გურია. საზოგადოებრივმა ორგანიზაციამ „დემოკრატიული განვითარების კავშირმა" განახორციელა სამონიტორინგო გასვლა ჩოხატაურის მუნიციპალიტეტის კოხნარის თემში.  შეხვედრა გაიმართა  ახალგარზდული ცენტრის „კოხნარას'' ოფისში და საუბარი შეეხო თემში არსებულ პრობლემებს. ორგანიზაცია პროექტს ახორციელებს საქართველოს სტრატეგიული კვლევებისა და განვითარების ცენტრის ერთობილივი ქსელური პროგრამის ფარგლებში.

გურია. საქართველოს ახალგაზრდა იურისტთა ასოციაციისა და სამართლიანი არჩევნების მიერ მოეწყო მრგვალი მაგიდა. შეხვედრის მიზანი იყო საარჩევნო კოდექსში შესული ცვლილებების და საქართველოს კონსტიტუციაში მოსალოდნელი ცვლილებების განხილვა და საზოგადოების მოსაზრებების მოსმენა. დემოკრატიული ჩართულობის ცენტრში გამართულ შეხვედრას ესწრებოდნენ პოლიტიკური პარტიების, მედიის და საზოგადოებრივი ორგანიზაციების წარმომადგენლები.

სამცხე–ჯავახეთი. 12 და 13 მაისს ახალციხის ახალგაზრდულ ცენტრში, სამოქალაქო განათლებისა და პედაგოგთა გადამზადების პროექტის ფარგლებში, სოციალური მედიის ტრენინგები ჩატარდა. ორდღიან ტრენინგს სამცხე-ჯავახეთის სხვადასხვა მუნიციპალიტეტის სკოლების მოსწავლეები ესწრებოდნენ. ტრენინგებზე მონაწილეებს განემარტათ თუ რა არის სოციალური მედია, ისწავლეს ბლოგების შექმნის და ინტერნეტში მუშაობის სპეციფიკა, ასევე ის, თუ როგორ გამოიყენონ ეს ცოდნა ინფორმაციის გასავრცელებლად და როგორ გაუზიარონ თანატოლებს სკოლებში დაბრუნების შემდგომ.

სამცხე–ჯავახეთი. ახალქალაქის მეოთხე საჯარო სკოლის სამოქალაქო განათლების კლუბის წევრებმა მცირე გრანტების პროგრამით დაფინანსებული პროექტის ფარგლებში გამოცემული ორენოვანი გაზეთის პრეზენტაცია გამართეს. პრეზენტაციაზე სამოქალაქო განათლების კლუბის წევრებმა ისაუბრეს საზოგადოების წინაშე მდგარ აქტუალურ საკითხებზე, რომლებიც ორენოვანი გაზეთის ყურადღების ცენტრში მოექცა. ასევე დასძინეს, რომ მსგავსი პროექტები და ღონისძიებები დაეხმარება ახალგაზრდებს ენობრივი ბარიერის დაძლევაში.

18 მაისს, 15:00 საათზე, სასტუმრო „თბილისი მარიოტში" გაიმართება საზოგადოებრივი ორგანიზაციების ვებპორტალის – www.csogeorgia.org – პრეზენტაცია. იგი შეიქმნა საზოგადოებრივ ორგანიზაციებს შორის ინფორმაციის გაცვლის, კომუნიკაციის გაუმჯობესების, რესურსების გაზიარების მიზნით. ასევე, საერთაშორისო ორგანიზაციების წარმომადგენლებს, საზოგადოებას, ნებისმიერ დაინტერესებულ პირს ეს ვირტუალური სივრცე საშუალებას მისცემს, დროის და ენერგიის მინიმალური დანახარჯით მიიღოს ინფორმაცია მესამე სექტორის შესახებ. ვებპორტალი – www.csogeorgia.org შეიქმნა სამოქალაქო საზოგადოების ინსტიტუტის და ფონდ „ღია საზოგადოება – საქართველოს" პარტნიორობით, ასევე ფონდ EED–ისა და ევროკავშირის  (EU) მხარდაჭერით.

თბილისი. კავშირმა „ადამიანებისთვის, განსაკუთრებულ ზრუნვას რომ საჭიროებენ"  სხვადასხვა ნივთების გამოფენა–გაყიდვა მოაწყო. ნივთებს საზოგადოებრივი ორგანიზაციის ბენეფიციარები, შეზღუდული შესაძლებლობის მქონე მოზრდილები ამზადებენ. ისინი ასევე მასპინძლობდნენ ექსკლუზიური ნივთების დასათვალიერებლად და შესაძენად მისულ სტუმრებს. გამოფენაზე წარმოდგენილი იყო სურნელოვანი სანთლები, სხვადასხვა სახი რვეულები, გობელენები, თექისგან დამზადებული სხვადასხვა პროდუქცია, ხის ნივთებიდა ა.შ. იგი 11–დან  7 საათამდე გრძელდებოდა. ორგანიზაცია წელიწადში ორჯერ მართავს გამოფენას – საშობაოდ და სააღდგომოდ. წელს ტრადიციას გადაუხვიეს და წინასააღდგომო გამოფენა გაზაფხულზე გადმოიტანეს.

კახეთი. სათემო განვითარების ცენტრი „ლელი" ლაგოდეხის მუნიციპალიტეტის 6 სოფელში ქალთა უფლებების შესახებ სემინარებს მართავს. „ამჟამად ვახორციელებთ პროექტს, რომელიც ეხება ქალთა უფლებებს. ლაგოდეხის მუნიციპალიტეტის სოფლებში, თითქმის ყოველდღიურ რეჟიმში, ვატარებთ ტრენინგებს", აცხადებს გელა თედეევი, სათემო ორგანიზაცია „ლელის" დამფუძნებელი. სათემო განვითარების ცენტრი „ლელი" ლაგოდეხის მუნიციპალიტეტის სოფელ ლელიანში 2007 წლიდან ფუნქციონირებს და მუშაობს როგორც ზდასრულთა განათლების, ქალთა უფლებების, ასევე სოფელში არსებული პრობლემების მოკვლევის, მისი გადაჭრის გზების ძიებისა და თემის განვითარების მიმართულებით.

თბილისი. რეგიონული მედიის ასოციაციამ, დიპლომატიური კორპუსის, საზოგადოებრივი ორგანიზაციების წარმომადგენლებთან და ჟურნალისტებთან, 11 მაისს სასტუმრო „თბილისი მარიოტში" შეხვედრა გამართა. ორგანიზატორებმა მოწვეულ სტუმრებს წარუდგინეს ბეჭდური მასალა – „წინასაარჩევნო პერიოდში რეგიონული მედიის წარმომადგენლებზე განხორციელებული ზემოქმედების ფაქტები". ბეჭდურ მასალაში ასახულია ჟურნალისტური საქმიანობის ხელისშეშლის 17 შემთხვევა. რომელთა ნაწილზეც უშუალოდ, თავად იმ  ჟურნალისტებმა ისაუბრეს, რომლებიც თავიანთ პროფესიულ საქმიანობაში წინააღმდეგობას წააწყდნენ.  რეგიონული მედიის ასოციაციამ ამ საკითხებზე გადაღებული ფილმის ჩვენებაც მოაწყო, შეხვედრის ბოლოს გაიმართა დისკუსია.

თბილისი. სასტუმრო „თბილისი მარიოტში" საერთაშორისო ორგანიზაციამ „ნიდერლანდების ინსტიტუტმა მრავალპარტიული დემოკრატიისთვის" (ნიმდ) პუბლიკაციის პრეზენტაცია გამართა. ნარკვევი სამ თემატურ მიმართულებად იყოფა: შიდა პარტიული დემოკრატია გენდერულ ჭრილში, ახალგაზრდების პოლიტიკური საქმიანობა და ადგილობრვ თვითმართველობის საქმიანობაში მოსახლეობის ჩართულობა. მომზადებული ნარკვევის მიხედვით,  ქალთა როლი და ჩართულობა გადაწყვეტილების მიღების პროცესში სულ უფრო და უფრო მცირდება. ასევე მცირდება, ახალგაზრდების როლი პოლიტიკურ ცხოვრებაში. პუბლიკაცია ასევე გვთავაზობს სხვადასვა რეკომენდაციებს, მათ შორის,  როგორ გაიზარდოს ადგილობრივი მოსახლეობის ჩართულობის ხარისხი თვითმართველობის საქმიანობაში. ნაშრომში ასევე ნაკლვევია მოსახლეობის ჩართულობა ადგილობრივი თვითმმართველი ერთეულის საბიუჯეტო პროცესში. „ჩატარებული კვლევა ცხადყოფს, რომ ადგილობრივი თვითმმართველობა ცდილობს უკეთესი კავშირი დაამყაროს მოსახლეობასთან და ბიუჯეტი მოარგოს მათ საჭიროებებს. თუმცა, აღსანიშნავია, რომ მოსახლეობის ჩართულობა ძირითადად პასიურ ხასიათს ატარებს და მხოლოდ ინფორმაციის მიწოდებით შემოფიარგლება. მოსახლეეობა არ არის გადაწყვეტილების მიმღები მისაღები სერვისების თაობაზე, იგი მხოლოდ აქტიური მომხმარებელია. დაბალი სამოქალაქო განათლებისა და კულტურის ქონასთან ერთად გადაწყვეტლების მიღებაში ნაკლები ჩართულობა უბიძგებს მათ, იყვნენ პასიურები" .  - ნათქვამია ნაშრომში.

თბილისი. „გრინფისის მხარდაჭერთა ჯგუფის" აქცია-ბრიფინგი გაიმართა გარემოს დაცვის სამინისტროსთან. აქტივისტები ჰესების მშენებლობის და ტყის მასივების გაჩეხვის შეწყვეტას ითხოვენ, რადგანაც ეს , მათი თქმით, იწვევს კლიმატურ ცვლილებებს. ორგანიზაცია საზოგადოებრივი კამპანიების გაგრძელებას გეგმავს.

თბილისი. საზოგადოებრივი ორგანიზაციის „21–ე საუკუნის" ორგანიზებითა და კოორდინირებით ინტერრელიგიური ჯგუფის შეხვედრა გაიმართა. ინტერრელიგიური სამუშაო ჯგუფი ერთი წლის წინათ შეიქმნა და მასში შედის 11 რელიგიური გაერთიანება. შეხვედრაზე საქართველოს საპატრიარქოს მიერ ინიცირებულ განცხადებებზე იმსჯელეს, რომელიც საქართველოს და თურქეთს შორის კულტურული მემკვიდრეობის შესახებ მოსალოდნელი ხელშეკრულების პირობების გასაჯაროებასა და ახოსპირელის ქუჩაზე მდებარე ეკლესიის რესტავრაციის საკითხებს ეხებოდა, თუმცა შეთანხმება ვერ შედგა.

კახეთი. გასულ კვირას გურჯაანში „ქალთა კლუბი" დაარსდა. მისი მიზანია ადგილობრივ სოფლებში მცხოვრები ქალების ჩართვა–გაწევრიანება. ამ ეტაპზე კლუბში 50–მდე ქალბატონია გაწევრიანებული. „უნდა აღინიშნოს, რომ ყველა მათგანი აქტიური და სადაქმებულია", – აცხადებს ქეთევან გელიტაშვილი. საზოგადოებრივი ორგანიზაციის – „ახალი თაობა დემოკრატიისათვის" – დამფუძნებელი. სწორედ ამ ორგანიზაციის ხელშეწყობით დაარსდა „ქალთა კლუბი". საზოგადოებრივი ორგანიზაცია „ახალი თაობა დემოკრატიისათვის" გურჯაანის მუნიციპალიტეტში 2008 წლიდან ფუნქციონირებს, ბოლო ერთი წელია ორგანიზაცია გენდერულ საკითხებზე მუშაობს. ქეთევან გელიტაშვილის თქმით, გენდერულ საკითხებზე მუშაობა ქალების პასიურობამ გამოიწვია – „კლუბში მუნიციპალიტეტში მცხოვრები ცნობილი ქალბატონების გაწევრიანებას ვგეგმავთ, რათა მათ თავიანთი წარმატებული გამოცდილება გაუზიარონ საზოგადოებას".

თბილისი. „რეაბილიტაციის პროცესი ფასადს მიღმა" - ასე ჰქვია კვლევას, რომელიც საქართველოს ახალგაზრდა იურისტთა ასოციაციამ მოამზადა. სპეციალისტებმა შეისწავლეს ოთხი კონკრეტული არასამეწარმეო, არაკომერციული იურიდიული პირის მიერ განხორციელებული საქმიანობა და მასთან დაკავშირებული ისეთი საკითხები, როგორიცაა მათი ფინანსური და ქონებრივი შენატანები, ფინანსების გამჭრივალობა,საჯაროობა და ა.შ.   სრულად

გურია. „სტუდენტურ–ახალგაზრდულ სათათბიროში" მომუშავე  EVS მოხალისეებმა, ადგილობრივ ახალგაზრდებთან ერთად „ევროპის დღე" აღნიშნეს. ღონისძიება მოიცავდა როგორც გასართობ, სპორტულ, ასევე შემეცნებითი შინაარსის აქტივობებს.  ადგილობრივი ახალგაზრდები აქტიურად ჩაერთნენ ვიქტორინაში და ევროპული ქვეყნების შესახებ საკუთარი ცოდნა გამოსცადეს. ევროპელმა მოხალისეებმა კი მცირე „აღლუმი" მოაწყვეს და საკუთარი ქვეყნები წარმოადგინეს – „აღლუმი" ოზურგეთის თეატრიდან დაიწყო, რამდენიმე ქუჩა მოიცვა და ისევ თეატრთან დასრულდა. მოხალისეებმა საინფორმაციო ლიფლეტები დაურიგეს მოსახლეობას, რომელშიც აღწერილი იყო 9 მაისის – „ევროპის დღის" წარმოშობის ისტორია და ასევე მოხალისეობის შესახებ ინფორმაცია და მისი მნიშვნელობა. ღონისძიების ფარგლებში ასევე გაიმართა ოზურგეთის საჯარო სკოლების მოსწავლეთა ნამუშევრების გამოფენა ღია ცის ქვეშ, რომელიც ანტიდისკრიმინაციულ თემატიკას მიეძღვნა.

11 მაისს, 13.00 საათზე, სასტუმრო „თბილისი მარიოტში" საქართველოს რეგიონული მედიის ასოციაციისა და კოალიციის –  „არჩევნის თავისუფლებისთვის" – წარმომადგენლები, წინასაარჩევნო პერიოდში მედიის წინაშე არსებული პრობლემების შესახებ, დიპლომატიურ კორპუსთან შეხვედრას გამართავენ.

11 მაისს, ახალციხეში დასუფთავების აქცია მოეწყობა. მასში მონაწილეობას მიიღებენ  ადგილობრივი თვითმმართველობის, საზოგადოებრივი ორგანიზაციების, უნივერსიტეტისა და სკოლების წარმომადგენლები, ასევე ადგილობრივი მოსახლეობა. აქცია, სახელწოდებით - ახალციხე-სუფთა ქალაქი – ადგილობრივი მუნიციპალიტეტისა და აშშ–ს საერთაშორისო განვითარების სააგენტოს მიერ დაფინანსებული დემოკრატიული მმართველობის პროგრამის (G3) ინიციატივით  ეწყობა.

11 მაისს, 13.00 საათზე, სასტუმრო „თბილისი მარიოტში" ნიდერლანდების მრავალპარტიული დემოკრატიის ინსტიტუტის დაკვეთით მომზადებული პუბლიკაციის – „შიდაპარტიული დემოკრატია და ადგილობრივი თვითმმართველობა" – პრეზენტაცია გაიმართება.

11 მაისს, 12.00 საათზე, სასტუმრო „რედისონში" საქართველოს ახალგაზრდა იურისტთა ასოციაცია პროექტის – „ანგარიშვალდებულებისა და გამჭვირვალობის ხელშეწყობა საქართველოში" – ფარგლებში მომზადებული კვლევის პრეზენტაციას გამართავს.

თბილისი. 10 მაისს, ილიას სახელმწიფო უნივერსიტეტში გენდერის თემაზე სემინარი გაიმართა. გენდერული კონცეფცია, გენდერული როლები,  სტერეოტიპები, გენდერული თანასწორობა  და თემები განიხილეს სემინარზე. შეხვედრის ორგანიზატორი საზოგადოებრივი ორგანიზაცია „ჰელფინგ ჰენდი" იყო, რომელიც „სამოქალაქო საზოგადოების განვითარების ცენტრთან" ერთად ახორციელებს პროექტს „ჩვენ გვაქვს ძალა, რომ საკუთარი უფლებები დავიცვათ". „არასდროს, არასდროს არ აწყენინოთ ქალებს" ამ პათოსით დასრულდა სემინარი სტუდენტებთან, თუმცა იმავე თემაზე შეხვედრებს ორგანიზატორები სხვა უნივერსიტეტებშიც გეგმავენ. პროექტის დამფინანსებელია "ქალთა ფონდი საქართველოში".

აჭარა. 9 მაისი ევროპის საერთაშორისო დღეა. იგი სათავეს 1950 წლიდან იღებს, როდესაც საფრანგეთის საგარეო საქმეთა მინისტრი რობერ შუმანი პარიზში განცხადებით გამოვიდა და ევროპული ინტეგრაციის იდეა წამოაყენა. ევროპის დღესთან დაკავშირებით, საზოგადოებრივმა ორგანიზაციამ ,,რეაბილიტაციის ცენტრმა" ბენეფიციარებისათვის ღონისძიება გამართა. შეხვედრაზე პროექტის კოორდინატორმა მათ დეტალურად გააცნო ევროკავშირის ისტორია და ესაუბრა მისი სიმბოლოების შესახებ. მონაწილეებისთვის სლაიდ-შოუს საშუალებით ნაჩვენები იყო რამდენიმე მაგალითი, თუ რას აკეთებს ევროკავშირი მსოფლიოში თავისი ინტერესების და ფასეულობების წარმოსაჩენად. შეხვედრის ორგანიზატორებმა ბენეფციარებს ევროკავშირისა და საქართველოს ურთიერთობების ისტორია გააცნეს. ევროპის დღისადმი მიძღვნილი ღონისძიება ,,რეაბილიტაციის ცენტრმა" მიმდინარე პროექტის - ,,ახალი ინიციატივა არასრულწლოვანთა მართლმსაჯულებაში" ფარგლებში გამართა. პროექტზე მუშაობა ორგანიზაციამ, ევროკავშირის ფინანსური მხარდაჭერით, 2010 წლის დეკემბრიდან დაიწყო და იგი 2012 წლის ივნისში დასრულდება.

გურია. ახალგაზრდულმა ცენტრმა „პროგრესმა", ჩოხატაურის მუნიციპალიტეტის ორ სოფელში – ხიდისთავსა და ერკეთში, მოსახლეობის ინფორმირების მიზნით ტრიფლეტები გაავრცელა. რომელშიც ასახულია ჩოხატაურის მუნიციპალიტეტის 2012 წლის ბიუჯეტში არსებული სოციალური პროგრამები და ამ პროგრამებისთვის გათვალისწინებული თანხების შესახებ ინფორმაცია. სოფლებში ტრიფლეტები გავრცელება ადგილობრივი სკოლის მოსწავლეების მეშვეობით.

სამცხე–ჯავახეთი. საქართველოს პარლამენტმა საკონსტიტუციო ცვლილებების პროექტის საყოველთაო-სახალხო განხილვის პროცესი დაიწყო. ამ საკითხთან დაკავშირებით შეხვედრა ახალციხის მოსახლეობასთან 2 მაისს, მესხეთის სახელმწიფო-სასწავლო უნივერსიტეტის მეორე კორპუსში გაიმართა. შეხვედრას უნივერსიტეტის პროფესორ-მასწავლებლები, სტუდენტები, საზოგადოებრივი ორგანიზაციის, მედიის, პოლიტიკური პარტიების წარმომადგენლები და სხვა დაინტერესებული პირები ესწრებოდნენ. შეხვედრაზე საპარლამენტო უმრავლესობისა და ოპოზიციური ფრაქციების წარმომადგენლებმა საკონსტიტუციო ცვლილებების პროექტი წარადგინეს და დამსწრე საზოგადოებას ცვლილებებთან დაკავშირებით საკუთარი მოსაზრებები გააცნეს. საკონსტიტუციო ცვლილებების პროექტის თანახმად საქართველოს პარლამენტის წევრად შეიძლება აირჩეს საარჩევნო უფლების მქონე საქართველოს მოქალაქე 21 წლის ასაკიდან. ასევე 21 წელს მიღწეული პირი, რომელიც დაბადებულია და ათი წლის განმავლობაში ცხოვრობს საქართველოში, ამასთანავე აქვს ევროკავშირის წევრი სახელმწიფოს მოქალაქეობა. საქართველოს კონსტიტუციაში შესატანი ცვლილებების საყოველთაო-სახალხო განხილვა უკვე გაიმართა ბათუმში, ზუგდიდში და სხვა ქალაქებში. ეს პროცესი ეროვნულ-დემოკრატიული ინსტიტუტის (NDI) ორგანიზებით და და აშშ-ს საერთაშორისო განვითარების სააგენტოს (USAID) ფინანსური დახმარებით ხორციელდება.