თბილისი. საქართველოს ახალგაზრდა იურისტთა ასოციაციის ინფორმაციით, 7 დეკემბერს კომუნიკაციების ეროვნულმა კომისიამ გაავრცელა განცხადება და მაუწყებლებს მოუწოდა, ეთერში არ განათავსონ უხამსობის შემცველი პროგრამები, წინააღმდეგ შემთხვევაში, გამოიყენებს კანონმდებლობით მინიჭებულ უფლებამოსილებას. „მიგვაჩნია, რომ კომისია მოქალაქეთა უფლებების დაცვის საფარველს ამოფარებული, ცდილობს მაუწყებლების რეგულირებას, რომლის უფლებამოსილებაც მას კანონით არ გააჩნია. კომისია განცხადებაში აღნიშნავს, რომ უხამსობის შემცველ პროგრამაზე შესაძლებელია სასამართლოს კონტროლის განხორციელება და რადგანაც მისი გადაწყვეტილება გადის სასამართლოს კონტროლს, მას ასევე აქვს ასეთი პროგრამის შინაარსობრივი რეგულირების უფლებამოსილება. კომისიის აღნიშნული მსჯელობა არ გამომდინარეობს არც „მაუწყებლობის შესახებ“ კანონიდან და არც საკონსტიტუციო სასამართლოს იმ გადაწყვეტილებიდან, რომლითაც დაიშვა სასამართლოს კონტროლი უხამსობის შემცველ პროგრამაზე“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. გაეცანით „საერთაშორისო გამჭირვალობა-საქართველოს“ კვლევას საქართველოს პარლამენტის ღიაობისა და გამჭვირვალობის შესახებ 2015-2020 წლებში. კვლევაში შეფასებულია საქართველოს პარლამენტის მიღწევები და გამოწვევები ღიაობისა და გამჭვირვალობის მიმართულებით ღია პარლამენტის შესახებ დეკლარაციის ხელმოწერის დღიდან დღემდე (30 აპრილი, 2015 - 31 ოქტომბერი, 2020). „მიუხედავად იმისა, რომ პარლამენტმა გადადგა მნიშვნელოვანი ნაბიჯები გამჭვირვალობის გაუმჯობესებისათვის, კვლავ რჩება არაერთი გამოწვევა, რაც უკავშირდება საპარლამენტო ინფორმაციის ხელმისაწვდომობას, მოქალაქეთა ჩართულობასა და პარლამენტის საქმიანობის ღიაობას“. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტმა (IDFI), საერთაშორისო მკვლევრებთან ერთად, 2019-2020 წლებში განახორციელა პროექტი - „სახელმწიფო არქივების ღიაობის შეფასება ყოფილ საბჭოთა რესპუბლიკებში და აღმოსავლეთის ბლოკის ქვეყნებში“. კვლევამ გამოავლინა რეგიონის 18 ქვეყნის სახელმწიფო არქივების გამჭვირვალობის რეიტინგი და ასევე საკმაოდ საინტერესო მიგნებები და სპეციფიკა, რომლებიც ამა თუ იმ ქვეყანაში სახელმწიფო არქივებს გააჩნიათ. „COVID-19-ით გამოწვეულმა რეალობამ განსაკუთრებით თვალსაჩინოდ წარმოაჩინა არქივების ვებგვერდების გამართული ფუნქციონირებისა და მომხმარებლებთან ონლაინ კომუნიკაციის მნიშვნელობა, რაც მოცემული კვლევითაც დასტურდება. მაშინ, როდესაც ადამიანებს მთელი მსოფლიოს მასშტაბით მოუწიათ სახლში ყოფნა და დისტანციურად მუშაობა, ისტორიკოსებისა და მკვლევრებისთვის საარქივო დოკუმენტებზე წვდომის ერთადერთი საშუალება გახდა ინტერნეტი, არქივების ვებგვერდი, იქ განთავსებული ფონდები და ელექტრონული მონაცემთა ბაზები“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. კელი დეგნანი - ამერიკის ელჩი საქართველოში საერთაშორისო გამჭვირვალობა-საქართველოს არჩევნების პროცესში შეტანილი წვლილისთვის მადლობას უხდის. „საერთაშორისო სტანდარტებთან შესაბამისობისკენ მიმართული თქვენი ძალისხმევა ხელს შეუწყობს ისეთი საარჩევნო პროცესის ჩამოყალიბებას, რომელიც ნდობით ისარგებლებს ქართველ ამომრჩევლებს შორის. გულითად მადლობას გიხდით ამ რთული და სასიცოცხლოდ მნიშვნელოვანი საქმიანობის ასეთი თავდადებით და პროფესიონალიზმით განხორციელებისთვის“, წერს ელჩი.  სრულად... წყარო: ორგანიზაციის გვერდი სოციალურ ქსელში

სამეგრელო. საერთაშორისო გამჭვირვალობა - საქართველოს ინფორმაციით, ფოთის მერის გოჩა კურდღელიას ბიზნესპარტნიორისა და მეგობრის რამაზ გუჯაბიძის წილობრივ მფლობელობაში არსებულმა კომპანიამ სახელმწიფო შესყიდვებიდან 2012 წლიდან დღემდე 306 205 ლარი მიიღო. „კომპანია „ხალიბთან” 2012 წლიდან დღემდე 671 გამარტივებული შესყიდვა გაფორმდა 373 შესყიდვა ფოთის მერიის იურიდიულ პირებთან გაფორმდა - 310 ხელშეკრულება გოჩა კურდღელიას მერობის პერიოდზე მოდის რამაზ გუჯაბიძეს სხვადასხვა დროს მმართველი პარტიების ყულაბაში 183 000 ლარი აქვს შეტანილი“, ნათქვამია საერთაშორისო გამჭვირვალობა - საქართველოს ბლოგპოსტში.  ორგანიზაცია მოუწოდებს ანტიკორუფციულ სააგენტოს, შეისწავლოს თითოეული შესყიდვა და დაადგინოს, შეიცავს თუ არა კორუფციის შესაძლო ნიშნებს. სრულად... წყარო: transparency.ge

სამეგრელო. 2-3 დეკემბერს, ინფორმაციის თავისუფლების განვითარების ინსტიტუტმა (IDFI) ზუგდიდის მერიისა და მერიის დაქვემდებარებაში მყოფი იურიდიული პირების თანამშრომლებისთვის გამჭვირვალობის, ანგარიშვალდებულებისა და კეთილსინდისიერების საკითხებზე ონლაინ ტრენინგი ჩაატარა. „ტრენინგი მიზნად ისახავდა საჯარო მოხელეთა ცნობიერების ამაღლებას, აგრეთვე, ანტიკორუფციული მექანიზმების მიმართულებით მათი შესაძლებლობების გაძლიერებას. აღსანიშნავია, რომ ტრენინგს წინ უსწრებდა მერიაში არსებული სიტუაციის ყოვლისმომცველი ანალიზის მომზადება, შემდგომ კი ზუგდიდის მერიის გამჭვირვალობისა და კეთილსინდისიერების ამაღლების სტრატეგიისა და სამოქმედო გეგმის შემუშავება...“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, Trace International-მა 19 ნოემბერს ბიზნესში კორუფციის რისკის შესახებ ახალი მაჩვენებლები გამოაქვეყნა.  „2020 წლის მონაცემების მიხედვით საქართველო 194 ქვეყანას შორის 28-ე ადგილზეა ბიზნესის კორუფციის რისკის 25 ქულით. 2019 წლის მონაცემებით 200 ქვეყანას შორის საქართველო 27-ე ადგილს იკავებდა 26 ქულით, რაც 2018 წლის მაჩვენებლების იდენტურია და გაუარესებულია 2017 წლის მონაცემებთან შედარებით, როცა საქართველო 200 ქვეყანას შორის 25-ე ადგილს იკავებდა 23 ქულით. ამ მონაცემებიდან ჩანს, ბოლო წლების განმავლობაში ბიზნესის კორუფციის რისკი ეტაპობრივად იმატებს. მართალია, ბოლო წელს აღნიშნული რისკი ერთი ქულით შემცირდა, მაგრამ საერთაშორისო რეიტინგში საქართველომ მაინც ერთი ადგილით უკან გადაინაცვლა”, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ღია მონაცემების სახელმძღვანელოს საჯარო მოხელეებისთვის. „ღია მონაცემები ხელს უწყობს სამოქალაქო მონიტორინგის მექანიზმების განვითარებას, აუმჯობესებს საზოგადოებრივ კეთილდღეობას და სახელმწიფო რესურსების ეფექტურ გამოყენებას. გზამკვლევის მიზანია საჯარო მოხელეებს მიაწოდოს პრაქტიკული ინფორმაცია მონაცემების მოპოვების, დამუშავების, ანალიზის, გამოქვეყნებისა და შენახვის შესახებ. ამ მიმართულებით მათი კვალიფიკაციის ამაღლება დაეხმარება საჯარო დაწესებულებებს, გაუმკლავდნენ მონაცემების დამუშავებასთან დაკავშირებულ გამოწვევებს და ეფექტურად გამოიყენონ არსებული რესურსები“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საქართველოს სტრატეგიული კვლევებისა და განვითარების ცენტრის ინფორმაციით, მუნიციპალიტეტის მერს და მუნიციპალიტეტის საკრებულოს წევრს გაწეული მუშაობის შესახებ ანგარიშების წარდგენას კანონი ავალდებულებს. „ასევე, კანონი მოითხოვს, რომ მუნიციპალიტეტის ორგანოებმა გამოაქვეყნონ, მინიმუმ მათივე ოფიციალურ ვებ-გვერდზე, მუნიციპალიტეტის მერის და საკრებულოს წევრების მიერ გაწეული მუშაობის შესახებ ანგარიშები, შესაბამისი ანგარიშის წარდგენიდან 10 დღის ვადაში; მოქალაქეების ჩართულობა ადგილობრივი თვითმმართველობის საქმიანობაში აძლიერებს ქვეყანას. საქართველოს სტრატეგიული კვლევებისა და განვითარების ცენტრი ახორცილებს პროექტს ადგილობრივ თვითმმართველობის განხორციელებაში მოქალაქეთა მონაწილეობის უზრუნველყოფის ხელშეწყობა. პროექტის მხარდამჭერია ფრიდრიხ ებერტის ფონდის წარმომადგენლობა საქართველოში“, ნათვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. წინამდებარე სპეციალური ანგარიში საქართველოს სახალხო დამცველის აპარატმა ფემიციდის მონიტორინგის მექანიზმის ფარგლებში შეიმუშავა. ანგარიშში გაანალიზებულია 2014-2015 წლებში ჩადენილი დანაშაულები. „2014 წელს გენდერული ნიშნით ჩადენილი ქალთა მკვლელობის რიცხვი განსაკუთრებით მაღალი იყო. ქალთა მკვლელობების ტრაგიკული მასშტაბების გამო, ეს წელი, გარდამტეხი გახდა ფემიციდის შესახებ საზოგადოების ცნობიერების ამაღლების თვალსაზრისით და ამ პერიოდიდან აქტიურად დაიწყო მუშაობა ქალის მიმართ და ოჯახში ძალადობის ფაქტებზე რეაგირების გაუმჯობესებაზე. 2014 წლიდან დღემდე, უწყებების, საერთაშორისო და არასამთავრობო ორგანიზაციების ერთობლივი ძალისხმევის შედეგად, ქალთა მიმართ და ოჯახში ძალადობასთან ბრძოლის კუთხით, არაერთი ნაბიჯი გადაიდგა. შესაბამისად, ანგარიშის რეკომენდაციების ნაწილში მხოლოდ ის საკითხები მოხვდა, რომლებიც ამ დრომდე გამოწვევად რჩება“, ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. „საერთაშორისო გამჭვირვალობა - საქართველოს” სამოქალაქო საბჭოების წევრებმა იმერეთის 4 მუნიციპალიტეტში (ქუთაისი, ხონი, ტყიბული, წყალტუბო) 40-ზე მეტი ინფრასტრუქტული პრობლემა/საჭიროება გამოავლინეს. „ვიმედოვნებთ, რომ ადგილობრივი თვითმმართველობები მოქალაქეთა იდენტიფიცირებულ საჭიროებებს 2021 წლის ბიუჯეტის პროექტში მაქსიმალურად გაითვალისწინებენ“. სრულად... წყარო: transparency.ge

თბილისი. ადამიანის უფლeბების სწავლებისა და მონიტორინგის ცენტრი (EMC) აქვეყნებს ოკუპირებული ტერიტორიების შესახებ კანონის შეფასების დოკუმენტს. „კანონის მიღებიდან ზუსტად 12 წელი გავიდა. ამ პერიოდში საქართველოს ხელისუფლებას, კანონის არსებობის პარალელურად, არაერთი მცდელობა ჰქონდა ოკუპირებული ტერიტორიების უკანონო რეჟიმებისთვის ახალ-ახალი სამშვიდობო წინადადებები შეეთავაზებინა. თუმცა, როგორც თომას დე ვაალი წერს, „დე-ფაქტო რეჟიმების უჩვეულო გამძლეობა“ ამ შეთავაზებებისთვის ადგილს თითქმის არ ტოვებდა. სამშვიდობო ინიციატივების პარალელურად ოკუპირებული ტერიტორიების შესახებ კანონიც უფრო მეტად ჰუმანური ხდებოდა ეტაპობრივი ცვლილებების შედეგად. თუმცა, სადაოა, რამდენად ქმნიდა ის კონფლიქტის პოზიტიური ტრანსფორმაციის და ამ პროცესში უფლებრივი და ჰუმანიტარული პერსპექტივების გაჩენის საშუალებას. სტატიის მიზანია გაანალიზოს კანონის განვითარების ეტაპები, უფლებრივი და ჰუმანიტარული განზომილებები და მისი ადგილი ერთიან სამშვიდობო პოლიტიკაში“, ნათქვამია მასალაში. სრულად... წყარო: emc.org.ge

თბილისი. ომბუდსმენის აპარატმა სპეციალური ანგარიში ფემიციდის მონიტორინგის მექანიზმის ფარგლებში შეიმუშავა. დოკუმენტში გაანალიზებულია 2018 წელს ჩადენილი დანაშაულები. „მონიტორინგის მიზანია გააანალიზოს ქალთა გენდერული ნიშნით მკვლელობების, მკვლელობის მცდელობისა და თვითმკვლელობამდე მიყვანის თითოეული საქმე, რათა გამოავლინოს ძალადობის მსხვერპლთა და დაზარალებულთა დაცვის მექანიზმის ხარვეზები, შემდგომში ამ მექანიზმების დასახვეწად და განსავითარებლად. მიუხედავად იმისა, რომ 2018 წელს მომხდარი ფემიციდის და ფემიციდის მცდელობის საქმეები 5 წლიანი მონიტორინგის ანგარიშის ფარგლებში გაანალიზდა, ბოლო პერიოდის ტენდენციების გათვალისწინებით, საჭიროდ მივიჩნიეთ ცალკე სახით, სპეციალური ანგარიში გამოგვეცა“, ნათქვამია სახალხო დამცველის ვებგვერდზე. სრულად... წყარო: ombudsman.ge

თბილისი. ინფორმაციის თავისუფლების განვითარების ინსტიტუტი (IDFI) MONEYVAL– ის შეფასება საქართველოში ფულის გათეთრებისა და ტერორიზმის დაფინანსების შესახებ. „საქართველოში ფულის გათეთრების რისკები დიდი ხანია არსებობს და წარმოადგენს როგორც შესაბამისი საერთაშორისო ორგანიზაციების, ისე სტრატეგიული პარტნიორების განხილვის საგანს. აღნიშნული საკითხი წლების განმავლობაში ექცეოდა ამერიკის შეერთებული შტატების (აშშ) სახელმწიფო დეპარტამენტის ყურადღების ქვეშ. აშშ-ს სახელმწიფო დეპარტამენტის ბოლო ანგარიშის თანახმად, საბანკო თაღლითობა და კიბერდანაშაული საქართველოში უკანონო შემოსავლების მიღების მნიშვნელოვანი წყაროა, ხოლო მასობრივი მარკეტინგული თაღლითობისთვის ასევე გამოიყენება სოციალური ინჟინერიის სქემები. საქართველოში არსებული ზოგადი ეკონომიკური მდგომარეობა, რომელიც შორს არის განვითარებული ეკონომიკისაგან, ქმნის ნაყოფიერ ნიადაგს ფულის გათეთრებისთვის. ამავდროულად, შემაშფოთებელია აზარტული თამაშების ინდუსტრიის, მათ შორის, ინტერნეტ თამაშების, უკონტროლო ზრდა“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ნორვეგიის ჰელსინკის კომიტეტი და ადამიანის უფლებათა ცენტრი ყურადღებით ადევნებენ თვალყურს საქართველოში 2020 წლის 31 ოქტომბრის საპარლამენტო არჩევნების ირგვლივ განვითარებულ მოვლენებს, რომელშიც საქართველოს მოსახლეობამ დამოუკიდებლობის მოპოვებიდან მეათეჯერ აირჩია უმაღლესი საკანონმდებლო ორგანო საყოველთაო და პირდაპირი კენჭისყრით.  „31 ოქტომბრის საპარლამენტო არჩევნების წინასაარჩევნო და არჩევნების შემდგომი პერიოდი მნიშვნელოვანი ხარვეზებით წარიმართა, რაც ცხადყოფს საარჩევნო დარღვევებთან გამკლავების კუთხით როგორც კანონმდებლობაში, ასევე პრაქტიკაში არსებულ სისტემურ პრობლემებს. წინასაარჩევნო პერიოდში ხშირი იყო სახელმწიფოსა და მმართველ პარტიას შორის ზღვარის წაშლის, ადმინისტრაციული რესურსის საარჩევნო მიზნით გამოყენებისა და ამომრჩეველთა მოსყიდვის სავარაუდო შემთხვევები მთელი საქართველოს მასშტაბით. მსგავს ფაქტებთან დაკავშირებით თვალსაჩინო ტენდენციას წარმოადგენდა სამართალდამცავი ორგანოების მხრიდან ადეკვატური რეაგირებისა და დამნაშავეთა დასჯის ნაკლებობა“.  სრულად... წყარო: humanrights.ge

თბილისი. სახალხო დამცველმა „სოფლის ექიმის“ სახელმწიფო პროგრამის ფარგლებში მოსახლეობისათვის პირველადი ჯანდაცვის მომსახურებაზე ხელმისაწვდომობის მონიტორინგის საფუძველზე შედგენილი სპეციალური ანგარიში წარმოადგინა. „მონიტორინგისა და მოქმედი მარეგულირებელი აქტების გაანალიზების საფუძველზე გამოიკვეთა, რომ აუცილებელია გაიზარდოს სოფლად პირველადი ჯანდაცვის ხელმისაწვდომობა და ეფექტურობა“. სრულად... წყარო: ombudsman.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) 2020 წლის საპარლამენტო არჩევნების მეორე ტურს, რომელიც 21 ნოემბერს იმართება, 17 მაჟორიტარულ ოლქში 35 მობილური ჯგუფის საშუალებით დააკვირდება. ორგანიზაციის სადამკვირვებლო მისია მეორე ტურზე ლიმიტირებული იქნება. „როგორც ცნობილია, ოპოზიციურმა პარტიებმა უარი განაცხადეს მეორე ტურში მონაწილეობაზე. მიუხედავად იმისა, რომ საარჩევნო კოდექსი არჩევნების მეორე ტურში მაჟორიტარი დეპუტატობის კანდიდატურის მოხსნის შესაძლებლობას არ ითვალისწინებს და საარჩევნო ბიულეტენში საუკეთესო შედეგის მქონე ორი კანდიდატი იქნება მოცემული, ოპოზიციური პარტიების მიერ პარლამენტის ბოიკოტი და არჩევნების მეორე ტურში მონაწილეობაზე უარის თქმა მნიშვნელოვნად აზრს უკარგავს საარჩევნო უბნებზე არჩევნების პროცესის დაკვირვებას. ამასთან, კოვიდ-ინფექციით ინფიცირებულთა მზარდი სტატისტიკის ფონზე ჯანდაცვის სისტემაში შექმნილი პრობლემების გათვალისწინებით, დამკვირვებელთა მთელი დღის მანძილზე საარჩევნო უბანზე ყოფნა მათ ჯანმრთელობას გაუმართლებელ რისკებს უქმნის“, ნათქვამია ორგანიზაციის ვებგვერდზე. სრულად... წყარო: isfed.ge

თბილისი. საქართველოს პარლამენტის 2020 წლის 31 ოქტომბრის არჩევნებს, ადგილობრივი სადამკვირვებლო ორგანიზაცია - განვითარებისა და დემოკრატიის ცენტრი (CDD), საერთაშორისო სადამკვირვებლო ორგანიზაცია - დემოკრატიის, მედიისა და კულტურული გაცვლის ინსტიტუტთან (IDEM) პარტნიორობით, 100 კაციანი ერთობლივი სადამკვირვებლო მისიით დააკვირდა საქართველოს ყველა რეგიონსა და ქვეყნის გარეთ გახსნილ საარჩევნო უბნებზე. „ჩვენი ერთობლივი მისიის შეფასებით, საქართველოს პარლამენტის 31 ოქტომბრის არჩევნები კონკურენტულ გარემოში და ზოგადად ძირითადი თავისუფლებების დაცვით ჩატარდა. კენჭისყრის პროცესმა შედარებით მშვიდ და ორგანიზებულ გარემოში ჩაიარა, ერთეული პროცედურული დარღვევების ფონზე. თუმცა რიგი ხარვეზები - დარღვევები გამოიკვეთა ხმების დათვლისა და შედეგების შეჯამების პროცესში. COVID-19 პანდემიასთან დაკავშირებული გამოწვევების ფონზე, აღსანიშნავია ამომრჩეველთა მაღალი აქტივობა, რითაც კიდევ ერთხელ დადასტურდა ქართველი ამომრჩევლის მხარდაჭერა შეცვლილი საარჩევნო სისტემისადმი, რომლის ერთერთი მთავარი მიზანი, სწორედ უფრო პროპორციული, წარმომადგენლობითი და მრავალფეროვანი საკანონმდებლო ორგანოს ფორმირება იყო“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა (IDFI) 12-13 ნომბერს, სენაკის მერიისა და მერიის დაქვემდებარებაში მყოფი იურიდიული პირების თანამშრომლებისთვის გამჭვირვალობის, ანგარიშვალდებულებისა და კეთილსინდისიერების საკითხებზე ონლაინ ტრენინგი ჩაატარა. „ტრენინგი მიზნად ისახავდა საჯარო მოხელეთა ცნობიერების ამაღლებას, აგრეთვე ანტიკორუფციული მექანიზმების მიმართულებით მათი შესაძლებლობების გაძლიერებას. აღსანიშნავია, რომ ტრენინგს წინ უსწრებდა მერიაში არსებული სიტუაციის ყოვლისმომცველი ანალიზის მომზადება, შემდგომ კი სენაკის მერიის გამჭვირვალობის, ანგარიშვალდებულების და კეთილსინდისიერების სტრატეგიისა და სამოქმედო გეგმის შემუშავება“, ნათქვამია ორგანიზაციის ვებგვერდზე.  სრულად... წყარო: idfi.ge

თბილისი. 2020 წლის 7 მაისს და 12 ივნისს სახალხო დამცველის მოადგილემ და სპეციალური პრევენციული ჯგუფის წევრებმა შპს „ფსიქიკური ჯანმრთელობის და ნარკომანიის პრევენციის ცენტრში“ საგანგებო ვიზიტები განახორციელეს. „ვიზიტების მიზანი დაწესებულების მიერ ახალი კორონავირუსის გავრცელების პრევენციის კუთხით გატარებული ზომებისა და პაციენტის უფლებებზე მათი გავლენის შესწავლა იყო. კორონავირუსის გავრცელების პრევენციისათვის დაწესებულებამ გარკვეული ღონისძიებები გაატარა. თუმცა, ფსიქიატრიულ დაწესებულებებში COVID 19-ის პირობებში კლინიკური მდგომარეობის მართვის სახელმწიფო სტანდარტის დამტკიცების შემდეგაც კი, დაწესებულებას სრულად არ ჰქონდა დანერგილი სტანდარტით გათვალისწინებული რიგი რეკომენდაციები“, ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. საერთაშორისო გამჭვირვალობა - საქართველო გთავაზობთ კორუფციის ლექსიკონის მორიგ განმარტებას ინტერესთა კონფლიქტზე. „იმისთვის რომ ვიყოთ მეტად გათვითცნობიერებულები, მნიშვნელოვანია ვიცოდეთ ტერმინების ზუსტი განმარტება. ინტერესთა კონფლიქტის დროს, თანამდებობის პირს უწევს არჩევანის გაკეთება მის პირად ინტერესებსა და სამსახურებრივ ვალდებულებებს ან/და საჯარო ინტერესებს შორის“. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველომ 31 ოქტომბრის საპარლამენტო არჩევნებთან დაკავშირებულ დარღვევებზე საუბნო და საოლქო კომისიებში ჯამში 108 საჩივარი შეიტანა.  სრულად... წყარო: ორგანიზაციის გვერდი სოციალურ ქსელში