თბილისი. კოალიცია მედიის ადვოკატირებისთვის მიიჩნევს, რომ აჭარის საზოგადოებრივი მაუწყებლის ირგვლივ განვითარებული მოვლენები კვლავაც კრიტიკულია. „დღეისათვის აჭარის მაუწყებლის წინ შიმშილობის აქციის მეშვიდე დღეა, ასევე დევნისა და შევიწროების მსხვერპლი გახდა ახალი ამბების სამსახურის უფროსი შორენა ღლონტი, რომელიც დღეს სამსახურიდან გაათავისუფლეს კიდეც. ამ და სხვა მოვლენებზე პასუხისმგებლობა აჭარის მაუწყებლის ხელმძღვანელ ორგანოებს - დირექტორსა და მრჩეველთა საბჭოს ეკისრება“. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თარგმანების კრებულს: რასიზმი, კაპიტალიზმი, პატრიარქატი - თარგმანების კრებული. „კრებულში თავმოყრილია აფრო-ამერიკელი აქტივისტების, მკვლევრების და მოაზროვნეების საჯარო გამოსვლების, ესეებისა და ინტერვიუების თარგმანები ქართულ ენაზე. ავტორები აჩვენებენ იმ ისტორიას და სტრუქტურულ მიზეზებს, რაც განაპირობებს რასიზმის არსებობას ამერიკაში და სახავენ სხვადასხვა გზებს, რითაც შესაძლებელია არსებული სისტემის კრიტიკა, მასთან დაპირისპირება თუ სხვადასხვა ჯგუფს შორის სოლიდარობის გზების ძიება“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება თბილისის მერიის მიერ რეხის დასახლებაში უნებართვო მშენებლობების დაგეგმილ დემონტაჟს. ორგანიზაცია მოუწოდებს მერიას, მაქსიმალურად დაიცვას და გაითვალისწინოს უსახლკაროების ინტერესები. „სათანადო საცხოვრებლის უფლების გარანტირების ვალდებულებიდან გამომდინარე, უმნიშვნელოვანესია, მუნიციპალურმა ორგანოებმა გაითვალისწინონ რეხის დასახლების მცხოვრებთა მოწყვლადობა და არ გადადგან ისეთი ნაბიჯები, რომელიც მათ მდგომარეობას კიდევ უფრო დაამძიმებს, განსაკუთრებით COVID-19-ის ეპიდემიის მიმდინარეობისას. ნებისმიერმა ღონისძიებამ, რომელიც მუნიციპალიტეტის მიერ ამ საკითხთან დაკავშირებით მიიღება, სათანადოდ უნდა გაითვალისწინოს მაცხოვრებელთა უფლებები, ინტერესები და უზრუნველყოს მათი უსახლკარობის პრევენცია“, ნათქვამია ორგანიზაციის განცხადებაში. სრულად... წყარო: emc.org.ge

თბილისი. 30-31 მაისს გაიმართა სოლიდარობის პლატფორმის მეხუთე შეხვედრა. ღონისძიების ფარგლებში მიმდინარე დისკუსიები ეხებოდა რასიზმის კონცეფციას. „სოლიდარობის პლატფორმა აერთიანებს აქტივისტებს თბილისიდან, აჭარიდან, ქვემო ქართლიდან, პანკისიდან და სამცხე-ჯავახეთიდან და მიზნად ისახავს, რელიგიური და ეთნიკური უმცირესობებით დასახლებულ რეგიონებში მოღვაწე აქტივისტების ერთმანეთთან დაკავშირებას და საჯარო ცხოვრებაში მათი გავლენების და მონაწილეობის გაძლიერებას“. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტმა უნივერსალური პერიოდული მიმოხილვის მესამე ციკლის ფარგლებში გაერთიანებული ერების ორგანიზაციის ადამიანის უფლებათა საბჭოს ანგარიში წარუდგინა. ანგარიში შეეხება ისეთ საკვანძო და აქტუალურ საკითხებს, როგორიც არის: 1) მართლმსაჯულება და სამართლიანი სასამართლოს უფლება; 2) გამოხატვის თავისუფლება/ინფორმაციის ხელმისაწვდომობა; 3) პირადი ცხოვრების ხელშეუხებლობა. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრმა (EMC) საქმეთა განაწილების სისტემის მუშაობაში მნიშვნელოვანი გამოწვევები გამოავლინა. მაგ: სასამართლოს თავმჯდომარე კვლავ ინარჩუნებს პრობლემურ უფლებამოსილებებს, მათ შორის, მორიგეობის დადგენის, მასში ცვლილების შეტანის და მოსამართლეთა ვიწრო სპეციალიზაციის შემადგენლობის განსაზღვრის უფლებებს; სრულად... წყარო: emc.org.ge

თბილისი. „საერთაშორისო გამჭვირვალობა - საქართველო“ საგანგებო მდგომარეობის განმავლობაში განხორციელებულ ტენდერებს და პირდაპირ შესყიდვებს აკვირდება, მათ შორის სასტუმროებთან დადებული ხელშეკრულებების გარემოებებს სწავლობს. „მომატებული კორუფციული რისკებიდან გამომდინარე, ყურადღება მიიქცია შპს „ყვარლის ედემთან“ გაფორმებულმა ხელშეკრულებამ, რომლის მიხედვითაც, სასტუმროში მაღალი რისკის ზონად გამოცხადებული რეგიონებიდან შემოსული საქართველოს მოქალაქეები უნდა განთავსდნენ. ხელშეკრულების მიხედვით, სასტუმრომ 45 ნომერი უნდა გამოყოს 2 თვის ვადით. შპს „ყვარლის ედემის“ მფლობელებმა და დირექტორმა 2020 წლის 20 და 23 მარტს „ქართულ ოცნებას” ჯამში 65,000 ლარი შესწირეს და რამდენიმე დღეში საქართველოს ტურიზმის ეროვნული ადმინისტრაციისგან გამარტივებული შესყიდვის გზით 277,300 ლარიანი კონტრაქტი მიიღეს“. სრულად… წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს პოლიტიკური ფილოსოფოსის, ფსიქიატრის ფრანც ფანონის წიგნის: „ბედკრულნი ამა ქვეყნისა“ პირველი თავის თარგმანს. „დეკოლონიზაცია შეუმჩნეველი არასდროს რჩება, რაკი ის ყოფნას მიემართება, ფუნდამენტურად ცვლის მას, გარდაქმნის უმნიშვნელობამდე გათელილ მაყურებლებს მთავარ მოქმედ პირებად, რომელთაც ისტორიის დინება თითქოსდა დიდებით ხუნძალვს, დეკოლონიზაცია ახალი ადამიანების, ახალი ენის, და ახალი ადამიანურობის ხელით ყოფნაში ახალ რიტმს შემოუძღვება. ჭეშმარიტად, დეკოლონიზაცია ახალი ადამიანების შექმნაა. თუმცა ეს აქტი თავის ლეგიტიმაციას რომელიმე ზებუნებრივი ძალისგან არ იღებს: კოლონიზებული „საგანი“ ადამიანად იმავე პროცესით იქცევა, რომლითაც თავს ითავისუფლებს. ამგვარად, დეკოლონიზაციას თან სდევს საჭიროება, სრულად გადაისინჯოს კოლონიური მდგომარეობა. მის ზუსტ განსაზღვრებას ერთ ცნობილ ფრაზაში შეგვიძლია მივაკვლიოთ: „უკანასკნელნი გახდებიან პირველნი“. დეკოლონიზაცია ამ ფრაზის დამოწმებაა. ამიტომაცაა, რომ აღწერის დონეზე, ყველა დეკოლონიზაცია წარმატებულია“. სრულად... წყარო: emc.org.ge

თბილისი. გაეროს ბავშვთა ფონდის განცხადებით, ახალი კორონავირუსის პანდემიამ დიდი ზეგავლენა მოახდინა ბავშვებსა და მოზარდებზე, ყველაზე მეტად - მათ მოწყვლად ნაწილზე. ორგანიზაციას განსაკუთრებით აღელვებს იმ ბავშვების მდგომარეობა, რომელთაც ნაკლებად მიუწვდებათ ხელი ძირითად მომსახურებებსა და რესურსებზე. „კორონავირუსის სწრაფად გავრცელებისადმი განსაკუთრებით დაუცველნი არიან ისეთ ოჯახებში მცხოვრები ბავშვები, სადაც სივიწროვეა ან არ არის სათანადო პირობები - ხელსაბანი და სხვა სანიტარიული კვანძები და საშუალებები. გაეროს ბავშვთა ფონდის მრავალინდიკატორული კლასტერული კვლევის მიხედვით, საქართველოში 29 800 ბავშვს სახლში არ აქვს წყლითა და საპნით ხელის დაბანის პირობები. შესაბამისად, უფრო მაღალია ასეთი ბავშვების კორონავირუსით დაინფიცირების რისკი. მიმდინარე კრიზისის პერიოდში ყველა ბავშვმა უნდა განაგრძოს სწავლა და შეძლოს სკოლაში უსაფრთხოდ დაბრუნება. ელექტრონული ინსტრუმენტებისა და ინტერნეტის კავშირის, შინ სათანადო სასწავლო გარემოს და მშობლების მხარდაჭერის ნაკლებობის გამო ისედაც გარიყული ბავშვები ჩამორჩენის საფრთხის წინაშე იმყოფებიან“, ნათქვამია ორგანიზაციის ვებგვერდზე. სრულად... წყარო: www.unicef.org

თბილისი. პარტნიორობა ადამიანის უფლებებისთვის (PHR) ბავშვთა მრჩეველთა საბჭოს წევრებს იწვევს. „PHR-ის პროექტის „ბავშვთა მართლმსაჯულების უფლების გაძლიერება საქართველოში“, ფარგლებში ქმნის „ბავშვთა მრჩეველთა საბჭო“, სადაც თავად ბავშვები იქნებიან აქტიურად ჩართულნი ორგანიზაციის საქმიანობაში, მიიღებენ ღონისძიებების დაგეგმვასა და განხორციელებაში მონაწილეობას. მოამზადებენ მოსაზრებებს და რეკომენდაციებს სახელმწიფოსთვის და ჩაერთვებიან საზოგადოებრივ პროცესებში. ასევე მრჩეველები კონსულტაციას გაუწევენ ორგანიზაციას ბავშვებთან დაკავშირებულ მიმდინარე საკითხებზე. ორგანიზაცია, თავის მხრივ იზრუნებს, რომ ბავშვებს ჰქონდეთ უსაფრთხო გარემო და საინტერესო სამუშაო პირობები მათი ინტერესების უპირატესი დაცვით“, ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. საქართველოს ახალგაზრდა იურისტთა ასოციაცია ბავშვთა დაცვის საერთაშორისო დღესთან დაკავშირებით განცხადებას ავრცელებს. „პანდემიით გამოწვეული პრობლემები განსაკუთრებით შეეხო ქუჩაში მცხოვრებ და სოციალურად დაუცველ ბავშვებს, ხოლო საყოველთაო კარანტინის დროს ოჯახში ან/და ბავშვის მოვლის ცენტრებში დარჩენილი ბავშვების მიმართ გაიზარდა ძალადობის განხორციელების რისკები. მისასალმებელია, რომ საქართველოში მოხდა დისტანციური სწავლების დანერგვა და საზოგადოებრივი მაუწყებლის ეთერში ე.წ. ტელესკოლის პროგრამის შემუშავება. სამწუხაროდ, აღნიშნული ღონისძიებები ვერ ჩაანაცვლებს სკოლებს, მით უფრო იმ დროს, როდესაც ქვეყნის მოსახლეობის უმრავლესობას აქვს მძიმე სოციო-ეკონომიკური მდგომარეობა და არ აქვს გაჯეტი ან/და ინტერნეტზე წვდომა, რომლის მეშვეობითაც ჩაერთვება გაკვეთილზე“. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აზარტული ინდუსტრიისგან ბავშვთა დაცვას მოითხოვს. „ბავშვთა სიღარიბის მაღალ მაჩვენებელთან და განათლების სისტემაში არსებულ ჩავარდნებთან ერთად, ბავშვთა აზარტულ თამაშებში მონაწილეობა მძიმე გამოწვევად რჩება, რომელიც ქრონიკული სიღარიბისა და ფსიქოსოციალური პრობლემების რისკს ზრდის. არასრულწლოვანთათვის უსაფრთხო გარემოსა და ჯანსაღი განვითარების შესაძლებლობის უზრუნველსაყოფად, EMC საქართველოს მთავრობას მოუწოდებს, უმოკლეს დროში შეიმუშავოს აზარტული თამაშების მკაცრი რეგულირების მექანიზმები და არ დაუშვას მათში არასრულწლოვანთა მონაწილეობა“. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციამ პარლამენტის წევრების მიერ ინიცირებულ შრომის კოდექსში ცვლილებების პაკეტის თაობაზე საქართველოს პარლამენტის ჯანმრთელობის დაცვისა და ადამიანის უფლებების დაცვის კომიტეტებს მოსაზრებები წარუდგინა. „იმის მიუხედავად, რომ „შრომის კოდექსში“ ცვლილებები და „შრომის ინსპექციის შესახებ“ საქართველოს კანონის პროექტი ზრდის დასაქმებულის სამართლებრივი დაცვის გარანტიებს, საია-მ საჭიროდ მიიჩნია საქართველოს პარლამენტისათვის დამატებითი შენიშვნების წარდგენა, რათა ხელი შეუწყოს პროექტის გაუმჯობესებას და არსებული ხარვეზების დახვეწას“. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს გიორგი ხასაიას პუბლიკაციას: ტყიბული, პანდემია და ექსტრაქტივიზმი. „სულ ეხლახანს, პანდემიის გამოცხადებამდე ცოტა ხნით ადრე, ძიძიგურის შახტთან, მეშახტე ხმამაღლა ყვება ტრიბული ქვანახშირის კომპანიის ახალი წარმომადგენლის ნათქვამს - „მეშახტე ისე უნდა ამუშავო, რომ დამჯდარი იბანდეს“. კაპიტალს რომ ლაპარაკი შეეძლოს, ასე ილაპარაკებდა. მაგრამ კაპიტალი არ ლაპარაკობს, ის მოქმედებს, როგორც ვამპირი - „კაპიტალი მკვდარი შრომაა, რომელიც ვამპირის მსგავსად ცოცხალი შრომის შეწოვით არსებობს და იმდენად უფრო მეტს სცოცხლობს, რამდენადაც იგი მეტს შეიწოვს“ (მარქსი 1954, 295)“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს კვლევებზე დაყრდნობით მომზადებულ ვიდეოს, სადაც ორგანიზაციის განცხადებით, ნათლად ჩანს განათლების პოლიტიკის ფუნდამენტური ხარვეზები და წლების განმავლობაში სახელმწიფოს მიერ, ამ კუთხით გამოჩენილი გულგრილობა, რაც საბოლოოდ, არადომინანტური ეთნიკური ჯგუფების სოციალურ გარიყულობასა და მოწყვლადობას კიდევ უფრო აღრმავებს. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აფასებს საქართველოში იეჰოვას მოწმეთა ორგანიზაციის წევრების მიმართ 2019 წელს ჩადენილ დანაშაულებრივ ქმედებებს და მათზე სახელმწიფო უწყებების (შსს, პროკურატურა) სამართლებრივი რეაგირების ეფექტურობას ითხოვს. „ორგანიზაციის შეფასება არსებითად ეყრდნობა იეჰოვას მოწმეთა რელიგიური ორგანიზაციის მიერ მოწოდებულ ინფორმაციას. მოწოდებული მონაცემების მიხედვით, 2019 წელს თემს წევრების მიმართ, რელიგიური შეუწყნარებლობის ნიადაგზე ჩადენილი 20 დანაშაულებრივი ქმედება ფიქსირდება. აგრეთვე 20 შემთხვევა დაფიქსირდა 2018 წელს, ხოლო 2017 წელს 16 შემთხვევას ჰქონდა ადგილი“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ორგანიზაციამ „პარტნიორობა ადამიანის უფლებებისათვის” განცხადება წარადგინა ტელეკომპანია „მთავარის” გადაცემა „მთავარი აქცენტების” წამყვანის - ნიკა გვარამიას წინააღმდეგ. საქართველოს ჟურნალისტური ეთიკის ქარტიის სამდივნომ ორგანიზაციის განცხადება დასაშვებად ცნო. „სადავო გადაცემა “მთავარი აქცენტები” ეთერში 2020 წლის 24 მაისს გავიდა და მხარის პრეტენზია გვარამიას მონოლოგის იმ ნაწილს ეხება, როდესაც ის, ყოფილი ცოლის ცემაში ბრალდებული ნიკოლოზ ბასილაშვილის საქმის დეტალებზე საუბრობს. „პარტნიორობა ადამიანის უფლებებისათვის” განმარტებით, გარდა იმისა რომ წამყვანის მონოლოგში, ბასილაშვილის ყოფილი მეუღლის მხრიდან, შანტაჟთან დაკავშირებული ინფორმაცია ფაქტადაა გადმოცემული და სიმართლეს არ შეესაბამება, მსხვერპლი ისეა წარმოჩენილი, თითქოს მან უბიძგა ბრალდებულს ძალადობის ჩადენისკენ და ქმნის წარმოდგენას, თითქოს „ქალის გარკვეული „არასწორი” სოციალური ქცევა, მამაკაცს ანიჭებს პრივილეგიას, რომ მას ძალადობრივი მეთოდებით გაუსწორდეს.“ სრულად... წყარო: www.qartia.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სტატიას: არადომინანტური ეთნიკური ჯგუფების პოლიტიკური მონაწილეობის თეორიები და მოდელები - მიმოხილვა. „წინამდებარე ლიტერატურის მიმოხილვა მიზნად ისახავს, ქვეყნის პოლიტიკურ ცხოვრებაში არადომინანტური ეთნიკური ჯგუფების პოლიტიკური მონაწილეობის საკითხზე არსებული შეხედულებების კრიტიკას აკადემიური ცოდნების და დაკვირვებების შუქზე. მიმოხილვის მიზანი ამ საკითხზე საბოლოო და მყარი პოზიციის დაფიქსირება არ არის. პირიქით, ეს ნაშრომი არის მცდელობა, რომ პოლიტიკური მონაწილეობის შესახებ ღია დისკუსია დაიწყოს, რომელიც აკადემიურ ცოდნაზე დაფუძნებული ტრანსფორმაციული პოლიტიკების შემუშავების საფუძველი გახდება“, ნათქვამია ორგანიზაციის ვებგვერდზე. სრულად... წყარო: emc.org.ge ადამიანის უფლებები

თბილისი. მაკლეინის ასოციაცია ბავშვებისთვის (Mac Georgia) აქვეყნებს ფეისბუქ ჩანაწერს: განსაკუთრებული საჭიროებების მქონე ბავშვების დედმამიშვილები. მშობლებთან ერთად დედმამიშვილებიც დიდ დროს ატარებენ განსაკუთრებული საჭიროების მქონე ბავშვებთან. მათთან ურთიერთობისას ისინი სხვადასხვა სტრესორების გავლენის ქვეშ ექცევიან, რამაც შესაძლოა, გაზარდოს ემოციური და ქცევითი სირთულეების ჩამოყალიბების რისკი. ჩანაწერში ჩამოთვლილია სტრესორები და მათთან გამკლავების რეკომენდაციები.  „ეცადეთ ყოველთვის დაესწროთ ბავშვისთვის ღირშესანიშნავ მომენტებსა და ღონისძიებებს, როგორიცაა სკოლის დამთავრება, სპორტული თამაში, გამოსაშვები ზეიმი და ა.შ. ეცადეთ შეუქმნათ ბავშვს უსაფრთხო გარემო, სადაც მას შეეძლება საკუთარი ემოციების თქვენთვის გაზიარება. ხაზი გაუსვით იმას, რომ გესმით მათი ემოციები და მათგან არ ითხოვთ სრულყოფილებას, როგორც კომპენსაციას მეორე ბავშვთან დაკავშირებული სირთულეების გამო.“ სრულად... წყარო: ორგანიზაციის გვერდი სოციალურ ქსელში

თბილისი. 25-26 მაისს, ჩართულობისა და განვითარების ცენტრმა ალბანეთის ეუთოს თავმჯდომარეობის მიერ ეუთოს დემოკრატიული ინსტიტუტებისა და ადამიანის უფლებების ოფისის (ODIHR) მხარდაჭერით გამართულ, პირველ, სრულად ონლაინ, შეუწყნარებლობასა და დისკრიმინაციის საკითხებზე ორიენტირებულ Supplementary Human Rights Demencion შეხვედრაში მიიღო მონაწილეობა. „სესიაზე, რომელიც ონლაინ არატოლერანტობისა და დისკრიმინაციის თანამედროვე ფორმებს ეძღვნებოდა, „ჩართულობისა და განვითარების ცენტრის“ წარმომადგენელმა ისაუბრა იმ პრობლემებზე, რომლებთან გამკლავებაც საქართველოში გვიწევს. სიძულვილის ჯგუფების მოქმედებები, ლგბტქ თემის, მიგრანტებისა და სხვა ჯგუფებისადმი დისკრიმინაცია და არატოლერანტულობა, მათზე თავდასხმები, სიძულვილის ენის გამოყენება ონლაინ... თუმცა, ჩვენი გამოსვლის მთავარი ფოკუსი, ჩვენი კოლეგის, ვიტალი საფაროვის სიძულვილის ნიადაგზე ჩადენილი მკვლელობა და სააპელაციო სასამართლოში მიმდინარე საქმე იყო“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) ინფორმაციით, 20-21 ივნისის მოვლენების შედეგად დაშავებულებს პროკურატურა დაზარალებულის სტატუსს კვლავ არ ანიჭებს. „პროკურატურამ 2019 წლის 20-21 ივნისის მოვლენების შედეგად დაშავებულ 23 პირს, რომელთა ინტერესებს საია იცავს, დაზარალებულის სტატუსის მინიჭებაზე ისევ უარი უთხრა. პროკურატურის უარს საია სასამართლოში ასაჩივრებს და დაზარალებული პირებისათვის შესაბამისი სამართლებრივი სტატუსის მინიჭებას მოითხოვს. დაზარალებულის სტატუსის ოფიციალურად მინიჭების გარეშე, აღნიშნული პირები მოკლებულნი არიან შესაძლებლობას, ეფექტიანად იყვნენ ჩართულნი სამართალწარმოების პროცესში, გაეცნონ საქმის მასალებს და გააკონტროლონ, რამდენად ქმედითია ის ნაბიჯები, რასაც პროკურატურა საქმის დროული გამოძიებისათვის დგამს“, ნათქვამია ორგანიზაციის ვებგვერდზე. სრულად... წყარო: gyla.ge

„ახალი აზროვნების ინსტიტუტი“ იწყებს ინოვაციურ პროექტს. „მიუხედავად იმისა, რომ წლების განმავლობაში მრავალი სახელმწიფო და არასამთავრობო ორგანიზაცია ინფორმირების პროექტებს ახორციელებს, საქართველოში მაინც მწვავედ დგას ნაადრევი ქორწინების პრობლემა. ნაადრევი ქორწინების შედეგად ქალებს ხელი არ მიუწვდებათ განათლების და დასაქმების შესაძლებლობებზე. ბავშვის ასაკში ქორწინება მათ საზოგადოებრივ ცხოვრებაში ჩართულობასაც მნიშვნელოვნად აფერხებს. ზემოთ აღნიშნული პრობლემების მოსაგვარებლად, ახალი აზროვნების ინსტიტუტი მშობლებს სთავაზობს პროექტს „დედათა სკოლას“, რომელიც გააერთიანებს სოფ. სადახლოს, მოლაოღლსა და ხულდარაში მცხოვრებ მოხალისე 20 დედას, რომელთაც 10 თვის განმავლობაში ჩაუტარდებათ სემინარები და ტრენინგები სხვადასხვა საგანში, მათ შორის, სამოქალაქო განათლება, ქართული და ინგლისური ენა (ელემენტარული დონე), ბუნება, მათემატიკა, კომპიუტერული პროგრამები. პროექტის ფარგლებში ასევე განვახორციელებთ სოციალურ აქტივობებს, ვითანამშრომლებთ ადგილობრივ თვითმმართველობასთან და სკოლებთან. „დედათა სკოლის“ მონაწილეები უკვე შერჩულები არიან“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში