ადამიანის უფლებათა ევროპულმა სასამართლომ მიიღო და საქმის ნომერი მიანიჭა ადამიანის უფლებათა ცენტრის მიერ მომზადებულ სარჩელს. ადამიანის უფლებათა ცენტრმა ადამიანის უფლებათა ევროპულ სასამართლოს კონვენციის მე-6 მუხლის მესამე ნაწილისა და კონვენციის მე-13 მუხლის დარღვევის თაობაზე მიმართა. განმცხადებლის მიმართ დაირღვა პრინციპი, რომლის თანახმადაც, პირისთვის, მისი უსაფრთხოების მიზნით, წინასწარ უნდა იყოს ცნობილი, რა მოტივით და სტატუსით იბარებენ მას საგამოძიებო ორგანოში, რათა მან შეძლოს, განჭვრიტოს გამოუცხადებლობის სამართლებრივი შედეგები.  სრულად   წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ეკატერინე სხილაძის თვალსაზრისს „მამა და დედა ჩხუბობენ ხანჯლებით: პანდემიის გავლენა ქალთა მიმართ და ოჯახში ძალადობაზე“. „საქართველოში, ახალი კორონავირუსის პანდემიის პირობებში, კიდევ უფრო დამძიმდა ქალთა მიმართ და ოჯახში ძალადობის პრევენციის, მსხვერპლთა დაცვისა და დახმარების მიმართულებით არსებული სისტემური ხასიათის გამოწვევები. გართულებული ეკონომიკური მდგომარეობა, სამუშაო ადგილების დაკარგვა, ბავშვზე ზრუნვის დაწესებულებების ფუნქციონირების შეჩერება, მიმოსვლის შეზღუდვა, ყველაზე მძიმედ ქალებზე აისახა. გაიზარდა ქალების ზრუნვის ტვირთი ოჯახებში, გართულდა მათი ეკონომიკური მდგომარეობა და მოძალადეებთან ხანგრძლივი დროით ყოფნის პირობებში გაიზარდა ოჯახში ძალადობის რისკები“, - ვკითხულობთ პუბლიკაციაში. სრულად  წყარო: ორგანიზაციის ვებგვერდი

თბილისი. სახალხო დამცველი გამოეხმაურა იძულებით გადაადგილებულ პირთა უფლებრივ მდგომარეობას და ქვეყანაში ახალი კორონავირუსის მასშტაბური გავრცელების თავიდან აცილების მიზნით დაწესებული შეზღუდვებით გამოწვეული დევნილთა დარღვეული უფლებების აღდგენის თაობაზე სსიპ დევნილთა, ეკომიგრანტთა და საარსებო წყაროებით უზრუნველყოფის სააგენტოს წინადადებით მიმართა. დოკუმენტში საუბარია დევნილთა ყოფილი კომპაქტური განსახლების ობიექტებში ინფრასტრუქტურის გაუმართაობასა და დევნილთა სოციალურ-ეკონომიკურ პრობლემებზე, რაც პანდემიამ კიდევ უფრო მწვავედ წარმოაჩინა. სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება უსახლკარობასთან ბრძოლის საკითხებზე პარლამენტის თემატური მოკვლევის დასკვნას და მოუწოდებს მთავრობას, შემჭიდროვებულ ვადებში, შეასრულოს დოკუმენტით გაცემული რეკომენდაციები. „უსახლკარობის სფეროში ქვეყანაში არსებული მძიმე მდგომარეობის გათვალისწინებით, მივმართავთ საქართველოს მთავრობასა და მუნიციპალიტეტებს: უმოკლეს ვადაში შეასრულონ თემატური მოკვლევის ფარგლებში გაცემული რეკომენდაციები და უზრუნველყონ საერთაშორისო სტანდარტებთან შესაბამისი საცხოვრისის პოლიტიკის დაგეგმვა და განხორციელება; ზემოაღნიშნული რეკომენდაციების შესრულების პარალელურად, გადადგან ნაბიჯები იმ ძირეული პრობლემების აღმოსაფხვრელად, რომელიც არსებითია საცხოვრებლის უფლების გარანტირების მიმართულებით. მათ შორისაა, გამოსახლების ყველა ეტაპის მარეგულირებელი კანონმდებლობისა და პრაქტიკის სრულყოფა და საერთაშორისო სტანდარტებთან შესაბამისობა. ასევე, საცხოვრისის პოლიტიკაში სხვადასხვა მოწყვლადი ჯგუფის ინტერესებისა და გამოწვევების ეფექტიანი ასახვა. საქართველოს პარლამენტს: განახორციელოს ეფექტიანი ზედამხედველობა აღმასრულებელი ხელისუფლების მიერ თემატური მოკვლევის ჯგუფის რეკომენდაციების შესრულებაზე“, - ვკითხულობთ EMC-ის მიერ გავრცელებულ განცხადებაში. სრულად  წყარო: ორგანიზაციის ვებგვერდი

თბილისი. ადამიანის უფლებათა ცენტრმა, საქართველოში ნიდერლანდების საელჩოს მხარდაჭერით, 1 ივლისს დაიწყო პროექტი „უფასო იურიდიული ადვოკატირება და ადამიანის უფლებების მონიტორინგი კორონავირუსის პანდემიის შემდეგ“, რომელიც 2021 წლის 30 ივნისამდე გაგრძელდება.  პროექტის მიზანია კორონავირუსის გავრცელების პრევენციის მიზნით გამოცხადებული საგანგებო მდგომარეობის და პანდემიის შემდგომ პერიოდში სავარაუდო ადამიანის უფლებების დარღვევის ფაქტების იდენტიფიცირება და ცნობიერების ამაღლება მათზე თბილისსა და საქართველოს ხუთ რეგიონში - შიდა ქართლი, კახეთი, ქვემო ქართლი, იმერეთი და სამეგრელო.  სრულად  წყარო: ორგანიზაციის ვებგვერდი

თბილისი. 2020 წლის 22 ივლისს საია-მ, ე.წ „იდენტობის ჯგუფის საქმეებზე“ საქართველოს ხელისუფლების მიერ ზოგადი ღონისძიებების სახით აღებული ვალდებულებების შესრულებასთან დაკავშირებით, ევროპის საბჭოს მინისტრთა კომიტეტს წერილობითი მოსაზრებები წარუდგინა.  წარდგენილ დოკუმენტში საიამ მინისტრთა კომიტეტს წარუდგინა ამ კუთხით არსებული პრობლემების დეტალური ანალიზი, შესაბამის რეკომენდაციებთან ერთად. როგორც საია-ს მიერ გამოქვეყნებულ ინფორმაციაში აღნიშნული, სახელმწიფოს მიერ ამ რეკომენდაციების გატარება მნიშვნელოვანია იდენტობის ჯგუფის საქმეების ჯეროვნად და ეფექტიანად აღსასრულებლად, რადგან უზრუნველყოფს, როგორც უშუალოდ დაზარალებულების დარღვეული უფლებებისა და სამართლიანობის აღდგენას, ასევე - ზოგადად, საქართველოში მცხოვრები ლგბტ+ თემისა და იეჰოვას მოწმეების უფლებრივი მდგომარეობის გაუმჯობესებას.  სრულად  წყარო: ორგანიზაციის ვებგვერდი

თბილისი. COVID19-ის პანდემიის შედეგად შექმნილ ახალ რეალობასთან დაკავშირებით, საქართველოს სტრატეგიული კვლევებისა და განვითარების ცენტრი და ფონდი აურესი ერობლივ განცხადებას ავრცელებენ.  „COVID19-ის პანდემიამ საქართველო და ზოგადად მსოფლიო ახალი გამოწვევებისა წინაშე დააყენა. გარდა თვითონ COVID19 ინფექციისა და მასთან დაკავშირებული რისკებისა, დღის წესრიგში დადგა მისი პრევენციისთვის მიღებული ზომებით, კერძოდ პირბადეების და სხვა დამცავი (ხელთათმანი, ხალათი და სხვა) საშუალებებით და ფიზიკური დისტანცირებით გამოწვეული ნეგატიური შედეგი, ისევე როგორც ამ ნეგატიური შედეგების შემცირების საკითხი“, - აღნიშნულია განცხადებაში.  სრულად  წყარო: ორგანიზაციის ვებგვერდი

თბილისი. სისხლის სამართლის საერთაშორისო სასამართლოსთვის საქართველოს კოალიცია ეხმიანება რუსეთის მიერ საქართველოს მოქალაქეების, მათ შორის, ზაზა გახელაძის და ხვიჩა მღებრიშვილის უკანონო დაკავებისა და ბრალდების საქმეებს და ამ ქმედებებს რუსეთის მხრიდან ადამიანის ფუნდამენტური უფლებების მნიშვნელოვან დარღვევად აფასებს.  „ზაზა გახელაძის და ხვიჩა მღებრიშვილის დაკავების და ბრალდების საქმეები სხვა ინციდენტებთან ერთად ნათლად მიუთითებს რუსეთის და აფხაზეთისა და სამხრეთ ოსეთის/ცხინვალის რეგიონის დე-ფაქტო ხელისუფლებათა მხრიდან ადამიანის ფუნდამენტური უფლებების სისტემური ხელყოფის ფაქტებზე. არსებულ მძიმე უფლებრივ მდგომარეობაზე პასუხისმგებლობა სწორედ რუსეთის ფედერაციას ეკისრება როგორც ცხინვალის რეგიონის/სამხრეთ ოსეთის და აფხაზეთის ტერიტორიებზე ეფექტიანი კონტროლის განმახორციელებელ სახელმწიფოს. ოკუპირებული ტერიტორიები, ისევე, როგორც დე-ფაქტო ხელისუფლების წარმომადგენელთა ქმედებები უკონტროლო და თვითნებურია, რაც შესაბამისი აქტორების მხრიდან დროულ და სათანადო რეაგირებას საჭიროებს“, - ნათქვამია განცხადებაში.  სრულად   წყარო: https://www.gyla.ge/ge

თბილისი. ინფორმაციის თავისუფლების განვითარების ისტიტუტი (IDFI) შინაური ბინადარი ცხოველების მოვლა-პატრონობასთან დაკავშირებით, განცხადებას ავრცელებს.  „ბოლო დროს განვითარებულმა მოვლენებმა კიდევ ერთხელ მიაქცია საზოგადოების ყურადღება საქართველოში შინაურ ბინადარ ცხოველთა მოვლა-პატრონობის საკითხისადმი. ცხადად წარმოჩინდა საზოგადოების ცნობიერებაში, კანონმდებლობასა და პრატიკაში არსებული კომპლექსური პრობლემები, რომლებიც საჭიროებენ დაუყოვნებლივ რეაგირებას სისტემურ დონეზე“, - ვკითხულობთ განცხადებაში, - „საჭიროა, შინაურ ბინადარ ცხოველთა კეთილდღეობისა და მოვლა-პატრონობის მიმართულებით არსებული პრობლემები სრულად იქნეს გააზრებული მაღალ პოლიტიკურ დონეზე. ამის შემდეგ კი უნდა გადაიდგეს ქმედითი ნაბიჯები საზოგადოებრივი ცნობიერების ამაღლებისა და სრულყოფილი საკანონმდებლო ბაზის შექმნის მიზნით“.  სრულად  წყარო: ორგანიზაციის ვებგვერდი

თბილისი. საქართველოში ბიზნესისა და ადამიანის უფლებების მიმართულებით არსებული მდგომარეობის, ადამიანის უფლებებისა და ტრანსნაციონალური კორპორაციების, სხვა ბიზნეს საწარმოების საკითხების შესახებ გაეროს სამუშაო ჯგუფის მიერ საქართველოს შესახებ მომზადებული ანგარიშის გათვალისწინებით, სახალხო დამცველმა საქართველოს პრემიერ-მინისტრს წერილობით მიმართა.  სახალხო დამცველი წერილში წუხილს გამოთქვამს ადამიანის უფლებათა სამოქმედო გეგმით აღებული ვალდებულებების შესრულების დაბალ მაჩვენებელთან დაკავშირებით. წერილის მიხედვით, მიუხედავად განხორციელებული რიგი ღონისძიებებისა, სხვადასხვა უწყებისგან მიღებული ინფორმაციის თანახმად, ამ დროისთვის ბიზნესისა და ადამიანის უფლებების შესახებ სამოქმედო გეგმით განსაზღვრული არაერთი უმნიშვნელოვანესი ამოცანის შესასრულებლად ქმედითი ღონისძიებები არ გატარებულა.  სრულად   წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენრი (EMC) დღეს საზოგადოებას წარუდგენს კვლევას - „ეთნიკური უმცირესობების საჭიროებები, საზოგადოებრივი მაუწყებელი და პანდემია“. „2020 წლის 23 მარტს, ეთნიკური უმცირესობებით კომპაქტურად დასახლებული ორი რაიონი, მარნეული და ბოლნისი, ახალი კორონავირუსის შიდა გავრცელების შემთხვევის გამო ჩაიკეტა (რადიო თავისუფლება, 2020). მსუბუქი პანიკა, რომელიც ქვეყანაში ვირუსის უკონტროლო გავრცელების საფრთხეს მოჰყვა, მალევე ქსენოფობიისა და ნაციონალიზმის მორიგ ტალღაში გადაიზარდა, რაც ყველაზე ნათლად სოციალურ ქსელ Facebook-ზე მომხმარებლების კომენტარებში გამოვლინდა (ქევანიშვილი, 2020). „წითელ ზონებად“ გამოცხადებულ რაიონებში ჩაკეტილ მოსახლეობას მომდევნო დღეების განმავლობაში ერთდროულად უწევდა კორონავირუსთან, ეკონომიკური სიდუხჭირის შიშსა და ეთნო-ნაციონალიზმთან ბრძოლა. იმის მაგივრად, რომ ადგილობრივი აქტივისტების ენერგია კორონავირუსის შესახებ ინფორმაციის გავრცელებაზე, ვირუსის პრევენციასა და ეკონომიკური სირთულეების თავიდან არიდებაზე დახარჯულიყო, მათ მოუხდათ ინტერნეტ კამპანიის წამოწყება, რომლის მთავარი მესიჯიც იყო - „მე ვარ საქართველოს მოქალაქე“, - ვკითხულობთ კვლევის შესავალში. სრულად  წყარო: ორგანიზაციის ვებგვერდი

თბილისი. საქართველოს პარლამენტმა 2020 წლის 14 ივლისს მთავრობისთვის დელეგირებული უფლებამოსილების ვადა 2021 წლის 1 იანვრამდე გაახანგრძლივა.  საია კვლავ მიიჩნევს, რომ საქართველოს პარლამენტის მიერ მთავრობაზე შრომისა და გადაადგილების თავისუფლებების შეზღუდვის უფლებამოსილების დელეგირება ეწინააღმდეგება საქართველოს კონსტიტუციის მე-14 და 26-ე მუხლებს და საკონსტიტუციო სასამართლოში ახალი სარჩელი წარადგინა.  სრულად   წყარო: ორანიზაციის ვებგვერდი

შიდა ქართლი. 15-16 და 17 ივლისს, გორის სამოქალაქო აქტივიზმის ცენტრის, პროგრამა PITA-ში ჩართული მოხალისეებისათვის გაიმართა 3-დღიანი ტრენინგი „მრავალფეროვნების მართვა, ტოლერანტობა და სოციალური ინოვაციები“. აქტივობა დაიგეგმა პროგრამა PITA-ს ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს განვითარების სააგენტოს (USAID) ფინანსური მხარდაჭერით.  სრულად  წყარო: გვერდი სოციალლურ ქსელში

თბილისი. საქართველოს ახალგაზრდა იურისტთა ასოციაციას (საია) განცხადებით, 17 ივლისს, მართლმსაჯულების საერთაშორისო დღე აღინიშნება. „1998 წლის 17 ივლისს, რომის სტატუტის მიღებით სისხლის სამართლის საერთაშორისო (ჰააგის) სასამართლოს სახით მართლმსაჯულების საერთაშორისო სისტემის შექმნას ჩაეყარა საფუძველი. აღნიშნული სასამართლოს მიზანს განსაკუთრებით მძიმე დანაშაულების (ომის დანაშაული, გენოციდი, კაცობრიობის წინააღმდეგ მიმართული დანაშაული და აგრესია) გამოძიება და პასუხისმგებელ პირთა გამოვლენა წარმოადგენს. შესაბამისად, ჰააგის სასამართლო საერთაშორისო დანაშაულების მსხვერპლებისთვის სამართლიანობის აღდგენის მნიშვნელოვანი მექანიზმია“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, 2 აპრილს, ბათუმში კომენდანტის საათის დროს პოლიციელთა მხრიდან განხორციელებული ფიზიკური და სიტყვიერი შეურაცხყოფის მსხვერპლს, ლაშა მიქაბერიძეს, დაზარალებულის სტატუსი ამ დრომდე არ მინიჭებია. ორგანიზაცია მიიჩნევს, რომ პროკურატურის მიერ ლაშა მიქაბერიძისათვის დაზარალებულის სტატუსის მინიჭებაზე უარის თქმა უკანონო და დაუსაბუთებელია. საია უარს სასამართლოში ასაჩივრებს. სრულად... წყარო: gyla.ge

თბილისი. ხელმომწერი ორგანიზაციები და შშმ აქტივისტები ეხმიანებიან 14 ივლისს, პარლამენტის მიერ „შშმ პირთა უფლებების შესახებ“ კანონის მიღებას. „მიუხედავად რიგი პოზიტიური ცვლილებებისა, მიგვაჩნია, რომ აღნიშნული კანონი, მისი დეკლარაციული ხასიათისა და შინაარსობრივი გამოწვევების გათვალისწინებით, ხელისუფლების მხრიდან შშმ პირთა რეალური გაძლიერების კიდევ ერთი ხელიდან გაშვებული შესაძლებლობაა“. სრულად... წყარო: emc.org.ge

თბილისი. საერთაშორისო გამვირვალობა - საქართველო მიიჩნევს, რომ ბაჩანა შენგელიას წინააღმდეგ დაწყებული დისციპლინური წარმოება მიკერძოებისა და ანგარიშსწორების აღქმას აჩენს. „ბაჩანა შენგელია ხელისუფლებას, მისი დედის, ია კერზაიას გარდაცვალების საქმეზე არაეფექტიანი გამოძიების გამო აკრიტიკებდა. მის მიმართ დაწყებული დისციპლინური წარმოება რამდენიმე მიმართულებით არის პრობლემური და იუსტიციის მინისტრის მხრიდან მიკერძოებულობისა და შერჩევითობის აღქმას აჩენს. კერძოდ: მინისტრის დებულებაში შეტანილი ცვლილების ქრონოლოგია დისციპლინირების მექანიზმის ანგარიშსწორების ინსტრუმენტად გამოყენების შთაბეჭდილებას ქმნის;  დისციპლინირების საფუძველი სათანადოდ განჭვრეტადი არ არის და გარდა ამისა, შესაძლოა, კონსტიტუციასთანაც მოდიოდეს წინააღმდეგობაში; დისციპლინური წარმოების ზეპირი მოსმენის გარეშე ჩატარება პრობლემურია; ნოტარიუსთა სამუშაო პროგრამაზე წვდომის შეჩერება დაუსაბუთებლად მოხდა.“ სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აფასებს უცხო ქვეყნის მოქალაქის, ვ. პ.-ს სავარაუდო გაუპატიურების ფაქტზე საქართველოში მიმდინარე გამოძიების პროცესს და შინაგან საქმეთა სამინისტროსა და პროკურატურას დროული, ეფექტიანი და ობიექტური გამოძიების ჩატარებას სთხოვს. „ვ.პ-ს სავარაუდო გაუპატიურების საქმეზე მიმდინარე გამოძიების ანალიზი აჩვენებს, რომ უკანასკნელი წლებში ქალთა მიმართ ძალადობის წინააღმდეგ ბრძოლაში გაუმჯობესებული სისხლის სამართლის პოლიტიკის მიუხედავად, სქესობრივი თავისუფლების წინააღმდეგ მიმართულ დანაშაულებს კვლავ თან სდევს სამართლებრივი, ინსტიტუციური და კულტურული გამოწვევები, რომლებიც მსგავსი საქმეების ეფექტიანი და რეალური გამოძიების პროცესს არსებითად აზიანებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ბოლო პერიოდში მომხდარ ძალადობრივ კონფლიქტებს და შინაგან საქმეთა სამინისტროს სისტემური რეფორმების დროულად გატარებისკენ მოუწოდებს. ორგანიზაციის შეფასებით, „ბოლო წლებში განხორციელებული ცვლილებები ვერ გახდა რეალურად დეპოლიტიზირებული, ანგარიშვალდებული და ადამიანის უფლებებზე ორიენტირებული სამართალდამცავი სისტემის ჩამოყალიბების საფუძველი. საზოგადოებაში კვლავაც რჩება განცდა, რომ არსებობს სამართალდამცავ ორგანოებზე გავლენის მოხდენის საფრთხეები, არაობიექტური გამოძიების, დაუსჯელობის რისკები და სამართალდამცავი სისტემის დაბალი ანგარიშვალდებულება საზოგადოების წინაშე“. სრულად... წყარო: emc.org.ge

თბილისი. გაეროს ქალთა ფონდის ინფორმაციის თანახმად, საქართველოს პარლამენტმა ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ საქართველოს კანონისა და სხვა თანმდევი კანონების ცვლილებების პაკეტი მე-3 მოსმენით მიიღო. „ცვლილებების თანახმად, შემაკავებელი ორდერის გამოცემასთან ერთად, შესაძლებელი იქნება მაღალი რისკის მოძალადეების მიმართ ელექტრონული ზედამხედველობის დაწესება, რომელიც სპეციალური GPS სისტემის მეშვეობით განხორციელდება“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებებზე მომუშავე ორგანიზაციებმა სექსუალური და რეპროდუქციული ჯანმრთელობისა და უფლებების შესახებ გაეროს უნივერსალური პერიოდული მიმოხილვის 37-ე სესიის ფარგლებში საქართველოს შესახებ კოალიციური ალტერნატიული ანგარიში წარადგინეს. „ანგარიში სექსუალური და რეპროდუქციული ჯანმრთელობისა და უფლებების ჭრილში 2015 წლიდან დღემდე საქართველოს მიერ მიღებულ ზომებს აფასებს და განიხილავს სახელმწიფოს მხრიდან კონკრეტულ ჯგუფთა და უფლებათა დაცვის საკითხებს“. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციამ (საია) სისხლის სამართლის პროცესების მონიტორინგის N14 ანგარიში წარმოადგინა. „ანგარიში ემსახურება სისხლის სამართლის პროცესებზე დასწრებითა და გამოვლენილი შემთხვევების ანალიზის შედეგად, პრაქტიკული და საკანონმდებლო ხარვეზების, მათ შორის, დადებითი ტენდენციების იდენტიფიცირებას. ის ასახავს სისხლის სამართალწარმოების საკითხებს 2019 წლის მარტიდან 2020 წლის თებერვლის პერიოდში, რა დროსაც საია-მ 2744 სასამართლო სხდომის მონიტორინგი განახორციელა, ასევე ძირითად ტენდენციებს მონიტორინგის დაწყებიდან დღემდე“, ნათქვამია ორგანიზაციის ვებგვერდზე. სრულად... წყარო: gyla.ge