რაჭა-ლეჩხუმი. „უფლებები საქართველოს“ ამბროლაურის სამართლებრივი დახმარების ცენტრის იურისტმა ანა ჯელაძემ ცაგერში საინფორმაციო-საკონსულტაციო შეხვედრები გამართა. შეხვედრებს ესწრებოდნენ სკოლის დირექტორები, პედაგოგები, მშობლები და მოსწავლეები.  „მონაწილეებმა ისაუბრეს თავიანთ რეგიონში გენდერული თანასწორობის კუთხით არსებულ პრობლემებზე და ერთმანეთს საკუთარი გამოცდილება გაუზიარეს. „უფლებები საქართველოს“ იურისტმა მათ ამბროლაურის სამართლებრივი დახმარების ცენტრის საქმიანობა და უფასო იურიდიული დახმარებით სარგებლობის პირობები გააცნო. ასევე, მიაწოდა ინფორმაცია ეკონომიკური გაძლიერების კუთხით თავიანთ რეგიონში არსებულ შესაძლებლობებზე.“ სრულად... წყარო: rights.ge

თბილისი. საერთაშორისო გამჭვირვალობა - საქართველომ კიდევ ერთი საქმე მოიგო. ორგანიზაციის იურისტების დახმარებით, ქუთაისის სააპელაციო სასამართლომ საქმე შეწყვიტა და უდანაშაულოდ ცნო მოქალაქე ვაჟა თავართქილაძე, რომელსაც საკუთარი საშაურმის ვიტრინაზე გამოკრული ჰქონდა წარწერა: ბათუმის ზონდერი მერი - ხალხის მტერი. ამ გადაწყვეტილებამდე, ბათუმის საქალაქო სასამართლომ მოქალაქე 1000 ლარით დააჯარიმა. სრულად... წყარო: ორგანიზაციის გვერდი სოციალურ ქსელში

თბილისი. 17 ივლისს, პარტნიორობა ადამიანის უფლებებისთვის (PHR) ადვოკატები და ახალგაზრდა ქალი ფეხბურთელები ქუთაისიდან, აშშ-ს ელჩს, კელი დეგნანს შეხვდნენ.  „შეხვედრაზე ისაუბრეს ქალი ადვოკატებისა და უფლებადამცველების მიერ გაწეულ შრომაზე ქალთა უფლებების მიმართულებით. ასევე, ხაზი გაესვა ქალი ფეხბურთელების გამბედაობას და სწრაფვას სამართლიანობისკენ.  აშშ-ს მთავრობა, USAID-ის ჩათვლით, მზად არის მუდმივად შეუწყოს ხელი ქართველი ხალხის საყოველთაო უფლებების დაცვას“. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველოს“ იურისტებმა უკრაინის მოქალაქეებისათვის საინფორმაციო შეხვედრა გამართეს. „შეხვედრის ფარგლებში მონაწილეებმა ბინადრობის ნებართვის მოპოვების, ბიზნესის რეგისტრაციის, სოციალურ სერვისებზე წვდომის და სხვა აქტუალურ საკითხებზე იმსჯელეს“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, შინაგან საქმეთა სამინისტროს თანამშრომელი, გოგა რაზმაძე მის მიმართ დისკრიმინაციული და ღირსების შემლახავი მოპყრობის ფაქტებზე საუბრობს. „გოგა რაზმაძის მიერ განცხადებაში მოყვანილი გარემოებები არის საკმარისად კონკრეტული და მოითხოვს ეფექტურ რეაგირებას. ზოგიერთი ფაქტი კი დანაშაულის ნიშნებსაც შეიცავს. IDFI მხარდაჭერას უცხადებს გოგა რაზმაძეს და მოუწოდებს სამინისტროს, შეაჩეროს ნებისმიერი პროცესი, რომელიც შეიძლება მიზნად ისახავდეს თანამშრომლების შევიწროებას გამოთქმული აზრისთვის“, ნათქვამია ორგანიზაციის განცხადებაში. ვრცლად... წყარო: idfi.ge

სამცხე-ჯავახეთი. სოციალური სამართლიანობის ცენტრი გიზიარებთ ტიგრან თარზიანის ბლოგპოსტს: „საარსებო შემწეობის სისტემის მიღმა: ჯავახეთში მცხოვრები ეთნიკურად სომეხი თემის გამოწვევები“. „სოციალური მომსახურების სააგენტოს სტატისტიკის მიხედვით, ახალქალაქსა და ნინოწმინდაში მცხოვრები, საარსებო შემწეობის მიმღები ოჯახების რაოდენობა მცირეა, რის გამომწვევ მიზეზებზეც წარმოდგენილ დოკუმენტში იქნება საუბარი. სამწუხაროდ, ამ დრომდე, სახელმწიფო არ ცვლის საკუთარ სოციალურ პოლიტიკას, რაც სხვადასხვა ჯგუფების კეთილდღეობაზე მძიმედ აისახება. ეთნიკური უმცირესობის წარმომადგენლების წინაშე არსებული დამატებითი გამოწვევები კი საარსებო შემწეობის მიღებას კიდევ უფრო ართულებს. შედეგად, ჯავახეთში მცხოვრები ოჯახების მდგომარეობა ფაქტობრივად არ უმჯობესდება - არსებული პრობლემები კვლავ დღის წესრიგშია და, ამავდროულად, ახალ სირთულეებსაც იწვევს“. ბლოგპოსტი იხ. ბმულზე... პროექტი ხორციელდება USAID-ის სამოქალაქო საზოგადოების ჩართულობის პროგრამის მხარდაჭერით. წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) გიზიარებთ ლელა მაჭარაშვილის ბლოგპოსტს: ასაკის ნიშნით საჯარო თანამდებობაზე წვდომის შეზღუდვის კონსტიტუციური სტანდარტები. „კონსტიტუციით გარანტირებული საჯარო თანამდებობის დაკავების უფლება მოიცავს არა მხოლოდ კონკრეტული თანამდებობის დაკავების, არამედ ამ თანამდებობრივი უფლებამოსილების შეუფერხებლად განხორციელებისა და თანამდებობიდან უსაფუძვლოდ გათავისუფლებისაგან დაცვის გარანტიებს. ამდენად, კანონმდებლობით უნდა გამოირიცხებოდეს თანამდებობაზე წვდომის დაუსაბუთებელი შეზღუდვისა ან/და უსაფუძვლოდ გათავისუფლების შემთხვევები“. სრულად... წყარო: gyla.ge

იმერეთი. საქართველოს ახალგაზრდა იურისტთა ასოციაცია (საია) სასამართლოში იცავდა სამტრედიის მუნიციპალიტეტის მერიაში შიდა აუდიტის სამსახურის მონიტორინგისა და შიდა კონტროლის განყოფილების უფროსის ინტერესებს, რომელიც დაწესებულებაში მრავალწლიანი მუშაობის შემდეგ სამსახურიდან გათავისუფლდა. „სასამართლომ უკანონოდ მიიჩნია მოხელის სამსახურიდან გათავისუფლება. ამასთან, მოპასუხე უწყებას დაევალა უკანონოდ გათავისუფლებული პირის სამსახურში აღდგენა და მისთვის იძულებითი განაცდურის ანაზღაურება“. სრულად... წყარო: gyla.ge

სამეგრელო. 17 და 18 ივლისს სოციალური სამართლიანობის ცენტრი ზუგდიდის მუნიციპალიტეტის სოფლებში, განმუხური და რუხი, მცხოვრები მოსახლეობისთვის სამართლებრივი დახმარების შეხვედრას გამართავს. ორგანიზაციის იურისტები ადგილობრივ მოსახლეობას სთავაზობენ უფასო სამართლებრივ კონსულტაციას მათთვის პრობლემატურ სამართლებრივ საკითხებზე. მათ შორის, დევნილის სტატუსის, სოციალური შემწეობების, ეთნიკური, რელიგიური ნიშნით დისკრიმინაციის, პოლიციის თანამშრომლების მხრიდან არასათანადო მოპყრობის, მოქალაქეობის, მიწაზე საკუთრების უფლების რეგისტრაციის, ოჯახში ძალადობისა და იძულებით ქორწინების საკითხებზე. შეხვედრა ტარდება შვედეთის საერთაშორისო განვითარების თანამშრომლობის სააგენტოს (SIDA) და კვინა ტილ კვინას მიერ მხარდაჭერილი პროექტის, „კონფლიქტების ტრანსფორმაციის წახალისება კონფლიქტებთან დაკავშირებული ისტორიის კრიტიკული გადააზრების და ქალთა პერსპექტივების გაძლიერებით“, ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გთავაზობთ ახალ მიმოხილვას: პასუხი პოპულისტურ გამოწვევას: ადამიანის უფლებადამცველი ორგანიზაციების ახალი ტაქტიკები. მიმოხილვა სრულად იხ. ბმულზე... „მსოფლიოს მასშტაბით პოპულისტი მთავრობებისა და აქტორების მომრავლება მნიშვნელოვან რისკებსა და გამოწვევებს წარმოშობს ადამიანის უფლებათა დაცვისა და ამ სფეროში მოქმედი ორგანიზაციებისთვის, თუმცა ამ მოვლენას შეიძლება თან ახლდეს მოულოდნელი პოზიტიური შედეგიც: საგანგებო გამოწვევებმა უფლებადამცველ ორგანიზაციებს, შესაძლოა, ბიძგი მისცეს, თავიანთი მოქმედებების სტრატეგიებს გადახედონ და დამკვიდრებულ არქიტექტურაში ტრანსფორმაციულ გარდაქმნებზე დაიწყონ ფიქრი“. წყარო: socialjustice.org.ge

თბილისი. გაეცანით ეკო მამალაძის ბლოგპოსტს: „ზეგანაკვეთური შრომა საჯარო სამსახურში: როცა საათიც მუშაობას წყვეტს“. „ზეგანაკვეთური შრომა გავრცელებული პრაქტიკაა როგორც საჯარო, ასევე კერძო სექტორში დასაქმებულთათვის, რაც კიდევ უფრო მეტ მნიშვნელობას სძენს კანონმდებლის მიერ საკითხის სათანადო რეგულირებასა და ამ მიმართულებით სახელმწიფოს მხრიდან ეფექტიანი ზედამხედველობის განხორციელებას. სამწუხაროდ, საქართველოს შრომის კულტურაში ზეგანაკვეთური სამუშაოს ანაზღაურების გარეშე შესრულება ნორმირებულია, რასაც ადასტურებს ბოლოდროინდელი კვლევები, რომლის თანახმად დამსაქმებლების მხრიდან ერთ-ერთი ყველაზე ხშირად დარღვეული უფლება ზეგანაკვეთური სამუშაოს ანაზღაურების დაუცველობა იყო“. სრულად... წყარო: gyla.ge

თბილისი. პარტნიორობა ადამიანის უფლებებისთვის (PHR) ინფორმაციით, შრომით მიგრაციაში მყოფი ქალების მიმართ ეკონომიკური ძალადობა ასევე გამოიხატება, მათი გამომუშავებული ფულის სრულად გამოგზავნის მოთხოვნაში, რასაც ისინი ემორჩილებიან. „როცა გამოდიან ქალები ვინც 24 საათიანზე მუშაობენ, 50 ცენტი რო 50 ცენტია იმას არ იტოვებენ ისე აგზავნიან.  როცა 24 საათიანზე მუშაობ დასვენების დღეს ქუჩაში ხომ ვერ იქნები და ბინა ღირს 25 ევრო. ანუ ის 25 ევრო რომ არ გადაიხადონ, მართლა ქუჩაში სძინავთ, სკვერში. ერთ პურს წამოიღებენ სახლიდან, ერთ ბოთლ წყალს სახლიდან რომ გარეთ არ იყიდონ და ისე სხედან  გარეთ“. პარტნიორობა ადამიანის უფლებებისთვის (PHR) გუნდი აქტიურად მუშაობს შრომით მიგრაციაში მყოფი ქალების უფლებების დაცვაზე. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების ორგანიზაციები ეხმიანებიან 2023 წლის 8 ივლისს განვითარებულ მოვლენებს.  „საგანგაშოა, რომ შინაგან საქმეთა სამინისტრო კვლავ განაგრძობს სიძულვილის ჯგუფების მიმართ შემწყნარებელ პოლიტიკას. ნაცვლად კონსტიტუციური ვალდებულებების შესრულებისა, უზრუნველყოს პრევენციული და სამართალდარღვევაზე რეაგირების ღონისძიებები საზოგადოებრივი უსაფრთხოების დასაცავად, უფლებას აძლევს მათ, ხელი შეუშალონ სხვა ადამიანების შეკრებისა და გამოხატვის თავისუფლებას, დაუბრკოლებლად გაავრცელონ ძალადობისკენ მოწოდებები, და განახორციელონ ამგვარი ქმედებები“. ვრცლად... წყარო: socialjustice.org.ge ფოტო: პუბლიკა

თბილისი. „კოალიცია თანასწორობისთვის“ მოუწოდებს სამართალდამცავ უწყებებს, მიიღონ ყველა შესაძლო ზომა „თბილისი პრაიდის“ მიერ „პრაიდ კვირეულის“ ფარგლებში დაანონსებული ღონისძიებების უსაფრთხოების უზრუნველსაყოფად. „მნიშვნელოვანია, რომ წელს 2022 წლისგან განსხვავებით შინაგან საქმეთა სამინისტროს ჯერჯერობით არ გაუვრცელებია განცხადება დაგეგმილი ღონისძიებების უსაფრთხოდ ჩატარების უზრუნველყოფის შესახებ. ჰომოფობიის პოლიტიკური გამოყენება ხელისუფლების მხრიდან და დაუსჯელობის ის გარემო, რომელიც კრემლისტური, ექსტრემისტული ჯგუფების ძალადობის აშკარა პოლიტიკურ და სამართლებრივ შეწყნარებაში ჩანს, გარდა იმისა, რომ არაუსაფრთხო და მტრულ გარემოს ქმნის ლგბტი ადამიანებისთვის და აქტივისტებისთვის, ის აზიანებს სოციალურ მშვიდობას და აღრმავებს  პოლარიზაციას. სახელმწიფოს მხრიდან უსაფრთხოების დაცვის საბაზისო ვალდებულებების შეუსრულებლობას ნეგატიური გავლენა ექნება ევროინტეგრაციის პროცესისთვისაც“, ნათქვამია განცხადებაში. სრულად... წყარო: equalitycoalition.ge

ქვემო ქართლი. 6 ივლისს, სოციალური ქსელის საშუალებით, ორგანიზაციისთვის „პარტნიორობა ადამიანის უფლებებისთვის“ (PHR) ცნობილი გახდა, რომ ქალაქ რუსთავში 9 წლის ბავშვზე ფიზიკურად იძალადა ოჯახის წევრმა (მამინაცვლის მამამ). არასრუწლოვანი გამოკითხეს რუსთავის სამმართველოს პირველ განყოფილებაში, სადაც ბავშვმა, სავარაუდოდ, მოძალადეების შიშის გამო, ვერ შეძლო ძალადობის შესახებ საუბარი. PHR-მა, როგორც ბავშვის უფლებებზე მომუშავე ორგანიზაციამ, ინფორმაციის მიღების წუთიდან წერილობით მიმართა ადამიანის უფლებათა დაცვისა და გამოძიების ხარისხის მონიტორინგის დეპარტამენტს და სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს და მოითხოვა ბავშვის უფლებების და უსაფრთოხების დაცვისთვის ყველა საჭირო ზომის დაუყოვნებლივ მიღება. გავრცელებული ინფორმაციის თანახმად, სავარაუდო მოძალადე დაკავებულია, თუმცა ძალადობაგამოვლილი ბავშვის რეაბილიტაციისა და მისი ინტერესების დასაცავად, არაერთი ღონისძიების გატარებაა საჭირო. PHR-ი მოუწოდებს სახელმწიფო ორგანოებს და გადაწყვეტილების მიმღებ პირებს უზრუნველყონ საქმეზე სრულყოფილი და სწრაფი მართლმსაჯულების განხორიცელება, ბავშვის საუკეთესო ინტერესის უპირატესი გათვალისწინებით. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, 2023 წლის მაისის მდგომარეობით, 254 333 ბავშვი საარსებო შემწეობის მიმღებია, რაც არასრულწლოვნების საერთო რაოდენობის 28.3%-ია.  „ეს ნიშნავს იმას, რომ ფაქტობრივად, ყოველი მესამე ბავშვი საარსებო შემწეობას იღებს. უკანასკნელი ათი წლის განმავლობაში საარსებო შემწეობის მიმღებ ბავშვთა რაოდენობა 146.3%-ით გაიზარდა“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) აქვეყნებს ცირა ჯანანაშვილის ბლოგპოსტს: „უკანონოდ გათავისუფლებული საჯარო მოხელეების უფლებების აღდგენის პრობლემური საკითხები“. „საკუთარი უფლებების დაცვის გზა, პირველ ეტაპზე, ია-ვარდების ნაცვლად გაჭიანურებული სასამართლო პროცესებით და სტრესით რომ არის მოფენილი, ეს არახალია, მაგრამ არანაკლებ ეკლიანია შემდეგი ეტაპიც, რომელიც გადაწყვეტილების აღსრულების დროში გაწელილი პროცესით და მოვალის თვითნებური ქმედებებით არის გაჟღენთილი. ეს ქმედებები კი, არცერთ კანონს თუ კანონქვემდებარე აქტს არ შეესაბამება. მარტივად რომ ვთქვათ, ხშირად საჯარო სამსახურში დასაქმებული და უკანონოდ გათავისუფლებული პირები სასამართლოში დავას იგებენ, თუმცა, სასამართლოს სამი ინსტანციის გავლის შემდგომაც მთავარი ბრძოლა შეიძლება წინ ელოდეთ“. სრულად... წყარო: gyla.ge

თბილისი. სოციალური სამართლიანობის ცენტრის ინფორმაციით, სასამართლომ უკანონოდ მიიჩნია დიდი ბრიტანეთის მოქალაქის, ლონდონის უნივერსიტეტის დოქტორანტის აიდა ბალაფკანის საქართველოში არ შემოშვების გადაწყვეტილება. „სასამართლომ გაიზიარა სოციალური სამართლიანობის ცენტრის პოზიცია, რომ აიდა ბალაფკანის საქართველოში არ შემოშვების გადაწყვეტილება დაუსაბუთებელი და უკანონო იყო. ეს საქმე კიდევ ერთხელ ადასტურებს, რომ საზღვრის კვეთის გადაწყვეტილებების მიმღები უფლებამოსილი სახელმწიფო დაწესებულებები კანონმდებლობის ვიწრო განმარტებებითა და დაუსაბუთებელი გადაწყვეტილებების მიღებით, ამკვიდრებენ უცხოელთა უფლებების შემლახველ პრაქტიკას“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველო გიზიარებთ ინფორმაციას რვა სიახლის შესახებ, რასაც პერსონალური მონაცემთა დაცვის შესახებ ახალი კანონი ითვალისწინებს. „კანონი პერსონალური მონაცემების დაცვის მიმართულებით ბევრ სიახლეს ითვალისწინებს, შესაბამისობაშია საუკეთესო საერთაშორისო სტანდარტებთან და მისი ამოქმედება ეტაპობრივად მოხდება“. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციის (საია) ცნობით, 2021 წლის 5-6 ივლისის მოვლენებიდან 2 წელი გავიდა, თუმცა, ამ დრომდე შესაძლო დანაშაულების ყველა ეპიზოდი არ არის სათანადოდ გამოძიებული.  „ნათელია, რომ, მიუხედავად კონკრეტული მოძალადე პირების დასჯისა, სისხლის სამართლის საქმის საპროცესო ხელმძღვანელ უწყებას არ აქვს სათანადო ნებელობა, დასაჯოს ძალადობის ორგანიზატორი, ხელმძღვანელი ან ძალადობრივი ქმედებების საჯაროდ მომწოდებელი პირები. მართალია, გამოძიება, მათ შორის, მიმდინარეობს ძალადობის ორგანიზატორთა მიმართ, თუმცა, მისი მიმდინარეობა კონკრეტული პირების მიმართ ბრალის წარუდგენლობისა და გამოძიების ფოკუსიდან გამომდინარე, არ არის ყოველმხრივი,  საია 2021 წლის 5-6 ივლისს განვითარებული ძალადობრივი მოვლენების შედეგად დაზარალებული პირების უფლებებს იცავს. ამ ეტაპზე საია ჩართულია 19 პირის საქმეში“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) ეხმიანება 2023 წლის 1 ივლისს, ტელეკომპანია პირველის ეთერში, გადაცემა „ნოდარ მელაძის შაბათში” გასულ სიუჟეტს, რომელშიც აღწერილია ქ. რუსთავში მდებარე მარტოხელა მოხუცთა პანსიონატში მომხდარი შესაძლო ძალადობისა და არაადამიანური/დამამცირებელი მოპყრობის ფაქტები.  „მოვუწოდებთ ყველა შესაბამის უწყებას, მყისიერი რეაგირება მოახდინონ სიუჟეტში გასულ ფაქტებთან დაკავშირებით, მანდატის ფარგლებში ადგილზე გაეცნონ დაწესებულებაში არსებულ მდგომარეობას და დროული, ეფექტიანი რეაგირებით დაიცვან დაწესებულების ბენეფიციარები შესაძლო ძალადობისგან“, ნათქვამია განცხადებაში. ვრცლად... წყარო: gyla.ge

თბილისი. სამოქალაქო საზოგადოების ორგანიზაციებმა საიამ, სოციალური სამართლიანობის ცენტრმა და პარტნიორობა ადამიანის უფლებებისთვის, წარადგინეს ერთობლივი ალტერნატიული ანგარიში სოციალური უფლებების ევროპულ კომიტეტში საქართველოს მიერ ევროპის სოციალური ქარტიის იმპლემენტაციის თაობაზე. ანგარიშში წარმოდგენილია დეტალური რეკომენდაციები, რომლებიც ქვემოთ ჩამოთვლილი პრობლემებისა და გამოწვევების აღმოფხვრისაკენ არის მიმართული. ბავშვებისა და მოზარდების უფლებების დაცვა; ბავშვებისა და მოზარდების სოციალური, სამართლებრივი და ეკონომიკური დაცვის გარანტიები; დასაქმებული ქალების მიერ ორსულობის, მშობიარობისა და ბავშვის მოვლის გამო შვებულების გამოყენება; ოჯახის სოციალური, სამართლებრივი და ეკონომიკური დაცვის გარანტიები; საცხოვრისის უფლება. სრულად... წყარო: gyla.ge