ორგანიზაციის „პარტნიორობა ადამიანის უფლებებისთვის" იურისტები მარტყოფის შეზღუდული შესაძლებლობის მქონე პირთა პანსიონატში არსებული მდგომარების გაცნობის მიზნით იმყოფებოდნენ. „პანსიონატში ვიზიტისას შეიმჩნეოდა ინსტიტუციის მაცხოვრებლებსა და პერსონალს შორის დაძაბული, კონფლიქტური დამოკიდებულება. მაცხოვრებლები აღნიშნავდნენ, რომ დაწესებულებაში ხშირია ოთახებიდან სხვადასხვა ნივთების მოპარვის შემთხვევები, რასაც დირექცია და პერსონალი რეაგირების გარეშე ტოვებს. კონფლიქტური სიტუაციები ხშირია თავად მაცხოვრებლებს შორისაც, რაც ასევე რჩება პერსონალისა და დირექციის რეაგირების გარეშე. ვიზიტის შედეგად მიღებული ინფორმაციის გადამოწმების და დროული რეაგირების მიზნით PHR-მა წერილობით მიმართა ადამიანით ვაჭრობის (ტრეფიკინგის) მსხვერპლთა, დაზარალებულთა დაცვის და დახმარების სახელმწიფო ფონდს, საქართველოს შინაგან საქმეთა სამინისტროს და საქართველოს სახალხო დამცველს", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. „საერთაშორისო გამჭვირვალობა - საქართველო" (TI) „ბავშვის უფლებათა კოდექსსა" და თანმდევ კანონებში შესატანი ცვლილებების პაკეტს ეხმიანება.  „საქართველოს პარლამენტმა პირველი მოსმენით განიხილა „ბავშვის უფლებათა კოდექსის" და თანმდევ კანონებში ცვლილებების პროექტები. ახალი კოდექსი მიზნად ისახავს სახელმწიფო პოლიტიკის, სისტემური მიდგომის ჩამოყალიბებას ბავშვთა უფლებების დაცვის სფეროში. იქმნება ერთიანი საკანონმდებლო აქტი ბავშვის უფლებების შესახებ. ახალი კოდექსი ყველა სახელმწიფო ორგანოს, ფიზიკური და იურიდიული პირისთვის ბავშვთან მუშაობის წარმართვისას სახელმძღვანელო უნდა იყოს", - ვკითხულობთ TI-ის მიერ გავრცელებულ ინფორმაციაში.  სრულად... წყარო: ორგანიზაციის ვებგვერდი

თბილისი. სახალხო დამცველი მიესალმება 3 მაისს მიღებული კანონით დისკრიმინაციის საქმეებზე მისი მანდატის გაძლიერებას და ახალ ცვლილებებს მნიშვნელოვან წინგადადგმულ ნაბიჯად აფასებს. როგორც სახალხო დამცველის მიერ გავრცელებულ ინფორმაციაშია აღნიშნული, მანამდე არსებული საკანონმდებლო ჩარჩო სახალხო დამცველს კერძო სექტორში დისკრიმინაციის საქმეების შესწავლისათვის აუცილებელი ბერკეტებით ვერ უზრუნველყოფდა. კერძო პირებს არ ევალებოდათ სახალხო დამცველისათვის საქმის გამოსაკვლევად აუცილებელი ინფორმაციის მიწოდება, მისი რეკომენდაციის განხილვა და შედეგების შეტყობინება.  სრულად... წყარო: სახალხო დამცველის ვებგვერდი

თბილისი. ღია საზოგადოების ფონდმა (OSGF) კონფერენციით გახსნა დისკუსია უსახკლარობაზე. "ამ თემაზე მომუშავე სხვადასხვა აქტორების ერთ სივრცეში შეხვედრამ მოგვცა შესაძლებლობა, რომ შევაფასოთ ცენტრალური და ადგილობრივი ხელისუფლების პოლიტიკა. უსახლკარობა უფლებრივ ჭრილში უნდა განვიხილოთ და უსახლკარობის სახელმწიფო პოლიტიკის პრობლემები და გამოწვევები გავიაზროთ". სრულად... წყარო: ორგანიზაციის გვერდი სოციალურ ქსელში

თბილისი. „ადამიანის უფლებების სწავლებისა და მონიტორინგის ცენტრი" (EMC) საქართველოს პროკურატურის მიერ თემირლან მაჩალიკაშვილის სიცოცხლის ხელყოფის საქმესთან დაკავშირებით გაკეთებულ განცხადებას ეხმიანება.  EMC მოუწოდებს საქართველოს პროკურატურას, დროულად მიიღოს სამართლიანი და ადეკვატური გადაწყვეტილება ამ საქმეზე და დაიწყოს სისხლისსამართლებრივი დევნა, როგორც, უშუალოდ, იმ სპეცრაზმელის მიმართ, რომელმაც გაისროლა, ასევე, სპეცოპერაციის დაგეგმვასა და განხორციელებაზე პასუხისმგებელი თანამდებობის პირების მიმართ.  სრულად... წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციის დუშეთის ოფისის დახმარებით, მოქალაქემ შეძლო საკუთარი უფლებების დაცვა და მიწის ნაკვეთი დაიბრუნა. „უზენაესმა სასამართლომ დაუშვებლად ცნო სსიპ სახელმწიფო ქონების ეროვნული სააგენტოს და შპს „კ"-ს საკასაციო საჩივრები. შესაბამისად, დავა საბოლოოდ დასრულდა და საიას დახმარებით, პირმა შეძლო ქონებრივი უფლებების აღდგენა", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება 5 მაისს, დილით სახელმწიფო უსაფრთხოების სამსახურში მალხაზ მაჩალიკაშვილის დაბარების ფაქტს. „ჩვენთვის გაუგებარია შაბათს, დილით, დაკითხვამდე რამდენიმე საათით ადრე, რატომ მოსთხოვეს სუს-ის თანამშრომლებმა მაჩალიკაშვილს დაკითხვაზე მისვლა და რატომ არ დაიბარეს ის გონივრულ ვადაში, მალხაზ მაჩალიკაშვილის ადვოკატებთან სათანადო კომუნიკაციის გზით. ჩვენი მოთხოვნით, მალხაზ მაჩალიკაშვილის და მისი ნათესავის მოწმედ დაკითხვა გადაიდო 2019 წლის 7 მაისს, 11 საათისთვის”, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „ადამიანის უფლებების სწავლებისა და მონიტორინგის ცენტრი" (EMC), ახალგორელი აქტივისტისა და ჟურნალისტის, თამარ მეარაყიშვილის წინააღმდეგ ცხინვალის რეგიონში მიმდინარე დევნის პრაქტიკის გამო, ხელისუფლებას ქმედითი პოლიტიკური, დიპლომატიური და სამართლებრივი ზომების მიღებისკენ მოუწოდებს.  „მიუხედავად იმისა, რომ საქართველოს ხელისუფლება ოკუპირებულ ტერიტორიებზე ეფექტიან კონტროლს ვერ ახორციელებს, ადამიანის უფლებათა საერთაშორისო სამართალი მას აკისრებს პოზიტიურ ვალდებულებას, მის ხელთ არსებული ყველა საშუალების გამოყენებით დაიცვას თამარ მეარაყიშვილის უფლებები. ამის გათვალისწინებით, EMC მოუწოდებს საქართველოს სახელმწიფოს: დროულად და ეფექტიანად გამოიძიოს თამარ მეარაყიშვილის გატაცების საქმე, იდენტიფიცირებული პირების მხრიდან გამოვლენილ ქმედებებს მისცეს რელევანტური სისხლის სამართლებრივი კვალიფიკაცია და შესაბამის პირებს დააკისროს პასუხისმგებლობა; უზრუნველყოს თამარ მეარაყიშვილის უფლებების დაცვა საერთაშორისო სამართლებრივი მექანიზმების გამოყენებით. ამ კუთხით EMC მიიჩნევს, რომ მნიშვნელოვანია მეარაყიშვილის საქმე საქართველოს მთავრობამ ადამიანის უფლებათა ევროპულ სასამართლოში რუსეთის წინააღმდეგ წარდგენილ მესამე სახელმწიფოთა შორის განაცხადის ნაწილად აქციოს; ყველა საერთაშორისო დონეზე მოლაპარაკებების წარმოებისას აქტიურად დააყენოს თამარის, როგორც ეთნიკურად ქართველი აქტივისტის უფლებების დაცვის საკითხი და მისი უფლებებისა და ინტერესების მნიშვნელობას ხაზი გაუსვას ყველა საერთაშორისო ფორმატში", - ვკითხულობთ EMC-ის მიერ გავრცელებულ განცხადებაში.  სრულად... წყარო: ორგანიზაციის ვებგვერდი

თბილისი. დისკრიმინაციის ყველა ფორმის აღმოფხვრის შესახებ კანონის მიღების 5 წლის თავის აღსანიშნავად, ევროპის საბჭომ და სახალხო დამცველის აპარატმა ახალგაზრდებისთვის საჯარო შეხვედრა გამართეს. „თანასწორობის მნიშვნელობა და დისკრიმინაციის აღმოფხვრის გზები" - ასე ერქვა შეხვედრას, რომლის მონაწილეებს შესაძლებლობა ქონდათ მოსაზრებები გაეცვალათ თანასწორობის, ადამიანის უფლებებისა და ანტიდისკრიმინაციული პოლიტიკის შესახებ და ესაუბრათ მათ მნიშვნელობაზე დემოკრატიის, განვითარებისა და მშვიდობის უზრუნველყოფისთვის; მიეღოთ მეტი ინფორმაცია „მე ვირჩევ თანასწორობის" კამპანიის შესახებ, იმის თაობაზე, თუ როგორ დაუჭირონ მხარი დისკრიმინაციის, სიძულვილით მოტივირებული დანაშაულებებისა და სიძულვილის ენის წინააღმდეგ ბრძოლას საქართველოში.  სრულად... წყარო: ombudsman.ge

თბილისი. „კოალიცია თანასწორობისთვის", რომელიც 10 არასამთავრობო ორგანიზაციის გაერთიანებაა, მხარს უჭერს ძალოსან თათია ლორთქიფანიძეს და სპეციალურ განცხადებას ავრცელებს.  „სპორტსმენი ძალოსან ქალთა ნაკრების მთავარ მწვრთნელს სექსუალური შევიწროების გამო, ხოლო ძალოსანთა ფედერაციას დისკრიმინაციაზე უჩივის სასამართლოში. მის ინტერესებს კოალიციის წევრი ორგანიზაცია „საფარი" დაიცავს", - აღნიშნულია განცხადებაში, - „სექსუალური შევიწროება დისკრიმინაციის ერთ-ერთი ფორმაა, რომელსაც ქალები ხშირად განიცდიან, მაგრამ სასამართლოს ძალიან იშვიათად მიმართავენ. მნიშვნელოვანია, რომ ქალებმა დაიცვან საკუთარი უფლებები და გამოიყენონ „დისკრიმინაციის ყველა ფორმის აღმოფხვრის შესახებ" კანონი".  სრულად... წყარო: კოალიციის ვებგვერდი

თბილისი. საქართველოს სახალხო დამცველი სპეციალური განცხადებით ეხმაურება „დისკრიმინაციის ყველა ფორმის აღმოფხვრის შესახებ" კანონის მიღების 5 წლის თავს. ანტიდისკრიმინაციული კანონის მიღების ერთ-ერთ მთავარ მონაპოვრად სახალხო დამცველი მიიჩნევს დისკრიმინაციის, როგორც სოციალური ფენომენის, თაობაზე სოციუმში დაწყებულ დისკუსიას და ცნობადობის ამაღლებას, რაც თავის მხრივ, ხელს უწყობს დაუცველი ჯგუფების მიმართ შემწყნარებლური გარემოს ჩამოყალიბებას. „სამწუხაროდ, თანასწორობის მიღწევის პროცესში კვლავ არაერთი გამოწვევა არსებობს, რაც, ძირითადად, საკანონმდებლო ჩარჩოს პრაქტიკაში ეფექტიანი იმპლემენტაციის პრობლემას და საზოგადოებაში ჯერ კიდევ მყარად არსებულ სტერეოტიპებს უკავშირდება. სახალხო დამცველი აღნიშნავს, რომ არსებულ გამოწვევებთან ეფექტიანი ბრძოლისთვის, მნიშვნელოვანია, ყველა დაინტერესებული მხარის - ხელისუფლების, სამოქალაქო სექტორის თუ საერთაშორისო პარტნიორების ჩართულობა და კოორდინირებულად თანამშრომლობა", - აღნიშნულია განცხადებაში.  სრულად... წყარო: ორგანიზაციის ვებგვერდი

თბილისი. „დისკრიმინაციის ყველა ფორმის აღმოფხვრის შესახებ" საქართველოს კანონთან დაკავშირებით, საქართველოს ახალგაზრდა იურისტთა ასოციაცია განცხადებას ავრცელებს. „2014 წლის 2 მაისს საქართველოს პარლამენტმა „დისკრიმინაციის ყველა ფორმის აღმოფხვრის შესახებ" კანონი მიიღო. კანონის მოქმედების 5 წლის განმავლობაში საია-ს სტრატეგიულ სამართალწარმოებაში პრიორიტეტული ადგილი უჭირავს დისკრიმინაციასთან დაკავშირებულ საქმეებს. ამ პერიოდში საია-მ საერთო სასამართლოებსა და საქართველოს სახალხო დამცველთან 30-ზე მეტი საქმე აწარმოა. კანონის ამოქმედებიდან 5 წლის განმავლობაში საია აწარმოებდა სქესის, ასაკის, შეზღუდული შესაძლებლობის, რელიგიის, ეთნიკური წარმომავლობის, მოქალაქეობის, პოლიტიკური, პროფესიული კავშირის წევრობის და სხვა ნიშნებით დისკრიმინაციასთან დაკავშირებულ საქმეებს. 2018 წლის განმავლობაში, ისევე როგორც წინა წლებში, საია-ს წარმომადგენლობით წარმოებულ არაერთ საქმეზე დადგინდა დისკრიმინაცია სასამართლოს და სახალხო დამცველის მიერ", - ვკითხულობთ განცხადებაში.  სრულად... წყარო: ორგანიზაციის ვებგვერდი

თბილისი. „კოალიცია თანასწორობისთვის" ირაკლი ოქრუაშვილის მიერ საქართველოს მოქალაქე ეთნიკურ აზერბაიჯანელებთან დაკავშირებით გაკეთებულ საჯარო განცხადებებს ეხმიანება. „კოალიცია თანასწორობისთვის" ეხმიანება საქართველოს ყოფილი თავდაცვის მინისტრის ირაკლი ოქრუაშვილის 2019 წლის 25 და 30 აპრილს გაკეთებულ საჯარო განცხადებებს, რომელიც დავით გარეჯში წარმოქმნილ პრობლემასთან დაკვაშირებით, საქართველოს აზერბაიჯანელი თემის პოლიტიკურ ინსტრუმენტალიზებას და მარგინალიზებას უწყობს ხელს. მიუხედავად იმისა, რომ ირაკლი ოქრუაშვილის პოლიტიკური და სოციალური გავლენები დღეს არსებითად სუსტია, მისი რიტორიკა ეთნიკური უმცირესობების მიმართ სიმპტომატურად აჩვენებს დომინანტურ პოლიტიკასა და დისკურსს საქართველოს მოქალაქე ეთნიკური უმცირესობების მიმართ. ეს დიკურსი ხელს უწყობს მათ გაუცხოებას, სოციალურ დახარისხებას და მათი თემის გეოპოლიტიზებას", - ნათქვამია განცხადებაში.  სრულად... წყარო: emc.org.ge

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს განცხადებას, მშრომელთა სოლიდარობის საერთაშორისო დღესთან დაკავშირებით. „განვითარების არსებული მოდელისა და დასაქმების პოლიტიკის ხარვეზულობით განპირობებული სიღარიბისა და უმუშევრობის, სუსტი სოციალური დაცვის სისტემის, ქალების მიერ შესრულებული უხილავი და აუნაზღაურებელი შრომისა თუ არაფორმალურ სექტორში თვითდასაქმებული ადამიანებისთვის შეზღუდვების დაწესების ფონზე, დღეს "პრივილეგიაა” იყო დასაქმებული სერვისის სექტორში, ხშირად ანაზღაურებადი შვებულების, ბიულეტენის, ზეგანაკვეთური და ღამის შრომის განსხვავებული წესით ანაზღაურების გარეშე; ანაზღაურებით, რომელიც ხშირად არ იძლევა ინდივიდუალური სამომხმარებლო ხარჯის სრულად დაფარვის შესაძლებლობას და იძულებულს გხდის, შემოსავლის დამატებითი წყარო მოიძიო, თან იმ პირობებში, როცა არსებული სამუშაოზე მომეტებული და მძიმე შრომა გიწევს, რაც განაპირობებს არანორმირებულ, ზეგანაკვეთურ შრომას დამატებითი ანაზღაურების გარეშე; ამასთან, შენს მიმართ ზეწოლის ბერკეტად გამოიყენონ დაჯარიმების უსამართლო და არამართლზომიერი პოლიტიკები", - ნათქვამია EMC-ის განცხადებაში. სრულად... წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია მშრომელთა სოლიდარობის საერთაშორისო დღეს ეხმაურება. „1 მაისი მნიშვნელოვანი დღეა, რომელიც სიმბოლურად დასაქმებულების მიერ გაწეულ შრომის მნიშვნელობას და ღირსეული სამუშაო პირობების აუცილებლობას უსვამს ხაზს. ადამიანის მიერ შრომის თავისუფლების სრულყოფილი რეალიზაცია განაპირობებს კონკრეტული პირის თუ ქვეყნის სოციალურ კეთილდღეობას, თუმცა, საქართველოში ბოლო დროს განხორციელებული დადებითი საკანონმდებლო ცვლილებების მიუხედავად, შრომის თავისუფლების სათანადო დაცვის აუცილებლობა კვლავ არ არის სათანადოდ გააზრებული პოლიტიკის დონეზე", - აღნიშნულია საია-ს მიერ გავრცელებულ განცხადებაში.  სრულად... წყარო: ორგანიზაციის ვებგვერდი

თბილისი. მშრომელთა სოლიდარობის საერთაშორისო დღესთან დაკავშირებით, საქართველოს სახალხო დამცველის აპარატი განცხადებას ავრცელებს.  „1 მაისი მშრომელთა საერთაშორისო დღეა, ამ დღეს სახალხო დამცველი კიდევ ერთხელ მოუწოდებს ხელისუფლებას გაატაროს სათანადო ღონისძიებები შრომითი უფლებების სფეროში არსებული პრობლემების მოსაგვარებლად", - ვკითხულობთ განცხადებაში, - „განსაკუთრებულ შეშფოთებას იწვევს სამუშაო ადგილებზე დაღუპულთა და დაშავებულთა მზარდი სტატისტიკა. 2018 წელს წარმოებაში მომხდარი უბედური შემთხვევების შედეგად, დაიღუპა 59 და დაშავდა 199 ადამიანი... არ ტარდება სათანადო ღონისძიებები დაქირავებულთა ჯანმრთელობაზე, მათი კვალიფიკაციის ამაღლებაზე, პირველადი სამედიცინო დახმარების სწავლებაზე ზრუნვისთვის. არ არის დაცული სანიტარიულ-ჰიგიენური ნორმები... შრომის კანონმდებლობით გათვალისწინებული მოთხოვნების მონიტორინგმა აჩვენა, რომ, ხშირ შემთხვევაში, სამუშაო დროის ხანგრძლივობა შეუსაბამოა ხელშეკრულებით განსაზღვრულ პირობებთან; ირღვევა შვებულების გაცემის წესი, ანაზღაურების გაცემის წესი... თანასწორობის პრინციპების დაცვის მიმართულებით, შრომის უფლებები განსაკუთრებით მოწყვლად ჯგუფების - ქალებისა და შშმ პირების მიმართ ირღვევა... სახალხო დამცველი თავისი მანდატის ფარგლებში აგრძელებს ქვეყანაში შრომითი უფლებების დაცვის მდგომარეობის შესწავლას და გამოიყენებს მის ხელთ არსებულ ყველა საშუალებას არსებული ვითარების გამოსასწორებლად".  სრულად... წყარო: ორგანიზაციის ვებგვერდი

1 მაისს, 17:00 საათზე, მთავრობის ადმინისტრაციასთან, საქართველოს გაერთიანებული პროფკავშირები საპირველმაისო აქციას გამართავენ.  მისამართი: პავლე ინგოროყვას ქუჩა #7

თბილისი. საქართველოს ახალგაზრდა იურისტთა ასოციაციამ, პარტნიორ ორგანიზაცია ,,ადამიანის უფლებათა დაცვის ევროპული ცენტრთან (EHRAC)'' თანამშრომლობით, 2019 წლის 17 აპრილს, ადამიანის უფლებათა ევროპულ სასამართლოში საჩივარი წარადგინა. საჩივარი პოლიციელების მხრიდან ირაკლი ხოფერიას მიმართ განხორციელებულ არასათანადო მოპყრობასა და ამ ფაქტზე დაწყებული გამოძიების არაეფექტურობას შეეხება.  სრულად... წყარო: gyla.ge

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს სოციალური უფლებების ევროპულმა კომიტეტის (ECSR) 2018 წლის დოკუმენტს საქართველოს შესახებ. დოკუმენტი შეეხება ევროპის სოციალური ქარტიით (ESC) გათვალისწინებულ შრომით უფლებებთან (რატიფიცირებულ ნაწილებთან მიმართებით) საქართველოს კანონმდებლობის შესაბამისობას და მოიცავს ისეთ საკითხებს, როგორიცაა: სამუშაო საათების გონივრულობა, უქმე დღეების ანაზღაურება, ყოველკვირეული დასვენების პერიოდი, ღამის სამუშაო, ქალი და მამაკაცი მუშაკების უფლება თანაბარი ღირებულების სამუშაოსათვის თანაბარი ანაზღაურების მიღებაზე, დასაქმების შეწყვეტის შესახებ გონივრული ვადით ადრე ინფორმირება, ორგანიზების უფლება, ერთობლივი კონსულტაციები, მოლაპარაკების პროცედურები, ინფორმაციისა და კონსულტაციის უფლება კოლექტიური გათავისუფლების პროცედურების შემთხვევებში, კოლექტიური მოქმედება.  სრულად... წყარო: ორგანიზაციის ვებგვერდი

თბილისი. საქართველოს სახალხო დამცველმა გამოაქვეყნა სპეციალური ანგარიში 2018 წელს „დისკრიმინაციის წინააღმდეგ ბრძოლის, მისი თავიდან აცილებისა და თანასწორობის მდგომარეობის შესახებ".  „საქართველოს სახალხო დამცველი, „დისკრიმინაციის ყველა ფორმის აღ-მოფხვრის შესახებ" საქართველოს კანონის შესაბამისად, წელიწადში ერთხელ შეიმუშავებს და აქვეყნებს სპეციალურ ანგარიშს ქვეყანაში დისკრიმინაციის წინააღმდეგ ბრძოლის, მისი თავიდან აცილების და თანასწორობის მდგომარე-ობის შესახებ. წინამდებარე ანგარიში წარმოადგენს რიგით მე-4 დოკუმენტს. დადებით ცვლილებებთან ერთად, სამწუხაროდ, საქართველოში თანასწორობის უფლების დაცვა კვლავ არაერთი გამოწვევის წინაშე დგას. ამ ეტაპზე, არ არის განხორციელებული საკანონმდებლო ცვლილებები, რომელსაც დისკრიმინაცი-ის წინააღმდეგ ბრძოლის შესახებ კანონმდებლობის დახვეწის მიზნით, საქართ-ველოს სახალხო დამცველი 2015 წლიდან ითხოვს. სახელმწიფო ხელისუფლების წარმომადგენლების მხრიდან არ ისმის თანასწორობის მხარდამჭერი განცხა-დებები; ამასთან, როგორც თანასწორობის შესახებ სახალხო დამცველის წინა ანგარიშშიც2 იყო აღნიშნული, სასამართლოები კვლავ არ აწარმოებენ დისკრიმ-ინაციის შესახებ საქმეების შესახებ სტატისტიკას. ყველაზე დაუცველ ჯგუფებად, წინა წლების მსგავსად, რჩებიან ქალები, შეზ-ღუდული შესაძლებლობის მქონე პირები, და ლგბტ+ თემის წარმომადგენლები", - ვკითხულობთ ანგარიშის წინასწიტყვაობაში.  სრულად... წყარო: ორგანიზაციის ვებგვერდი

თბილისი. წამების მსხვერპლთა ფსიქოსოციალური და სამედიცინო რეაბილიტაციის საქართველოს ცენტრისა (GCRT) და უკრაინის ფსიქიატრთა ასოციაციას წარმომადგენლებმა წამების მსხვერპლთა რეაბილიტაციის საერთაშორისო ცენტრთან (IRCT) თანამშრომლობით კიევში სამდღიანი ტრენინგი ჩაატარეს სტამბოლის პროტოკოლის იმპლემენტაციის შესახებ. სრულად... წყარო: ორგანიზაციის გვერდი სოციალურ ქსელში

აჭარა. 23 აპრილს, ქ. ბათუმის მე-9 საჯარო სკოლაში ჩატარდა თანატოლთა ტრენინგი, თემაზე: „ქალთა მიმართ ძალადობა და მასთან ბრძოლის გზები". მომხსენებელი გახლდათ ბათუმის ახალგაზრდული ცენტრის მოხალისე - ლაშა ბერიძე. „დისკუსიის რეჟიმში, ვისაუბრეთ ქალთა მიმართ ძალადობის გააზრებაზე ჩვენს საზოგადოებაში, მის გამომწვევ მიზეზებსა და შედეგებზე, დავასახელეთ ამ პრობლემასთან ბრძოლის ოპტიმალური გზები", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში