თბილისი. 9 სექტემბერს საქართველოს სახალხო დამცველმა ნინო ლომჯარიამ წარადგინა სპეციალური ანგარიში „სკოლამდელი აღზრდისა და განათლების დაწესებულებების მონიტორინგის შედეგები“. „მონიტორინგმა გამოავლინა, რომ სახალხო დამცველის აპარატის მიერ 2014 წელს ჩატარებული მონიტორინგის შემდეგ სიტუაცია გაუმჯობესდა, რაც ძირითადად შეეხო აღსაზრდელთა ჯანსაღ, დაბალანსებულ და ასევე, სპეციალურ კვებით საჭიროებებს. თუმცა, სახელმწიფოსა და მუნიციპალიტეტების მიერ განხორციელებული სამუშაოების მიუხედავად, საბავშვო ბაღებში კვლავ რჩება მთელი რიგი საკითხები, რაც შესაბამისი სტრუქტურების მხრიდან მეტ ძალისხმევას მოითხოვს“, ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. ადამიანის უფლებების სწავლებისა და მონიტორინგის ცენტრის (EMC) ინფორმაციით, 8 სექტემბერს, პარლამენტში მინიმალურ ხელფასთან დაკავშირებული კანონპროექტის განხილვა დაიწყო, რომელიც მინიმალურ ხელფასს საქსტატის მიერ დადგენილი ყოველთვიური საშუალო ხელფასის 45%-ით განსაზღვრას ითვალისწინებს. „ორგანიზაცია მიესალმება საჯარო დისკუსიის განახლებას მინიმალური ხელფასის შესახებ და მხარს უჭერს ღირსეული მინიმალური ხელფასის დადგენას. კანონით განსაზღვრული, ღირსეული მინიმალური ხელფასი მშრომელთა დაცვის ფუნდამენტური ინსტრუმენტია, რომელსაც საქართველოში მშრომელთა და მათი ოჯახების სოციო-ეკონომიკური მდგომარეობის, ისევე როგორც მშრომელთა უფლებრივი მდგომარეობის ხელშესახები გაუმჯობესება შეუძლია“. სრულად... წყარო: emc.org.ge

თბილისი. „უფლებები საქართველო” გაგიწევთ უფასო იურიდიულ დახმარებას/კონსულტაციას მოსამართლეთა დისციპლინური პასუხისმგებლობის საკითხებზე. „თუ გაქვთ დასაბუთებული პრეტენზია, რომ მოსამართლე მოგექცათ არაჯეროვნად, გააჭიანურა საქმის განხილვა, ან სხვაგვარად დაარღვია სამოსამართლო ქცევის კოდექსი, მიმართეთ „უფლებები საქართველოს” და მიიღეთ უფასო იურიდიული დახმარება/კონსულტაცია“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ქალთა საინფორმაციო ცენტრი პროექტის „ოჯახში ძალადობის მსხვერპლთა მხარდაჭერის გაძლიერება COVID 19-ით გამოწვეული კრიზისის პერიოდში“ ფარგლებში, აქვეყნებს ბლოგპოსტს: „ენდეთ თქვენს გრძნობებს, ისინი არასოდეს მოგატყუენებ“... „ურთიერთობა ძალიან სწრაფად განვითარდა. ყველაფერი იყო ისე, როგორც თქვენ გინდოდათ. ყურადღება, სიურპრიზები, მთელი დღე ტელეფონზე მოკითხვა, მიყვარხარ, მენატრები და უშენოდ არ შემიძლია, სიხარულის ცრემლის დენა და სიყვარულის ზეიმი. გეგონათ, თქვენზე ბედნიერი არავინ იყო და ასეთ ადამიანს ხომ არ გაუშვებდით ხელიდან?! არავითარ შემთხვევაში“. სრულად... წყარო: ginsc.net

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: საზოგადოებრივი მაუწყებლის დაფინანსება და რეიტინგი რეფორმის დაწყებიდან 3 წლის შემდეგ. „ჩვენი მონაცემებით, 2018-2019 წლებში მაუწყებლის რეიტინგს ჰქონდა უმნიშვნელო ზრდა. აღსანიშნავია, რომ რეიტინგის არსებული ზრდა მეტწილად გამოწვეულია არხზე დაწყებული ახალი პროექტებითა და მეგაშოუებით. თუმცა, საზოგადოებრივი მაუწყებლის კანონით განსაზღვრული როლიდან გამომდინარე, კითხვები ჩნდება, რამდენად ემსახურება აღნიშნული გადაცემები საზოგადოებრივ სიკეთეს. 2017 წლის დასაწყისში ვასილ მაღლაფერიძემ განაცხადა, რომ თუ საზოგადოებრივი მაუწყებლის რეიტინგი 15%-ზე მეტი არ იქნებოდა 2019 წლისთვის, ის გადადგებოდა დაკავებული თანამდებობიდან. TVMR-ის მონაცემებიდან ჩანს, რომ მაუწყებლის რეიტინგმა 2019 წლისთვის ვერ მიაღწია სასურველ ნიშნულს.მაღლაფერიძე 2020 წლის 18 აგვისტოს გადადგა, თუმცა თანამდებობის დატოვების მიზეზად რეიტინგის პრობლემა არ დაუსახელებია“. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრის (EMC) ინფორმაციით, 5-6 სექტემბერს სოლიდარობის პლატფორმის მორიგი ღონისძიება გაიმართა.  „ღონისძიების ფარგლებში მიმდინარე დისკუსიები ეხებოდა საჯარო ცხოვრებაში არადომინანტური ეთნიკური და რელიგიური ჯგუფების მონაწილეობას. შეხვედრების ფარგლებში მოხსენებები წაიკითხეს ნაირა გელაშვილმა და გიორგი თარხან-მოურავმა თემაზე: როგორ მოვედით აქამდე? საქართველოს სამოქალაქო თანასწორობის და ინტეგრაციის პოლიტიკა 1990-იან და 2000-იან წლებში. ასევე, მოხსენებები წაიკითხეს EMC-ის მვკლევარებმა, თეონა ფირანიშვილმა და ქამრან მამედლიმ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. სამართლიანი არჩევნებისა და დემოკრატიის საერთაშორისო საზოგადოებამ (ISFED) საქართველოს პარლამენტის 2020 წლის არჩევნების წინასაარჩევნო მონიტორინგის მესამე შუალედური ანგარიში წარმოადგინა. „ანგარიშში ძირითადად განხილულია 2020 წლის 4 აგვისტოდან 5 სექტემბრის ჩათვლით პერიოდი, აგრეთვე მოვლენები, რომელთა განვითარება 4 აგვისტომდე დაიწყო. ორგანიზაციის შეფასებით, საანგარიშო პერიოდში ამომრჩეველთა სავარაუდო მოსყიდვისა და ადმინისტრაციული რესურსის გამოყენების ნიშნები, საარჩევნო გარემოს მთავარ გამოწვევად რჩება“, ნათქვამია ორგანიზაციის ვებგვერდზე. სრულად... წყარო: isfed.ge

თბილისი. საქართველოს სახალხო დამცველი ეხმიანება პანკისის სათემო რადიოსა და მისი დამფუძნებლის წინააღმდეგ სოფელ დუისში გამართულ აქციებს, რომელიც 2020 წლის 29 აგვისტოს და 5 სექტემბერს გაიმართა. „სახალხო დამცველი ხაზს უსვამს მედიის მნიშვნელოვან როლს ხეობაში მიმდინარე პროცესების გაშუქებაში და მოუწოდებს საქართველოს შინაგან საქმეთა სამინისტროს, დროულად დაიწყოს გამოძიება ზემოხსენებულ ფაქტებთან დაკავშირებით; ასევე შეაფასოს გელა მთივლიშვილისა და პანკისის რადიოს სხვა თანამშრომლებისთვის ჟურნალისტურ საქმიანობაში ხელშეშლის რისკები და მიიღოს სათანადო ზომები მათთვის უსაფრთხო სამუშაო გარემოს უზრუნველსაყოფად“, ნათქვამია ორგანიზაციის ვებგვერდზე. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაციის ინფორმაციით, თბილისის საქალაქო სასამართლომ, ლუკა სირაძის საქმეზე ბრალდებული გამომძიებლის, მარიანა ჩოლოიანის მიმართ გამამტყუნებელი განაჩენი გამოიტანა და 3 წლის ვადით თავისუფლების აღკვეთა შეუფარდა. „სასამართლომ განაჩენის მიღებისას გაითვალისწინა ლუკა სირაძის დედის, ასევე ნეიტრალური მოწმეების ჩვენებები, საქმეზე შეკრებილი სხვა მტკიცებულებები და სახელმწიფო ბრალდების არგუმენტაცია. ლუკა სირაძის ოჯახის ინტერესებს საია იცავს“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს დემოკრატიული ინიციატივა (GDI) ეხმაურება საქართველოს პარლამენტის მიერ 2020 წლის 2 სექტემბერს მიღებულ კანონს, რომლის თანახმადაც, 2021 წლის 1 იანვრიდან სასაზღვრო პოლიცია საქართველოს მოქალაქეებს აუკრძალავს შენგენის ზონაში შესვლის მიზნით საქართველოს ტერიტორიის დატოვებას, თუკი ისინი არ დააკმაყოფილებენ კანონში მითითებულ კრიტერიუმებს. ორგანიზაცია მიიჩნევს, რომ მიღებული კანონი არის არაკონსტიტუციური და ეწინააღმდეგება საერთაშორისო სტანდარტებს. სრულად... წყარო: gdi.ge

თბილისი. მითების დეტექტორი აქვეყნებს თამარ ჩხარტიშვილის ბლოგპოსტს: როგორ აკავშირებენ 5G-ს ხეების ხმობასთან, დაავადებებთან და ოჯახში ძალადობასთან. „გაზეთ „ასავალ-დასავალის” 31 აგვისტო - 6 სექტემბირს ნომერში გამოქვეყნდა ინტერვიუ ლალი მოროშკინასთან, რომელმაც 5G ანტენებთან დაკავშირებით ისაუბრა. მოროშკინას თქმით, წიწვოვანი ხეები რადიაციის შედეგად ხმება და ხმობის პროცესის დაწყება 5G ანტენების სატესტო რეჟიმში ჩართვას უკავშირდება. ამასთან ერთად, მოროშკინა 5G-ს უკავშირებს თავის ტკივილს, წნევას, ფსიქიკურ აშლილობას და ოჯახში ძალადობასაც კი. ლალი მოროშკინას განცხადება 5G ანტენების კავშირზე სხვადასხვა დაავადებებთან, ოჯახურ ძალადობასთან და ხეების ხმობასთან ანეკდოტური მტკიცებულებაა და სამეცნიერო კვლევებითა თუ არგუმენტებით გამყარებული არ არის. ასევე, ინფორმაცია თითქოს ბელგიამ, საფრანგეთმა და გერმანიამ 5G ტექნოლოგიაზე უარი თქვეს - სიცრუეა“, ნათქვამია მასალაში. სრულად... წყარო: www.mythdetector.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს პოდკასტს: რა დაგვანახა პანდემიამ მონოინდუსტრიულ რეგიონებთან დაკავშირებით.  „ბოლო მოვლენებმა ცხადი გახადა, რომ პანდემიის პირობებში სახელმწიფო ორმაგ პოლიტიკას ეწევა - მაშინ, როდესაც სახელმწიფო დონეზე ერთის მხრივ გაცხადებულ მიზნად ადამიანთა ფიზიკური ჯანმრთელობა და უსაფრთხოებაა დასახელებული, მონოქალაქებში სამთომოპოვებითი სექტორში საქმიანობა არ გაჩერებულა, ხოლო მაღაროელების და მეშახტეების პროტესტი უსაფრთხო სამუშაო გარემოს შესახებ საჯარო პოლიტიკური დღისწესრიგიდან გაქრა“. სრულად... წყარო: emc.org.ge

თბილისი. სახალხო დამცველის აპარატმა განაახლა ელექტრონული კურსი „სექსუალური შევიწროების პრევენციისთვის“. კურსი მიზნად ისახავს, აამაღლოს ცნობიერება საჯარო სივრცეში და სამუშაო ადგილზე სექსუალური შევიწროების საკითხებზე. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაცია (საია) მიიჩნევს, რომ თავდაცვის სამინისტროს ინიციატივა წინასაარჩევნოდ მოქალაქეთა მძიმე სოციალური პირობებით მანიპულაცია და ადმინისტრაციული რესურსის გამოყენებაა. „საქართველოს თავდაცვის სამინისტროს 2020 წლის 31 აგვისტოს განცხადებით, მოქალაქეებს „გიორგი აბრამიშვილის სახელობის საქართველოს თავდაცვის სამინისტროს სამხედრო ჰოსპიტლის“ მიმართ 2009 წლიდან სხვადასხვა მომსახურებისთვის დარიცხული დავალიანება ჩამოეწერებათ. ამ სარგებლით დაახლოებით ათასამდე მოქალაქე ისარგებლებს. ხელისუფლების ინიციატივა შეუმსუბუქოს მოქალაქებს ფინანსური წნეხი მისასალმებელია, თუმცა არჩევნების წინ ამ ნაბიჯის გადადგმა ამომრჩეველთა გულის მოგებაზე გათვლილი მანიპულაციის შთაბეჭდილებას ტოვებს." სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ია ერაძის პუბლიკაციას: სამთო-მოპოვებითი საქმიანობა პანდემიის დროს: ნეოლიბერალური წესრიგი და ჰიბრიდული სახელმწიფო. „შახტში არაფერი იცვლება“ - ასე სრულდება ტყიბულელი მეშახტეების 2020 წლის 13 მარტის მიმართვის ტექსტი, რომლითაც ისინი ჯანმრთელობისთვის საშიშ სამუშაო პირობებს აპროტესტებდნენ (პერტაია, 2020a). იმავე დღეს, საქართველოს პრემიერ-მინისტრმა ანტიკრიზისული ეკონომიკური სტიმულირების გეგმა წარუდგინა საქართველოს მოსახლეობას (საქართველოს მთავრობა, 2020). ქვეყანამ ხმალამოღებული ბრძოლა დაიწყო ვირუსის წინააღმდეგ, თუმცა ტყიბული არავის გახსენებია. 20 მარტს მეშახტეებმა გამოუვალი ფინანსური მდგომარეობის გამო სიცოცხლისთვის საშიშ პირობებში განაგრძეს მუშაობა - „შახტში ვბრუნდებით იმიტომ, რომ წინააღმდეგ შემთხვევაში დავკარგავთ იმ მცირე შემოსავალსაც კი, რომელსაც ჩვენი მძიმე შრომის ფასად მოვიპოვებთ. ჩვენი ოჯახები დარჩება მშიერი“. სრულად... წყარო: emc.org.ge

თბილისი. ადამიანის უფლებათა ცენტრმა სავარაუდოდ პოლიტიკურად მოტივირებული საქმეების სასამართლო პროცესებისა და საპროტესტო აქციების მონიტორინგის შუალედური ანგარიშები მოამზადა. „ამ დროისათვის ცენტრის დაკვირვების ქვეშ 20 სავარაუდოდ პოლიტიკურად მოტივირებული სასამართლო პროცესი და 19 საპროტესტო აქცია მოექცა. სასამართლო მონიტორინგის შედეგად გამოვლინდა, რომ ადამიანის უფლებათა ცენტრის დაკვირვების ქვეშ არსებულ საქმეებში რიგ შემთხვევებში არ იყო უზრუნველყოფილი სამართლიანი სასამართლოს უფლება. რაც შეეხება საპროტესტო აქციებსა, მათი უმეტესობა ატარებდა მშვიდობიან ხასიათს. თუმცა, რიგ შემთხვევებში, ადამიანის უფლებათა ცენტრის მონიტორთა მიერ იდენტიფიცირებულ შემთხვევათა შორის დაფიქსირდა არაპროპორციული ძალის მობილიზების, ასევე დაკავებისა და დაჯარიმების მუქარით დაშლის მოთხოვნებიც“. სრულად... წყარო: www.humanrights.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ჭიათურაში, შუქრუთში მდებარე მაღაროში მომხდარ უბედურ შემთხვევას, რომლის შედეგადაც 46 წლის მაღაროელი გარდაიცვალა და სახელმწიფოს უსაფრთხო შრომის უზრუნველყოფისკენ მოუწოდებს. „შემთხვევა მიმდინარე წლის 24 აგვისტოს ვაკე ტყე ოთხის მაღაროში მოხდა. გავრცელებული ინფორმაციით, სამუშაო პროცესის დროს მაღაროელს ტრაქტორმა გადაუარა. ჭიათურის მაღაროებში დასაქმებული ადამიანების შრომის პირობები წლების განმავლობაში მძიმე რჩება. დაბალი ანაზღაურების პარალელურად, დასაქმებულთა შრომითი უფლებები სისტემატიურად ირღვევა. შრომის უსაფრთხოების წესების დაუცველობის გამო, დასაქმებულები ყოველდღიურად საკუთარ სიცოცხლესა და ჯანმრთელობას რისკის ქვეშ აყენებენ“. სრულად... წყარო: emc.org.ge

თბილისი. საერთაშორისო გამჭვირვალობა - საქარველოს ინფორმაციით, ოთარ ჯაიანს, 20 წელზე მეტხანს არ აძლევდნენ მიწისა და სახლის დაკანონების უფლებას, თუმცა ორგანიზაციის იურისტის დახმარებით მისი პრობლემა მოგვარდა. სრულად... წყარო: ორგანიზაციის გვერდი სოციალურ ქსელში

თბილისი. სახალხო დამცველი ნინო ლომჯარია გარდაცვლილი პროგრამისტის თამარ ბაჩალიაშვილის ოჯახს და ადვოკატს შეხვდა. ომბუდსმენის განცხადებით, ის მზადაა ჩაერთოს საქმის შესწავლის პროცესში და ოჯახის ადვოკატთან ერთად გაეცნოს სისხლის სამართლის მასალებს, სახალხო დამცველი ასევე გეგმავს შეხვდეს გენერალურ პროკურორს ირაკლი შოთაძეს და პირადად მისგან მოისმინოს საქმესთან არსებულ კითხვებზე პასუხები. სრულად... წყარო: ombudsman.ge

თბილისი. საერთაშორისო გამჭვირვალობა - საქართველოს მოსაზრებით, ანტიკორუფციულ რეფორმაზე ახალი საკანონმდებლო ინიციატივის მხარდაჭერა მნიშვნელოვნად გაზრდის კორუფციასთან ბრძოლის ეფექტურობას. „საერთაშორისო პრაქტიკით დასტურდება, რომ დამოუკიდებელი ანტიკორუფციული სამსახური არის სისტემურ კორუფციასთან ბრძოლის ეფექტური მექანიზმი. აღნიშნული მოდელი წარმატებით არის დანერგილი არაერთ ევროპულ ქვეყანაში. შემოთავაზებული რეფორმა გულისხმობს ქვეყნის ანტიკორუფციული პოლიტიკის თვისებრივ გაუმჯობესებას; განსაკუთრებით მნიშვნელოვანია, რომ ის შესაძლებელს გახდის ე.წ. „ელიტური კორუფციის“ შემთხვევების რეალურ გამოძიებას და მათ პრევენციას“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საქართველოს სახალხო დამცველმა აჭარის ტელევიზიაში მიმდინარე მოვლენებთან დაკავშირებით აზრისა და გამოხატვის თავისუფლების შესახებ გაეროს ახლად არჩეულ სპეციალურ მომხსენებელს ირენ ხანს და მედიის საკითხებზე ეუთოს წარმომადგენელს ჰარლემ დეზირს მიმართა. გაგზავნილ წერილებში, საქართველოს სახალხო დამცველი ინფორმაციას აწვდის აღნიშნული მანდატის მქონე პირებს ტელეკომპანიაში მიმდინარე მოვლენების შესწავლის შედეგად გამოვლენილ დარღვევებზე, რაც საფრთხეს უქმნის ქვეყანაში არსებულ მედია პლურალიზმსა და უარყოფითად აისახება გამოხატვის თავისუფლებაზე. სრულად... წყარო: ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება 2020 წლის ომბუდსმენის რეკომენდაციას, რომელშიც სახალხო დამცველი ადგენს, რომ საზოგადოებრივი მაუწყებლის აჭარის ტელევიზიისა და რადიოს თანამშრომლების - თეონა თურმანიძის, მალხაზ რეხვიაშვილის, სოფიო ჟღენტის და თეონა ხარაბაძის საქმეებზე დაირღვა მოქმედი საკანონმდებლო მოთხოვნები, ხოლო თეონა თურმანიძისა და თეონა ხარაბაძის მიმართ ადგილი ჰქონდა პირდაპირ დისკრიმინაციას განსხვავებული მოსაზრებისა და პროფესიული კავშირის წევრობის გამო. ორგანიზაცია რეკომენდაციის ტექსტს სასამართლოს მალევე გაუზიარებს და იმედოვნებს, რომ სახალხო დამცველის შეფასებები კიდევ უფრო მეტად გააძლიერებს მალხაზ რეხვიაშვილის, სოფიო ჟღენტისა და თეონა ხარაბაძის სამართლებრივი ინტერესებისა და უფლებების დაცვის პროცესს. სრულად... წყარო: emc.org.ge