თბილისი. კოალიცია მედიის ადვოკატირებისთვის მიიჩნევს, რომ კრიტიკულად მნიშვნელოვანია საქართველოს პარლამენტმა „მაუწყებლობის შესახებ” საქართველოს კანონი დროულად,  2023 წლის 31 მაისამდე, მოიყვანოს ევროპულ კანონმდებლობასთან შესაბამისობაში. „პარლამენტმა უნდა გაითვალისწინოს, როგორც ევროპის საბჭოს ექსპერტების რეკომენდაციები, ასევე ტელევიზიებისა და კოალიციის მიერ მომზადებული ალტერნატიული კანონპროექტი“. განცხადება ვრცლად იხილეთ ბმულზე... წყარო: mediacoalition.ge

თბილისი. პარტნიორობა ადამიანის უფლებებისთვის (PHR) დავის განმავლობაში, ითხოვდა რომ დაუყოვნებლივ საქართველოს მთავრობას დავალებოდა, შეექმნა ისეთი მექანიზმი, რომელიც გამონაკლისის გარეშე, 30 დღიანი მოცდის ვადის გარეშე, დააფინანსებდა ყველა შემთხვევას, როდესაც სახეზე იყო ქცევითი გამოწვევების და/ან კომუნიკაციის სირთულის მქონე შშმ პირებისათვის ზოგადი ანესთეზიის ე.წ. „ნარკოზით“ სტომატოლოგიური მომსახურების გაწევის საჭიროება. აღნიშნული მოთხოვნა სასამართლომ 3 დღეში განიხილა და დროებითი განჩინებით დააკმაყოფილა. „რაც შეეხება ძირითად მოთხოვნას, საჭირო იყო ამ მომსახურების პროგრამად ჩამოყალიბება, შესაბამისად ვითხოვდით სპეციალური მექანიზმის/პროგრამის/სერვისის/ შექმნას კომუნიკაციის სირთულისა და ქცევის დარღვევის მქონე შშმ პირებისთვის, სტომატოლოგიური მომსახურების შეუფერხებელი მიღებისთვის. PHR-ის სტრატეგიული სამართალწარმოების შედეგად, თბილისის საქალაქო სასამართლოს განჩინების აღსრულების მიზნით, საქართველოს მთავრობამ და ჯანდაცვის სამინისტრომ 2022 წლის 13 ივნისს განახორციელეს ცვლილებები „საყოველთაო ჯანდაცვაზე გადასვლის მიზნით გასატარებელ ზოგიერთ ღონისძიებათა შესახებ“ საქართველოს მთავრობის 2013 წლის 21 თებერვლის #36 დადგენილებაში, კერძოდ, პროგრამებს ჯანდაცვის ახალი პროგრამა: „სტომატოლოგიური მომსახურება ზოგადი ანესთეზიით“ დაემატა. რაც ნიშნავს იმას, რომ, ქცევითი გამოწვევისა და/ან კომუნიკაციის სირთულის მქონე შშმ პირებისათვის შეიქმნა ახალი  პროგრამა -  რომლითაც შშმ პირებმა ყოველგვარი მოცდის გარეშე უნდა მიიღონ საშუალოდ 1500 ლარის ღირებულების (ან უფრო მეტის) სტომატოლოგიურ მომსახურება უფასოდ“, ნათქვამია ორგანიზაციის ვებგვერდზე. სრულად... წყარო: phr.ge

საუნივერსიტეტო გადასახადის დაფინანსებას თუ ეძებთ, მაშინ ტიბაანელი თინეიჯერების ეს ვიდეო უნდა ნახოთ. სიღნაღის მუნიციპალიტეტელ სტუდენტებს დეტალური ინფო ამ ბმულზე დაგხვდებათ... სხვა მუნიციპალიტეტებში მცხოვრებ სტუდენტებს კი, შეგიძლიათ მიწეროთ თქვენს მერიებს. გამოუვალ შემთხვევაში კი, ცოდნის კაფეს განათლების ფონდი თქვენს გვერდით იქნება. ვიდეო მომზადებულია ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. შეზღუდული შესაძლებლობის მქონე პირები და  მათ საკითხებზე მომუშავე ორგანიზაციები საერთო განცხადებას ავრცელებენ. „აქონდროპლაზიის მქონე ბავშვები კარგად იაზრებენ იმ რეალობას, რომლის წინაშეც დგანან, ხედავენ საკუთარი მშობლების ბრძოლასა და დარდს, რაც ფსიქოლოგიურ ზიანს აყენებს ბავშვებს; მათ იციან, რომ არსებობს რეალური მედიკამენტი, რაც მათ ცხოვრებას რადიკალურად შეცვლის, და უწევთ მოლოდინსა და შიშში ყოფნა, მშობლების განცდების გაზიარებასთან ერთად, მათი პირადი შეგრძნებები და ემოციები არ უნდა იყოს უგულებელყოფილი. სახელმწიფო ვალდებულია უზრუნველყოს ჯანდაცვის ხელმისაწვდომობა და იმოქმედოს ბავშვის საუკეთესო ინტერესებიდან გამომდინარე. სამკურნალო პრეპარატს Voxzogo Vosorotide 2021 წელს „ამერიკის წამლისა და საკვების ადმინისტრაციამ“ (FDA) მიანიჭა ავტორიზაცია, რაც მის უსაფრთხოებასა და ეფექტურობას ადასტურებს. ამავე წელს მედიკამენტი შეაფასა და ავტორიზაცია მიანიჭა „ევროპის მედიცინის სააგენტომ“ (EMA). ამ ორი ყველაზე ავტორიტეტული ინსტიტუტის მიერ ავტორიზაციის მინიჭება, ცალსახად მეტყველებს მედიკამენტის უსაფრთხოებასა და ეფექტურობაზე. ცხადია, ყველა მედიკამენტის გამოყენებას სჭირდება შესაბამისი მართვა და ყველას აქვს გვერდითი ეფექტები, რაც სათანადო მართვის პირობებში უნდა დარეგულირდეს - ეს არ გახდეს მედიკამენტის შემოტანაზე უარის თქმის მიზეზი“, ნათქვამია განცხადებაში. სრულად... წყარო: socialjustice.org.ge

26 აპრილს, 19:00 საათზე, ჯუნიორ ეჩივმენტი საქართველო, PMI თბილისი, საქართველოს წარმომადგენლობასთან თანამშრომლობით მართავს სემინარს „პროექტის მენეჯმენტი“. სრულად...

26 აპრილს, 19:00 საათზე, წიგნის სახლში „ლიგამუსი“ გაიმართება საფრანგეთში საქართველოს ელჩის, ბატონ გოჩა ჯავახიშვილის შეხვედრა უნივერსიტეტის აკადემიურ და ადმინისტრაციულ პერსონალთან და სტუდენტებთან. ელჩი ისაუბრებს საქართველოსა და საფრანგეთს შორის სხადასხვა სფეროში, მათ შორის საუნივერსიტეტო თანამშრომლობის სფეროში, არსებული ურთიერთობების მნიშვნელობაზე და უპასუხებს დამსწრე საზოგადოების შეკითხვებს. სრულად...

26 აპრილს, 15:00 საათზე, ფონდი ტასოს ორგანიზებით გაიმართება ფოტოგამოფენა: ჩემი სოფლის ქალი. გამოფენა მიზნად ისახავს, ხაზი გაუსვას სოფლად მცხოვრები ქალების ჩვეულებრივი გამოცდილებების უნიკალურობას, წარმოაჩინოს სოფლის ცხოვრების სილამაზე და მრავალფეროვნება, დააფასოს იმ ქალების ღვაწლი, რომლებმაც დიდი წვლილი შეიტანეს თავიანთი თემების ჩამოყალიბებაში, განვითარებასა და საუკუნეების მანძილზე შენარჩუნებაში. სრულად...

26 აპრილს 15:00 საათზე გაიმართება ივანე ჯავახიშვილის სახელობის თბილისის სახელმწიფო უნივერსიტეტის მუზეუმის, ეთნოლოგია - ანთროპოლოგიის ინსტიტუტისა და საქართველოს მეცნიერებათა აკადემიის არქივის ერთობლივი გამოფენა „ეთნოლოგი ქალები საქართველოში“. სრულად... მისამართი: ი. ჭავჭავაძის გამზ. 1 თსუ 1Iკორპ. II სართ. მუზეუმის საგამოფენო დარბაზი

შიდა ქართლი. სამოქალაქო საზოგადოების ინსტიტუტის (CSI) ინციატივით, საკონსულტაციო შეხვედრა გაიმართა შიდა ქართლში მომუშავე საზოგადოებრივი ორგანიზაციების წარმომადგენლებთან. კონსულტაციის თემა იყო – ა(ა)იპ–ების სარეგისტრაციო მონაცემების ახალ კანონთან შესაბამისობაში მოყვანა. სრულად...

თბილისი. საერთაშორისო რესპუბლიკური ინსტიტუტი (IRI) საზოგადოებრივი აზრის კვლევის დოკუმენტს აქვეყნებს. კვლევა ხელმისაწვდომია ბმულზე... ახალი კვლევა (Center for Insights in Survey Research) აჩვენებს, რომ საქართველოს ევროკავშირში გაწევრიანებას მტკიცე მხარდაჭერა აქვს, ასევე გამოკითხულთა უმრავლესობა პოლიტიკური პარტიების მიმართ ნდობის ნაკლებობას გამოხატავს და უკმაყოფილოა ქვეყანაში რუსეთის მოქალაქეების ყოფნის გამო. „საზოგადოებაში არსებული განწყობების გათვალისწინებით, საერთაშორისო რესპუბლიკური ინსტიტუტი (IRI) აგრძელებს მრავალპარტიული დემოკრატიის მხარდაჭერას საქართველოში. IRI მხედველობაში იღებს პოლიტიკური პარტიების მიმართ ნდობის შემცირებას, ასევე საქართველოს მოქალაქეების სურვილს იხილოს მეტი ახალგაზრდა პოლიტიკაში და განაგრძობს მუშაობას როგორც მმართველ, ასევე ოპოზიციურ პოლიტიკურ პარტიებთან და დამწყებ პოლიტიკურ მოძრაობებთან იმის უზრუნველსაყოფად, რომ საქართველოს მოქალაქეებს ჰქონდეთ მრავალფეროვანი პოლიტიკური წარმომადგენლობა და არჩევანი, როგორც არჩევნების დღეს, ასევე მმართველობით დონეზე“. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. საერთაშორისო გამჭვირვალობა - საქართველოს ინფორმაციით, ახალციხის საკრებულოში ინფრასტრუქტურის კომისიის თავმჯდომარისა და სატენდერო კომისიის წევრის, ნოდარ ტალახაძის შვილისა და რძლის „კომპანია ელ ეს ჯორჯიამ“ 2020-2022 წლებში სახელმწიფო შესყიდვებიდან 8 797 512 ლარი მიიღო. აქედან, 2 290 017 ლარზე ხელშეკრულებები ახალციხის მერიამ კომპანიას უკონკურენტოდ მოგებულ ტენდერებსა და პირდაპირ შესყიდვებზე გაუფორმა. ორგანიზაცია მოუწოდებს სახელმწიფო უსაფრთხოების სამსახურის ანტიკორუფციულ სააგენტოს, შეისწავლოს შპს „კომპანია ელ ეს ჯორჯიასა“ და ახალციხის მუნიციპალიტეტის მერიას შორის გაფორმებული სახელმწიფო შესყიდვები და გამოარკვიოს, ხომ არ ჰქონდა ადგილი შესაძლო კორუფციულ გარიგებებს მიმწოდებელსა და შემსყიდველ ორგანიზაციებს შორის. სრულად... წყარო: transparency.ge

თბილისი. სოციალური სამართლიანობის ცენტრი ეხმაურება აქონდროპლაზიის მქონე ბავშვების ოჯახის წევრების რამდენიმეთვიან პროტესტს და საქართველოს მთავრობას მოუწოდებს, მიიღოს ყველა ღონისძიება არასრულწლოვნების სიცოცხლისა და ჯანმრთელობის გარანტირებისათვის. სახელმწიფომ უნდა გაიაზროს საკუთარი ვალდებულებები აქონდროპლაზიის მქონე ბავშვების მიმართ და: ინტენსიურად დაიწყოს მშობლებთან დიალოგი, ბავშვების საჭიროებებისა და გამოწვევების უკეთ იდენტიფიცირებისათვის; უმოკლეს ვადებში შეიმუშაოს და საზოგადოებასა და მშობლებს გააცნოს ზუსტი ხედვა (მათ შორის, საბიუჯეტო სახსრების გამოყოფის მიმართულებით) მედიკამენტის ქვეყანაში შემოტანასა და მასზე წვდომასთან დაკავშირებით; უმოკლეს ვადებში უზრუნველყოს მედიკამენტზე წვდომა, სულ მცირე, ყველაზე მწვავე საჭიროების მქონე ბავშვებისათვის. სრულად... წყარო: socialjustice.org.ge ფოტო: პუბლიკა

თბილისი. საქართველოს გაეროს ასოციაცია, წელს პირველად, მასშტაბური ახალგაზრდული ფესტივალის Tbilisi Open Air/AlterVision პარტნიორი გახდა. „თუ უკვე დაგეგმე ფესტივალზე მოსვლა, დღის განმავლობაში აუცილებლად უნდა გვესტუმრო საქართველოს გაეროს ასოციაცია-ის ფერად და საგანმანათლებლო სივრცეში. თქვენთვის ბევრი გასართობი და შემეცნებითი აქტივობა მოვამზადეთ მრავალფეროვნების, თანასწორობის, თავისუფლებისა და სამოქალაქო აქტივიზმის შესახებ. ძალიან გვიხარია, რომ უამრავ მუსიკის მოყვარულ, თავისუფალ და მრავალფეროვან ადამიანს შეგხვდებით“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდის მხარდაჭერით, სტატისტიკის ეროვნული სამსახურის მიერ ჩატარებული ბავშვთა კეთილდღეობის კვლევის თანახმად, ბავშვის შემწეობა ეხმარება მოწყვლად ბავშვებს, თუმცა ბავშვების 38 პროცენტი განიცდის მატერიალურ და სოციალურ დანაკლისს. კვლევის მიზანი იყო საქართველოში მაცხოვრებელ ბავშვთა კეთილდღეობის რამდენიმე საკვანძო ასპექტის გაზომვა, მათ შორის: განათლების, ჯანდაცვის სერვისებისა და სოციალური დახმარების ხელმისაწვდომობა, სასკოლო კვება, უსაფრთხოება სახლში, მატერიალური და სოციალური დანაკლისი, ფუნქციური სირთულეები და შეზღუდულ შესაძლებლობასთან ასოცირებული სტიგმა. სრულად... კვლევა სრულად ხელმისაწვდომია ბმულზე... წყარო: www.unicef.org ფოტო: UNICEF

25 აპრილს, 18:00 საათზე, მწერალთა სახლში, რეპრესირებული მწერლების მუზეუმის ახალი საგანმანათლებლო ციკლის ფარგლებში, ხელოვნებათმცოდნე ეკა კიკნაძის საჯარო ლექცია გაიმართება. ლექციაზე განიხილება ქართველი მხატვრების ცხოვრება, შემოქმედება და სიკვდილი სტალინური ტერორის ხანაში. სრულად...

საქართველო. ზიანის შემცირების ქსელი გთავაზობთ მიიღოთ უფასო სერვისები, მთელი საქართველოს მასშტაბით, 10 ქალაქში. დამატებითი ინფორმაციის მისაღებად მისწერეთ ორგანიზაციას პირადად ან დაუკავშირდით თქვენს ქალაქში არსებულ ცენტრს. ცენტრების შესახებ ინფორმაცია იხილეთ ბმულზე... სრულად... წყარო: ორგანიზაციის გვერდი სოციალურ ქსელში

თბილისი. ფონდი ტასოს ყოველკვირეული სიახლის თანახმად, შრომის საერთაშორისო ორგანიზაციის (ILO) მიერ Microsoft Corporation-ის მხარდაჭერით, შემუშავებული პროგრამის მეშვეობით, 10 ქვეყანაში მეწარმე ქალებს თავიანთი ბიზნესის დიგიტალიზაციაში დაეხმარებიან. ამ ეტაპზე, პროექტი ძირითადად აზიისა და აფრიკის ქვეყნებს მოიცავს. სრულად... წყარო: ორგანიზაციის გვერდი სოციალურ ქსელში

აჭარა. საერთაშორისო გამჭვირვალობა - საქართველოს ინფორმაციით, ორგანიზაციამ ბათუმელ მოქალაქეს იმედდაკარგული საქმე მოაგებინა.  მოქალაქე რუსუდან ჭიჭინაძე მადლობას უხდის TI საქართველოს იურისტებს, ანი ბერძენიშვილს და ნინო სიორიძეს. სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდის ახალი ანგარიშის თანახმად, საქართველოში, ბოსნია-ჰერცეგოვინაში, მონტენეგროში, რუმინეთსა და უკრაინაში ყველაზე მაღალია იმ ბავშვთა წილი, რომლებიც არასრულად არიან აცრილნი. „კორონავირუსის დაწყების შემდეგ, ევროპასა და ცენტრალურ აზიაში დაახლოებით ერთი მილიონი ბავშვი დარჩა ერთი ან რამდენიმე რუტინული ვაქცინის გარეშე“. გაიგეთ მეტი... წყარო: www.unicef.org

ამ წუთებში, სემინარი იმართება თემაზე „როგორ მივიღოთ მონაწილეობა სახელმწიფო შესყიდვებში და მივაღწიოთ წარმატებას“. შეხვედრა გახსნეს სახელმწიფო შესყიდვების სააგენტოს თავმჯდომარემ ლევან რაზმაძემ, პარლამენტის წევრმა ნინო წილოსანმა და USAID-ის ეკონომიკური მმართველობის პროგრამის ხელნძღვანელმა ნატალია ბერუაშვილმა. მისამართი: თბილისი, ბიზნეს ცენტრი ტერმინალი, ი.ჭავჭავაძის 37, აქსის თაუერსი, (შავი შენობა) მეხუთე სართული.

თბილისი. „საერთაშორისო გამჭვირვალობა - საქართველოს“ გადაცემათა ციკლი „ვილიკლიკოთ ევროპაზე - დათო ლიკლიკაძესთან ერთად“ გრძელდება. გადაცემის მორიგ ეპიზოდში საუბარია შემდეგ თემებზ: რატომ ვირჩევთ ევროპას და დასავლურ ღირებულებებს? რა საფრთხეები მოდის რუსეთისგან? ეს და სხვა საკითხები განიხილა გადაცემის ავტორმა დათო ლიკლიკაძემ სტუმრებთან, ტურიზმის სფეროს წარმომადგენლებთან: რუსუდან სილაგაძესთან, ლელა მესხთან და ანტონ სინეტაშვილთან. სრულად... წყარო: radiodk.ge

თბილისი. მაკ ჯორჯიას ფსიქოლოგებმა თბილისის N74 ბაგა-ბაღში ჩაატარეს ტრენინგი „ქცევის მართვა“.  ტრენინგის განმავლობაში განიხილეს შემდეგი საკითხები:  პოზიტიური ქცევის მხარდაჭერის სისტემა,  ჯგუფის მართვა, რთული ქცევის ფუნქციური შეფასება, ტანტრუმი. ტრენინგი ასევე მოიცავდა პრაქტიკულ სამუშაოს, რაც რთული ქცევის შემთხვევების ანალიზს ისახავდა მიზნად. ტრენინგის განმავლობაში მიღებული ცოდნა  სპეციალისტებს აღსაზრდელების ქცევითი სირთულეების შეფასებაში, ქცევის მართვის გეგმის შემუშავებასა და მის ეფექტურად განხორციელებაში დაეხმარება.  სრულად... წყარო: ორგანიზაციის გვერდი სოციალურ ქსელში