თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ეთო გვრიტიშვილის მიერ მომზადებულ პოლიტიკის დოკუმენტს: შრომის ფრაგმენტული ინსპექტირება - ზედამხედველობის გარეშე დარჩენილი შრომითი უფლებები. „მიუხედავად გარკვეული პროგრესისა, ქვეყანაში შრომითი უფლებების მიმართულებით არსებულ გამოწვევებზე ეფექტიანი სახელმწიფო პოლიტიკა დღემდე არ არსებობს. ბოლო წლებში წარმოებული კვლევების თანახმად, მოსახლეობის მნიშვნელოვანი ნაწილი ფიქრობს, რომ ქვეყანაში ყველაზე ხშირად შრომითი უფლებები ირღვევა. მოსახლეობის მოსაზრებით, ყველაზე ხშირია სამუშაო ადგილზე არასათანადო ანაზღაურება (71%), შრომის უსაფრთხოების ნორმების დარღვევა (64%), სამუშაო საათების ხანგრძლივობის ნორმების დარღვევა (57%), ანაზღაურების დაგვიანება (42%), ანაზღაურებადი შვებულების უფლების დარღვევა (30%), დეკრეტული შვებულების უფლების დარღვევა(15%)“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. 11 ივლისს, პანკისში სოლიდარობის პლატფორმის წევრები შეიკრიბნენ. „პლატფორმის წევრებმა იმსჯელეს ჩვენს საზოგადოებაში სოლიდარობის, თანასწორობის და სოციალური სამართლიანობის კუთხით არსებულ გამოწვევებზე, სოლიდარობის პლატფორმის როლზე ამ პროცესში და სამომავლო გეგმებზე. გარდა ამისა, მონაწილეებმა ისაუბრეს სამომავლო გეგმებზე, პლატფორმის მისიაზე და კოლექტიური თვითორგანიზების მნიშვნელობაზე. პლატფორმის წევრებმა ისაუბრეს იმაზე, თუ როგორ შეიძლება სოლიდარობის პლატფორმამ ჩამოაყალიბოს ალტერნატიული საჯარო სივრცე, სადაც დამკვიდრებული კონსერვატიული და ლიბერალური იდეოლოგიების და დომინანტური პერსპექტივების კრიტიკული გადააზრება შესაძლებელი გახდებოდა“, ნათქვამია ადამიანის უფლებების სწავლებისა და მონიტორინგის ცენტრის ვებგვერდზე. სრულად... წყარო: emc.org.ge

თბილისი. 8 ივლისს, ადამიანის უფლებების სწავლებისა და მონიტორინგის ცენტრმა (EMC), საქართველოს ახალგაზრდა იურისტთა ასოციაციამ (GYLA) და პარტნიორობამ ადამიანის უფლებებისთვის (PHR) უნივერსალური პერიოდული მიმოხილვის (UPR) მესამე ციკლის ფარგლებში გაეროს ადამიანის უფლებათა საბჭოში კოალიციური ანგარიში წარადგინეს. „ანგარიში ფარავს 2015-2020 წლების პერიოდს და აფასებს ცალკეული სოციალური და ეკონომიკური უფლებების უზრუნველყოფის პროგრესსა და გამოწვევებს“. სრულად... წყარო: emc.org.ge

თბილისი. 9 ივლისს, ტოლერანტობის და მრავალფეროვნების ინსტიტუტმა Tolerance and Diversity Institute - TDI და ჩართულობისა და განვითარების ცენტრმა Center for Participation and Development ერთობლივი ანგარიში წარადგინეს გაეროს პერიოდული მიმოხილვის ფარგლებში (UPR). „ანგარიშში შეფასებულია საქართველოში რასიზმის, უცხოელთა უფლებრივი მდგომარეობის, პოპულისტური, ფაშისტური და ძალადობრივი ჯგუფების ზრდისა და გაძლიერების, ეთნიკური უმცირესობების პოლიტიკური და სამოქალაქო ჩართულობის მხრივ არსებული მდგომარეობა“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს მარიამ შალვაშვილის თარგმანს: მეტი, ვიდრე რასა: რას ნიშნავს იყო შავკანიანი და ღარიბი ქალაქის შიდა უბანში. „უილიამ ჯულიუს უილსონი (1935) არის ჰარვარდის უნივერსიტეტის ურბანული სოციოლოგიის პროფესორი, რომელიც იკვლევს კლასისა და რასის საკითხებს. დღემდე ის ჰარვარდის ისტორიაში ერთ-ერთ ყველაზე ბრწყინვალე მკვლევრად მიიჩნევა. თავის ნაშრომებში უილსონი ააშკარავებს იმ სხვადასხვა უხილავ სტრუქტურულ მიზეზს, რომელიც ქალაქის შიდა უბნების მაცხოვრებლებს მრავალ შესაძლებლობას უზღუდავს“. სრულად... წყარო: emc.org.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს კვლევას: ფემიციდი და მასთან დაკავშირებული გამოწვევები საქართველოში. „წინამდებარე კვლევა წარმოადგენს ერთგვარ მცდელობას მიმოიხილოს ის საკანონმდებლო გარანტიები, რაც გენდერული ნიშნით განხორციელებული ძალადობისა და ფემიციდის კრიმინალიზებას ახდენს საქართველოში, გამოავლინოს ამ მიმართულებით პრაქტიკაში არსებული პრობლემები და შეიმუშავოს რეკომენდაციები“. სრულად... წყარო: isfed.ge

თბილისი. საქართველოს ახალგაზრდა იურისტთა ასოციაცია (საია) თამაზ გრატიაშვილის საქმის დროულ გამოძიებას ითხოვს. „9 ივნისს, შინაგან საქმეთა სამინისტროს ქალაქ ფოთის საქალაქო სამმართველოს თანამშრომლებმა, ადმინისტრაციული წესით დააკავეს, სოფელ ჭალადიდში მცხოვრები თამაზ გრატიაშვილი. მისი განმარტებით, როგორც დაკავების დროს, ასევე დაკავების შემდგომ, პოლიციის თანამშრომლები ფიზიკურად გაუსწორდნენ. აღნიშნულ ფაქტთან დაკავშირებით, სახელმწიფო ინსპექტორის სამსახურმა გამოძიება ძალადობით ან იარაღის გამოყენებით სამსახურებრივი უფლებამოსილების გადამეტების მუხლით დაიწყო. აღნიშნულ საქმეში საია 17 ივნისს დაზარალებულის ინტერესების დასაცავად ჩაერთო“. სრულად... წყარო: gyla.ge

თბილისი. 7 ივლისს, დასრულდა სასამართლო პროცესი, სადაც მოსამართლემ დააკმაყოფილა პარტნიორობა ადამიანის უფლებებისთვის (PHR) აღმასრულებელი დირექტორის, ანა არგანაშვილის მოთხოვნა არასრულწლოვან ბავშვთან ერთად კარანტინიდან თვითიზოლაციაში გადასვლაზე. „სასამართლოს გადაწყვეტილებით, ბავშვის ინტერესის დაცვა უპირატესია და მისი საჭიროებების გათვალისწინების გარეშე არ უნდა ხდებოდეს გადაწყვეტილებების მიღება. სამართლებრივი მხარდაჭერა ხორციელდება პროექტ „ბავშვთა მართლმსაჯულების უფლების გაძლიერება საქართველოში” ფარგლებში USAID/PROLoG-ის ფინანსური მხარდაჭერით“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI), საზოგადოება „მემორიალთან“ ერთად, რეპრესირებულთა საყოფაცხოვრებო სუბსიდიის გაზრდის მიზნით, ფართომასშტაბიან კამპანიას იწყებს. „პირველი აქტივობა რეპრესირებულთათვის განკუთვნილი საყოფაცხოვრებო სუბსიდიის გაზრდის მოთხოვნაა, რადგან სახელმწიფოს მიერ სხვადასხვა სოციალური კატეგორიებისთვის დაწესებულ საყოფაცხოვრებო სუბსიდიის ოდენობებს შორის, ყველაზე დაბალი, 7 ლარიანი დახმარება (ჩერნობილის ბირთვული ობიექტის შემხებლობაში მყოფ პირებთან ერთად), სწორედ პოლიტიკური რეპრესიების მსხვერპლად აღიარებული პირებისთვისაა გათვალისწინებული. სუბსიდიის ზრდის მოთხოვნით, IDFI-მ ღია წერილით მიმართა საქართველოს პრემიერ-მინისტრს“. სრულად... წყარო: idfi.ge

თბილისი. ქალთა მოძრაობა ეხმიანება COVID 19 -თან დაკავშირებით მთავრობის მიერ მიღებულ საკარანტინე ზომებს, რომელიც არღვევს ბავშვების და ბავშვიანი ოჯახების ფუნდამენტურ უფლებებს. „მიუხედავად იმისა, რომ მთავრობის 322-ე დადგენილებით არასრულწლოვნების შემთხვევაში სსიპ საგანგებო სიტუაციებისა და გადაუდებელი დახმარების ცენტმა უნდა დააკმაყოფილოს ბავშვიანი მშობლის მომართვა თვითიზოლაციაში განთავსების თაობაზე, უგულვებელყოფს ბავშვიანი ოჯახების მიმართვებს. სახელმწიფო დისკრიმინაციულია ოჯახებთან მიმართებაში: გაუგებარია მისი შეფასების კრიტერიუმები რომლითაც ზოგიერთ ბავშვს ათავსებს თვითიზოლაციაში და ზოგს არა“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა (EMC) გაეროს ადამიანის უფლებათა დაცვის უმაღლეს კომისარს (OHCHR) მოკლე ანაგრიში წარუდგინა საქართველოს ოკუპირებულ რეგიონებში არსებულ მდგომარეობასთან დაკავშირებით. „ოკუპირებულ ტერიტორიებზე ადამიანის უფლებათა მონიტორინგის დამოუკიდებელი მექანიზმების არარსებობის პირობებში უფლებებზე მომუშავე ორგანიზაციების ინფორმაციას უმაღლესი კომისრის ოფისისთვის განსაკუთრებული მნიშვნელობა აქვს. OHCHR ანგარიში გაეროს ადამიანის უფლებათა საბჭოს შესაბამისი რეზოლუციის საფუძველზე უკვე მეოთხე წელია ვრცლად აღწერს საქართველოს ოკუპირებულ ტერიტორიებზე ჰუმანიტარული და ადამიანის უფლებების თვალსაზრისით არსებულ მძიმე ვითარებას. EMC-ის მიერ მიწოდებული ინფორმაცია ყურადღებას ამახვილებს 2019 წელს მომხდარ ყველაზე მნიშვნელოვან გარემოებებზე, მძიმე ჰუმანიტარულ კრიზისზე და ადამიანის უფლებების სისტემურ დარღვევებზე“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ღია საზოგადოების ფონდი აქვეყნებს ქეთი ჯინჯიბუხაშვილის ბლოგპოსტს: სტუმრად საკუთარ ქვეყანაში. „ჩემი ისტორია რამდენიმე წლის წინ დაიწყო, როცა ქმარს გავეყარე. განქორწინება ჩემთვის ფსიქოლოგიური ტერორიდან თავის დახსნის საშუალებად ჩანდა… მანამდე მუდამ მესმოდა, რომ უნდა ამეტანა ძალადობა, შევგუებოდი.. „ყველა ასეა, შენ რა გგონია, გათხოვება რა გეგონა, ეს არის ოჯახი, განვითარებულ ქვეყანაში კი არ ცხოვრობ…’’ თუმცა, მაშინვე ვხვდებოდი, რომ ყველა ადამიანს აქვს უფლება იცხოვროს საკუთარი ცხოვრებით, ატანის გარეშე, მაგრამ ჯერ ვერ ვაცნობიერებდი, რომ ამის შესაძლებლობას იძლევა მხოლოდ საკუთარი საცხოვრებელი ადგილი, სახლი, სადაც შეგიძლია ფსიქოლოგიური ზეწოლის გარეშე განვითარდე და შექმნა შენი ჯანსაღი გარემო. ქმრის სახლიდან წამოსვლის შემდეგ დავრჩი უსახლკაროდ, დროებითი სერვისის ამარა“. სრულად... წყარო: osgf.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს მარიამ შალვაშვილის თარგმანს: ფრედერიკ დაგლასის სიტყვით გამოსვლის ტექსტზე: რას ნიშნავს ამერიკელი მონისთვის თქვენი 4 ივლისი. „საკუთარი რწმენის გამო დაგლასი ხშირად იყენებდა ქრისტიანულ ალუზიებს თავის გამოსვლებში, თუმცა მუდმივად აკრიტიკებდა იმ ადამიანებს, რომლებიც რელიგიას მონობის გამამართლებლად იყენებდნენ. დაგლასი ასევე მკვეთრად ეწინააღმდეგებოდა სეგრეგაციას სკოლებში. ამასთან, ის ჩართული იყო სუფრაჟისტების მხარდასაჭერ ღონისძიებებში და ხშირად გამოდიოდა სიტყვით ქალებისთვის პოლიტიკაში მონაწილეობის და არჩევნებში ხმის მოპოვების სასარგებლოდ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციამ (საია) ბაჩანა შენგელიას სახელით საკონსტიტუციო სასამართლოს მიმართა. „როგორც საზოგადოებისათვის ცნობილია, 24 ივნისს, ნოტარიუს ბაჩანა შენგელიას მიმართ საქართველოს იუსტიციის სამინისტრომ დისციპლინური წარმოება დაიწყო. დისციპლინურ წარმოებას საფუძველად დაედო ბაჩანა შენგელიას მიერ პირად facebook-ზე გამოხატული მოსაზრებები, რაც გენერალური ინსპექციის შეფასებით, წარმოადგენდა „მიკერძოებული პოლიტიკის საჯაროდ გამომჟღავნებას“ და „პოლიტიკურ შეფასებებს.“ საია-ს შეფასებით, იუსტიციის მინისტრის აღნიშნული ბრძანება ახდენს გამოხატვის თავისუფლების შინაარსობრივ რეგულირებას. გარდა ამისა, საიას სარჩელით წარდგენილი აქვს არგუმენტები, რომლითაც ამტკიცებს, რომ ნოტარიუსის ფეისბუქის პირად გვერდზე პოლიტიკური სიმპათიის ან ანტიპათიის გამოხატვის გამო ნოტარიუსის დასჯა არის არაპროპორციული ღონისძიება და წარმოადგენს ნოტარიუსის, როგორც საქართველოს მოქალაქის პოლიტიკური გამოხატვის თავისუფლებაში მძიმე ფორმით ჩარევას“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს სახალხო დამცველის აპარატმა გაეროს ლტოლვილთა უმაღლესი კომისრის წარმომადგენლობის მხარდაჭერით ონლაინ პრეზენტაცია გამართა თემაზე: „უცხოელთა სამართლებრივი მდგომარეობა საქართველოში“. „შეხვედრაზე განიხილეს მიგრანტთა, თავშესაფრის მაძიებელთა და საერთაშორისო დაცვის მქონე პირთა უფლებრივი მგომარეობის მხრივ არსებული გამოწვევები და ტენდენციები, როგორიცაა საერთაშორისო სტატუსის მინიჭების დაბალი მაჩვენებელი ბოლო წლების განმავლობაში, უსაფრთხოების საფუძველით უარის დასაბუთებულობის, ინტეგრაციისა და დაკავების ალტერნატივის საკითხები“. სრულად... წყარო: ombudsman.ge

თბილისი. საქართველოს დემოკრატიული ინიციატივა (GDI), სამართლიანი არჩევნებისა და დემოკრატიის საერთაშორისო საზოგადოება (ISFED) და ადამიანის უფლებების ცენტრი (HRC) მიიჩნევენ, რომ საბოტაჟის მუხლით სახელმწიფო უსაფრთხოების სამსახურში მიმდინარე გამოძიება კრიტიკული მედიის თვისუფლებაში უხეში ჩარევისა და აზრის შინაარსის კონტროლის ნიშნებს შეიცავს. „სუს-ის გამოძიების შინაარსს განსაკუთრებულ პრობლემურობას, საარჩევნო წელი და 2020 წლის მოახლოებული საპარლამენტო არჩევნები ანიჭებს, რა დროსაც კრიტიკული მედიის შეუფერხებელ ფუნქციონირებას სასიცოცხლო როლი ენიჭება არჩევნების თავისუფლად და სამართლიანად შეფასებისთვის. მოვუწოდებთ ხელისუფლებას, თავი შეიკავოს კრიტიკული მედიის დამოუკიდებლობაში ნებისმიერი სახის ჩარევისგან და უარი თქვას მედიისა და გამოხატვის თავისუფლების წინააღმდეგ სისხლისსამართლებრივი რეპრესიის გამოყენებაზე“, ნათქვამია ერთობლივ განცხადებაში. სრულად... წყარო: isfed.ge

თბილისი. ხელმომწერი ორგანიზაციები საქართველოს პარლამენტში შრომის რეფორმიდან ფუნდამენტური ჩანაწერების შესაძლო ამოღების გამო უკიდურეს შეშფოთებას გამოთქვამენ და საერთაშორისო ორგანიზაციებს ღია წერილით მიმართავენ. „ეს კანონპროექტი მიზნად ისახავს საქართველოს შრომის კოდექსის ადამიანის უფლებათა საერთაშორისო სტანდარტებსა და საუკეთესო პრაქტიკებთან დაახლოებას. შემოთავაზებული ცვლილებები მშრომელთა ფუნდამენტურ უფლებებს ეხება, თუმცა კანონპროექტი კერძო ინტერესისა და ბიზნესის ლობის შეტევის ქვეშ აღმოჩნდა, როგორც ფორმალურად, პარლამენტში, ისე, როგორც ჩანს, არაფორმალურად. შედეგად, დღეს მისი დამტკიცება საფრთხეშია. გაზაფხულის სესიის დასრულებამდე სულ რამდენიმე სხდომა რჩება და თანდათან იზრდება კანონპროექტის დაყოვნების ან მისი ჩაგდების რისკი. ეს ასოცირების ხელშეკრულებაში გაწერილი ვალდებულებების შესრულებასაც ეჭვქვეშ აყენებს“, ნათქვამია ერთობლივ განცხადებაში. სრულად... წყარო: gyla.ge

თბილისი. კოალიციამ „ღირსეული შრომისათვის“ პრესკონფერენცია გამართა სოციალური აგენტების და მათი პროფკავშირის მხარდასაჭერად. „მიუხედავად წლების განმავლობაში უცვლელად არსებული უმძიმესი შრომითი პირობებისა, რაც გამოიხატება სოციალური აგენტების ფიქსირებული ხელფასის (80 ლარი) საარსებო მინიმუმთან შეუსაბამობაში, ერთთვიან შრომით ხელშეკრულებებში, სატრანსპორტო ხარჯების აუნაზღაურებლობასა და სხვა საკითხებში, საპროტესტო განწყობების შექმნამდე, ეს პრობლემები ვერ გახდა ოკუპირებულ ტერიტორიებიდან გადაადგილებულ პირთა, შრომის, ჯანმრთელობის და სოციალური დაცვის სამინისტროს ყურადღების საგანი. ახლაც, გაფიცვამდე რამდენიმე დღით ადრე, სამინისტრო არ იჩენს პოლიტიკურ ნებას, დასმული საკითხების სწრაფად და ეფექტურად გადასაჭრელად“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ბოლო პერიოდში ახალგაზრდებს შორის მომხდარ ძალადობრივ კონფლიქტებს. ორგანიზაცია მოუწოდებს ხელისუფლებას, დაიწყოს სისტემური მუშაობა განათლების და დანაშაულის პრევენციის მიმართულებით, რომლის მიზანიც იქნება ძალადობრივი კულტურისა და ახალგაზრდებში კრიმინალური მენტალიტეტის გავრცელების პრევენცია. „მოკლე პერიოდში მომხდარი ტრაგიკული შემთხვევები აჩვენებს, რომ ინდივიდუალური ძალადობრივი ფაქტების მიღმა, ფუნდამენტურ გამოწვევას წარმოადგენს ის ზოგადი გარემო, რომელშიც მოზარდებს უწევთ თანაცხოვრება და განვითარება. ეს შემთხვევები კიდევ ერთხელ გვახსენებს ხორავას ქუჩის საქმეს, რომელმაც სამართალდამცავი ორგანოების სისტემურ ჩავარდნებთან ერთად, ასევე გამოავლინა განათლების სისტემის და სკოლის არაეფექტურობა, მოზარდებში შეემცირებინა კრიმინალური და ძალადობრივი მენტალიტეტი“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს პოლიტიკის დოკუმენტს: „ინსტიტუციური ჩარჩო და ხელისუფლების დონეებს შორის უფლებამოსილებების გადანაწილება უსახლკარობასთან ბრძოლის სფეროში“. დოკუმენტის ერთერთი მიგნების თანახმად, საქართველოში უსახლკარობასთან ბრძოლის სფეროში ცენტრალური ხელისუფლების ვალდებულებები არასაკმარისია და ნათლად არ არის გაწერილი. ცალკეული ფუნქციები, რომელიც კანონმდებლობაში გვხვდება, პრაქტიკაში აღუსრულებელია. სრულად... წყარო: emc.org.ge

თბილისი. IRC, საია, EMC და RIVG მოუწოდებენ საქართველოს პარლამენტს განაახლოს „პერსონალურ მონაცემთა დაცვის შესახებ“ საქართველოს კანონის პროექტის განხილვა და უზრუნველყოს მისი დროული მიღება. „მიგვაჩნია, რომ მიუხედავად გარკვეული ხარვეზებისა და საკამათო საკითხებისა, კანონპროექტის მიღება მნიშვნელოვნად გააუმჯობესებს პერსონალურ მონაცემთა დაცვის მდგომარეობას და ქართულ სამართლებრივ ჩარჩოს დააახლოვებს ახალ ევროპულ რეგულაციასთან (GDPR) მაშინ, როდესაც მოქმედი კანონი მოძველებულია და ვერ პასუხობს არსებულ გამოწვევებს. ამავე დროს მიგვაჩნია, რომ შესაბამისმა კომიტეტებმა ყურადღებით უნდა განიხილონ ის შენიშვნები და წინადადებები, რომელიც კანონპროექტის მიმართ იქნა გამოთქმული სამოქალაქო საზოგადოების ორგანიზაციების მიერ და პლენარულ სხდომაზე კენჭისყრამდე უზრუნველყონ კანონპროექტის დახვეწა/სრულყოფა“, ნათქვამია განცხადებაში. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) პოლიტიკის დოკუმენტს „უსახლკარო პირის ცნება და პირის უსახლკაროდ მიჩნევის კრიტერიუმები“ აქვეყნებს. დოკუმენტის ერთ-ერთი მიგნების თანახმად, საქართველოში კი ამ საკითხთან არსებული მიდგომები არასისტემური და ხარვეზიანია. უსახლკარო პირის ცენტრალურ დონეზე არსებული ცნება ვიწრო და ბუნდოვანია. შესაბამისად, შეუძლებელი ხდება უსახლკაროთა რაოდენობისა და უსახლკარობის გამომწვევი მიზეზების დადგენა, საცხოვრისის პოლიტიკის დაგეგმვა და მისი ეფექტიანობის შეფასება. სრულად... წყარო: emc.org.ge