თბილისი. ქარტიის საბჭოს თავმჯდომარე ხატია ღოღობერიძე გახდა, მან ამ პოზიციაზე თამარ რუხაძე შეცვალა. ხატია ღოღობერიძე ქარტიის საბჭოს ერთი წლის ვადით უხელმძღვანელებს. ხატია ღოღობერიძე მედიაში 2009 წლიდან მუშაობს. სხვადასხვა დროს იყო გამოცემა ბათუმელების, News.ge-ისა და ტაბულას ჟურნალისტი. ასევე, ტაბულას სატელევიზიო კორესპონდენტი. 2020 წლიდან, 2 წლის განმავლობაში იყო News.On.ge-ის მთავარი რედაქტორი. 2022 წლიდან არის ონლაინ გამოცემა Queer.ge-ს მთავარი რედაქტორი, ასევე, dev.ge-ის რედაქტორი. საქართველოს ჟურნალისტური ეთიკის ქარტიის საბჭოს წევრად აირჩიეს 2021 წლის 18 დეკემბერს, ქარტიის წევრთა საერთო კრებაზე. სრულად... წყარო: www.qartia.ge

თბილისი. ღირსეული შრომის პლატფორმა აქვეყნებს კვლევას: საცხოვრებელი ხელფასი საქართველოში. „საცხოვრებელი ხელფასი არის ხელფასის ის ოდენობა, რომელიც ფარავს მშრომელთა ღირსეული ცხოვრებისათვის აუცილებელ და ძირითად საჭიროებებს... მისი გამომუშავებისათვის მშრომელებს არ უნდა სჭირდებოდეთ ზეგანაკვეთური შრომა - საცხოვრებელი ხელფასის მიღება შესაძლებელი უნდა იყოს ერთ სამუშაოზე დასაქმების შემთხვევაშიც. 2022 წლის ოქტომბერში Wage Indicator Foundation-ის გამოთვლებით, საცხოვრებელი ხელფასი საქართველოში, ყოველთვიურად 1770 ლარი უნდა იყოს. სამწუხაროდ, საქართველოში არსებული ხელფასები ამჟამად საცხოვრებელ ხელფასზე გაცილებით დაბალია. კანონმდებლობით განსაზღვრული მინიმალური ხელფასი თვეში 20 ლარია და 1999 წლის შემდეგ არ განახლებულა. სახელმწიფოს მონაცემების თანახმად, მედიანური ხელფასი - თანხა, რომელიც მშრომელებს ორ თანაბარ ჯგუფად ყოფს – 2021 წლისთვის თვეში 900 ლარი იყო. ეს ნიშნავს, რომ დასაქმებულთა 50% ამ თანხაზე ნაკლებს იღებს. საშუალო ხელფასიც კი 2021 წელს, თვეში მხოლოდ 1305 ლარი იყო, რაც საცხოვრებელ ხელფასზე გაცილებით დაბალია“, ნათქვამია მასალაში. სრულად... წყარო: shroma.ge

თბილისი. სამართლიანი არჩევნებისა და დემოკრატიის საერთაშორისო საზოგადოების ინფორმაციით, ქუთაისის სააპელაციო სასამართლომ ორგანიზაციის დაცვის ქვეშ მყოფი თამარ ქომეთიანის სამსახურიდან გათავისუფლება უკანონოდ და დაუსაბუთებლად ცნო. თამარ ქომეთიანი  ა(ა)იპ ზუგდიდის მუნიციპალიტეტის „მოსწავლე ახალგაზრდობის სასახლეში” 2020 წლიდან მუშაობდა. საქმის დეტალები... ISFED, USAID-ის სამართლის უზენაესობის პროგრამისა და ღია საზოგადოების ფონდის მხარდაჭერით, ახორციელებს სტრატეგიული სამართალწარმოების პროექტს, რომლის ფარგლებშიც უფასო იურიდიულ დახმარებას უწევს სამსახურიდან სავარაუდო პოლიტიკური  ნიშნით გათავისუფლებულ პირებს. წყარო: isfed.ge

თბილისი. საქართველოს სახალხო დამცველის აპარატმა სამუშაო შეხვედრა გამართა საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის, გენდერული თანასწორობის მუდმივმოქმედი საპარლამეტო საბჭოსა და ბავშვის უფლებათა დაცვის მუდმივმოქმედი საპარლამენტო საბჭოს წარმომადგენლებთან. სამუშაო შეხვედრაზე ომბუდსმენის მოვალეობის შემსრულებელმა თამარ გვარამაძემ სახალხო დამცველის მანდატსა და საქმიანობის სპეციფიკაზე ისაუბრა, ასევე დამსწრეებს მიაწოდა ინფორმაცია 2020-2022 წლებში აპარატის მიერ მომზადებული სპეციალური ანგარიშების თაობაზე. საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ მიხეილ სარჯველაძემ ადამიანის უფლებების დაცვის გაუმჯობესების მიზნით მომავალში თანამშრომლობის გაღრმავების მნიშვნელობას გაუსვა ხაზი. სრულად... წყარო: სახალხო დამცველის გვერდი სოციალურ ქსელში

23 დეკემბერს, განათლების განვითარების და განათლების ცენტრმა (EDEC), აშშ-ის საერთაშორისო განვითარების სააგენტოს (USAID) ფინანსური მხარდაჭერით, პროგრამის „ერთიანობა მრავალფეროვნებაშია“ ფარგლებში პრეზენტაცია გამართა.  გაიგეთ მეტი... წყარო: ორგანიზაციის გვერდი სოციალურ ქსელში

თბილისი. ჰაინრიხ ბიოლის ფონდის სამხრეთ კავკასიის რეგიონული ბიურო აქვეყნებს ლიკა ჯალაღანიას სტატიას „რიონის ხეობის პროტესტი და „მოქალაქეობის“ გარდაქმნის პოტენციალი“. „სტატია შეეხება რიონის ხეობის პროტესტის კონტექსტში ახალი პოლიტიკური მოქალაქეობის დაბადების და თვითშექმნის პოტენციალებს. სტატიის ფოკუსში ექცევა მხოლოდ ის ზოგადი მულტიდისციპლინური ლიტერატურა, რომელიც ადგილობრივ პროტესტებს მოქალაქეობისა და სამართალსუბიექტურობის გადაკვეთაზე ხედავს და იძლევა შესაძლებლობას, მეტად სიღრმისეულად დავინახოთ ადგილობრივად ამოზრდილ წინააღმდეგობათა მნიშვნელობები და გავლენები“, ნათქვამია სტატიის აღწერაში. სრულად... წყარო: ge.boell.org

თბილისი. კონკურსის „ეს ქვეყანა შენია“ ფარგლებში გამარჯვებული გუნდების წარმომადგენლები თბილისიდან, წეროვანიდან და გორიდან, სამოქალაქო საზოგადოების ინსტიტუტის პიარ მენეჯერთან, თემურ ჯალიაშვილთან ერთად, მიწვეული იყვნენ საზოგადოებრივი მაუწყებლის ეთერში, კერძოდ კი, ნინო ზაუტაშვილის საავტორო გადაცემაში „რეალური სივრცე“. ახალგაზრდებმა ისაუბრეს თავიანთ თემში მათი თაოსნობით განხორციელებული აქტივობების შესახებ. გადაცემის დასრულების შემდეგ სამოქალაქო საზოგადოების ინსტიტუტის წარმომადგენლებმა გამარჯვებულებს გადასცეს ინდივიდუალური საჩუქრები, მათ შორის ლეპტოპები. კამპანიის „ეს ქვეყანა შენია“ ფარგლებში კვლავაც გაგრძელდება კონკურსში მონაწილეთა დაჯილდოება. პროექტის გუნდი ეწვევა რეგიონებს და გამარჯვებულებს საზეიმოდ გადასცემს პრიზებს. კამპანიას „ეს ქვეყანა შენია“ ახორციელებს სამოქალაქო საზოგადოების ინსტიტუტი პროექტის „სამოქალაქო საზოგადოების ინიციატივის“ ფარგლებში, რომლის მხარდამჭერია ევროკავშირი და კონრად ადენაუერის ფონდი.

აჭარა. გაეროს განვითარების პროგრამის (UNDP) ინფორმაციით, ბათუმის მუნიციპალიტეტი ნარჩენების მართვის ახალ მიდგომას ნერგავს, რომელიც ნარჩენების წარმოქმნის შემცირებასთან ერთად, ნარჩენების შემდგომი გადამუშავებისთვის მათ დახარისხებასაც ისახავს მიზნად. მუნიციპალური ნარჩენების მართვის ახალი მიდგომა ეფუძნება ბათუმის მერიისა და გაეროს განვითარების პროგრამის სწრაფი განვითარების ლაბორატორიის თანამშრომლობას, რომლის ქცევითი ექსპერიმენტის შედეგად, ბათუმში პლასტმასას ბოთლების სეპარირებული შეგროვება ერთ წელიწადში 16-ჯერ გაიზარდა. სრულად... წყარო: ორგანიზაციის გვერდი სოციალურ ქსელში

თბილისი. პროექტის „მასობრივი განადგურების იარაღის გამოყენებით პოლიტიკური მკვლელობების პრევენციისთვის საქართველოს შესაძლებლობების გაძლიერება“ ფარგლებში, GCSD-მ ჩაატარა ტრენინგი ქბრბ (ქიმიური, ბიოლოგიური, რადიაციული და ბირთვული) უსაფრთხოების შესახებ სხვადასხვა მედია ორგანიზაციის წარმომადგენლებისთვის. ტრენინგს, დოქტორი მარკ მაიკლ ბლუმი უძღვებოდა და სამი დღის განმავლობაში მოიცავდა თემების ფართო სპექტრს, მათ შორის: ბირთვული იარაღის ისტორია და ამ იარაღის კონტროლის რეჟიმები, ქიმიური იარაღის ტიპები და მასობრივი განადგურების იარაღის გამოყენებით ჩადენილი მკვლელობები. პროექტი ხორციელდება ამერიკის შეერთებული შტატების სახელმწიფო დეპარტამენტის ერთობლივი საფრთხის შემცირების ოფისის (CTR) მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. 23 დეკემბერს, სწავლებისა და დასაქმების ხელშეწყობის ცენტრების კარიერის დაგეგმვის კონსულტანტებისთვის ტრენერთა ტრენინგი გაიმართა. პროგრამა მიზნად ისახავდა მონაწილეებისათვის ინტერაქციული ტრენინგის მომზადებისა და ჩატარების შესახებ ცოდნის გადაცემასა და იმ შესაბამისი უნარ-ჩვევების განვითარებას, რომელიც როგორც ტრენინგების, ასევე სასწავლო პროგრამების დაგეგმვის, განხორციელებისა და შეფასების პროცესში, ზრდასრულთა სწავლების მიდგომების დანერგვასა და ინტერაქტიური მეთოდიკის გამოყენებას კიდევ უფრო მეტად ეფექტიანს გახდის. ტრენინგი გაიმართა პროექტის „უნარების გაძლიერება და დასაქმების ინოვაციური შესაძლებლობები საქართველოს რეგიონული განვითარებისთვის“ ფარგლებში. პროექტი ხორციელდება საქართველოს სტრატეგიული კვლევებისა და განვითარების ცენტრის (CSRDG) ლიდერობით, ახალგაზრდა პედაგოგთა კავშირთან და საქართველოს სამოქალაქო განვითარების ასოციაციასთან ერთად. პროექტის ფინანსური მხარდამჭერია ევროკავშირი. სრულად... წყარო: ორგანიზაციის გვერდი სოციალურ ქსელში

თბილისი. ჰაინრიჰ ბიოლის ფონდის თბილისის ოფისი - სამხრეთ კავკასიის რეგიონი გილოცავთ დამდეგ ახალ წელს.  „იმედი გვაქვს, რომ ახალი 2023 წელი იქნება უფრო მშვიდობიანი, დემოკრატიული და მწვანე. დასვენების დღეებში საკითხავად გიზიარებთ 2022 წლის განმავლობაში ჩვენ მიერ გამოქვეყნებულ მნიშვნელოვან პუბლიკაციებს“. სრულად... წყარო: ge.boell.org

თბილისი. „შემოქმედებითი საქართველო“ გიზიარებთ შემოქმედებითი მეწარმეობის რესურსცენტრს, რომელიც წარმოადგენს პრაქტიკულ გზამკვლევს შემოქმედებითი ბიზნესებით დაინტერესებული ადამიანებისთვის. ვებგვერდი აერთიანებს სხვადასხვა სახელმძღვანელოს, ოფიციალურ დოკუმენტს, კვლევებსა და ვიდეო ლექციებს. პროექტი განხორციელებულია შემოქმედებითი საქართველოს ბრიტანეთის საბჭოს საგრანტო პროგრამის, შემოქმედებითი ნაპერწკალი: სამეწარმეო განათლება უმაღლესებისათვის ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. კავკასიის გარემოსდაცვითი არასამთავრობო ორგანიზაციების ქსელი (CENN) გიზიარებთ ახალ სტატიას „კლიმატის ცვლილებით გამოწვეული „ზარალის და ზიანის“ შეთანხმება: ძირითადი კითხვები და პასუხები“. სტატია მიმოიხილავს, კლიმატის 27-ე მსოფლიო კონფერენციის (COP27-ის) ერთ-ერთ მთავარ შედეგს - შეთანხმებას „ზარალისა და ზიანის“ მსოფლიო ფონდის შექმნის თაობაზე. სტატია... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის აქვეყნებს ესმა იმერლიშვილის ბლოგპოსტს: მენსტრუაცია და შეზღუდული შესაძლებლობები. „შეზღუდული შესაძლებლობის მქონე ქალები და გოგოები, მთელი მსოფლიოს მასშტაბით, ხშირად ვერ ახერხებენ საკუთარი მენსტრუაციული ჯანმრთელობის მართვას, რაც გამოიხატება ინფორმაციის ნაკლებობაში, მენსტრუაციის ჰიგიენის მართვისთვის საჭირო საშუალებებზე არასათანადო წვდომაში და სხეულის ავტონომიისა და რეპროდუქციული უფლების დარღვევაში. ყოველივე ამას, სხვადასხვა სოციალურ-კულტურული, ეკონომიკური და სტრუქტურული ფაქტორები უდევს საფუძვლად. წინამდებარე დოკუმენტი მენსტრუაციული ჰიგიენის მართვის მნიშვნელოვან ასპექტებს მიმოიხილავს და მიუხედავად იმისა, რომ თითოეული საკვანძო საკითხის სიღრმისეულ დისკუსიას ვერ ახდენს, იმედს ვიტოვებთ, რომ მკითხველისთვის ინფორმაციის იმ დოზით მიწოდებას უზრუნველყოფს, რაც საკითხისადმი შემდგომი დაინტერესებისა და ყოველდღიურ ცხოვრებაში არსებული პრობლემების იდენტიფიცირებაში დაეხმარება“. სრულად... წყარო: phr.ge

რეგიონები. მე-4 საერთაშორისო კონფერენციის - „არქივების ღიაობის მნიშვნელობა საბჭოთა წარსულის გადაფასებასა და პროპაგანდისთვის წინააღმდეგობის გაწევაში“ ფარგლებში, ინფორმაციის თავისუფლების განვითარების ინსტიტუტმა (IDFI) გორსა და კასპში გასვლითი შეხვედრები გამართა. „კასპის სკოლა-გიმნაზიაში არსებულ ოკუპაციის მუზეუმში, რომელიც საბჭოთა კავშირის დროინდელ პოლიციის ყოფილ შენობაშია განთავსებული, 2022 წლის ნობელის მშვიდობის პრემიის ლაურეატი ისტორიულ-საგანმანათლებლო და უფლებადამცველი ორგანიზაციის, „საერთაშორისო მემორიალის”, თავმჯდომარემ, იან რაჩინსკიმ ღია ლექცია ჩაატარა, რომლის ფარგლებშიც ისაუბრა რეპრესიების მიმდინარეობაზე, მასშტაბებსა და სტატისტიკის შედგენის მახასიათებლებზე“. სრულად... წყარო: idfi.ge

თბილისი. სოციალური სამართლიანობის ცენტრი გთავაზობთ თეა ქამუშაძის სტატიას: „რუსთავის ეზოს სამლოცველოები: ქალაქის საჯარო სივრცეების საკრალიზაცია თუ დესაკრალიზაცია?!“ „პოსტ-საბჭოთა პერიოდიდან მოყოლებული მართლმადიდებლურის ეკლესიის მცდელობას მოახდინოს საჯაროს სივრცეების მონოპოლიზება, სილვია სერანო განიხილავს როგორც ეროვნული სივრცის დესეკულარიზაციის პროცესს. ამ მოცემულობას სუსტად მაგრამ გარკვეული ფორმით წინააღმდეგობას უწევს სახელმწიფო აქტორები, როდესაც კულტურული მემკვიდრეობის ძეგლებს რელიგიურ შინაარს აცლიან და მას საერთო მოხმარების სივრცეებად აყალიბებენ. ამის მაგალითად სერანო განიხილავს რაბათის კომპლექსის მშენებლობას ახალციხეში, სადაც წარმოდგენილია, როგორც მეჩეთი, ისე წმინდა მარინეს ეკლესია, თუმცა რელიგიური ფორმით არც ერთი არ ფუნქციონირებს, ისინი მხოლოდ გარეგნული ნიშნებითა და მახასიათებლებით გვიყვებიან წარსული გამოცდილების შესახებ (სერანო, 2018). ის რომ რაბათის კომპლექსი პოლიტიკური პროექტი იყო და არა კულტურული, ის ფაქტიც მიუთითებს, რომ მისი აღდგენა და მშენებლობას მაშინდელმა შინაგან საქმეთა მინისტრმა ვანო მერაბიშვილმა და მისმა უწყებამ ითავა და არა კულტურისა და ძეგლთა დაცვის სამინისტრომ, რომელსაც ძეგლის აუთენტურობაზე და ისტორიულობის შენარჩუნებაზეც უნდა ეზრუნა. პროექტის მიზანი ნაციონალური სივრცის დესაკრალიზებით მრავალფეროვნების წახალისება და მისი როგორც ღირებულების წარმოჩენა უნდა ყოფილიყო. როგორც სერანო აღნიშნავს, იმის გამოც რომ დასრულებული პროექტის წარდგენა, ხელისუფლების ცვლილებას დაემთხვა დროში და რთული წარმოსადგენია, როგორ მოემსახურება რაბათის კომპლექსი სეკულარიზაცია/დესეკულარიზაციის ლოკალურ კონტექსტს, რომელიც საკრალურის დესაკრალიზაციით უნდა ტრანსფორმირდეს საზიარო სივრცედ“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) აქტიურადაა ჩართული „ღირსეული შრომის პლატფორმის“ საქმიანობაში, რომელიც აერთიანებს დამოუკიდებელ პროფესიულ კავშირებს, ადამიანის უფლებათა დამცველ ორგანიზაციებსა და აქტივისტებს. ორგანიზაცია გიზიარებთ 2022 წლის კვლევას „მოპარული ხელფასი საქართველოში - შრომითი უფლებების დარღვევის ფინანსური გავლენა მშრომელთა უფლებებზე“.  კვლევა... საია-მ ასევე მოამზადა კვლევა „შრომითი უფლებები საჯარო სამსახურში: სამინისტროები და თვითმმართველი ქალაქები“. დოკუმენტში მოცემულია საჯარო სამსახურში შრომითი უფლებების მომწესრიგებელი სამართლებრივი ნორმების შედარებითი ანალიზი. კვლევა... ორგანიზაციის 2022 წლის საქმიანობის ანგარიში... წყარო: ორგანიზაციის გვერდი სოციალურ ქსელში

თბილისი. ახალგაზრდულ მუშაკთა ასოციაციის ცნობით, უკვე ხელმისაწვდომია სახელმძღვანელო - „ახალგაზრდული საქმიანობის კარგი პრაქტიკის მაგალითების კომპენდიუმი“. კარგი პრაქტიკის მაგალითების გამოყენება სულ უფრო მნიშვნელოვანი ხდება არა მარტო ახალგაზრდულ საქმიანობაში, არამედ ადამიანისა და საზოგადოების განვითარების ნებისმიერ სფეროში. ეს სახელმძღვანელო განსაკუთრებით საინტერესო იქნება მათთვის, ვისაც შეხება აქვს ახალგაზრდულ საქმიანობასთან ან უბრალოდ საინტერესებულია ამ სფეროთი. სახელმძღვანელოს ელ.ვერსია... კამპანია ხორციელდება პროექტის “Skills4Success - უნარები წარმატებისთვის” ფარგლებში. პროექტს ევროკავშირის დაფინანსებით ახორციელებს Save the Children International-ი პარტნიორ ორგანიზაციებთან: საქართველოს ახალგაზრდულ მუშაკთა ასოციაციასთან, ახალგაზრდობის სააგენტოსა და კონრად ადენაუერის ფონდთან ერთად. სრულად... წყარო: ორგანიზაციის გვერდი სოციალურ ქსელში

გერმანია. კავკასიის გარემოსდაცვითი არასამთავრობო ორგანიზაციების ქსელი (CENN) შეუერთდა საქართველოს დელეგაციას გერმანიის საერთაშორისო თანამშრომლობის საზოგადოების (GIZ)-სა და გერმანული LAG 21-ის მიერ ორგანიზებულ გაცვლით ვიზიტზე გერმანიაში, რომელიც მდგრადი განვითარების მიზნების ადგილობრივ დონეზე დანერგვის ხელშეწყობაზე გამოცდილების გაზიარებას ეძღვნებოდა. ვიზიტის ფარგლებში, მონაწილეები გაეცნენ საუკეთესო პრაქტიკის მაგალითებს გარემოს დაცვის, მდგრადი ტურიზმის, ენერგოეფექტურობისა და მდგრადი ეკონომიკის მიმართულებით. გერმანიის მთავრობის მიერ მხარდაჭერილი მიმდინარე პროექტის „SDG-ების განხორციელების ხელშეწყობა საქართველოში“ ფარგლებში, CENN აქტიურად მუშაობს საქართველოს SDG სამდივნოსთან საქართველოში მდგრადი განვითარების მიზნების განხორციელების პროცესებში მრავალსექტორული დიალოგის უზრუნველსაყოფად. აღნიშნული პროექტის საქმიანობა ითვალისწინებს სხვადასხვა დაინტერესებული მხარეების გაძლიერებას და SDG-ებთან დაკავშირებული დაგეგმვის, მონიტორინგისა და ანგარიშგების პროცესებში სამოქალაქო საზოგადოების ორგანიზაციებისათვის ჩართულობის სივრცეებისა და მექანიზმებს შექმნას. სრულად... წყარო: ორგანიზაციის გვერდი სოციალურ ქსელში

რეგიონები. აჭარის, გურიის, ქვემო ქართლისა და შიდა ქართლის პროფესიული სასწავლებლების წარმომადგენლებმა მონაწილეობა მიიღეს „ძირითადი კომპეტენციებისა და სამუშაოსთვის მზაობის“ ტრენერთა ტრენინგში. საქართველოს გაეროს ასოციაციის ინფორმაციით, მიღებული ცოდნისა და გამოცდილების საფუძველზე, სხვადასხვა პროფესიული სასწავლებლის 14 თანამშრომელი იგივე დასახელების ტრენინგს ჩაატარებს საკუთარი საგანმანათლებლო დაწესებულების სტუდენტებისთვის. ტრენინგი ჩატარდა ევროკავშირის მიერ დაფინანსებული „ცოდნისა და უნარების განვითარების ქსელებისა და პლატფორმების გაძლიერების პროექტის (LINKS)“ ფარგლებში, რომელიც ხორციელდება საქართველოს გაეროს ასოციაციისა და საქართველოს ღია საზოგადოების ფონდის მიერ. სრულად... წყარო: ორგანიზაციის გვერდი სოციალურ ქსელში

26 დეკემბერს, 19:00 საათზე, სასტუმროში „ჰოლიდეი ინნ“, მაკლეინის ასოციაციის ორგანიზებით, გაიმართება შეხვედრა: რას ნიშნავს იყო კარგი მშობელი? სრულად... მისამართი: თბილისი, 26 მაისის მოედანი #1

თბილისი. სამოქალაქო საზოგადოების ორგანიზაციები შეშფოთებას გამოთქვამენ "სახალხო დამცველის არჩევის პროცესის ჩავარდნის გამო, რაც საფრთხეს უქმნის საქართველოს ევროინტეგრაციის პროცესს". ისინი მოუწოდებენ მმართველ პარტიას, ითანამშრომლოს ოპოზიციასთან და სამოქალაქო საზოგადოებასთან, რათა უზრუნველყოს ევროკავშირის წევრობის კანდიდატის სტატუსის მისაღებად თორმეტივე პირობის დროული შესრულება. „22 დეკემბერს საქართველოს პარლამენტმა კენჭი უყარა სახალხო დამცველობის კანდიდატებს, თუმცა ხმათა საჭირო რაოდენობა ვერცერთმა დააგროვა. ასეთი შედეგი წინასწარვე იყო ცნობილი, რადგან საპარლამენტო უმრავლესობის ლიდერებმა კენჭისყრამდე ერთი დღით ადრე განცხადეს, რომ ოპოზიციასთან რომელიმე კანდიდატზე შეთანხმება ვერ შედგა. ხმათა საჭირო რაოდენობა (90) ვერ მოიპოვა სამოქალაქო საზოგადოების ფართო ჯგუფის მიერ წარდგენილმა კანდიდატებმაც“. სრულად... წყარო: socialjustice.org.ge