სამეგრელო. გაეროს ბავშვთა ფონდი ბავშვზე მორგებული ქალაქების ინიციატივის ფარგლებში, მხარს უჭერს ქალაქ ფოთის მერიას, რათა ფოთი ბავშვზე მორგებული ქალაქი გახდეს. 2 თებერვალს გაეროს ბავშვთა ფონდის წარმომადგენელი, ღასან ხალილი ქალაქ ფოთს ეწვია და გამართა შეხვედრები ქალაქის მერიის, მუნიციპალიტეტისა და საგანმანათლებლო დაწესებულებების თანამშრომლებთან, ბავშვებთან და სამოქალაქო საზოგადოების წარმომადგენლებთან. შეხვედრებზე განიხილეს ბავშვთა უფლებები, ასევე ის ნაბიჯები, რომელთა გადადგმის შემდეგაც ფოთი შეძლებს გახდეს ბავშვზე მეტად მორგებული ქალაქი. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობის“ მიერ გამოქვეყნებული 2022 წლის „კორუფციის აღქმის ინდექსის“ (CPI) მიხედვით, საქართველოს 56 ქულა აქვს, რაც წინა წელთან შედარებით ერთი ქულით მეტია. წარსულში 56 ქულა ქვეყანას 3-ჯერ: 2017, 2019 და 2020 წლებში  ჰქონდა. რეიტინგში შემავალ 180 ქვეყანას შორის საქართველო 41-ე ადგილს იკავებს. ორგანიზაციის განმარტებით, „კორუფციის აღქმის ინდექსში“ ქვეყნის შედეგის ერთი ქულით ცვლილება სტატისტიკურად უმნიშვნელოდ ითვლება. საქართველოს შემთხვევაში ქულა 2012 წლის შემდეგ მნიშვნელოვნად არ გაუმჯობესებულა (იხ. გრაფიკი),[1] რაც იმას ნიშნავს, რომ ბოლო 10 წლის განმავლობაში ქვეყანას კორუფციის წინააღმდეგ ქმედითი ნაბიჯები არ გადაუდგამს. რეიტინგში საქართველოს შედეგი, ძირითადად, განპირობებულია წვრილმანი მექრთამეობის დაბალი დონით, თუმცა ამავდროულად კვლავაც გამოწვევად რჩება ელიტური კორუფცია და მის წინააღმდეგ ბრძოლის პოლიტიკური ნების არარსებობა. სრულად... წყარო: transparency.ge

თბილისი. ევროკომისიამ გამოაქვეყნა ანალიტიკური ანგარიშები უკრაინის, მოლდოვისა და საქართველოს ევროკავშირის კანონთა კრებულთან (EU acquis) შესაბამისობის შესახებ. ანგარიშები ავსებს 2022 წლის ივნისში ევროკავშირში გაწევრიანების შესახებ სამი ქვეყნის განაცხადების თაობაზე ევროკომისიის მიერ მიღებულ მოსაზრებებს, აფასებს არსებულ მდგომარეობას და გვთავაზობს ღირებულ მითითებებს შესასრულებელი სამუშაოს შესახებ. დამატებითი ინფორმაცია... წყარო: www.eeas.europa.eu

3 თებერვალს, 13:00 საათზე, „შემოქმედებითი ევროპა საქართველო“ გიწვევთ საინფორმაციო შეხვედრაზე. „თუ აპირებთ მონაწილეობის მიღებას კონკურსში ამ ეტაპზე ან მომავალში, თქვენთვის სპეციალურად ჩავატარებთ ტრენინგს აპლიკაციის შევსების თაობაზე. დეტალურად გავივლით კონკურსში მონაწილეობის ყველა ტექნიკურ ეტაპს (პორტალზე რეგისტრაცია, ბიუჯეტის შევსების სპეციფიკა და ა.შ.)“. ტრენინგში მონაწილეობის მსურველებმა გთხოვთ, გაიაროთ რეგისტრაცია... სრულად...

თბილისი. სოციალური სამართლიანობის ცენტრი აგრძელებს ინტერვიუების ციკლს „ისტორია, მეხსიერება, პოლიტიკა“ და მშვიდობის მშენებლებთან ერთად საუბრობს ქართულ-აფხაზური, ქართულ-ოსური ურთიერთობებისა და ეთნოპოლიტიკური კონფლიქტების შესახებ. რა არის ის ძირითადი კონცეფციები, რასაც დღეს მშვიდობის მშენებლობა ეფუძნება, როგორია დღევანდელი სამშვიდობო პოლიტიკა და როგორ იცვლებოდა კონფლიქტებთან მიმართებით ქართული, აფხაზური და ოსური მხარის პერსპექტივები - დღევანდელი ინტერვიუს სტუმარია ნაციონალიზმისა და კონფლიქტების კვლევის ინსტიტუტის თავმჯდომარე, ნინო კალანდარიშვილი.  სრულად... წყარო: ორგანიზაციის გვერდი სოციალურ ქსელში

თბილისი. გაეცანით საქართველოს ახალგაზრდა იურისტთა ასოციაციის კვლევას - „გარემოს დაცვის სისხლისსამართლებრივი რეგულირება“. „სისხლისსამართლებრივი პასუხისმგებლობა გარემოს დაცვის სფეროში ერთ-ერთი მნიშვნელოვანი ინსტრუმენტია, რომელიც უზრუნველყოფს დანაშაულთან ქმედით ბრძოლას და ამ სფეროში არსებული იმ დირექტივების ეფექტიან იმპლემენტაციას, რომელთა ეროვნულ დონეზე დანერგვის ვალდებულება საქართველომ ასოცირების შეთანხმების ფარგლებში აიღო.  კვლევის შედეგად გამოკვეთილი მიგნებების გათვალისწინებით, საქართველოს კანონმდებლობის დახვეწის, ევროკავშირის სამართალთან მისი მეტად დაახლოებისა და ჰარმონიზაციის, ასევე, პრაქტიკაში აღსრულების კუთხით გამოვლენილი პრობლემების გამოსწორების მიზნით, საიამ შეიმუშავა რეკომენდაციები“. სრულად... წყარო: www.gyla.ge

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. სამოქალაქო საზოგადოების ორგანიზაციები, კიდევ ერთხელ ეხმიანებიან საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობის უკიდურესად დამძიმებას. „მიხეილ სააკაშვილის ჯანმრთელობის მდგომარეობის უკიდურესი გაუარესება ნათელია სამედიცინო დასკვნებიდან და ექსპერტთა ჩვენებებიდან. მისი ჯანმრთელობის კიდევ უფრო დამძიმება და შესაძლო ლეტალური შედეგის დადგომა, ადამიანის უფლებების უმძიმეს დარღვევას გამოიწვევს, რაც, თავის მხრივ, ქვეყნის რეპუტაციას გამოუსწორებელ ზიანს მიაყენებს. აქედან გამომდინარე, მოვუწოდებთ სასამართლოს, გაითვალისწინოს დარგის სპეციალისტთა დასკვნები და უმოკლეს ვადაში, მიიღოს ადამიანის უფლებების სტანდარტების შესაბამისი გადაწყვეტილება. ასევე, მოვუწოდებთ საერთაშორისო თანამეგობრობას, გამოიყენონ მათ ხელთ არსებული ყველა საშუალება, რათა თავიდან იქნას აცილებული ადამიანის სიცოცხლისა და ჯანმრთელობისთვის მიყენებული გამოუსწორებელი ზიანი და საქართველოს სახელმწიფოს პოლიტიკური კოლაფსი“, ნათქვამია ერთობლივ განცხადებაში. სრულად... წყარო: socialjustice.org.ge

თბილისი. ქალთა საინფორმაციო ცენტრის ცნობით, ამერიკის შეერთებული შტატების სახელმწიფო დეპარტამენტმა ნინო ლომჯარიას და მის გუნდს ადამიანის უფლებათა დამცველის ყოველწლიური გლობალური ჯილდო გადასცა. „მადლობა, რომ მუშაობდით და მუშაობთ რომ, ააშენოთ დემოკრატიული სახელმწიფო, რომელიც „თანხვედრაშია მოქალაქეების ევროატლანტიკურ მისწრაფებასთან!“, აღნიშნულია განცხადებაში. სრულად... წყარო: ქსც-ის გვერდი სოციალურ ქსელში

თბილისი. კავკასიის გარემოსდაცვითი არასამთავრობო ორგანიზაციების ქსელის (CENN) ცნობით, თებერვალი შიმშილის აღმოფხვრის თვეა. 2022 წლის შიმშილის გლობალური ინდექსის თანახმად, საქართველო 22-ე ადგილზეა 121 ქვეყანას შორის და 5.7 ქულით შიმშილის დაბალი დონის ქვეყნებს შორისაა… მსოფლიოს, მათ შორის საქართველოს, ერთ-ერთი მთავარი მიზანია, რომ 2030 წლისთვის არავის შიოდეს. თქვენც შეგიძლიათ წვლილი შეიტანოთ ამ მიზნის მიღწევაში. მხარი დაუჭირეთ ადგილობრივი, უსაფრთხო და ჯანსაღი პროდუქტების წარმოებას. გადმოწერეთ კალენდარი და იხელმძღვანელეთ ყოველთვიური რჩევებით... შემოგვიერთდით ინსტაგრამზე და ჩაერთე კამპანიის ფარგლებში დაგეგმილ ყოველთვიურ სახალისო ქვიზებში... სრულად... წყარო: ორგანიზაციის გვერდი სოციალურ ქსელში

თბილისი. 31 იანვარს, სასტუმრო „რუმსში“, MAC Georgia-ს საუბრების სერია „შუქი მოვიდას“ პრემიერა გაიმართა.  „შუქი მოვიდას“ სპიკერები თავიანთ პერსონალურ და გულწრფელ ისტორიებს აუდიტორიის წინაშე ყვებოდნენ. ღონისძიებას 300-ზე მეტი ადამიანი ესწრებოდა. მაკლეინის ასოციაცია მადლიერებას გამოხატავს „შუქი მოვიდას“ განსაკუთრებული სპიკერების, თითოეული დამსწრესა და ყველა იმ ადამიანის მიმართ, ვისი ძალისხმევითაც შესაძლებელი გახდა ღონისძიების წარმატებით გამართვა.  სრულად... წყარო: ორგანიზაციის გვერდი სოციალურ ქსელში

კახეთი. „უფლებები საქართველოს“ და „ლელიანის ზრდასრულთა განათლების ცენტრის“ ინიციატივით, ლაგოდეხის მუნიციპალიტეტში ახალგაზრდებმა ეთნიკური უმცირესობების უფლებების დაცვის საინიციატივო ჯგუფი შექმნეს.  „საინიციატივო ჯგუფის მიზანია, ლაგოდეხის მუნიციპალიტეტში მცხოვრები ეთნიკური უმცირესობების საზოგადოებრივ-პოლიტიკურ ცხოვრებაში ინტეგრაცია და  უფლებების დაცვა. ამ მიზნით, ახალგაზრდები აქტიურად იმუშავებენ ეთნიკური უმცირესობების უფლებებთან დაკავშირებული პრობლემების იდენტიფიცირებაზე, დაგეგმავენ და განახორციელებენ სხვადასხვა ღონისძიებას და ინიციატივებს, მოამზადებენ პეტიციებს“.  ახალგაზრდული საინიციატივო ჯგუფი შეიქმნა ომისა და მშვიდობის გაშუქების ინსტიტუტის (IWPR) პროექტის ფარგლებში, რომელიც გაერთიანებული სამეფოს მთავრობის მხარდაჭერით ხორციელდება. სრულად... წყარო: ორგანიზაციის გვერდი სოციალურ ქსელში

2 თებერვალს,12:00 საათზე, „საქართველოს ახალგაზრდა იურისტთა ასოციაცია“ სასტუმრო „შერატონ გრანდ მეტეხი პალასში“ კვლევის „გარემოს დაცვის სისხლისსამართლებრივი რეგულირება“ - პრეზენტაციას გამართავს. ღონისძიებას სახელმწიფო უწყებების, ადგილობრივი და საერთაშორისო ორგანიზაციების წარმომადგენლები დაესწრებიან. მისამართი: თბილისი, თელავის ქ.#20

რაჭა-ლეჩხუმი. რაჭა-ლეჩხუმის და ქვემო სვანეთის რეგიონული ჰაბის - ფონდი „აფხაზინტერკონტის“ ორგანიზებით, 2023 წლის 27 იანვარს ცაგერის მუნიციპალიტეტში რეგიონული საკოორდინაციო შეხვედრა გაიმართა. შეხვედრის მიზანი იყო სამოქალაქო საზოგადოების ორგანიზაციების მუდმივი ინფორმირებულობა, სექტორთა შორის თანამშრომლობის და ხელსაყრელი გარემოს (განვითარების შესაძლებლობები, არსებული გამომწვევები, დაფინანსების შესაძლებლობები) შექმნის ხელშეწყობა; მიმდინარე საქმიანობების გაცნობა, ადგილობრივი ბიუჯეტიდან, დაფინანსებების მოპოვების შესაძლებლობებზე ინფორმირება და თანამშრომლობის პერსპექტივებზე მსჯელობა. შეხვედრას დაესწრნენ ცაგერის მუნიციპალიტეტის ადგილობრივი თვითმმართველობის წარმომადგენელი, სამოქალაქო საზოგადოების ორგანიზაციები, სამოქალაქო კლუბების, მედიის, საჯარო სკოლების (სამოქალაქო განათლების პედაგოგები) წარმომადგენლები, ახალგაზრდები და სამოქალაქო ლიდერები.  შეხვედრის მონაწილეები გაეცნენ ჰაბისა და კონსორციუმის წევრების საქმიანობას/აქტივობებს ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიცია დაუშვებლად მიიჩნევს საჯარო ინფორმაციის მოთხოვნის გამო ჟურნალისტების დისკრედიტაციის მცდელობას, რაც გამოიხატა ადმინისტრაციული ორგანოების მხრიდან პერსონალური მონაცემების გასაჯაროების და მესამე პირებისთვის უკანონოდ გადაცემის შემთხვევებში. „2023 წლის 16 იანვარს, „მთავარი არხის“ საინფორმაციო სამსახურის მთავარი პროდიუსერი, თეა გილიგაშვილი, პარლამენტიდან საჯარო ინფორმაციის გამოთხოვის გამო დეზინფორმაციული კამპანიის მსხვერპლი გახდა. თეა გილიგაშვილმა პარლამენტიდან კანონით დადგენილი ფორმით გამოითხოვა ინფორმაცია ხარჯების თაობაზე და იკითხა, რა სახსრებით გაემგზავრნენ მმართველი პარტიის წევრები იტალიაში, ხვიჩა კვარაცხელიას საფეხბურთო მატჩზე დასასწრებად და ვინ დააფინანსა მათი მოგზაურობა. საქართველოს პარლამენტისთვის გაგზავნილი წერილი მალევე  მმართველ პარტია „ქართულ ოცნებასთან“, აფილირებულმა Facebook გვერდმა „სინამდვილეში“ გამოაქვეყნა და  გილიგაშვილი საჯარო ინფორმაციის გამოთხოვის გამო ხელისუფლების „დისკრედიტაციის მცდელობაში“ დაადანაშაულა“. სრულად... წყარო: transparency.ge

შიდა ქართლი. სოციალური სამართლიანობის ცენტრი აგრძელებს ინტერვიუების ციკლს კონფლიქტის რეგიონებში არსებული რეალობის შესასწავლად და ამ საკითხების ირგვლივ ინტერესის გასაძლიერებლად. ორგანიზაცია გიზიარებთ ინტერვიუს სამოქალაქო აქტივისტ თამარ მეარაყიშვილთან. „ჩვენს საზოგადოებაში ცოდნა კონფლიქტის რეგიონებში არსებულ მდგომარეობაზე და სოციალურ და პოლიტიკურ კონტექსტებზე ძალიან დაბალია. აქ მიმდინარე მოვლენები მეტწილად მხოლოდ კრიზისულ სიტუაციებში და უფლებების მძიმე დარღვევის დროს თუ იქცევს საზოგადოების, პოლიტიკური ელიტის და მედიის ყურადღებას. ახალგორი კონფლიქტის რეგიონებს შორის შეიძლება მოვნიშნოთ იმ განსაკუთრებულ ადგილად, სადაც, როგორც იქ დარჩენილი მოსახლეობა, ისე წამოსული დევნილები საკუთარ ცხოვრებას „ორ სახლად ცხოვრებას“ უწოდებენ. მათ აგვისტოს ომიდან 14 წლის შემდეგადაც რჩებათ გაურკვევლობის განცდა იმის შესახებ, რომელია მათი ნამდვილი სახლი − ახალგორი თუ საქართველოს კონტროლირებად ტერიტორიაზე 2008 წლის შემდეგ შექმნილი მათი „დროებითი საცხოვრებელი“. ახალგორი განსაკუთრებულია კიდევ ერთი გარემოების გამოც, ამ რაიონში მცხოვრებ ქართველებსა და ოსებსა არასოდეს ჰქონიათ ეთნიკური დაძაბულობის და კონფლიქტის გამოცდილება და ისტორია, მაშინაც კი, როცა ეს დაძაბულობა თავის ისტორიულ პიკს აღწევდა ხოლმე, მათ შორის 90-იან წლებში და აგვისტოს ომის პერიოდში“. სრულად... წყარო: socialjustice.org.ge

თბილისი. საქართველოს შემეცნებითი ცენტრი წარმოგიდგენთ ინტერვიუს „მხლენელთა საკითხავის“ ერთ-ერთ თანაავტორთან - ნათია გვინიაშვილთან, რომელიც დალხენისა და მლხენელობის კონცეფციას შესახებ საუბრობს.  ინტერვიუ მომზადდა პროექტის „დალხენის პრაქტიკების გავრცელების ხელშეწყობა ჯანსაღი სოციალური ტრანსფორმაციისთვის“ ფარგლებში, საქართველოს შემეცნებით ცენტრთან (CDC-Creative Development Center) თანამშრომლობით და ქალთა ფონდის  Women's Fund in Georgia) მხარდაჭერით. “ნათიას თქმით, დალხენა მისთვის სასიცოცხლოდ მნიშვნელოვანი რამეა. ეს არის ყველაფერი რასაც გაცნობიერებულად ვაკეთებ საკუთარი კეთილდღეობისთვის, ყველაფერს რასაც ვაკეთებ სხვისი კეთილდღეობისთვის და რასაც კოლექტიურად ვაკეთებთ ერთმანეთისთვის. ეს არის იმის აღიარება, რომ რეალობა, რომელშიც ვცხოვრობთ, მიმართულია სისტემური უსამართლობისა და ჩაგვრის შენარჩუნებისკენ და ამ პროცესში ჩვენგან მაქსიმალური რესურსის ამოღებისკენ. ეს სისტემა ჩვენ გვანადგურებს და გადარჩენისთვის არა მხოლოდ ინდივიდუალური, არამედ კოლექტიური ზრუნვა და დალხენაა საჭირო”. სრულად... წყარო: ccgeorgia.ge

გურია. 30 და 31 იანვარს, ოზურგეთის პროგრესის სახლის ორგანიზებით, ადგილობრივი სამოქალაქო საზოგადოების ორგანიზაციების წარმომადგენლებისთვის ჩატარდა ტრენინგი: ვიზუალიზაციები და ინფორმაციის გადმოცემის ეფექტური მექანიზმები.  შეხვედრა ორგანიზებული იყო პროექტის „სამოქალაქო საზოგადოების ინიციატივის“ ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

1-ელ თებერვალს, 19:00 საათზე, გაიმართება საინფორმაციო შეხვედრა: საუბრები ჰომოფობიაზე. სრულად...

1-ელ თებერვალს, საქართველოში უკვე მერვედ, წიგნის საჯაროდ კითხვის მსოფლიო დღე აღინიშნება. საჯაროდ კითხვის დღესთან დაკავშირებით, 1-ელ თებერვალს, 19:00 საათზე, ეროვნულ ბიბლიოთეკაში გაიმართება საჯარო ლექცია - „რას ვკარგავთ, როცა გამოხატვის თავისუფლებას ვკარგავთ?“. საჯარო ლექციას გაუძღებიან ლევან ბერძენიშვილი, თამარ ლებანიძე და ივა ფეზუაშვილი. სრულად...

1-ელ თებერვალს, 18:30 საათზე, მწერალთა სახლში (მაჩაბლის ქ. #13) გაიმართება გიგი თევზაძის წიგნების: „ათი წერილი მკითხველს თავისუფლების შესახებ“, „ათი წერილი მკითხველს მონობის შესახებ“ და „ათი წერილი მკითხველს განათლებული პატრიოტიზმის შესახებ“ - წარდგენა-დისკუსია. სრულად...

1-ელ თებერვალს, 16:00 საათზე, საქართველოს პოლიტიკის ინსტიტუტი (GIP) საქართველოს მმართველობის ინდექსის პრეზენტაციას გამართავს. მისამართი: თბილისი, ვარდების რევოლუციის მოედანი 1, სასტუმრო „რედისონ ბლუ ივერია“.