თბილისი. 23 იანვარს, პროექტის ,,საზოგადოების ცოდნის გაძლიერება და სამოქალაქო საზოგადოების ჩართვა რეგიონულ დაგეგმარებაში" პრეზენტაცია გაიმართა, რომელსაც გაეროს განვითარების პროგრამის (UNDP) მხარდაჭერით ახორციელებს „სიდა" და სამოქალაქო საზოგადოებრივი ორგანიზაციების რეგიონული ქსელი (R-CSN). პროექტის ფარგლებში, ადგილობრივი სამოქალაქო საზოგადოებრივი ორგანიზაციების მხარდაჭერით, შესაძლებელი გახდება მოსახლეობის ინფორმირებულობის გაზრდა და ჩართვა ფართო კონსულტაციებში 2016–2018 წლების რეგიონების განვითარების სტრატეგიის სამოქმედო გეგმის ფორმირებაში 6 რეგიონის მასშტაბით: ქვემო ქართლი, გურია, სამეგრელო–ზემო სვანეთი, იმერეთი, რაჭა–ლეჩხუმი–ქვემო სვანეთი, მცხეთა–მთიანეთი. პროექტის აქტივობების საფუძველზე გაიზრდება სამიზნე რეგიონების მოსახლეობის ცნობიერება დაგეგმარების პროცესებში ჩართულობის მნიშვნელობისა და აუცილებლობის შესახებ. პროექტი ხორციელდება „რეგიონული და ადგილობრივი განვითარების გაძლიერების" პროგრამის ფარგლებში, შვეიცარიის განვითარების სააგენტოსა (SDC) და ავსტრიის განვითარების სააგენტოს (ADA) დაფინანსებით. წყარო: ორგანიზაციის ვებგვერდი სოციალურ ქსელში

შიდა ქართლი. გორის მუნიციპალიტეტის გამგებლის დავით ონიაშვილის განცხადებით გორის რაიონის სოფლებში შეიქმნება ახალგაზრდული ცენტრები, რომლებიც ახალგაზრდების პრობლემების მოგვარებაზე იზრუნებენ და აქტიურად ითანამშრომლებენ გორის ახალგაზრდული თვითმმართველობის ჯგუფთან. ამის შესახებ ონიაშვილმა გორის ახალგაზრდული თვითმმართველობის წევრებთან შეხვედრისას განაცხადა. შეხვედრა არასამთავრობო ორგანიზაციის „მეგობრობის ხიდი ქართლოსის" პროექტის ,,ახალგაზრდების ჩართულობის გაძლიერება რეგიონულ დონეზე საქართველოში" –ფარგლებში შედგა, სადაც ახალგაზრდებმა იმ პრობლემებზე ისაუბრეს, რომელიც სოფლად მცხოვრებ მოსახლეობას აწუხებს. სრულად... წყარო: qartlosi.org

კახეთი. 21 იანვარს არასამთავრობო ორგანიზაციის ,,თელავის საზოგადოებრივი დარბაზის" ორგანიზებით, ქალაქში არსებულ პრობლემებზე დისკუსია გაიმართა. ორგანიზაციის წევრების გადაწყვეტილებით, შეიქმნა სამუშაო ჯგუფი, რომელიც მერიასთან ერთად პრობლემების გამოვლენასა და მოგვარებაზე იმუშავებს: ,,ჩვენი ორგანიზაცია მერიასთან ერთად იმუშავებს ქალაქში არსებული პრობლემების გამოვლენისა და მისი გადაჭრის გზების ძიებაზე. დაგეგმილი გვაქვს მოსახლეობასთან კონსულტაციები და გვინდა, რომ ჩვენი აქტიური საქმიანობით უკეთესობისკენ შევცვალოთ ქალაქში არსებული მდგომარეობა", აცხადებს ,,თელავის საზოგადოებრივი დარბაზის" ხელმძღვანელი ჯუმბერ სახეიშვილი.

თბილისი. კავკასიის ეკონომიკური და სოციალური კვლევითი ინსტიტუტი (CIESR) ოქტომბრიდან ახორციელებს პროექტს „საბიუჯეტო პროცესების მონიტორინგი ადგილობრივი თვითმმართველობის გამჭვირვალობისათვის".პროექტი ითვალისწინებს თვითმმართველობის გამჭვირვალობის ეფექტიანობის ხელშეწყობას. კერძოდ, დასავლეთ საქართველოში, სამტრედიისა და მარტვილის მუნიციპალიტეტებში, საფინანსო-საბიუჯეტო საკითხების მონიტორინგის განხორციელებას აღნიშნულ მუნიციპალიტეტებში არსებულ არასამთავრობო ორგანიზაციებთან გამოცდილების გაზიარებისა და მათთან პარტნიორობის გზით.პროექტი ხორციელდება დემოკრატიის მხარდაჭერის ეროვნული ფონდის  (NED) ფინანსური მხარდაჭერით და მისი  ხანგრძლივობა შეადგენს 9 თვეს.

თბილისი. საქართველოს ახალგაზრდა ეკონომისტთა ასოციაციამ ქობულეთის ბიუჯეტის ანალიზი გამოაქვეყნა. ანგარიში მოიცავს ქობულეთის მუნიციპალიტეტის 2014 წლის ბიუჯეტის პროექტის და კვარტალური შესრულებების ანალიზს. ანგარიშში გაანალიზებულია 2014 წლის ბიუჯეტის პრიორიტეტები, დაგეგმილი/შესრულებული შემოსავლები და ხარჯები. ანგარიშის მიზანს წარმოადგენს გაანალიზოს და რეკომენდაციები მისცეს მხარჯავ დაწესებულებას. ქობულეთის ბიუჯეტის ანგარიში... წყარო: economists.ge

თბილისი. „სამართლიანი არჩევნებისა და დემოკრატიის საერთაშორისო საზოგადოებამ" განცხადება გაავრცელა. „ხელვაჩაურის მუნიციპალიტეტის საკრებულოში ვაკანტურ პოზიციაზე კონკურსანტების დანიშვნასთან დაკავშირებით გამოვლენილ პრობლემურ საკითხზე „სამართლიანი არჩევნების" რეაგირებამ შედეგი გამოიღო. ...მიგვაჩნია, რომ თვითმმართველობაში მიმდინარე საკადრო ცვლილებებისას არასამთავრობო სექტორის რეკომენდაციების გათვალისწინება პოზიტიური მოვლენაა, რაც ხელს უწყობს პროცესის სამართლიანად და გამჭვირვალედ წარმართვას", ნათქვამია ორგანიზაციის ვებ-გვერდზე. სრულად... წყარო: www.isfed.ge

თბილისი. ფონდ „ღია საზოგადოება საქართველოსა" (OSGF) და თბილისი საბურთალოს რაიონის გამგეობის მხარდაჭერით, სამოქალაქო საზოგადოების ინსტიტუტი ახორციელებს პროექტს რომლის ფარგლებშიც ყალიბდება საზოგადოებრივი - საკონსულტაციო საბჭო საბურთალოს რაიონის გამგეობასთან. საბჭო წარმოადგენს ადგილობრივი თვითმმართველობის საქმიანობაში მოქალაქეთა ჩართულობის მექანიზმს, რომელიც საშუალებას მისცემს მოქალაქეებს, მედია, ბიზნეს და საზოგადოებრივ ორგანიზაციებს ჩაერთონ რაიონის და ქალაქის მართვაში, მონაწილეობა მიიღონ მოქალაქეთათვის მნიშვნელოვანი ადგილობრივი საკითხების გადაწყვეტაში, წარადგინონ თავიანთი წინადადებები და მოსაზრებები გამგეობის წინაშე. საბჭო დაკომპლექტდება 21 წევრით, შემდეგი განაწილებით: 10 - საბურთალოს რაიონის ტერიტორიაზე მაცხოვრებელი მოქალაქე 2 - ბიზნეს ორგანიზაციის წარმომადგენელი; 2- მედია ორგანიზაციის წარმომადგენელი; 2 - საზოგადოებრივი ორგანიზაციის წარმომადგენელი. სულ შეიქმნება 3 ასეთი საბჭო. საბჭოს საქმიანობაში ჩართვით დაინტერესებულ ორგანიზაციებს გთხოვთ, დაგვიკავშირდეთ: ტელეფონი: 577949829, ელ–ფოსტა: archil@civilin.org დამატებითი ინფორმაცია პროექტის შესახებ შეგიძლიათ იხილეთ ბმულზე: http://civilin.org.

თბილისი. 24 დეკემბერს, ფონდმა „ღია საზოგადოება საქართველომ" და თვითმმართველობის თემაზე მომუშავე არასამთავრობო ორგანიზაციებმა გამართეს ღონისძიება „თვითმმართველობის რეფორმის გამოწვევები - თვითმმართველობაში მოქალაქეთა მონაწილეობის პერსპექტივები". შეხვედრაზე ისაუბრეს საქართველოს ორგანულ კანონში ,,ადგილობრივი თვითმმართველობის კოდექსის" ცვლილების პროექტის შესახებ, რომელიც თვითმმართველობაში მოქალაქეთა მონაწილეობის მექანიზმების გაუმჯობესებას და სოფლის საზოგადოებრივი დარბაზების შექმნას ითვალისწინებს. ასევე, გაიმართა პროექტის „თვითმმართველობაში მოქალაქეთა მონაწილეობის დამატებითი ფორმების შექმნის ხელშეწყობის" ფარგლებში ჩატარებული სამუშაოების შედეგების პრეზენტაცია. პროექტი მიზნად ისახავს მოქალაქეების, სათემო და არასამთავრობო ორგანიზაციების, ადგილობრივი ხელისუფლების წარმომადგენლების მაქსიმალური ჩართულობისა და მათთან კონსულტაციების გზით თვითმმართველობაში მონაწილეობის დღეს არსებული მექანიზმების გადახედვას და „მოქალაქეთა მონაწილეობის დამატებითი ფორმების შექმნის" შესახებ ახალი კანონპროექტის მომზადებას, რომელიც დეკემბერის ბოლოს განსახილველად წარედგინება საქართველოს ხელისუფლებას. ადგილობრივ ორგანოებსა და მოსახლეობას შორის კავშირის გაძლიერებისა და თვითმმართველობის განხორციელებაში მოსახლეობის ჩართულობის გაზრდის ხელშეწყობის მიზნით, აღნიშნული პროექტის ფარგლებში, ცხრამეტმა არასამთავრობო ორგანიზაციამ ქვეყნის ყველა რეგიონის ქალაქებსა და სოფლებში 200-ზე მეტი საკონსულტაციო შეხვედრა და მრგვალი მაგიდა ჩაატარა. სრულად... წყარო: droa.ge

თბილისი. ამ წუთებში სასტუმრო „თბილისი მარიოტში" ფონდი „ღია საზოგადოება საქართველო" და თვითმმართველობის თემაზე მომუშავე არასამთავრობო ორგანიზაციები მართავენ ღონისძიებას „თვითმმართველობის რეფორმის გამოწვევები - თვითმმართველობაში მოქალაქეთა მონაწილეობის პერსპექტივები". შეხვედრაზე ასევე გაიმართება პროექტის „თვითმმართველობაში მოქალაქეთა მონაწილეობის დამატებითი ფორმების შექმნის ხელშეწყობის" პროექტის ფარგლებში ჩატარებული სამუშაოების შედეგების პრეზენტაცია. წყარო: ვებგვერდი „თვითმმართველობის დროა"

შიდა ქართლი. საზოგადოება „ბილიკის" ორგანიზებით, ქალაქ გორის მუნიციპალიტეტის მერი გორის მუნიციპალიტეტის სოფლების ბერშუეთის, სვენეთი, გარეჯვრის და ძევერის საჯარო სკოლის მოსწავლეებს შეხვდა. მოსწავლეებმა მერს მათთვის საინტერესო შეკითხვები დაუსვეს. მოსწავლეების ძირითადი ინტერესი მერის ფუნქციებს, მის სამუშაო გრაფიკს, სამომავლო პროექტებს ეხებოდა. გორის მერმა ისაუბრა ასევე 2015 წელს დაგეგმილი პროექტების შესახებაც. მან მოსწავლეებს მიაწოდა მოკლე ინფორმაცია ადგილობრივ თვითმმართველი ორგანოების შესახებ, ასევე განმარტა უკანასკნელი არჩევნების პროცესი და მის შემდგომ არსებული ვითარება. მერმა მოსწავლეებთან შეხვედრაზე რამდენიმე სიახლეზეც ისაუბრა. მისი განცხადებით, ახალ წელს, გორის ცენტრში საბავშვო ატრაქციონები მოეწყობა და ამასთან ერთად სხვადასხვა ღონისძიებებით ადგილობრივებს საახალწლო განწყობას შეუქნიან. შეხვედრის ორგანიზატორი იყო ორგანიზაცია „ბილიკი", რომელიც პროგრამის „მომავლის თაობის" პატნიორი არასამთავრობო ორგანიზაციაა შიდა ქართლის რეგიონში.

თბილისი. 23 დეკემბერს, სასტუმრო „ქორთიარდ" მარიოტში" გაიმართა თბილისის მერიის ვებპორტალის კონცეფციის პრეზენტაცია. რომელიც გულისხმობს თბილისის ამჟამინდელი ვებგვერდის ჩანაცვლებას უფრო გამჭვირვალე და ღია ვებპორტალით, იგი მოქალაქეებს მისცემს საშუალებას მიიღონ ყველა საჭირო ინფორმაცია, დაუკავშირდნენ მერს, დაუსვან კითხვები მათთვის საინტერესო უწყებებს, მიიღონ პასუხები, შეაფასონ გამგეობების მუშაობა და ჩაერთონ გადაწყვეტილების პროცესში. ვებპორტალის კონცეფციის პრეზენტაცია და განხილვა გაიმართა პროექტის „თბილისის მერიაში გამჭვირვალობისა და ანგარიშვალდებულების ახალი სტანდარტების დანერგვის ხელშეწყობის" ფარგლებში, ინფორმაციის თავისუფლების განვითარების ინსტიტუტის. ფონდ „ღია საზოგადოება საქართველოს" მხარდაჭერითა და თბილისის მერიასთან პარტნიორობით გაიმართა. სრულად... წყარო: ფონდ „ღია საზოგადოება საქართველოს" ვებგვერდი

თბილისი. საერთაშორისო გამჭვირვალობა – საქართველომ მიხეილ კუკავას ბლოგპოსტი გამოქვეყნა: „2015 წლის თბილისის ბიუჯეტი: სიახლეები და პრობლემები". „19 დეკემბერს თბილისის საკრებულომ დედაქალაქის 2015 წლის ბიუჯეტი დაამტკიცა. ბიუჯეტის თავდაპირველ ვერსიასთან შედარებით საბოლოო ვერსიაში არაერთი ცვლილება შევიდა, განსაკუთრებით – ჯანმრთელობის და სოციალური უზრუნველყოფის მიმართულებით. 2015 წელს დედაქალაქის შემოსავლები 2014 წელთან შედარებით 47.59 მილიონი ლარით იზრდება (7.2 პროცენტი), ხოლო ხარჯები – 38.15 მილიონი ლარით (5.78 პროცენტი)", ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საერთაშორისო გამჭვირვალობა – საქართველო უახლოეს მომავალში გამოაქვეყნებს სამართლებრივ ანალიზს მუნიციპალიტეტებში არსებული პრემიების წესის შესახებ. მანამდე ორგანიზაცია ზუგდიდის მუნიციპალიტეტის მიერ ამავე საკითხზე მიღებულ გადაწყვეტილებაზე ინფორმაციას აქვეყნებს. „16 დეკემბერს გამართულ სხდომაზე თვითმმართველი თემი ზუგდიდის მუნიციპალიტეტის საკრებულომ, მთავრობის კანცელარიის ზედამხედველობის სამსახურის დასკვნის საფუძველზე, პრემიების გაცემის მანამდე სამაგალითო წესში ცვლილებები შეიტანა. აღსანიშნავია, რომ ცვლილებას მხარი დაუჭირეს საკრებულოს როგორც უმრავლესობის, ისე – უმცირესობის წარმომადგენელმა წევრებმა. ... ზუგდიდის მუნიციპალიტეტის საკრებულოს მიერ მიღებული საბოლოო გადაწყვეტილება არის კიდევ ერთი ნიშანი იმისა, რომ დეცენტრალიზაციის პროცესი ქვეყანაში ძალიან ნელა მიმდინარეობს, მთავრობა უხეშად ერევა მუნიციპალიტეტების საქმიანობაში, ადგილობრივი თვითმმართველობის ორგანოები კი დამოუკიდებლად ვერ იღებენ გადაწყვეტილებებს თავიანთ ექსკლუზიურ უფლებამოსილებებთან დაკავშირებულ საკითხებზე", ნათქვამია ორგანიზაციის ვებგვერდზე. სრულად... წყარო: transparency.ge

აჭარა. 16 დეკემბერს, ბათუმის შოთა რუსთაველის სახელმწიფო უნივერსიტეტში, სამოქალაქო საზოგადოების ინსტიტუტის წარმომადგენელმა ახალგაზრდებს სატრენინგო კურსის შესახებ ინფორმაცია მიაწოდა. სატრენინგო კურსის მიზანი, ახალგაზრდებში სამოქალაქო ცნობიერების ამაღლება და მათში მოქალაქეობრივი პასუხისმგებლობის დონის ზრდა. ტრენინგები ოთხი ძირითადი მიმართულებით გაიმართება: ადგილობრივი თვითმმართველობა და მოქალაქეთა მონაწილეობა; მუნიციპალიტეტის ბიუჯეტი - დაგეგმარება, განხორციელება და მონიტორინგი; პრობლემების იდენტიფიცირება და მისი გადაწყვეტის გზების გამონახვა; ეფექტური კომუნიკაცია და სამოქალაქო ინტერესების დაცვა . ტრენინგის გასავლელად საჭიროა დაინტერესებულმა ახალგაზრდებმა შეავსონ სააპლიკაციო ფორმა, სადაც უნდა წარმოაჩინონ ბათუმში არსებული ერთ–ერთი პრობლემა და მისი გადაჭრის ხედვა. სააპლიკაციო შერჩევის შემდეგ, მოხდება მათთან გასუბრება. ორივე ეტაპის წარმატებული ახალგაზრდების ვინაობა თებერვალში გახდება ცნობილი. აპლიკაციების მიღება 2015 წლის 20 იანვრამდე გაგრძელდება. აპლიკაციის ფორმა...

შიდა ქართლი. ,,მეგობრობის ხიდი ქართლოსის” პროექტის „ახალგაზრდების ჩართულობის გაძლიერება რეგიონულ დონეზე საქართველოში” – წარმომადგენლები ქალაქ გორის საკრებულოს თავმჯდომარეს და მერიის წარმომადგენლებს შეხვდნენ. პროექტში ჩართულმა ახალგაზრდებმა ხელისუფლების წარმომადგენლებს ქალაქში არსებული პრობლემების ამსახველი ფოტოკოლაჟი უჩვენეს, რომელთა ძირითადი ნაწილი ქალაქის დასუფთავებას, სკვერების რეაბილიტაციას და სანაგვე ურნების სიმცირეს ეხებოდა. ამას გარდა, ახალგაზრდებმა ყურადღება გაამახვილეს ქალაქის ცენტრალურ ქუჩებზე ფეხით მოსიარულეთა უსაფრთხოებაზეც. სრულად... წყარო: ორგანიზაცია „მეგობრობის ხიდი – ქართლოსი"

აჭარა. 16 დეკემბერს, ბათუმის დემოკრატიული ჩართულობის ცენტრში, სამოქალაქო საზოგადოების ინსტიტუტის ინიციატივით, საზოგადოებრივი დარბაზების თავმჯდომარეებისთვის ბათუმის 2015 წლის ბიუჯეტის განხილვა გაიმართა. ბათუმის მერიის ფინანსური განყოფილების წარმომადგენელმა, აღნიშნულ აუდიტორიას დაწვრილებით განუმარტა ბიუჯეტში არსებული ხარჯების მიზნობრიობა. ბიუჯეტის პრეზენტაციის შემდეგ მოქალაქეებმა თავიანთი აზრი დააფიქსირეს. საზოგადოებრივი დარბაზის თავმჯდომარეებმა, თანამდებობრივი ვალდებულების ფარგლებში, ბიუჯეტის შესახებ ინფორმაცია უნდა მიაწოდონ დარბაზის წევრებს. დოკუმენტის გაცნობის შემდეგ კი, ტერიტორიული ერთეულების მიხედვით უნდა წარმოადგინონ პრობლემები და იმ შემთხვევაში თუ არსებული პრობლემის გადაჭრა არ არის ასახული ქალაქის ბიუჯეტში, სამოქალაქო მრჩეველთა საბჭოს სახელით, რეკომენდაციის სახით მიმართონ ბათუმის საკრებულოს.

შიდა ქართლი. ახალგაზრდული თვითმმართველობის წევრები გორის მუნიციპალიტეტის საკრებულოს თავმჯდომარეს და გორის მუნიციპალიტეტის გამგეობის წარმომადგენლებსაც შეხვდნენ და მათ წინაშე დააყენეს ის პრობლემები, რაც თავად გამოკვეთეს სოფლებში. ნაგავსაყრელის არარსებობა სოფლებში, საბავშვო ბაღების რეაბილიტაციის საჭიროება და სასმელი წყლის პრობლემა - ეს იმ საკითხების არასრული ჩამონათვალია, რაზეც ახალგაზრდებმა გაამახვილეს ყურადღება ადგილობრივ ხელისუფლებასთან შეხვედრისას. მათ ერთად იმსჯელეს გამოკვეთილ პრობლემებზე და ამ პრობლემების გადაჭრის გზებზე, ასევე იმ ერთობლივ აქტივობებზე, სადაც ახალგაზრდული თვითმართველობის წევრებიც ჩაერთვებიან. შეხვედები მოეწყო პროექტის ,,ახალგაზრდების ჩართულობის გაძლიერება რეგიონულ დონეზე საქართველოში" ფარგლებში, რომელსაც ,,მეგობრობის ხიდი – ქართლოსი" ახორციელებს European Endowment For Democracy-ის ფინანსური მხარდაჭერით. სრულად... წყარო: ორგანიზაცია „მეგობრობის ხიდი – ქართლოსი"

ქვემო ქართლი. 16 დეკემბერს, ორგანიზაციამ „პარტნიორობა ადამიანის უფლებებისთვის" რუსთავის მუნიციპალიტეტის მერიის თანამშრომლებისთვის ტრენინგი ჩაატარა. ტრენინგზე მერიის თანამშრომლები გაეცნენ თვითმმართველობის როლს შეზღუდული შესაძლებლობის მქონე პირთა უფლებების დაცვის საკითხებში, გაეროს შეზღუდული შესაძლებლობის მქონე პირთა უფლებათა კონვენციის (UN CRPD) ძირითად პრინციპებს და მის გამოყენების მექანიზმებს შეზღუდული შესაძლებლობის მქონე პირთა უფლებების დაცვის მიმართულებით. ტრენინგი განხორციელდა ევროკავშირისა და ფონდს ,,ღია საზოგადოება საქართველოს" პროექტის - „შეზღუდული შესაძლებლობის მქონე პირთა უფლებისა და შესაძლებლობის მხარდაჭერა, თვითმმართველობის ორგანოების მუშაობაში და მონაწილეობის უზრუნველსაყოფად" - ფარგლებში, რომელსაც PHR ახორციელებს პარტნიორ ორგანიზაციებთან ,,კონსტიტუციის 42-ე მუხლი" და ,,ხელმისაწვდომი გარემო ყველასათვის" ერთად. წყარო: ორგანიზაციის გვერდი სოციალურ ქსელში

კახეთი. 15 დეკემბერს, თელავში კავკასიის გარემოსდაცვითი ორგანიზაციათა ქსელის (CENN) ინიციატივით, პროექტის ,,ტყეების მდგრადი მართვა საქართველოში’’ ფარგლებში, საბიუჯეტო ორგანიზაციების შეშით მომარაგებისა და შეშის გამოყენების შესახებ საინფორმაციო შეხვედრა გაიმართა. შეხვედრას არასამთავრობო ორგანიზაციების, ადგილობრივი თვითმმართველობის წარმომადგენლები და დარგის სპეციალისტები ესწრებოდნენ. კავკასიის გარემოსდაცვითი ორგანიზაციათა ქსელის კახეთის რეგიონული კოორდინატორის, კახა სუხიტაშვილის თქმით, პროექტის, რომლის ფარგლებშიც აღნიშნული შეხვედრა გაიმართა, მიზანია ტყეების მდგრადი მართვის ხელშეწყობა საქართველოში: ,,დამსწრეებს გავაცანით ჩვენი ერთ-ერთი ინიციატივა, რომელიც ძალიან პრობლემურია მათ შორის კახეთში. ეს არის საბიუჯეტო ორგანიზაციების მიერ შეშის გამოყენება სათბობად. მითუმეტეს იმ დასახლებულ პუნქტებში, სოფლებსა და ქალაქებში, რომელიც უკვე გაზიფიცირებულია. ჩვენ გვინდა , რომ მოვახდინოთ საზოგადოების მობილიზება, მათ შორის, საჯარო სტრუქტურების, რომ მოხდეს მაქსიმალურად სწრაფად შეშის რესურსების გამოყენების შემცირება და ალტერნატიული გათბობის საშუალების მოძიება”.

აჭარა. 11 დეკემბერს, ბათუმის საკრებულოში ახალგაზრდების სტაჟირების პროგრამის ოფიციალური დახურვისა და საკონკურსო პროექტების წარდგენის პრეზენტაცია გაიმართა. საკრებულოს წევრებმა საუკეთესო პროექტის გამარჯვებულები გამოავლინეს და სპეციალური სერთიფიკატები გადასცეს. ახალგაზრდებს ხუთი პროექტი: „შშმ პირთა საჭიროებების კვლევა" „ბოძკინტები ბათუმის ქუჩებში და ველო ტრასებზე", „სოციალურად დაუცველ და მრავალშვილიან ოჯახთა წევრი აღსაზრდელების ვაუჩერიზაცია კერძო ბაღებში", „ახალგაზრდების საჭიროებების კვლევა" და „მწვანე ბათუმი" – ჰქონდათ წარმოდგენილი. საკრებულოს წევრთა გადაწყვეტილებით, 15 ხმით ჯანმრთელობისა და სოციალურ საკითხთა კომისიის სტაჟიორებმა პროექტით „შშმ პირთა საჭიროებების კვლევის" გაიმარჯვეს. საკრებულოს დარგობრივ კომისიებში სტაჟირებას ექვსი თვის განმავლობაში 25 ახალგაზრდა გადიოდა, კომისიის თავმჯდომარეები კი მათი უშუალო კოორდინატორები იყვნენ. ბათუმის საკრებულო, არასამთავრობო ორგანიზაცია განვითარებისა და თანამშრომლობის ხელშეწყობის კავშირ „პროგრესთან" ერთად, ქალაქის თვითმმართველობაში ახალგაზრდების სტაჟირების პროგრამას ორი წელია ახორციელებს, რომლის მიზანიც საკრებულოს დარგობრივი კომისიებისა და მერიის შესაბამის სამსახურების საქმიანობაში ახალგაზრდების ჩართულობა და მათი ცნობიერების გაზრდაა.

შიდა ქართლი. ,,მეგობრობის ხიდი ქართლოსის" ოფისში ქარელის ახალგაზრდული თვითმმართველობის ჯგუფის სამუშაო შეხვედრა გაიმართა, რომელზეც  ჯგუფის წევრებმა მიმდინარე წლის ბოლომდე დაგეგმილ ღონისძიებებზე და აქტივობებზე იმსჯელეს და სამომავლო გეგმებიც დასახეს. შეხვედრაზე საუბარი შეეხო ქარელის მუნიციპალიტეტში არსებული პრობლემებსაც, რომელთა შორის გამოიკვეთა ნაგავსაყრელის და ნაგვის გატანის, გამწვანების სიმცირის, სკვერების არარსებობის და სპორტული აქტივობების იშვიათობის პრობლემა.  ჯგუფის ხელმძღვანელის ნანუკა ფერაძის თქმით  ჯგუფის წევრები ქარელის საკრებულოს უახლოეს სხდომას დაესწრებიან და მოხსენებასაც გააკეთებენ აღნიშნული პრობლემების და მათი გადაჭრის რეკომენდაციებზე. ქარელის ახალგაზრდული თვითმმართველობის ჯგუფის წევრები იმედოვნებენ, რომ მათი წინადადებები მომავალი წლის ბიუჯეტში იქნება გათვალისწინებული.ქარელის ახალგაზრდული თვითმმართველობის ჯგუფი შექმნილია ,,მეგობრობის ხიდი ქართლოსის" პროექტის ,,ახალგაზრდების ჩართულობის გაძლიერება რეგიონულ დონეზე საქართველოში" ფარგლებში. პროექტი შიდა ქართლის ოთხივე მუნიციპალიტეტში ხორციელდება და მისი მიზანია ახალგაზრდების გააქტიურება და მათი ჩართულობის გაზრდა ადგილობრივი თემების განვითარებაში. პროექტი დაფინანსებულია ევროპის დემოკრატიული ფონდის (European Endowment For Democracy) მიერ.

კახეთი. გაეროს განვითარების პროგრამის (UNDP) ფარგლებში, ლოპოტაზე, ადგილობრივი თვითმმართველობის საჯარო მოხელეებისთვის თემაზე „ქონების მართვა და განკარგვა"  ტრეინინგი ჩატარდა.ორგანიზაციის წარმომადგენლების თქმით, ტრენინგი პროექტის– „რეგიონული და ადგილობრივი განვითარების მხარდაჭერა საქართველოში" თანამშრომლობით გაიმართა, რომელიც შვეიცარიის განვითარების, თანამშრომლობის სააგენტოსა (SDC) და ავსტრიის განვითარების სააგენტოს (ADA) ფინანსური მხარდაჭერით ჩატარდა.მათივე თქმით, ტრენინგი საგანმანათლებლო ხასიათის იყო და საჯარო მოხელეების პროფესიული უნარჩვევების განვითარებას ისახავდა მიზნად. მონაწილეებმა კი მუნიციპალიტეტისათვის მიკუთვნებული ქონებაზე, ქონების პრივატიზების წესზე, აუქციონსა და სხვა მნიშვნელოვან საკითხებზე ისაუბრეს.