თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება აჭარის საზოგადოებრივი მაუწყებლიდან ალტერნატიული პროფესიული კავშირის თავმჯდომარისა და გადაცემა „ჰეშთეგის“ წამყვანის მალხაზ რეხვიაშვილის სამსახურიდან გათავისუფლების ფაქტს. „ორგანიზაცია მიიჩნევს, რომ მაუწყებლის ახალი მენეჯმენტის მიერ მიღებული ეს გადაწყვეტილება მაუწყებელში კრიტიკული აზრის დევნის, ალტერნატიული პროფესიული კავშირის დასუსტებისა და მაუწყებლის დამოუკიდებლობის ნგრევის პროცესის გაგრძელებაა, რომელიც უკვე შემაშფოთებელ ფორმას იღებს“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება სამცხე-ჯავახეთის რეგიონში ბოლო პერიოდში დაფიქსირებული ძალადობრივი დაპირისპირების შემთხვევებს, რომელიც ენზელ მკოიანის სახელსა და პასუხისმგებლობას უკავშირდება. ორგანიზაცია მოითხოვს სამართალდამცავი ორგანოებისგან აღნიშნული შემთხვევების დამოუკიდებელ და ეფექტიან გამოძიებას. ამასთან, EMC მოუწოდებს მმართველ პოლიტიკურ პარტიას გადახედოს ზოგიერთ რეგიონში, მათ შორის, სამცხე-ჯავახეთში კლანური ძალაუფლებისა და მმართველობის მკვეთრად ანტიდემოკრატიულ შინაარსს და გაიაზროს კორუფციული და კლანური მმართველობის მძიმე პოლიტიკური და სოციალური შედეგები. სრულად... წყარო: emc.org.ge

თბილისი. საქართველოს სახალხო დამცველისა და გაეროს ქალთა ორგანიზაციის ერთობლივი ინიციატივით, გენდერული თანასწორობის შესახებ უფასო ელექტრონული კურსი შემუშავდა. „მისი გავლა ნებისმიერ დაინტერესებულს შეუძლია. გამოიყენეთ კარანტინის დრო ნაყოფიერად, გაიარეთ კურსი და გაიგეთ მეტი გენდერული თანასწორობის შესახებ: ინიციატივა პროექტის „ერთობლივი ძალისხმევა ქალთა ეკონომიკური გაძლიერებისთვის საქართველოში“ ფარგლებში, ნორვეგიის მთავრობის დაფინანსებით განხორციელდა“. სრულად... წყარო: ორგანიზაციის გვერდი სოციალურ ქსელში

თბილისი. წამების მსხვერპლთა ფსიქოსოციალური და სამედიცინო რეაბილიტაციის საქართველოს ცენტრი (GCRT) ინფორმაციით, წამების მსხვერპლთა რეაბილიტაციის საერთაშორისო საბჭო Conversion Therapy-ის ე.წ. გარდაქმნის თერაპიის შესახებ ანგარიშს აქვეყნებს. „ანგარიშში დეტალურად არის განხილული ის მეთოდები, რასაც პრაქტიკის დროს იყენებენ სხვადასხვა ქვეყნები და ის ზეგავლენა, რაც ამ ჩარევებს აქვს ადამიანზე“. სრულად... წყარო: ორგანიზაციის გვერდი სოციალურ ქსელში

თბილისი. 7 მაისს ადამიანის უფლებათა ევროპულმა სასამართლომ საიას და ადამიანის უფლებათა დაცვის ევროპული ცენტრის ერთობლივ საქმეზე მეგრელიშვილი საქართველოს წინააღმდეგ ევროპული კონვენციის მე-6 (1) მუხლის (საქმის სამართლიანი განხილვის უფლება) დარღვევა დაადგინა. „გადაწყვეტილების თანახმად, ჩხრეკის დროს მომჩივანს დაუსაბუთებლად არ მიეცა დამსწრეების მოწვევის უფლება და ეროვნულმა სასამართლოებმა სათანადოდ არ განიხილეს მისი არგუმენტი პოლიციელთა მხრიდან ნარკოტიკების ჩადებასთან დაკავშირებით“. სრულად... წყარო: gyla.ge

თბილისი. Covid-19 პანდემიისა და ქვეყანაში გამოცხადებული საგანგებო მდგომარეობის მიუხედავად, სახალხო დამცველის აპარატი დისტანციურ რეჟიმში აგრძელებს აქტიურ მუშაობას. „პანდემიის ნეგატიური შედეგები განსაკუთრებით მძიმედ აისახება ისეთი მოწყვლადი ჯგუფების უფლებებზე, როგორებიცაა მოქალაქეობის არმქონე პირები, თავშესაფრის მაძიებლები და საერთაშორისო დაცვის მქონე პირები. აპარატი აქტიურად მუშაობს ამ ბენეფიციარების უფლებების დასაცავად და მზად არის დისტანციურ რეჟიმში, ცხელი ხაზის მეშვეობით აღნიშნულ პირებს გაუწიოს სამართლებრივი კონსულტაცია და დახმარება. ბენეფიციარებს შეუძლიათ დაგვიკავშირდნენ 24/7 აპარატის ცხელ ხაზზე: 1481“. სრულად... წყარო: ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სტატიების კრებულს, რომელიც მომზადებულია ევროკავშირის მიერ დაფინანსებული პროექტის „სასამართლო რეფორმის განხორციელების მხარდაჭერის (FAIR)“ ფარგლებში. „კრებული აერთიანებს რვა დამოუკიდებელ სტატიას, რომლებშიც გაანალიზებულია მართლმსაჯულების სფეროში არსებული აქტუალური და კრიტიკული საკითხები. სტატიების ავტორები შეირჩნენ „ადამიანის უფლებების სწავლებისა და მონიტორინგის ცენტრის“ (EMC) მიერ ორ ეტაპად გამოცხადებული კონკურსის საფუძველზე, სადაც ნებისმიერ დაინტერესებულ პირს ჰქონდა შესაძლებლობა, EMC-ის გუნდისთვის გამოეგზავნა შესაბამისი განაცხადი“. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ვიზუალიზაციას საგანგებო მდგომარეობის ფარგლებში პროკურატურის მუშაობის შესახებ.  „სასამართლო სხდომები შესაძლებელია გაიმართოს დისტანციურად, კომუნიკაციის ელექტრონული საშუალებების გამოყენებით. საქართველოს პროკურატურის ყველა ოფისი აღიჭურვა შესაბამისი ტექნიკური საშუალებებით და მოხდა პროგრამული უზრუნველყოფა“. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს განცხადებას და მიიჩნევს, რომ უწყებებმა საგანგებო მდგომარეობისას საჯარო ინფორმაცია დროულად და სრულყოფილად უნდა გასცენ. „არსებული კრიზისული ვითარების ეფექტიანად მართვისთვის, აუცილებელია საზოგადოება მაქსიმალურად იყოს ინფორმირებული თითოეული უწყების საქმიანობაზე და ზოგადად არსებულ ვითარებაზე. საგანგებო მდგომარეობის პირობებში, როცა ადამიანის უფლებების დარღვევის ისედაც მომეტებული საფრთხეები არსებობს, მნიშვნელოვანია, რომ სახელმწიფომ მაქსიმალური ძალისხმევა გაწიოს უწყებების დემოკრატიული ფუნქციონირების უზრუნველსაყოფად. წინააღმდეგ შემთხვევაში, შესაძლოა, უფლებების პოტენციური დარღვევის ფაქტები დაფარული და საზოგადოებრივი კონტროლის მიღმა აღმოჩნდეს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრმა (EMC) დასაქმებულების ინტერესების დაცვის მიზნით, „ევოლუშენ ჯორჯიას“ წინააღმდეგ თბილისის საქალაქო სასამართლოს მიმართა. „EMC წარმოადგენს კომპანიიდან გამოსაცდელი ვადის პერიოდში გათავისუფლებული 14 თანამშრომლის ინტერესებს და ამტკიცებს, რომ შპს „ევოლუშენ ჯორჯიამ“ ბოროტად გამოიყენა საკუთარი უფლებამოსილება და უკანონოდ და დაუსაბუთებლად შეწყვიტა მოსარჩელეებთან შრომითი ურთიერთობა, რითაც ზიანი მიაყენა მათ ინტერესებს. მოსარჩელეები სამსახურიდან გათავისუფლების ბრძანების უკანონოდ ცნობას, სამსახურში აღდგენასა და იძულებითი განაცდურის ანაზღაურებას ითხოვენ“, ნათქვამია ორგანიზაციის ვებგვერდზე.  სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ძამას ხეობაში მართლმადიდებელი სასულიერო პირების მიერ სავარაუდოდ უკანონო გზებით სოფლების საძოვრებისა და მიწების მისაკუთრების პრაქტიკას და მოუწოდებს ხელისუფლებას შეისწავლოს ხეობაში არსებული ვითარება და უზრუნველყოს ადგილობრივი გლეხების სოციალური ინტერესებისა და უფლებების დაცვა. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: აჭარის საზოგადოებრივი მაუწყებლის ჟურნალისტების სამთვიანი დევნის ქრონიკა. „ეს პროცესი 2019 წლის აპრილში ნათია კაპანაძის თვითნებური და პოლიტიზირებული იმპიჩმენტის პროცესით დაიწყო და აგრესიული ფორმები ახალი დირექტორის დანიშვნის შემდეგ მიიღო. მთლიანობაში ამ დროისთვის ახალმა მენეჯმენტმა საინფორმაციო სამსახურში საკვანძო პოზიციების მქონე თანამშრომლების უდიდესი ნაწილი გაათავისუფლა ან სხვა სამსახურში გადაიყვანა“, ნათქვამია განცხადებაში. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თეონა ფირანიშვილის ბლოგპოსტს: ციცაბო კლდეზე სიარული ანუ აღიარება - არაღიარების მიჯნაზე. „რატომ არ გამოგვდის ჩვენ 30 წელია ციცაბო კლდეზე სიარული? რატომ გვეშინია კომუნიკაციის, ალტერნატივების და მოქნილი გადაწყვეტილებების ძიების, როდესაც აფხაზი ბავშვი ჭადრაკის სათამაშოდ მიდის საერთაშორისო ტურნირზე, ან Chevening გაცვლით პროგრამაში იღებს მონაწილეობას, ან აფხაზეთში უფლებების მდგომარეობას აფასებს დამოუკიდებელი საერთაშორისო ექსპერტი. რატომ არ ვფიქრობთ ამ ჩაკეტილი ყუთის მიღმა შესაძლებლობებზე, რატომ არ გვინდა პირდაპირი დიალოგი და ვიქცევით ისე თითქოს ისინი არ არსებობდნენ? არ ვფიქრობთ იმაზე რომ იმ აფხაზი ბავშვისთვის, რომელსაც საქართველომ ხელი შეუშალა ჭადრაკის ჩემპიონატზე გასულიყო, საქართველო მუდმივად არაკეთილისმსურველ სუბიექტად დარჩება. და როცა ეს თაობა მოვა დე-ფაქტო ხელისუფლების სათავეში, რომელსაც განათლებას, ჯანდაცვას, მოგზაურობას უშლიდნენ, მერე როგორ ვილაპარაკოთ შერიგებაზე, ნდობის აღდგენაზე, დიალოგზე?“ სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია აქვეყნებს სტრატეგიული სამართალწარმოების იურისტის თამარ ონიანის ბლოგპოსტს: თავისუფალი პრესა, როგორც ვაქცინა. ბლოგპოსტი პრესის თავისუფლების დღეს ეძვნება და მასში დასმულია ისეთი მნიშვნელოვანი საკითხები, როგორიცაა პრესის დევნა, ცენზურა, ადამიანის უფლებების შეზღუდვა ობიექტური და სანდო ინფორმაციის მიღებაზე. „შეძლებდა თუ არა მსოფლიო ერთი ნაბიჯით წინ ყოფილიყო ვირუსთან ბრძოლაში, თუკი ვირუსის პირველწყაროს თავისუფალი პრესა ეყოლებოდა?! პანდემიის ყველაზე ადრეული დღეებიდან, როდესაც ჩინეთის მთავრობამ, ისევე, როგორც უკვე შემდგომ პერიოდში არაერთმა სახელმწიფომ, გვაჩვენა მაგალითი, თუ რა გავლენა აქვს ადამიანის თავისუფლებაზე, ადამიანის სიცოცხლესა და ჯანმრთელობაზე, პრესის დევნას, ჩაგვრას, შევიწროებას. დღევანდელი დღე შეხსენებაა ყველა სახელმწიფოს ხელისუფლებისა და ჩვენთვის, ადამიანებისთვის, რომ ჩვენი თავისუფლების მოპოვების გზაზე, სიტყვა - მთავარი იარაღია, ხოლო ჩვენი სათქმელი კიდევ იმ ადამიანების, ჟურნალისტების, რეპორტიორების მიერ გაღებული შრომის შედეგად ფორმირდება, რომლებიც, თავიანთი ყოველდღიური საქმიანობით ქმნიან „ვაქცინას“ ყველა იმ „ვირუსის“ წინააღმდეგ, რომელიც მიზანმიმართულია ადამიანის, არა მიზნად აღქმის, არამედ მისი საშუალებად ქცევისკენ. დღეს პრესის თავისუფლების დღეა, და ყველას, ვინც თავისუფლების ამ ქოლგის ქვეშ მოიაზრება, მადლობა უნდა ვუთხრათ! მადლობა.“ სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ანთროპოლოგ ნიქჰილ ანანდის სტატიის მარიამ შალვაშვილისეულ თარგმანს: მუნიციპალური გათიშვა: განმდევნელ წყალსა და მის ურბანულ ინფრასტრუქტურებზე. „ეს სტატია აჩვენებს, თუ როგორ ხდება მუსლიმი მოსახლეობა, ქალაქის ტექნოკრატებისა და ინჟინრების წინასწარგანზრახული უმოქმედობის გამო, იძულებული, ნაკლებად სასურველი წყალი მოიხმაროს და როგორ იწარმოება განდევნის პრაქტიკა მმართველებსა და მართულებს შორის სუსტი და სადავო ინფრასტრუქტურული კავშირების განმეორებადი პროცესის მეშვეობით“, ნათქვამია სტატიის აბსტრაქტში. სრულად... წყარო: emc.org.ge

თბილისი. მსოფლიოს ჯანდაცვის ორგანიზაციის ევროპის რეგიონალური ოფისის, ევროპის საბჭოს ადამიანის უფლებათა კომისრის, წამების საწინააღმდეგო კომიტეტის და გაეროს ნარკოტიკებისა და დანაშაულის წინააღმდეგ ბრძოლის ბიუროს რეკომენდაციით, თავისუფლების აღკვეთის დაწესებულების პოპულაციის შემცირება COVID-19-ის გავრცელების პრევენციის გზაზე ერთ-ერთი აუცილებელი და უფრო მეტიც, გარდაუვალი ნაბიჯია. „პენიტენციურმა სისტემამ ციხის ადმინისტრაციის, ჯანდაცვისა და იურიდიული სფეროების წარმომადგენლებთან ერთად წინასწარ უნდა შეიმუშავოს იმ პირთა წრის ჩამონათვალი, ვინც კრიზისის გამწვავების შემთხვევაში დატოვებს საპატიმროებს. რა თქმა უნდა, ყველა იმ პირმა, რომელიც მოხვდება წინასწარ განსაზღვრულ კატეგორიაში, უნდა გაიაროს შემოწმება, თუ რამდენად აკმაყოფილებს დაბალი რისკის მოთხოვნებს. პირები, რომლებიც დროებით ან სამუდამოდ დატოვებენ საპატიმროებს, არ უნდა შეიცავდნენ საფრთხეს საზოგადოებრივი უსაფრთხოებისთვის. ზემოაღნიშნული ნაბიჯი, როგორც სხვადასხვა ორგანიზაციებმა თუ კომიტეტებმა აღნიშნეს, არათუ საჭირო, არამედ გარდაუვალია ქვეყნებში, სადაც ციხეების გადატვირთულობის პრობლემა არსებობს“. სრულად... წყარო: idfi.ge

თბილისი. კოალიცია თანასწორობისთვის ანტიკრიზისული გეგმის მიღმა დარჩენილთა საჭიროებებზე განცხადებას ავრცელებს. „სათემო ორგანიზაციებთან კონსულტაციების მიუხედავად, ანტიკრიზისულ გეგმაში არც ლგბტქი ადამიანების საჭიროებებია გათვალისწინებული. მოცემულ მდგომარეობაში, შემოსავლის და სამუშაოს გარეშე დარჩენილ ქვიარ ადამიანებს, ვინც ოჯახის წევრთა მხარდაჭერით ან საზოგადოების სოლიდარობით ვერ სარგებლობს, ქუჩაში დარჩენა ემუქრებათ. მათი გადაუდებელი საჭიროებები, მათ შორის ქირის სუბსიდირება და ალტერნატიული საცხოვრისით ან თავშესაფრით უზრუნველყოფა, სახელმწიფო ანტიკრიზისული დახმარების პროგრამის მიღმა დარჩა. კრიზისის დაძლევის პროცესში, უწყებათაშორისი საკოორდინაციო საბჭოს რეაგირება სათემო ორგანიზაციების მოთხოვნებზე ფრაგმენტულია და პროაქტიულად არ პასუხობს დღის წესრიგში მდგარ კომპლექსურ გამოწვევებს“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ზვიად რატიანის ინტერესებს სტრასბურგის სასამართლოში დაიცავს. „სტრასბურგში წარდგენილ განაცხადში მითითებულია, რომ პოლიციელების მიერ ზვიად რატიანის ადმინისტრაციული დაკავების შემდეგ მისი ვიდეოგადაღება და ამ ჩანაწერების საჯაროდ გავრცელება იყო უკანონო. ამასთან, მათი გადაღება და გავრცელება ემსახურებოდა არა საზოგადოების ინფორმირების ინტერესს, არამედ ზვიად რატიანის მიმართ ნეგატიური განწყობის შექმნას და მისი პიროვნების უარყოფით კონტექსტში წარმოჩენას“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) მშრომელთა საერთაშორისო დღეს ეხმიანება. ორგანიზაცია სახელმწიფოს მშრომელთა უფლებების დაცვაზე ორიენტირებული საკანონდებლო და ინსტიტუციური ჩარჩოს, არსებული კანონმდებლობის აღსრულების მოქნილი მექანიზმებისა და სოციალური დაცვის მყარი სტანდარტების შექმნისკენ მოუწოდებს. „საქართველოში მშრომელთა დიდი ნაწილი შრომის კანონმდებლობის უგულებელყოფისა და შრომითი უფლებების დარღვევის მსხვერპლი ყოველდღიურად ხდება. თუმცა პანდემიის პირობებში ამან განსაკუთრებით მასობრივი ხასიათი შეიძინა. სისტემატიური სახე მიიღო წინასწარი შეტყობინებისა და სათანადო კომპენსაციის გარეშე ადამიანების სამსახურიდან გათავისუფლებამ, უხელფასო შვებულებაში დასაქმებულების იძულებით გაშვებამ, ხელფასის თვითნებურმა შემცირებამ თუ ანაზღაურებაზე უარის თქმამ. შექმნილმა ვითარებამ ზედაპირზე გამოიტანა და ხილული გახადა მშრომელთა მოწყვლადობა და სამართლიანი საკანონმდებლო მოწესრიგების, ქმედითი ინსტიტუტებისა და სოციალური დაცვის მყარი გარანტიების არარსებობა“. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია მშრომელთა საერთაშორისო დღესთან დაკავშირებით განცხადებას ავცელებს. „უპირველეს ყოვლისა, გვსურს ჩვენი მადლიერება გამოვხატოთ იმ პროფესიის წარმომადგენლების მიმართ, რომლებიც პანდემიის პირობებში, საქართველოსა და მსოფლიოში დგანან საზოგადოების ჯანმრთელობისა და უსაფრთხოების სადარაჯოზე. პანდემიამ კარგად დაგვანახა არამარტო ექიმების, არამედ ექთნების, სანიტრების, მომსახურების და სხვა სფეროში დასაქმებული პირების სამუშაოს მნიშვნელობა, რომლებსაც დღეს მინიმალური ანაზღაურების სანაცვლოდ, მძიმე სამუშაო პირობებში უწევთ მუშაობა. აქვე აღვნიშნავთ, რომ სახელმწიფოს ეკისრება მომეტებული ვალდებულება, ამ პირთა შრომითი პირობებისა და უსაფრთხოების დასაცავად. საქართველოს, როგორც სოციალური სახელმწიფოს კონსტიტუციური ვალდებულებაა, იზრუნოს საზოგადოებაში სოციალური სამართლიანობის, თანასწორობისა და სოლიდარობის პრინციპების განმტკიცებაზე. სახელმწიფო დონეზე შრომის ერთიანი პოლიტიკის არარსებობა და შრომითი უფლებების გარანტირების მნიშვნელობის სათანადოდ გაუაზრებლობა უარყოფით ეფექტს ახდენს რიგითი დასაქმებულის სოციალურ დაცვასა და სტაბილურობაზე, რაც, თავის მხრივ, დამაზიანებელია სახელმწიფოს კეთილდღეობისთვის“. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი აქვეყნებს ბლოგპოსტს 1 მაისის დღესთან დაკავშირებით. „პირველი მაისი მშრომელთა საერთაშორისო დღეა. წელს საქართველოში, ისევე როგორც დანარჩენ მსოფლიოში, პირველი მაისი უჩვეულო, პანდემიურ ვითარებაში დგება. ახალი კორონავირუსის გლობალური პანდემია მშრომელების მნიშვნელობასა და მოწყვლადობას ერთდროულად ააშკარავებს. დღეს ყველაზე უკეთ ჩანს რამდენადაა დამოკიდებული სოციალური კეთილდღეობა, თანამედროვე ცხოვრების წესი და არსებული ეკონომიკური წესრიგი საცალო ვაჭრობის ქსელებში დასაქმებული კონსულტანტების, ექიმებისა და ექთნების, მკერავების, მეეზოვეების და სხვების ფიზიკურად მძიმე და არასათანადოდ ანაზღაურებულ ყოველდღიურ შრომაზე. დღეს, როცა ტყიბულში, რუსთავში, ჭიათურაში და სხვაგან, მძიმე და სამთო-მოპოვებით ინდუსტრიებში დასაქმებულები მუშაობას პანდემიის მიუხედავად, გაზრდილი საფრთხის პირობებში აგრძელებენ, განსაკუთრებით თვალსაჩინოა, რამდენად მნიშვნელოვანია მათი შრომა ქვეყნის ეკონომიკისთვის. თვალსაჩინოა ისიც, რომ ჯანმრთელობისთვის მაღალი რისკის შემცველი სამუშაო გარემო მათთვის უკვე წლებია უცვლელი მოცემულობაა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი აქვეყნებს 22 წლის აითაჯ ხალილის „კარანტინის დღიურებს“. აითაჯი ერთი თვის წინ საკარანტინო პერიოდში ადამიანის უფლებებისა სწავლებისა და მონიტორინგის ცენტრის მარნეულის და ბოლნისის მუნიციპალიტეტებისთვის განკუთვნილი აზერბაიჯანულენოვანი ცხელი ხაზის მიმღები და მხარდამჭერი იყო. „ამ პროცესში ვაგრძელებდი დღიურის წერას, რომელსაც უკვე 10 წელია ვწერ. ამ დღიურში კი, რომელსაც ახლა წარმოგიდგენთ, აღწერილია ცხელი ხაზის მეშვეობით მოსმენილი ისტორიები და ჩემი თვალით დანახული „წითელი ზონა“. სრულად... წყარო: emc.org.ge