საქართველო. ინფორმაციის თავისუფლების განვითარების ინსტიტუტმა (IDFI), პროექტის „საჯარო და კერძო სექტორებს შორის დიალოგის ხელშეწყობა საქართველოში მონიტორინგისა და ცნობიერების ამაღლების გზით“ ფარგლებში, საინფორმაციო შეხვედრა გაიმართა ოზურგეთის, ზუგდიდის და ბათუმის საკრებულოს წარმომადგენლებთან. „პროექტის ფარგლებში, IDFI შეაფასებს მუნიციპალიტეტებში რეგულაციების შემუშავების პროცესში საჯარო-კერძო დიალოგის ხარისხს. გარდა ამისა, პროექტი მიზნად ისახავს შერჩეულ მუნიციპალიტეტებში საკრებულოს წევრების ცნობიერების ამაღლებას დიალოგის მნიშვნელობასა და ხარისხის შეფასების მექანიზმის თაობაზე“. სრულად... წყარო: idfi.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) დააკვირდა პოსტსაარჩევნო პერიოდში იმ მუნიციპალიტეტებში განვითარებულ მოვლენებს, სადაც უმრავლესობა მმართველმა პარტიამ ვერ მოიპოვა. ორგანიზაციის შეფასებით, „საკრებულოებში მიმდინარე პროცესები ნათლად წარმოაჩენს ქართული დემოკრატიის ნაკლოვანებებს, რომელთა შორისაა ძალაუფლების განაწილების მიუღებლობა, საზოგადოების საკეთილდღეოდ შეთანხმების მიღწევის სირთულე, უარეს შემთხვევაში - შეუძლებლობა, თვითმმართველობის არსის გაუცნობიერებლობა და რეალურად დეცენტრალიზაციის არარსებობა“. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: ინტერნეტის თავისუფლება და ციფრული უფლებები საქართველოში: სისტემური გამოწვევები. „ინტერნეტ „კონტენტის“ შეზღუდვის მოქმედი სამართლებრივი მოდელი წარმოშობს ინტერნეტის საშუალებით ინფორმაციის მიღებისა და გავრცელების დაუსაბუთებელი და არაპროპორციული შეზღუდვის რისკებს“. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 2021 წლის 13-17 დეკემბერს, ეგვიპტეში, კორუფციის წინააღმდეგ გაეროს კონვენციის მონაწილე სახელმწიფოთა მეცხრე კონფერენცია გაიმართა. „კონფერენციას საქართველოს სამთავრობო დელეგაცია არ ესწრებოდა და საქართველოს სახელით განცხადებაც არ გაკეთებულა. საქართველოს პასიურობა ყველაზე გლობალურ ანტიკორუფციულ პლატფორმაზე კიდევ ერთი დასტურია იმისა, რომ ქვეყანაში ანტიკორუფციული საქმიანობა პრიორიტეტს აღარ წარმოადგენს“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. სამართლიანი არჩევნებისა და დემოკრატიის საერთშორისო საზოგადოების (ISFED) ინფორმაციით, ის გახდა პირველი ორგანიზაცია საქართველოში, რომელმაც ტიკტოკის პლატფორმაზე წინასაარჩევნოდ მიმდინარე ტენდენციები და საინფორმაციო მანიპულაციები შეისწავლა. „ძირითადი მიგნებების მიხედვით, ფეისბუქის მიერ გაუქმებული არაერთი ცნობილი ანონიმური და პროპაგანდისტული გვერდი წარმატებით გადაერთო ტიკტოკის პლატფორმაზე, მათ შორის „ალტ-ინფოს“ ქსელი“. სრულად... წყარო: isfed.ge

ამბროლაური-ლანჩხუთი.ინფორმაციის თავისუფლების განვითარების ინსტიტუტის (IDFI) ინფორმაციით, ამბროლაურისა და ლანჩხუთის მუნიციპალიტეტებმა გამჭვირვალობის და კეთილსინდისიერების ამაღლების სტრატეგიები და სამოქმედო გეგმები მიიღეს. „სტრატეგიული დოკუმენტები მიზნად ისახავს მერიებში დაიხვეწოს მმართველობითი პროცესები, დაინერგოს ღიაობის, გამჭვირვალობის, ეთიკისა და კეთილსინდისიერების მაღალი სტანდარტები, პრაქტიკაში ეფექტურად განხორციელდეს ადგილობრივი დონეზე მოქალაქეთა ჩართულობის მექანიზმები. დოკუმენტები ამერიკის შეერთებული შტატების საერთაშორისო განვითარების სააგენტოს (USAID) პროექტის „დემოკრატიული მმართველობის ინიციატივა (GGI) საქართველოში”, IDFI-ს მონაწილეობით მომზადდა“. სრულად... წყარო: idfi.ge

თბილისი. „საერთაშორისო გამჭვირვალობის“ სამდივნოს მიერ გამოქვეყნებულ 2021 წლის „კორუფციის აღქმის ინდექსის“ (CPI) მიხედვით, საქართველოს 55 ქულა აქვს, რაც წინა წელთან შედარებით ერთი ქულით გაუარესებული შედეგია. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტის ინფორმაციის თანახმად, კორუფციასთან ბრძოლის სასერტიფიკატო პროგრამის სამი მონაწილე - ნინო ტაგანაშვილი, მარიამ სალუქვაძე და ანა გოგოლაძე ევრაზიის აკადემიური ანტიკორუფციული ქსელის (Eurasian Academic Anti-Corruption Network) სხვა მონაწილეებთან ერთად, სასწავლო ვიზიტით მოლდოვაში იმყოფებოდნენ.  „სასწავლო ვიზიტის მიზანი იყო პროგრამის მონაწილეების ცოდნისა და ცნობიერების ზრდა მოლდოვაში კორუფციის რისკებისა და კორუფციასთან ბრძოლის მექანიზმებთან დაკავშირებით. ამავდროულად, სასწავლო ვიზიტის შედეგად, გაღრმავდა ევრაზიის აკადემიური ანტიკორუფციული ქსელის (Eurasian Academic Anti-Corruption Network) წარმომადგენელთა თანამშრომლობა და დაიგეგმა სამომავლო აქტივობები“. სრულად... წყარო: idfi.ge

თბილისი. სოციალური სამართლიანობის ცენტრმა მოამზადა კვლევა: „შრომის ინსპექციის საქმიანობის შეფასება 2021“. „კვლევის მიზანია ერთი წლის თავზე შეაფასოს შრომის რეფორმის შედეგად გაზრდილი მანდატის და ინსტიტუციური გაძლიერების კვალდაკვალ შრომის ინსპექციის სამსახურის ეფექტიანობა. კვლევა ინსპექციის დაარსებიდან (2015 წ.) პირველად შეაფასებს შრომის ინსპექციის სამსახურის საქმიანობას არსებული გამოწვევებისა და სისტემის გაუმჯობესებისათვის საჭირო ნაბიჯების იდენტიფიცირების მიზნით. კვლევის დასასრულს წარმოდგენილია რეკომენდაციები შესაბამისი უწყებებისთვის, რომელთა განხორციელებაც ხელს შეუწყობს შრომის ინსპექციის სისტემის გაუმჯობესებას და ქვეყანაში შრომითი უფლებებისა და უსაფრთხოების სტანდარტების ამაღლებას“. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს ინფორმაციით, თვითმმართველობის არჩევნების შემდგომ პერიოდში ვრცელდება ცნობები ადგილობრივი საჯარო სამსახურებიდან თანამშრომელთა გათავისუფლების შესახებ. თუ თვლით, რომ თქვენი უფლებები ირღვევა, უკანონოდ გაგათავისუფლეს საჯარო სამსახურიდან, იურიდიული დახმარებისთვის მიმართეთ ორგანიზაციას.  სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 20 იანვარს, საქართველოს პარლამენტის ღია მმართველობის მუდმივმოქმედი საპარლამენტო საბჭოს მდგრადი განვითარების მიზნებზე მომუშავე ჯგუფის სამუშაო შეხვედრა გაიმართა. „შეხვედრის ძირითადი მიზანი იყო საქართველოს პარლამენტის მდგრადი განვითარების მიზნების განხორციელებისა და მონიტორინგის შესახებ 2022-2024 წლების სამოქმედო გეგმის განვითარება“.  სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ანალიტიკურ სტატიას, რომლის ავტორია ანატოლი კორეპანოვი. სტატია დაიწერა კონკურსისთვის „მონაცემები ცვლილებებისთვის“. ანატოლი კორეპანოვი კონკურსის პირველი ადგილის მფლობელია. „წინამდებარე დოკუმენტში გაანალიზებულია იმერეთის რეგიონის 11 მუნიციპალიტეტის (12-დან) სპორტის პოლიტიკა და პროგრამული ხარჯები, ასევე მიმოხილულია მერიებს დაქვემდებარებული სპორტული ორგანიზაციების -არაკომერციული (ააიპ) და შეზღუდული პასუხისმგებლობის (შპს) იურიდიული პირების საქმიანობის არაერთი ასპექტი: გამჭვირვალობა, ფინანსები და შემოსავლის წყაროები, მოქმედი პროგრამები და ბენეფიციართა ჯგუფები, მწვრთნელთა კვალიფიკაცია და ანაზღაურება, აგრეთვე შეზღუდული შესაძლებლობების მქონე პირთა სპორტში ჩართულობის ხელშეწყობად არსებული მიდგომები. ანალიზი ეფუძნება სამაგიდე კვლევას, რომლის ფარგლებში დამუშავდა მუნიციპალიტეტების მერიებისგან მიღებული ინფორმაცია (2021 წლის მაისი-ივნისი) და საჯაროდ ხელმისაწვდომი მონაცემები“.  სრულად... წყარო: idfi.ge

თბილისი. საერთაშორისო გამჭვირვალობა - საქართველოს კვლევის მიხედვით, მუნიციპალიტეტების მიერ 2020 წელს განხორციელებული სახელმწიფო შესყიდვების კვლევის შედეგად, დგინდება, რომ:  „სახელმწიფო შესყიდვების შედეგად 15-მა ადგილობრივმა ტელევიზიამ ჯამში 686 ათას ლარზე მეტი მიიღო. 63 მუნიციპალიტეტიდან სამაუწყებლო მომსახურების შესყიდვა 18-მა განახორციელა, კერძოდ, ჩატარდა 14 ტენდერი და 4 გამარტივებული შესყიდვა. ყველაზე მსხვილი შესყიდვები რუსთავის, მარნეულის, გურჯაანის, ქუთაისის და ნინოწმინდის მუნიციპალიტეტებმა განახორციელეს“... სრულად... წყარო: transparency.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ბლოგპოსტს: პოლიტიკური რეკლამები Facebook-სა და Instagram-ზე 2021 წლის არჩევნების პერიოდში. „Facebook-ის რეკლამების ბიბლიოთეკის მიხედვით, 2021 წლის ადგილობრივი თვითმმართველობის არჩევნებისთვის 9 აგვისტოდან 6 ნოემბრის ჩათვლით პერიოდში ფეისბუქსა და ინსტაგრამზე არჩევნებში მონაწილე პოლიტიკური პარტიებისა და მათი წარმომადგენლების/კანდიდატების მიერ 8 126 პოლიტიკური რეკლამა განთავსდა, რაზეც არანაკლებ 524 602 და არაუმეტეს 536 086 აშშ დოლარი დაიხარჯა“. სრულად... წყარო: isfed.ge

თბილისი. გაეცანით ინფორმაციის თავისუფლების განვითარების ბლოგპოსტს: „კონსტიტუციის ფორმალური მოთხოვნები „ინტერნეტ კონტენტის“ რეგულირებასთან დაკავშირებით“. „გამოხატვის თავისუფლების შინაარსობრივი რეგულირება, მხოლოდ უმაღლესი საკანონმდებლო ორგანოს კომპეტენციაა. სხვა სახელმწიფო ორგანოებს, გამოხატვის თავისუფლების შინაარსობრივი შეზღუდვების დადგენის უფლებამოსილება არ გააჩნიათ“. სრულად... წყარო: idfi.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: რა ხარვეზებს შეიცავს სახელმწიფო ინსპექტორის სამსახურთან დაკავშირებული საკანონმდებლო პაკეტი. „მიუხედავად იმისა, რომ განმარტებით ბარათში კანონპროექტის ავტორები ეფექტურ რეფორმებსა და არასამთავრობო ორგანიზაციების რეკომენდაციებზე აპელირებენ, წარმოდგენილი საკანონდებლო პაკეტი არ ეხმიანება დამოუკიდებელი საგამოძიებო მექანიზმის საქმიანობის და პერსონალურ მონაცემთა დაცვის კუთხით არსებულ გამოწვევებს. საკანონმდებლო პაკეტი საკითხის შესწავლის გარეშე იქნა ინიცირებული; მნიშვნელოვანი საკითხები კვლავ რეფორმის მიღმა დარჩა; კანონპროექტის დაჩქარებული წესით მიღება გაუმართლებელია; საკანონდებლო პაკეტის განხილვის პროცედურა არ პასუხობს გამჭვირვალობისა და პარლამენტის ღიაობის პრინციპებს; მივმართავთ საქართველოს პარლამენტს, შეაჩეროს კანონპროექტის დაჩქარებული წესით განხილვა და რეფორმის ჩატარების მიზნით გამართოს ფართომასშტაბიანი კონსულტაციები სახელმწიფო ინსპექტორთან, საერთაშორისო და ადგილობრივ ექსპერტებთან“. სრულად... წყარო: transparency.ge

თბილისი. საქართველოს სახალხო დამცველისთვის შემაშფოთებელია საქართველოს პარლამენტის წევრების მიერ ინიცირებული კანონის პროექტი, რომლითაც დაჩქარებული წესით უქმდება სახელმწიფო ინსპექტორის სამსახური. „კანონპროექტი მომზადებულია გაუმჭვირვალედ და დაინტერესებულ მხარეებთან წინასწარი კონსულტაციის გარეშე. მიგვაჩნია, რომ ეს გადაწყვეტილება წინააღმდეგობაში მოდის საქართველოს კონსტიტუციასთან, ადამიანის უფლებებთან და მიზნად ისახავს დამოუკიდებელი ინსტიტუტის საქმიანობაში ჩარევას“. სრულად... წყარო: ombudsman.ge

თბილისი. ინფორმაციის თავისუფლების განვითარების ინსტიტუტმა (IDFI) სტუდენტებისთვის ანტიკორუფციული ფილმების ჩვენება გამართა. ღონისძიების ფარგლებში წარმოდგენილი იყო კორუფციის წინააღმდეგ გაეროს კონვენციის კოალიციის (UNCAC Coalition) ორგანიზებით გამართულ საერთაშორისო კონკურსში მონაწილე/გამარჯვებული მოკლე ფილმები: “18 Plaintiffs”, “Skyscraper”, “Citizens finance harmful private businesses”, “Corruption Files: The Whistleblower: Anna Garrido”. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ადგილობრივი თვითმმართველობების ბიუჯეტების ანალიზს. „2021 წელს მუნიციპალიტეტების მიერ დაგეგმილი ხარჯების ყველაზე დიდი წილი 37% (716,3 მლნ. ლარი) სუბსიდიებზე მოდის, რომელიც უმეტესწილად ა(ა)იპ-ების დაფინანსებაზე გაიცემა. 2020-2021 წლებში თბილისის ბიუჯეტში საქალაქო სამგზავრო ტრანსპორტის სუბსიდიისთვის, გათვალისწინებული იყო სულ 212 მილიონი ლარი. მუნიციპალიტეტებში შრომის ანაზღაურების ხარჯების წილი მთლიან ხარჯებში 8%-დან 50%-მდე მერყეობს, ხოლო სოც. უზრუნველყოფის - 2%-დან 17%მდე. 2021 წელს ადგილობრივი თვითმართველობის არჩევნებამდე ბიუჯეტის ცვლილებების შედეგად საერთო ხარჯების გეგმიური მაჩვენებელი 292 მილიონი ლარით გაიზარდა“, აღნიშნულია კვლევის ძირითად მიგნებებში. სრულად... წყარო: idfi.ge

თბილისი. მედიის განვითარების ფონდმა (MDF) ყოველწლიური ანგარიში „სიძულვილის ენა 2020” გამოაქვეყნა. „კვლევის მიზანია მედიასა და საჯარო დისკურსში სიძულვილის ენის სხვადასხვა ფორმებისა და მათი წყაროების იდენტიფიცირება“. სრულად... წყარო: mdfgeorgia.ge

თბილისი. საქართველოს სახალხო დამცველი აქვეყნებს სპეციალურ ანგარიშს „(ა)იპ ჯავახეთის ნინოწმინდის წმინდა ნინოს სახელობის მზრუნველობამოკლებულ ბავშვთა პანსიონის აღსაზრდელთა უფლებრივი მდგომარეობის შესახებ“. „კვლევის შედეგებმა ცხადყო, რომ 2021 წლის გაზაფხულზე განვითარებული მოვლენების შემდეგ გადადგმული ნაბიჯების მიუხედავად, პანსიონში კვლავ რჩება არაერთი გამოწვევა, როგორც დაწესებულების და აღსაზრდელთა დოკუმენტაციის წარმოების, ისე არასრულწლოვანთა ინდივიდუალური, მათ შორის, ბიო-ფსიქო-სოციალური საჭიროებების შეფასებისა და უზრუნველყოფის კუთხით. პრობლემური და არაეფექტურია ბავშვებთან მომუშავე უწყებებსა და დაწესებულებებს შორის კომუნიკაციისა და ინფორმაციის გაცვლის საკითხი, რაც არსებითად უარყოფითად აისახება არასრულწლოვანთა საჭიროებების დაკმაყოფილების პროცესზე და ეწინააღმდეგება მათ ინტერესებს“, - ნათქვამია კვლევაში. სრულად... წყარო: ombudsman.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, გამარტივებული შესყიდვების პირდაპირ ხელშეკრულებებს კვლავ იღებენ მმართველი პარტიის შემომწირველები და ზოგ შემთხვევაში მოქმედი თანამდებობის პირების კომპანიები. „სწორედ ასეთი შემთხვევების შესამცირებლად, უმჯობესია კორონავირუსთან დაკავშირებული შესყიდვების ელექტრონული ტენდერის გზით ჩატარება და კონკურენციის გაზრდა“. სრულად... წყარო: idfi.ge