თბილისი. ტოლერანტობისა და მრავალფეროვნების ინსტიტუტის (TDI) ინფორმაციით, 2021 წლის 12 მაისიდან საქართველოს კანონში „უცხოელთა და მოქალაქეობის არმქონე პირთა სამართლებრივი მდგომარეობის შესახებ” ცვლილებები შედის. „ცვლილებები ბინადრობის ნებართვების მოქმედების ვადებსაც ეხება; ასევე, გამკაცრდა რეგულაციები საქართველოდან გასვლის ვალდებულების გადავადებასთან დაკავშირებით; საყურადღებოა, რომ ბინადრობის ნებართვის პროცედურები წლიდან წლამდე სულ უფრო მკაცრდება; უცხოელებისთვის აფრიკისა და აზიის რეგიონის ქვეყნებიდან ბინადრობის ნებართვის მიღება აქამდეც საკმაოდ პრობლემური იყო, მათთვის დაუსაბუთებელი უარებით, განაცხადის განხილვის გაუმჭვირვალე პროცედურებითა და ხშირ შემთხვევაში, ბლანკეტურად, სახელმწიფო უსაფრთხოების მიზეზებზე აპელირებით;  საკანონმდებლო ცვლილებების ეს მორიგი ტალღა უმთავრესად სწორედ ამ რეგიონის წარმომადგენლებისთვის კიდევ უფრო მეტი დაბრკოლების შექმნას ისახავს მიზნად“, ნათქვამია ორგანიზაციის ვებგვერდზე. სრულად... წყარო: tdi.ge

თბილისი. სახალხო დამცველმა გამოაქვეყნა სპეციალური ანგარიში „თვითმმართველი ორგანოების სოციალური და ჯანმრთელობის დაცვის პროგრამების შესაბამისობა თანასწორობის პრინციპთან“, რომელშიც მუნიციპალური პროგრამების ანტიდისკრიმინაციულ კანონმდებლობასთან შესაბამისობაა გაანალიზებული. „კვლევამ ცხადყო, რომ ადგილობრივი თვითმმართველობის პროგრამების ნაწილი მოსარგებლეთა წრის განსაზღვრისას სქესის, შეზღუდული შესაძლებლობის, ასაკის, ქორწინების სტატუსის და სხვა ნიშნით დისკრიმინაციულ კრიტერიუმებს იყენებს, რის შედეგადაც, რიგი ჯგუფები პროგრამით სარგებლობის მიღმა რჩებიან. ასევე, გვხვდება სხვადასხვა ჯგუფების მიმართ დისკრიმინაციის წამახალისებელი ტერმინები და რეგულაციები, რომელიც არსებულ სტიგმებს აძლიერებს. არის შემთხვევები, როდესაც თანაბარი საჭიროებების მქონე პირთაგან პროგრამაში მოსახვედრად შერჩევა ყოველგვარი დასაბუთების გარეშე ხდება“. სრულად... წყარო: ombudsman.ge

ელექტრონულ ბარათებში განხილულია სხვადასხვა მნიშვნელოვანი საკითხები, როგორიცაა ვაქცინაციის აუცილებლობა და მისი სარგებელი, ევროკავშირის და ჯანმოს მხარდაჭერა საქართველოსთვის კოვიდ-პანდემიის პერიოდში, სხვადასხვა სახის მხარდაჭერის მექანიზმები, რომლებიც ხელმისაწვდომია პანდემიის პერიოდში. ბარათები ხელმისაწვდომია ქართულ და ინგლისურ ენაზე. ბარათები შეიქმნა ევროკავშირის სამეზობლო პოლიტიკის ფარგლებში, ჯანმრთელობისმსოფლიო ორგანიზაციასთან და EUvsDisinfo-სთან თანამშრომლობით ყველაფერი, რაც COVID-19-ის პანდემიის პერიოდში ვაქცინაციის შესახებ უნდა იცოდეთ

თბილისი. საქმეზე „კალანდია საქართველოს წინააღმდეგ“ ევროპულმა სასამართლომ 2021 წლის 22 აპრილს საქართველოს ახალგაზრდა იურისტთა ასოციაციის (საია) საჩივარი დააკმაყოფილა და ევროპული კონვენციის მე-6 (1) მუხლის (საქმის სამართლიანი განხილვის უფლება) დარღვევა დაადგინა. „კალანდიას საქმე ერთ-ერთია საიას წარმოებაში არსებულ საქმეებს შორის, რომლებიც პოლიტიკური მოტივაციის საფუძვლით პირთა დევნას შეეხება და თავისი არსით, მსგავსია საიას მიერ ევროპულ სასამართლოში მოგებული ორი საქმისა „ტლაშაძე და კაკაშვილი საქართველოს წინააღმდეგ“ და „მეგრელიშვილი საქართველოს წინააღმდეგ“. სრულად...  წყარო: gyla.ge

თბილისი. ღირსეული შრომის პლატფორმა მშრომელთა საერთაშორისო დღესთან დაკავშირებით განცხადებას ავრცელებს. „საქართველოში, პირველ მაისს მშრომელთა ერთი ნაწილი უსამსახუროდ, მეორე ნაწილი კი საფრთხისშემცველ სამუშაო პირობებში ხვდება. COVID 19-ის პანდემიის შედეგად დამდგარი მრავალმხრივი და საყოველთაო კრიზისი იმის დასტურია, რომ არსებული პოლიტიკური და ეკონომიკური სისტემა ვერ უზრუნველყოფს მდგრად, სამართლიან და უსაფრთხო ყოველდღიურობას მშრომელთათვის და მათი ოჯახებისთვის. კრიზისი ადასტურებს ფუნდამენტური ცვლილებების და მათთვის ბრძოლის აუცილებლობასაც“, ნათქვამია ერთობლივ განცხადებაში. სრულად... წყარო: socialjustice.org.ge

აჭარა. საქართველოს ახალგაზრდა იურისტთა ასოციაციის ინფორმაციით, ნათია კაპანაძის საქმეზე მიუხედავად იმისა, რომ სარჩელის წარდგენიდან 2 წელი გავიდა, დღემდე არც ერთი სხდომა არ ჩატარებულა. ორგანიზაციის განმარტებით უცნობია თუ რა გახდა საქმის განხილვის გაჭიანურების საფუძველი. სატელეფონო საუბრისას მიღებული განმარტებით საქმის გაჭიანურება „ქვეყანაში შექმნილმა მდგომარეობამ“ განაპირობა. საია მიიჩნევს, რომ ნათია კაპანაძის საქმის განხილვა ხელოვნურად ჭიანურდება და ბათუმის საქალაქო სასამართლოს მოუწოდებს, ამ საქმეზე გადაწყვეტილება უმოკლეს ვადებში მიიღოს. სრულად... წყარო: gyla.ge

თბილისი. სოციალური სამართლიანობის ცენტრი (ყოფილი EMC) ეხმიანება საქართველოს პარლამენტში ინიცირებულ, სამშენებლო კანონმდებლობაში დაგეგმილი ცვლილებების პაკეტს.  ორგანიზაცია მიიჩნევს, რომ იგი უსახლკარობის კრიმინალიზაციის პირდაპირ რისკებს აჩენს და ერთმნიშვნელოვნად ეწინააღმდეგება ადამიანის უფლებათა საერთაშორისო სტანდარტებს. სრულად... წყარო: socialjustice.org.ge

თბილისი. სოციალური სამართლიანობის ცენტრმა (ყოფილი EMC) ნარკოპოლიტიკის 2020 წლის ტენდენციების შესახებ ანგარიში მოამზადა. „ანგარიშში მიმოხილულია ნარკოტიკულ დანაშაულებზე მართლმსაჯულების სფეროში არსებული მდგომარეობა, 2020 წლის სტატისტიკური მონაცემები ნარკოტიკულ დანაშაულებზე სისხლისსამართლებრივი დევნის და გამამტყუნებელი განაჩენების, ნარკოტესტირების, პირობით მსჯავრდებულთა რაოდენობისა და სხვა რელევანტური საკითხების თაობაზე“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. „უფლებები საქართველოს“ ინფორმაციით, თბილისის საქალაქო სასამართლოს ადმინისტრაციულ საქმეთა კოლეგიის მოსამართლის, დიანა ფარქოსაძის 2021 წლის 27 აპრილის გადაწყვეტილებით, ორგანიზაციის იურისტის, რუსუდან მჭედლიშვილის მოთხოვნა დაკმაყოფილდა და საქართველოს შინაგან საქმეთა სამინისტროს მიგრაციის დეპარტამენტს დაევალა სომალის მოქალაქე ა.მ.ა.-სთვის საქართველოში ჰუმანიტარული სტატუსის მინიჭება. სრულად... წყარო: rights.ge

შიდა ქართლი. 27 აპრილს, გორის „კეთილდღეობის და განვითარების ცენტრი“-თან არსებული გორის სამოქალაქო აქტივიზმის ცენტრის მოხალისეებისათვის გაიმართა ფილმის „პეპლების ცირკის“ ჩვენება და განხილვა, ხოლო ფილმის შემდეგ კი მოხდა ესეების კონკურსის დაჯილდოვება. კონკურსი ეხებოდა ისეთ თემებს, როგორიცაა ტოლერანტობა და ადამიანის უფლებები. ახალგაზრდებმა წარმოადგინეს საინტერესო ესეები და გამოვლინდა გამარჯვებულები, რომლებსაც გადაეცათ ფასიანი საჩუქრები. სრულად... წყარო: ორგანიზაციის გვერდი სოციალურ ქსელში

თბილისი. 28 აპრილს, საქართველოს ახალგაზრდა იურისტთა ასოციაციამ (საია) გამართა კვლევის - „პრემიერი - სუვერენი“ - ონლაინ პრეზენტაცია. „კვლევა შეეხება საქართველოში კოვიდ-19-თან დაკავშირებით საგანგებო მდგომარეობის გამოცხადებას და მის თანამდევ შედეგებს. კვლევამ გამოავლინა, რომ ამ პროცესს ხარვეზების გარეშე არ ჩაუვლია. ნაშრომი შედგება ორი ნაწილისგან და განიხილავს საქართველოში კოვიდ-19-ის პანდემიის საპასუხოდ გამოცხადებულ საგანგებო მდგომარეობასთან დაკავშირებულ მნიშვნელოვან საკითხებს. პირველი ეხება პრეზიდენტის ბრძანებისა და დეკრეტის მიღების პროცედურებს, პარლამენტის პასიურ როლსა და კონსტიტუციის მოთხოვნების საწინააღმდეგოდ მთავრობისთვის უფლებამოსილებების გაზრდას. მეორე - ძირითად აქცენტს აკეთებს საერთაშორისო აქტებიდან დეროგაციის, შეზღუდული უფლებების, დაწესებული სანქციებისა და საკანონმდებლო ცვლილებების ანალიზზე“, ნათქვამია ორგანიზაციის ვებგვერდზე. სრულად... წყარო: gyla.ge

იმერეთი. საქართველოს ახალგაზრდა იურისტთა ასოციაციის (საია) ინფორმაციით, 28 აპრილს, წყალტუბოს მაგისტრატმა სასამართლომ გამოაცხადა გადაწყვეტილების სარეზოლუციო ნაწილი, რომლის თანახმადაც ნამოხვანის ჰესების კასკადის მშენებელი კომპანია შპს „ენკა რინიუებზლი“ ცნობილ იქნა სამართალდამრღვევად ადმინისტრაციულ სამართალდარღვევათა კოდექსის 798 მუხლის პირველი ნაწილის საფუძველზე, რაც გულისხმობს საქმიანობის განმახორციელებლის მიერ გარემოსდაცვითი გადაწყვეტილებით დადგენილი პირობების შეუსრულებლობას. სასამართლომ კომპანიის მიმართ გამოიყენა ადმინისტრაციული სახდელის ზომად ჯარიმა 5 000 ლარის ოდენობით. სრულად... წყარო: gyla.ge

თბილისი. სოციალური სამართლიანობის ცენტრის (ყოფილი EMC) შეფასებით, დაგეგმილი ცვლილებებით, ადმინისტრაციულ სამართალდარღვევათა კოდექსი კიდევ უფრო რეპრესიული ხდება.  „ცვლილებები სრულად უგულებელყოფს წლების განმავლობაში სამოქალაქო ორგანიზაციების და უფლებადამცველების მხრიდან მოთხოვნილ ადმინისტრაციულ სამართალდარღვევათა კოდექსის რეფორმის საჭიროებას, ამის ნაცვლად კი კიდევ უფრო დიდ სივრცეს ხსნის საპოლიციო რეპრესიული მექანიზმებისა და სახდელების თვითნებურად გამოყენებისთვის. მოვუწოდებთ პარლამენტს, მხარი არ დაუჭიროს ინიცირებულ ცვლილებებს და სანაცვლოდ, დროულად დაიწყოს მუშაობა სამართალდარღევავათა კოდექსის ფუნდამენტურ რეფორმაზე“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. ხელმომწერი საზოგადოებრივი ორგანიზაციები ბოლო დღეებში ჰომოფობიური ძალადობის გაძლიერების ტენდენციას ეხმიანებიან და სახელმწიფოს ამ მიმართულებით პოლიტიკის არსებითი ცვლილებისკენ მოუწოდებენ. „სამწუხაროდ, სახელმწიფოს პოლიტიკა ჰომოფობიას და ტრანსფობიას, ისევე, როგორც გენდერულ უთანასწორობას, დღემდე არ იაზრებს სისტემურ და სტრუქტურულ პრობლემად, რის გამოც ჰომოფობიის წარმოჩენა ხდება მხოლოდ ინდივიდუალურ საკითხად, და შესაბამისად, სახელმწიფოს მიერ ჰომოფობიასთან ბრძოლის წინააღმდეგ დასახულ მთავარ სტრატეგიად კვლავ მის ინდივიდუალურ გამოვლინებებზე შერჩევითი სადამსჯელო პასუხი რჩება. შესაბამისად, უმნიშვნელოვანესია ჰომოფობიისა და ტრანსფობიის შემცირებაზე მიმართული პროაქტიული ინიციატივები, ფართო საგანმანათლებლო და ცნობიერების ამაღლების მიმართულებით, რომელიც სხვა ეფექტურ ნაბიჯებთან ერთად გრძელვადიანი შედეგის მომტანი იქნება და ადამიანებს ღირსეული ცხოვრების შესაძლებლობებს მისცემს“, ნათქვამია ერთობლივ განცხადებაში. სრულად... წყარო: socialjustice.org.ge

თბილისი. სოციალური სამართლიანობის ცენტრი (ყოფილი EMC) გთავაზობთ ახალ კვლევას: „მეზობელ ქვეყნებში ექსტრადიციის მანკიერი და არაადამიანური პრაქტიკა“. „დოკუმენტში განხილულია 2017-2020 წლებში საქართველოდან რუსეთის ფედერაციაში, თურქეთისა და აზერბაიჯანის რესპუბლიკებში პირთა ექსტრადირების საკითხზე გადაწყვეტილების მიღების პროცესში გამოვლენილი ძირითადი პრობლემური ტენდენციები და მათი შესაბამისობა ადამიანის უფლებათა საერთაშორისო და ადგილობრივ სტანდარტებთან“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) უარყოფითად აფასებს ადმინისტრაციულ სამართალდარღვევათა კოდექსში შესატანი ცვლილებების პროექტებს და მოუწოდებს პარლამენტს, არ დაუჭიროს მხარი დაგეგმილ ცვლილებებს. „26 აპრილს, საქართველოს პარლამენტში დარეგისტრირდა ორი კანონპროექტი, რომლებიც დაჩქარებული წესით განიხილება. მათგან ერთი შეეხება საქართველოს ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციის კანონიერი მოთხოვნისადმი დაუმორჩილებლობა) მუხლებში შესატან ცვლილებებს. კანონპროექტის თანახმად, საგრძნობლად მკაცრდება სანქცია ორივე მითითებულ მუხლზე, ამასთან, შემცირებულია მოსამართლის როლი - საქმის ფაქტობრივი გარემოებების გათვალისწინებით, განსაზღვროს სანქციის ზომა ან გამოიყენოს სიტყვიერი შენიშვნა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს სტატიას: მოდერნიზებული 108-ე კონვენციის მნიშვნელობა საქართველოსთვის. „108+ კონვენციის ხელმოწერით საქართველო აიღებს საერთაშორისო ვალდებულებას უზრუნველყოს მონაცემთა სუბიექტის უფლებების დაცვის უფრო მაღალი სტანდარტი, მონაცემთა დამმუშავებლის მეტი ანგარიშვალდებულება და მონაცემთა დაცვაზე ეფექტიანი ზედამხედველობა. განსაკუთრებით აღსანიშნავია სახელმწიფო უსაფრთხოებისა და თავდაცვის მიზნებისათვის მონაცემთა დამუშავებაზე ეფექტური ზედამხედველობის უზრუნველყოფის ვალდებულება, რაც უსაფრთხოების სექტორის ანგარიშვალდებულების გაზრდის თვალსაზრისით მნიშვნელოვანი წინგადადგმული ნაბიჯი იქნება“, ნათქვამია ორგანიზაცისი ვებგვერდზე. სრულად... წყარო: idfi.ge

თბილისი. სოციალური სამართლიანობის ცენტრი პროექტის „ოპოიდებით ჩანაცვლებითი მკურნალობის ხელმისაწვდომობის ადვოკატირება პენიტენციურ დაწესებულებაში“ ფარგლებში აქვეყნებს თემო ხატიაშვილის ვიდეოპოსტს: ჩანაცვლებითი მკურნალობის პრობლემები ციხეებში“. ციხეებში დღემდე არ მოქმედებს ხანგრძლივი ჩანაცვლებითი მკურნალობა. არსებული კანონმდებლობა ვერ უზრუნველყოფს მსჯავრდებული და ბრალდებული პირებისთვის მკურნალობის უწყვეტობას, აიძულებს პროგრამაში ჩართულ პირებს უარი თქვან მკურნალობაზე პენიტენციურ სისტემაში მოხვედრის შემთხვევაში. არსებული რეგულაციები არ შეესაბამება ადამიანის უფლებათა დაცვის სტანდარტებს და აფერხებს ჯანდაცვის სერვისებზე თანაბარი ხელმისაწვდომობას ციხეებში“, ამბობს თემო ხატიაშვილი. სრულად... წყარო: socialjustice.org.ge

თბილისი. სოციალური სამართლიანობის ცენტრი გთავაზობთ მარიამ შალვაშვილის სტატიას: პირადი პრობლემები - საყოველთაო პასუხისმგებლობა?. „ქალებსა და კაცებს შორის იერარქიის და განსხვავებულობის საჩვენებლად, ლიტერატურაში ხშირად გამოიყენება სივრცის და საქმიანობების დაყოფა პირად (private) და საჯარო (public) ნაწილებად. ამ დაყოფის მიხედვით, ქალები პირად სფეროში საქმიანობენ, რაშიც ოჯახი იგულისხმება, ხოლო კაცები, ძირითადად, საჯარო სფეროს - სახელმწიფოს მართვას და ეკონომიკურ საქმიანობას უძღვებიან. მაღალმთიან აჭარაში ჩატარებული მცირე კვლევის საშუალებით, მსურს ეჭვქვეშ დავაყენო და გავაკრიტიკო ამგვარი დაყოფა და ვაჩვენო, რომ, ხშირ შემთხვევაში, რთულია ამ ორი სფეროს ნათლად გამიჯვნა“, ნათქვამია სტატიის აღწერაში. სრულად... წყარო: socialjustice.org.ge

სამეგრელო. საქართველოს ახალგაზრდა იურისტთა ასოციაცია (საია) იცავდა არასრულწლოვანს, რომელის მიმართ საჯარო სივრცეში სექსუალური შევიწროება განხორციელდა. „ზუგდიდის რაიონულმა სასამართლომ დაადგინა არასრულწლოვანზე განხორციელებული სექსუალური შევიწროების ფაქტი და პასუხისმგებელი პირი 600 ლარით დააჯარიმა. სასამართლოს გადაწყვეტილება ადმინისტრაციულ პასუხისგებაში მიცემულმა პირმა ქუთაისის სააპელაციო სასამართლოში გაასაჩივრა, თუმცა, სააპელაციო სასამართლომაც გაიზიარა პირველი ინსტანციის სასამართლოს დადგენილებაში მოყვანილი ფაქტობრივი და სამართლებრივი დასაბუთება და გადაწყვეტილება უცვლელად დატოვა. ამ საქმეს საია USAID/PROLoG-ის მხარდაჭერით აწარმოებდა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. 22 აპრილს, სოციალური სამართლიანობის ცენტრმა (ყოფილი EMC) გამართა კონფერენცია - „ეთნიკური უმცირესობების პოლიტიკური გაუცხოების სისტემური მიზეზები“. „საჯარო ცხოვრებაში და პოლიტიკაში ეთნიკური უმცირესობების მონაწილეობა კვლავ მნიშვნელოვან გამოწვევად რჩება. ეთნიკური უმცირესობების წარმომადგენლობა პარლამენტში კვლავ დაბალია და 2020 წლის არჩევნების შემდეგ სიტუაცია ამ მიმართულებით მკვეთრად გაუარესებულია“, ნათქვამია ორგანიზაციის ვებგვერდზე. ვრცლად... წყარო: socialjustice.org.ge

თბილისი. „უფლებები საქართველოს“ ინფორმაციით, გამოძიების დაწყებიდან თითქმის ოთხი წლის შემდეგ, ორგანიზაციის იურისტის, არჩილ ჩოფიკაშვილის მიერ პროკურატურისთვის წარდგენილი შუამდგომლობა დაკმაყოფილდა და აზერბაიჯანელ ჟურნალისტს, აფგან მუხთარლის, რომელიც დაუდგენელმა პირებმა 2017 წლის მაისში თბილისიდან გაიტაცეს და აზერბაიჯანის ხელისუფლებას გადასცეს, დაზარალებულის სტატუსი მიენიჭა. გარდა ამისა, დაზუსტდა საქმის კვალიფიკაცია. სრულად... წყარო: www.rights.ge