თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "რუსთავი 2-ის" ჟურნალისტმა მარიამ გაფრინდაშვილმა დაარღვია ქარტიის პრინციპები დაარღვია. სადავო სიუჟეტი გადაცემა "შაბათის კურიერის" ეთერში 16 მარტს გავიდა სახელწოდებით "ტროლები ოპონენტებისთვის" და ეძღვნებოდა ხელისუფლების მიერ ინტერნეტში სხვადასხვა პირთა დისკრედიტაციისთვის შექმნილ ანგარიშებს. სიუჟეტში ნახსენები იყო განმცხადებელი ლელა კურდღელაშვილი, რომელსაც "ტროლების" საქმიანობასთან და "ქართულ ოცნებასთან" შეხება არ ჰქონია. სრულად წყარო: ორგანიზაციის ვებგვერდი

სამეგრელო-ზემო სვანეთი. ზუგდიდის რაიონულმა სასამართლომ „პრესა ჯი"-ს რედაქტორისა და ,,აიტივის" დამფუძნებლის, ჟურნალისტ გიორგი კაპანაძის ადმინისტრაციულ სამართალდარღვევათა საქმე განიხილა. გიორგი კაპანაძე პოლიციის თანამშრომლებმა 2019 წლის 19 მაისს, ზუგდიდის მერის რიგგარეშე არჩევნების დღეს პროფესიული საქმიანობის განხორციელებისას დააკავეს და, მოგვიანებით, ადმინისტრაციული სამართალდარღვევის ოქმი 166-ე (წვრილმანი ხულიგნობა) და 173-ე (სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობა) მუხლების საფუძველზე შეუდგინეს. 5 ივნისს ზუგდიდის რაიონულმა სასამართლომ საკმარისი მტკიცებულებების არარსებობის გამო შეწყვიტა საქმის წარმოება წვრილმანი ხულიგნობის ნაწილში. რაც შეეხება 173-ე მუხლით გათვალისწინებულ ქმედებას, სასამართლომ სამართალდარღვევა ჩადენილად მიიჩნია, თუმცა, დარღვევის მცირემნიშვნელობიდან გამომდინარე, გიორგი კაპანაძეს სახდელის ნაცვლად სიტყვიერი შენიშვნა მისცა. გიორგი კაპანაძის ინტერესებს საიას ზუგდიდის ოფისი იცავს. სრულად  წყარო: ორგანიზაციის ვებგვერდი

თბილისი. კოალიცია მედიის ადვოკატირებისთვის ნათია ზოიძის განცხადებას ეხმიანება. „ნათია ზოიძე აცხადებს, რომ მრჩეველთა საბჭო არის პოლიტიკურად მოტივირებული და რომ ნათია კაპანიძის უნდობლობიდან დაწყებული ეს პროცესი არის პოლიტიკური ინტერესის ქვეშ. დირექტორის მოვალეობის შემსრულებელი, ასევე, ამბობს, რომ საბჭოს მხრიდან ადგილი აქვს მის სარედაქციო პოლიტიკაში ჩარევის მცდელობას. ამავდროულად, საბჭოს წევრი - ბეჟან გობაძე საუბრობს, რომ ორი წევრი, რომელმაც ნათია კაპანაძის იმპიჩმენტის პროცედურა დაიწყო, ისევ ერთობლივად ცდილობენ სამთავრობო კანდიდატის ლობირებას. კოალიცია მედიის ადვოკატირებისთვის მიიჩნევს, რომ აუცილებელია პროცესებში ჩართულმა ყველა პირმა უზრუნველყოს საზოგადოებრივი მაუწყებლის მიუკერძოებლობა და დამოუკიდებლობა, რათა შევინარჩუნოთ პოლიტიკური ზეგავლენისგან დამოუკიდებელი მაუწყებელი", ნათქვამია ერთობლივ განცხადებაში. სრულად... წყარო: gyla.ge

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომანია "იმედის" ჟურნალისტმა ქარტიის პირველი (სიზუსტე), მესამე (მიჩქმალვა), მეხუთე (შესწორება) და მეთერთმეტე (ფაქტის განზრახ დამახინჯება) პრინციპები დაარღვია. მის წინააღმდეგ ქარტიას მიმართა ახალგაზრდა იურისტთა ასოციაციამ. სადავო სიუჟეტი ეხებოდა აშშ-ის სახელმწიფო დეპარტამენტის ანგარიშს. ამ თემაზე საუბრობდა საიას წარმომადგენელიც. განმცხადებელი მიიჩნევდა, რომ სიუჟეტი მანიპულაციური იყო, ჟურნალისტმა არასწორი ინფორმაცია გაავრცელა, მიჩქმალა მნიშვნელოვანი ინფორმაცია და განზხარ დაამახინჯა ფაქტები. სრულად... წყარო: ორგანიზაციის ვებგვერდი

თბილისი. საერთაშორისო გამჭვირვალობა საქართველო, საზოგადოებრივი მაუწყებლის აჭარის ტელევიზიისა და რადიოში დირექტორობის მსურველ კონკურსანტებზე ინფორმაციას გვაწვდის. „გამოცხადებულ კონკურსში მონაწილეობას 9 ადამიანი იღებს. ადგილი ვაკანტური მას შემდეგ გახდა, რაც 2019 წლის აპრილში მოქმედი დირექტორი, ნათია კაპანაძე, მრჩეველთა საბჭოს იმპიჩმენტის შედეგად თანამდებობიდან გადააყენეს. კაპანაძე დირექტორად 2016 წელს აირჩიეს და ვადის ამოწურვამდე 6 თვე ჰქონდა დარჩენილი. მისი დირექტორობის პერიოდში აჭარის ტელევიზია არაერთ ადგილობრივ თუ საერთაშორისო ანგარიშში მოხვდა, როგორც მიუკერძოებელი და მზარდი ორგანიზაცია. მრჩეველთა საბჭოს წევრების მიერ კაპანაძის სადავო არგუმენტებით გადაყენება არასამთავრობო სექტორის მხრიდან მკვეთრად ნეგატიური შეფასების საგანი გახდა", ნათქვამია განცხადებაში. სრულად... წყარო: www.transparency.ge

თბილისი. საქართველოს ჟურნალისტური ეთიკის ქარტია აქვეყნებს სახელმძღვანელოს: ძალადობრივ ექსტრემიზმთან დაკავშირებული საკითხების გაშუქება. სრულად... წყარო: www.qartia.ge

თბილისი. „საერთაშორისო გამჭვირვალობა-საქართველოს" წარმომადგენელმა 22 მაისს, ივანე ჯავახიშვილის სახელობის თბილისის სახელმწიფო უნივერსიტეტის ჟურნალისტიკის მიმართულების სტუდენტებს ღია მონაცემების გამოყენებასთან დაკავშირებით ტრენინგი ჩაუტარა. ტრენინგის მიზანია დამწყები ჟურნალისტებისთვის საგამოძიებო უნარების განვითარება. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ჟურნალისტური ეთიკის ქარტია აქვეყნებს ბავშვთა საკითხების გაშუქების სახელმძღვანელოს. „ბავშვის დაფარვა უპირობოდ აუცილებელია, როდესაც ის არის ძალადობის/დანაშაულის მსხვერპლი. მეურვის თანხმობა არ ათავისუფლებს ჟურნალისტს პასუხისმგებლობისგან. მან თავად უნდა შეაფასოს ის ნეგატიური შედეგები, რაც შეიძლება ბავშვის იდენტიფიცირებას მოჰყვეს", ნათქვამია ქარტიის ვებგვერდზე. სრულად... წყარო: www.qartia.ge

თბილისი. საქართველოს ჟურნალისტური ეთიკის ქარტიამ და გაეროს ბავშვთა ფონდმა მედიაწიგნიერების სახელმძღვანელო შექმნეს. „წინამდებარე მედიაწიგნიერების სახელმძღვანელო არაფორმალური განათლების გზით დაეხმარება ახალგაზრდებს აიმაღლონ ცოდნის დონე მასობრივი კომუნიკაციის და ახალი ტექნოლოგიების შესახებ, გააძლიერებს მათ უნარს კრიტიკულად გაანალიზონ, თუ რა კავშირი არსებობს მედიას, აუდიტორიასა და ინფორმაციას შორის. მედიის პრობლემა ისაა, რომ მას შეუძლია წაახალისოს სექსიზმი, რადიკალიზმი, ეთნოცენტრიზმი, ჰომოფობია და სხვა ტიპის ცრურწმენები, ხელი შეუწყოს დეზინფორმაციას, პრობლემურ იდეოლოგიებს და საკამათო ღირებულებებს", ნათქვამია ორგანიზაციის ვებგვერდზე. სრულად... წყარო: qartia.ge

აჭარა. 14 მაისს, ბათუმის ახალგაზრდული ცენტრის მოხალისემ და მედიის განვითარების ფონდის რეგიონალური ქსელის ბათუმის წარმომადგენელმა, გიორგი ბოლქვაძემ, შეხვედრა გამართა ანტიდასავლურ პროპაგანდასთან დაკავშირებით. ასევე, მონაწილეებს აუხსნა ტროლის მნიშვნელობა და მისი ამოცნობის გზები. სრულად... წყარო: ორგანიზაციის გვერდი სოციალურ ქსელში

თბილისი. კოალიცია „დამოუკიდებელი და გამჭვირვალე საქართველოსთვის" საქართველოს პარლამენტის თავმჯდომარეს მიმართავს. მიმართვის საგანს ზაზა ხარებავასთვის იუსტიციის უმაღლესი საბჭოს წევრის უფლებამოსილების შეწყვეტა წარმოადგენს. „საგამოძიებო ჟურნალისტიკის ფარგლებში, „სტუდია მონიტორის” მიერ მომზადებული სიუჟეტით (https://bit.ly/2H3D9Ai) და სხვადასხვა მედია საშუალებებით, გავრცელდა ინფორმაცია, რომ პარლამენტის მიერ, იუსტიციის უმაღლესი საბჭოს ერთ-ერთი არამოსამართლე წევრის, ზაზა ხარებავას არჩევის დროს, დარღვეულ იქნა „საერთო სასამართლოების შესახებ” საქართველოს ორგანული კანონის მოთხოვნა. კანონმდებლობით, ამ მოთხოვნის დარღვევა საბჭოს წევრისათვის უფლებამოსილების შეწყვეტის საფუძველია. კოალიცია დაინტერესდა მოცემული შემთხვევით, შეისწავლა დოკუმენტაცია, რომლის საფუძველზეც ზაზა ხარებავა თანამდებობაზე აირჩიეს და მიაჩნია, რომ ის თანამდებობაზე კანონის დარღვევით იქნა განწესებული. შესაბამისად, მოგმართავთ განცხადებით, პარლამენტმა იმსჯელოს და პარლამენტის რეგლამენტის 212-ე მუხლის მე-4 პუნქტის საფუძველზე უფლებამოსილება შეუწყვიტოს ზაზა ხარებავას", - ვკითხულობთ მიმართვაში.  სრულად... წყარო: კოალიციის ვებგვერდი

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, „ინტერპრესნიუსის" ჟურნალისტს, გიორგი სულაძეს და რუსთავი 2-ის არაიდენტიფიცირებულ ჟურნალისტს ქარტიის პრინციპები არ დაურღვევიათ. „მათ წინააღმდეგ ქარტიას ხატია ბეროძემ მიმართა. ის მიიჩნევდა, რომ ამ მედიასაშუალებების მიერ მომზადებულ მასალებში, რომელიც სოფელ გელათის მოსახლეობის პროტესტს ეხებოდა, დარღვეული იყო ქარტიის პირველი (სიზუსტე) და მესამე (დადასტურებული წყარო) პრინციპები", ნათქვამია ქარტიის ვებგვერდზე. სრულად... წყარო: www.qartia.ge

თბილისი. საზოგადოებრივი ორგანიზაციები რუსთავი 2-ის საქმის მორიგ სასამართლო დავაზე ერთობლივ განცხადებას ავრცელებენ. „მორიგი სასამართლო დავა არა მარტო მაუწყებლის მუშაობას აფერხებს, არამედ საფრთხეს უქმნის მედიაპლურალიზმს და თავისუფალ მედიაგარემოს ჩვენ ქვეყანაში. რუსთავი 2-ის სარედაქციო პოლიტიკის შესაძლო ცვლილებას უდავოდ უარყოფითი გავლენა ექნება 2020 წლამდე წინასაარჩევნო გარემოზე და მთლიანად დემოკრატიულ პროცესზე”, ნათქვამია ორგანიზაციის ვებგვერდზე. სრულად... წყარო: gyla.ge

კონფერენცია მედიაში ეთიკისა და პასუხისმგებლობის შესახებ თბილისი. პრესის საერთაშორისო დღესთან, 3 მაისთან დაკავშირებით, ევროკავშირის მხარდაჭერით, თბილისში გაიმართა კონფერენცია „მედიის ევროპული სტანდარტი - ეთიკა და პასუხისმგებლობა". კონფერენციაში, რომლის ორგანიზატორიც საქართველოს ჟურნალისტური ეთიკის ქარტია იყო, მონაწილეობა მიიღეს: საქართველოში აკრედიტებულმა დიპლოპატიური კორპუსის წარმომადგენლებმა, მედიის ქართველმა და ევროპელმა სპეციალისტებმა, აღმასრულებელი, საკანონმდებლო, მარეგულირებელი და თვითრეგულირების ორგანოების წარმომადგენლებმა. სრულად... წყარო: საქართველოში ევროკავშირის წარმომადგენლობის ვებგვერდი

აჭარა. საქართველოს ახალგაზრდა იურისტთა ასოციაცია სსიპ საზოგადოებრივი მაუწყებლის აჭარის ტელევიზიისა და რადიოს ყოფილი დირექტორის, ნათია კაპანაძის ინტერესებს სასამართლოში დაიცავს. ეს გაცხადდა საია-ს მიერ დღეს გამართულ პრესკონფერენციაზე, რომელიც სსიპ საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს მიერ დირექტორისთვის უნდობლობის გამოცხადების საკითხს ეხებოდა. ნათია კაპანაძე დღეს ბათუმის საქალაქო სასამართლოს სარჩელით მიმართავს და მოითხოვს: მისთვის უნდობლობის საკითხზე მიღებული გადაწყვეტილების ბათილად ცნობას, თანამდებობაზე აღდგენას, იძულებითი განაცდურის ანაზღაურებასა და დირექტორის პოზიციაზე გამოცხადებული კონკურსის ბათილად ცნობას.  სრულად... წყარო: ორგანიზაციის ვებგვერდი

თბილისი. „საქართველოს დემოკრატიული ინიციატივის" მიერ გამოქვეყნებული განცხადების მიხედვით, აჭარის საზოგადოებრივი მაუწყებლის დირექტორისთვის უნდობლობის გამოცხადების ერთ-ერთი საფუძველი, მრჩეველთა საბჭომ, თავისივე გადაწყვეტილებით, ეჭვქვეშ დააყენა.  „კანონმდებლობის თანახმად, სსიპ საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭო ვალდებულია 1 აპრილამდე გამოაქვეყნოს და აჭარის უმაღლეს საბჭოს წარუდგინოს გასული წლის ანგარიში, რომელსაც თან უნდა ერთვოდეს გარე აუდიტის დასკვნა. საბჭომ 2018 წლის ანგარიში 1 აპრილს გამოაქვეყნა, თუმცა გარე აუდიტის დასკვნა დღეს, 25 აპრილს განიხილა, მას შემდეგ, რაც ტელევიზიის დირექტორს უნდობლობა გამოუცხადა. ეს მაშინ, როდესაც უნდობლობის ერთ-ერთ საფუძვლად ფინანსური დარღვევები იყო მითითებული", - ვკითხულობთ განცხადებაში, - „კოალიცია მედიის ადვოკატირებისთვის მიიჩნევს, რომ აჭარის საზოგადოებრივი მაუწყებლის მრჩეველთა საბჭოს დღევანდელი გადაწყვეტილებით კიდევ უფრო მეტი კითხვა გაჩნდა ტელევიზიის დირექტორისთვის უნდობლობის გამოცხადების სამართლებრივ საფუძვლებთან დაკავშირებით".  სრულად... წყარო: www.gdi.ge

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, საზოგადოებრივი მაუწყებლის აჭარის ტელევიზიის ჟურნალისტმა თეონა ხარაბაძემ ქარტიის პირველი (სიზუსტე) და მეხუთე (შესწორება) პრინციპები დაარღვია. „მის წინააღმდეგ ქარტიას ხელვაჩაურის მუნიციპალიტეტის მერმა, ჯუმბერ ვარდმანიძემ მიმართა. განმცხადებლის უკმაყოფილება გამოიწვია აჭარის ტელევიზიის ეთერში 11 თებერვალს გასულმა სიუჟეტმა, რომელიც ეხებოდა ხელვაჩაურის მუნიციპალიტეტის აუდიტის 2017 წლის ანგარიშს. ჯუმბერ ვარდმანიძის თქმით, ჟურნალისტმა სოფელ ჯიბინაურში კეთილმოწყობილი სტადიონის ნაცვლად აჩვენა მოუწესრიგებელი სტადიონი. განმცხადებელი ამტკიცებდა, რომ ჟურნალისტმა არასწორი კადრები გაუშვა ეთერში, რითიც დაარღვია ქარტიის პრინციპები”, ნათქვამია ქარტიის ვებგვერდზე. სრულად... წყარო: www.qartia.ge

თბილისი. „ინფორმაციის თავისუფლების განვითარების ინსტიტუტი" (IDFI) „CRRC-საქართველოს" მიერ ჩატარებული სატელეფონო გამოკითხვის შედეგებს აქვეყნებს. გამოკითხვა ჩატარდა იმის შესასწავლად, თუ რამდენად ნახა საზოგადოებამ „რუსთავი 2"-ის ეთერში გასული, „სტუდია მონიტორისა" და „რადიო თავისუფლების" საგამოძიებო ჟურნალისტური ფილმი - „მოსამართლეები ხელისუფლების სამსახურში", რომელიც 2011 წელს მთავრობის მიერ მფლობელებისთვის „კონსტანტა ბანკის" ჩამორთმევის მცდელობას ეხებოდა და პროკურორებისა და მოსამართლეების მიერ გარკვეულ გადაცდომებზე მიანიშნებდა. გამოკითხვის ძირითად მიზანს წარმოდგენდა იმის გარკვევა, თუ რა დამოკიდებულება ჰქონდა მოსახლეობას ფილმისა და მასში წამოწეული თემების მიმართ.  სრულად... წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტიამ გამოხატა შეშფოთება პანკისის ხეობაში მიმდინარე მოვლენებისა და ჟურნალისტების დაშავების გამო.  „საქართველოს ჟურნალისტური ეთიკის ქარტია მიმართავს ყველა შესაბამის უწყებას უზრუნველყოს ჟურნალისტების უსაფრთხოება, რათა მათ დროულად და ადეკვატურად შეძლონ მიმდინარე მაღალი საზოგადოებრივი ინტერესის მქონე მოვლენის გაშუქება," - აღნიშნულია ქარტიის მიერ გავრცელებულ განცხადებაში, - „ამასთან მნიშვნელოვანია, რომ სახელმწიფო უწყებებმა უზრუნველყონ ჟურნალისტებისთვის დაზუსტებული ინფორმაციის მიწოდება, რათა თავიდან იქნეს აცილებული არასწორი და სპეკულაციების შემცველი ცნობების გავრცელება".  სრულად... წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო" სსო-ების ერთობლივ განცხადებას აქვეყნებს ნათია კაპანაძის იმპიჩმენტთან დაკავშირებით. „ნეგატიურად ვაფასებთ საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს გადაწყვეტილებას ტელევიზიის დირექტორის ნათია კაპანაძის თანამდებობიდან ვადამდე ადრე გადაყენების შესახებ. სამწუხაროა, რომ მრჩეველთა საბჭომ გაიზიარა იმპიჩმენტის ინიციატორთა სადაო არგუმენტები და არ გაითვალისწინა ის პროგრესი, რომელიც ტელევიზიამ ნათია კაპანაძის დირექტორობის პერიოდში მიაღწია, რაც დასტურდება, როგორც ადგილობრივი, ასევე საერთაშორისო ორგანიზაციების შეფასებებში მათ შორის, ეუთო/ოდირის (OSCE/ODIHR) სადამკვირვებლო მისიისა და "Human Rights Watch”-ის ანგარიშებში", ნათქვამია განცხადებაში. სრულად... წყარო: www.transparency.ge

თბილისი. უზენაესმა სასამართლომ დაუშვებლად ცნო „საზოგადოებრივი მაუწყებლის" საკასაციო საჩივარი, რითაც ეკატერინე მიშველაძესა და საზოგადოებრივ მაუწყებელს შორის სამი წლის განმავლობაში მიმდინარე დავა საბოლოოდ დასრულდა. ეკა მიშველაძის ინტერესებს საია იცავდა.  „სამივე ინსტანციის სასამართლომ დაადგინა, რომ „საზოგადოებრივმა მაუწყებელმა" ეკატერინე მიშველაძე სამსახურიდან უკანონოდ გაათავისუფლა. საქართველოს უზენაესმა სასამართლომ გაიზიარა ქვედა ინსტანციების სასამრთლოების შეფასება, რომ „საზოგადოებრივმა მაუწყებელმა" არ გამოიყენა მის ხელთ არსებული საშუალება ეკა მიშველაძის ალტერნატიული სამუშაოთი უზრუნველსაყოფად და ვერც ის გარემოება დაამტკიცა, რომ ასეთი საშუალება არ გააჩნდა", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. 12 აპრილს, წამების მსხვერპლთა ფსიქოსოციალური და სამედიცინო რეაბილიტაციის საქართველოს ცენტრმა (GCRT-მ) 2018 წლის ჟურნალისტური კონკურსის გამარჯვებულები დაასახელა.  პრიზის მფლობელები გახდნენ: ჯაბა ანანიძე - ბათუმელები • Batumelebi.ge გვანცა დოლუაშვილი - რადიო მოზაიკა ქეთი ღვედაშვილი - ლიბერალი/Liberali სალომე ჩადუნელი - On.ge სრულად... წყარო: ორგანიზაციის გვერდი სოციალურ ქსელში