თბილისი. საქართველოს ახალგაზრდა იურისტთა ასოციაცია (საია) საქართველოს მთავრობის წინააღმდეგ იწყებს დავას სენაკის საკრებულოს უფლებამოსილების შეწყვეტასთან დაკავშირებით. „გამომდინარე იქიდან, რომ საქართველოს მთავრობამ საკუთარი ინიციატივით არ შეასრულა კანონით გათვალისწინებული ვალდებულება, საიამ მიმართა მას განცხადებით და მოითხოვა აქტის გამოცემა სენაკის მუნიციპალიტეტის საკრებულოს უფლებამოსილების შეწყვეტილად ცნობის თაობაზე. ამ დროისთვის არ არის ცნობილი მთავრობის ოფიციალური პოზიცია განცხადებაში დასმულ საკითხთან დაკავშირებით. იმედს გამოვთქვამთ, საქართველოს მთავრობა დროულად მოახდენს სათანადო რეაგირებას და იმსჯელებს სენაკის საკრებულოს უფლებამოსილების შეწყვეტილად ცნობასთან დაკავშირებით“. სრულად... წყარო: gyla.ge

თბილისი. „საერთაშორისო გამჭვირვალობა - საქართველომ” რუსეთზე საქართველოს ეკონომიკური დამოკიდებულების საკითხები შეისწავლა. კვლევის თანახმად, მიმდინარე წლის მარტი-ივნისში რუსეთის მოქალაქეებმა საქართველოში 6,400-მდე კომპანია დაარეგისტრირეს. ასობით კომპანიას იურიდიულ მისამართად საქართველოს სხვადასხვა სოფელი აქვს მითითებული. სრულად... წყარო: transparency.ge

თბილისი. სოციალური თერაპიის სახლი ახალ ინიციატივას გთავაზობთ - გაჩნდა იდეა შექმნილიყო თეატრალური სტუდია - “Theater Studio For Everybody”, რომელიც ეპატიჟება ყველა მსურველს, 14 წელს ზემოთ, ვისაც თეატრი და ხელოვნება უყვარს. სრულად... წყარო: ორგანიზაციის გვერდი სოციალურ ქსელში

თბილისი. გაეცანით გიორგი ხიზანიშვილის ბლოგპოსტს: ვიმედოვნებ, რომ ჩემი ისტორია ვინმესთვის მოტივაციის მომცემი აღმოჩნდება. „დღეს ჩვენ ქვეყანაში, ქალაქებსა თუ სოფლებში, არიან ადამიანები სხვადასხვა შეზღუდვით, რომელთაც ჩემ მსგავსად ვერ წარმოუდგენიათ თავი სპორტის რომელიმე სახეობაში. ამიტომ, მინდა მათ ვუთხრა: ნუ იქნებით პასიურები, პირიქით, იყავით აქტიურნი, დაკავდით სპორტით, ვინაიდან ეს არის რესოციალიზაციისა და წარმატების საუკეთესო გზა“. სრულად... წყარო: disability.ge

თბილისი. საქართველოს საზოგადოებრივი ორგანიზაციები ერთობლივ განცხადებას ავრცელებენ ომბუდსმენის კანდიდატის შერჩევის ინკლუზიური პროცესის ხელშესაწყობად. „საქართველომ ევროკავშირის წევრობის კანდიდატის სტატუსის მოსაპოვებლად 12 რეკომენდაცია უნდა შეასრულოს, მათგან ერთ-ერთი სახალხო დამცველის არჩევის პროცესს ეხება. ომბუდსმენის ნომინირების პროცესში უპირატესობა მიენიჭოს დამოუკიდებელ კანდიდატს, პროცესი წარიმართოს გამჭვირვალედ და დაცული იყოს აპარატის ეფექტიანი ინსტიტუციური დამოუკიდებლობა. ხელისმომწერმა ორგანიზაციებმა ფართო კონსულტაციების შედეგად გადავწყვიტეთ ერთობლივად შევიმუშაოთ ომბუდსმენის კანდიდატობის ნომინირების წესი და ის კრიტერიუმები, რასაც უნდა აკმაყოფილებდეს ომბუდსმენის კანდიდატი“. სრულად... წყარო: ქალთა საინფორმაციო ცენტრის გვერდი სოციალურ ქსელში

თბილისი. 18-20 აგვისტოს, ინფორმაციის თავისუფლების განვითარების ინსტიტუტისა (IDFI) და საქართველოს უნივერსიტეტის (UG) ორგანიზებით გაიმართა Boot Camp-ი: „პოლარიზებული საზოგადოება ჰიბრიდული გამოწვევების წინაშე“.  Boot Camp-ში ჩართულნი იყვნენ აკადემიური და სასერტიფიკატო პროგრამის - „დეზინფორმაციისა და პროპაგანდის კვლევა: ისტორია, თეორია და გაბათილების საშუალებები“ მონაწილეები და საქართველოს უნივერსიტეტის სტუდენტები. ორდღიანი ბანაკის ფარგლებში, მონაწილეებმა იმსჯელეს ჰიბრიდული ომის თანამედროვე  გამოწვევებზე, ინფორმაციის მანიპულირებასთან და პროპაგანდის გავრცელებასთან დაკავშირებულ მიმდინარე ტენდენციებზე. სრულად...  წყარო: idfi.ge  

კახეთი. ცოდნის კაფე არის სოციალური საწარმო, რომელიც კახეთში მცხოვრებლებს სთავაზობს სივრცეს არა მარტო თავიანთი ინიციატივებისა და იდეებისათვის მხარდაჭერის მოსაპოვებლად, არამედ უზრუნველყოფს მათ წვდომას ტრენინგებზე, კურსებზე, მულტიმედია ბიბლიოთეკაზე, წიგნის მაღაზიასა და მრავალ სხვა რესურსზე. ეს ყველაფერი შესაძლებელი გახდა ევროკავშირის პროექტის ფარგლებში, Mercy corps-ის გრანტის საშუალებით. სრულად... წყარო: ევროკავშირის გვერდი სოციალურ ქსელში

ქვემო ქართლი. ფრიდრიხ ნაუმანის ფონდის მხარდაჭერითა და თავისუფალი დემოკრატიული ინსტიტუტის ორგანიზებით სოფ. პანტიანში დაიწყო რიგით მეოთხე პროექტი „ახალგაზრდული ჰაბი თავისუფლებისთვის“. პროექტის ფარგლებში  მონაწილეები შეხვდებიან საინტერესო   მომხსენებლებს და აქტიურად ჩაერთვებიან  ვორკშოპებსა და ჯგუფურ სამუშაოებში. სრულად... წყარო: ორგანიზაციის გვერდი სოციალურ ქსელში

თბილისი. 2021 წლის ზამთარში პარტნიორობა ადამიანის უფლებებისთვის (PHR) ნანას (სახელი შეცვლილია) საქმეში ჩაერთო. ნანა სექსუალური ძალადობის მსხვერპლი ქალია. მასზე ოჯახის ახლობელმა მის ბავშვობაში იძალადა. „პირველი ინსტანციის სასამართლომ ბრალდებული პირი გაამართლა, ხოლო ბრალდებულის ინტერესების დამცველმა ადვოკატებმა საადვოკატო ბიუროს სოციალურ გვერდზე ნანას საქმის შესახებ ინფორმაცია გამოაქვეყნეს. მიუხედავად იმისა, რომ დაზარალებულის სახელი და გვარი ინიციალებით იქნა აღნიშნული, პოსტის მეშვეობით გასაჯაროვდა ისეთი ინფორმაცია საქმის დეტალების, დაზარალებულისა და მისი ოჯახის წევრების შესახებ, რომ მთლიანობაში იდენტიფიცირებადი გახდა დაზარალებული. PHR-მა განცხადებით მიმართა პერსონალურ მონაცემთა დაცვის სამსახურს და მოითხოვა აღნიშნული საკითხის შესწავლა და რეაგირება. პერსონალურ მონაცემთა დაცვის სამსახურმა გაიზიარა PHR-ის პოზიცია და დაადგინა, რომ საადვოკატო ბიუროს მხრიდან მოხდა სამართალდარღვევა, რის გამოც საადვოკატო ბიურო დაჯარიმდა 500 ლარის ოდენობით. ბიუროს ასევე დაევალა ორგანიზაციის სოციალური გვერდიდან აღნიშნული პოსტის აღება“. ორგანიზაცია აგრძელებს დაზარალებული ქალის დაცვას. სრულად... წყარო: phr.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: პოლიტიკის დოკუმენტების შემუშავების მონიტორინგისა და შეფასების წესის პრაქტიკაში აღსრულება. კვლევის მიგნებების თანახმად, 2020-2021 წლებში სათანადოდ არ შესრულდა მთავრობის პოლიტიკის დოკუმენტების ყოველწლიური გეგმა. საჯარო უწყებების მხრიდან საჯარო კონსულტაციების გამართვის პრაქტიკა არაერთგვაროვანია. იკვეთება ადამიანური რესურსებისა და შესაბამისი კომპეტენციების ნაკლებობა საჯარო პოლიტიკის დოკუმენტების შექმნის, მონიტორინგის და ხარისხის უზრუნველყოფის მიმართულებით. სრულად... წყარო: idfi.ge

სამცხე-ჯავახეთი. აგვისტოში სოციალური სამართლიანობის ცენტრმა ჯავახეთის სოფლები მოინახულა. ორგანიზაცია გიზიარებთ ფოტო ისტორიას ჯავახეთის რეგიონიდან.  „სოფელი ეშტია ნინოწმინდის მუნიციპალიტეტის სიდიდით მეორე სოფელია. ამ დროისთვის სოფელში 1700-მდე ადამიანი ცხოვრობს. მოსახლეობის დიდი ნაწილი კათოლიკე სომხები არიან. წინა წლებთან შედარებით მოსახლეობის რაოდენობა სოფელში თითქმის განახევრდა. ადგილობრივები ჰყვებიან, რომ სოფელში მიგრაციის მაღალი ტალღაა, რადგან რეგიონში დასაქმების და განვითარების შანსები შეზღუდულია. სოფლის მოსახლეობა ძირითადად მესაქონლეობითა და მეკარტოფილეობით ირჩენს თავს. სოფელი ფოკა ფარავნის ტბის სამხრეთ ნაპირას, ზღვის დონიდან 2080 მ-ზე მდებარეობს. სოფელი ქალაქ ნინოწმინდიდან 28 კმ-ით არის დაშორებული. 2014 წლის აღწერის მონაცემებით, სოფელში 1176 მოსახლეა. აქვეა საჯარო სკოლა და საზოგადოებრივი ცენტრი. მოსახლეობა ძირითადად დაკავებულია მესაქონლეობით და მეთევზეობით. სწორედ მდინარე ფარავანი არის ადგილობრივებისთვის მნიშვნელოვანი სასიცოცხლო რესურსი. სოფელში პრობლემად რჩება მცირემიწიანობა, მიგრაცია და სამუშაო ადგილების სიმწირე. ამას კი მძიმე კლიმატური პირობები ემატება“. სრულად...  წყარო: ორგანიზაციის გვერდი სოციალურ ქსელში

2 სექტემბერს, 20:00 საათზე, Odesa Photo Days 2022 და გორელ ფოტოგრაფთა კლუბი წარმოგიდგენთ 24 თებერვლიდან 15 აპრილის ჩათვლით გადაღებულ ფოტოებს უკრაინის 12 რეგიონიდან. მისამართი: გორი, გურამიშვილის #5 (ლომჭაბუკის სკვერი)-ში

თბილისი. საქართველოს ახალგაზრდა იურისტთა ასოციაცია (საია) იცავდა კომპანია „თბილისი ენერჯიში“ დასაქმებულ პირს, რომელმაც სამსახურებრივი მოვალეობების შესრულებისას მიიღო ტრავმა. დამსაქმებელი დაზარალებული თანამშრომლისთვის ზიანის ანაზღაურებაზე უარს ამბობდა. შესაბამისად, საჭირო გახდა სასამართლოში სარჩელის შეტანა შპს „თბილისი ენერჯის“ წინააღმდეგ. თბილისის სააპელაციო სასამართლოს გადაწყვეტილებით, კომპანიას ყოფილი თანამშრომლის სასარგებლოდ, დაეკისრა სარჩოს გადახდა 2019 წლის ივნისიდან საპენსიო ასაკს მიღწევამდე. საიას ინფორმაციით, სააპელაციო სასამართლოს გადაწყვეტილება კანონიერ ძალაშია შესული. სრულად...  წყარო: gyla.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 2018-2022 წლებში საქართველოს პრეზიდენტის ბრძანებულებით საქართველოს მოქალაქეობა მიენიჭა 13,575 პირს. საქართველოს მოქალაქეობის მიმღები (მოქალაქეობის აღდგენის შემთხვევების გარდა) 8,464 პირიდან 72% (6,075 პირი) წარმოადგენდა რუსეთის მოქალაქეს. 2022 წელს რუსეთის უკრაინაში შეჭრის შემდეგ საქართველოს მოქალაქეობა საგამონაკლისო წესით მიიღო რუსეთის 551-მა მოქალაქემ, ხოლო უკრაინის 8 მოქალაქემ. გაეცანით IDFI-ის კვლევას...  წყარო: idfi.ge

იმერეთი. სოციალური სამართლიანობის ცენტრმა კობა და გელა კვინიკაძეების მიმართ ხარაგაულის პოლიციის თანამშრომლების მიერ არასათანადო მოპყრობის ფაქტზე ადამიანის უფლებათა ევროპულ სასამართლოში საჩივარი წარადგინა. განმცხადებლები დავობენ ევროპული კონვენციის მე-3 (წამების, არაადამიანური და ღირსების შემლახავი მოპყრობის აკრძალვა) და მე-13 (უფლება სამართლებრივი დაცვის ეფექტიან საშუალებებზე) მუხლების დარღვევაზე. „2018 წლის 18 ნოემბერს, კობა და გელა კვინიკაძეები ხარაგაულის რაიონის სოფელი ბაბის ტერიტორიაზე, პოლიციის მოთხოვნისადმი დაუმორჩილებლობისა და წინააღმდეგობის გაწევის საფუძვლით დააკავეს. დაკავების ადგილზე და შემდგომ, ხარაგაულის პოლიციის შენობაში, დაახლოებით საათნახევრის განმავლობაში, ხარაგაულის პოლიციის განყოფილების უფროსი და სხვა თანამშრომლები კობა და გელა კვინიკაძეებს აყენებდნენ ფიზიკურ და სიტყვიერ შეურაცხყოფას, რის შედეგადაც მათ სხეულის სხვადასხვა ნაწილში დაზიანებები მიიღეს“. სრულად...  წყარო: socialjustice.org.ge

შიდა ქართლი. გამყოფი ხაზის მიმდებარე სოფელ აძვში, რომელიც გორის მუნიციპალიტეტში მდებარეობს, ადამიანის უფლებათა ცენტრს პოლიციამ წყლის იმ სათავე ნაგებობის დათვალიერების უფლება არ მისცა, რომელიც ადგილობრივების თქმით, დაბინძურებულია. არასამთავრობო სექტორი და მედია გამყოფ ხაზთან გადაადგილების შეზღუდვის შესახებ ხშირად ამახვილებს ყურადღებას. ორგანიზაციამ ოფიციალური წერილით მიმართა, როგორც შინაგან საქმეთა სამინისტროს, ასევე - სახელმწიფო უსაფრთხოების სამსახურსაც. HRC-მ უწყებებისგან მოითხოვა განმარტება, თუ რატომ იზღუდება პოლიციის მიერ გადაადგილება გამყოფი ხაზის მიმდებარე სოფლებში და არსებობს თუ არა შესაბამისი ნორმატიული აქტი, რომელიც ამ საკითხს არეგულირებს. სრულად... წყარო: www.humanrights.ge

აჭარა. საერთაშორისო გამჭვირვალობა - საქართველოს ინფორმაციით, ხელვაჩაურის მუნიციპალიტეტის მერი, ზაზა დიასამიძე ბათუმში სახლს უნებართვოდ აშენებს, მშენებლობის ხარჯები ქონებრივ დეკლარაციაში მითითებული არ აქვს. ორგანიზაციის მოკვლევით, სახლის მშენებლობა ზაზა დიასამიძემ მეუღლის, თამილა ჭურკვეიძის კუთვნილ მიწაზე 2019 წლიდან დაიწყო, თუმცა ამის შესახებ მხოლოდ 2022 წელს შევსებულ დეკლარაციაში მიუთითა. „აღნიშნულ არქიტექტურულ პროექტზე მშენებლობის ნებართვა არ გაცემულა, შესაბამისად, ზაზა დიასამიძეს და მის მეუღლეს არც რეგულაციებით გათვალისწინებული სამშენებლო მოსაკრებელი გადაუხდიათ“.  „საერთაშორისო გამჭვირვალობა - საქართველო” მიმართავს ბათუმის მუნიციპალიტეტის მერიას, შეისწავლოს ხელვაჩაურის მუნიციპალიტეტის მიერ ბათუმში უნებართვო მშენებლობის საკითხი და დროულად მიიღოს შესაბამისი ზომები. ორგანიზაცია მიმართავს საჯარო სამსახურის ბიუროსაც, შეისწავლონ ზაზა დიასამიძის ქონებრივ დეკლარაციებში ჩვენ მიერ გამოვლენილი ხარვეზები და კანონის შესაბამისად მოახდინონ გამოვლენილ ხარვეზებზე რეაგირება. სრულად... წყარო: transparency.ge

პირველ სექტემბერს, 17:00 საათზე, შოთა რუსთაველის სახელობის სახელმწიფო დრამატულ თეატრში, წარმატებული ემიგრანტების დაჯილდოების ცერემონიალი გაიმართება. მისამართი: თბილისი, შოთა რუსთაველის გამზ. #17

27 სექტემბერს, სამოქალაქო საზოგადოების ინსტიტუტი (CSI) გიწვევთ ფორუმზე „ადგილობრივ დონეზე მოქალაქეთა მონაწილეობის გაძლიერება“. ფორუმის მიზანია მოქალაქეთა ჩართულობის კუთხით არსებული გამოცდილებისა და საუკეთესო პრაქტიკების გაზიარება, გამოწვევებისა და შესაძლებლობების გაანალიზება. ამ კუთხით მნიშვნელოვან საკითხებზე დიალოგისა და დისკუსიის სივრცის შექმნა, რაც ხელს შეუწყობს სამოქალაქო მონაწილეობის საკითხით დაინტერესებული აქტორების შესაძლებლობების გაძლიერებას და მათ შორის თანამშრომლობის სტიმულირებას.  მონაწილეობით დემოკრატიის პრინციპების დანერგვა ადგილობრივი მმართველობის პროცესებში განსაკუთრებით აქტუალურია. გადაწყვეტილების მიღებაში მონაწილეობა, ფართო გაგებით მოიაზრებს კონკრეტული პოლიტიკისა თუ სტრატეგიის შექმნის, რეგულაციების შემუშავების, სერვისების დანერგვა-გაუმჯობესების და ზოგადად, მოქალაქეებისთვის მნიშვნელოვანი საკითხების გადაწყვეტის პროცესს. შესაბამისად, არსებული ინოვაციური მექანიზმებისა და კარგი პრაქტიკების გაზიარება ხელს შეუწყობს მუნიციპალიტეტების საქმიანობაში მონაწილეობითი მიდგომების გაძლიერებას, ანგარიშვალდებულებისა და გამჭვირვალობის ზრდას, საჭიროებებზე მორგებული პოლიტიკის განხორციელებასა და გადაწყვეტილების მიღების პროცესში მოქალაქეთა ჩართულობის წახალისებას.  აღნიშნული ფორუმი ქმნის სივრცეს ყველა დაინტერესებული პირისთვის უკეთ გააცნობიეროს მოქალაქეთა მონაწილეობის მნიშვნელობა პოლიტიკის დაგეგმვის, განხორციელებისა და შეფასების პროცესში, და ასევე თავად წარუდგინოს აუდიტორიას მონაწილეობითი პროცესის წარმატებული მაგალითები, მექანიზმები, რესურსები და ა.შ.  მონაწილეობისთვის, გთხოვთ გაიაროთ ონლაინ რეგისტრაცია შემდეგ ბმულზე: https://forms.gle/sKM2G9TMgDRXh9Ly5 ონლაინ რეგისტრაციის ბოლო, განახლებული თარიღია 19 სექტემბერი. ფორუმი გაიმართება 27 სექტემბერს (განახლებული თარიღი), თბილისში, სასტუმრო "რუმსში", "Garden Hall" (მ. კოსტავას 14). დამატებითი კითხვების შემთხვევაში დაგვიკავშირდით:  ტელ: 555 94 50 66  ელ–ფოსტა: n.mgvdeladze@civilin.org  ფორუმი ორგანიზებულია სამოქალაქო საზოგადოების ინსტიტუტის (CSI) მიერ, „ადგილობრივი განვითარების აქტორების მდგრადი კავშირის შექმნა საქართველოში“ პროექტის ფარგლებში, რომელიც დაფინანსებულია გერმანული საერთაშორისო ფონდის, Bread for the World-ის მიერ. ინიციატივა მიზნად ისახავს ადგილობრივი თვითმმართველობის დონეზე განვითარების სფეროში ჩართული აქტორების გაძლიერებას, რათა მათ ეფექტურად შეძლონ ადგილობრივი საჭიროებებისა და განვითარების პრიორიტეტების განსაზღვრა და პოლიტიკური გადაწყვეტილებების მიღების პროცესში აქტიური მონაწილეობა.

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. როგორც ცნობილია, პირველი აგვისტოდან, უკრაინელი მოქალაქეების სასტუმროებში ცხოვრების დაფინანსების სახელმწიფო პროგრამა დასრულდა. საქართველოს ღია საზოგადოების ფონდი გთხოვთ, გავერთიანდეთ და დავეხმაროთ უკრაინელ ლტილვილებს. „ქალები, ბავშვები, პენსიონრები, რომლებმაც ჩვენი თანადგომის იმედით საქართველოს მოაშურეს, ღია ცის ქვეშ დარჩნენ. მათი მამები, ქმრები, შვილები - ქვეყნის თავისუფლებისთვის იბრძვიან. ჩვენ ყველაზე მეტად შეგვიძლია განვიცადოთ ომით მიღებული ტკივილი, საყვარელი ადამიანების დაკარგვა და დევნილობაში ყოფნის სიმწარე. დღეს, ჩვენ შეგვიძლია გავერთიანდეთ, რომ უკრაინელ მეგობრებს ყველაზე რთული პერიოდი გადავატანინოთ. ანგარიშზე ჩარიცხული თითოეული ლარი, უკრაინის მოქალაქეების დაბინავებას მოხმარდება“, ნათქვამია ორგანიზაციის განცხადებაში. GEL: #GE51TB7324636080100018 USD: #GE63TB7324636180100012 სრულად... წყარო: ფონდის გვერდი სოციალურ ქსელში

საზოგადოებრივი ორგანიზაციების ერთიანი პორტალი (www.csogeorgia.org) საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…