თბილისი. გაეცანით საჯარო მმართველობის რეფორმის 2019-2020 წლების სამოქმედო გეგმის შესრულების მონიტორინგის შუალედური ალტერნატიული ანგარიშს. 23 დეკემბერს, ინფორმაციის თავისუფლების განვითარების ინსტიტუტმა (IDFI) საქართველოს ახალგაზრდა იურისტთა ასოციაციასთან (GYLA) ერთად საჯარო მმართველობის რეფორმის (PAR) სამოქმედო გეგმის შესრულების 2020 წლის პირველი ექვსი თვის მონიტორინგის ალტერნატიული ანგარიშის შედეგები წარადგინა. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაციამ პარლამენტს მოქალაქეთა პოლიტიკური გაერთიანებების კანონის ცვლილებაზე დასკვნა წარუდგინა. „მმართველი გუნდის მიერ ინიცირებული პროექტის მიხედვით პარტიებისთვის სახელმწიფო დაფინანსების ჩამორთმევა ორგანიზაციის მიერ აღიქმება, როგორც ხელისუფლების მხრიდან ოპოზიციისთვის განკუთვნილი თვითნებური სასჯელი. საია მოუწოდებს პარლამენტს მხედველობაში მიიღოს პარტიათა სახელმწიფო დაფინანსების მიზნები, დანიშნულება, არ დაუშვას პოლიტიკური პარტიების არაპროპორციულად შემზღუდველი, დაუსაბუთებელი ნორმების გაჩენა კანონმდებლობაში და არ მიიღოს წარმოდგენილი კანონპროექტი“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. რონდელის ფონდმა, ფრიდრიხ ებერტის ფონდის მხარდაჭერით, ჩაატარა კვლევა - „ანტიპანდემიური შეზღუდვების და მთავრობის ანტიკრიზისული ღონისძიებების გავლენა დასაქმებაზე, შემოსავლებსა და სიღარიბის დონეზე საქართველოში“. კვლევაში განხილულია პანდემიური ეკონომიკური კრიზისის თავისებურებანი საქართველოში. სიმულაციური ანალიზის საფუძველზე მომზადდა ანტიპანდემიური შეზღუდვებისა და მთავრობისა ანტიკრიზისული ღონისძიებების მოსალოდნელი გავლენის შეფასება დასაქმებაზე, შემოსავლებსა და სიღარიბის დონეზე 2020-2021 წლების პერიოდში. იხილეთ სრული კვლევა ბმულზე... წყარო: www.gfsis.org

თბილისი. EMC მიიჩნევს, რომ ანტიკრიზისული პროგრამების მეორე ტალღის მოკლევადიანი და გრძელვადიანი ეფექტები კითხვის ნიშნებს აჩენს. ადამიანის უფლებების სწავლებისა და მონიტორინგის ცენტრის (EMC) აზრით, ახალი ანტიკრიზისული პროგრამების დაფარვა და მათი გრძელვადიანი გავლენა, მათ შორის თუ როგორ გადანაწილდება ახალი საკრედიტო ვალდებულებები ბიუჯეტის სამომავლო ხარჯებში, ბევრ კითხვის ნიშანს აჩენს. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტმა (IDFI) მიმოიხილა ენერგეტიკის სექტორის მიმდინარე განვითარება და არსებული გამოწვევები, 2020 წლის ნოემბრის მდგომარეობით. „IDFI სექტორში მიმდინარე ტენდენციებს პერიოდულად მიმოიხილავს, ვინაიდან ენერგეტიკის სექტორი ქვეყნისათვის სტრატეგიულად მნიშვნელოვანი სექტორია, რომელიც ზეგავლენას ახდენს მოსახლეობის ეკონომიკურ მდგომარეობაზე. ასევე, ენერგოდამოუკიდებლობა საქართველოს დამოუკიდებლობის დღიდან ქვეყნისთვის მნიშვნელოვან გამოწვევად და ამავდროულად შესაძლებლობად რჩება“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. „საერთაშორისო გამჭვირვალობა - საქართველო”-ს საპარლამენტო მონიტორინგის პროექტის ფარგლებში წარმოდგენილი კვლევა მოიცავს IX მოწვევის პარლამენტის მიერ (საანგარიშო პერიოდი: 2017 წლის 5 იანვარი - 2020 წლის 30 სექტემბერი) გენდერული თანასწორობის მიმართულებით, განხორციელებულ საქმიანობას, რომლის ფარგლებშიც გაანალიზებულია პარლამენტის აქტივობები საკანონმდებლო და კონტროლის განხორციელების მხრივ. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) კრიტიკულად აფასებს მთავრობის მიერ არადომინანტური რელიგიური ორგანიზაციებისგან სასულიერო პირებისა და მრევლის სიების მოთხოვნას. ორგანიზაციის შეფასებით, ამ გადაწყვეტილებით, სახელმწიფო ფაქტობრივად აიძულებს ადამიანებს გაამჟღავნონ საკუთარი რელიგიური კუთვნილება. „ასევე, სახელმწიფო მოიპოვებს წვდომას სასულიერო პირების და მრევლის რაოდენობაზე, მათ საცხოვრებელზე. იმ ვითარებაში, როდესაც რელიგიის საკითხთა სახელმწიფო სააგენტოს მიმართ რელიგიური ორგანიზაციების და თემების ნდობა ძალიან დაბალია და ის უსაფრთხოების სამსახურებთან დაკავშირებულ უწყებად განიხილება, პრობლემურია, რომ მთავრობა ისევ კონტროლის ტექნიკით და მეთოდებით ცდილობს რელიგიურ ორგანიზაციებთან კომუნიკაციას და მათ ავტონომიაში ჩარევას“. სრულად... წყარო: emc.org.ge

თბილისი. „საერთაშორისო გამჭვირვალობა - საქართველო“ აფასებს, თუ როგორ შეასრულა თავისი მაკონტროლებელი ფუნქცია აჭარის ავტონომიური რესპუბლიკის უმაღლესმა საბჭომ 2016-2020 წლებში - კერძოდ კი, საბჭომ 9 მექანიზმიდან 4 არ გამოიყენა. ანგარიში მოიცავს საკვლევ პერიოდს 2016 წლის ნოემბრიდან 2020 წლის 11 სექტემბრის ჩათვლით. კვლევის მიზანია აჭარის მთავრობის კონტროლის მექანიზმების ანალიზი. სრულად... წყარო: transparency.ge

თბილისი. ამერიკის შეერთებული შტატების საერთაშორისო განვითარების სააგენტო (USAID) განცხადებას ავრცელებს და მიესალმება „სამართლიანი არჩევნების“ (ISFED) გადაწყვეტილებას - ISFED-მა საკუთარი ინიციატივით გადაამოწმა პარალელური დათვლის (PVT) შედეგები, აუდიტის დასკვნა კი საზოგადოებას გააცნო. „ISFED პროფესიონალური და ღირსეული რეპუტაციის მქონე სამოქალაქო საზოგადოების ორგანიზაციაა, რომელიც ყოველთვის პასუხისმგებელია გამჭირვალე ინფორმაციის უზრუნველყოფაზე, საკუთარ მონაცემთა ხარისხის კონტროლსა და შედეგების სიზუსტეზე PVT-ის ჩატარების საერთაშორისოდ აღიარებული საუკეთესო პრატიკის შესაბამისად. მხარს ვუჭერთ არჩევნების მონიტორინგში ჩართული ყველა ორგანიზაციის გამჭვირვალე მუშაობას და ვაფასებთ ISFED-ის მიერ არჩევნების შემდგომ რთულ გარემოში განხორციელებულ საქმიანობას“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) მონაწილეობა მიიღო ევროპის უსაფრთხოებისა და თანამშრომლობის ორგანიზაციის (ეუთო) მიერ ორგანიზებულ ვებინარში.  „ღონისძიება წარმოდგენდა პლატფორმას დაინტერესებულ პირებს შორის დისკუსიის წარმართვისთვის თემაზე: ღია მონაცემების მნიშვნელობა კარგი მმართველობის წახალისებისთვის სახელმწიფო შესყიდვებში. ღონისძიების ფარგლებში IDFI-მ საქართველოს სახელმწიფო შესყიდვების სისტემა და ღია მონაცემების მიმართულებით არსებული გამოწვევები განიხილა”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებათა ცენტრმა სავარაუდოდ პოლიტიკურად მოტივირებული საქმეების მონიტორინგთან დაკავშირებული ანალიტიკური დოკუმენტების კრებული გამოაქვეყნა. კრებული 2020 წლის განმავლობაში მომზადებულ 6 ანალიტიკურ დოკუმენტს აერთიანებს: გიორგის უგულავას წინააღმდეგ მიმდინარე სისხლის სამართლის საქმეების შეფასება;  2019 წლის 20-21 ივნისის მოვლენებთან დაკავშირებული სისხლის სამართლის საქმეების სამართლებრივი ანალიზი; ირაკლი ოქრუაშვილის წინააღმდეგ მიმდინარე სისხლის სამართლის საქმეების სამართლებრივი შეფასება; გიორგი რურუას სისხლის სამართლის საქმის სამართლებრივი ანალიზი; ნიკა გვარამიას წინააღმდეგ მიმდინარე სისხლის სამართლის საქმის სამართლებრივი შეფასება; დისტანციურ სამართალწარმოებასთან დაკავშირებული პრობლემები კორონავირუსის პანდემიისა და საგანგებო მდგომარეობის პირობებში.  იხილეთ კრებული სრულად...  წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველოს” სამოქალაქო საბჭოების წევრებმა ყვარელში, გურჯაანში, ახმეტაში, ოზურგეთში, გორსა და გარდაბანში 30-მდე ინფრასტრუქტული პრობლემა საჭიროება გამოავლინეს. ორგანიზაცია იმედოვნებს, ადგილობრივი თვითმმართველობები მოქალაქეთა იდენტიფიცირებულ საჭიროებებს 2021 წლის ბიუჯეტის პროექტში მაქსიმალურად ასახავენ. „სასმელი და სარწყავი წყლის მიწოდება, შიდა გზებისა და სანიაღვრე არხების მოწესრიგება, მეწყერსაშიში ზონების გამაგრება, გარე განათებების დამონტაჟება, საბავშვო ბაღებისა და სპორტული ინფრასტრუქტურის გამართვა, ინტერნეტზე ხელმისაწვდომობა, კულტურული მემკვიდრეობის ძეგლების მოვლა, - ეს იმ საჭიროებების არასრული სიაა, რომელთა მოგვარების მიზნით ორგანიზაციამ მუნიციპალიტეტებს უკვე მიმართა“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს კვლევის ანგარიშს: შრომითი ურთიერთობები და სოციალური დაცვა პანდემიის დროს. „საქართველოს მოსახლეობა უკიდურესად მოუმზადებელი შეხვდა პანდემიის მიერ გამოწვეულ ეკონომიკურ კრიზისს. პანდემიის პირობებში სახელმწიფო პოლიტიკა და ინსტიტუტები მზად არ იყო დაზარალებული ადამიანებისა და ოჯახებისთვის სისტემური სოციალური მხარდაჭერის აღმოსაჩენად. სახელმწიფო დონეზე შემუშავებული ანტიკრიზისული სოციალური პოლიტიკა კი, საკმარისი არ იყო საგრძნობლად შემცირებული შემოსავლით თუ უშემოსავლოდ დარჩენილი ადამიანებისთვის სოციალური უსაფრთხოება უზრუნველეყო“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: არის თუ არა საქართველო მიტაცებული სახელმწიფო. „ქართული არასამთავრობო ორგანიზაციები წლების განმავლობაში საუბრობდნენ საქართველოში არაფორმალური მმართველობის პრობლემაზე. 2018 წელს ეს შეფასება კიდევ უფრო დამძიმდა, როდესაც უკვე საერთაშორისო დონეზე დაიწყო დისკუსია ქვეყანაში დემოკრატიულ უკუსვლასა და სახელმწიფოს მიტაცების ნიშნების არსებობაზე. „ქართული ოცნების“ მმართველობის ორი ვადის გასვლის თავზე დაგროვილი მტკიცებულებები საკმარისია იმის სათქმელად, რომ კორუფციამ საქართველოში სახელმწიფოს მიტაცების ფორმა მიიღო“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტმა (IDFI) საქართველოს 2021 წლის ბიუჯეტის კანონპროექტი მიმოიხილა და შესაბამისი მიგნებების შესახებ ინფორმაცია გამოაქვეყნა. „იმ პირობებში, როდესაც მოსალოდნელია, რომ ეკონომიკა შემცირდეს -6%-ით და აღნიშნული შემცირება 1990-იანი წლების შემდეგ არ ყოფილა ისტორიულად ასეთ მინიმალურ მაჩვენებელზე (2008 წლის ომის პირობებშიც კი), განსაკუთრებით მნიშვნელოვანია, თუ რამდენად ადეკვატური და მოქნილი იქნება ხელისუფლების ნაბიჯები მოსახლეობის სოციალური მხარდაჭერის ნაწილში“. კვლევის ძირითადი მიგნებებია: ბიუჯეტში საგადასახადო შემოსავლების დანაკლისის მაღალი რისკი, სახელმწიფო ვალის ზრდა, სახელმწიფო მმართველობის ხარჯების ზრდა, სოციალური დანახარჯების მაღალი მაჩვენებელი... სრულად... წყარო: idfi.ge

თბილისი. საერთაშორისო გამჭვირვალობა - საქართველო გვიხსნის თუ როგორ პარლამენტს მივიღებთ, თუკი საპარლამენტო ოპოზიცია უარს იტყვის შესვლაზე და საკანონდებლო ორგანო მხოლოდ „ქართული ოცნების” 90 დეპუტატით იქნება წარმოდგენილი. „საქართველო, კონსტიტუციის უკანასკნელი ცვლილებების თანახმად, საპარლამენტო რესპუბლიკაა და შესაბამისად, პარლამენტის გამართული ფუნქციონირება საკვანძო მნიშვნელობისაა ქვეყნის განვითარებისათვის. პარლამენტი ხალხის წარმომადგენლობითი ორგანოა, ის საქართველოს მოსახლეობის არჩევანსა და მის ნებას უნდა გამოხატავდეს. ერთპარტიული პარლამენტი ვერ შეასრულებს წარმომადგენლობითი ორგანოს ფუნქციას, ვერ შეძლებს გამართულად ფუნქციონირებას და მთავრობის კონტროლს. პარლამენტის თანამდებობები სრულად ვერ დაკომპლექტდება და ბევრ გადაწყვეტილებას პარლამენტი ვერ მიიღებს ხმათა არასაკმარისი რაოდენობის გამო. ოთხმოცდაათი წევრით წარმოდგენილი პარლამენტი ვერ მიიღებს ისეთ გადაწყვეტილებებს, რომელთა მიღებასაც 100 ან 113 ხმა ჭირდება და ძალიან გართულდება 90 ხმის მობილიზებაც. ასეთი გადაწყვეტილება კი არაერთია“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საქართველოს დემოკრატიული ინიციატივა წარმოგიდგენთ ანგარიშს, რომლის მიზანია 2020 წელს საქართველოში ადამიანის უფლებათა და თავისუფლებათა დაცვის მდგომარეობის მხრივ არსებული პრობლემებისა და გამოწვევების მოკლე მიმოხილვა. „დოკუმენტში განხილულია როგორც სამოქალაქო და პოლიტიკურ უფლებებთან, ასევე - კანონის უზენაესობასთან დაკავშირებული საკითხები. ქვეყანაში როგორც კონკრეტული კონსტიტუციური უფლებების, ასევე - კანონის უზენაესობის დაცვის ხარისხის ინდიკატორს უპირველესად ინდივიდუალური საქმეები და მოვლენები წარმოადგენს, რომლებშიც ჩანს ხელისუფლების, ერთი მხრივ, ნება და, მეორე მხრივ, უნარი, შეასრულოს კონსტიტუციით ნაკისრი ვალდებულებები. დოკუმენტის დიდი ნაწილი სწორედ ინდივიდუალური საქმეების/მოვლენების მიმოხილვას ეთმობა“, ნათქვამია ორგანიზაციის ვებგვერდზე. სრულად... წყარო: gdi.ge

თბილისი. TI - საქართველოს ინფორმაციით, „სახელმწიფო თავდაცვის ანტიკორუფციული ინდექსის“ (GDI) 2020 წლის კვლევის მიხედვით, საქართველოს 60 ქულა აქვს, რითიც თავდაცვის სფეროში „კორუფციის საშუალო რისკის კატეგორიაში“ ხვდება. „საერთაშორისო გამჭვირვალობა - თავდაცვა და უსაფრთხოების“ მიერ გამოქვეყნებული კვლევის ავტორები საქართველოს შემთხვევაში 5 ძირითად კომპონენტს გამოყოფენ, სადაც ნაკლოვანებები არსებობს და საჭიროა გაუმჯობესება, რათა საქართველოს თავდაცვის სისტემაში შემცირდეს კორუფციის რისკი: სუსტი ანტიკორუფციული მექანიზმები; სუსტი საპარლამენტო ზედამხედველობა; ბიუჯეტის არასაკმარისი გამჭვირვალობა; შესყიდვების გაუმჭვირვალე პროცედურების გამოყენება; მამხილებელთა არასათანადო დაცვა; სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 9 დეკემბერს, კორუფციის წინააღმდეგ ბრძოლის საერთაშორისო დღე აღინიშნება. ეს დღე მნიშვნელოვანია კორუფციის თვალსაზრისით არსებული გამოწვევების შესახებ ცნობიერების ამაღლებისა და არსებული ხარვეზების აღმოფხვრისთვის ეფექტიანი ღონისძიებების დაგეგმვისთვის. ორგანიზაციის მნიშვნელოვანი ძალისხმევა ანტიკორუფციული მიმართულებით ცნობიერების ამაღლებას უკავშირდება. გაეცანით დეტალურად ორგანიზაციის მიერ განხორციელებულ აქტივობებს... წყარო: idfi.ge

თბილისი. საქართველოს ახალგაზრდა იურისტთა ასოციაციის შეფასებით, წლის განმავლობაში პრობლემურ თემებს შორის იყო საქართველოს პარლამენტის მიერ საკარანტინო ღონისძიებების განსაზღვრის უფლებამოსილების საქართველოს მთავრობაზე დელეგირება, მთელი რიგი მოწყვლადი ჯგუფების მთავრობის ანტიკრიზისული გეგმის მიღმა დატოვება. გარემოსდაცვით გადაწყვეტილებებში ადამიანის უფლებების გაუთვალისწინებლობა, საკონსტიტუციო სასამართლოს მოსამართლეების მიერ თანამდებობის გაუმჭვირვალე და დაუბალანსებელი პროცედურებით დაკავება, სისხლის სამართლის პროცესების საჯაროობის კუთხით არსებული პრობლემები, 2020 წლის საპარლამენტო არჩევნების დარღვევებით ჩატარება და სხვა საკითხები. ორგანიზაცია დადებითად აფასებს საქართველოს შრომის კოდექსში შესულ ცვლილებებს, რომლითაც გარკვეულწილად გაუმჯობესდა დასაქმებულთა შრომითი უფლებები. სრულად... წყარო: gyla.ge

თბილისი. კორუფციასთან ბრძოლის საერთაშორისო დღესთან დაკავშირებით საერთაშორისო გამჭვირვალობა - საქართველო განცხადებას ავრცელებს. „მართალია საქართველოში კვლავ იშვიათია წვრილმანი კორუფციის შემთხვევები, მაგრამ გადაუჭრელ პრობლემად რჩება მაღალი დონის კორუფცია, რაც ქვეყნის განვითარების შემაფერხებელი მნიშვნელოვანი ფაქტორია. ...როგორც გასულ წლებში, საქართველოს ხელისუფლებას არც 2020 წელს გადაუდგამს სათანადო ნაბიჯები ქვეყნის ანტიკორუფციული სისტემის, კანონმდებლობისა და პოლიტიკის ხარვეზების აღმოსაფხვრელად“. ორგანიზაცია მუწოდებს ხელისუფლებას, ქმედითი ნაბიჯები გადადგას ოპოზიციის როლის გასაძლიერებლად, სასამართლო სისტემის რეფორმირებისკენ, პროკურატურის დამოუკიდებლობის უზრუნველსაყოფად... სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) უკვე ჩატარებული კვლევების შეჯამებით ანგარიშს აქვეყნებს: COVID-19-ის პერიოდში განხორციელებული სახელმწიფო შესყიდვები. „გაანალიზებული მონაცემებით ჩანს, რომ თანხების უდიდესი ნაწილი იხარჯება კოვიდსასტუმროებისა და კლინიკების მობილიზებაზე. ამ მიზნობრიობით შესყიდვების უდიდესი ნაწილი ხორციელდება გამარტივებული წესით. ამასთან, აღსანიშნავია, რომ Covid-19-თან დაკავშირებული ზოგიერთი მომსახურების შესყიდვა ნაწილობრივ უბრუნდება ელექტრონული ტენდერის ფორმატს, რაც მისასალმებელია, თუმცა ასეთი შემთხვევები არ არის ბევრი. ვთვლით, რომ ისეთი მომსახურების შესყიდვები, რომელიც უკვე აპრობირებულია და მათი საჭიროების შესახებ წინასწარი ცოდნა არსებობს, შესაძლებელია განხორციელდეს ელექტრონული ტენდერის მეშვეობით, რათა მოხდეს მეტი კონკურენციის უზრუნველყოფა“, ნათქვამია ორგანიზაციის დასკვნაში. სრულად... წყარო: idfi.ge