თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება COVID – 19-ის ეპიდემიის პირობებში სოციალურად მოწყვლადი ჯგუფების საჭიროებებს და საქართველოს მთავრობასა და მუნიციპალიტეტებს მათი სათანადო კვების უფლების უზრუნველყოფისკენ მოუწოდებს. „ანტიკრიზისული გეგმა, რომელიც საქართველოს მთავრობამ 24 აპრილს წარადგინა, სხვადასხვა მიზნობრივი ჯგუფისთვის სოციალური დახმარების პაკეტებს მოიცავს, თუმცა რამდენიმე მოწყვლადი ჯგუფი მათ მიღმა რჩება“. სრულად... წყარო: emc.org.ge

თბილისი. ჰაინრიჰ ბიოლის ფონდი სამხრეთ კავკასიაში აქვეყნებს „მწვანე ალტერნატივას“ დამფუძნებლის, მანანა ქოჩლაძის სტატიას: კოვიდ-19, გარემოს დაცვა და მომავლის პერსპექტივები. „კოვიდ-19-ის პანდემია სერიოზული გამოწვევა აღმოჩნდა თანამედროვე საზოგადოებებისთვის. მსოფლიოში დაავადების სწრაფი გავრცელების შედეგად, ათასობით ადამიანი დაიღუპა, იზოლაციისა და კარანტინის გამო დაიხურა საზღვრები, უამრავმა ადამიანმა დაკარგა სამუშაო ადგილი. როგორც მოსალოდნელი იყო, ყველაზე მძიმედ პანდემიამ ღარიბ მოსახლეობას დაარტყა და კიდევ უფრო გაზარდა სიღარიბე და უთანასწორობა, ისედაც უთანასწორო მსოფლიოში“. სრულად... წყარო: ge.boell.org

თბილისი. საქართველოს ახალგაზრდა იურისტთა ასოციაციამ “წამებისა და არასათანადო მოპყრობის ფორმები და პრევენცია“ ანგარიშის ონლაინ პრეზენტაცია გამართა. „ბოლო წლების განმავლობაში წამებისა და არაადამიანური მოპყრობის სისტემური შემთხვევები არ დაფიქსირებულა, თუმცა, სამართალდამცველთა მხრიდან მსგავსი დანაშაულების ჩადენა კვლავ პრობლემას წარმოადგენს. წინა წლების მსგავსად, გამოწვევად რჩება სამართალდამცველი უწყებების მხრიდან მსგავსი ფაქტების სათანადო კვალიფიკაცია, გამოძიების გონივრულ ვადებში წარმართვა, არასათანადო მოპყრობის მსხვერპლთა დაზარალებულად ცნობა. პოზიტიური ნაბიჯი იყო სახელმწიფო ინსპექტორის სამსახურის შექმნა და მისი ამოქმედება, თუმცა, დადებითად ვერ შეფასდება სახელმწიფო ინსპექტორის შესახებ კანონის იმ რედაქციით მიღება, რომლის მიხედვითაც, ინსპექტორს შეზღუდული მანდატი აქვს“. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს სტატიას: პოლიტიკური რეპრესიების მსხვერპლთა სოციალური დახმარების სტატისტიკა.  „მიმდინარე სტატიაში IDFI-ს მიერ გაანალიზებულია სოციალური მომსახურების სააგენტოს ვებგვერდზე გამოქვეყნებული სტატისტიკური მონაცემები, რომლებიც ეხება პოლიტიკური რეპრესიების მსხვერპლად აღიარებული პირებისათვის, ბოლო 10 წლის განმავლობაში სოციალურ დახმარებებზე (პოლიტიკური რეპრესიის მსხვერპლად აღიარებული პირის რამდენიმე პირველი რიგის მემკვიდრეზე გაცემული ერთიანი ფულადი კომპენსაციების გარდა) სახელმწიფოს მიერ გაწეულ ხარჯებს. კერძოდ, სტატიაში მიმოხილულია ამ მიზნით სახელმწიფოს მიერ დაწესებული საყოფაცხოვრებო სუბსიდიისა და სოციალური პაკეტების ბენეფიციარების და მათზე გაწეული ხარჯების სტატისტიკური მონაცემები“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ევროკავშირის მხარდაჭერილი წალკის და ქედის ადგილობრივი განვითარების ჯგუფები (LAGs), CENN-თან თანამშრომლობით, გიწვევთ ვებინარების კვირეულში: „ქალები და Covid-19,“ მონაწილეობის მისაღებად. ვებინარები შეეხება ვირუსის გავრცელების შედეგად, იზოლაციის პირობებში გავრცელებულ ქალთა გამოწვევებს და არსებულ გამოწვევებზე რეაგირების შესაძლო გზებს. ვებინარებში მონაწილეობის მისაღებად, უნდა გაიაროთ წინასწარი რეგისტრაცია მითითებულ ბმულზე... დამატებითი ინფორმაციისთვის იხილეთ ვებინარის გვერდი... წყარო: ევროკავშირის გვერდი სოციალურ ქსელში

თბილისი. საერთაშორისო გამჭვირვალობა - საქართველოს ინფორმაციით, საქართველოს პარლამენტი განიხილავს ცვლილებებს ადგილობრივ თვითმმართველობის კოდექსში, რომლითაც მუნიციპალიტეტებს საჯარო სამართლის იურიდიული პირების (სსიპ) შექმნის უფლება ეძლევათ. ორგანიზაცია თვლის, რომ კანონმდებლობის რეფორმის გარეშე მუნიციპალიტეტებისთვის სსიპ-ების შექმნის უფლების მინიჭება მიზანშეუწონელია. სრულად...  წყარო: transparency.ge

თბილისი. ევროკავშირი ავრცელებს განცხადებას გენდერული თანასწორობისა და საქართველოში არსებული მოწყვლადი ჯგუფების დაცვის შესახებ კორონავირუსის პანდემიის კონტექსტში. „პანდემიის ნეგატიური შედეგები განსაკუთრებით რთულია დაუცველი ადამიანებისთვის. ჯანმრთელობისა და ეკონომიკის სფეროში არსებულ გამოწვევებთან გასამკლავებლად გადაუდებელი და აუცილებელი ზომების მიღებისას არავინ უნდა გამოგვრჩეს, მათ შორის არც ის, ვინც უკვე ცხოვრობს სიღარიბის ზღვარს ქვემოთ, იძულებით გადაადგილებულია, შეზღუდული შესაძლებლობა აქვს, გენდერული და ოჯახური ძალადობის მსხვერპლია ან უსახლკარო ბავშვია თუ ზრდასრული. ევროკავშირისა და მისი წევრი ქვეყნების მხარდაჭერით მთავრობა, სახელმწიფო და სამოქალაქო საზოგადოებისგან შემდგარი ორგანიზაციები პანდემიის შედეგად დაზარალებულებს ეხმარებიან. სამოქალაქო საზოგადოების ორგანიზაციებისთვის გაცემული გრანტები, მათ შორის „სწრაფი რეაგირების მექანიზმის“ ფარგლებში, საშუალებას აძლევს მათ, დაუყოვნებლივ დაეხმარონ მოწყვლად ჯგუფებს. მსგავსი კრიზისის დროს, დემოკრატიული საზოგადოების ყველა ჯგუფი გადამწყვეტ როლს თამაშობს, ამიტომ პლურალისტული სამოქალაქო საზოგადოებისთვის ისე, როგორც არასდროს მნიშვნელოვანია ხელშემწყობი გარემოს არსებობა. არავინ არის დაზღვეული ამ პანდემიის შედეგებისგან და არავინ უნდა გამოგვრჩეს“. სრულად... წყარო: eeas.europa.eu

თბილისი. პორტალი ადამიანის უფლებების შესახებ აქვეყნებს ლანა გიორგიძის სტატიას: საქართველოს ამომრჩეველთა ბაზის გაჟონვის სავარაუდო მიზანი. სტატიაში საუბარია 30 მარტს საინფორმაციო პორტალ Zdnet-ის მიერ საქართველოს ამომრჩეველთა ბაზის ჰაკერულად გავრცელების შესახებ გამოქვეყნებულ ინფორმაციაზე. „28 მარტს, 4,9 მილიონზე მეტი საქართველოს მოქალაქის (გარდაცვლილების ჩათვლით) მონაცემები აიტვირთა ჰაკერულ ფორუმზე (1.04 GB MDB ფაილი), რომელიც შეიცავდა ისეთ პერსონალურ მონაცემებს, როგორიცაა: სახელი, გვარი, დაბადების ადგილი, პირადი ნომერი და ტელეფონის ნომერი“. რესპონდენტები საუბრობენ ინფორმაციის გაჟონვის სავარაუდო მიზნებზე. საგულისხმოა, რომ სიაში გარდაცვლილი ადამიანების მონაცემებიცაა დაფიქსირებული, მაგალითად, 1880 წელს დაბადებული პიროვნებების. მოკვლევის თანახმად, სია შექმნილია 2011 წელს, თუმცა 2020 წლამდე არსად გამოქვეყნებულა. სრულად... წყარო: humanrights.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ომბუდსმენის რეკომენდაციას, რომელიც მან საზოგადოებრივი მაუწყებლის აჭარის ტელევიზიისა და რადიოდან გათავისუფლებული შორენა ღლონტის, მაია მერკვილაძისა და თეონა ბაკურიძის საქმეებზე გამოსცა. „მნიშვნელოვანია აღინიშნოს, რომ სახალხო დამცველი მის ვრცელ რეკომენდაციაში არსებითად იზიარებს იმ სამართლებრივ დასაბუთებას და არგუმენტაციას, რომელიც სამივე საქმეზე სასამართლოში უკვე გაგზავნილ სარჩელებში წარმოდგენილია EMC-ს მიერ. EMC რეკომენდაციის ტექსტს სასამართლოს მალევე გაუზიარებს და ვიმედოვნებთ, რომ სახალხო დამცველის შეფასებები კიდევ უფრო მეტად გააძლიერებს შორენა ღლონტის, მაია მერკვილაძისა და თეონა ბაკურიძის სამართლებრივი ინტერესების და უფლებების დაცვის პროცესს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. USAID/PROLoG მხარს უჭერს საქართველოს დემოკრატიულ ინიციატივას COVID-19-ის პანდემიით განპირობებულ სტიგმასთან ბრძოლაში. საქართველოს დემოკრატიული ინიციატივა (GDI) მსოფლიო ჯანდაცვის ორგანიზაციის რეკომენდაციების საფუძველზე მოამზადებს ვიდეო-რგოლს ფეისბუქისა და ტელევიზიებისთვის. „ყველას ძალისხმევა უნდა იყოს მიმართული თავად დაავადების და არა დაავადებული ინდივიდების წინააღმდეგ; ხალხი უნდა გაერთიანდეს მოწყვლადი ადამიანების მხარდასაჭერად; მიუღებელია დისკრიმინაცია და სტიგმატიზაცია“. ვიდეო შეიქმნება ფსიქოლოგის მონაწილეობით. გამოქვეყნებამდე მოხდება მისი ტესტირება ფოკუს ჯგუფში. ვიდეო ითარგმნება სომხურ და აზერბაიჯანულ ენებზე და გავრცელდება ტელევიზიითა და ფეისბუქის საშუალებით“. სრულად... წყარო: ewmi-prolog.org

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ლელა რეხვიაშვილის ბლოგპოსტს: კორონა მხოლოდ დასაწყისია: საჭიროებების ეკონომიკა და სოლიდარობის ეკონომიკა. „პანდემიის პირობებში ცხადად ვხედავთ, რას ნიშნავს ეკონომიკა, რომელსაც შეუნელებელი ზრდა სჭირდება, და რას ნიშნავს ადამიანის ცხოვრება მაშინ, როცა ადამიანის გადარჩენა მხოლოდ და მხოლოდ მისი შრომის ბაზარზე გაყიდვაზეა დამოკიდებული. ვხედავთ, რა ადვილად ხდება მობილობის შეზღუდვა სისტემის კრიზისის მიზეზი. მაგრამ, კორონა მხოლოდ დასაწყისია. კორონავირუსი ის გამოწვევაა, რომელიც კლიმატის ცვლილებებით გამოწვეულ მოსალოდნელ კატასტროფებებზე ადრე გვეწვია. იმაზე რომ აღარაფერი ვთქვათ, რომ თავად კორონასვირუსის და მისი მსგავსი დაავადებების გავრცელება, ცხოველებში არსებული ვირუსების ადამიანზე გადასვლა, პირდაპირ უკავშირდება ბუნების ექსპლუატაციის არსებულ დაუნდობელ პრაქტიკას“. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს შეფასებას საგანგებო მდგომარეობასთან დაკავშირებით მიღებულ საკანონმდებლო ცვლილებებზე. „უპირველეს ყოვლისა, უნდა აღინიშნოს, რომ კანონპროექტთან დაკავშირებით ინფორმაცია 2020 წლის 17 მარტს გავრცელდა და ამავე დღეს დარეგისტრირდა პარლამენტში, თუმცა ის არ იყო საჯაროდ ხელმისაწვდომი 2020 წლის 13 აპრილამდე, სანამ პარლამენტის ბიურომ არ გადასცა განსახილველად შესაბამის კომიტეტს. ამ პერიოდში არ იყო უზრუნველყოფილი კანონპროექტის გაცნობა დაინტერესებული პირებისათვის და მასთან დაკავშირებით შესაბამისი შენიშვნების წარმოდგენის შესაძლებლობა. ასევე აღსანიშნავია ისიც, რომ კანონპროექტი განიხილა მხოლოდ იურიდიულ საკითხთა კომიტეტმა და მის განხილვაში მონაწილეობა არ მიუღია ადამიანის უფლებათა დაცვისა და სამოქალაქო ინტეგრაციის კომიტეტს, რომლის მონაწილეობა ამ პროცესში მნიშვნელოვანი იყო. შესაბამისად, საკანონმდებლო პროცესი წარიმართა დახურულად და არ ყოფილა მასში რაიმე ფორმით მონაწილეობის შესაძლებლობა“, ნათქვამია ორგანიზაციის შეფასებაში. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება „სახელმწიფო უსაფრთხოების სამსახურის“ ყოველწლიურ ანგარიშს. „ორგანიზაცია პრობლემურად მიიჩნევს დოკუმენტში მოყვანილ არაერთ მსჯელობას, რომელიც ხელს უწყობს კონკრეტული ჯგუფების მარგინალიზებას, აძლიერებს უსაფრთხოების და კონტროლის რიტორიკას არამხოლოდ ოკუპირებულ ტერიტორიებთან დაკავშირებით, არამედ ქვეყანაში არსებული ე.წ. ჰიბრიდულ საფრთხეებთან გასამკლავებლადაც. ამავდროულად, ანგარიში მხოლოდ ზედაპირულ და პოპულისტურ ინფორმაციას შეიცავს ოკუპაციის, კონტრტერორიზმის და სხვა სენსიტიურ საკითხებზე, რაც ფაქტობრივად შეუძლებელს ხდის როგორც პარლამენტის, ასევე საზოგადოების მიერ, უწყების საქმიანობის ეფექტიან ზედამხედველობასა და მონიტორინგს“, ნათვქამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზტდა იურისტთა ასოციაცია (საია) აქვეყნებს ორგანიზაციის იურიდიული განათლების ხელშეწყობის ფონდის ხელმძღვანელის, ნინო ბაღაშვილის ბლოგპოსტს: 21-ე საუკუნის მილერიტები. პოსტში საუბარი 1844 წლის 22 ოქტომრის მოვლენასა და 2020 წლის პანდემიის მსგავსებაზე. „ახლა, როცა 2020 წელია, საქართველოს მოსახლეობა თანამედროვე მილერიტებად ვიქეცით, ნაწინასწარმეტყველები პიკის ლოდინში ვცხოვრობთ შეუზღუდავი ძალაუფლების პირობებში და გაურკვეველი ვადით. მაშინ, 1844 წელს, სამყაროს აღსასრული რომ არ დადგა, უილიამ მილერმა თავის მიმდევრებს დაუტოვა „პატიება და თავდაცვა“, სადაც ის ბოდიშს იხდიდა და ამბობდა რომ შეცდა. სრულიად დარწმუნებული ვარ, რომ ბოდიშის მოხდა არც ჩვენთვის გაუჭირდებათ, მაგრამ ამით ნაკლებად რომ ეშველება საქმეს და უფრო მწვავე პრობლემები გვექნება, ვიდრე პანდემიაა, ეს უკვე ნათელია“. სრულად... წყარო: gyla.ge

თბილისი. საქართველოს ჟურნალისტური ეთიკის ქარტია აქვეყნებს გზამკვლევს: ეთიკური დილემები პანდემიის გაშუქებისას. „გზამკვლევის ეს ნაწილი ეთმობა იმ ეთიკურ დილემებს, რაც მედიას პანდემიის თემის გაშუქებისას შესაძლოა წარმოეშვას“. სრულად... წყარო: www.qartia.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ვასილ ჟიჟიაშვილის, საკონსტიტუციო სამართალწარმოების იურისტის ბლოგპოსტს: თავისუფლების ორი გაგება პანდემიის დროს. „სამყაროში მიმდინარე ცვალებადმა ფაქტობრივმა გარემოებებმა შესაძლოა სწრაფად გადააწყოს სოციალური საჭიროებები, კომპეტენტური პროფესიები და სხვა. მაგრამ, თუკი ჩვენ საკუთარ თავს დავაჯერებთ, რომ ყველა ფაქტობრივ რეალობაში არსებობს ვიღაც, ვინც წყვეტს რომელი ქცევაა სასარგებლო ჩვენთვის და ჩვენ მას ყოველ ჯერზე მივცემთ ლეგიტიმაციას ჩვენი სამოქმედო არეალი შემოფარგლოს სარგებლიანი ქცევის პრინციპით, ჩვენ უბრალოდ უარს ვიტყვით თავისუფლებაზე. ჩვენ ჩვენივე ხელით მივცემთ ვიღაცას ჩვენზე იძულების ძალაუფლებას“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) მოუწოდებს მთავრობას, 24 აპრილისთვის დაანონსებულ სოციალური დახმარების ანტიკრიზისულ გეგმაში გაითვალისწინოს სოციალური დაცვის მექანიზმების მიღმა დარჩენილი, ყველაზე მოწყვლადი, მათ შორის, ფორმალური სისტემებიდან გარიყული ადამიანების მრავალმხრივი საჭიროებები. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია (საია) ეხმიანება თბილისის ერთ-ერთ საკარანტინო ზონაში მოთავსებული პირების შემთხვევას, რომლებიც რამდენიმე დღეა უშედეგოდ ცდილობენ შესაბამის ადმინისტრაციულ ორგანოებთან დაკავშირებას და დასაბუთებული პასუხის მიღებას. შოთა და ირაკლი გურეშიძეები 14 აპრილს ჩამოფრინდნენ საქართველოში. რადგანაც მათ ჰქონდათ ისეთი საცხოვრებელი, რომელიც თვითიზოლაციისთვის აუცილებელ პირობებს აკმაყოფილებდა, მათ მოითხოვეს საცხოვრებელში გადასვლაზე ნებართვა, თუმცა დაუსაბუთებელი უარი მიიღეს. პირებმა პროტესტის ნიშნად არ მოაწერეს ხელი კარანტინში დარჩენასთან დაკავშირებულ თანხმობის დოკუმენტს, რის გამოც სამართალდამცავებმა 3000-3000 ლარით დააჯარიმეს. მომხდარის გამო, ირაკლი და შოთა გურეშიძეებმა შიმშილობა დაიწყეს, რომელიც 8 დღის შემდგომ, ჯანმრთელობის გაუარესების გამო შეწყვიტეს. მათ უკვე გაგზავნეს საჩივარი შესაბამის უწყებებში, თუმცა მოქალაქეებისთვის დღემდე უცნობია, რა შედეგი მოჰყვა წარდგენილ საჩივრებს. საია მოუწოდებს საქართველოს შინაგან საქმეთა სამინისტროსა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს საკითხის სპეციფიკის გათვალისწინებით 14-დღიანი საკარანტინო ვადის ამოწურვამდე უზრუნველყონ წარდგენილი ადმინისტრაციული საჩივრის განხილვა და შესაბამისი შედეგების თაობაზე განმცხადებლების ინფორმირება. სრულად... წყარო: gyla.ge

საქართველოს ახალგაზრდა იურისტთა ასოციაციამ გამოაქვეყნა კვლევა „გაეროს შეზღუდული შესაძლებლობის მქონე პირთა უფლებების კონვენციით (UNCRPD) დადგენილი სტანდარტები“. „საია-ს მიერ ჩატარებულმა კვლევამ გამოავლინა, რომ კონვენციის რატიფიცირებიდან 7 წლის შემდეგაც, შეზღუდული შესაძლებლობის მქონე პირები ჯერ კიდევ ვერ ახერხებენ საკუთარი უფლებების სათანადო რეალიზებას. სახელმწიფოს მხრიდან არ მომხდარა კონვენციით გათვალისწინებული სტანდარტების ასახვა ქართულ სამართლებრივ სისტემაში. შშმ პირთა უფლებების გაუმჯობესებისათვის სახელმწიფოს მიერ გადადგმული გარკვეული ნაბიჯების მიუხედავად, ისინი დღემდე აწყდებიან სისტემურ დაბრკოლებებს საზოგადოებრივი ცხოვრების თითქმის ყველა სფეროში. მათ არ აქვთ შესაძლებლობა, სხვების თანასწორად სრულყოფილად ისარგებლონ კონსტიტუციითა და საერთაშორისო ხელშეკრულებებით დაცული უფლებებით“, ნათქვამია ორგანიზაციის ვებგვერდზე. სრულად... წყარო: gyla.ge

კოალიცია „მედიის ადვოკატირებისათვის“ წევრი ორგანიზაციები, თვლიან, რომ აჭარის საზოგადოებრივ მაუწყებელში კვლავაც უწყვეტად გრძელდება თანამშრომელთა დევნა და შევიწროება მათი განსხვავებული მოსაზრებების გამო. „2020 წლის 21 აპრილს საზოგადოებრივი მაუწყებლის აჭარის ტელევიზიისა და რადიოს დირექტორმა გიორგი კოხრეიძემ საინფორმაციო გამოშვება „მთავარის“ ერთ-ერთი წამყვანი თეონა თურმანიძე ეთერიდან მოხსნა. როგორც თავად ჟურნალისტი ფეისბუქზე წერს, აღნიშნული გადაწყვეტილების მიზეზად სოციალურ ქსელში მაუწყებელთან დაკავშირებით მის მიერ დაფიქსირებული პოზიცია დაუსახელეს“, ნათქვამია განცხადებაში. სრულად... წყარო: კოალიციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: პანკისის ხეობა საპოლიციო სპეცოპერაციიდან 1 წლის შემდეგ. „პანკისის ხეობაში მასშტაბური საპოლიციო ღონისძიების ორგანიზების შემდეგ 1 წელი გავიდა, თუმცა, სახელმწიფოს არ გადაუდგამს სათანადო ნაბიჯები, რომელიც ნდობის და დემოკრატიული დიალოგის მშენებლობისკენ იქნებოდა მიმართული და თემში არსებულ სოციალურ უკმაყოფილებებს და წუხილებს რეალურად უპასუხებდა“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს უცნობი ავტორის თვალსაზრისს: ციცინათელების სასაფლაო. ანონიმი საუბრობს ქართულ-აფხაზურ ომზე, გალში გატარებულ ბავშვობაზე და იმ პრობლემებზე, რომლებიც იქ მცხოვრებ ადამიანებს აწუხებთ. „კიდევ ბევრი ისეთი რამის დაწერა და გაზიარება შეიძლება, რამაც ცოტათი მაინც შეიძლება დაგაფიქროთ იმაზე, რომ ამ ხალხის ყველაზე დიდი ტკივილი და პრობლემა „მივიწყებულობაა“. თქვენ არ იცით რამდენად მნიშვნელოვანი და იმედის მომცემია „გადაღმა“ მყოფი ხალხისთვის „გაღმა“ გადმოსვლა და „სამშვიდობოს“ ყოფნა. ეს „გაღმა“ სხვა სივრცეებისა და მასშტაბებისკენ ხსნის გზას. ეს „გაღმა“ არის იმედი, რომლის ცეცხლი „გადაღმა“ მყოფ ხალხს ნელ-ნელა უქრება“. სრულად... წყარო: emc.org.ge