თბილისი. „საერთაშორისო გამჭვირვალობა - საქართველომ“ „საჯარო დაწესებულებაში ინტერესთა შეუთავსებლობისა და კორუფციის შესახებ“ კანონის პრაქტიკაში მოქმედება საქართველოს სამინისტროების მაგალითზე გამოკვეთა. ძირითადი მიგნებების მიხედვით: „2016-2020 წლებში სამინისტროებში არ გამოვლენილა კორუფციული სამართალდარღვევის, ინტერესთა შეუთავსებლობის, დაუსაბუთებელი ქონების ფლობის, კანონით აკრძალული შეთავაზების მიღების და საჩუქართან დაკავშირებული შეზღუდვის დარღვევის შემთხვევები. რაც იმას ნიშნავს, რომ დარღვევების გამოვლენა სამინისტროებში პარქტიკაში არ ხდება. გამოვლინდა თანამდებობრივი შეუთავსებლობის მხოლოდ 1 შემთხვევა. ეროვნული ანტიკორუფციული პოლიტიკის შემუშავება, განხორციელების მონიტორინგი და კოორდინაცია, ასევე ანტიკორუფციული საბჭოს მუშაობა შეჩერებულია. ანტიკორუფციული საბჭოს სამდივნო რეალურად არ არსებობს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საერთაშორისო გამჭვირვალობა - საქართველო აქვეყნებს კვლევას: 2013-2020 წლებში სახელისუფლებო პიარის თანამშრომლებზე 140 მლნ ლარზე მეტი დაიხარჯა. კვლევის ძირითადი მიგნებების თანახმად: „ყველაზე სოლიდური თანხა, 19.9 მლნ ლარზე მეტი, 2016 წელს დაიხარჯა. 2020 წელს, 2012 წელთან შედარებით, 578-დან 969-მდე (68%) გაიზარდა სახელმწიფო უწყებების პიარში დასაქმებული თანამშრომლების რაოდენობა. 322 სახელმწიფო უწყებიდან 35 დაწესებულებამ ინფორმაცია არ ან არასრულად მოგვაწოდა“. სრულად... წყარო: transparency.ge

თბილისი. სახალხო დამცველმა და ორგანიზაციამ „უფლებები საქართველო“ სპეციალური ანგარიში გამოაქვეყნეს, რომელიც თბილისისა და რუსთავის საქალაქო სასამართლოებში ჩატარებული სასამართლო პროცესების მონიტორინგის შედეგებს ასახავს. პროექტის მკვლევარები სისხლის სამართლის 30 საქმეზე დააკვირდნენ ოჯახში ძალადობის მსხვერპლი ქალების დაკითხვას. „უფლებების და მხარდამჭერი სერვისების შესახებ არასრულყოფილი ინფორმირება ერთ-ერთია იმ სირთულეებიდან, რომლებსაც ოჯახში ძალადობის მსხვერპლი ქალები სასამართლოში დაკითხვისას აწყდებიან“.  სრულად... წყარო: rights.ge

თბილისი. „საერთაშორისო გამჭვირვალობა-საქართველომ” პანდემიის პერიოდში სამშენებლო სექტორში სახელმწიფოს მიერ დადებული გამარტივებული შესყიდვების კონტრაქტები შეისწავლა. „2020 წლის პირველი ივნისიდან 2021 წლის 15 სექტემბრამდე სახელმწიფომ სამშენებლო მომსახურების შესყიდვის 125 მლნ ლარამდე ჯამური ღირებულების 4 500-მდე პირდაპირი კონტრაქტი გააფორმა  აქედან 33.8 მლნ ლარის ჯამური ღირებულების კონტრაქტები პარტია „ქართული ოცნების“ და სალომე ზურაბიშვილის შემომწირველების კომპანიებზე მოდის, რომელთაც 2016-2021 წლებში მმართველი პარტიის სასარგებლოდ 1.1 მლნ ლარზე მეტი გაიღეს“, ნათქვამია ორგანიზაციის ბლოგპოსტში. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას, რომელიც მიმოიხილავს კიბერსივრცეში პერსონალური მონაცემების დაცვისა და კიბერუსაფრთხოების მარეგულირებელ სამართლებრივ გარემოს. „საუკეთესო ევროპულ სამართლებრივ ჩარჩოებზე დაყრდნობით, კვლევაში მოცემულია მტკიცებულებებზე დაფუძნებული რეკომენდაციები“. სრულად... წყარო: idfi.ge

სამეგრელო. საერთაშორისო გამჭვირვალობა - საქართველოს ინფორმაციით, ზუგდიდის მუნიციპალიტეტის 2017 წლის მოწვევის საკრებულომ გადაწყვიტა, ახალი საკრებულოს უფლებამოსილების ცნობამდე, დაჩქარებული წესით განიხილოს ზუგდიდის 2022 წლის ბიუჯეტის პროექტი და მიიღოს იგი. ორგანიზაციის შეფასებით, 2017 წლის მოწვევის საკრებულოს აღნიშნული ნაჩქარევი გადაწყვეტილება საგულისხმო პრობლემებს შეიცავს. „ზუგდიდის მერის მოვალეობის შემსრულებლისა და 2017 წლის მოწვევის საკრებულოს ნაჩქარევი გადაწყვეტილება ხელს უშლის ახალარჩეულ საკრებულოს, რომ შეასრულოს თავისი ფუნქცია. ეს დღეს ზუგდიდის საკრებულოს სხდომათა დარბაზში გააპროტესტა ახალარჩეული საკრებულოს 4 წევრმა „ერთიანი ნაციონალური მოძრაობიდან”, თუმცა ისინი სხდომათა დარბაზიდან საპატრულო პოლიციამ ძალის გამოყენებით გააძევა. მნიშვნელოვანია, ცენტრალურმა საარჩევნო კომისიამ დროულად დანიშნოს ახალი მოწვევის საკრებულოს პირველი სხდომა, რათა მას მიეცეს საქმიანობის წარმართვის, მათ შორის 2022 წლის ბიუჯეტის პროექტის განხილვისა თუ დამტკიცების შესაძლებლობა, და ახალარჩეული საკრებულოს წევრები სრულფასოვნად ჩაერთონ პროცესებში“, ნათქვამია ორგანიზაციის გვერდზე სოციალურ ქსელში.  სრულად...  წყარო: ორგანიზაციის გვერდი სოციალურ ქსელში

თბილისი. 18 ნოემბერს, ინფორმაციის თავისუფლების განვითარების ინსტიტუტმა (IDFI), USAID-ის ეკონომიკური მმართველობის პროგრამის მხარდაჭერით, პროექტის „საჯარო-კერძო დიალოგის ხარისხის შეფასების მექანიზმი“ პრეზენტაცია გამართა. „პროექტის ფარგლებში, IDFI შეაფასებს საკანონმდებლო აქტების შემუშავების პროცესში საჯარო-კერძო დიალოგის ხარისხს. შეფასება განხორციელდება სამი წლის განმავლობაში“. სრულად... წყარო: idfi.ge

თბილისი. საერთაშორისო გამჭვირვალობა - საქართველო მიიჩნევს, რომ საქართველოს მთავრობის მიერ OECD/ACN-ის მონიტორინგის მისიის მიერ მომზადებული ანგარიშის დამტკიცებაზე უარი ზიანს აყენებს საქართველოს რეპუტაციას და ეწინააღმდეგება ქართველი ხალხის მიერ კონსტიტუციით გამყარებულ ნებას ევროპული, დემოკრატიული, კორუფციისგან თავისუფალი და დამოუკიდებელი მართლმსაჯულების მქონე ქვეყნის მშენებლობის შესახებ. „მოვუწოდებთ მთავრობას, კონსტრუქციულად ითანამშრომლოს მონიტორინგის ჯგუფთან, უზრუნველყოს საპილოტე ანგარიშის დამტკიცება და მისი საჯაროდ ხელმისაწვდომობა“. სრულად... წყარო: transparency.ge

თბილისი. „საერთაშორისო გამჭვირვალობა-საქართველომ“ სარეკლამო ბაზარზე 2020 წელს არსებული მდგომარეობა და ძირითადი ტენდენციები შეისწავლა. კვლევაში მიმოხილულია, თუ როგორ აისახა „კოვიდ 19-ის“ გავრცელების შეკავების მიზნით დაწესებული შეზღუდვები და საპარლამენტო არჩევნების დროს პოლიტიკური პარტიების მიერ რეკლამისთვის დახარჯული თანხები სარეკლამო ბაზარზე. ერთ-ერთი მიგნების თანახმად: 2020 წელს, 2019 წელთან შედარებით, სატელევიზიო სარეკლამო ბაზარი 7.7 მლნ ლარით (11%) გაიზარდა და 75.2 მლნ ლარი შეადგინა. ზრდა ძირითადად საპარლამენტო არჩევნების დროს პოლიტიკური პარტიების მიერ სატელევიზიო რეკლამაში დახარჯულმა თანხამ გამოიწვია. სრულად... წყარო: transparency.ge

თბილისი. „საერთაშორისო გამჭვირვალობა - საქართველომ“ 2021 წლის 30 ოქტომბრის მუნიციპალიტეტის ორგანოთა არჩევნების მეორე ტურზე საარჩევნო კომისიებსა და სასამართლოებში 53 საჩივარი/სარჩელი შეიტანა, მათგან საარჩევნო კომისიებში 43, სასამართლოებში კი - 10. ორგანიზაციის ცნობით, საარჩევნო საჩივრების უმეტესობა არ დაკმაყოფილდა. „სამწუხაროა, რომ სასამართლოები საქმეებს მეტწილად არასრულყოფილად განიხილავდნენ. საოლქო საარჩევნო კომისიების ნაწილი კი დავებს ფორმალისტურად უდგებოდა და საქმის გარემოებების შესწავლისა და ფაქტების დადგენის ინტერესი არ ჰქონდა“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) საქართველოს ეკონომიკის პერიოდულ მიმოხილვას აქვეყნებს. „მიმდინარე მიმოხილვაში მოცემულია მთლიანი შიდა პროდუქტის, ვაჭრობის, ფულადი გზაცნილების, პირდაპირი უცხოური ინვესტიციების, გაცვლით კურსის, ბიუჯეტის, ვალის 2021 წლის ცხრა თვის მდგომარეობა და მოსალოდნელი პროგნოზები მომდევნო წლებში“. სრულად... წყარო: idfi.ge

თბილისი. ეუთო/ოდირი და ევროპარლამენტი საქართველოს ადგილობრივი თვითთმართველობის არჩევნების მეორე ტურის დაკვირვების შედეგებზე განცხადებას აქვეყნებს. „მუნიციპალურ ორგანოთა არჩევნების მეორე ტური ზოგადად კარგად ადმინისტრირებული იყო, მაგრამ უწყვეტმა პოლარიზაციამ და ნეგატიური რიტორიკის გამწვავებამ პროცესზე უარყოფითად იმოქმედა. კამპანია კონკურენტული იყო და ხასიათდებოდა ეროვნულ საკითხებზე ფოკუსირებით, რამაც ადგილობრივი საკითხები დაჩრდილა. ზოგადად კანდიდატებს კამპანიის თავისუფლად წარმართვა შეეძლოთ, მაგრამ ამომრჩევლებთა დაშინებისა და ზეწოლის ბრალდებები შენარჩუნდა. რესურსებს შორის მკვეთრმა დისბალანსმა და ხელისუფლებაში ყოფნით მინიჭებულმა შეუსაბამო უპირატესობამ საასპარეზო პირობები შეცვალა. არჩევნების დღემ მთლიანობაში მშვიდად ჩაიარა და კარგად იყო ადმინისტრირებული. თუმცა საარჩევნო უბნების გარეთ პარტიების მხარდამჭერებს შორის დაპირისპირებისა და ორმხრივი პროვოკაციების ერთეული შემთხვევა დაფიქსირდა. ბოლოდროინდელი საკანონმდებლო ცვლილებების მიუხედავად, რომელთა მიხედვითაც საარჩევნო უბნის გარეთ 100 მეტრის პერიმეტრში შეკრებები აიკრძალა, საერთაშორისო საარჩევნო სადამკვირვებლო მისიის დამკვირვებლებმა აღნიშნეს, რომ მათ მიერ მონახულებული საარჩევნო უბნების 29 პროცენტში, დროდადრო შეიმჩნეოდა ცალკეულ პირთა ჯგუფების დამაშინებელი ყოფნა უშუალოდ საარჩევნო უბნების მიმდებარე ტერიტორიაზე“... სრულად... წყარო: www.osce.org

თბილისი. „საერთაშორისო გამჭვირვალობა – საქართველომ“ მუნიციპალიტეტის ორგანოთა არჩევნების მეორე ტურს მთელი ქვეყნის მასშტაბით 250-მდე დამკვირვებლით გაუწია მონიტორინგი. ორგანიზაციის ცნობით, 150-მდე წვრილი და შედარებით სერიოზული დარღვევა დაფიქსირდა. TI Georgia-ს დამკვირვებლებმა საუბნო და საოლქო საარჩევნო კომისიებში მთლიანობაში 23 საჩივარი დაწერეს. სამართლიანი არჩევნებისა და დემოკრატიის საერთაშორისო საზოგადოება ხაზს უსვამს ჟურნალისტებისა და დამკვირვებლების მიმართ ძალადობრივი შემთხვევების სიხშირეს, პირების მიერ კენჭისყრაში განმეორებით მონაწილეობის ფაქტებს, ბიულეტენების არასწორად და სავარაუდოდ, მიზანმიმართულად გაბათილების შემთხვევებს... საქართველოს ახალგაზრდა იურისტთა ასოციაციაც (საია) განსაკუთრებით მიუთითებს ორგანიზაციის სადამკვირვებლო მისიისა და ჟურნალისტების მიმართ სიტყვიერი და ფიზიკური შეურაცხყოფის ფაქტებზე. ორგანიზაციის წარმომადგენლებმა ხარვეზებს შორის აღრიცხეს: წილისყრის პროცედურის, მარკირებისა და ხმის მიცემის წესების დარღვევა, COVID-19-ის რეგულაციების დაუცველობა, საარჩევნო დოკუმენტაციის არასათანადოდ შევსება/გამოქვეყნება. წყარო: ორგანიზაციების ვებგვერდები

თბილისი. სამართლიანი არჩევნებისა და დემოკრატიის საერთაშორისო საზოგადოება 2021 წლის თვითმმართველობის არჩევნების მეორე ტურს იმ 20 მუნიციპალიტეტში დააკვირდება, სადაც მერის არჩევნების მეორე ტური იმართება. ISFED განსაკუთრებით აქცენტირებული იქნება 8 მუნიციპალიტეტზე, მათ შორის 5 თვითმმართველ ქალაქსა (თბილისი, რუსთავი, ბათუმი, ფოთი და ქუთაისი) და 3 თვითმმართველ თემზე (ზუგდიდი, ოზურგეთი და თელავი). სრულად... წყარო: isfed.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: პოლიტიკური პარტიების შემოწირულებები: სტატისტიკა და კორუფციის რისკების შემცველი შემთხვევები. „2021 წლის 1 იანვრიდან 25 ოქტომბრის ჩათვლით 25-მა პოლიტიკურმა პარტიამ ჯამში 23 227 322 ლარის ოდენობის შემოწირულება მიიღო, რომლის 71% - 16 585 660 ლარი „ქართულ ოცნებაზე” მოდიოდა, მეორე იყო პარტია „ლელო” 2 330 556 ლარით, ხოლო მესამე - „ერთიანი ნაციონალური მოძრაობა” 2 212 912 ლარით. მმართველი პარტიის შემომწირველმა იურიდიულმა პირებმა და ფიზიკურ პირ შემომწირველებთან დაკავშირებულმა კომპანიებმა 2021 წელს ჯამში დაახლოებით 155 მლნ ლარის ღირებულების სახელმწიფო ტენდერები მოიგეს და 6 მლნ ლარის ღირებულების გამარტივებული სახელმწიფო შესყიდვის კონტრაქტები მიიღეს. ამ კომპანიებმა და მათთან პირდაპირ ან ირიბად დაკავშირებულმა შემომწირველებმა იგივე პერიოდში 3 მლნ ლარამდე გაიღეს „ქართული ოცნების” სასარგებლოდ“, ნათქვამია ბლოგპოსტში. სრულად... წყარო: transparency.ge

თბილისი. სამართლიანმა არჩევნებმა სოციალური მედიის მონიტორინგის მეოთხე შუალედური ანგარიში წარადგინა. „მასში აღწერილია არჩევნებში მონაწილე პოლიტიკური პარტიებისა და მუნიციპალიტეტების მერობის ფეისბუქგვერდების აქტივობა, ასევე პოლიტიკური და საარჩევნო მიზნით მოქმედ ანონიმურ და ღია ფეისბუქგვერდებზე დაკვირვების შედეგები და სხვა მნიშვნელოვანი ტენდენციები“. სრულად... წყარო: isfed.ge

თბილისი. სამართლიანმა არჩევნებმა სოციალური მედიის მონიტორინგის მესამე შუალედური ანგარიში წარადგინა. ანგარიშის მიხედვით: „თბილისის მერობის კანდიდატებს შორის, ყველაზე აქტიური ანა დოლიძის გვერდი იყო. ანტიოპოზიციურ გვერდებზე გაზიარებულ პოსტებზე ინტერაქცია თითქმის 4-ჯერ მაღალია, ვიდრე „ქართული ოცნების“ წინააღმდეგ მოქმედ გვერდებზე გამოქვეყნებული პოსტებისა. რეკლამებში ყველაზე მეტი თანხა, დაახლოებით 127 ათასი აშშ დოლარი, „ქართულმა ოცნებამ“ გადაიხადა. მას „ერთიანი ნაციონალური მოძრაობა“ (დაახლ. 68 ათასი აშშ დოლარი) და „ლელო“ (36 ათასამდე აშშ დოლარი) მოჰყვებიან. ანონიმურ გვერდებზე ყველაზე მეტი რეკლამა (188) ოპოზიციის მადისკრედიტირებელ გვერდებზე განთავსდა, რომლებზეც 2 520-დან 2 619 აშშ დოლარამდე დაიხარჯა“. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტის (IDFI) ცნობით, 18 ოქტომბერს დაიწყო 2021-2022 წლების სასწავლო წელი კორუფციასთან ბრძოლის სასერტიფიკატო პროგრამის საბაკალავრო კურსის მონაწილეებისათვის. „საბაკალავრო საფეხურზე შერჩეული 22 მონაწილე, ერთი წლის განმავლობაში, გაივლის ისეთ საგნებს როგორიცაა „კარგი მმართველობა და კორუფცია“ და „საჯარო პოლიტიკა და კორუფცია““. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ნაშრომს, რომლის მიზანია საქართველოში კანონის უზენაესობის გლობალური ინდექსის მაჩვენებლების განხილვა 2021 წლის მდგომარეობით, მისი შედარება წინა წლების მაჩვენებლებთან, არსებული გამოწვევების იდენტიფიცირება და ტენდენციების გამოვლენა. „2021 წლის კანონის უზენაესობის გლობალური ინდექსის თანახმად, საქართველოში კანონის უზენაესობის მდგომარეობა 0,61 ქულით არის შეფასებული (მაქსიმალური 1 ქულა). ამ მაჩვენებლით საქართველოს პოზიცია წინა წელთან შედარებით 0,01 ქულით გაუმჯობესდა“. სრულად... წყარო: idfi.ge

თბილისი. ქალთა საინფორმაციო ცენტრის ინფორმაციით, 2017 წელს საქართველოში „სტამბოლის კონვენცია“ რატიფიცირდა. ნაკისრი ვალდებულებების შესრულების მონიტორინგს კი ევროსაბჭოს ქალთა მიმართ ძალადობისა და ოჯახში ძალადობის წინააღმდეგ მიმართულ ქმედებებზე მომუშავე ექსპერტთა ჯგუფი (GREVIO) ახორციელებს. არასამთავრობო ორგანიზაციებმა, GREVIO-ს წარუდგინეს ჩრდილოვანი ანგარიში საქართველოში არსებული მდგომარეობის, კერძოთ კი სექსუალური ძალადობის პრობლემის შეფასების ფარგლებში.  სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის შეფასებით, სამოქალაქო თანასწორობისა და ინტეგრაციის სახელმწიფო სტრატეგიის ათწლიანი დოკუმენტი არ ითვალისწინებს არსებითად ახალ და გადამწყვეტი შინაარსის საკანონმდებლო, ინსტიტუციურ და პოლიტიკურ ცვლილებებს, რომელიც არადომინანტური ეთნიკური ჯგუფებისთვის უფრო თანასწორი და სამართლიანი პოლიტიკური და სოციალური გარემოს შექმნას შეუწყობდა ხელს. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გთავაზობთ ანალიტიკურ დოკუმენტს, რომელიც ორგანიზაციის თანამშრომლებმა წინასაარჩევნო პერიოდსა და არჩევნების დღეს, ქვემო ქართლის და სამცხე-ჯავახეთის რეგიონებში საარჩევნო პროცესებზე დაკვირვების საფუძველზე მოამზადეს. „ეს დოკუმენტი არის მცდელობა, დავინახოთ ის ძირითადი გამოწვევები, პრობლემური მიდგომები და „განსხვავებული“ გარემო, რომელშიც არადომინანტური ეთნიკური ჯგუფების წარმომადგენელ საქართველოს მოქალაქეებს უწევთ არჩევანის გაკეთება“. სრულად... წყარო: socialjustice.org.ge