თბილისი. 2 თებერვალს, საქართველოს ადგილობრივ თვითმმართველობათა ეროვნულ ასოციაციას სამუშაო ვიზიტით ეწვია დელეგაცია ევროპის საბჭოდან. „შეხვედრის მიზანია ესპანეთში, ადგილობრივი დაფინანსების ნიშნულების პროგრამის გაცნობა საქართველოს მუნიციპალიტეტებისათვის და საპილოტე პროგრამისთვის მუნიციპალიტეტებთან ურთიერთობების დამყარება", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

აჭარა. 24 იანვარს, ბათუმი საკრებულოს წევრთა კონგრესი დასრულდა. ფორუმის მონაწილეები სამი დღის განმავლობაში ადგილობრივი თვითმართველობების საქმიანობასთან დაკავშირებულ საკითხებს განიხილავდნენ. საერთაშორისო რესპუბლიკური ინსტიტუტის პროექტში ქვეყნის მასშტაბით თითქმის ყველა თვითმმართველი ქალაქია ჩართული. ორგანიზატორები ფიქრობენ, რომ ფორუმი საკრებულოების ფუნქციონირებას უფრო ეფექტურს გახდის. კონგრესის დასკვნითი დღე პრეზენტაციებს დაეთმობა, სადაც ფორუმის მონაწილეებმა ორი დღის განმავლობაში მუშაობის ერთგვარი შედეგი და თვითმმართველობის პროცესის განვითარების გეგმა წარმოადგინეს.

თბილისი. „სიდას" და „სამართლიანი არჩევნების და დემოკრატიის საერთაშორისო საზოგადოების" (ISFED) ორგანიზებით, თვითმმართველობის რეფორმასა და გამოწვევებზე, გუდაურში დისკუსია გაიმართა. დისკუსიაში მონაწილეობა მიიღეს სამოქალაქო საზოგადოების რეგიონული ქსელის (R-CSN) წევრმა ორგანიზაციებმა და თვითმმართველობის საკითხზე მომუშავე სხვა ორგანიზაციებმა. „შეხვედრის მიზანი იყო გამოკვეთილიყო, თუ რა პრობლემები არსებობს თვითმმართველობებში, რამდენად წარმატებულია თვითმმართველობის რეფორმა, რომელიც ხელისუფლებამ დაიწყო და როგორ უნდა განვითარდეს ეს რეფორმა. დისკუსიაზე არასამთავრობო ორგანიზაციების წარმომადგენლებს საშუალება მიეცათ თვითმმართველობის საკითხებზე კონკრეტული მოსაზრებები დაეფიქსირებინათ", ნათქვამია ორგანიზაციის ვებ-გვერდზე. სრულად... წყარო: www.cida.ge

თბილისი. 26 ნოემბერს გაიმართა კონფერენცია თემაზე - ტერიტორიული ერთეულების როლი ქვეყნის სოციალურ-ეკონომიკურ განვითარებაში. კონფერენცია ნორვეგიის საგარეო საქმეთა სამინისტროს, ნორვეგიის ადგილობრივ თვითმმართველობათა ასოციაციის (KS) და საქართველოს ადგილობრივ თვითმმართველობათა ეროვნული ასოციაციის (NALA) ერთობლივი პროექტის ფარგლებში ჩტარდა. შეხვედრაზე განიხილეს ისეთი მნიშვნელოვანი თემები, როგორიცაა „ადგილობრივი თვითმმართველობის კოდექსში” ცვლილებების შეტანა; საქართველოს კანონში „რეგიონული განვითარების შესახებ” ცვლილებების შეტანა, არათანაბარი ეკონომიკური განვითარება საქართველოში, ტერიტორიული ერთეულების განვითარების როლი. სრულად... წყარო: ორგანიზაციის ვებ-გვერდი სოციალურ ქსელში

თბილისი. საერთაშორისო გამჭვირვალობა საქართველო ზუგდიდის მუნიციპალიტეტის 2016 წლის ბიუჯეტის პროექტთან დაკავშირებით რეკომენდაციებს ავრცელებს. „მიგვაჩნია, რომ ბიუჯეტის პრიორიტეტების შერჩევისას მუნიციპალიტეტი აუცილებლად უნდა დაეყრდნოს შესაბამის კვლევებს, რომელიც უნდა ჩატარდეს ბიუჯეტის პროექტზე მუშაობის დაწყებამდე და იგი მაქსიმალურად უნდა ითვალისწინებდეს მუნიციპალიტეტში მცხოვრებ მოქალაქეთა ყველა ჯგუფის ინტერესებს. წინააღმდეგ შემთხვევაში, შესაძლებელია პრიორიტეტები არასწორად იქნეს შერჩეული, რაც ბიუჯეტის არასასურველი მიმართულებით, არაეფექტიანად გახარჯვის რისკებს წარმოქმნის", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. საერთაშორისო გამჭვირვალობა საქართველომ გურიის მუნიციპალიტეტებიდან საჯარო ინფორმაცია გამოითხოვა 2014 წლის მაისის და 2015 წლის ოქტომბრის მდგომარეობით დასაქმებულთა რაოდენობისა და თვის მანძილზე გასაცემი ხელფასის ოდენობის შესახებ. „საერთაშორისო გამჭვირვალობა - საქართველო" კიდევ ერთხელ მოუწოდებს მუნიციპალიტეტებს ადგილობრივი საჭიროებებიდან გამომდინარე განსაზღვრონ, თუ რა სახის იურიდიული პირების არსებობაა საჭირო თვითმმართველობის გამართული საქმიანობისათვის. მწირი საბიუჯეტო რესურსების პირობებში მუნიციპალიტეტები მაქსიმალურად უნდა იყვნენ ორიენტირებულნი ადმინისტრაციული ხარჯების ეკონომიასა და მოქალაქეთა პირველადი საჭიროებების, კომუნალური თუ ინფრასქტრუქტურული პროექტების განხორციელებაზე”, ნათქვამია ორგანიზაციის განცხადებაში. სრულად... წყარო: www.transparency.ge

თბილისი. ადგილობრივ თვითმმართველობებში გენდერული თანასწორობის პრინციპების დანერგვის შესახებ კონფერენცია გაიმართა. ორდღიანი კონფერენციის ორგანიზატორები გაეროს ქალთა ორგანიზაცია, ქალთა საინფორმაციო ცენტრი და ქალთა ფონდი „ტასო" არიან. ღონისძიების პირველ დღეს მონაწილეებმა თვითმმართველობებში გენდერული თანასწორობისთვის აუცილებელ ინსტიტუციურ მექანიზმებზე იმსჯელეს. სრულად... წყარო: ორგანიზაციის ვებ-გვერდი სოციალურ ქსელში

თბილისი. „სამართლიანი არჩევნების" (ISFED) განცხადებით, სასამართლოში სარჩელის წარდგენის შემდეგ ადგილობრივი თვითმმართველობის ორგანოებმა საჯარო ინფორმაცია გასცეს. ორგანიზაცია მიიჩნევს, რომ „მნიშვნელოვანია ადგილობრივი თვითმმართველობის ორგანოებმა გაიაზრონ ის ვალდებულებები, რომელიც მათ აკისრიათ მოქალაქეების წინაშე და დაუბრკოლებლად მიაწოდონ მათ საჯარო ინფორმაცია. ეს ერთის მხრივ გააძლიერებს დემოკრატიულ კონტროლს, ხოლო მეორეს მხრივ ხელს შეუწყობს გამჭვირვალე და ანგარიშვალდებული ორგანოების ფორმირებას", ნათქვამია „სამართლიანი არჩევნების" ვებ-გვერდზე. სრულად... წყარო: www.isfed.ge

თბილისი. „საერთაშორისო გამჭვირვალობა საქართველო" ახალ ბლოგ პოსტს აქვეყნებს - ქალები თვითმმართველობაში: გენდერული ბალანსი დასავლეთ საქართველოს მუნიციპალიტეტებში. ორგანიზაციამ დასავლეთ საქართველოს 37 მუნიციპალიტეტში არსებული მდგომარეობა გამოიკვლია. 2014 წლის კვლევის თანახმად, საკრებულოს წევრთა შორის მხოლოდ 12% იყო ქალი, მუნიციპალიტეტებში წამყვან თანამდებობებს კი კაცები იკავებდნენ. ორგანიზაციის განცხადებით, წინა წლის კვლევებთან შედარებით მდგომარეობა წელსაც არ შეცვლილა რადიკალურად. „ამ რეგიონების 37 თვითმმართველ ერთეულში საკვანძო თანამდებობებზე ქალები ნაკლებად არიან წარმოდგენილნი, ქალების უმრავლესობას არ უკავია მნიშვნელოვან გადაწყვეტილებათა მისაღებად აუცილებელი თანამდებობები. 2014 წლის ადგილობრივი თვითმმართველობის არჩევნების შედეგად დასავლეთ საქართველოს საკრებულოებში 1086 მანდატიდან, ქალებმა სულ 134 მანდატი მოიპოვეს, რაც საერთო რაოდენობის 12 %-ის ტოლია", ნათქვამია ორგანიზაციის ვებ-გვერდზე. სრულად... წყარო: www.transparency.ge

კახეთი. ახალგაზრდა იურისტთა ასოციაციის თელავის ოფისმა, თელავის დემოკრატიული ჩართულობის ცენტრში, პროექტის „დაცული არჩევანი - ეფექტური თვითმმართველობის გარანტი" – ფარგლებში კვლევის შედეგების პრეზენტაცია გამართა. საქართველოს ახალგაზრდა იურისტთა ასოციაცია და ადგილობრივი დემოკრატიის სააგენტო – საქართველო, ფონდ „ღია საზოგადოება - საქართველოს" მხარდაჭერით ახორციელებენ აღნიშნულ პროექტს. საიამ პროექტის პირველ ეტაპზე იანვარსა და თებერვალში თვითმმართველ ქალაქებში ჩატარდა ფოკუს ჯგუფები ადგილობრივი თვითმმართველობის ორგანოებისა და სამოქალაქო საზოგადოების წარმომადგენლებთან. ფოკუს ჯგუფების მიზანი იყო ზემოაღნიშნულ პირთა დამოკიდებულების გამოვლენა, რამდენად დაცულები არიან საჯარო მოხელეები ადგილობრივი თვითმმართველობის კოდექსით განსაზღვრული სამართლებრივი რეგულაციების ფარგლებში და შესაძლებელია თუ არა ალტერნატიული მექანიზმების შემუშავების გზით აღნიშნული მდგომარეობის გაუმჯობესება.

თბილისი. სამოქალაქო საზოგადოების ინსტიტუტმა „გამოყენებითი კვლევების ხელშეწყობა საქართველოს რეგიონული განვითარებისთვის" (GARF – RD) პროექტის ფარგლებში გამოსცა პირველი პუბლიკაცია „პოლიტიკის დოკუმენტები". ეს პუბლიკაცია წარმოადგენს რეგიონული განვითარების პროგრამის ფარგლებში შექმნილი საჯარო პოლიტიკის დოკუმენტების პირველ ტომს და მოიცავს ხუთი პოლიტიკის დოკუმენტს ისეთ თემებზე, როგორიცაა: 1.საზღვრისპირა, ტრანსსასაზღვრო და ტრანსეროვნული რეგიონული თანამშრომლობა 2.ტერიტორიული ოპტიმიზაცია - ურბანული და სასოფლო განვითარება 3.რეგიონული და ინფრასტრუქტურული განვითარების პოლიტიკის შესაბამისობა ევროკავშირის ასოცირების ხელშეკრულების პრიორიტეტებთან 4.ადგილობრივი ტრანსპორტი 5.კომუნალური სფერო - წყალმომარაგება წინამდებარე პუბლიკაცია განკუთვნილია, როგორც საქართველოს ცენტრალური და ადგილობრივი ხელისუფლების წარმომადგენლებისთვის, ასევე ქართული და საერთაშორისო ანალიტიკური ცენტრებისა და აკადემიური წრეებისთვის, რათა საქართველოს რეგიონული განვითარების შესახებ მსჯელობა ფართო დისკუსიის საგანი გახდეს. პუბლიკაცია მომზადებულია სამოქალაქო საზოგადოების ინსტიტუტის მიერ, ევროკავშირის ფინანსური მხარდაჭერით. მის შინაარსზე პასუხისმგებლობას იღებენ ავტორი ორგანიზაციები: „ფონდი კავკასიის უნივერსიტეტი", „გორის საინფორმაციო ცენტრი", „ეკონომიკური პოლიტიკის კვლევის ცენტრი" (EPRC), „საქართველოს სტრატეგიული კვლევებისა და განვითარების ცენტრი" (CSRDG), „მდგრადი განვითარების საერთაშორისო ფონდი - საქართველო.” პოლიტიკის დოკუმენტები...

აჭარა. 9 ივლისს, ახლაგაზრდა იურისტთა ასოციაციისა და ორგანიზაციის „ადგილობრივი დემოკრატიის'' წარმომადგენლებმა საჯარო შეხვედრა გამართეს. შეხვედრაზე წარმოდგენილი იყო კვლევის შედეგების პრეზენტაცია – უნდა ჰქონდეს თუ არა სისხლის სამართლებრივი იმუნიტეტი თვითმართველობის არჩეულ თანამდებობის პირებს . კვლევის ფარგლებში საქარათველოს 8 თვითმმართველ ქალაქში საკრებულოების 300-მდე წევრი და მესამე სექტორის წარმომადგენელი გამოკითხეს. ორივე სექტორი, როგორც გამოკითხვამ აჩვენა, თვითმმართველობებში არჩეული თანამდებობის პირებისთვის იმუნიტეტის იდეას არ ემხრობა, თუმცა მიაჩნიათ, რომ ადგილობრივი თვითმმართველოს კოდექსში უნდა განისაზღვროს მერის და საკრებულოს თავმჯომარის გადაყენების კონკრეტული სტანდარტები. გამოკითხული რესპოდენტები მოსაზრებების შეჯამების შედეგად, პროექტის ავტორები მოამზადებენ რეკომენდაციას პარლამენტში წარსადგენად, რათა ადგილობრივ თვითმმართველობაში არჩეული თანამდებობის პირებისთვის შეზღუდული იმუნიტეტის მინიჭების შესახებ კონკრეტული ჩანაწერი გაჩნდეს.

აჭარა. 9 ივლისს, ბათუმის საკრებულოს სხდომათა დარბაზში, სამოქალაქო მრჩეველთა საბჭოსა და ბათუმის მერიის ერთობლივი ინიციატივით საჯარო შეხვედრა გაიმართა. შეხვერაზე განხილეს ბათუმის მიწათსარგებლობის გეგმაში შესატანი ცვლილებების პროექტი. შეხვედრას სამოაქალაქო მრჩეველთა საბჭოსა და ბათუმის საკრებულის წერვრები ესწრებოდნენ. ასევე, დისკუსიაში მონაწილეობა მიიღეს აჭარაში მოქმედმა მესამე სექტორის წარმომადგენლება და საზოგადოებრივი დარბაზების თავმჯდომარეებმა. შეხვედრაზე ძირითადად ის ცვლილებები განიხილეს, რომლის მიხედვითაც ქალაქის დაგეგმარება 2016 წლიდან დაიწყება.

აჭარა. 9 ივლისს, ბათუმის საკრებულოს სხდომათა დარბაზში, განვითარებისა და თანამშრომლობის ხელშეწყობის კავშირმა – „პროგრესმა" საზაფხულო სტაჟირების პროგრამის ფარგლებში მორიგი შეხვედრა გამართა. ამჟამად, ბათუმის მუნიციპალიტეტის სტაჟიორებმა ბათუმის სახელმწიფო უნივერსიტეტის პროფესორის – ჯემალ კარალიძის ლექცია – თვითმმართველობის ისტორია– მოისმინეს. სტაჟირების პროგრამის მონაწილეებისთვის, გარდა სემინარებისა, საზოგადოებრივი ორგანიზაცია „პროგრესი" და ბათუმის მერია, მუნიციპალიტეტის საქიანობაში სიღრმისეულად გარკვევასაც სთავაზობს.

თბილისი. ახალგაზრდა იურისტთა ასოციაცია აქვეყნებს მოსაზრებებს ადგილობრივი თვითმმართველობის კოდექსში და თანმდევ საკანონმდებლო აქტებში შესატან ცვლილებებზე. „საია დადებითად აფასებს წარმოდგენილი საკანონმდებლო ინციატივას, კერძოდ ადგილობრივი თვითმმართველობის განხორციელებაში მოქალაქეთა ჩართულობის უზრუნველსაყოფად განსაზღვრულ მთელ რიგ დამატებით ფორმებს. თუმცა, მიუხედავად ზოგადი პოზიტიური ფონისა საია ეხმიანება ცალკეულ საკითხებს, რომლებიც დამატებით დამუშავებას საჭიროებენ. მათ შორისაა: მუნიციპალიტეტის დისკრეცია ჩაატაროს საერთო კრება ქალაქსა და დასახლებაში, სადაც ამომრჩეველთა რაოდენობა 2000-ს აღემატება, საერთო კრების საქმიანობის ღიად და გამჭვირვალედ წარმართვის აუცილებლობა, საერთო კრების მუდმივმოქმედი ორგანოს - საზოგადოებრივი საბჭოს გაუქმება, საერთო კრების რჩეულის უფლებამოსილებების დეტალურად განსაზღვრის საჭიროება, სამოქალაქო მრჩეველთა საბჭოს წევრთა არჩევა, ხელმძღვანელობაზე უფლებამოსილი პირის დადგენის აუცილებლობა და სხვა საკითხები...", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საზოგადოებრივი ორგანიზაციები განცხადებას ავრცელებენ ადგილობრივი თვითმმართველობის განხორციელებაში მოქალაქეთა მონაწილეობის ფორმების დანერგვის საკითხზე. „2014 წელს ხელისუფლებამ დაიწყო „საქართველოს თვითმმართველობათა კოდექსში" ცვლილებების და დამატებების მომზადება, მათ შორის XI თავისთვის, რომელიც შეეხება ადგილობრივი თვითმმართველობის განხორციელებაში მოქალაქეთა მონაწილეობის დამატებითი ფორმების დანერგვას. ... კანონპროექტის თავდაპირველი ვარიანტი ითვალისწინებდა მოსახლეობის თვითორგანიზებისა და თვითმმართველობის განხორციელებაში მოქალაქეთა მონაწილეობის ფორმას... სამწუხაროდ, კანონპროექტის განხილვებისას სრულიად იგნორირებული იყო თავად მოსახლეობის, ასევე იმ 60-მდე ორგანიზაციის მოსაზრებები, რომლებმაც აღნიშნული საკითხის შესწავლას და კანონპროექტის მომზადებას წელიწადზე მეტი მოანდომეს. შედეგად, ხელისუფლების მიერ მიღებული გადაწყვეტილებით, საზოგადოებრივი საბჭოს, როგორც დასახლების ქმედითი, ეფექტური კოლეგიალური წარმონაქმნის ცნება პროექტიდან ამოღებულია. ...ზემოთქმულიდან გამომდინარე, ვთხოვთ საქართველოს პარლამენტს კიდევ ერთხელ დაუბრუნდეს ამ საკითხს და საბოლოო გადაწყვეტილება მხოლოდ სამოქალაქო ორგანიზაციებთან შესაბამისი კონსულტაციების შემდეგ მიიღოს", ნათქვამია განცხადებაში. სრულად... წყარო: cida.ge

გურია. 6 ივლისს ,,ახალგაზრდა პედაგოგთა კავშირის" ლიდერთა სკოლის მოსწავლეები ადვოკატირების პროგრამის ფარგლებში ქალაქ ოზურგეთის მერს შეხვდნენ და ოზურგეთის ერთ-ერთი საცხოვრებელი კორპუსის მაცხოვრებელთა პრობლემების შესახებ ისაუბრეს. შეხვედრა ეხებოდა ქ. ოზურგეთში შემოქმედელის 5 – ში მდებარე საცხოვრებელი კორპუსის მაცხოვრებლების პრობლემებს ( კორპუსის მცხოვრებთა მომართვის საფუძველზე დაიგეგმა ადვოკატირების კამპანია). შეხვედრაზე ახალგაზრდებმა წარადგინეს შემოქმედელის 5–ში არსებული მდგომარეობის ამსახველი სიუჟეტი. ქალაქის მერმა გამოთქვა მხარდაჭერის სურვილი ახალგაზრდების ინიციატივის მიმართ და აღნიშნა, რომ პრობლემების იდენტიფიკაციის მიზნით ქალაქის მერიაში შეიქმნება სამუშაო ჯგუფი, რომელიც დეტალურად შეამოწმებს აღნიშნულ საცხოვრებელ კორპუსს და არსებულ პრობლემებს. მორიგი სამუშაო შეხვედრა აღნიშნულ თემაზე ახალგაზრდებსა და ქალაქის მერს შორის უახლოეს დღეებში გაიმართება. სრულად... წყარო: ორგანიზაციის ვებგვერდი

თბილისი. სამოქალაქო კულტურის საერთაშორისო ცენტრმა მორიგი ბიულეტენი „თვითმმართველობის დროა" განათავსა ვირტუალურ სივრცეში. შესაბამისად, მასში ასახულია ამ მიმართულებით მიმდინარე პროცესები. სრულად... წყარო: ivote.ge

თბილისი. სამოქალაქო კულტურის საერთაშორისო ცენტრმა და ფონდმა „ღია საზოგადოება - საქართველომ" ადგილობრივი თვითმმართველობის შესახებ მომზადებული ანგარიში წარადგინეს. ერთობლივად მომზადებულ ანგარიშში შეფასებულია 1991-2015 წლებში განხორციელებული ადგილობრივი თვითმმართველობის რეფორმები. დოკუმენტის პირველ ნაწილში საუბარია საქართველოში 1991-2012 წლებში თვითმმართველობის სისტემის განვითარების ტენდენციებზე. ასევე, შეფასებულია დეცენტრალიზაციის განვითარების პროცესი... სრულად... წყარო: ორგანიზაციის ვებ-გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოება ადგილობრივი თვითმმართველობის ორგანოების ვებ–გვერდების მონიტორინგის ანგარიშს აქვეყნებს. ანგარიში მოიცავს 2014 წლის 1 ნოემბრიდან 2015 წლის 1 მაისამდე პერიოდს. ორგანიზაცია აკვირდებოდა აღმასრულებელი (გამგეობა/მერია), ისე წარმომადგენლობითი (საკრებულო) ორგანოების ვებ-გვერდებს. ასევე, ადგილობრივი თვითმმართველობის სოციალური ქსელის (Facebook) გვერდებს. სრულად... წყარო: isfed.ge

სამცხე-ჯავახეთი. გასულ კვირას, ახალციხის დემოკრატიული ჩართულობის ცენტრში, განიხილეს კანონპროექტი „მოქალაქეთა ჩართულობის დამატებითი ფორმების" შესახებ. დისკუსია სამოქალაქო კულტურის საერთაშორისო ცენტრმა მოაწყო. შეხვერდა ჩატარდა არასამთავრობო ორგანიზაცია „სამოქალაქო კულტურის საერთაშორისო ცენტრის" პროექტის „საქართველოში დეცენტრალიზაციის რეფორმის ხელშეწყობა" ფარგლებში. პროექტი ხორციელდება ფონდი „ღია საზოგადოება საქართველოს" მხარდაჭერით. შეხვედრას არასამთავრობო სექტორის წარმომადგენლები და თვითმმართველობის საკითხებით დაინტერესებული პირები დაესწრნენ.

შიდა ქართლი. 19 ივნისს, გორის დემოკრატიული ჩართულობის ცენტრის დარბაზში გაიმართა მოქალაქეთა მონაწილეობის შესახებ კანონის პროექტის განხილვა, რომელსაც ესწრებოდნენ ადგილობრივი თვითმმართველობის, საზოგადოებრივი და მედია ორგანიზაციების წარმომადგენლები. განხილვა წარმართა „სამოქალაქო კულტურის საერთაშორისო ცენტრის" დირექტორმა კონსტანტინე კანდელაკმა. მან მოკლედ მიმოიხილა არსებული საკანონმდებლო ბაზა, მისი დადებითი და უარყოფითი მომენტები და წარმოადგინა ინიციატივები, რომელთა კანონში შეტანით უფრო გააქტიურდებოდა მოქალაქეთა მონაწილეობის პროცესი თვითმმართველობის განხორციელებაში. განსაკუთრებით გამახვილდა ყურადღება დასახლებების კრებების ჩატარებასა და მათი უფლებამოსილებებზე და პეტიციების მომზადებაზე. განხილვამ დიდი ინტერესი გამოიწვია შეხვედრაზე დამსწრეთა შორის და 1 საათის განმავლობაში მიმდინარეობდა აქტიური განხილვები. შეხვედრა გაიმართა ფონდის „ღია საზოგადოება - საქართველოს" მხარდაჭერით.