კახეთი. ამერიკის შეერთებული შტატების ელჩმა საქართველოში, კელი დეგნანმა გუშინ ყვარელში მედიის განვითარების ფონდის (MDF) ორგანიზებული მედიაწიგნიერების ფორუმის გამარჯვებულები სპეციალური სერტიფიკატებით დააჯილდოვა. „ანა ქიზიყელაშვილი, ანა-მარია კოკორაშვილი, მარიამ ბოჭორაშვილი, ეკატერინე ბეჟანიშვილი, ნანუკა მოლაშვილი, დავით ჭუნაშვილი, მაკა ზაუტაშვილი, ნანიკო მამულაშვილი და დიანა სანადირაძე ის ახალგაზრდები არიან, რომლებმაც ყალბი ფოტო-ვიდეოს გადამოწმება, ინფორმაციულ ქაოსთან გამკლავება და კლონირებული ვებ-გვერდების იდენტიფიცირება შესძლეს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა-საქართველოს“ მედიის გუნდმა ჟურნალისტიკის ფაკულტეტის სტუდენტებს ტრენინგი ჩაუტარა თემაზე „ღია მონაცემების გამოყენება საგამოძიებო ჟურნალისტიკაში“. „ტრენინგის ფარგლებში, სტუდენტები გაეცნენ საქართველოში არსებული ღია მონაცემების წყაროებსა და მათი გამოყენების წესებს“. სრულად... წყარო: ორგანიზაციის გვერდი სოციალურ ქსელში

თბილისი. ტროლების ამოცნობის საიდუმლოს ნიკა ქავთარაძესთან ერთად მითების დეტექტორის მკვლევარები ანი ქისტაური და მარიამ დანგაძე გაგიმხელენ. ტროლები ისინი არიან, რომლებიც ან ნამდვილ ვინაობას მალავენ ან სხვის მონაცემებს, ფოტოებს იპარავენ. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი (ყოფილი EMC) ეხმიანება ბოლო კვირებში სასულიერო პირების მონაწილეობით ჩადენილი ძალადობის შემთხვევებს და სახელმწიფოს ამ შემთხვევების ეფექტიანი გამოძიებისკენ მოუწოდებს. ორგანიზაცია მოუწოდებს საქართველოს საპატრიარქოს საჯაროდ გაემიჯნოს მოქალაქეების და ჟურნალისტების მიმართ გამოვლენილი ძალადობის პრაქტიკას და მიიღოს ზომები ეკლესიის შიგნით მშვიდობიანი და უსაფრთხო გარემოს შექმნისა და მოძალადე სასულიერო პირების მიმართ შიდა საეკლესიო სამართლებრივი პასუხისმგებლობის დაკისრებისთვის. სრულად... წყარო: socialjustice.org.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის სასულიერო პირების მხრიდან ჟურნალისტებზე თავდასხმებს გმობს და მოითხოვს შეწყდეს ჟურნალისტების დევნის ტენდენცია. მედიაკოალიცია მოუწოდებს საქართველოს შინაგან საქმეთა სამინისტროს დაუყოვნებლივ შეისწავლოს სასულიერო პირების მიერ ჟურნალისტების დევნის შემთხვევები. მათ შორის, დაიწყოს გამოძიება „მთავარი არხის“ ჟურნალისტის ირაკლი ვაჩიბერაძის მიმართ გამოვლენილი ძალადობისა და ჟურნალისტურ საქმიანობაში უკანონო ხელშეშლასთან დაკავშირებით. სრულად... წყარო: კოალიციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს განცხადების საფუძველზე, საქართველოს ჟურნალისტური ეთიკის ქარტიის საბჭომ გადაწყვეტილება მიიღო, რომ ტელეკომპანია „რუსთავი 2”-ის ჟურნალისტმა ნათია ლაზაშვილმა, ქარტიის პირველი პრინციპი (ინფორმაციის სიზუსტე) დაარღვია. „განცხადების საფუძველი გახლდათ „რუსთავი 2”-ის ეთერით 2020 წლის 14 დეკემბერს 9 საათიან კურიერში გასული სიუჟეტი, რომელშიც წამყვანმა აღნიშნა, რომ „საერთაშორისო გამჭვირვალობა - საქართველომ” საპარლამენტო არჩევნების შედეგებთან დაკავშირებით პოზიცია შეცვალა, რაც საბჭოს შეფასებით, არასწორ ინფორმაციას წარმოადგენდა. ჩვენი ორგანიზაცია აქტიურად იცავს მედიის და ჟურნალისტების უფლებებს და მათ გამოხატვის თავისუფლებას, რომელიც დღეს სერიოზული გამოწვევების წინაშე დგას. თუმცა მნიშვნელოვანია ასევე, რომ მედიის წარმომადგენლებმა დაიცვან საყოველთაოდ აღიარებული პროფესიული და ეთიკური სტანდარტები ქვეყანაში მიმდინარე პროცესების გაშუქებისას“, ნათქვამია ორგანიზაციის განცხადებაში.  სრულად... წყარო: transparency.ge

თბილისი. სახალხო დამცველი 4 მაისს დავით გარეჯის სამონასტრო კომპლექსის ტერიტორიაზე მომხდარ ძალადობრივ ქმედებებს ეხმაურება. „გავრცელებული ინფორმაციის თანახმად, დავით-გარეჯის სამონასტრო კომპლექსის ტერიტორიაზე სატელევიზიო სიუჟეტის მომზადების დროს, ტელეკომპანია „მთავარის“ ჟურნალისტების მიმართ ადგილი ქონდა ძალადობრივ ქმედებებს იქ მყოფი სასულიერო და სხვა პირების მხრიდან. ჟურნალისტების განცხადებით დაზიანებულია მათი ტექნიკაც.  ომბუდსმენის აპარატი გმობს მედიის წარმომადგენელთა მიმართ ჩადენილ ყველა სახის ძალადობას და ხაზგასმით აღნიშნავს თავისუფალი და კრიტიკული მედიაგარემოს სასიცოცხლო როლს დემოკრატიული საზოგადოებისთვის ისევე, როგორც მის განსაკუთრებულ ფუნქციას ქვეყანაში კანონის უზენაესობისა და ადამიანის უფლებათა პატივისცემის მიმართულებით“. სრულად... წყარო: ombudsman.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ანგარიშს: „პროპაგანდისტული ნარატივები Facebook-ზე 2020 წლის საპარლამენტო არჩევნების პერიოდში“... „ანგარიში მიმოიხილავს ღირებულებით საკითხებზე პროპაგანდისტული ნარატივების გამავრცელებელი ფეისბუქ გვერდების შესწავლის საფუძველზე გამოვლენილ აქტივობას და მოიცავს, როგორც რაოდენობრივ, ისე თვისებრივ მიგნებებს. ანგარიში ასევე მიმოიხილავს გვერდების კოორდინაციას საარჩევნო სუბიექტებთან, პროპაგანდისტული ნარატივის გამავრცელებელი გვერდების გზავნილების ანალიზს პოლიტიკურ დისკურსთან და საარჩევნო პროცესებთან თანხვედრაში“. სრულად... წყარო: isfed.ge

თბილისი. მითების დეტექტორის ლაბორატორიის სტუდენტის სალომე გიუნაშვილის მასალიდან გაიგებთ თუ საიდან იღებს სათავეს მიშელ ობამას გენდერთან დაკავშირებული სპეკულაციები და როგორ გავრცელდა ეს ე.წ. თეორიები ქართულენოვან სოციალურ ქსელებში. მიშელ ობამას გენდერთან დაკავშირებული კონსპირაციების მთავარი არგუმენტი ყოფილი პირველი ლედის სხეულის პროპორციებია. კონსპირაცია, ერთ-ერთმა პირველმა, 2014 წელს, ამერიკელმა ულტრა-მემარჯვენე რადიო წამყვანმა და სხვა უამრავი კონსპირაციული თეორიის ავტორმა, ალექს ჯონსმა გააჟღერა საკუთარ გადაცემაში. დეზინფორმაციული მტკიცება დრო და დრო კვლავ აქტუალური ხდება. „გავრცელებული ინფორმაცია, რომ ბარაკ ობამას ცოლი კაცია, მტკიცებულებებს მოკლებულია. მიშელ ობამას გენდერთან დაკავშირებული სპეკულაციები კონსპირაციად შეაფასა ფაქტების გადამოწმების არაერთმა პლატფორმამ, მათ შორის PolitiFact-მაც. მათი დასკვნით, მტკიცება, რომ მიშელ ობამა ტრანსგენდერი ქალია, დეზინფორმაციაა“. სრულად... წყარო: mythdetector.ge

თბილისი. გაეცანით სამართლიანი არჩევნებისა და დემოკრატიის საერთაშორისო საზოგადოების (ISFED) მიერ მომზადებულ 2020 წლის საპარლამენტო არჩევნების სოციალური მედიის მონიტორინგის საბოლოო ანგარიშს... „ანგარიში მოიცავს საქართველოში სოციალური მედიის სივრცეში 2020 წლის 1 სექტემბრიდან 21 ნოემბრის ჩათვლით პერიოდში მიმდინარე ძირითადი ტენდენციების ანალიზს. კერძოდ, აღწერილია არჩევნებში რეგისტრირებული პოლიტიკური პარტიებისა და კანდიდატების ოფიციალური გვერდების, ადგილობრივი თვითმმართველობის ორგანოების ოფიციალური გვერდების აქტივობა, ასევე პოლიტიკური მიზნით მოქმედ არაოფიციალურ, ანონიმურ გვერდებზე დაკვირვების შედეგები და სხვა მნიშვნელოვანი ტენდენციები, რომლებიც მიზნად ისახავენ, ამა თუ იმ ფორმით გავლენა მოახდინონ ამომრჩევლის ნებაზე“. სრულად... წყარო: www.isfed.ge

თბილისი. „უფლებები საქართველოს“ ინფორმაციით, გამოძიების დაწყებიდან თითქმის ოთხი წლის შემდეგ, ორგანიზაციის იურისტის, არჩილ ჩოფიკაშვილის მიერ პროკურატურისთვის წარდგენილი შუამდგომლობა დაკმაყოფილდა და აზერბაიჯანელ ჟურნალისტს, აფგან მუხთარლის, რომელიც დაუდგენელმა პირებმა 2017 წლის მაისში თბილისიდან გაიტაცეს და აზერბაიჯანის ხელისუფლებას გადასცეს, დაზარალებულის სტატუსი მიენიჭა. გარდა ამისა, დაზუსტდა საქმის კვალიფიკაცია. სრულად... წყარო: www.rights.ge

თბილისი. 27 აპრილს, 11:00 საათზე, ევროპის ფონდი საგამოძიებო ჟურნალისტიკის მხარდასაჭერად გამოცხადებული საგრანტო კონკურსით დაინტერესებული ორგანიზაციებისთვის ონლაინ კითხვა-პასუხის სესიას გამართავს. შეუერთდით სესიას ლინკზე... წყარო: ორგანიზაციის გვერდი სოციალურ ქსელში

თბილისი. „უფლებები საქართველოს“ 2 დღიანი ტრენინგი „მედია და ადამიანის უფლებათა ჟურნალისტიკა“ დასრულდა. „ორი დღის განმავლობაში შევძელით გვემსჯელა, გვეკამათა, გამოგვეხატა ემოციები, კმაყოფილება და შეშფოთება გამოხატვის თავისუფლებაზე, პირადი ცხოვრების დაცულობის უფლებაზე, საგანგებო მდგომარეობასა და მედიის თავისუფლებაზე. დევიზი „შევუთავსოთ სასარგებლო სასიამოვნოს“ ზედმიწევნით შევასრულეთ - მოვინახულეთ იყალთოს მონასტერი და აკადემია, მოვაწყვეთ ნიჭების გამოვლენის საღამო“. სრულად... წყარო: ორგანიზაციის გვერდი სოციალურ ქსელში

თბილისი. კოალიცია მედიის ადვოკატირებისთვის მიიჩნევს, რომ კომუნიკაციების ეროვნული კომისია კიდევ ერთხელ სცდება საკუთარ უფლებამოსილებას. „კოალიცია „მედიის ადვოკატირებისათვის“ წევრი ორგანიზაციები მივიჩნევთ, რომ კომუნიკაციების კომისიის ინიციატივითა და დაფინანსებით სატელევიზიო რეიტინგების მთვლელ კომპანიებისათვის საერთაშორისო აუდიტის ჩატარდება სცდება მარეგულირებელი ორგანოს კომპეტენციას და კანონით მინიჭებული უფლებამოსილებების საზღვრებს“, - აღნიშნულია განცხადებაში. სრულად...  წყარო: qartia.ge

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, TV პირველსა და მთავარ არხზე გამოქვეყნებული მასალებში ქარტიის მეათე (პირადი ცხოვრების ხელშეუხებლობა) პრინციპი დაირღვა. ტელევიზიების წინააღმდეგ ქარტიას ნათია ფურცხვანიძემ მომართა. სადავო ჟურნალისტური პროდუქტი ტელეკომპანიების ეთერში, 2021 წლის 20 მარტს გავიდა და ორივე მასალა, აცრის შემდგომ მედდის გარდაცვალების შემთხვევას ეხებოდა. სრულად...  წყარო: qartia.ge

თბილისი. 2021 წლის 9 აპრილს გავრცელდა ინფორმაცია ტელეკომპანია „ფორმულას“ თანამშრომლების მიმართ განხორციელებული დანაშაულებრივი ქმედებების შესახებ. მაუწყებლის ცნობით, ერთ-ერთ მათგანს ფიზიკურად გაუსწორდნენ, ხოლო მეორეს - ავტომანქანა დაუზიანეს. დაზარალებულები თავდასხმებს კრიტიკულ მედიასაშუალებაში საქმიანობას უკავშირებენ. სახალხო დამცველი გმობს მედიის წარმომადგენელთა მიმართ ჩადენილ ყველა სახის ძალადობას და ხაზგასმით აღნიშნავს თავისუფალი და კრიტიკული მედიაგარემოს სასიცოცხლო როლს დემოკრატიული საზოგადოებისთვის ისევე, როგორც მის განსაკუთრებულ ფუნქციას ქვეყანაში კანონის უზენაესობისა და ადამიანის უფლებათა პატივისცემის მიმართულებით. სრულად...  წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველო (TI ), ტელეკომპანია „ფორმულას“ მიერ გავრცელებულ ინფორმაციასთან დაკავშირებით, განცხადებას ავრცელებს.  „საგანგაშო ტენდენციის სახე მიიღო მედიის წარმომადგენლებზე და ამ შემთხვევაში, ტელეკომპანია „ფორმულას“ თანამშრომლებზე თავდასხმის ფაქტებმა. მოვუწოდებთ ხელისუფლებას და სამართალდამცავ ორგანოებს იმოქმედონ კანონის ფარგლებში, სასწრაფოდ გამოიძიონ აღნიშნული ინციდენტები და საზოგადოებას დროულად აცნობონ გამოძიების შედეგები“, - აღნიშნულია განცხადებაში.  სრულად...   წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტია მოუწოდებს შსს-ს დროულად გამოიძიოს „ფორმულას“ თანამშრომლებზე თავდასხმის ფაქტი. „ტელეკომპანია „ფორმულა“ ავრცელებს ინფორმაციას, რომ მის თანამშრომლებს თავს დაესხნენ და ფიზიკურად იძალადეს. მათი თქმით, ერთ-ერთ მათგანს ფიზიკურად გაუსწორდნენ, მეორეს კი მანქანა დაუმტვრიეს. მედიის ინფორმაციით, თავდასხმა კრიტიკულ მედიასაშუალებაში მუშაობას უკავშირდება. საქართველოს ჟურნალისტური ეთიკის ქარტია გმობს „ფორმულას“ თანამშრომლებზე განხორციელებულ ძალადობას და მიიჩნევს, რომ მომხდარი ფაქტი სწრაფად და ეფექტიანად უნდა გამოიძიონ“, - ვკითხულობთ განცხადებაში. სრულად...  წყარო: ორგანიზაციის ვებგვერდი

თბილისი. კოალიცია "მედიის ადვოკატირებისთვის" ტელეკომპანია "ფორმულას" თანამშრომლებზე თავდასხმის ფაქტებს ეხმაურება. კოალიცია "მედიის ადვოკატირებისთვის" წევრი ორგანიზაციები მოუწოდებენ გადაწყვეტილების მიმღებ უმაღლესი რანგის პირებს, საქართველოს პრემიერ-მინისტრს, პარლამენტის წევრებს, პარტია „ქართული ოცნების“ თავმჯდომარეს გააკეთონ ღია განცხადებები მედიის მხარდაჭერის და გახშირებული თავდასხმების შესაჩერებლად. დაუყოვნებლივ მიიღონ პრევენციული ღონისძიებები მედიის წარმომადგენლების უსაფრთხოების უზრუნველსაყოფად. სრულად...  წყარო: gdi.ge

თბილისი. საქართველოს ჟურნალისტური ეთიკის ქარტია ეხმაურება გავრცელებულ ინფორმაციას შს სამინისტროს წარმომადგენლების მიერ ჟურნალისტებისთვის ნამახვანში შესვლისა და მუშაობის შეზღუდვასთან დაკავშირებით. „ჟურნალისტური ეთიკის ქარტია მოუწოდებს ხელისუფლებას, ჟურნალისტებს არ შეუშალოს ხელი გადაადგილებაში და უზრუნველყოს მათთვის ინფორმაციის ხელმისაწვდომობა. მოვუწოდებთ სამართალდამცავ ორგანოებს არ ჩაერიონ ჟურნალისტურ საქმიანობაში და მედიას შეუქმნან შესაბამისი სამუშაო პირობები”, - ნათქვამია განცხადებაში. სრულად...  წყარო: ორგანზიაციის ვებგვერდი

თბილისი. 2021 წლის 07 აპრილს საიამ, ადამიანის უფლებათა დაცვის ევროპულ ცენტრთან (EHRAC) ერთად, ადამიანის უფლებათა ევროპულ სასამართლოში 2 ახალი საჩივარი გააგზავნა.  საჩივრები 2019 წლის 20-21 ივნისს ანტისაოკუპაციო აქციის დაშლისას 22 პირის, მათ შორის, მშვიდობიანი შეკრების უფლებით მოსარგებლე 10 პირის, მედიის 11 წარმომადგენლისა და მოვლენების ეპიცენტრში შემთხვევით აღმოჩენილი 1 პირის მიმართ, სახელმწიფოს მიერ ძალის გადამეტებასა და განხორციელებულ ქმედებებზე ეფექტიანი გამოძიების ჩაუტარებლობას შეეხება.  სრულად...  წყარო: gyla.ge

თბილისი. გენერალურ პროკურატურამ დაზარალებულად ცნო 2019 წლის 20-21 ივნისის საპროტექსტო აქციის დარბევისას დაზარალებული ჟურნალისტები: ზაზა სვანაძე, მერაბ ცაავა და ბესლან კმუზოვი, რომელთა სამართლებრივ ინტერესებს ადამიანის უფლებათა ცენტრი იცავს.  ადამიანის უფლებათა ცენტრი ითხოვდა, ჟურნალისტებს დაუყოვნებლივ მინიჭებოდა დზარალებულის სტატუსი. ორგანიზაციამ ეროვნულ დონეზე ყველა არსებული სამართლებრივი საშუალება გამოიყენა, რათა გენერალურ პროკურატურას ეწარმოებინა დროული, ეფექტიანი და მიუკერძოებელი გამოძიება.  სრულად...   წყარო: ორგანიზაციის ვებგვერდი