17 მაისს, 13:30 საათზე, „ექსპო-ჯორჯიაში“ ავსტრიის განვითარების თანამშრომლობის (ADC) დაფინანსებით მიმდინარე პროექტის „ახალგაზრდული მეწარმეობა სოფლის განვითარებისთვის“ (RDYE) გახსნის ღონისძიება გაიმართება. მისამართი: თბილისი, საგამოფენო ცენტრი „ექსპო ჯორჯია“, მე-3 პავილიონი.

თბილისი. ღია საზოგადოების ფონდის აღამსრულებელი დირექტორის ქეთი ხუციშვილის შეფასებით, „დღეს ჩვენ გავხდით მომსწრე, კიდევ ერთი პოლიტიკურად მოტივირებული პროცესისა და გადაწყვეტილებისა. ის საქმე, რომელიც ნიკა გვარამიას წინააღმდეგ არის აღძრული, იურისტების შეფასებით, საერთოდ არ შეიცავს სისხლის სამართლის დანაშაულის ნიშნებს. შესაბამისად, უნდა განხილულიყო როგორც სამეწარმეო საქმე. ჩვენ ვნახეთ, რომ მთელი ამ წლების მანძილზე, ხელისუფლება ვერ ფარავდა სურვილს, რომ დაეპატიმრებინა ნიკა გვარამია, რაც შეიძლება მეტად შეეზღუდა საქართველოში დამოუკიდებელი და კრიტიკული მედია. დღეს კიდევ ერთი, აშკარად რეპრესიული ნაბიჯი გადადგა არა მხოლოდ სასამართლომ, არამედ ხელისუფლებამ, რომლის დავალებითაც მოქმედებს სასამართლო“, ამბობს ქეთი ხუციშვილი. სრულად...  წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის განცხადებით, სასამართლო სისტემის დამოუკიდებლობასთან დაკავშირებული სისტემური გამოწვევებისა და მართლმსაჯულების პოლიტიკური ინსტრუმენტალიზების ტენდენციის ფონზე, ნიკა გვარამიას დაპატიმრება ხელისუფლების მიმართ კრიტიკულად განწყობილ მედიაზე ზეწოლის, პოლიტიკური პოლარიზებისა და კრიზისის გაღრმავებისკენ მიმართული კიდევ ერთი სახიფათო პრეცედენტია. მით უფრო მაშინ, როდესაც მოსამართლის მიერ სასჯელის ყველაზე მკაცრი ფორმის გამოყენება, განსახილველი დანაშაულის შინაარსის და ბუნების გათვალისწინებით, აშკარად არაპროპორციული ჩანს სადავო ქმედებით დამდგარ ზიანთან. სრულად... წყარო: socialjustice.org.ge

თბილისი. თბილისის საქალაქო სასამართლომ ე.წ „რუსთავის 2-ის“ საქმეზე განაჩენი გამოაცხადა. სასამართლომ ნიკა გვარამიას სასჯელის სახედ და ზომად 3 წლისა და 6 თვის ვადით თავისუფლების აღკვეთა განუსაზღვრა. საქართველოს ახალგაზრდა იურისტთა ასოციაცია (საია) მონიტორინგს უწევდა სისხლის სამართლის პროცესებს და მიიჩნევს, რომ გამოტანილი განაჩენი პრობლემურია როგორც სამართლებრივი თვალსაზრისით, ასევე, არსებობს საეჭვო გარემოებები მართლმსაჯულების განხორციელებასთან მიმართებით. „საგულისხმოა ისიც, რომ ტელეკომპანია „მთავარი არხის“ დირექტორის და წილის მფლობელის მიმართ დაუსაბუთებელი გადაწყვეტილება, სერიოზულ ზიანს მიაყენებს კრიტიკული სარედაქციო პოლიტიკის მქონე მაუწყებელს, რაც დამატებით შეუწყობს ხელს ქვეყანაში არსებული პოლარიზებული გარემოს გამძაფრებას“, ნათქვამია ორგანიზაციის განცხადებაში. სრულად... წყარო: gyla.ge

თბილისი. 17 და 18 მაისს, USAID-ის სამოქალაქო საზოგადოების ჩართულობის პროგრამა გამართავს საინფორმაციო შეხვედრებს სტრატეგიული მხარდაჭერის და პოლიტიკის კვლევის საგრანტო კონკურსზე. სრულად... წყარო: პროგრამის გვერდი სოციალურ ქსელში

თბილისი. საერთაშორისო გამჭვირვალობა - საქართველო მიიჩნევს, რომ კრიტიკული ტელევიზიის ხელმძღვანელის, ნიკა გვარამიას დასჯით სასამართლომ პოლიტიკური დაკვეთა შეასრულა. „საქმის მასალების შესწავლისა და პროცესზე დაკვირვების საფუძველზე შეგვიძლია დავასკვნათ, რომ  აღნიშნული საქმე არის პოლიტიკურად მოტივირებული, რომლის მიზანი ნიკა გვარამიას დასჯა და კრიტიკული ტელეკომპანიის საქმიანობის შეფერხებაა. მედიის ცენზურისა და დაშინებისათვის მართლმსაჯულების სისტემის გამოყენება სახიფათო გზავნილია სხვა კრიტიკული მედიასაშუალებებისთვისაც. ამასთან, აღნიშნული განაჩენი გაგრძელებაა იმ პოლიტიკური დევნისა, რომელსაც სახელმწიფო  ოპონენტების წინააღმდეგ წლებია აწარმოებს“, ნათქვამია განცხადებაში. სრულად...  წყარო: transparency.ge

თბილისი. WeResearch-მა ჰაინრიხ ბიოლის ფონდის თბილისის ოფისის სამხრეთ კავკასიის რეგიონული ბიუროს მხარდაჭერით განახორციელა კვლევა „საქართველოს ახალგაზრდები და ისტორია: გამოცდილების, დამოკიდებულებებისა და ღირებულებების კვლევა“. „კვლევა შეეხებოდა იმასაც, თუ როგორ ესმით ახალგაზრდებს საქართველოს ისტორია, რა იციან და რა აინტერესებთ ამ სფეროში, რა ძირითადი წყაროები აქვთ ისტორიის შესახებ ინფორმაციის მისაღებად და როგორ აფასებენ ისტორიის სწავლის გამოცდილებას“. სრულად... წყარო: ge.boell.org

16-17 მაისს, 19:00 საათზე ქართველი სტუდენტები თავისუფლებისთვის გიწვევთ ონლაინ ლექციების ციკლზე „LGBTQ+ უფლებები და თავისუფლება“. სრულად...

16 მაისს, 16:00 საათზე, მოსამართლის დღესთან დაკავშირებით, USAID სამართლის უზენაესობის პროგრამა მართავს ჰიბრიდულ ღონისძიებას სტუდენტების შეკითხვა მოსამართლეს. სრულად...

16 მაისს, 15:30 საათზე, USAID სამართლის უზენაესობის პროგრამა მოსამართლეების და სტუდენტების შეხვედრას გამართავს, რომელსაც აშშ-ის ელჩი საქართველოში, კელი დეგნანი გახსნის. მისამართი: თბილისი, სასტუმრო „თბილისი მერიოტი“

იმერეთი. თუ ცხოვრობთ ჭიათურაში, ან მის რომელიმე სოფელში - ითხვისში, შუქრუთში, პერევისაში, და თუ გაწუხებთ ის, რაც გარშემო წიაღის მოპოვების შედეგად ხდება, მობრძანდით სოფლის შეკრებაზე 21 მაისს, 14:00 საათზე, სოფელ ითხვისის დარბაზში. შეხვედრა სოციალური სამართლიანობის ცენტრისა და საქართველოს ახალგაზრდა იურისტთა ასოციაციის ორგანიზებით ტარდება. „ჩვენი მიზანია სოფლის მოსახლეობამ და მათმა მხარდამჭერმა უფლებადამცველმა ორგანიზაციებმა ერთად ვიმსჯელოთ სოფელში არსებულ მდგომარეობაზე და ადგილობრივთა საჭიროებების გადაჭრის სამართლებრივ გზებზე“. სრულად... წყარო: სოციალური სამართლიანობის ცენტრის გვერდი სოციალურ ქსელში

აჭარა. სამართლიანი არჩევნებისა და დემოკრატიის საერთაშორისო საზოგადოების (ISFED) განცხადებით, შუალედურ არჩევნებში გამარჯვებული საკრებულოს მაჟორიტარი წევრის უფლებამოსილების ცნობის წესის ცვლილება ბათუმის მუნიციპალიტეტის საკრებულოში შექმნილი პოლიტიკური ჩიხის „ქართული ოცნების“ სასარგებლოდ გადაწყვეტას ემსახურება. ორგანიზაციის ცნობით, საქართველოს პარლამენტში მმართველი პარტიის დეპუტატების მიერ ინიცირებულია საკანონმდებლო ცვლილებები „ადგილობრივი თვითმმართველობის კოდექსსა“ და „საქართველოს საარჩევნო კოდექსში“, რომელთა მიხედვით, ექსკლუზიურად იცვლება შუალედურ არჩევნებში გამარჯვებული მაჟორიტარი საკრებულოს წევრის უფლებამოსილების ცნობის წესი. კერძოდ, შუალედურ არჩევნებზე გამარჯვებული საკრებულოს მაჟორიტარი წევრის უფლებამოსილება არა მუნიციპალიტეტის საკრებულოს მიერ ცნობის, არამედ შესაბამისი შემაჯამებელი ოქმის ცესკოს ვებ-გვერდზე გამოქვეყნების საფუძველზე იქნება შესაძლებელი. „წარმოდგენილი საკანონმდებლო ინიციატივა უნდა შეფასდეს, როგორც პარლამენტის პოლიტიკური მიზნებით უხეშად ჩარევა ერთი მუნიციპალიტეტის წარმომადგენლობითი ორგანოს საქმიანობაში, რაც ეწინააღმდეგება ეფექტიანი თვითმმართველობის იდეას, ადგილობრივ დონეზე კონსესუსზე დაფუძნებული პოლიტიკის შექმნას და პლურალისტური დემოკრატიის ჩამოყალიბებას. მოვუწოდებთ მმართველ პარტიას საკანონდებლო ჩარევის ნაცვლად, ძალისხმევა პოლიტიკური კრიზისის განმუხტვისკენ მიმართოს და დემოკრატიული პროცესების ინტერესების შესაბამისად იმოქმედოს“, ნათქვამია ISFED-ის განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებათა ცენტრის განცხადებით, ქალის მკვლელობის საქმეზე პროკურატურამ გენდერული მოტივი არ გამოკვეთა. ორგანიზაციის კახეთის ოფისი იცავს დაზარალებულის უფლებამონაცვლის სამართლებრივ ინტერესებს გენდერული ნიშნით ქალის მკვლელობის სისხლის სამართლის საქმეზე.  ადამიანის უფლებათა ცენტრმა გამოძიების დაწყების ეტაპზევე გამოხატა პოზიცია ბრალის ფორმულირებასთან და ქმედების კვალიფიკაციასთან დაკავშირებით, რის თაობაზეც  მიმართა საქმეზე როგორც გამომძიებელს, ასევე კახეთის საოლქო პროკურატურას. ორგანიზაცია შეშფოთებულია, რომ კახეთის საოლქო პროკურატურამ არ დააკმაყოფილა მოთხოვნა ქალის განზრახ მკვლელობის საქმეზე გენდერული ნიშნის გამოკვეთის თაობაზე. ცენტრი მოუწოდებს პროკურატურას და საგამოძიებო ორგანოებს, განსაკუთრებული ყურადღება მიაქციონ კონკრეტულად ამ საქმეში და ასევე ზოგადად, ამგვარი კატეგორიის საქმეების გამოძიებისას გენდერულ ნიშანს, რაც ხელს შეუწყობს შემდგომში ასეთი ტიპის დანაშაულთა პრევენციას და საქმეების სრულყოფილ/ობიექტურ გამოძიებას. სრულად... წყარო: www.hrc.ge

თბილისი. სოციალური სამართლიანობის ცენტრის ინფორმაციით,  სასამართლომ მორიგება დაამტკიცა სამშენებლო კომპანია - „შპს ჯევიკე ჰოსფითალითსა“ და მშენებლობაზე გარდაცვლილი არასრულწლოვანი მუშის დედას - იამზე ბეშკენაძეს შორის. მის ინტერესებს დავაში სოც. სამართლიოანობის ცენტრი წარმოადგენდა. „Სამშენებლო სამუშაოები შრომის უსაფრთხოების ნორმების დარღვევით მიმდინარეობდა. Მორიგების შედეგად. კომპანიამ დედისთვის მორალური ზიანის ანაზღაურების ვალდებულება იკისრა“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: მონაცემების გლობალური ბარომეტრის კვლევის შედეგები - საქართველოსა და აღმოსავლეთ ევროპის და ცენტრალური აზიის რეგიონის ქვეყნების შედეგების მიმოხილვა. „მონაცემების გლობალური ბარომეტრი (GDB) ერთიანი მეთოდოლოგიით, სხვადასხვა ინდიკატორების საფუძველზე, აფასებს 108 ქვეყანას და შედეგად ადგენს ქვეყნების რეიტინგს. ბარომეტრის მეშვეობით შესაძლებელია არსებული გამოწვევების და კარგი პრაქტიკის გამოკვეთა, და ქვეყნების შედეგების ერთმანეთთან შედარება. GDB-ის საერთო შედეგების მიხედვით, აღმოსავლეთ ევროპის და ცენტრალური აზიის რეგიონის 12 ქვეყნიდან საქართველო 40.25 ქულით მეხუთე ადგილს იკავებს, უკრაინის, სომხეთის, ყაზახეთის და მოლდოვას შემდეგ. საქართველომ რეგიონში ერთ-ერთი დაბალი შედეგი მონაცემთა მართვის/განკარგვის კომპონენტში აჩვენა, რამაც ცხადყო, რომ აუცილებელია ღია მონაცემების ერთიანი პოლიტიკის, საჯარო მონაცემების მიმოცვლის საკანონმდებლო ჩარჩოსა და საჯარო მონაცემების მართვის/განკარგვის ერთიანი სტანდარტის არსებობა“. სრულად... წყარო: idfi.ge

თბილისი. საქართველოს პრობონოქსელი სამოქალაქო ორგანიზაციებს აძლევს შესაძლებლობას მიიღონ მაღალკვალიფიციური (პრო ბონო) საექსპერტო დახმარება, რაც მათთვის, მეტწილად, მიუწვდომელია.  ქსელი „საქართველოს სტრატეგიული კვლევებისა და განვითარების ცენტრის“ ინიციატივით დაარსდა და CSRDG მას შემდეგ საქმიანობის საექსპერტო და ადმინისტრაციულ მხარდაჭერას კოორდინირებს. პრო ბონო საქმიანობას მხარს უჭერს ევროკავშირი და კონრად ადენაუერის ფონდი (KAS). სრულად... წყარო: ორგანიზაციის გვერდი სოციალურ ქსელში

საქართველო. ფილმი „ევროპა და მე“ ოთხ სამიზნე რეგიონში: კახეთში, რაჭა-ლეჩხუმში, გურიასა და იმერეთში გადაღებულ ოთხ ამბავს აერთიანებს. ეს ფილმი მოგვითხრობს ჩვენს საერთო ღირებულებებზე – მრავალფეროვნებაზე, თანასწორობაზე, თავისუფლებასა და დემოკრატიაზე.ვროკავშირის მხარდაჭერით გადაღებული ფილმის „მე და ევროპა“ და მასთან დაკავშირებული რესურსების ნახვა შეგიძლიათ აქ... სრულად... წყარო: eu4georgia.eu

თბილისი. გაეროს განვითარების პროგრამა (UNDP) და გლობალური კინორეკლამის ასოციაცია „SAWA“ იწყებენ რვაკვირიან კამპანიას კლიმატის ცვლილების შესახებ... „კამპანია ეხმიანება UNDP-ის გლობალურ ინიციატივას „ნუ აირჩევ გადაშენებას“ და აგებულია დინოზავრი ფრენკის ვიდეოს გარშემო, რომელმაც შარშან 1.5-მილიარდიანი აუდიტორია მოიცვა და  საერთაშორისო მედიაში 3,000-ჯერ გაშუქდა“. სრულად... წყარო: ორგანიზაციის გვერდი სოციალურ ქსელში

სამეგრელო. საერთაშორისო გამჭვირვალობა - საქართველოს კვლევის თანახმად, სენაკის მერიის 2022 წლის მარტში გამოცხადებულ 5 ტენდერში - ჯამური ღირებულება 2 614 550 ₾ - სენაკის მერის, ვახტანგ გადელიას ბიძის, დემურ გადელიას კომპანიამ, სს „არქეოპოლისმა“ და ბიძაშვილის, იოსებ გადელიას კომპანიამ, შპს „ინდიკომ“ უკონკურენტოდ გაიმარჯვეს.   ორგანიზაციის ინფორმაციით, სენაკის მერიის ადმინისტრაციული სამსახურის უფროსი, ნანა ზარანდია, წარსულში „არქეოპოლისის“ დირექტორი იყო. ის სენაკის მერიის სატენდერო კომისიის თავმჯდომარის მოადგილეცაა და შესყიდვის დოკუმენტებში ხელს აწერს, რომ არ აქვს ინტერესთა კონფლიქტი ტენდერში გამარჯვებულ კომპანიებთან. „საერთაშორისო გამჭვირვალობა - საქართველო” მოუწოდებს სახელმწიფო უსაფრთხოების სამსახურის ანტიკორუფციულ სააგენტოს, შეისწავლოს სენაკის მერიის ტენდერებში სს „არქეოპოლისისა” და შპს „ინდიკოს” მონაწილეობის პროცესი და დაადგინოს, შეიცავს თუ არა კორუფციის შესაძლო ნიშნებს. სრულად... წყარო: transparency.ge

კახეთი. გაეროს ბავშვთა ფონდისა და Georgian Institute for Debate and Education • GIDE-ს პროექტის ფარგლებში, კახეთის რეგიონის 20 სოფლის სკოლაში დებატების კლუბები დაარსდა.  პროექტი ხორციელდება ნორვეგიის ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

13 მაისს, 12:00 საათზე, საქართველოს პოლიტიკის ინსტიტუტის (GIP) ორგანიზებით, გაიმართება საქართველო-მოლდოვა-სომხეთის ფორუმი: შეცვლის თუ არა ომი უკრაინაში დემოკრატიას და მმართველობას აღმოსავლეთ პარტნიორობის ქვეყნებში? სრულად...