1 დეკემბერს, 17:00 საათზე, სტარტაპ ბიურო, იმფაქთ ჰაბ თბილისსა და ფორსეტთან თანამშრომლობით, გიწვევთ ვორკშოპზე, რომელზეც ნარჩენების გადამუშავებაზე, ცირკულარულ ეკონომიკასა და სხვა გარემოსდაცვით თემებზე ცოდნასა და პირად გამოცდილებას სამი ექსპერტი გაგიზიარებთ. სრულად...

1-3 დეკემბერს, პრაქტიკა - ხალხის კაფეში, ტანსაცმლის გაცვლის აქტივობა გაიმართება. „თუ გაქვს ტანსაცმელი, რომელსაც აღარ ხმარობ და ფიქრობ რომ სხვას გამოადგება და თან თუ შენც გჭირდება ახალი თბილი ტანსაცმელი, გთავაზობთ - შევიკრიბოთ და გავცვალოთ“. სრულად...

ამ წუთებში, საქართველოს პოლიტიკის ინსტიტუტის (GIP) ორგანიზებით, ნატო-ს PDD-ის მიერ დაფინანსებული პროექტის, „საქართველოს მდგრადობის გაძლიერება არასტაბილურ დროში“, ფარგლებში, საჯარო დისკუსია იმართება. ღონისძიებას გახსნის ნატო-ს სამეკავშირეო ოფისის (NLO) ხელმძღვანელი საქართველოში, ალექსანდრე ვინიკოვი, საქართველოს პოლიტიკის ინსტიტუტის დირექტორთან, პროფესორი, კორნელი კაკაჩიასთან ერთად. მისამართი: თბილისი, შოთა რუსთაველის გამზირი 13 (სასტუმრო „თბილისი მარიოტი“)

თბილისი. ღირსეული შრომის პლატფორმა ეხმიანება თბილისის სატრანსპორტო კომპანიის დამოუკიდებელი პროფესიული კავშირის „ერთობა 2013”-ის მიერ კოლექტიურ შრომითი დავის ანონსს და სოლიდარობას უცხადებს მეტროს თანამშრომელთა სამართლიან მოთხოვნას შრომის ანაზღაურების ზრდასთან დაკავშირებით. სრულად... წყარო: socialjustice.org.ge

სამცხე-ჯავახეთი. ახალციხეში „უფლებები საქართველოს“ იურისტმა, ეკა აბაშიძემ, სხვადასხვა ორგანიზაციის წარმომადგენლებთან ერთად, მონაწილეობა მიიღო ქალთა მიმართ ძალადობის საკითხებისადმი მიძღვნილ საინფორმაციო შეხვედრაში, რომელიც ბორჯომში, უფროსკლასელი მოსწავლეებისთვის მოეწყო. „ეკა აბაშიძემ ისაუბრა ქალთა მიმართ ძალადობის კუთხით არსებულ გამოწვევებზე, პრობლემების აღმოფხვრის გზებსა და სახელმწიფოს მიერ გასატარებელ ღონისძიებებზე, ასევე განუმარტა შეხვედრის მონაწილეებს, რომ ძალადობის მსხვერპლებს შეუძლიათ უფასო სამართლებრივი დახმარებისთვის „უფლებები საქართველოს“ მიმართონ. სამცხე-ჯავახეთში „უფლებები საქართველოს“ სამართლებრივი დახმარების სერვისი USAID სამართლის უზენაესობის პროგრამის მხარდაჭერით, სექტემბრის თვიდან ამოქმედდა“. სრულად... წყარო: ორგანიზაციის გვერდი სოციალურ ქსელში

თბილისი. ორგანიზაცია „მირაბალდები“ გიზიარებთ ინფორმაციულ პოსტს ეკონომიკური ძალადობის შესახებ. „ქალთა მიმართ ეკონომიკური ძალადობა გულისხმობს პარტნიორის მხრიდან ქალის ფინანსური რესურსების სრულ კონტროლს, რაც გამოიხატება როგორც ფულზე წვდომის შეზღუდვით, ასევე სამსახურში სიარულის აკრძალვით ან ამის მცდელობით. ხშირი და მიღებული ფაქტია ისიც, რომ ქალები თავიანთი პარტნიორების საბანკო ბარათებს იყენებენ. უფრო მეტიც, ქალების დიდ რაოდენობას საერთოდ არ აქვს საკუთარი ანგარიში, რაც იმას ნიშნავს, რომ მათ მიერ გაღებული ნებისმიერი ხარჯი პარტნიორს შეიძლება სმს შეტყობინების სახით მიუვიდეს, რაც დღევანდელ რეალობაში კონტროლის ერთ-ერთი მარტივი გზაა. გახსოვდეთ, ეკონომიკური ძალადობა დანაშაულია, ფინანსური დამოუკიდებლობა კი თანასწორობის მიღწევის აუცილებელი პირობა“. სრულად... წყარო: ორგანიზაციის გვერდი სოციალურ ქსელში

თბილისი. 28-30 ნოემბერს, ეკონომიკური პოლიტიკის კვლევის ცენტრის (EPRC) აღმასრულებელმა დირექტორმა, ნინო ევგენიძემ მონაწილეობა მიიღო პანელურ დისკუსიაში - „რუსეთის იმპერიული ამბიციიდან გადახვევა: რუსეთის ომის შედეგები უკრაინის წინააღმდეგ აღმოსავლეთ პარტნიორობის რეგიონისთვის და ევროკავშირისთვის“. „მე ვარ ქვეყნიდან, რომლის ტერიტორიის 20% ოკუპირებულია რუსეთის მიერ. ისინი თბილისიდან 40 კილომეტრში არიან. სამწუხაროდ, 2008 წელს დასავლეთმა და მსოფლიომ რუსეთი საქართველოში ვერ შეაჩერა. ახლა კი, ყველას პასუხისმგებლობაა მხარი დაუჭიროს უკრაინას და გაუწიოს მათთვის საჭირო სამხედრო და ფინანსური დახმარება.  უკრაინელები იბრძვიან არა მარტო საკუთარი თავისთვის, არამედ იმისთვის, რომ ევროპა იყოს თავისუფალი და უსაფრთხო“, - განაცხადა ნინო ევგენიძემ. სრულად... წყარო: ორგანიზაციის გვერდი სოციალურ ქსელში

თბილისი. ქალთა საინფორმაციო ცენტრი პროექტის „ქალთა გაძლიერება და სრულფასოვანი მონაწილეობა ადგილობრივი გენდერული პოლიტიკის განხორციელებაში“ ფარგლებში, რომელიც დანიური ორგანიზაცია KVINFO-სა და დანიის საგარეო საქმეთა სამინისტროს მხარდაჭერით ხორციელდება გიზიარებთ რუსუდან ბუზიაშვილის ბლოგპოსტს: ამას ისეთი ქმარი ჰყავდა, მოძალადე ვერ იქნებოდა. „მახსოვს, რამდენიმე დღის წინ, ერთ-ერთ ცნობილ გვერდს ედო პოსტი, საზოგადოებისთვის საკმაოდ ნაცნობი კაცის ყოფილი მეუღლე, სოციალურ ქსელში გმობდა ძალადობას და ეხმაურებოდა ბოლო დროს ჩვენს ქვეყანაში მომრავლებულ ფემიციდს. ჩემთვის ძალიან საინტერესოა ასეთ მნიშვნელოვან თემებზე საზოგადოების დამოკიდებულება, ამიტომ კომენტარებს “ჩავუჯექი“ და იქ დამხვდა ნამდვილი “სასწაული” - ამ სიტყვის ყველაზე ცუდი გაგებით. “გაჩუმდი ქალო, შენ ვიზე რა გაქვს სათქმელი, ანგელოზივით ქმარი მიატოვე და ახალი კაცი გამოიჭირე“, “ამას ისეთი ქმარი ჰყავდა, მოძალადე ვერ იქნებოდა მაგრამ მაინც მიატოვა, რა ალაპარაკებს ნეტა’’, “შვილების დედა სხვასთან აგრძელებს ურთიერთობას და ღირსებას ულახავს ასეთ სასახელო კაცს“ და ა.შ. ეს იცით როდის ხდება?! მაშინ, როდესაც თვითონ ეს ქალიც საკმაოდ შემდგარი და ცნობილი ადამიანია, თავის სფეროში მაგრამ, საზოგადოებამ კაცისგან შექმნა “ხატი“, რომელიც არ შეიძლება რომ იყოს მოძალადე ან/და მოღალატე, იმიტომ რომ საზოგადოება იცნობს, როგორც წესიერ ადამიანს, ნამდვილ ქართველ კაცს და ამ დროს, საკმაოდ წარმატებულ ქალს ზედ უვლიან იმის გამო, რომ ცხოვრებას აგრძელებს, ერთ კომენტარსაც კი ვერ ნახავთ, სადაც ქალები სოლიდარობას უცხადებენ და იცავენ ან ამხნევებენ მას. მაგრამ, გახსოვდეთ რომ, ასეთი კომენტარების დამწერ ქალებს არ შეიძლება პოლემიკაში შეჰყვეთ. ხშირ შემთხევაში ისინი ილანძღებიან, იწყევლებიან და აგრესიას გამოხატავენ იმიტომ, რომ თვითონ ვერ გაბედეს იმ ნაბიჯის გადადგმა, რაც სხვამ გადადგა, თვითონ მოითმინეს ის რაც სხვამ არ მოითმინა და როდესაც ამ სხვა ადამიანს ბედნიერს ხედავენ შინაგანი პროტესტი უჩნდებათ იმის გამო, რომ თვითონ ვერ გააკეთეს“, ნათქვამია ბლოგპოსტში. სრულად... წყარო: ginsc.net

თბილისი. უფლებები საქართველოს ცნობით, ქალთა მიმართ ძალადობის ან/და ოჯახში ძალადობის ფაქტზე ოპერატიული რეაგირებისთვის, მსხვერპლის დაცვისა და მოძალადის გარკვეული მოქმედებების შეზღუდვის უზრუნველსაყოფად, შესაძლებელია პოლიციელის მიერ დროებითი ღონისძიების სახით შემაკავებელი ორდერის გამოცემა. შემაკავებელი ორდერის გამოცემისას: პოლიციელმა სწორად უნდა შეაფასოს ქალის მიმართ ძალადობის ან/და ოჯახში ძალადობის განმეორების რისკი და, რისკის სიმძიმის მიხედვით, მიიღოს გადაწყვეტილება შემაკავებელი ორდერის გამოცემის შესახებ; ძალადობის განმეორების რეალური საფრთხის არსებობისას, მაღალი რისკის მოძალადეებს, შემაკავებელი ორდერის გამოცემასთან ერთად ელექტრონული ზედამხედველობა უნდა დაუწესდეთ. ელექტრონული ზედამხედველობის განხორციელებისას, GPS სისტემით პოლიციამ უნდა გააკონტროლოს მოძალადის გადაადგილება, რაც ამცირებს მსხვერპლთან მისი მიახლოების საფრთხეს. სრულად... წყარო: ორგანიზაციის გვერდი სოციალურ ქსელში

30 ნოემბერს, 19:00 საათზე, თამარ ბაქრაძის ვებინარი „საბავშვო ბაღის მართვა“. ეს არის რიგით მეშვიდე ვებინარი დაგეგმილი ვებინარების სერიიდან სკოლამდელი დაწესებულებების დირექტორებისათვის/მენეჯერებისათვის და სკოლამდელი განათლების საკითხებით დაინტერესებული პირებისათვის. სრულად...

თბილისი. გაეცანით საქართველოს ახალგაზრდა იურისტთა ასოციაციის (საია) ანალიტიკოსის ანა ბერიძის კვლევას „კლიმატის ცვლილება და ადამიანის უფლებები“. „კლიმატის ცვლილების შედეგად გამოწვეული ბუნებრივი კატასტროფები, გარემოს შეცვლილი პირობები და სხვა უარყოფითი შედეგები უშუალოდ უქმნის საფრთხეს ადამიანის ისეთ ძირითად უფლებებს, როგორებიცაა: ადამიანის სიცოცხლისა და ჯანმრთელობის, ღირსეულად ცხოვრების, თვითგამორკვევის, განვითარების, განათლების უფლებები და სხვა“, აღნიშნულია კვლევაში. სრულად... წყარო: gyla.ge

თბილისი. 29 ნოემბერს, გაეროს ბავშვთა ფონდმა და საქართველოს საერთაშორისო სავაჭრო პალატამ ხელი მოაწერეს ურთიერთგაგების მემორანდუმს, რომელიც მიზნად ისახავს ბავშვების მხარდაჭერის მობილიზებას ბიზნეს პრაქტიკაში ბავშვის უფლებების უზრუნველყოფისა და ახალგაზრდების გაძლიერების გზით, რაც შრომის ბაზარზე მათ კონკურენტუნარიან სამუშაო ძალად გახდის. სრულად... წყარო: ორგანიზაციის გვერდი სოციალურ ქსელში

თბილისი. მაკლეინის ასოციაცია აქვეყნებს სტატიას: როგორ ვასწავლოთ ბავშვს რომ არ იყოს ბულინგის პასიური დამკვირვებელი. „ბულინგი, იგივე ჩაგვრა, ბავშვობისა და მოზარდობის პერიოდისათვის დამახასიათებელი მოვლენაა, რომელსაც ყველა ადამიანი ერთხელ მაინც შესწრებია. პირველ რიგში, ბავშვთან ერთად განსაზღვრეთ რა არის ბულინგი და რა ფორმით შეიძლება ვლინდებოდეს იგი. ნათლად აუხსენით, რომ ბულინგი შეიძლება გამოვლინდეს როგორც ფიზიკური ჩაგვრის, ისე სიტყვიერი შეურაცხყოფის სახით, რიგ შემთხვევებში კი შეიძლება მიმართული იყოს ადამიანის გარიყვის, მისი რეპუტაციის შელახვის და სოციალურ იზოლაციისკენ. მოიყვანეთ შესაბამისი მაგალითებიც. თუ ბავშვს შეეძლება ბულინგის ამოცნობა, მას შეეძლება ჩარევა და საჭიროების შემთხვევაში, დახმარების თხოვნაც“. სრულად... წყარო: macgeorgia.org

კახეთი. 28 ნოემბერს, თელავის სახელმწიფო უნივერსიტეტში, ორგანიზაცია „უფლებები საქართველომ“, USAID სამართლის უზენაესობის პროგრამის მხარდაჭერით, ქალთა მიმართ ძალადობის და ოჯახში ძალადობის საკითხებზე საჯარო ლექცია გამართა.  საჯარო ლექცია გენდერული ძალადობის წინააღმდეგ მიმართული 16-დღიანი გლობალური კამპანიის ნაწილია, რომელიც “Let’s End Femicide” სლოგანით მიმდინარეობს. სრულად იხ. კახეთის ხმის  წყარო: ორგანიზაციის გვერდი სოციალურ ქსელში

თბილისი. „უფლებები საქართველოს“ მოთხოვნით სასამართლომ დროებითი განკარგულება გამოსცა. 2022 წლის 25 ნოემბერს, სამტრედიის რაიონულმა სასამართლომ, სრულად დააკმაყოფილა „უფლებები საქართველოს“ მოთხოვნა და არასრულწლოვანს აღარ დასჭირდება მოძალადე მამის ნებართვა იმისათვის, რომ ისწავლოს სკოლაში, დედის და თავისი ადგილსამყოფლის მიხედვით. „უფლებები საქართველო“ ამ საქმეს USAID სამართლის უზენაესობის პროგრამის მხარდაჭერით აწარმოებს. „სიტყვებით ვერ აღვწერ იმ ემოციასა და ბედნიერებას, რაც პროცესზე, სასამართლოს მიერ გადაწყვეტილების გამოცხადების დროს მქონდა. დიდი სიხარულია, მოძალადე მამასთან რომ არ მომიწევს ბავშვის განათლებასთან დაკავშირებული საკითხების შეთანხმება. ბედნიერი ვარ, რომ დღეიდან, ბავშვისთვის განათლების მიცემა დამოუკიდებლად შემიძლია“, - ყვება არასრულწლოვნის დედა. სრულად... წყარო: ორგანიზაციის გვერდი სოციალურ ქსელში

29 ნოემბერს, 19:00 საათზე, გაიმართება მასწავლებელთა ყოველთვიური საკონსულტაციო შეხვედრა. სრულად...

29 ნოემბერს, 17:00 საათზე, სახალხო უნივერსიტეტი უმასპინძლებს ჟურნალ „რიწის“ მთავარი რედაქტორის - ნანა ქარდავას ლექციას „თბილისის აფხაზი გუბერნატორი“. მისამართი: თბილისი, გალაკტიონის ქუჩა #20

29 ნოემბერს, 17:00 საათზე, სასტუმრო „შერატონ მეტეხი პალასში“, USAID სამართლის უზენაესობის პროგრამის მხარდაჭერით, საქართველოს საკონსტიტუციო სასამართლო გამართავს საჯარო დისკუსიას გადაწყვეტილების შესახებ, რომელიც საკონსტიტუციო სასამართლოს წინაშე თეთრიწყაროს რაიონული სასამართლოს წარდგინების საფუძველზე იქნა მიღებული. მისამართი: თბილისი, თელავის ქ. #20

თბილისი. 28 ნოემბერს ინფორმაციის თავისუფლების განვითარების ინსტიტუტმა (IDFI), ამერიკის შეერთებული შტატების საერთაშორისო განვითარების სააგენტოსა (USAID) და Zinc Network-ის დახმარებით, კვლევის „რუსული კაპიტალი საქართველოში“ პრეზენტაცია გამართა და კვლევის ძირითადი მიგნებები წარადგინა. კვლევის მიზანი იყო რუსეთის მოქალაქეების საკუთრებაში არსებული საქართველოში მოქმედი კომპანიების მუშაობის, რესურსებისა და კავშირების შესწავლა შემდეგ სექტორებში: ელექტროენერგია, ნავთობი და გაზი. სრულად... წყარო: idfi.ge

თბილისი. სოციალური სამართლიანობის ცენტრის ცნობით, შარტავას ქუჩაზე, ყოფილი საბურთალოს ბაზრის მიმდებარე ტერიტორიაზე, 13-წლიანი პაუზის შემდეგ, „ოლიმპიური ვარსკვლავის“ შეჩერებული მშენებლობა წელიწადნახევრის წინ განახლდა. მშენებლობა, ახალი პროექტით, უამრავი დარღვევებით მიმდინარეობს.  2020 წლის ოქტომბერში, თბილისის საკრებულომ სოციალური სამართლიანობის ცენტრის შეფასებით, უკანონო გადაწყვეტილება მიიღო, როდესაც მთელი რიგი საკანონმდებლო მოთხოვნები მოუხსნა დეველოპერს და უგულებლყო ამ ორგანოს მთავარი პასუხისმგებლობა საჯარო და კერძო ინტერესების დაბალანსების შესახებ. ვიდეოში მოისმენთ, რა უარყოფითი გავლენები შეიძლება მოუტანოს ამ მშენებლობამ ახლო მდებარე საცხოვრებელ კორპუსებს და აქ მცხოვრები ადამიანების ყოველდღიურობას. სრულად... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტის (IDFI) პროგრამების დირექტორმა ლევან ავალიშვილმა, კორუფციასთან ბრძოლის სასერტიფიკატო პროგრამის ფარგლებში ბაკალავრიატის ჯგუფისთვის ინფორმაციის თავისუფლებაზე ლექცია ჩაატარა. ლევანი კურსის მონაწილეებს ესაუბრა საჯარო ინფორმაციის მნიშვნელობაზე, სამართლებრივ ჩარჩოსა და საქართველოში დამკვიდრებულ საჯარო ინფორმაციის გამოთხოვის მექანიზმებზე. ლექცია ინტერაქციულ რეჟიმში გაიმართა. სრულად... წყარო: idfi.ge

თბილისი. სოციალური სამართლიანობის ცენტრი გიზიარებთ მარიამ ბრეგვაძის კვლევას: მედიკამენტების ეკონომიკური ხელმისაწვდომობის უფლებრივი და ეკონომიკური განზომილებები. „საქართველოს მოსახლეობის კატასტროფული დანახარჯების უდიდეს წილს მედიკამენტები წარმოადგენს. ქვეყანა დღემდე იმ ქვეყნების ვიწრო წრეშია, რომლებიც წამლების ფასებს ამა თუ იმ ფორმით არ არეგულირებენ. მართალია, პრობლემა აღიარეს თავად პოლიტიკოსებმა, საპარლამენტო კომიტეტებმა და რელევანტურმა სახელმწიფო ორგანოებმა, თუმცა კომპლექსური ხედვა ამ საკითხზე დღემდე არ არსებობს და არც ქმედითი ნაბიჯები გადადგმულა“. სრულად... წყარო: socialjustice.org.ge