სამეგრელო. საქართველოში გაეროს მუდმივმა კოორდინატორმა საბინე მახლმა სამეგრელოს სოფელ ცაიშში, ოჯახში ძალადობის მსხვერპლებისა და ძალადობაგამოვლილი პირების კრიზისული ცენტრი მოინახულა. „ცაიშში კრიზისული ცენტრი 2019 წელს, არასამთავრობო ორგანიზაცია „სახლისა“ და ადგილობრივი მუნიციპალიტეტის თანამშრომლობის შედეგად, გაეროს ერთობლივი პროგრამის „გენდერული თანასწორობისთვის“ ფარგლებში, შვედეთის მთავრობის მხარდაჭერით ამოქმედდა. კრიზისული ცენტრი ძალადობის მსხვერპლებსა და ძალადობაგამოვლილ პირებს ფსიქოლოგიურ, სოციალურ და ეკონომიკურ დახმარებას, სარეაბილიტაციო, სამედიცინო, იურიდიულ და რეფერალურ მომსახურებებს სთავაზობს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

აჭარა. აჭარაში ვიზიტის ფარგლებში, ევროკავშირის ელჩი, კარლ ჰარცელი მობილური მხარდაჭერის ჯგუფების მუშაობას გაეცნო. „„კოალიცია დამოუკიდებელი ცხოვრებისათვის“ თავმჯდომარემ, გიორგი ძნელაძემ კარლ ჰარცელს პროექტის, „შეზღუდული შესაძლებლობების მქონე პირთა მხარდაჭერა COVID-19-ით გამოწვეული ბარიერების დაძლევაში”, შესახებ მიაწოდა ინფორმაცია და მობილური მხარდაჭერის ჯგუფების საჭიროებაზე გაამახვილა ყურადღება. მობილური მხარდაჭერის ჯგუფებმა, აჭარის, გურიისა და სამეგრელოს რეგიონებში, მუშაობა 2021 წლის 11 იანვრიდან განაახლა. ისინი შეზღუდული შესაძლებლობის მქონე პირებს ადაპტირებული ავტოსატრანსპორტო საშუალებით, უფასოდ ემსახურება“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდის სოციალურ ქსელში

სამცხე-ჯავახეთი. „კოალიცია თანასწორობისთვის“ ეხმიანება საქართველოს მართლმადიდებელი ეკლესიის საპატრიარქოს ა(ა)იპ ჯავახეთის ნინოწმინდის წმინდა ნინოს ობოლ, უპატრონო და მზრუნველობამოკლებულ ბავშვთა პანსიონატში ბავშვის უფლებების განგრძობადი დარღვევის ფაქტს. „უკიდურესად შემაშფოთებელია, რომ კვლავ დაფიქსირდა საქართველოს სახალხო დამცველის საქმიანობისათვის ხელის შეშლა და სახელმწიფო დღემდე არ ასრულებს გაეროს ბავშვის უფლებათა კომიტეტის დროებითი ღონისძიების მოთხოვნებს. „კოალიცია თანასწორობისათვის“ მოუწოდებს ხელისუფლებას, დაუყოვნებლივ დაიწყოს ქმედითი ღონისძიებების გატარება პანსიონატში მცხოვრები ბავშვების უფლებების დაცვის მიზნით, რაც მოცემული დროისათვის გულისხმობს შესაბამისი უფლებამოსილების მქონე დამოუკიდებელი მონიტორინგის განმახორციელებელი ორგანოსათვის ეფექტური მონიტორინგის განხორციელების შესაძლებლობის მიცემას, ხოლო გრძელვადიანად, ბავშვების რეინტეგრაციას ბიოლოგიურ ოჯახებში ან/და ოჯახურ გარემოსთან მიახლოებულ ზრუნვის ფორმაში განთავსებას“, ნათქვამია განცხადებაში.  სრულად... წყარო: phr.ge

თბილისი. გაეროს ბავშვთა ფონდის განცხადებით, ბავშვთა დიდი ზომის დარჩენილი ინსტიტუციების მონიტორინგი უნდა ხორციელდებოდეს ქვეყნის შესაბამისი უწყებების მიერ, რათა ბავშვთა უფლებები სრულად იყოს დაცული. „ბავშვთა დიდი ზომის დარჩენილ ინსტიტუციებთან დაკავშირებით უნდა შემუშავდეს და გაძლიერდეს ალტერნატიული მომსახურებები დეინსტიტუციონალიზაციის საერთო სტრატეგიის ფარგლებში, სადაც ზედმიწევნით იქნება გაწერილი შესაბამისი მიზნები და ამოცანები, რაც თავის მხრივ, ხელს შეუწყობს აღნიშნული ინსტიტუციების ოჯახსა და თემზე დაფუძნებული სერვისებით თანდათანობით ჩანაცვლებას... ამავდროულად, ყველა შესაბამის სახელმწიფო ინსტიტუციას უნდა შეეძლოს მონიტორინგი აწარმოოს ყველგან, სადაც ბავშვები არიან, რათა მათი უფლებები დაცული იყოს“, ნათქვამია ორგანიზაციის განცხადებაში. სრულად... წყარო: www.unicef.org

იმერეთი. სოციალური სამართლიანობის ცენტრის (ყოფილი EMC) აზრით, დღესდღეობით, ჭიათურის მუნიციპალიტეტში, სახელმწიფოს, “ჯორჯიან მანგანეზსა” და მის კონტრაქტორებს შორის ჩამოყალიბებული პასუხისმგებლობის და ზედამხედველობის ბუნდოვანი, გაუმჭვირვალე სისტემა, ერთი მხრივ, კომპანიის მიერ სალიცენზიო პირობების შესრულების შემოწმებასა და უკანონო მოპოვების კონტროლზე სახელმწიფო ზედამხედველობის შესაძლებლობას ზღუდავს, ხოლო, მეორე მხრივ, დასაქმებულებსა და ადგილობრივი მოსახლეობის პროტესტს პრაქტიკულად ადრესატის გარეშე ტოვებს. სწორედ ამიტომ ორგანიზაცია აუცილებლად მიიჩნევს, რომ “ჯორჯიან მანგანეზის” საქმიანობა დაუყონებლივ დაექვემდებაროს გარემოსდაცვითი ზედამხედველობის დეპარტამენტის და წიაღის ეროვნულ სააგენტოს ზედამხედველობას, რის გამოც დღეს ორგანიზაციამ აღნიშნულ უწყებებს მიმართა ადგილზე მდგომარეობის შესწავლის მოთხოვნით. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაციამ (საია) პარლამენტში ალტერნატიული ანგარიშები წარადგინა, რომლებშიც ორგანიზაცია ადამიანის უფლებათა ევროპული სასამართლოს მიერ საქართველოს წინააღმდეგ გამოტანილი გადაწყვეტილებებისა და განჩინებების აღსრულების მიზნით სახელმწიფოს მიერ გატარებულ ინდივიდუალურ და ზოგად ღონისძიებებს აფასებს და დამატებით, სახელმწიფოს კონკრეტული ნაბიჯების გადადგმისკენ მოუწოდებს.  საიას მიერ 2021 წელს წარდგენილი ალტერნატიული ანგარიშები ცინცაბაძის და იდენტობის ჯგუფის საქმეებს შეეხება.  სრულად... წყარო: gyla.ge

თბილისი. სოციალური სამართლიანობის ცენტრი აქვეყნებს სოლიდარობის პლატფორმის წევრების ვიდეოს, სადაც სხვადასხვა ეთნიკური და რელიგიური ჯგუფის აქტივისტები რიონის ხეობის მცველებს სოლიდარობას უცხადებენ. სოლიდარობის პლატფორმა მიზნად ისახავს, რელიგიური და ეთნიკური უმცირესობებით დასახლებულ რეგიონებში მოღვაწე აქტივისტების ერთმანეთთან დაკავშირებას და საჯარო ცხოვრებაში მათი გავლენების და მონაწილეობის გაძლიერებას. სრულად... წყარო: socialjustice.org.ge

იმერეთი. 15 მაისს სოლიდარობის პლატფორმის წევრები რიონის ხეობის მცველებს ესტუმრნენ. „შეხვედრის ფარგლებში, რიონის ხეობის მცველებმა ისაუბრეს მათი გამოწვევების შესახებ და სოლიდარობის პლატფორმის წევრებს გაუზიარეს მათი პროტესტის არსი და სულისკვეთება. სოლიდარობის პლატფორმის წევრებმა, თავის მხრივ, ისაუბრეს მათ რეგიონებში ჰესების მშენებლობის პრობლემურ პრაქტიკებზე და მის გარემოზე ზეგავლენაზე. ამასთანავე, პლატფორმის წევრებმა მხარდაჭერა გამოუცხადეს ხეობის მცველებს“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. ხელმომწერი ორგანიზაციები მოუწოდებენ საქართველოს საერთო სასამართლოების მოსამართლეებს, 26 მაისს არ ჩაატარონ XXIX რიგგარეშე კონფერენცია, რომელზეც დაგეგმილია საქართველოს იუსტიციის უმაღლესი საბჭოს 4 მოსამართლე წევრის არჩევა. „მიუხედავად იმისა, რომ საბჭოს 15 წევრიდან 9 (ოთხი მოსამართლე და 5 არამოსამართლე წევრი) ახლიდან უნდა აირჩეს 2021 წლის საგაზაფხულო სესიის განმავლობაში, საქართველოს პარლამენტს ჯერ კიდევ არ დაუწყია მუშაობა საბჭოს დაკომპლექტების წესის ცვლილებაზე. აღნიშნულის გათვალისწინებით, რიგგარეშე კონფერენციის ჩატარება და მოქმედი კანონმდებლობის შესაბამისად საბჭოს მოსამართლე წევრების არჩევა ეწინააღმდეგება 19 აპრილის შეთანხმების სულისკვეთებას და სპობს შესაძლებლობას საბჭოს მოსამართლე წევრები შერჩეულნი იყვნენ სამართლიანი პროცესის შედეგად, ხოლო შერჩეულ კანდიდატებს ჰქონდეთ მაღალი საზოგადოებრივი და პროფესიული ნდობა და ლეგიტიმაცია“, ნათქვამია ერთობლივ განცხადებაში. სრულად... წყარო: socialjustice.org.ge

თბილისი. „სოციალური სამართლიანობის ცენტრმა” (ყოფილი EMC) წარადგინა ნამახვანჰესის მშენებლობასთან დაკავშირებული საპროტესტო აქციების დროს გამოყენებული საპოლიციო ღონისძიებების შეფასების დოკუმენტი. დოკუმენტში გაანალიზებულია, რამდენად კანონიერი და პროპორციული იყო სახელმწიფოს მხრიდან გამოყენებული საპოლიციო იძულების ღონისძიებები პროტესტის მიმდინარეობისას. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. სახალხო დამცველის ინფორმაციით, ომბუდსმენის რწმუნებულები განმეორებითი ვიზიტით იმყოფებოდნენ ნინოწმინდის ბავშვთა პანსიონში, თუმცა მონიტორინგის განხორციელების შესაძლებლობა, გაეროს ბავშვთა კომიტეტის მიერ მიღებული დროებითი ღონისძიების მიუხედავად, კვლავ არ მიეცათ. დაწესებულების წარმომადგენლებმა გასაუბრება არ ისურვეს და ამის მიზეზად, ხელმძღვანელის მითითება დასახელდა. „ომბუდსმენის წარმომადგენლები, ასევე, იმყოფებოდნენ ნინოწმინდის მე-4 საჯარო სკოლაში. აღსანიშნავია, რომ სკოლაში პანსიონიდან არცერთი ბავშვი არ გამოცხადებულა, რაც მიუთითებს, რომ სახელმწიფო უწყებების მხრიდან დაწესებულებას ინფორმაცია ჰქონდა სახალხო დამცველის მოსალოდნელი ვიზიტის შესახებ. სკოლის დირექტორთან გასაუბრებით კიდევ ერთხელ დადასტურდა, რომ სკოლაში ბავშვები ზედამხედველების თანხლებით დადიან. ამასთან, ზედამხედველები საგაკვეთილო პროცესის მიმდინარეობისას სკოლის შენობაში იმყოფებიან და იქ ელოდებიან ბავშვებს. აღნიშნული პრაქტიკის თაობაზე, სკოლის ადმინისტრაციას ადგილზე მიეცა რეკომენდაცია, რადგან არღვევს ბავშვის საუკეთესო ინტერესს. საქართველოს სახალხო დამცველი კიდევ ერთხელ, მოუწოდებს ყველა შესაბამის სახელმწიფო უწყებას, დაუყოვნებლივ მოახდინოს ბავშვის უფლებათა კომიტეტის დროებითი ღონისძიებების შესრულება და უზრუნველყოს პანსიონში დამოუკიდებელი მონიტორინგის ორგანოს მიერ საკუთარი უფლებამოსილების განხორციელება“, ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. ომბუდსმენმა გამოაქვეყნა ანგარიში „სამართალდამცავთა პოზიტიური ვალდებულებები დაუცველი ჯგუფების თანასწორუფლებიანობის დაცვის მხრივ“. „ანგარიშში შეფასებულია 2015-2020 წლებში, მათ შორის, იეჰოვას მოწმეების და ლგბტ+ თემის წევრების წინააღმდეგ ჩადენილი სავარაუდო სიძულვილით მოტივირებული დანაშაულების გამოძიების ეფექტიანობა. ანგარიში ასევე მიმოიხილავს ბოლო წლებში ლგბტ+ თემის შეკრებისა და გამოხატვის თავისუფლების წინააღმდეგ ჩადენილ სამართალდარღვევის ფაქტებს. დოკუმენტის ბოლოს მოცემულია რეკომენდაციები, რომლითაც სახალხო დამცველი სამართალდამცავ ორგანოებს, ქვეყანაში სიძულვილით მოტივირებული დანაშაულების აღმოფხვრისა და ლგბტ+ ადამიანების მიერ გამოხატვისა და შეკრების თავისუფლებების რეალიზაციის გაუმჯობესების მიზნით გასატარებელი ღონისძიებების შესახებ მიუთითებს“. სრულად... წყარო: ombudsman.ge

თბილისი. სოციალური სამართლიანობის ცენტრი (ყოფილი EMC) აქვეყნებს ვიდეოს, რომელშიც ქვიარ აქტივისტები საუბრობენ შეკრებების მიღმა მნიშვნელოვანი სამუშაოს გაწევის აუცილებლობასა და წარსული გამოცდილების გადააზრებაზე. „2013 წლის 17 მაისის მძიმე გამოცდილების მიუხედავად, ჩვენ ვერ დავინახეთ, რომ ხელისუფლება სათანადოდ იაზრებს ჰომოფობიის მძიმე პოლიტიკურ და სოციალურ შედეგებს და მისი დაძლევისთვის სისტემური ნაბიჯებს დგამს. ამის საპირისპიროდ, აშკარაა, რომ ხელისუფლება უკვე წლებია ვერ უზრუნველყოფს ლგბტქი ადამიანების შეკრების თავისუფლების დაცვას“. სრულად... წყარო: socialjustice.org.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის“ მოუწოდებს საქართველოს პარლამენტს, დროულად დაიწყოს მართლმსაჯულების სისტემის რეფორმაზე მუშაობა. ასევე, უზრუნველყოს იუსტიციის უმაღლესი საბჭოს კვალიფიციური და სანდო კადრებით დაკომპლექტება. „როგორც საზოგადოებისთვის არის ცნობილი, ხელისუფლებასა და ოპოზიციას შორის 19 აპრილს ხელმოწერილი შეთანხმების ერთ-ერთ საკვანძო საკითხს მართლმსაჯულების ამბიციური რეფორმა წარმოადგენს. შეთანხმების პირობების კეთილსინდისიერად შესრულება მნიშვნელოვანია ქვეყნის შიგნით პოლიტიკური პროცესების სტაბილურობისა და არსებული მრავალშრიანი კრიზისის მძიმე ეფექტების შესამცირებლად. ამავდროულად, ხელშეკრულებაში გაწერილ თითოეულ პუნქტზე მუშაობა უნდა წარიმართოს მაღალი საზოგადოებრივი ჩართულობით და პოლიტიკური აქტორების ურთიერთპატივისცემით, რაც ასევე არის 19 აპრილის შეთანხმების სულისკვეთება“, ნათქვამია ერთობლივ განცხადებაში. სრულად... წყარო: gyla.ge

თბილისი. სოციალური სამართლიანობის ცენტრი (ყოფილი EMC) საქართველოს ფინანსთა და იუსტიციის სამინისტროებისგან ნამახვანი ჰესის ხელშეკრულების თაობაზე მათი დასკვნების გასაჯაროებაზე უარს ადმინისტრაციული საჩივრითა და სასამართლოს გზით ასაჩივრებს. „მიუხედავად იმისა, რომ საქართველოს კანონმდებლობის შესაბამისად, საჯარო ინფორმაცია დაუყოვნებლივ, შესაბამისი საფუძვლების არსებობის შემთხვევაში 10 დღის ვადაში უნდა გაიცეს, არცერთი სამინისტროსგან გამოთხოვილი ინფორმაცია არ მიგვიღია. საჯარო ინფორმაციის მოთხოვნის დაკმაყოფილების მიზნით, ჩვენ თბილისის საქალაქო სასამართლოს სარჩელით მივმართეთ; ამასთან, საქართველოს ფინანსთა მინისტრისგან საჯარო ინფორმაციის გაცემა ადმინისტრაციული საჩივრითაც მოვითხოვეთ“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. „უფლებები საქართველოს“ იურისტის, გიორგი მახარაძის ძალისხმევით, მოძრაობა „სირცხვილიას“ აღმასრულებელი დირექტორის, გიორგი მჟავანაძის მიმართ არსებული ადმინისტრაციული წარმოება შეწყდა. „შინაგან საქმეთა სამინისტრო გიორგი მჟავანაძეს პოლიციელისთვის სიტყვიერი შეურაცხყოფის მიყენებას საქართველოს ადმინისტრაციულ სამართალდარღვევათა კოდექსის 173-ე მუხლით ედავებოდა. ინციდენტს ადგილი 2021 წლის 5 თებერვალს ჰქონდა. 2021 წლის 17 მაისს, თბილისის საქალაქო სასამართლომ სრულად გაიზიარა დაცვის მხარის პოზიცია და შეწყვიტა გიორგი მჟავანაძის მიმართ ადმინისტრაციული სამართალდარღვევის საქმის წარმოება“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი ეხმაურება გურამ ფალავანდიშვილის მხრიდან 2021 წლის 16 მაისს თბილისის „დედაენის პარკში“ ქვიარ აქტივისტების მიერ დადგმული სახელოვნებო ინსტალაციის „Welcome to the closet”-ის დაზიანების ფაქტს. ორგანიზაცია მოუწოდებს სამართალდამცავ უწყებებს, დროული და ეფექტური რეაგირებისკენ და სიძულვილით მოტივირებული მართლსაწინააღმდეგო ქმედებებისა და დანაშაულების აღსაკვეთად პრევენციული ნაბიჯების გადადგმისკენ. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) ჰომოფობიის, ტრანსფობიის და ბიფობიის წინააღმდეგ საერთაშორისო დღეს განცხადებით ეხმაურება. „საქართველოში ბოლო წლების განმავლობაში ლგბტქი პირთა უფლებრივი მდგომარეობის გაუმჯობესების მიმართულებით მნიშვნელოვანი ნაბიჯები არ გადადგმულა. ქვეყანაში ლგბტქი თემი ერთ-ერთი ყველაზე მოწყვლადი ჯგუფია, ლგბტქი ადამიანები განსაკუთრებით დაუცველნი არიან სტიგმისა და ძალადობისგან. არსებულ სირთულეებს 2020 წლის მარტის თვიდან დაემატა პანდემიით გართულებული მდგომარეობა. COVID-19 პანდემიის შედეგად შექმნილმა მდგომარეობამ თემის მოწყვლადობა კიდევ უფრო გაზარდა“, ნათქვამია ორგანიზაციის ვებგვერდზე. სრულად... წყარო: gyla.ge

ქვემო ქართლი. სოციალური სამართლიანობის ცენტრი (ყოფილი EMC) ეხმიანება დმანისში მიმდინარე მოვლენებს და სახელმწიფოს მოუწოდებს, მიიღოს მყისიერი და ეფექტიანი ზომები ადგილზე უსაფრთხო და მშვიდობიანი გარემოს შესაქმნელად. ორგანიზაციის აზრით, ამისთვის საჭიროა შინაგან საქმეთა სამინისტრომ მოახდინოს პოლიციის დამატებით ძალების მობილიზაცია ადგილზე და მაღალი თანამდებობის პირების ჩართვა სიტუაციის განსამუხტად. „გუშინ საღამოს გავრცელდა ინფორმაცია დმანისში ძალადობისა და კონფლიქტის შესახებ, რომელიც ერთი შეხედვით საყოფაცხოვრებო ნიადაგზე დაიწყო და ის სვან ეკომიგრანტებსა და საქართველოს აზერბაიჯანელი თემების წარმომადგენლებს შორის მასშტაბურ დაპირისპირებაში და ძალადობაში გადაიზარდა“. სრულად... წყარო: ორგანიზაციის გვერდი სოციალურ ქსელში

თბილისი. ჰომოფობიის, ტრანსფობიისა და ბიფობიის წინააღმდეგ ბრძოლის საერთაშორისო დღეს (IDAHOTB) USAID/Georgia კიდევ ერთხელ ადასტურებს საქართველოს ყველა მოქალაქის, მათ შორის LGBTQI+ თემის წევრთა უფლებების მხარდაჭერას. „USAID, საქართველოში კანონის უზენაესობის მხარდაჭერის პროგრამის ფარგლებში, LGBTQI+ პირების მხარდაჭერის მიზნით თანამშრომლობს ორ ორგანიზაციასთან - თანასწორობის მოძრაობასთან და ქალთა ინიციატივის მხარდაჭერის ჯგუფთან. ქალთა ინიციატივის მხარდაჭერის ჯგუფი დანაშაულის, დისკრიმინაციის და ძალადობის მსხვერპლ LGBTQI+ თემის წარმომადგენლებს იურიდიულ დახმარებას სთავაზობს. ამასთანავე, ორგანიზაცია ხელს უწყობს შეზღუდული შესაძლებლობების მქონე პირთა უფლებების დაცვის სამართლებრივი პრეცედენტების შემუშავებას. თანასწორობის მოძრაობა, მტკიცებულებებზე დაფუძნებული ადვოკატირებისა და ცნობიერების ამაღლების აქტივობების საშუალებით ებრძვის სამუშაო ადგილებზე არსებულ დისკრიმინაციას. ორგანიზაციის მიზანია საქართველოში სამუშაო ბაზრის დისკრიმინაციისგან გათავისუფლება“. სრულად... წყარო: ორგანიზაციის გვერდი სოციალურ ქსელში

თბილისი. 17 მაისს ჰომოფობიასა და ტრანსფობიის წინააღმდეგ ბრძოლის საერთაშორისო დღესთან დაკავშირებით სახალხო დამცველი განცხადებას ავრცელებს. „სამწუხაროდ, ბოლო წლების განმავლობაში ლგბტ+ თემის ხილვადობის გაზრდასთან ერთად, იმატებს თემის წარმომადგენელთა მიმართ უფლებადარღვევის ფაქტები, რასაც ხშირ შემთხვევაში სახელმწიფოს მხრიდან არაეფექტიანი რეაგირება ახლავს თან. ლგბტ+ ადამიანების უფლებრივ მდგომარეობასთან დაკავშირებით სახელმწიფო პოლიტიკის და ხედვის არარსებობა ახალისებს მათ მიმართ ჩადენილ უფლებადარღვევებს, მათ შორის, დისკრიმინაციულ დანაშაულებს. ომბუდსმენი კიდევ ერთხელ მოუწოდებს შესაბამის სახელმწიფო უწყებებს და თანამდებობის პირებს, ეფექტიანი პრევენციული და რეაქტიული რეაგირება მოახდინონ ლგბტ+ ადამიანების მიმართ ჩადენილ სავარაუდო დანაშაულებსა თუ სამართალდარღვევებზე; დაგეგმონ ღონისძიებები საზოგადოებაში თანასწორობის შესახებ ცნობიერების ამაღლების მიზნით; გააკეთონ დაუცველი ჯგუფების, მათ შორის, ლგბტ+ თემის მხარდამჭერი საჯარო განცხადებები“, ნათქვამია ომბუდსმენის ვებგვერდზე.  სრულად... წყარო: ombudsman.ge

იმერეთი. 13 მაისს საქართველოს ახალგაზრდა იურისტთა ასოციაციის ქუთაისის ფილიალის წარმომადგენელი იმყოფებოდა ჭიათურის მუნიციპალიტეტის სოფელ შუქრუთში, სადაც ადგილობრივი მოსახლეობა უკვე 87 დღეა აპროტესტებს კომპანია ,,ჯორჯიან მანგანეზის“ მიერ წიაღის მოპოვების შედეგად სოფლის ბუნებრივი და სოციალური გარემოსათვის მიყენებულ შეუქცევად ზიანს. „ამ დროის განმავლობაში სახელმწიფოსა და აღნიშნული კომპანიის მხრიდან აქციის მონაწილეთა მოთხოვნების იგნორირების გამო სამმა ადგილობრივმა პროტესტის უკიდურეს ზომას მიმართა და პირი ამოიკერა. შუქრუთის მცხოვრებთა განმარტებით კომპანია ,,ჯორჯიან მანგანეზის“ საქმიანობის შედეგად გარემოს დაბინძურებამ შეუქცევადი სახე მიიღო. სოფელში ადგილობრივებისთვის ცხოვრება საფრთხის შემცველი გახდა, რადგან მათი სახლები კომპანიის საქმიანობით მიყენებული ზიანის შედეგად საცხოვრებლად უვარგისი გახდა, ასევე, მათ საკუთრებაში არსებულ მიწებს ვეღარ იყენებენ სასოფლო-სამეურნეო დანიშნულებით, რის გამოც შემოსავლის გარეშე რჩებიან“. სრულად... წყარო: gyla.ge