თბილისი. პარტნიორობა ადამიანის უფლებებისთვის (PHR) ცნობით, ორგანიზაციაში იურიდიული კონსულტაციის მიღების მიზნით, საქართველოს მოქალაქეების მიმართვიანობის მაგალითზე შეიძლება ითქვას, რომ შვილებისთვის ჯანმრთელობის სერვისების მისაღებად მიგრაცია ევროპის სხვადასხვა ქვეყნებში ქალების მძიმე არჩევანია. „ბოლო 3 წლის განმავლობაში, არაერთი სატელეფონო ზარი და შეტყობინება ყოფილა ლტოლვილის სტატუსის მინიჭებასთან დაკავშირებით. ისტორიები განსხვავებულია, თუმცა ინტერესი ერთი - ყველა შესაძლებლობის გამოყენება, რათა შვილებმა მიიღონ ის საჭირო ჯანმრთელობის სერვისები, რომელსაც საკუთარ ქვეყანაში ვერ იღებენ. ვრცლად იმის შესახებ, თუ კიდევ რატომ მიდიან ქალები შრომით მიგრაციაში, წაიკითხავთ  PHR-ის ადვოკატის, სოფიკო მენაბდიშვილის ბლოგპოსტში. სრულად... წყარო: phr.ge

აჭარა. საქართველოს ახალგაზრდა იურისტთა ასოციაციის (საია) აჭარის ფილიალს ამერიკის შეერთებული შტატების გერმანიის მარშალის ფონდის წარმომადგენლები ეწვივნენ. სტუმრებს შორის, ასევე, იყვნენ სხვადასხვა საერთაშორისო მედიის ჟურნალისტები. საუბარი შეეხო ქვეყანაში ადამიანის უფლებების მდგომარეობასა და საია-ს საქმიანობას. სრულად... წყარო: ორგანიზაციის გვერდი სოციალურ ქსელში

თბილისი. სოციალურ მუშაკთა ასოციაცია გიზიარებთ საინფორმაციო ბარათს, თუ რა საერთო შეიძლება ჰქონდეს სოციალურ მუშაობას და ფემინიზმს. მომზადებული მასალის თანახმად, სოციალური მუშაობის მთავარი ღირებულებები თანხვედრაში მოდის ფემინისტურ ღირებულებებთან: დისკრიმინაციასა და უთანასწორობასთან ბრძოლა, ჩაგვრასთან, შევიწროებასთან და სექსიზმთან ბრძოლა. ძალადობის პრევენცია და თანასწორობა. სოლიდარობა და ზრუნვა - ეს არის იმ საკითხების მცირე ჩამონათვალი, რომელიც ამ ორ სფეროს ერთმანეთთან აკავშირებს. პროექტის ფინანსური მხარდამჭერია ჰაინრიჰ ბიოლის ფონდის თბილისის ოფისი. სრულად... წყარო: ორგანიზაციის გვერდი სოციალურ ქსელში

აჭარა. საქართველოს ახალგაზრდა იურისტთა ასოციაციის აჭარის ფილიალმა სტუდენტებისთვის საჯარო ლექცია ჩაატარა სახელწოდებით „ადამიანის უფლებები დინამიკაში”. შეხვედრაზე ადამიანის უფლებებსა და თანამედროვე გამოწვევებთან ერთად ასევე განიხილეს საის-ს ისტორია და აჭარის ფილიალის წარმატებული საქმეები, რომლებმაც მნიშვნელოვნად შეცვალეს/გააუმჯობესეს პრაქტიკა. სრულად... წყარო: ორგანიზაციის გვერდი სოციალურ ქსელში

თბილისი. 23 მაისს, სოციალური სამართლიანობის ცენტრმა გამართა პანელური დისკუსია თემაზე: „უფლება სათანადო საცხოვრისზე: სახელმწიფოს პოლიტიკა და პრაქტიკა“. დისკუსიის მიზანი იყო სათანადო საცხოვრისის სახელმწიფო პოლიტიკისა და პრაქტიკის სისტემური გამოწვევებისა და ჩავარდნების იდენტიფიცირება. სრულად... წყარო: socialjustice.org.ge

თბილისი. გაეცანით საქართველოს ახალგაზრდა იურისტთა ასოციაციის მოხალისეობრივი პროექტის „ერთი თვე სასამართლო მონიტორად“ მონაწილის, ია იაძის ბლოგპოსტს: „ადევნება, როგორც სისხლის სამართლის დანაშაული“. „სასამართლო სხდომებზე მსხვერპლების ჩვენებებმა, რომლებშიც ისინი ყვებოდნენ ადევნების დანაშაულის შესახებ და მის საშინელ შედეგებზე, დამიტოვა განცდა, რომ ეს დანაშაული ჯერ კიდევ არ არის აღქმული სათანადო სერიოზულობით სამართალდამცავი ორგანოების, სასამართლოსა თუ საზოგადოების მხრიდან“. საია ამ პროექტს ახორციელებს USAID სამართლის უზენაესობის პროგრამის მხარდაჭერით. სრულად... წყარო: gyla.ge

თბილისი. ორგანიზაცია „საფარის“ ინფორმაციით, ნინოწმინდის პანსიონის ყოფილ აღსაზრდელს საცხოვრებელი სახლი გადაეცემა. „ახალგაზრდა ქალი 20 წლისაა. მასთან მუშაობა „საფარმა” 2021 წელს, პანსიონის დატოვებიდან რამდენიმე თვეში დაიწყო. მას არ გააჩნდა საცხოვრებელი ადგილი, თავს მეგობართან აფარებდა. პანსიონატში ყოფნის დროს მას არ მისცემია შესაძლებლობა დაუფლებოდა დამოუკიდებლად ცხოვრებისათვის აუცილებელ უნარ-ჩვევებს, შესაბამისად მას ბევრი, თითქმის გადაუჭრელი სოციალური პრობლემებიც აწუხებდა”, – ამბობს იურისტი, ცირა ჯგერენაია. იურისტთან გასაუბრებისას მან ახსენა, რომ რამდენჯერმე იყო ნამყოფი მამისეულ სახლში, ქალაქ ქუთაისში. მამა 2007 წელს, 4 წლის ასაკში გარდაეცვალა. იურისტმა ცირა გჯერენაიამ მასთან გასაუბრების შემდეგ საქმის გამოკვლევა დაიწყო და აღმოაჩინა, რომ ქუთაისში, ახალგაზრდა ქალის ბაბუის საკუთრებაში მართლაც ფიქსირდებოდა საცხოვრებელი სახლი. ბაბუისა და მამის გარდაცვალების შემდეგ, სახლი უკანონოდ, არაერთი დარღვევის საფუძველზე ერთ-ერთმა მემკვიდრემ დაირეგისტრირა საკუთრებაში“. წაიკითხეთ საქმის დეტალები სრულად... წყარო: sapari.ge

კახეთი. სოციალური სამართლიანობის ცენტრი ეხმაურება ყვარელში განვითარებულ მოვლენებს. „იმ პირობებში, როდესაც საქართველო  განგრძობადი ოკუპაციის რეჟიმშია და იმავდროულად, ევროკავშირისგან კანდიდატის სტატუსის თაობაზე გადაწყვეტილების მოლოდინშია, ქვეყანაში რუსი მაღალჩინოსნის ოჯახის წევრების შემოშვება საფრთხეს უქმნის როგორც სამოქალაქო მშვიდობას, ასევე ეროვნულ ინტერესებსა და ქვეყნის ევროინტეგრაციის პერსპექტივას. არა ერთი კითხვა ჩნდება საზღვრის კონტროლის საკითხზეც. მაშინ, როდესაც შინაგან საქმეთა სამინისტრო არა ერთ კრიტიკულად განწყობილ აქტივისტს, ჟურნალისტს მეზობელი ქვეყნებიდან ამ კუთხით არსებული ბუნდოვანი ნორმების გამოყენებითა და უსაფრთხოების არგუმენტზე თვითნებური მითითებით, უარს ეუბნება საქართველოში შემოსვლაზე, ბუნდოვანია, როგორ შეიძლება საზღვარზე შსს-ს თანამშრომლებს არ დაეიდენტიფიცირებინათ დასანქცირებული რუსეთის მოქალაქეების შემოსვლა. ჩვენი აზრით, ეს გადაწყვეტილება, წარსულში სერგეი გავრილოვისა და ვლადიმერ პოზნერის საქართველოში შემოსვლის გადაწყვეტილებებთან და ამ ფონზე გაკეთებულ პოლიტიკურ განცხადებებთან ერთად, ამგვარი ფიგურების საქართველოში შემოსვლის საკითხზე პოლიტიკურ ლოიალობას უფრო აჩვენებს და შეუძლებელია მხოლოდ საზღვარზე შესაბამისი სამსახურების მუშაობის არაეფექტიანობით ავხსნათ“, ნათქვამია განცხადებაში. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) აგრძელებს ზვიად მთავრიშვილის ოჯახის ინტერესების დაცვას, როგორც ეროვნულ, ასევე, - საერთაშორისო დონეზე. „საქმე ეხება 2019 წლის 15 აპრილს, კაჭრეთში მცხოვრები ზვიად მთავრიშვილის გარდაცვალებას, რომელსაც წინ უძღოდა 2019 წლის 22 მარტს ამ უკანასკნელის მიმართ სამართალდამცავთა მხრიდან სავარაუდო არასათანადო მოპყრობა. საიამ სტრასბურგის სასამართლოში გაგზავნილ წერილობით პოზიციაში კიდევ ერთხელ აღნიშნა, რომ ზვიად მთავრიშვილის საქმეზე სახელმწიფომ არა მხოლოდ დაარღვია საქმეზე ეფექტიანი და სრულყოფილი გამოძიების ჩატარების ვალდებულება, არამედ ზვიად მთავრიშვილის გარდაცვალება, სავარაუდოდ, სწორედ სახელმწიფოს მოხელეთა (პოლიციის თანამშრომელთა) ქმედებების პირდაპირ შედეგს წარმოადგენს, რაც საქმეში არსებული მტკიცებულებებით დასტურდება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. სამოქალაქო საზოგადოების ორგანიზაციები აქციაზე დაკავების შემთხვევაში, მზად არიან უფასოდ გაგიწიონ იურიდიული დამხარება. საჭიროების შემთხვევაში, დარეკეთ ცხელ ხაზზე 577070563 სრულად... წყარო: ორგანიზაციის გვერდი სოციალურ ქსელში

ქვემო ქართლი. 22 მაისს, სოციალური სამართლიანობის ცენტრი USAID სამართლის უზენაესობის პროგრამის მხარდაჭერით, მარნეულის მუნიციპალიტეტის სოფელ ხულდარაში სამართლებრივი დახმარების შეხვედრას გამართავს. სრულად... წყარო: ორგანიზაციის გვერდი სოციალურ ქსელში

თბილისი. ევროკავშირის (EU) თანამონაწილეობით დაფუძნდა პროგრამა EU4Youth და Telegram-ში ჩატბოტის გამოყენებით შეიქმნა თამაში „fairemployment“.  „თამაშის ძირითადი მიზანია იმ სამართლიანი შრომითი პრაქტიკისა და სტანდარტების შესახებ ცნობიერების ამაღლება და მათი უკეთ გააზრება, რომლებიც უზრუნველყოფილი უნდა იყოს შრომითი ხელშეკრულების გაფორმებამდე და მის შემდეგ, როგორც ახალგაზრდებისთვის, ასევე დამსაქმებლებისთვის“. სრულად... წყარო: eu4georgia.eu

თბილისი. თბილისის ადამიანის უფლებათა სახლის ცნობით, მარტის აქციებზე დაკავებული პირების ჯარიმებისთვის გამოყოფილი თანხა ამოიწურა. შესაბამისად, ორგანიზაცია აგრძელებს შემოწირულებების მიღებას. „თბილისის ადამიანის უფლებათა სახლმა ჯამში 33 600 ლარის ოდენობის, 17 ადმინისტრაციული ჯარიმა გადაიხადა. ჩვენი მიზანია, გვერდში დავუდგეთ აქტივისტებს, რომლებიც მშვიდობიანი ფორმით აპროტესტებდნენ საქართველოში „რუსული კანონის“ მიღებას. მადლობას ვუხდით ყველას, ვინც თავისუფალი, ძლიერი და დამოუკიდებელი სამოქალაქო საზოგადოებისთვის და საქართველოს ევროპული მომავლისთვის იბრძვის“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის ცნობით, თბილისის საქალაქო სასამართლომ „საქართველოს ეროვნული მუზეუმის მიერ“ მოსარჩელესთან შრომითი ურთიერთობის შეწყვეტის თაობაზე მიღებული გადაწყვეტილება ცნო ბათილად, ასევე, მოპასუხეს დაეკისრა მოსარჩელისთვის იძულებითი განაცდურისა და კომპენსაციის სახით 3000 ლარის, დამატებით გამოუყენებელი შვებულებისა და საპროცესო ხარჯების ანაზღაურება. მოსარჩელის ინტერესებს სასამართლოში საია იცავდა. სრულად... წყარო: gyla.ge

თბილისი. საქართველოში ევროკავშირის წარმომადგენლობა, გაერთიანებული ერების ორგანიზაცია, ევროპის საინვესტიციო ბანკის რეგიონული წარმომადგენლობა სამხრეთ კავკასიაში, საქართველოში ევროკავშირის სადამკვირვებლო მისიის ხელმძღვანელი და ქვეყანაში მოქმედი საელჩოები მოუწოდებენ საქართველოს, შეუსაბამოს სახელმწიფო პოლიტიკა და პრაქტიკა საქართველოს საერთაშორისო ვალდებულებებს ლგბტქი+ პირთა უფლებების დაცვის და ინკლუზიური საზოგადოების ხელშეწყობისთვის. „საზოგადოების რომელიმე წევრის გარიყვა  აძლიერებს სოციალურ, ეკონომიკურ და პოლიტიკურ უთანასწორობასა და უსამართლობას, რაც აფერხებს საქართველოს დემოკრატიის შემდგომ განვითარებას. მოვუწოდებთ საქართველოს ხელისუფლებას, პოლიტიკურ, სამოქალაქო და რელიგიურ ლიდერებს, საყოველთაოდ დაიცვან ადამიანის უფლებები, ხმა აიმაღლონ სიძულვილის, დისკრიმინაციისა და ძალადობის წინააღმდეგ, იმუშაონ ლგბტქი+ თემებთან და უზრუნველყონ მათთვის ადამიანის უფლებებით სრულად სარგებლობა. მოვუწოდებთ საქართველოს მთავრობას, რომ სახელმწიფო პოლიტიკა და პრაქტიკა შეუსაბამოს საქართველოს საერთაშორისო ვალდებულებებს“, ნათქვამია ერთობლივ განცხადებაში. სრულად... წყარო: www.eeas.europa.eu

თბილისი. საქართველოს ახალგაზრდა იურისტთა ასოციაცია გიზიარებთ ორგანიზაციის მიერ მომზადებულ პრაქტიკულ სახელმძღვანელოს ჟურნალისტებისთვის. „დოკუმენტში მოცემულია ის ძირითადი სამართლებრივი რეგულაციები და პრაქტიკა, რომლებიც ჟურნალისტებს დარღვეული უფლებების აღდგენაში დაეხმარება, როგორც გამოძიების ფარგლებში, ისე - ზიანის ანაზღაურების საკითხში. ამასთანავე, დოკუმენტში განხილულია უშუალოდ ჟურნალისტების დაცვის საერთაშორისო სტანდარტები, რომლებიც საჯარო შეკრებების გაშუქების დროს მოქმედებს“. სახელმძღვანელო სრულად... წყარო: gyla.ge

თბილისი. საერთაშორისო გამჭვირვალობა - საქართველო მთელ განვითარებულ სამყაროსთან ერთად მხარს უჭერს თანასწორობას და გმობს ჰომოფობიას. „1990 წლის 17 მაისს ჯანდაცვის მსოფლიო ორგანიზაციამ ჰომოსექსუალობა ამოიღო ფსიქიკური დაავადებების სიიდან. მიუხედავად ამისა, სიძულვილი განსხვავებული სექსუალური იდენტობისა და ორიენტაციის ადამიანების მიმართ კვლავ დიდ პრობლემას წარმოადგენს მთელ მსოფლიოში“, ნათქვამია ორგანიზაციის პოსტში. სრულად... წყარო: ორგანიზაციის გვერდი სოციალურ ქსელში

თბილისი. 17 მაისი ჰომოფობიასთან, ბიფობიასთან და ტრანსფობიასთან ბრძოლის საერთაშორისო დღეა. სოციალური სამართლიანობის ცენტრის აზრით, საქართველოში კვლავ მნიშვნელოვანი გამოწვევაა ლგბტ(ქ)ი ადამიანების უსაფრთხოებისა და უფლებების რეალური დაცვა და სოციალური ჰომოფობია, რომელიც ლგბტ(ქ)ი ადამიანების ყოველდღიურობაზე, საჯარო და პირად ცხოვრებაზე მძიმე გავლენას ახდენს. „თუ წინა წლებში მმართველი გუნდის მხრიდან აშკარა იყო ანტი-ლგბტ(ქ)ი მოძრაობების, რადიკალური ძალადობრივი ჯგუფების მიმართ ლოიალობა, მიმდინარე წელს, ხელისუფლების მკაფიო კონსერვატიული შემობრუნების კვალდაკვალ, შესამჩნევია მმართველი პოლიტიკური კლასის მხრიდან ჰომოფობიური რიტორიკის ღიად გამოყენება. ამ მხრივ, აღსანიშნია მარტის მოვლენები, როდესაც საპროტესტო აქციის დისკრედიტაციის მიზნით ხელისუფლების წარმომადგენლების მხრიდან არაერთი ჰომოფობიური განცხადება გაჟღერდა. ქვეყნის მაღალჩინოსნების მხრიდან დემონსტრაციის მონაწილე ახალგაზრდების დემონიზების ფონზე, აქციის ერთ-ერთი მონაწილის - ლაზარე გროგორიადისის დაკავების შემდეგ, მის წინააღმდეგ სახელისუფლებო პროპაგანდა ღიად ამუშავდა და მას ირკალი კობახიძემ, არასტანდარტული გარეგნობის გამო, “არეული ორიენტაციის” ადამიანი უწოდა. ხოლო მმართველი პარტიის ლიდერმა ოპოზიციას და სამოქალაქო საზოგადოებას ბრალი დასდო „ლგბტ პროპაგანდასა“ და ეკლესიის რეპუტაციის შელახვაში. აქვე, უნდა აღინიშნოს, რომ ამა წლის მაისში პრემიერ-მინისტრმა მონაწილეობა მიიღო კონსერვატიულ ჰომოფობიურ კონფერენციაში, სადაც მან სხვა პოპულისტ ლიდერებთან ერთად ანტიდემოკრატიული, ჰომოფობიური შინაარსით გაჟღენთილი სიტყვა წარმოთქვა“... განცხადება ვრცლად… წყარო: socialjustice.org.ge

თბილისი. „ღია საზოგადოების ფონდი“ მოუწოდებს შრომის ინსპექციას, დაუყოვნებლივ შეისწავლოს შრომითი უსაფრთხოების მდგომარეობა დასაქმების ადგილზე, სადაც კედლის მოწყობის სამუშაოებს ორი მუშის სიცოცხლე ემსხვერპლა. „საქართველოში მშენებლობის სექტორში საქმიანობა კვლავ სიცოცხლისა და ჯანმრთელობისთვის მუდმივი რისკების არსებობას გულისხმობს. ამას შრომის ინსპექციის საქმიანობის სტატისტიკაც ადასტურებს. მიუხედავად შრომის ინსპექციის სრული მანდატით აღჭურვისა, სახელმწიფო დღემდე ვერ ახერხებს საფრთხის შემცველ დასაქმების ადგილებზე, მათ შორის სამშენებლო სექტორში დასაქმებულთათვის, ღირსეული და უსაფრთხო სამუშაო გარემოს შექმნას“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველომ“ შეისწავლა 2022 წლის 16 მაისს ტელეკომპანია „რუსთავი 2-ის“ ყოფილი დირექტორისა და „მთავარი არხის“ დამფუძნებლის ნიკა გვარამიას მიმართ გამოტანილი გამამტყუნებელი განაჩენი, რომელიც ორგანიზაციის შეფასებით ვერ პასუხობს კანონიერების, დასაბუთებულობისა და სამართლიანობის კრიტერიუმებს.  „მოსამართლის მიუკერძოებლობასა და ობიექტურობასთან დაკავშირებით არსებული ლეგიტიმური კითხვების უგულებელყოფის, ნიკა გვარამიას მსჯავრდებისა და სასჯელის განსაზღვრის კუთხით სამართლებრივი მსჯელობის სიმწირის, მტკიცებულების სახით წარმოდგენილი ფაქტების სისტემური ანალიზისა და სასამართლოების შესაბამისი პრაქტიკის, იურიდიული ლიტერატურისა თუ სამეცნიერო ნაშრომების გამოყენების ნაკლებობის გამო შეგვიძლია დავასკვნათ, რომ ნიკა გვარამიას მიმართ გამოტანილი გამამტყუნებელი განაჩენი დაუსაბუთებელია“, ნათქვამია ორგანიზაციის განცხადებაში. სრულად... წყარო: transparency.ge

თბილისი. მედიის ადვოკატირების კოალიცია სოლიდარობას უცხადებს ნიკა გვარამიას და მის დაუყოვნებლივ გათავისუფლებას მოითხოვს. „ნიკა გვარამიას პატიმრობიდან ერთი წელი გავიდა. ადგილობრივი და საერთაშორისო ორგანიზაციების შეფასებით, „მთავარი არხის“ მენეჯერი პოლიტიკურად მოტივირებულ საქმეზეა დაკავებული. ნიკა გვარამიას პატიმრობა არის უხეში თავდასხმა მედიის თავისუფლებაზე და კრიტიკული აზრის გამოხატვის უფლებაზე“, ნათქვამია კოალიციის განცხადებაში. სრულად... წყარო: კოალიციის გვერდი სოციალურ ქსელში

თბილისი. გაეროს ბავშვთა ფონდმა (UNICEF), შვიდ სახელმწიფო უნივერსიტეტთან და ბავშვთა უფლებების ცენტრებთან თანამშრომლობით, წამოიწყო კვლევა უნივერსიტეტის სტუდენტთა ფსიქიკურ ჯანმრთელობაზე, რომ სიღრმისეულად გაცნობოდა სტუდენტების ფსიქიკური ჯანმრთელობის საჭიროებებსა და მათ წვდომას შესაბამის სერვისებზე. UNICEF-ის კვლევის მიხედვით, ახალგაზრდები ფსიქიკური ჯანმრთელობის თვალსაზრისით ერთ-ერთი ყველაზე მოწყვლადი ჯგუფია - ყოველი მეოთხე ახალგაზრდა განიცდის საშუალო ან ძლიერი შფოთვის სიმპტომებს, ყოველ მესამეს კი დეპრესიის ნიშნები აწუხებს“. სრულად...  წყარო: www.unicef.org