სამეგრელო. სამართლიანი არჩევნების (ISFED) ინფორმაციით, ორგანიზაცია ზუგდიდის მოსწავლე-ახალგაზრდობის სასახლიდან პოლიტიკური ნიშნით გათავისუფლებული თანამშრომლის უფლებებს დაიცავს. „ზუგდიდის მუნიციპალიტეტის „მოსწავლე-ახალგაზრდობის სასახლის“ მატერიალურ-ტექნიკურ საკითხთა განყოფილების უფროსი, თამარ ქომეთიანი აცხადებს, რომ სამსახურიდან გათავისუფლების მიზნით, მიზანმიმართულად დევნიდნენ და ხელოვნურად შეუქმნეს გათავისუფლების საფუძველი. ქომეთიანის პოლიტიკური დევნა მას შემდეგ დაიწყო, რაც პარტია „საქართველოსთვის“ მხარდაჭერა გამოუცხადა და თავისი პოლიტიკური შეხედულებები გაასაჯაროა“. სრულად... წყარო: isfed.ge

კახეთი. 28 იანვარს თელავის განათლების განვითარების და დასაქმების ცენტრმა (TEDEC), განათლების განვითარების და დასაქმების ცენტრთან (EDEC) ერთად, დასაქმების მხარდამჭერი სერვისების განვითარების თემაზე, თელავში, მრგვალი მაგიდა გამართა. შეხვედრა ევროკავშირის მიერ დაფინანსებული პროექტის „ისწავლე დასაქმებისთვის“ ფარგლებში ჩატარდა. გაიგეთ მეტი... წყარო: edec.ge

თბილისი. ევროკავშირის წარმომადგენლობამ საქართველოში და ჯანმრთელობის მსოფლიო ორგანიზაციამ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს COVID-19-თან ბრძოლის მიზნით სამედიცინო აღჭურვილობა გადასცა. „ხელსაწყოებით სოფლის ამბულატორიები აღიჭურვება ქვეყნის მასშტაბით მოქალაქეებისთვის ჯანდაცვაზე უკეთესი ხელმისაწვდომობის უზრუნველსაყოფად“. სრულად... წყარო: eeas.europa.eu

იმერეთი. ადგილობრივი დემოკრატიის სააგენტო საქართველომ, პროექტის „სამოქალაქო საზოგადოების ინიციატივა“ ფარგლებში, კონსულტაციები გასცა სამოქალაქო საზოგადოებრივი და სათემო ორგანიზაციების წარმომადგენლებისათვის ბაღდათის მუნიციპალიტეტში. შეხვედრები ტარდება პროექტის „სამოქალაქო საზოგადოების ინიციატივის“ ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

1 თებერვალს, 18:00 საათზე, საქართველოს ინოვაციების და ტექნოლოგიების სააგენტო გამოცხადებულ საგრანტო პროგრამებთან დაკავშირებით საინფორმაციო დღეს გამართავს. სრულად...

თბილისი. საქართველოს ახალგაზრდა იურისტთა ასოციაციის ინფორმაციით, პაციენტმა, რომლის ინტერესებსაც სასამართლოში ორგანიზაციის გორის ოფისი იცავდა, გიორგი აბრამაშვილის სახელობის სამხედრო ჰოსპიტალს სასამართლო დავა მოუგო. „სასამართლომ სამედიცინო დაწესებულებას პაციენტის სასარგებლოდ სამედიცინო მომსახურების ხარჯების და მორალური ზიანის ანაზღაურება დააკისრა“. სრულად... წყარო: gyla.ge

თბილისი. სახალხო დამცველმა შრომით ურთიერთობაში სექსუალური შევიწროების ფაქტი დაადგინა და შემავიწროებელს და ასევე დამსაქმებელ შპს „ევოლუშენ ჯორჯიას“ რეკომენდაციით მიმართა.  „ომბუდსმენმა შეისწავლა საქმეში არსებული მასალები, მათ შორის, განმცხადებლის გამოკითხვის ოქმი, მხარეთა შორის არსებული მიმოწერა, ასევე მესამე პირისგან მიღებული ინფორმაცია და მივიდა დასკვნამდე, რომ კოლეგის მხრიდან ადგილი ჰქონდა განმცხადებლის მიმართ არასასურველ, სექსუალური ხასიათის ვერბალურ ქცევას, რომელმაც დაამცირა და შეურაცხყოფა მიაყენა დასაქმებულს“.  სრულად... წყარო: ombudsman.ge

თბილისი. ღირსეული შრომის პლატფორმის წევრი ორგანიზაციები მწუხარებას გამოთქვამენ მეშახტის გარდაცვალების გამო და სახელმწიფოს მოუწოდებენ დაუყოვნებლივ გამოიკვლიოს მომხდარი ინციდენტის გამომწვევი მიზეზები და დააყენოს კომპანიის შესაბამისი მაღალი თანამდებობის პირთა პასუხისმგებლობის საკითხი. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი, სამართლიანი არჩევნებისა და დემოკრატიის საერთაშორისო საზოგადოება (ISFED) და საქართველოს ახალგაზრდა იურისტთა ასოციაცია (Gyla) კულტურის მინისტრის მიერ გათავისუფლებული თანამშრომლების ინტერესებს დაიცავენ. „კულტურული მემკვიდრეობის დაცვის ეროვნული სააგენტოსა და საქართველოს ეროვნული მუზეუმიდან, ამ ეტაპზე, ჯამში 70-მდე თანამშრომელი გათავისუფლდა. ხოლო ათობით გამორჩეული თანამშრომელი გათავისუფლების შიშის ქვეშ აგრძელებს მუშაობას სხვადასხვა პოზიციებზე ამავე სისტემაში. მინისტრ წულუკიანს მოვუწოდებთ შეწყვიტოს კულტურის სფეროს მაღალპროფესიონალი კადრების დევნა მათი პროფესიული და განსხვავებული მოსაზრებების გამო და გაითვალისწინოს გათავისუფლებული თანამშრომლების ორგანიზებული წინააღმდეგობის მოთხოვნა, შესაბამისი კომპეტენციისა და გამოცდილების ადამიანებს მიეცეს საშუალება, გააგრძელონ მუშაობა საქართველოს კულტურული მემკვიდრეობის ძეგლების, სამუზეუმო ექსპონატებისა და ეროვნული საგანძურის დასაცავად“, ნათქვამია განცხადებაში. განცხადება იხ. ბმულზე... წყარო: socialjustice.org.ge

თბილისი. ადამიანის უფლებათა ცენტრმა გამოაქვეყნა ანალიტიკური დოკუმენტი: ადამიანის უფლებების მდგომარეობა საქართველოში, 2021. „ანგარიშში მიმოხილულია ადამიანის უფლებათა მდგომარეობა საქართველოში 2021 წელს. ტრადიციულად, მასში შესულია ყველა ის მნიშვნელოვანი სამართლებრივი და პოლიტიკური საკითხი, რამაც გავლენა იქონია ქვეყანაში ადამიანის უფლებათა დაცვის სტანდარტზე. დოკუმენტი ეფუძნება ადამიანის უფლებათა ცენტრის, საქართველოში მოქმედი სხვა ორგანიზაციების, საქართველოს სახალხო დამცველისა და საერთაშორისო ორგანიზაციების ცნობებს და შეფასებებს“. სრულად... წყარო: hrc.ge

თბილისი. თუ გაქვთ კითხვები ბავშვის განვითარების შესახებ, მშობლის სკივრი ოკუპაციურ თერაპევტთან უფასო კონსულტაციას გთავაზობთ. „მიიღეთ კვალიფიციური რჩევები და რეკომენდაციები ენისა და მეტყველების თერაპევტისგან. შეარჩიეთ თქვენთვის სასურველი დრო, კონსულტაცია გაიმართება ხუთშაბათს, 3 თებერვალს, 12:00, 13:00, 14:00 საათებზე. ოკუპაციურ თერაპევტთან კონსულტაციის დასაჯავშნად მიყევით ბმულს... კონსულტაცია დაფინანსებულია MAC Georgia-ს მიერ, „მაკ ჯორჯია“ მუდმივად ზრუნავს შშმ ბავშვებისა და მათი ოჯახების საჭიროებების დაკმაყოფილებაზე მათზე მორგებული სანდო, მაღალკვალიფიციური და ეფექტიანი სერვისების უზრუნველყოფით“. სრულად... წყარო: პლატფორმის გვერდი სოციალურ ქსელში

აფხაზეთი-ცხინვალი. რონდელის ფონდი აქვეყნებს ანი ზირაქაშვილის სტატიას „COVID-19-თან ბრძოლა: როგორ დაეხმარა რუსეთი აფხაზეთსა და ცხინვალის რეგიონს“. „კორონავირუსული ინფექციით დაინფიცირების პირველი შემთხვევა აფხაზეთში 2020 წლის 7 აპრილს დაფიქსირდა, ხოლო ერთი თვის შემდეგ, 6 მაისს დაინფიცირების პირველი შემთხვევა ცხინვალის რეგიონშიც დადასტურდა. გამწვავებული ეპიდემიოლოგიური ვითარებისა და მწირი სამედიცინო რესურსების გამო დე ფაქტო მთავრობებმა დახმარება რუსეთისგან მიიღეს“. სრულად... წყარო: kremlin-roadmap.gfsis.org

თბილისი. 28 იანვარს, ომბუდსმენის მოადგილე გიორგი ბურჯანაძე ფინეთის საგანგებო და სრულუფლებიან ელჩს საქართველოში კირსტი ნარინენს და ფინეთის საგარეო საქმეთა სამინისტროს რუსეთის, აღმოსავლეთ ევროპისა და ცენტრალური აზიის დეპარტამენტის გენერალურ დირექტორს მარია ლიივალას შეხვდა. „შეხვედრაზე სახალხო დამცველის მოადგილემ ზოგადად ადამიანის უფლებების დაცვის თვალსაზრისით ქვეყანაში არსებული მდგომარეობა განიხილა; ისაუბრა უმცირესობების უფლებების დაცვისა და დისკრიმინაციის აღმოფხვრის თვალსაზრისით არსებულ გამოწვევებზე, სასამართლო ხელისუფლების ხარვეზებზე და სხვა მნიშვნელოვან საკითხებზე“. სრულად... წყარო: ombudsman.ge

თბილისი. პლატფორმა „მშობლის სკივრი“ ფუნქციონირების შეფასების განმარტებას გვთავაზობს. „ფუნქციონირების თითოეული სფეროს ფარგლებში განასხვავებენ ყოველდღიური აქტივობებს. მაგ. თვითმოვლის სფეროში გამოყოფენ - ჩაცმას, დაბანას, ჭამას, ტუალეტის მოხმარებას და სხვა; მობილობის სფეროს ფარგლებში - ფეხზე დგომას, წამოდგომას, სიარულს, სახლი და გარეთ გადაადგილებას, კიბეზე ასვლა/ჩასვლას და ა.შ. ფუნქციონირების შეფასება, სწორედ აღნიშნული აქტივობების შესრულების შეფასებას გულისხმობს“. სრულად... წყარო: ორგანიზაციის გვერდი სოციალურ ქსელში

აჭარა. 28 იანვარს, აჭარის ჯანდაცვის სამინისტროს მხარდაჭერით, ბათუმში გაიმართა სამუშაო შეხვედრა, რომლის მთავარი თემებიც რუტინული იმუნიზაცია და ბავშვების სისხლში ტყვიის შემცველობის მაღალი დონე იყო. „2018 წლის მრავალინდიკატორულმა კლასტერულმა კვლევამ საქართველოში ბავშვების სისხლში ტყვიის მაღალი დონე გამოავლინა. კვლევის შედეგებს მოჰყვა ტყვიით მოშხამვის პრევენციის სახელმწიფო პროგრამის შემუშავება. სამუშაო შეხვედრის ფარგლებში მოხდა პროგრამის ეფექტიანობის შეფასება და მომდევნო ნაბიჯების დაგეგმვა 2022 წლისათვის. აუცილებელია, მთავრობამ გადადგას მნიშვნელოვანი ნაბიჯები ტყვიით მოშხამვის პრევენციისათვის“. სრულად... წყარო: ორგანიზაციის გვერდი სოციალურ ქსელში

31 იანვარი, 15:00 საათზე, სამეგრელო - ზემო სვანეთის რეგიონული ჰაბის ორგანიზებით, გაიმართება ონლაინ შეხვედრა თემაზე „სოციალური მედია სამოქალაქო საზოგადოების ორგანიზაციების განვითარებისთვის“. ჰაბი საქმიანობას ახორციელებს ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივის“ ფარგლებში.  სრულად...

31 იანვარს, 19:00 საათზე, GrlzWave-ის ორგანიზებით, პაპილომა ვირუსის შესახებ ონლაინ ლექცია გაიმართება. სრულად...

31 იანვარს, 14:45 საათზე, ევროკავშირი და ჯანმრთელობის მსოფლიო ორგანიზაცია სამედიცინო დაწესებულებებს COVID-19-ის საწინააღმდეგო აღჭურვილობას გადასცემს. მისამართი: თბილისი, ნ. ყიფშიძის საუნივერსიტეტო კლინიკა. ვაკე-საბურთალოს რაიონი, ვაჟა-ფშაველას გამზ. 29

31 იანვარს, 13:00 საათზე, სამართლიანი არჩევნებისა და დემოკრატიის საერთაშორისო საზოგადოების (ISFED) ზუგდიდის რეგიონულ ოფისში თამარ ქომეთიანის სავარაუდო, პოლიტიკური ნიშნით სამსახურიდან გათავისუფლებასთან დაკავშირებით, ბრიფინგი გაიმართება. მისამართი: ზუგდიდი, რუსთაველის ქ. 87ა

31 იანვარს, 13:00 საათზე, პლატფორმა Zoom-ში გაიმართება კვლევის პრეზენტაცია: „უფლებადამცველთა სამართლებრივი მდგომარეობა საქართველოში“. სრულად...

31 იანვარს, 11:00 საათზე, „სოციალური სამართლიანობის ცენტრი“, საია და ISFED სასამართლოში კულტურის სამინისტროს საქვეუწყებო დაწესებულებებიდან განთავისუფლებული თანამშრომლების ინტერესებს დაიცავენ, აღნიშნულთან დაკავშირებით ფონდი „ღია საზოგადოება - საქართველოს“ ოფისში ერთობლივ პრესკონფერენციას გამართავენ. მისამართი: თბილისი, ჭოველიძის #10

31 იანვარს, 11:00 საათზე, „ადამიანის უფლებათა ცენტრი“ ანგარიშის ონლაინ პრეზენტაციას გამართავს. თემა: „ადამიანის უფლებების მდგომარეობა საქართველოში - 2021“. პრეზენტაციაზე დასასწრებად, ისარგებლეთ ბმულით... Meeting ID: 527 596 4328