თბილისი. საქართველოს ახალგაზრდა იურისტთა ასოციაციის (საია) ინფორმაციით, 20-21 ივნისის მოვლენების შედეგად დაშავებულებს პროკურატურა დაზარალებულის სტატუსს კვლავ არ ანიჭებს. „პროკურატურამ 2019 წლის 20-21 ივნისის მოვლენების შედეგად დაშავებულ 23 პირს, რომელთა ინტერესებს საია იცავს, დაზარალებულის სტატუსის მინიჭებაზე ისევ უარი უთხრა. პროკურატურის უარს საია სასამართლოში ასაჩივრებს და დაზარალებული პირებისათვის შესაბამისი სამართლებრივი სტატუსის მინიჭებას მოითხოვს. დაზარალებულის სტატუსის ოფიციალურად მინიჭების გარეშე, აღნიშნული პირები მოკლებულნი არიან შესაძლებლობას, ეფექტიანად იყვნენ ჩართულნი სამართალწარმოების პროცესში, გაეცნონ საქმის მასალებს და გააკონტროლონ, რამდენად ქმედითია ის ნაბიჯები, რასაც პროკურატურა საქმის დროული გამოძიებისათვის დგამს“, ნათქვამია ორგანიზაციის ვებგვერდზე. სრულად... წყარო: gyla.ge

„ახალი აზროვნების ინსტიტუტი“ იწყებს ინოვაციურ პროექტს. „მიუხედავად იმისა, რომ წლების განმავლობაში მრავალი სახელმწიფო და არასამთავრობო ორგანიზაცია ინფორმირების პროექტებს ახორციელებს, საქართველოში მაინც მწვავედ დგას ნაადრევი ქორწინების პრობლემა. ნაადრევი ქორწინების შედეგად ქალებს ხელი არ მიუწვდებათ განათლების და დასაქმების შესაძლებლობებზე. ბავშვის ასაკში ქორწინება მათ საზოგადოებრივ ცხოვრებაში ჩართულობასაც მნიშვნელოვნად აფერხებს. ზემოთ აღნიშნული პრობლემების მოსაგვარებლად, ახალი აზროვნების ინსტიტუტი მშობლებს სთავაზობს პროექტს „დედათა სკოლას“, რომელიც გააერთიანებს სოფ. სადახლოს, მოლაოღლსა და ხულდარაში მცხოვრებ მოხალისე 20 დედას, რომელთაც 10 თვის განმავლობაში ჩაუტარდებათ სემინარები და ტრენინგები სხვადასხვა საგანში, მათ შორის, სამოქალაქო განათლება, ქართული და ინგლისური ენა (ელემენტარული დონე), ბუნება, მათემატიკა, კომპიუტერული პროგრამები. პროექტის ფარგლებში ასევე განვახორციელებთ სოციალურ აქტივობებს, ვითანამშრომლებთ ადგილობრივ თვითმმართველობასთან და სკოლებთან. „დედათა სკოლის“ მონაწილეები უკვე შერჩულები არიან“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრის (EMC) ინფორმაციით, გაეროს შშმ პირთა უფლებების კომიტეტმა საქართველოში შშმ პირების უფლებრივი მდგომარეობის დეტალური შესწავლა დაიწყო. „კომიტეტმა განიხილა საქართველოს მთავრობის ანგარიში, EMC-ს, PHR-სა და სამოქალაქო საზოგადოების სხვა წევრების მიერ წარდგენილი მასალები და გამოაქვეყნა შეკითხვები (Lists of Issues). ამ დოკუმენტით კომიტეტი მთავრობისგან ითხოვს განახლებული და დაზუსტებული ინფორმაციის წარდგენას შშმ პირთა კონვენციის ყველა მუხლის დანერგვასთან დაკავშირებით. მნიშვნელოვანია აღინიშნოს, რომ კომიტეტის მიერ გამოქვეყნებულ შეკითხვებში ასახულია სამოქალაქო საზოგადოების მიერ პრობლემურად მიჩნეული საკითხები და სხვადასხვა დროს მომზადებული ალტერნატიული ანგარიშების შინაარსი“. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია აქვეყნებს პროექტის მოწვეული ექსპერტის ანა ჯაბაურის ბლოგპოსტს: საგამოძიებო კომისია საქართველოს პარლამენტში. „საქართველოში დროებითი საგამოძიებო კომისია (შემდგომში - კომისია) კონკრეტული საკითხის შესასწავლად იქმნება. იგი უმცირესობის მექანიზმად მიიჩნევა, ამიტომ აზრი დაეკარგება, თუ მის ასამოქმედებლად მაღალი კვორუმი დაწესდება. პარლამენტი კომისიის შექმნის საკითხზე გადაწყვეტილებას 50 ხმით იღებს (მოწინააღმდეგეთა ხმები მხედველობაში არ მიიღება). თუმცა, ეს უმრავლესობა მაღალია. უმჯობესია, რაოდენობა 1/5-მდე შემცირდეს“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აფასებს თბილისის სააპელაციო სასამართლოს მიერ დეკანოზ გიორგი მამალაძის მიმართ დადგენილი განაჩენის აღსრულების გადავადებაზე უარს. ორგანიზაცია მიიჩნევს, რომ სააპელაციო სასამართლომ თბილისის საქალაქო სასამართლოს მსგავსად კვლავ ფორმალური არგუმენტით თქვა უარი განაჩენის აღსრულების გადავადებაზე, სათანადოდ არ შეაფასა მნიშვნელოვანი ფაქტობრივი გარემოებები და მიიღო დაუსაბუთებელი გადაწყვეტილება. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) მოუწოდებს საქართველოს პარლამენტს არ დაუშვას კანონპროექტის დაჩქარებული წესით მიღება.  „საქართველოს პარლამენტი დაჩქარებული წესით განიხილავს „საზოგადოებრივი ჯანმრთელობის შესახებ“ კანონში შესატანი ცვლილების პროექტს. კანონპროექტი დაკავშირებულია ახალი კორონავირუსის (COVID-19-ის) გავრცელებით გამოწვეულ საფრთხეებთან და მისი მიღების შემთხვევაში, ქვეყნის შესაბამის უწყებებს შესაძლებლობა ექნებათ, რომ საგანგებო მდგომარეობის დასრულების შემდეგაც გააგრძელონ ორგანიზაციული, სამართლებრივი და სხვა სახის ღონისძიებების გატარება, რომელიც შექმნილი ვითარების გამკლავებისკენ იქნება მიმართული.  კანონპროექტი პარლამენტის ბიურომ 2020 წლის 19 მაისს განიხილა, ხოლო ქვეყანაში საგანგებო მდგომარეობა 22 მაისს უქმდება. ამ მიზეზით, ინიციატორი კანონპროექტის დაჩქარებული წესით განხილვას ითხოვს. ამგვარ ფორსირებულ რეჟიმში კანონპროექტის განხილვა ართულებს განსახილველ საკითხზე სრულყოფილი დისკუსიის წარმართვას და საზოგადოების სათანადო ჩართულობას და მონაწილეობას კანონპროექტის განხილვის პროცესში“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება „საზოგადოებრივი ჯანმრთელობის შესახებ“ კანონში დაგეგმილ ცვლილებებს და მიიჩნევს, რომ წარმოდგენილი კანონპროექტი ადამიანის უფლებების უხეში დარღვევის პირდაპირ და აშკარა რისკებს შეიცავს. „ინიციატივის კანონად ქცევა, აღმასრულებელი ხელისუფლების შესაბამის ორგანოებს ანიჭებს ორდინალურ ვითარებაში თითქმის იმავე ზომების გატარების უფლებას, რისი შესაძლებლობაც მას აქამდე მხოლოდ საგანგებო მდგომარეობის პირობებში ჰქონდა. საზოგადოებრივი ჯანმრთელობის შესახებ კანონის დღეს მოქმედ რედაქციას ბევრი ხარვეზი აქვს და ის ნამდვილად საჭიროებს გამოსწორებას, თუმცა არა აღმასრულებელი ხელისუფლების უკონტროლო ძალაუფლების საკანონმდებლო დონეზე განმტკიცების გზით. წარმოდგენილი ინიციატივა საგანგებო მდგოამრეობის ნორმალიზაციას ახდენს და ფაქტობრივად შეუზღუდავ ძალაუფლებას ანიჭებს აღმასრულებელ ხელისუფლებას, რადგან ზემოაღნიშნულ საკითხებზე გადაწყვეტილების მიღების პროცესზე მინიმალურ საპარლამენტო ან სასამართლო კონტროლსაც კი არ ითვალისწინებს კანონპროექტი“, ნათქვამია ორგანიზაციის განცხადებაში. სრულად... წყარო: emc.org.ge

თბილისი. საერთაშორისო გამვირვალობა - საქართველოს განცხადებით, საგანგებო მდგომარეობის გამოცხადების გარეშე შემზღუდავი ღონისძიებების განხორციელება არაკონსტიტუციურია. „პარლამენტში დარეგისტრირებული კანონპროექტის თანახმად, ადამიანის ზოგიერთი ძირითადი უფლებების შეზღუდვა საკარანტინო ღონისძიებების სახით საგანგებო მდგომარეობის გამოცხადების გარეშეც იქნება შესაძლებელი. შეზღუდვის გამოყენების წესსა და მასშტაბებს მთავრობა განსაზღვრავს. კანონის პროექტი წინააღმდეგობაშია საქართველოს კონსტიტუციასთან და მთავრობის მიერ ადამიანის იმ ძირითად უფლებათა შეზღუდვას ითვალისწინებს, რომლებიც კონსტიტუციის თანახმად, მხოლოდ საგანგებო მდგომარეობის დროს უნდა შეიზღუდოს და ისიც პარლამენტის გადაწყვეტილებით“, ნათქვამია განცხადებაში. სრულად... წყარო: transparency.ge

თბილისი. საქართველოს ახალგაზრდა იურისტთა ინფორმაციით, 13 მაისს საქართველოს პარლამენტს წარედგინა ჯანმრთელობის დაცვისა და სოციალურ საკითხთა კომიტეტის წევრების - დიმიტრი ხუნდაძის, ილია ნაკაშიძის, ვლადიმერ კახაძის, ზურაბ ხაჩიძის, კობა ნაკაიძის და დიმიტრი მხეიძის საკანონმდებლო ინიციატივა (N07-3/450) „საზოგადოებრივი ჯანმრთელობის შესახებ“ საქართველოს კანონში შესატან ცვლილებასთან დაკავშირებით. „მიგვაჩნია, რომ მართალია, ახალი კორონავირუსის გავრცელებასთან დაკავშირებით შესაბამისი რეგულაციების მიღება ემსახურება ლეგიტიმურ მიზანს, თუმცა საქართველოს მთავრობისთვის კანონპროექტში აღნიშნული უფლებების შეზღუდვის უფლებამოსილების გადაცემა არ შეესაბამება საქართველოს კონსტიტუციის სტანდარტს და ზემოაღნიშნული შეზღუდვები უნდა მოხდეს მხოლოდ კანონის შესაბამისად. აქვე აღსანიშნავია ისიც, რომ კანონპროექტი უშვებს მითითებულ უფლებათა შეზღუდვას არაპროპორციული მოცულობით და არ არის ორიენტირებული კონკრეტული შემთხვევიდან გამომდინარე აუცილებლობაზე“, ნათქვამია ორგანიზაციის განცხადებაში. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) გიორგი ცინცაძის პუბლიკაციას: ფინანსური ლანდშაფტი, ბუნებრივი კაპიტალი. „მოხმარებისა და წარმოების მოულოდნელი, მკვეთრი შემცირება, როგორსაც დღეს კორონავირუსის პანდემია განაპირობებს, ერთდროულად რამდენიმე ეკონომიკურ და ფინანსურ რყევას იწვევს: უმუშევრობა მკვეთრად იზრდება, საკრედიტო ვალდებულებების შესრულება მასიურად ეჭვქვეშ დგება, სახაზინო შემოსავლები მცირდება, ხარჯები კი მატულობს. ამ პირობებში გადაუდებელი აუცილებლობა ხდება კაპიტალის ინვესტირება, ეჭვქვეშ დამდგარ პროექტებში მოქცეული, მაღალ და გაუთვალისწინებელ რისკებთან პირისპირ დარჩენილი ფინანსების გადამისამართება ან მათი ახლებურად, გრძელვადიანი და მომგებიანი პროექტებით დაზღვევა. აშლილი ფინანსური კაპიტალისთვის სასიცოცხლოდ მნიშვნელოვანი ხდება ისეთი პროექტების დაგეგმვა, რომელიც მოგების დაგროვების ჰორიზონტს ხელახლა გააჩენდა და საკრედიტო სისტემისთვის აუცილებელ სამომავლო ბრუნვას უზრუნველყოფდა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის ინფორმაციით, დღეს, გიგა ოთხოზორიას მკვლელობიდან 4 წელი გავიდა. „გიგა 2016 წლის 19 მაისს აფხაზეთის საოკუპაციო ხაზთან, ხურჩა ნაბაკევის გამშვებ პუნქტთან მოკლეს ე.წ. აფხაზმა მესაზღვრეებმა. ოთხოზორიას სიცოცხლის უფლების დარღვევის საქმეს ადამიანის უფლებათა ევროპული სასამართლო განიხილავს. ოთხოზორიას ოჯახის წევრთა ინტერესებს საია და EHRAC იცავენ. ევროპულ სასამართლოში მხარეებს შორის შიდა კომუნიკაცია უკვე დასრულდა და გადაწყვეტილების გამოცხადებას ველოდებით“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს პოლიტიკის დოკუმენტს: დისკრიმინაციული მოტივით ჩადენილ დანაშაულებზე სისხლისსამართლებრივი დევნის პროცესში პროკურატურის წინაშე არსებული გამოწვევების შესახებ. „საქართველოშიც, 2018 – 2019 წლებში ერთ-ერთი ყველაზე გავრცელებული დანაშაული ოჯახში ძალადობა იყო. მსხვერპლთა მნიშვნელოვან სეგმენტს კი (88%) სწორედ ქალები წარმოადგენენ. სიძულვილით მოტივირებულ დანაშაულებთან დაკავშირებით, მართალია, 2018 წლისთვის სისხლისსამართლებრივი დევნის დაწყების მაჩვენებელი წინა წლებთან შედარებით გაზრდილია, თუმცა სამართალდამცველთა მხრიდან სიძულვილით მოტივირებულ შესაძლო დანაშაულთან დაკავშირებით პროკურატურის მიერ დაწყებული დევნის მაჩვენებელი კვლავ დაბალია. ამასთან, სიძულვილით მოტივირებული დანაშაულის მსხვერპლთა უმრავლესობა (სექსუალური უმცირესობები) მიუთითებს სამართალდამცველთა მხრიდან ძალადობის, არასათანადო რეაგირებისა და ჰომოფობიური მოპყრობის ფაქტებზე“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ანალიტიკურ დოკუმენტს საქართველოში მტაცებლური სესხების პრობლემასთან დაკავშირებით, რაც ხშირად უსახლკარობისა და ადამიანის უფლებების სხვა ტიპის დარღვევის მიზეზი ხდება. სრულად... წყარო: emc.org.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: რა სიახლეებს ითვალისწინებს შშმ პირთა დაცვის შესახებ ახალი კანონპროექტი. „კანონის პროექტში დადებითად უნდა შეფასდეს შემდეგი მნიშვნელოვანი სიახლეები: შშმ პირების ხელშეწყობა სამართალწარმოების განხორციელების პროცესში: შშმ პირს სახელმწიფო იურიდიული დახმარების მიღების შესაძლებლობა ექნება და ასევე იარსებებს სპეციალური მოსარჩელის ინსტიტუტი; კანონით განისაზღვრება გონივრული მისადაგებისა და უნივერსალური დიზაინის პრინციპები. მნიშვნელოვანია, რომ ნორმები, რომელიც შშმ პირთა უფლებების დაცვის გარანტიებს ითვალისწინებს, არ იყოს ბუნდოვანი და შეიცავდეს აღსრულების მექანიზმებს. ამ მიმართულებით რიგი საკითხები დახვეწასა და გაუმჯობესებას საჭიროებს...“ სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ლიკა ჯალაღანიას ბლოგპოსტს: 17 მაისი - დასასრული. „დღეს არსებულმა პანდემიის კრიზისმა, ადამიანის უფლებათა ზემოაღნიშნული დომინანტური დღის წესრიგის ხარვეზულობა თვალნათლივ წარმოაჩინა, განსაკუთრებული რისკის ქვეშ დააყენა რა ის ჯგუფები, რომელთა სოციალური პირობები ვერ აღმოჩნდა საკმარისი პანდემიის უმძიმეს პირობებს გამკლავებოდა და რომლებამდეც სახელმწიფოს მხრიდან არსებითად ხარვეზული ანტიკრიზისული გეგმით გათვალისწინებული უმცირესი დახმარებაც ვერ მივიდა. ამ კრიზისმა აჩვენა ადამიანთა რეალური წუხილები და საჭიროებები, რომელიც ლიბერალურ უფლებათა ენითა და ერთჯერადი სამოქმედო აქტივობებით იყო გადაფარული, რომელიც ემსახურებოდა სხვათა, თუმცა არა მოწყვლადი ჯგუფების, და მათ შორის, ლგბტქი ადამიანთა ინტერესებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია (საია) ეხმიანება ჰომოფობიის, ტრანსფობიის და ბიფობიის წინააღმდეგ ბრძოლის საერთაშორისო დღეს. „ლგბტქი თემი ერთ-ერთ ყველაზე გარიყულ ჯგუფს წარმოადგენს საქართველოში. COVID-19-ის პანდემიის შედეგად კიდევ უფრო მძიმეა მათი როგორც სოციალური ისე უფლებრივი მდგომარეობა მიუხედავად იმისა, რომ საქართველომ ბოლო წლების განმავლობაში სამართლებრივი დაცვის მექანიზმები გარკვეულ ასპექტებში გააუმჯობესა, კერძოდ 2014 წელს საქართველოს პარლამენტმა მიიღო კანონი „დისკრიმინაციის ყველა ფორმის აღმოფხვრის შესახებ“, მთელი რიგი საკითხების საკანონმდებლო მოწესრიგების საჭიროება კვლავაც აქტუალურია. განსაკუთრებული გამოწვევაა მოქმედი კანონმდებლობის პრაქტიკაში განხორციელების საკითხი. კერძოდ, პრობლემად რჩება სიძულვილის ენისა და სიძულვილით მოტივირებული დანაშაულების ეფექტიანი გამოძიება და ჩამდენ პირთა დასჯა. ასევე, ყურადღების მიღმა რჩება ჯანმრთელობის დაცვისა და სამოქალაქო აქტების რეგისტრაციის სფეროში არსებული პრობლემები“, ნათქვამია საია-ს განცხადებაში. სრულად... წყარო: gyla.ge

თბილისი. კოალიცია თანასწორობისთვის ეხმიანება ჰომოფობიის, ტრანსფობიის და ბიფობიის წინააღმდეგ ბრძოლის საერთაშორისო დღეს. „17 მაისი სხვადასხვა ქვეყანაში ლგბტქი თემის საჯარო სივრცეში შეკრებასა და მანიფესტაციასთან ერთად, თემის წინაშე არსებული სხვადასხვა საჭიროებების შესახებ საზოგადოებაში ინფორმაციის გასავრცელებლად არის მონიშნული. საქართველოში ლგბტქი სათემო და თემთან მომუშავე არასამთავრობო ორგანიზაციები წლიდან წლამდე ცდილობდნენ 17 მაისისთვის შეეძინათ მეტი შინაარსი და ეს დღე ექციათ თემის წინაშე არსებული გამოწვევების საილუსტრაციო დღედ. თუმცაღა მთელი რიგი წინააღმდეგობის პირობებში, ეს ვერ მოხერხდა და IDAHOT რჩება სახელმწიფოსა და საზოგადოების მხრიდან ჰომოფობიის მენიფესტაციის დღედ“, ნათქვამია განცხადებაში. სრულად... წყარო: emc.org.ge

თბილისი. ჩართულობის და განვითარების ცენტრის (CPD) ინფორმაციით, ვიტალი საფაროვი, გრეტა ტუნბერგი და ბერტა კასერასი, ჰააგაში, გამოყენებითი მეცნიერებების უნივერსიტეტის კედელზე დახატეს. „15-მეტრიანი მურალი პატივს მიგებს ყველას, ვინც თავისუფლების, თანასწორობის, სამართლიანობის, გარემოს დაცვის, სიმშვიდისა და უკეთესი მსოფლიოსთვის იბრძვის. ვიტალის დანახვა ამ შესანიშნავ მურალზე, თანაც ასე შორს ჩვენი ქალაქიდან, განსაკუთრებით მაშინ, როდესაც არ შეგვიძლია ჰააგაში ჩავიდეთ, ჩვენში წინააღმდეგობრივ ემოციებს აღვიძებს. ძალიან გვიხარია და ვამაყობთ, რომ ვიტალი, რომელმაც საკუთარი ცხოვრება სამართლიანობისა და თანასწორობისთვის ბრძოლას მიუძღვნა, რომელსაც მრავალფეროვნების, სოლიდარობისა და მიმღებლობისა და ადამიანების დახმარების სჯეროდა და რომელიც სიძულვილის წინააღმდეგ ბრძოლას შეეწირა კიდეც, იქცა იმედისა და შთამაგონებელი ცვლილებების სახედ, თუმცა, ამავე დროს მისი მონატრება საოცრად გვიტეხს გულს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს იურისტის დახმარებით, მოქალაქე ზურაბ დალაქიშვილმა საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტს დავა მოუგო. დეპარტამენტს მოქალაქის სამსახურში ადგენა და მისთვის კომპენსაციის სახით, 20 000 ლარის გადახდა დაევალა. სრულად... წყარო: ორგანიზაციის გვერდი სოციალურ ქსელში სამართალი

თბილისი. EMC ეხმიანება ფსიქიატრიული და სახელმწიფო ზრუნვის დაწესებულებების ბენეფიციარების უმძიმესი უფლებადარღვევების შემთხვევებს და სახელმწიფო უწყებებს დეინსტიტუციონალიზაციის პროცესის დაუყოვნებლივ წარმართვისკენ, ხოლო მის დასრულებამდე ინსტიტუციების ბენეფიციარების უფლებებისა და უსაფრთხოების ეფექტიანი დაცვისკენ მოუწოდებს. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის ინფორმაციით, გარდაცვლილი პაციენტის მშობელმა სამედიცინო დაწესებულებას სასამართლო დავა მოუგო. „საქართველოს უზენაესმა სასამართლომ ძალაში დატოვა თბილისის სააპელაციო სასამართლოს გადაწყვეტილება, რომლითაც სამედიცინო დაწესებულებას პაციენტის მშობლის სასარგებლოდ მორალური ზიანის სახით 5000 ლარის, ხოლო მატერიალური ზიანისათვის 10 000 ლარის (დაკრძალვის ხარჯები) გადახდა დაეკისრა. მოსარჩელის ინტერესებს სასამართლოში საია იცავდა“. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრმა (EMC) აჭარის საზოგადოებრივი მაუწყებლიდან უკანონოდ გათავისუფლებული თანამშრომლების სახელით მიმართა შინაგან საქმეთა სამინისტროსა და გენერალურ პროკურატურას აჭარის მაუწყებლის დირექტორის გიორგი კოხრეიძის მიმართ გამოძიებისა და სისხლისსამართლებრივი დევნის დაწყების მოთხოვნით. „სამართალდამცავი ორგანოების წინაშე წარდგენილ ვრცელ მიმოხილვაში EMC უთითებს, მათ შორის, საერთაშორისო ორგანიზაციების (ეუთო, ევროპის საბჭო, რეპორტერები საზღვრებს გარეშე), საქართველოს სახალხო დამცველისა და ადამიანის უფლებებზე მომუშავე ადგილობრივი ორგანიზაციების შეფასებებს, რომლებიც ღიად მსჯელობენ მაუწყებლის სარედაქციო პოლიტიკაში ჩარევის, ჟურნალისტების დევნისა და კონტროლის პრაქტიკებზე“, ნათქვამია ორგანიზაციის ვებგვერდზე. სრულად... წყარო: emc.org.ge