სამეგრელო. 14 ივნისს, ქალაქ ზუგდიდში შშმ პირთა უფლებების დაცვის დღესთან დაკავშირებული ღონისძიება გაიმართა. აღნიშნული ღონისძიება მესამე წელია ადგილობრივი თვითმმართველობისა და შშმ პირთა საკითხებზე მომუშავე ორგანიზაციების თანამშრომლობით იმართება. თბილისში მომხდარი ტრაგედიის გამო ორგანიზატორებმა გადადეს ღონისძიების საკონცერტო და შემოქმედებითი ნაწილი. ასოციაცია „ჰანგი" პარტნიორ ორგანიზაციებთან ერთად მადლობას უხდის ქალაქ ზუგდიდის მუნიციპალიტეტის მერიას, ზუგდიდის მუნიციპალიტეტის გამგეობას ღონისძიების ორგანიზებასა და თანამშრომლობისათვის. სრულად... წყარო: ირგანიზაციის ვებ-გვერდი სოციალურ ქსელში

თბილისი. საერთაშორისო გამჭვირვალობა – საქართველო აქვეყნებს 2012–2014 წლის 31 დეკემბრის ჩათვლით საქართველოს მუნიციპალიტეტებში გაცემული პრემიებისა და სახელფასო დანამატის შესახებ პუბლიკაციას. ორგანიზაციამ 59 მუნიციპალიტეტიდან და 12 თვითმმართველი ქალაქიდან გამოითხოვა. „2012-2014 წლებში საქართველოს თვითმმართველობებში პრემიისა და სახელფასო დანამატის სახით 100 მილიონ ლარზე მეტი გაიცა. გამომდინარე იქედან, რომ ცალკეული მუნიციპალიტეტის საკრებულომ და გამგეობამ/მერიამ ჩვენ მიერ გამოთხოვილი ინფორმაცია საერთოდ არ მოგვაწოდა, შეგვიძლია ვივარაუდოთ, რომ გაცემული პრემიებისა და დანამატების რიცხვი აღემატება ზემოხსენებულ მაჩვენებელს", ნათქვამია პუბლიკაციაში. სრულად... წყარო: transparency.ge

კახეთი. ,,სამოქალაქო კულტურის საერთაშორისო ცენტრის’’ ინიციატივით, თელავში თვითმმართველობის კოდექსში შესატან ცვლილებებზე იმსჯელეს. დისკუსიას ადგილობრივი არასამთავრობო ორგანიზაციებისა და თვითმმართველობის წარმომადგენლები ესწრებოდნენ. ,,სამოქალაქო კულტურის საერთაშორისო ცენტრის" გამგეობის თავმჯდომარის, კოტე კანდელაკის განცხადებით, შეხვედრის მიზანს წარმოადგენდა აღნიშნული კანონპროექტში შესატან ცვლილებებთან დაკავშირებით მოსახლეობის ინფორმირება. ,,ვიმსჯელეთ თვითმმართველობის კანონის ერთ-ერთ თავში, ,,მოქალაქეთა მონაწილეობის დამატებითი ფორმების შესახებ’’ ცვლილებების შეტანის თაობაზე, რომელიც ითვალისწინებს მრავალ ახალ დამატებით ფორმას. მოქალაქეებს შეეძლებათ აქტიურად ჩაერთონ, მიიღონ მონაწილეობა ადგილობრივი თვითმმართველობის საქმიანობაში. ვიდრე აღნიშნული კანონპროექტი პარლამენტში განსახილველად შევა, ვხვდებით მოსახლეობას რათა მოვისმინოთ მათი მოსაზრებები და შენიშვნები, რის შემდეგაც პარლამენტს კანონპროექტის განხილვების პროცესში მივაწვდით აღნიშნულ ინიციატივებს რათა მივიღოთ სრულყოფილი კანონი’’, განაცხადა კოტე კანდელაკმა.

სამცხე-ჯავახეთი. 25 მაისს, ახალციხის დემოკრატიული ჩართულობის ცენტრში საზოგადოებას ვებპორტალი გააცნეს, რომლის საშუალებითაც მათ შეუძლიათ მათივე არჩეული საკრებულოს წევრის მუშაობას დააკვირდნენ და ასევე, შეაფასონ საკრებულოს გადაწყვეტილებები. ვებპორტალზე Shenmartav.ge–ზე თავმოყრილია საქართველოს პარლამენტის, აჭარის ავტონომიური რესპუბლიკის უმაღლესი საბჭოსა და ოთხი თვითმმართველი ქალაქის: ახალციხის, ბათუმის, გორისა და რუსთავის მუნიციპალიტეტის საკრებულოს საქმიანობა. მათი მონიტორინგი „მშვიდობის, დემოკრატიისა და განვითარების კავკასიურმა ინსტიტუტმა" ოთხ რეგიონულ პარტნიორ არასამთავრობო ორგანიზაციასთან ერთად დაიწყო. ვებპორტალზე ახალციხის საკრებულოს გვერდს „დემოკრატ მესხთა კავშირი" მართავს. პროექტი ხორციელდება ორგანიზაცია „ევროპული პარტნიორობა დემოკრატიისათვის" და პრესის თავისუფლების პროგრამის მხარდაჭერით, რომელსაც აფინანსებს ნიდერლანდების სამეფოს მთავრობა. ვებ პორტალის პრეზენტაცია უკვე გაიმართა ბათუმში, გორსა და რუსთავში.

აჭარა. სამოქალაქო მრჩეველტას საბჭოსა და ბათუმის საკრებულოს ერთობლივი ორგანიზებით, 2016–2019 წლების პრიორიტეტების საჯარო განხილვა დასრულდა. საჯარო შეხვედრები ბათუმის დემოკრატიული ჩართულობის ცენტრში სამი დღის განმავლობაში მიმდინარეობდა. ადგილობრივი ხელისუფლების მიერ მომზადებული პრიორიტეტები საზოგადოებრივი დარბაზებისა და სამოქალაქო მრჩეველთა საბჭოს წევრებმა, ასევე ახალგაზრდებმა მოისმინეს. არსებული პრიორიტეტების შესახებ დამსწრეებმა გარკვეული შენიშვნები და მოსაზრებები წარადგინეს. ამჟამად მიმდინარეობს პრობლემებისა და ინიციატივების შესწავლა და ანალიზი. აღნიშნული პროცესის დასრულების შემდეგ სამოქალაქო მრჩეველთა საბჭო წერილობით რეკომენდაციას მოამზადებს და მერიის შესაბამის სამსახურებს წარუდგენს.

სამცხე-ჯავახეთი. 8 მაისს ახალციხეში, ასოციაცია „ტოლერანტისა" და ახალციხის დემოკრატიული ჩართულობის ცენტრის ორგანიზებით ლექცია–სემინარი გაიმართა: „ძლიერი სოფელი – ძლიერი სახელმწიფო". სამოქალაქო საზოგადოების წარმომადგენლებმა, ფერმერებმა და სოფლის რწმუნებულებმა სოფლებში არსებული პრობლემები განიხილეს. გამოცდილების გაზიარების მიზნით, შეკრებილებს, საფრანგეთში მომზადებული რეპორტაჟებიც აჩვენეს, სადაც მცირე ბიზნესით დასაქმებული ადამიანების პრობლემები იყო განხილული. ლექციის ბოლოს, მონაწილეებმა სპეციალური კითხვარები შეავსეს. პროექტის ხელმძღვანელები ამ კითხვარის საშუალებით გაიგებენ, რა პრობლემები არსებობს სოფლებში და როგორია ეკონომიკური პოტენციალი. „ძლიერი სოფელი - ძლიერი სახელმწიფო", 2014 წლის „მომავლის სოფელის" ლექციების ციკლის გაგრძელებაა. ლექცია-დებატების ფორმატი ხელს უწყობს როგორც ინფორმაციის გაცვლას, ასევე აადვილებს სოფლის მაცხოვრებელთა ინტერაქტიულ დიალოგში ჩართვას და ბიზნეს ინიციატივების იდეების გარშემო გახსნილ საუბარს.

კახეთი. რადიო „ჰერეთმა" ევრაზიის თანამშრომლობის ფონდის და შვედეთის განვითარების სააგენტოს (SIDA) მხარდაჭერით, ახალი პროექტი დაიწყო. პროექტი ითვალისწინებს რადიო ბლოგების საშუალებით მოქალაქეების მიერ თვითმმართველობის ეფექტიან მონიტორინგს. პროექტის მიზანია კონკურსის წესით შერჩეულმა მოქალაქეებმა ინოვაციური ფორმატის, რადიო ბლოგის საშუალებით ხელი შეუწყო კახეთის მუნიციპალიტეტებში არსებული პრობლემების იდენტიფიცირებას. პროექტის ფარგლებში, 8 თვის განმავლობაში რადიოსადგური კახეთში 10 ბლოგერს მოამზადებს. ისინი მომზადდებიან სოციალური მედიის, გენდერისა და რადიო რეპორტინგის საკითხებში. ბლოგერები შექმნიან 70-ზე მეტ რადიო ბლოგს საკუთარ მუნიციპალიტეტებში არსებულ და მიმდინარე მოვლენებზე, რომელიც გადაცემა რადიო ბლოგის სახით „ჰერეთის" ეთერში გავა და განთავსდება ვებგვერდსა თუ სოციალურ ქსელებში.

კახეთი. ჩეხეთის არასამთავრობო ორგანიზაციამ „აგორამ", თელავში შეხვედრა გამართა. შეხვედრას ადგილობრივი და საერთაშორისო ორგანიზაციების და სამთავრობო სტრუქტურების წარმომადგენლები ესწრებოდნენ, სადაც ისაუბრეს განსახორციელებელ პროექტებზე. ორგანიზაციის წარმომადგენლების თქმით, პროექტის ფარგლებში დაგეგმილია კომიტეტის შექმნა, რომელშიც გაერთიანდებიან მერიის, არასამთავრობო ორგანიზაციების წარმომადგენლები და თელავის აქტიური საზოგადოების წევრები. მათივე თქმით, აღნიშნული პროექტის მიზანია ადგილობრივი მოსახლეობის ჩართვა და გააქტიურება ქალაქში მიმდინარე პროექტებსა და პროცესებში.

კახეთი. 2 და 3 მაისს საქველმოქმედო ჰუმანიტარული ცენტრი „აფხაზეთის" ორგანიზებით სასტუმროში „კაჭრეთის ამბასადორი" ორდღიანი ტრენინგები გაიმართა, რომელსაც ქ. ზუგდიდის მერიის, ბორჯომისა და კასპის მუნიციპალიტეტებისა და გამგეობის და, ასევე, საქართველოს პარლამენტის რეგიონული პოლიტიკისა და თვითმმართველობის კომიტეტის წარმომადგენლები დაესწრნენ. ტრენინგის თემა იყო -თვითმმართველობების როლი ამხანაგობების განვითარებაში" და მიზნად ისახავდა ადგილობრივი თვითმმართველობების შესაძლებლობების გაზრდას, ამხანაგობის ინსტიტუტის განვითარებას. სრულად... წყარო: ორგანიზაციის ვებ-გვერდი სოციალურ ქსელში

გურია. 29 აპრილს, „საქართველოს დემოკრატიული განვითარების კავშირის" ინიციატივით, ოზურგეთის „დემოკრატიული ჩართულობის ცენტრში" საზოგადოებრივი ცოდნის გაძლიერებისა და საზოგადოებრივი ორგანიზაციების ჩართულობის მიზნით რეგიონულ დაგეგმარებაში, შეხვედრა გაიმართა. შეხვედრაზე წარმოდგენილი იყო ქალაქ ოზურგეთის განვითარების 3 წლიანი სტრატეგია. შეხვედრის მიზანი კი საზოგადოების ჩართულობაა, რომლის დროსაც შესაძლოა ახალი პროექტი იშვას და იგი აისახება დოკუმენტში. „თუ კი რამ ახალი ინიციატივა იქნება მოსახლეობაში, ჩვენ გთავაზობთ, რომ ვიქნებით შუამავალი რგოლი საზოგადოებასა და ხელისუფლებას შორის, მზად ვართ ყველა ახალი ინიციატივა ვაქციოთ მცირე პროექტად, ჩვენ მას კომპლექსურად დავამუშავებთ და მივაწვდით ხელისუფლებას გეგმაში ცასადებად", აღნიშნა შეხვედრაზე ლევან ხინთიბიძემ.

აჭარა. 29 აპრილს ბათუმში მაჟორიტარი პარლამენტის წევრების ბიუროების თანამშრომლებისთვის „საერთაშორისო გამჭვირვალობა – საქართველოს" წარმომადგენლები საქართველოს საბიუჯეტო სისტემაზე ტრენინგს ატარებენ. ტრენინგის თემებია: პარლამენტის საბიუჯეტო ზედამხედველობა, სახელმწიფო და ადგილობრივი ბიუჯეტების დაგეგმვა და შესრულება. ამავე შინაარსის ტრენინგი აღმოსავლეთ საქართველოს ოლქების წარმომადგენელი დეპუტატების ბიუროების თანამშრომლებისთვის თბილისში 1 მაისს გაიმართება. სრულად... წყარო: ორგანიზაციის ვებ-გვერდი სოციალურ ქსელში

იმერეთი. 28 აპრილს, ქუთაისის განათლების განვითარების და დასაქმების ცენტრის ორგანიზებით, პროექტის ,,ეს მუშაობს’’ ფარგლებში აკაკი წერეთლის სახელმწიფო უნივერსიტეტში გაიმართა მოსახლეობის ფორუმი. მოსახლეობის ფორუმში მონაწილეობა მიიღო ქუთაისში მცხოვრებმა 150 სხვადასხვა სოციალური სტატუსის მქონე პირმა, მათ შორის – დასაქმებულები, სამსახურის მაძიებლები, დიასახლისები, მრავალშვილიანი დედები, სოციალურად დაუცველი, შეზღუდული შესაძლებლობების მქონე, იძულებით გადაადგილებული პირები, აქტიური მოქალაქეები, რომლებმა იმსჯელეს ქალაქის ინფრასტრუქტურულ, ახალგაზრდულ საკითხებსა და კულტურის სფეროში არსებულ პრობლემებზე. განსაზღვრეს 2016 წლის ბიუჯეტის პრიორიტეტები. სრულად... წყარო: ორგანიზაციის ვებ-გვერდი სოციალურ ქსელში

გურია. 24 აპრილს ოზურგეთის დემოკრატიული ჩართულობის ცენტრის ორგანიზებით გაიმართა საჯარო დისკუსია ქალაქ ოზურგეთში ადმინისტრაციული ხარჯების შესახებ. დისკუსიაში მონაწილეობა მიიღეს ქალაქ ოზურგეთის საკრებულოს თავმჯდომარემ გელა კობალაძემ, საქართველოს დემოკრატიული განვითარების კავშირის თავმჯდომარემ ლევან ხინთიბიძემ და საქართველოს პატრიოტთა ალიანსის წარმომადგენელმა, ქალაქ ოზურგეთის მუნიციპალიტეტის საკრებულოს წევრმა გოჩა ძიმისტარიშვილმა. დისკუსიაში აგრეთვე მონაწილეობდნენ არასამთავრობო ორგანიზაციებისა და პოლიტიკური პარტიების წარმომადგენლებმა, ჟურნალისტებმა და მოქალაქეებმა.

კავკასიის ეკონომიკური და სოციალური კვლევითი ინსტიტუტის ექსპერტებმა ტრენინგები გამართეს მარტვილისა და სამტრედიის მუნიციპალიტეტებში საფინანსო–საბიუჯეტო საკითხებზე. აქტივობა განხორციელდა პროექტის ფარგლებში - „საბიუჯეტო პროცესების მონიტორინგი ადგილობრივი თვითმმართველობის გამჭვირვალობისათვის". პროექტი ითვალისწინებს თვითმმართველობის გამჭვირვალობის ეფექტიანობის ხელშეწყობას. კერძოდ, დასავლეთ საქართველოში, სამტრედიისა და მარტვილის მუნიციპალიტეტებში, საფინანსო-საბიუჯეტო საკითხების მონიტორინგის განხორციელებას აღნიშნულ მუნიციპალიტეტებში არსებულ არასამთავრობო ორგანიზაციებთან გამოცდილების გაზიარებისა და მათთან პარტნიორობის გზით. პროექტი ხორციელდება დემოკრატიის მხარდაჭერის ეროვნული ფონდის (NED) ფინანსური მხარდაჭერით და მისი ხანგრძლივობა შეადგენს 9 თვეს. სრულად... წყარო: ciesr.org

იმერეთი. „ღია თვითმმართველობა" – ეს არის მოდელირებული, სიმულაციური თამაში ახალგაზრდებისთვის, რომლებიც პრობლემების მოძიებისა და გადაწყვეტილების გზების ძიების პროცესში არიან ჩართულნი. მას ქუთაისში არასამთავრობო ორგანიზაცია „თაობათა დიალოგი" ახორციელებს. პროექტის ფარგლებში, ახალგაზრდების მონაწილეობით შეიქმნა, ქუთაისის ახალგაზრდული საკრებულო, რომლის ფარგლებში დებატები გაიმართა ახალგაზრდული საკრებულოს თავმჯდომარეობის კანდიდატებს შორის. ღონისძიებას ესწრებოდნენ სხვადასხვა პარტიის წარმომადგენლები და მაყურებელსაც შეეძლო მისი თვალყურის დევნება. მორიგი დებატები 24 აპრილს გაიმართება. წყარო: თაობათა დიალოგის ვებგვერდი სოციალურ ქსელში

აჭარა. 17 აპრილს, ბათუმის საკრებულოს სხდომათა დარბაზში, საკრებულოს საფინანსო და ეკონომიკური განვითარების კომისიისა და სამოქალაქო მრჩეველთა საბჭოს ერთობლივი ორგანიზებით შეხვედრა გაიმართა. სადაც 2014 წლის ბიუჯეტის შესრულების ანგარიში მოისმინეს. 2014 წლის შესრულებული სამუშაოების შესახებ ინფორმაცია საკრებულოს ვიცე– მერმა და მერიის საფინანსო ეკონომიკური სამსახურის უფროსის მოადგილემ წარუდგინეს. თუ როგორ და რამდენით შესრულდა ანგარიში, რა ნაკლოვანებები იყო წინა წელს და რა არის გასათვალისწინებელი მომავალი წლის ბიუჯეტის დაგეგმარებისას ამ და სხვა საკითხებზე კომისიის წევრებმა არასამთავრობო ორგანიზაციებთან ერთად იმსჯელეს. ადგილობრივი თვითმმართველობის კოდექსის თანახმად, აღმასრულებელი ორგანო ვალდებულია მიმდინარე წლის პირველ მაისამდე წარუდგინოს საკრებულოს გასული წლის ბიუჯეტის ანგარიში.

თბილისი. 17 აპრილს, არასამთავრობო ორგანიზაცია სამოქალაქო განვითარების სააგენტოს (სიდას) ორგანიზებით, 50-მდე რეგიონული არასამთავრობო ორგანიზაციის წარმომადგენელმა საერთაშორისო ორგანიზაციების წარმომადგენლებთან ერთად საქართველოს რეგიონებში შექმნილი ვითარება განიხილეს. კერძოდ შეხვედრაზე განიხილეს თვითმმართველობისა და რეგიონული მმართველობის საკითხები, არასამთავრობო სექტორის წინაშე არსებული გამომწვევები. შეხვედრა გაიმართა აღმოსავლეთ–დასავლეთის მართვის ინსტიტუტის (EWMI) ACCESS-ის პროექტის ფარგლებში, რომელიც დაფინანსებულია ამერიკის შეერთებული შტატების საერთაშორისო განვითარების სააგენტოს (USAID) მიერ. სამუშაო შეხვედრა ჩატარდა ფონდი „ღია საზოგადოება - საქართველოს" ფინანსური მხარდაჭერით. სრულად... წყარო: სიდას ვებგვერდი სოციალურ ქსელში

კახეთი. სიღნაღში, არასამთავრობო ორგანიზაციის „რეგიონის განვითარების ცენტრის" ინიციატივით გაიმართა მუნიციპალიტეტში კულტურის სფეროში მიმდინარე პროექტების განხილვა. შეხვედრას ესწრებოდნენ არასამთავრობო სექტორის წარმომადგენლები, სტუდენტები და აქტიური ახალგაზრდები. შეხვედრა დიალოგის რეჟიმში მიმდინარეობდა და განიხილეს სიღნაღის მუნიციპალიტეტში მიმდინარე კულტურული პროექტები და სამომავლო გეგმებზე ისაუბრეს. აღნიშნული ღონისძიების მიზანია ახალგაზრდების ჩართვა დემოკრატიულ პროცესებში, სამუშაო შეხვედრებსა და მათ მიერ დაგეგმილი პროექტის განხორციელების საშუალებით ჩამოყალიბდეს მოქალაქეთა ჩართულობის მაგალითები და ფორმები.

კახეთი. თელავის დემოკრატიული ჩართულობის ცენტრში, არასამთავრობო ორგანიზაციამ „თელავი ჩემი ქალაქია" შეხვედრა გამართა, რომელსაც არასამთავრობო ორგანიზაციებისა და ადგილობრივი თვითმმართველობის წარმომადგენლები ესწრებოდნენ. შეხვედრის მიზანს თელავის მერიასთან ერთად ქალაქის განვითარებისთვის სამომავლო გეგმების დასახვა და არსებული პრობლემების განხილვა იყო. ,,შეხვედრის მიზანი ადგილობრივი მნიშვნელობის საკითხებზე მსჯელობა და ერთობლივად სამომავლო მიზნების დასახვა იყო. ქალაქის მერს გავაცანით ახლადდაფუძნებული ორგანიზაციის მუშაობის ძირითადი მიმართულებები, ხედვები და ინიციატივები", განაცხადა არასამთავრობო ორგანიზაცია ,,თელავი ჩემი ქალაქის’’ დამფუძნებელმა თამარ ლაზარიაშვილმა.

აჭარა. 1 აპრილს, სამოქალაქო საზოგადოების ინსტიტუტის ბათუმის ფილიალმა მორიგი ტრენინგი ჩაატარდა. ამჯერად ფილიალის ხელმძღვანელმა ახალგაზრდებს საჯარო პოლიტიკის შესახებ ესაუბრა, კერძოდ კი, განხილეს პრობლემის იდენტიფიცირებისა და მისი გადაჭრის გზების ძიების საკითხები. თეორიული მასალის გაცნობის გარდა, ტრენინგის მონაწილეებმა კონკრეტულ მაგალითებზე იმუშავეს. ასევე თვითონ განსაზღვრეს მუნიციპალიტეტის წინაშე არსებული რამდენიმე პრობლემა და ჯგუფური მუშაობის შედეგად, მათი პრეზენტაცია გააკეთეს. ტრენინგის ბოლოს ახალგაზრდებმა რამდენიმე მიმართულება შეარჩიეს, ასევე შექმნეს სამუშაო ჯგუფები და დაიწყეს მუშაობა სარეკომენდაციო დოკუმენტის შესამუშავებლად და ბათუმის საკრებულოსთვის წარსადგენად.

აჭარა. შუახევის მუნიციპალიტეტში, არასამთავრობო ორგანიზაციამ „ადამიანი, კანონი, თავისუფლებამ” პროექტის ფარგლებში „ახალგაზრდული საკრებულო'' ჩამოაყალიბა. რომელიც მაღალი აკადემიური მოსწრების XI-XII კლასის მოსწავლეებით დაკომპლექტდა. პროექტის მიზანია ახალგაზრდებში სამოქალაქო დონის ამაღლება, აქტიურ მოქალაქეებად ჩამოყალიბება და გათვიცნობიერება ადგილობრივი თვითმმართველობის საქმიანობაში. შერჩეული ახალგაზრდები 6 თვის განმავლობაში გაივლიან ტრენინგებს და გაეცნობიან თვითმმართველობითი ორგანოს მმართველობის სტრუქტურას. მსგავსი პროექტი ქვეყნის მასშტაბით 64 მუნიციპალიტეტში ხორციელდება.

თბილისი. ორგანიზაცია „ახალგაზრდა ადვოკატები" სამგორის მუნიციპალიტეტის გამგეობას წინადადებით მიმართავს, მუნიციპალიტეტის თვითმმართველობაში, საკადრო პოლიტიკას განსაკუთრებული ყურადღება მიაქციოს. კადრები, „რომლებიც 2003-2012 წლების მმართველობის პერიოდში, აქტიურად მონაწილეობდნენ ადამიანის უფლებების დარღვევის ფაქტებში, სათანადო შესწავლისა და რეაგირების გარეშე არ დარჩეს". სრულად... წყარო: barristers.ge