თბილისი. საქართველოს ახალგაზრდა იურისტთა ასოციაციას მიმართეს TSpress-ის წარმომადგენლებმა და აღნიშნეს, რომ 2016 წლის 5 აპრილს, ფოთის მერის მიერ გამართულ საჯარო შეხვედრაზე მოსახლეობასთან, TSpress-ის ჟურნალისტი და ოპერატორი არ შეუშვეს. „საია ხაზგასმით აღნიშნავს, რომ საქართველოს ადმინისტრაციული კანონმდებლობის ერთ-ერთი უმთავრესი პრინციპია საჯარო დაწესებულებების ღიაობა და საჯარო ინფორმაციის ხელმისაწვდომობა ყველა მსურველისათვის. მსგავსი ფაქტები ლახავს მედიის უფლებებს და უარყოფითად აისახება მის სამუშაო გარემოზე. საია მოუწოდებს ყველა ადგილობრივი და ცენტრალური საჯარო დაწესებულებების წარმომადგენლებს ღიაობისაკენ და მოუწოდებს მათ არ შეუზღუდონ მოქალაქეების მიერ ინფორმაციის მიღებისა და ინფორმაციის გავრცელების კონსტიტუციური უფლებები", ნათქვამია ორგანიზაციის განცხადებაში. სრულად... წყარო: gyla.ge

კახეთი. 22 აპრილს, „კონსტიტუციის 42-ე მუხლმა" დემოკრატიული ჩართულობის ცენტრში გამართა საჯარო დისკუსია თემაზე „დისკრიმინაციის ყველა ფორმის აღმოფხვრის ხელშეწყობა საქართველოში - არსებული მდგომარეობა და სამომავლო პერსპექტივები". „დისკუსიის ძირითადი საკითხები იყო: ანტიდისკრიმინაციული კანონმდებლობის და მექანიზმების ნაკლოვანებები; სახელმწიფოს მიდგომა დისკრიმინაციის წინააღმდეგ ბრძოლაში; ომბუდსმენის და სასამართლოს როლი დისკრიმინაციის აღმოფხვრის ხელშეწყობაში; საზოგადოების ცნობიერება დისკრიმინაციის შესახებ; სამომავლო პერსპექტივები დისკრიმინაციის წინააღმდეგ ბრძოლასთან დაკავშირებით", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. სამოქალაქო განვითარების სააგენტომ რუსთავისა და გარდაბნის მუნიციპალიტეტებში გამჭირვალობის და მოქალაქეთა ჩართულობის მექანიზმებისა და პრაქტიკის შეფასების ანგარიში წარადგინა. „კვლევის ფარგლებში შეფასდა რუსთავისა და გარდაბნის მუნიციპალიტეტების ოფიციალური ვებგვერდები ინფორმაციის პროაქტიულად გამოქვეყნების, საჭირო საკომუნიკაციო და ვებ სერვისების მიწოდების და განახლებული ინფორმაციის ხელმისაწვდომობის თვალსაზრისით. გამოვლინდა ძლიერი მხარეები და ნაკლოვანებები, შემუშავდა და თვითმმართველობებს წარედგინა რეკომენდაციები საჯარო ინფორმაციის პროაქტიულად გამოქვეყნების, თვითმმართველობის საქმიანობაში მოქალაქეთა მონაწილეობის უზრუნველყოფის და ვებ სივრცეში მუნიციპალიტეტის ცნობადობის გაზრდის მიზნით", ნათქვამია ორგანიზაციის ვებ-გვერდზე. სრულად... წყარო: www.cida.ge

თბილისი. არასამთავრობო ორგანიზაციები ერთობლივ მიმართვას ავრცელებენ საქართველოს შინაგან საქმეთა მინისტრისა და სახელმწიფო უსაფრთხოების სამსახურის ხელმძღვანელთან. „მიმართვაზე ხელმომწერი ორგანიზაციები ვეხმაურებით ბოლო დღეებში სტუდენტური მოძრაობა „აუდიტორია 115"-ის წარმომადგენლების მიერ გაკეთებულ საჯარო განცხადებებს, რომელშიც ისინი მათი აქტიურობის ფონზე ოჯახის წევრებსა და ახლობლებზე შესაძლო ზეწოლის ფაქტებზე საუბრობენ. მიგვაჩნია, რომ გავრცელებული ინფორმაცია უნდა გახდეს შინაგან საქმეთა მინისტრისა და სახელმწიფო უსაფრთხოების სამსახურის ხელმძღვანელის უშუალო დაინტერესების საფუძველი. ამასთან, საჭიროა დაუყოვნებლივ დაიწყოს სამსახურებრივი მოკვლევა ხსენებულ ფაქტებზე, ვინაიდან შესაძლოა ადგილი ჰქონდეს კონკრეტული პირების მხრიდან საკუთარი სტატუსისა და უფლებამოსილების არამიზნობრივ გამოყენებას. საკმაოდ მსგავსი და ერთგვაროვანი ხელწერის პირობებში, ასევე დასადგენია რამდენად ჰქონდა ადგილი აღნიშნული პროცესის ორგანიზებას ხელმძღვანელი/ზემდგომი პირების მხრიდან", ნათქვამია ორგანიზაციის ვებ-გვერდზე. სრულად... წყარო: www.transparency.ge

აჭარა. 21 აპრილს, „დემოკრატიის ინსტიტუტმა" ბათუმის საკრებულოსთან არსებული „სამოქალაქო მრჩეველთა საბჭოს" და „საზოგადოებრივი დარბაზის" წევრებს ახალი პროექტი „პეტიცია-ხალხის ხმა თვითმმართველობაში" გააცნო. ორგანიზაციის აღმასრულებელმა დირექტორმა არჩილ ხახუტაიშვილმა ისაუბრა, თუ როგორ დაეხმარება აღნიშნული პროექტი მოქალაქეებს პეტიციის ფორმით ხმა მიაწვდინონ საკრებულოებს და უშუალო მონაწილეობა მიიღონ თავიანთ ქალაქებსა და დასახლებაში არსებული პრობლემების გადაჭრის პროცესში. „დემოკრატიის ინსტიტუტი" აქტიური მოქალაქეებისგან შემდგარ სათათბირო ორგანოს მოსახლეობასთან შეხვედრებისა და მათი პრობლემების კვლევის მიზნით თანამშრომლობას სთავაზობს. შეხვედრაზე დამსწრე, ბათუმის სხვადასხვა დასახლების წარმომადგენელმა მოქალაქეებმა არსებული პრობლემების შესახებ ისაუბრეს და „დემოკრატიის ინსტიტუტის" მიერ მომზადებული კითხვარი შეავსეს, სადაც პრობლემები პრიორიტეტების მიხედვით წარმოადგინეს, ასევე დაასახელეს კონკრეტული პრობლემის გადაჭრის რა მეთოდი გამოიყენეს და რა შედეგი მიიღეს. პროექტის განხორციელების შემდეგ ეტაპზე „დემოკრატიის ინსტიტუტი" შეხვედრებს გამართავს ბათუმის 13-ვე დასახლებაში, სადაც ლიდერები-აქტიური მოქალაქეები შეირჩევიან. თავის მხრივ ისინი თავიანთ დასახლებაში მოსახლეობასთან შეხვედრებზე გამოავლენენ იმ პრობლემებს, რომელთა მოგვარებაც საკრებულოს კომპეტენციას წარმოადგენს.

თბილისი. სამოქალაქო საზოგადოების ინსტიტუტმა „გამოყენებითი კვლევების ხელშეწყობა საქართველოს რეგიონული განვითარებისთვის" (GARF – RD) პროექტის ფარგლებში გამოსცა მეორე პუბლიკაცია „პოლიტიკის დოკუმენტები". „წინამდებარე პუბლიკაცია განკუთვნილია, როგორც საქართველოს ცენტრალური და ადგილობრივი ხელისუფლების წარმომადგენლებისთვის, ასევე ქართული და საერთაშორისო ანალიტიკური ცენტრებისა და აკადემიური წრეებისთვის, რათა საქართველოს რეგიონული განვითარების შესახებ მსჯელობა ფართო დისკუსიის საგანი გახდეს. პუბლიკაცია მომზადებულია სამოქალაქო საზოგადოების ინსტიტუტის მიერ, ევროკავშირის ფინანსური მხარდაჭერით. მის შინაარსზე პასუხისმგებლობას იღებენ ავტორი ორგანიზაციები: „ფონდი კავკასიის უნივერსიტეტი", „საქართველოს საზოგადოებრივ საქმეთა ინსტიტუტი" (GIPA), "სტრატეგიული ინიციატივების სააგენტო", „საქართველოს სტრატეგიული კვლევებისა და განვითარების ცენტრი" (CSRDG)", ნათქვამია ორგანიზაციის ვებ-გვერდზე. სრულად... წყარო: civilin.org

კახეთი. 20 აპრილს პანკისის ხეობის მოსახლეობასთან პაციენტის უფლებების შესახებ საინფორმაციო შეხვედრები გაიმართა. შეხვედრები პროექტის „პაციენტის უფლებების დაცვის ცხელი ხაზის" ფარგლებში „საქართველოს ბიოეთიკის ასოციაციამ" ჩაატარა. პროექტი ფონდი „ღია საზოგადოება-საქართველოს" მხარდაჭერით მიმდინარეობს. „ადგილობრივ მოსახლეობას მიეწოდა ინფორმაცია რა უნდა იცოდეს მოქალაქემ პაციენტის უფლებების შესახებ; რა შეიძლება გამოიწვიოს პაციენტის უფლებების არცოდნამ; როგორ უნდა მოიქცეს საქართველოს მოქალაქე, თუკი მისი, როგორც პაციენტის უფლებები ირღვევა; რა მექანიზმები არსებობს უფლებების შესაძლო დარღვევაზე რეაგირებისთვის და ა.შ", ნათქვამია ორგანიზაციის ვებ-გვერდზე. სრულად... წყარო: www.osgf.ge

თბილისი. საქართველოს ახალგაზრდა იურისტთა ასოციაცია ეხმიანება სულხან წულაძის მიმართ აღკვეთი ღონისძიების სახით პატიმრობის გამოყენების საკითხს. „საიას მიაჩნია, რომ მოცემულ შემთხვევაში აღკვეთის ღონისძიების სახით პატიმრობის გამოყენება ვერ აკმაყოფილებს აღნიშნულ სტანდარტებს. ამასთან, განჩინება არის დაუსაბუთებელი, რადგან მასში განვითარებული მსჯელობა არის ზოგადი და აბსტრაქტული ხასიათის და აღკვეთის ღონისძიების სახით პატიმრობის გამოყენების აუცილებლობა და კანონიერება არ არის გამყარებული საქმეში არსებული კონკრეტული ფაქტებითა და ინფორმაციის ერთობლიობით", ანთქვამია ორგანიზაციის განცხადებაში. სრულად... წყარო: gyla.ge

გურია. ოზურგეთის მუნიციპალიტეტის მიერ წარმოდგენილმა პროექტმა „მონაწილეობითი პრინციპები გურიის ტურიზმის განვითარების სტრატეგიისთვის" ევროკავშირის მიერ გამოცხადებულ საგრანტო კონკურსში გაიმარჯვა. „აღნიშნული პროექტი მიზნად ისახავს საჯარო, გამჭვირვალე და მჭიდრო ურთიერთთანამშრომლობაზე დაფუძნებულ პროცესს. ამასთანავე, უზრუნველყოფს იმ პროექტებსა და ინიციატივებზე ფოკუსირებას, რომელიც მიმართულია რეგიონის მდგრად, ინკლუზიურ განვითარებაზე. პროექტი აერთიანებს გურიის ოთხივე მუნიციპალიტეტს: ოზურგეთის მუნიციპალიტეტი, ქალაქი ოზურგეთი, ლანჩხუთის მუნიციპალიტეტი, ჩოხატაურის მუნიციპალიტეტი. პროექტის ფარგლებში, პირველი სამუშაო შეხვედრა გურიის გუბერნიაში ჩატარდა. შეხვედრის მთავარ ამოცანას წარმოადგენდა პროექტის წამყვანი მხარეების გაერთიანება, სამომავლო აქტივობების დაგეგმვა და რეკომენდაციების შემუშავება. შეხვედრას გურიის გუბერნატორი, გუბერნატორის მოადგილეები, მუნიციპალიტეტების ხელმძღვანელი პირები, სამოქალაქო საზოგადოების ინსტიტუტისა და ოზურგეთის ახალგაზრდა მეცნიერთა კლუბის წარმომადგენლები დაესწრნენ. შეხვედრის დასაწყისში, გაიმართა პროექტის პრეზენტაცია, რომელიც ორგანიზაცია სამოქალაქო საზოგადოების ინსტიტუტის მხრიდან წარმოდგენილმა პროექტის კოორდინატორმა - ირინე ცინცაძემ გააცნო დამსწრე საზოგადოებას", ნათქვამია სამოქალაქო საზოგადოების ინსტიტუტის ვებ-გვერდზე. სრულად... წყარო: civilin.org

თბილისი. საქართველოს დემოკრატიული ინიციატივა აქვეყნებს 2016 წლის თებერვლის საინფორმაციო ბიულეტენს ავრცელებს. ბიულეტენი მიმოიხილავს ამ თვის მნიშვნელოვან საკითხებს - საქართველოს პრეზიდენტის მიერ საქართველოს პარლამენტისათვის წლიური ანგარიში წარდგენა, სისხლის სამართლის საერთაშორისო სასამართლოს (ICC) მიერ რუსეთ-საქართველოს ომის გამოძიების დაწყება, საქართველოს საგარეო საქმეთა სამინისტროს მიერ მომზადებულ ანგარიში ოკუპირებულ ტერიტორიებზე ადამიანის უფლებების მდგომარეობის შესახებ, საქართველოს მოსამართლეთა რიგგარეშე კონფერენციასა და მოსამართლეთა ტესტირების სკანდალს, ასევე ტელეკომპანია მაესტროს საქმესთან დაკავშირებულ დეტალებს, ადიგენში რელიგიურ ნიადაგზე დაპირისპირების შემთხვევასა და სხვა. სრულად... წყარო: gdi.ge

სამცხე-ჯავახეთი. დემოკრატ მესხთა კავშირის საკონფერენციო დარბაზში, პრეზენტაცია გაიმართა თემაზე: სოციალური მეწარმეობა. ღონისძიება ორგანიზებულ იქნა, ტოლერანტობის სამოქალაქო ცნობიერებისა და ინტეგრაციის მხარდამჭერი პროგრამა PITA-ს ფარგლებში, რომელსაც ახორციელებს საქართველოს გაეროს ასოციაცია UNAG, აშშ-ს საერთაშორისო განვითარების სააგენტოს ფინანსური მხარდაჭერით. სრულად... წყარო: ორგანიზაციის ვებ-გვერდი სოციალურ ქსელში

თბილისი. საერთაშორისო გამჭვირვალობა საქართველო აქვეყნებს ვიდეო-ინსტრუქციას - როგორ მოვამზადოთ თაიმლაინი. წყარო: www.transparency.ge

შიდა ქართლი. 20 აპრილს, არტ-კაფეში ქალთა საინფორმაციო ცენტრმა ლიტერატურული პრემია „საბა"-ს მფლობელის, მთარგმნელისა და მწერლის ანა კორძაია-სამადაშვილის საჯარო ლექციას უმასპინძლა თემაზე „ცუდი გოგოები და კარგი გოგოები". საჯარო ლექცია ჩატარდა ქალთა საინფორმაციო ცენტრის პროექტის „გაძლიერებული ქალები მშვიდობისა და განვითარებისათვის" ფარგლებში ამერიკის სახელმწიფო დეპარტამენტის მხარდაჭერით. სრულად... წყარო: ორგანიზაციის ვებ-გვერდი სოციალურ ქსელში

იმერეთი. ქუთაისის გენდერის მედიაცენტრმა, პოლიტიკაში ქალების გააქტიურების მიზნით, პოლიტიკური პარტიების ქალ წარმომადგენლებთან შეხვედრები დაიწყო. „პოლიტიკური პარტიების ქალ წარმომადგენლებთან შეხვედრები პროექტის ,,აირჩიე თანასწორობა" ფარგლებში იმართება, რომელსაც არასამთავრობო ორგანიზაცია „ჟურნალისტთა ქსელი გენდერული თანასწორობისათვის" აშშ საერთაშორისო განვითარების სააგენტოს USAID–ისა და საარჩევნო სისტემების განვითარების ფონდის IFES -ის მხარდაჭერით ახორციელებს", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. ვანო ხუხუნაიშვილის სახელობის ეფექტიანი მმართველობის სისტემის და ტერიტორიული მოწყობის რეფორმის ცენტრთან იქმნება მუნიციპალურ მოხელეთა სწავლების სასწავლო პროგრამების ელექტრონულ ბაზა. „თვითმმართველ ერთეულებს თავის მხრივ ექნებათ შესაძლებლობა ამ რეესტრში მოიძიონ ხარისხიანი სასწავლო პროგრამები თავიანთი მოხელეების კვალიფიკაციის ამაღლებისთვის. სასწავლო პროგრამა დარეგისტრირდება მხოლოდ იმ შემთხვევაში, თუ დადასტურდება მისი შესაბამისობა სპეციალურ სტანდარტებთან. სპეციალურ სტანდარტებთან პროგრამის შემოწმებას განახორციელებენ ცენტრის მიერ მოწვეული ექსპერტები", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. თბილისი ღია მმართველობა პარტნიორობის (OGP) საპილოტე პროგრამის მონაწილედ შეირჩა და ღია მმართველობის პროცესში ჩაერთვება. „ღია მმართველობა პარტნიორობის საპილოტე პროგრამაში მონაწილეობით, თბილისის მთავრობა იღებს ვალდებულებას, დედაქალაქის მართვის პროცესი უფრო ღია გახადოს და გადაწყვეტილების მიღების პროცესში მოქალაქეები და საზოგადოებრივი ორგანიზაციები ჩართოს. ამ მიზნით, თბილისი დაინტერესებულ პირებთან ერთად შეიმუშავებს სამოქმედო გეგმას, რომელშიც კონკრეტულ ვალდებულებებს აიღებს. ფონდმა „ღია საზოგადოება საქართველომ", ინფორმაციის თავისუფლების განვითარების ინსტიტუტთან ერთად, მხარი დაუჭირა თბილისის მერიის მიერ შესარჩევ კონკურსში განაცხადის წარდგენას. ამ პროცესის სამომავლო მხარდაჭერას ფონდი მომავალშიც გააგრძელებს", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 19 აპრილს, სასტუმრო ამბასადორში, გაიმართა „გამოყენებითი კვლევების ხელშეწყობა საქართველოს რეგიონული განვითარებისთვის" პროგრამის (GARF-RD) დასკვნითი, შემაჯამებელი ღონისძიება. მოგეხსენებათ, ევროკავშირთან ასოცირების კონტექსტში, საქართველოსთვის ძალზედ მნიშვნელოვანია კვლევებზე და მტკიცებულებებზე დაყრდნობით განხორცილებული რეგიონული განვითარების პოლიტიკის წარმოება. აღნიშნულ გამოწვევებზე რეაგირების მიზნით, 2014 წლის მაისში, საქართველოში ევროკომისიის მისიის ფინანსური მხარდაჭერით და საქართველოს რეგიონული განვითარებისა და ინფრასტრუქტურის სამინისტროსთან კოორდინაციით, სამოქალაქო საზოგადოების ინსტიტუტმა (CSI) დაიწყო რეგიონული განვითარების პროგრამის განხორციელება (2014-2016 წწ.) - „გამოყენებითი კვლევების ხელშეწყობა საქართველოს რეგიონული განვითარებისთვის" (GARF - RD). პროექტი მიზნად ისახავდა: 1.საქართველოში მოქმედი ანალიტიკური ცენტრების მხარდაჭერას რეგიონული განვითარების კონკრეტული სფეროების საჯარო პოლიტიკის დოკუმენტების მომზადების პროცესში; 2.რეგიონული განვითარების სფეროში მომუშავე ანალიტიკური ცენტრების ურთიერთდაკავშირებას და შემუშავებული ხედვების ხელისუფლებასთან განხილვას. პროექტის ფარგლებში შეიქმნა 10 საჯარო პოლიტიკის დოკუმენტი ორი მიმართულებით: ა) რეგიონული პოლიტიკის მართვა, ადგილობრივი თვითმმართველობა და რეგიონების კონკურენტუნარიანობა; ბ) პოლიტიკების ტერიტორიული ზეგავლენის ანალიზი. დასკვნით შეხვედრას ესწრებოდნენ რეგიონული განვითარების და ინფრასტრუქტურის სამინისტროს წარმომადგენლები, პროექტის კოორდინატორი ევროკავშირის მხრიდან, აღმოსავლეთ პარტნიორობის სამოქალაქო საზოგადოების ფორუმის წევრი საზოგადოებრივი ორგანიზაციები, ექსპერტები რეგიონული განვითარების და თვითმმართველობის საკითხებში, ანალიტიკური ორგანიზაციების, აკადემიური ინსტიტუტების წარმომადგენლები.

სამეგრელო. 16 აპრილს ზუგდიდში, გრიგოლ ხვიტიას სახელობის სასწავლო უნივერსიტეტში გაიმართა მორიგი შეხვედრა სერიიდან „დიალოგები დემოკრატიაზე". სამუშაო თემას წარმოადგენდა პირადი საიდუმლოების დაცვა და კამპანია „ეს შენ გეხება". სრულად... წყარო: cela.ge

ქვემო ქართლი. 19 აპრილს, სიქას ორგანიზებით, პროგრამის „მომავლის თაობა” ფარგლებში ევროკავშირისა და ნატოს საინფორმაციო ცენტრის ქვემო ქართლის ბიუროს წარმომადგენელი მარიკა ლიპარტელიანი თელეთის საჯარო სკოლის სამოქალაქო კლუბის წევრებს შეხვდა. „შეხვედრის დასაწყისში სტუმარმა ევროკავშირისა და ნატოს მთავარ იდეაზე, დანიშნულებასა და საქმიანობებზე ისაუბრა. მიმოხილვის შემდეგ მოეწყო დოკუმენტური ფილმის ჩვენება და განხილვა, რომელიც ევროკავშირის დაარსების ისტორიას ეხებოდა”, ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. კამპანიის „ეს შენ გეხებას" წევრი ორგანიზაციები პროკურატურას სტატისტიკურ მონაცემებს სთხოვს. „მოგმართავთ კამპანიის „ეს შენ გეხება” სახელით და საქართველოს კონსტიტუციისა და საქართველოს ზოგადი ადმინისტრაციული კოდექსის მოთხოვნების გათვალისწინებით. გთხოვთ, მოგვაწოდოთ შემდეგი საჯარო ინფორმაცია 2012 წლის 1 ოქტომბრიდან დღემდე: რამდენ საქმეზე დაიწყო გამოძიება პირადი ცხოვრების ამსახველი ინფორმაციის ან პერსონალური მონაცემების ხელყოფის ფაქტებთან დაკავშირებით, ასევე, კერძო კომუნიკაციის საიდუმლოების დარღვევის, კიბერდანაშაულისა და კიბერტერორიზმის ფაქტებთან დაკავშირებით (გთხოვთ, მიგვითითოთ სსკ-ის შესაბამისი მუხლები); რამდენი პირი მიეცა სისხლისსამართლებრივ პასუხისგებაში ხსენებული დანაშაულის საფუძველზე, მათ შორის, ბრალდებულებიდან რამდენი წარმოადგენდა საჯარო მოხელეს (გთხოვთ, მიგვითითოთ მათი სამსახურებრივი პოზიციები)...", ნათქვამია მიმართვაში. სრულად... წყარო: esshengexeba.ge

ქვემო ქართლი. 13 აპრილს, ინფორმაციის თავისუფლების განვითარების ინსტიტუტმა (IDFI) მონაწილეობა მიიღო მარნეულში გამართულ ღია მმართველობის პარტნიორობის საჯარო კონსულტაციაში. შეხვედრაზე IDFI-ს წარმომადგენელმა თამარ ნადიბაიძემ მოქალაქეებს გააცნო IDFI-ს რეკომენდაციები ღია მმართველობის პარტნიორობის მესამე სამოქმედო გეგმისთვის (2016-2017). მისათვის, რომ ინიციატივა მოხვდეს სამოქმედო გეგმაში, აუცილებელია, შეესაბამებოდეს OGP-ის 4 ძირითად პრინციპს: ადგილობრივი და ცენტრალური მმართველობის ღიაობა, ხელისუფლების წარმომადგენლების ანგარიშვალდებულება, მოქალაქეთა ჩართულობა გადაწყვეტილების მიღების პროცესში და საჯარო სერვისების ინოვაციური და ტექნოლოგიური განვითარება", ნათქვამია ორგანიზაციის ვებ-გვერდზე. სრულად... წყარო: idfi.ge

ქვემო ქართლი. 14-15 აპრილს, ტოლერანტობის და მრავალფეროვნების ინსტიტუტმა (TDI), ქალაქ გარდაბანში, რელიგიური და ეთნიკური უმცირესობების წარმომადგენელი გოგოებისთვის ჩაატარა ტრენინგი გენდერულ თანასწორობაზე. „ტრენინგი მიზნად ისახავდა: გენდერული თანასწორობის ცნებების გაზიარებას, გენდერული ცნებებისა და მიდგომების გააზრებას, საზოგადოებრივ სივრცეში გენდერული სტერეოტიპებისა და გენდერული უთანასწორობის ამოცნობასა და კრიტიკულ ანალიზს, სხვადასხვა რელიგიურ ტრადიციაში გენდერული როლების არსებული მოდელების გაცნობასა და მათი გენდერული თანასწორობის ჭრილში განხილვას", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში