ნინო ლომჯარიამ და უკრაინის პარლამენტის ადამიანის უფლებათა კომისარმა ლიუდმილა დენისოვამ საოკუპაციო ხაზის გასწვრივ მდებარე სოფელი ხურვალეთი მოინახულეს.  სახალხო დამცველმა თავის უკრაინელ კოლეგას ოკუპირებულ ტერიტორიებზე მცხოვრები მოსახლეობის უფლებრივი მდგომარეობა გააცნო. ისაუბრეს საერთო ხასიათის პრობლემებზე, მათ შორის გადაადგილების, სამედიცინო და სხვა სახის სერვისების მიღების შეზღუდვაზე. „როგორ ჩანს, საოკუპაციო ძალა ერთი სცენარის და ერთი გეგმის მიხედვით მოქმედებს, რეალურად ეს არის ერთი ხელწერა, თუმცა საქართველოს შემთხვევაში ვითარებას ადამიანურ დონეზე და მასთან უწყებრივ დონეებზე კომუნიკაციის არქონა ამწვ ავებს, რაც, ცხადია, რუსეთის ზეწოლის შედეგია. სრულად...  წყარო: ombudsman.ge

თბილისი. ადამიანის უფლებათა ევროპულმა სასამართლომ წარმოებაში მიიღო ადამიანის უფლებათა ცენტრის მიერ მომზადებული კიდევ ერთი სარჩელი, რომელიც 2019 წლის 20-21 ივნისის მოვლენებს უკავშირდება.  საქმე სახელწოდებით Berikashvili vs Georgia სასამართლომ უკვე დაარეგისტრირა. შსს-ს მიერ დარბეულ დემონსტრაციაზე დაზარალებული მოქალაქე ევროპული კონვენციის მე-3, მე-10, მე-11 და მე-13 მუხლების დარღვევის დადგენას ითხოვს.  სრულად...   წყარო: ორგანიზაციის ვებგვერდი

თბილისი. „ტოლერანტობის და მრავალფეროვნების ინსტიტუტი“ მიიჩნევს, რომ საქართველოს მთავრობის მიერ დადგენილი რეგულაციები ინდოელი სტუდენტების მიმართ კვლავ დისკრიმინაციულია და შეიცავს სავარაუდო კორუფციულ ნიშნებს.  „ინდოეთის მოქალაქე სტუდენტები, რომლებიც საქართველოს უნივერსიტეტებში სწავლობენ, უკვე თვეებია ვერ ახერხებენ ინდოეთიდან საქართველოში დაბრუნებას. მათთვის კორონავირუსის გავრცელების პრევენციის საფუძვლით დაწესებული შეზღუდვები არაპროპორციული, არაგონივრული და დისკრიმინაციულია“, - აღნიშნულია ორგანიზაციის მიერ გავრცელებულ განცხადებაში.  სრულად...   წყარო: ორგანიზაციის ვებგვერდი

თბილისი. სოციალური სამართლიანობის ცენტრი გთავაზობთ საქართველოში მოქმედი მიტანის სერვისის კომპანიების ხელშეკრულებების სამართლებრივ შეფასებას. „მიტანის სერვისში დასაქმებული კურიერები დღეისათვის აღნიშნული პრობლემის ყველაზე ნათელ ილუსტრაციას წარმოადგენენ. პლატფორმული კომპანიები, კურიერებს როგორც წესი დამოუკიდებელ კონტრაქტორებად მიიჩნევენ, მათთან მომსახურების ხელშეკრულებებს აფორმებენ და მთლიანად იხსნიან შრომითი კანონმდებლობით გათვალისწინებულ ვალდებულებებს, მათ შორის, არ უზრუნველყოფენ კურიერების უსაფრთხო სამუშაო გარემოს, მინიმალურ შრომით პირობებსა და ღირსეული შრომისათვის დადგენილ სტანდარტებს“, - ვკითხულობთ დოკუმენტში. სრულად...  წყარო: ორგანიზაციის ვებგვერდი

თბილისი. სახალხო დამცველი აცხადებს, რომ შინაგან საქმეთა სამინისტროს გენერალური ინსპექციისა და სპეციალური პენიტენციური სამსახურის მონიტორინგის დეპარტამენტის მუშაობა კვლავ არსებითი ხარვეზებით გრძელდება.  „საქმეთა ანალიზმა აჩვენა, რომ უფლებადარღვევის სავარაუდო ფაქტებზე სპეციალური პენიტენციური სამსახურის მონიტორინგის დეპარტამენტსა და შინაგან საქმეთა სამინისტროს გენერალურ ინსპექციაში სამსახურებრივი შემოწმება არაჯეროვნად ჩატარდა, რამაც ხელი შეუშალა განმცხადებლების მიერ მითითებული კანონდარღვევების შესწავლასა და გამოვლენას. საგამოძიებო უწყებების გენერალური ინსპექციები სრულფასოვნად არ იკვლევენ მოქალაქეთა საჩივრებს, სავარაუდო უფლებადარღვევის ფაქტების გამოსავლენად არ მოიპოვებენ ნეიტრალურ მტკიცებულებებს და ძირითად შემთხვევებში შემოიფარგლებიან მხოლოდ სავარაუდო კანონდამრღვევი თანამშრომლების გამოკითხვით, რომლებიც ცხადია, უარყოფენ მათი მხრიდან კანონის დარღვევის ფაქტებს“, - აღნიშნავს სახალხო დამცველი.  სრულად...   წყარო: ombudsman.ge

თბილისი. სახალხო დამცველი, 5 ივლისს ჯგუფური ძალადობის ორგანიზებისა და ძალადობისკენ მოწოდების ფაქტებზე, ორი პირის მიმართ სისხლისსამართლებრივი დევნის დაწყებას მოითხოვს. „5 ივლისის ძალადობრივი მოვლენებიდან ორი თვე გავიდა, თუმცა საქართველოს პროკურატურას ჯგუფური ძალადობის ორგანიზების ბრალდებით სისხლისსამართლებრივი დევნა არც ერთი პირის მიმართ არ დაუწყია. სახალხო დამცველმა შეისწავლა მედია საშუალებების მიერ გავრცელებული ვიდეომასალები და მიიჩნევს, რომ საჯაროდ ხელმისაწვდომი მტკიცებულებები აღწევს დასაბუთებული ვარაუდის, ანუ ბრალის წარდგენის სტანდარტს, რათა 2 პირის მიმართ დაწყებულ იქნას სისხლისსამართლებრივი დევნა ჯგუფური ძალადობის ორგანიზებისა და ასევე, ძალადობრივი ქმედებისაკენ საჯაროდ მოწოდების ფაქტებზე“, - აღნიშნულია სახალხო დამცველის განცხადებაში. სრულად...  წყარო: ombudsman.ge

თბილისი. სოციალური სამართლიანობის ცენტრი, 5-6 ივლისის მოვლენებთან დაკავშირებით, ანალიტიკურ დოკუმენტს აქვეყნებს. „2021 წლის 5 ივლისს, ულტრაკონსერვატორულმა ჯგუფებმა, წინასწარ ორგანიზებული ძალადობრივი ქმედებებით, რასაც თან ახლდა სახელმწიფოს აშკარა უმოქმედობა, ხელი შეუშალეს თბილისში, რუსთაველის გამზირზე „ღირსების მარშის“ გამართვას, რომლის ორგანიზატორიც იყო „თბილისი პრაიდი“ და სხვა სამოქალაქო/აქტივისტური ჯგუფები. აღნიშნული მოვლენები იყო ულტრაკონსერვატორული ჯგუფების მხრიდან ძალადობის წახალისების, საზოგადოებრივი წესრიგის მოშლის და სახელმწიფოს მხრიდან საკუთარი ბაზისური ფუნქციების ვერგანხორციელების ერთგვარი კულმინაცია. სამწუხაროდ, წარსულში ლგბტქ+ პირების მიმართ სხვადასხვა სოციალური, რელიგიური თუ პოლიტიკური ჯგუფის მხრიდან გამოვლენილი აგრესია და ფიზიკური ძალადობა, არ აღმოჩნდა ხელისუფლებისთვის საკმარისი, გადაედგა უფრო ქმედითი ნაბიჯები მათი უფლებების დასაცავად“, - ვკითხულობთ დოკუმენტში. სრულად...  წყარო: ორგანიზაციის ვებგვერდი

თბილისი. საქართველოს სახალხო დამცველი ზედამხედველობას უწევს წინასაარჩევნო პროცესში ადამიანის უფლებების დარღვევის ფაქტებს და შეშფოთებას გამოთქვამს ბოლო პერიოდში ათობით პირის შესაძლო დისკრიმინაციულად, პოლიტიკური შეხედულებების გამო სამსახურებიდან გათავისუფლებასთან დაკავშირებით. „ამ დროისთვის, აპარატის ხელთ არსებული ინფორმაციით, 62 დასაქმებულის მიმართ განხორციელდა სხვადასხვა სახის ზეწოლა. ამ პირთა უმეტესობამ სახალხო დამცველის წარმომადგენლებთან დაადასტურა ზეწოლის და გათავისუფლების ფაქტები და მიზეზად ყოფილი პრემიერის გიორგი გახარიას პარტიის წევრებთან ნათესაური, მეგობრული თუ კეთილგანწყობილი ურთიერთობა დაასახელა. (უნდა აღინიშნოს, რომ რამდენიმე მათგანმა, ზეწოლის ფაქტის დადასტურების მიუხედავად, თავი შეიკავა და არ გამოთქვა თანხმობა სახალხო დამცველის აპარატს შეესწავლა მისი საქმე). დასაქმებულები გაათავისუფლეს შინაგან საქმეთა სამინისტროდან, მუნიციპალური სამსახურებიდან, სხვადასხვა მუნიციპალიტეტების მიერ დაფუძნებული სსიპ-ებიდან, ააიპ-ებიდან და სხვა საჯარო დაწესებულებებიდან“, - აღნიშნულია სახალხო დამცველის მიერ გავრცელებულ განცხადებაში. სრულად...  წყარო: ombudsman.ge

თბილისი. სპეციალური პენიტენციური სამსახურის ინფორმაციით, პენიტენციურ დაწესებულებებში კორონავირუსი ასზე მეტ პატიმარს დაუდასტურდა.  პენიტენციურ დაწესებულებებში კორონავირუსის გავრცელებასთან დაკავშირებით, სახალხო დამცველის აპარატმა ინფორმაცია მოიპოვა პატიმრებისგან და კონკრეტული პენიტენციური დაწესებულებების ადმინისტრაციისგან. მოპოვებული ინფორმაცია ამ ეტაპზე შეესაბამება პენიტენციური სამსახურის მიერ გავრცელებულ ინფორმაციას. დღეისათვის N2, N8, N14 დაწესებულებებიდან ინფიცირებული პატიმრები გადაყვანილი არიან სპეციალურად მოწყობილ საკარანტინე სივრცეში. სპეციალური პენიტენციური სამსახურისგან გამოთხოვილია დამატებითი დეტალური ინფორმაცია პატიმართა იზოლაციისა და მკურნალობის შესახებ.  სრულად...   წყარო: ombudsman.ge

თბილისი. საქართველოს დემოკრატიული ინიციატივა (GDI) წარმოგიდგენთ ანგარიშს - „მარში ღირსების გარეშე“. „ანგარიშის სათაურით გამოკვეთილია ის სამწუხარო რეალობა, რომ 5 ივლისი, ანუ დღე, როდესაც თანადგომისა და სოლიდარობისადმი მიძღვნილი „ღირსების მარში“ უნდა გამართულიყო, საბოლოოდ იქცა დღედ, როდესაც ვიხილეთ სიძულვილი, ძალადობა და აგრესია, შესაბამისად - მოძალადეთა მარში, რომელიც დაცლილი იყო ღირსებისგან. ანგარიში წარმოაჩენს LGBTQI+ თემის მიერ შეკრებისა და გამოხატვის თავისუფლების რეალიზების კუთხით არსებულ პრობლემებს. ამ ჭრილში განხილულია სახელმწიფოს მიერ კონსტიტუციური და საერთაშორისო ვალდებულებების შესრულება და LGBTQI+ თემის მიმართ გატარებული პოლიტიკა. უფრო კონკრეტულად, ანგარიში ასახავს 2021 წლის 5 და 6 ივლისს თბილისში ჰომოფობიურ კონტექსტში განვითარებულ მოვლენებს და მათ წინმსწრებ პერიოდს. აღნიშნული მოვლენები ასევე შეფასებულია მედიის თავისუფლებისა და ჟურნალისტთა უსაფრთხოების თვალსაზრისით“. ანგარიში... წყარო: gdi.ge

ქვემო ქართლი. სოციალური სამართლიანობის ცენტრი აქვეყნებს ვიდეოს, რომელშიც მოსახლეობა დმანისის მუნიციპალიტეტის ერთ-ერთი სოფლის, ანგრევანის მძიმე ინფრასტრუქტურული და სოციალური პრობლემების შესახებ გვიყვება. „სოფელი ეთნიკური აზერბაიჯანელებით არის დასახლებული. მამედოვების ოჯახი, რომელიც ვიდეოში თავისი მძიმე ყოველდღიურობის შესახებ გვიყვება, მიუხედავად არსებული რეალობისა, სოფლის დატოვებას არ აპირებს. „მე აქ დავიბადე, აქ ვცხოვრობ, საქართველოთი ვსუნთქავ. არასოდეს მიფიქრია სხვაგან წასვლაზე, არც თბილისში, არც საზღვარგარეთ, აქ დავიბადე და აქ დავრჩები. რა მინდა საზღვარგარეთ? საქართველო უფრო ლამაზია, საქართველოს მოვუაროთ“ - ამბობს ოსმან მამედოვი. სრულად... წყარო: socialjustice.org.ge

თბილისი.სოციალური სამართლიანობის ცენტრის ინფორმაციით, სამოქალაქო ორგანიზაციების წარმომადგენლები, გიორგი ონიანი (საერთაშორის გამჭვირვალობა - საქართველო), გიორგი მშვენიერაძე (საქართველოს დემოკრატიული ინიციატივა) და გურამ იმნაძე (სოციალური სამართლიანობის ცენტრი) განცხადებით მიმართავენ საქართველოს გენერალურ პროკურატურას, რომლითაც ითხოვენ გამოძიების დაწყებას სახელმწიფო უსაფრთხოების სამსახურისა და ოპერატიულ-ტექნიკური სააგენტოს თანამშრომლების სავარაუდო უკანონო საქმიანობის ფაქტზე. „პროკურატურისთვის განცხადებით მიმართვის საფუძველი გახდა მიმდინარე წლის პირველ აგვისტოს, ტელეკომპანია „მთავარის” გადაცემაში გაჟღერებული ინფორმაცია სახელმწიფო უსაფრთხოების სამსახურის სავარაუდოდ უკანონო საქმიანობის, მათ შორის ფარულ მიყურადებისა და თვალთვალის შესახებ“. სრულად... წყარო: socialjustice.org.ge

თბილისი. სოციალური სამართლიანობის ცენტრი სოლიდარობას უცხადებს საქართველოს აზერბაიჯანელ თემში თვითორგანიზებულ პროცესს, რომელიც ისტორიული გვარების დაბრუნებას უკავშირდება და პარლამენტს ამ პროცესის მხარდაჭერისკენ მოუწოდებს. „საქართველოში გვარების შეცვლის ისტორია რუსეთის იმპერიისა და საბჭოთა კავშირის პოლიტიკას უკავშირდება. ამ პერიოდებში მოსახლეობის აღრიცხვისა და კონტროლის გაიოლების მიზნით სავალდებულო გახადა გვარების „გაფორმება“ პირსახელზე რუსული სუფიქსების (ოვ /ევ ან/და სხვა) დართვით. შედეგად, მოქალაქეების დიდმა ნაწილმა დაკარგა ტრადიციული გვარი. ეს პროცესი მასობრივად შეეხო სხვადასხვა ეთნიკურ ჯგუფს, მათ შორის საქართველოს აზერბაიჯანელ თემს. აღსანიშნავია, რომ გვარის ცვლილებისა და აღდგენის არსებული საკანონმდებლო ჩარჩო ჩვენს მოქალაქეებს არ აძლევს ტრადიციული გვარების აღდგენის შესაძლებლობას“. სრულად... წყარო: socialjustice.org.ge

თბილისი. სოციალური სამართლიანობის ცენტრი წარმოგიდგენთ ახალი კვლევის დოკუმენტს, რომელშიც 14-15 იანვარს, სოფელ ბუკნარში მომხადრი დაპირისპირებაა გაანალიზებული და შეფასებული. „წინა გამოცდილებებისგან განსხვავებით, ბუკნარის შემთხვევაში რელიგიის თავისუფლების და თანასწორობის სასარგებლო განცხადებები გაკეთდა მაღალი სახელმწიფო თანამდებობის პირების მხრიდან. ადგილზე მედიაციის პროცესი ხარვეზებით, თუმცა მაინც დროულად დაიწყო და გამოჩნდა პოლიციის სამართლებრივი რეაგირებაც. თუმცა, ფუნდამენტურად მნიშვნელოვანი გვგონია, სახელმწიფომ სოფელ ბუკნარის თემში და ასევე, რელიგიური/ეთნიკური კონტექსტის მქონე კონფლიქტებთან მიმართებით გრძელვადიანი ტრანსფორმაციული პოლიტიკა გაატაროს“. დოკუმენტი... წყარო: socialjustice.org.ge  ფოტო: პუბლიკა, მინდია გაბაძე

თბილისი. 9 აგვისტოს საქართველოს სახალხო დამცველი, ნინო ლომჯარია, საქართველოში ევროკავშირის სადამკვირვებლო მისიის ხელმძღვანელს ელჩ მარეკ შჩიგელს შეხვდა და ქვეყანაში კონფლიქტით დაზარალებული მოსახლეობის უფლებრივი მდგომარეობა, სახალხო დამცველის მანდატი და აპარატის წინაშე მდგარი გამოწვევები გააცნო. სრულად... წყარო: ombudsman.ge

თბილისი. საქართველოს სახალხო დამცველი აგვისტოს ომის 13 წლისთავთან დაკავშირებით განცხადებას ავრცელებს. „უკვე 13 წელია 2008 წლის აგვისტოს ომის შედეგები დამანგრეველ გავლენას ახდენს, როგორც საოკუპაციო ხაზის გასწვრივ, ისე ოკუპირებულ ტერიტორიებზე მაცხოვრებელ ადამიანებზე. კვლავ გრძელდება რუსეთის ფედერაციის მესაზღვრეების მიერ ადამიანების უკანონოდ დაკავება და დაჯარიმება. წლიდან წლამდე უარესდება გადაადგილების თავისუფლება ორივე ოკუპირებულ რეგიონში. საოკუპაციო ხაზზე გადაადგილებისთვის, დე ფაქტო ხელისუფლების მიერ დადგენილი ფორმალური რეჟიმი და სხვადასხვა ბარიერის დაწესება, როგორიცაა ე.წ. გამშვები პუნქტების არაპროგნოზირებადი ჩაკეტვა, ზღუდავს ოკუპირებული რეგიონების მკვიდრთა გადაადგილების თავისუფლებას და გაუმართლებელ დაბრკოლებებს უქმნის მათ საარსებო წყაროებზე წვდომას“. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაციამ სამოქალაქო ავიაციის ყოფილი ბორტმექნიკოსის, რუსლან გვარაძის სახელით საკონსტიტუციო სასამართლოს მიმართა მთავრობის დადგენილებით მისთვის ფულადი დახმარების შემცირების კონსტიტუციურობის საკითხზე. „1987 წლის 14 ივნისს რუსლან გვარაძის ვერტმფრენი ასრულებდა ფრენას თბილისი-თელავი-ომალოს მიმართულებით. დაშვებისას ვერტმფრენი ჩავარდა ხევში, ამის გამო რუსლან გვარაძემ მიიღო საწარმოო ტრავმა, დაკარგა შრომის უნარი 80%-ით და გახდა მნიშვნელოვნად გამოხატული შეზღუდული შესაძლებლობის მქონე პირი (იმდროისათვის „მეორე ჯგუფის ინვალიდი“). სრულად... წყარო: gyla.ge