Civil.ge-ს ინფორმაციით, სოციალური მედიაგიგანტი Facebook საქართველოში მომავალი კვირიდან ფაქტების გადამოწმების პროგრამას აამოქმედებს. „პროგრამა არასამთავრობო ორგანიზაცია „საქართველოს რეფორმების ასოციაციისა“ (GRASS) და „მედიის განვითარების ფონდის“ პროექტების – Factcfeck.ge-ისა და „მითების დეტექტორის“ Facebook-თან პარტნიორობით ამოქმედდება და მისი მიზანი პლატფორმაზე გავრცელებული ყალბი ამბებისა და დეზინფორმაციის გამოვლენა იქნება“. სრულად... წყარო: civil.ge

თბილისი. საერთაშორისო გამჭვირვალობა - საქართველოს ინფორმაციით, საქართველოში სახელმწიფო შესყიდვების მონაცემთა ბაზა დამუშავებად ფორმატში ჯერ კიდევ არ არის ხელმისაწვდომი. „სისტემის გაციფრულების 10 წლის თავზეც კი დაინტერესებულ მხარეებს არ აქვთ მარტივი და პირდაპირი წვდომა შესყიდვების შეჯამებულ მონაცემებზე. საქართველოს მთავრობამ და სახელმწიფო შესყიდვების სააგენტომ უნდა გამოავლინონ პოლიტიკური ნება და გამონახონ შესაბამისი რესურსები, რათა საბოლოოდ გაიხსნას სახელმწიფო შესყიდვების სისტემა და მასში არსებული ინფორმაცია მაქსიმალურად ხელმისაწვდომი გახდეს. რა იგულისხმება შესყიდვების ინფორმაციის „საბოლოო გახსნაში“? საქართველოს შესყიდვების სისტემა ხომ სრულად ელექტრონული და გამჭვირვალეა? დიახ, ეს დიდწილად ასეა, თუმცა, საქმე იმაშია, რომ არსებული სისტემა გვანახებს მხოლოდ ცალკეული შესყიდვის შესახებ ინფორმაციას და მისგან შეუძლებელია რაიმე სახის ზოგადი სტატისტიკის და შეჯამებული მონაცემების ამოღება“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი აქვეყნებს ბლოგპოსტს: რეფორმები სამართალდამცავ სისტემაში. „შინაგან საქმეთა მინისტრი აღარ უნდა იყოს ქვეყნის პირველი პოლიციელი და მისი კომპეტენცია უნდა შეიზღუდოს სამინისტროს ადმინისტრაციულ-მენეჯერული ფუნქციების განხორციელებით და ზოგადი პოლიტიკის განსაზღვრით; მას არ უნდა ჰქონდეს საპოლიციო საქმიანობაში უშუალოდ ჩარევის შესაძლებლობა, მათ შორის ისეთი მითითების გაცემა, რომელიც საპოლიციო/საგამოძიებო მოქმედებების ჩატარებას შეეხება...“ სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია წინასაარჩევნო პროცესებს გრძელვადიანი სადამკვირვებლო მისიის ფარგლებში, 9 რეგიონული მონიტორის მეშვეობით თბილისში, აჭარაში, გურიაში, სამეგრელო-ზემო სვანეთში, იმერეთში, შიდა და ქვემო ქართლში, მცხეთა-მთიანეთსა და კახეთში აკვირდება. „2020 წლის საპარლამენტო არჩევნების შუალედური ანგარიში ფარავს 1 ივნისიდან 31 აგვისტოს ჩათვლით განხორციელებული მონიტორინგის შედეგებს. საიას დამკვირვებლებმა როგორც მმართველი პარტიის, ისე ოპოზიციის მხრიდან დააფიქსირეს: - სახელმწიფოსა და პარტიის გამიჯვნის მოთხოვნის უგულებელყოფის 5 შემთხვევა (მათ შორის, COVID-19-ის შედეგების აღმოფხვრის ანტიკრიზისული გეგმა); - ამომრჩევლის მოსყიდვისა და სავარაუდო მოსყიდვის 5 შემთხვევა; - ძალადობრივი ქმედებების, დაძაბული არჩევნებისწინა გარემოს შექმნისა და წინასაარჩევნო აგიტაციის ხელის შეშლის 6 შემთხვევა“. სრულად... წყარო: gyla.ge

თბილისი. საერთაშორისო გამჭვირვალობა - საქართველო აქვეყნებს 2020 წლის სახელმწიფო ბიუჯეტის 6 თვის შესრულების მოკლე ანალიზს. ერთ-ერთი ძირითადი მიგნების თანახმად, „სახელმწიფო ბიუჯეტის შემოსულობების 6 თვის გეგმა 761 მლნ ლარით გაიზარდა და 7,661 მლნ ლარი შეადგინა. შემოსულობების ზრდა დამატებითი ვალების აღებამ განაპირობა. 6 თვეში მთავრობამ 2,541 მლნ ლარის ვალი აიღო. 30 ივნისის მდგომარეობით მთავრობის ვალმა 24.1 მილიარდი ლარი შეადგინა, რაც მშპ-ის დაახლოებით 49%-ია“. სრულად... წყარო: transparency.ge

თბილისი. საერთაშორისო გამჭვირვალობა - საქართველოს მიერ მოკვლეული ინფორმაციის თანახმად, თვითმმართველობის არჩევნების შემდეგ იმერეთის მუნიციპალური იურიდიული პირების ხარჯები გაიზარდა. „საქართველოს ხელისუფლება გამოვიდა მცირე ზომის მთავრობის ინიციატივით, რაც, პირველ რიგში, სახელმწიფო ბიუროკრატიის შემცირებას გულისხმობს; ამ ფონზე, კი მუნიციპალური იურიდიული პირების ხარჯები და დასაქმებულთა რაოდენობა იზრდება. იმ პირობებში, როდესაც ადგილობრივი თვითმმართველობები ინფრასტრუქტურული და სოციალური პრობლემების მოსაგვარებლად შესაბამისი ფინანსური სახსრების ნაკლებობას განიცდიან, მიზანშეუწონელია ხარჯების მსგავსი მასშტაბური მატება“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. სამოქალაქო პლატფორმა 20/20 2020 წლის 31 ოქტომბრის არჩევნებისთვის საოლქო საარჩევნო კომისიების დროებითი წევრების არჩევის შესახებ მომზადებულ არაგეგმიურ ანგარიშს აქვეყნებს. „სამოქალაქო პლატფორმა 20/20“ მიიჩნევს, რომ საოლქო კომისიების დროებითი წევრების შერჩევისას ცენტრალურმა საარჩევნო კომისიამ არასათანადო ყურადღება დაუთმო კანდიდატთა პროფესიონალიზმისა და მიუკერძოებლობის შესწავლას. შესწავლისას კომისიამ არ გამოიყენა საჯარო ინფორმაცია, რომელიც არამარტო ცენტრალური საარჩევნო კომისიისთვის, არამედ ნებისმიერი მოქალაქისთვის არის საჯარო. 72 საარჩევნო ოლქიდან 16 ოლქში გამოცხადებულ კონკურსში მონაწილეობის სურვილი გამოთქვა მხოლოდ ერთმა კანდიდატმა, რაც მიუთითებს იმაზე, რომ ცენტრალურმა საარჩევნო კომისიამ სრულად ვერ გამოიყენა მოსახლეობის ინფორმირების მექანიზმები, რის გამოც ვერ მოხერხდა საარჩევნო სერტიფიკატის მქონე პირების ინფორმირება“, ნათქვამია ანგარიშში.  სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: სამინისტროებსა და სსიპ-ებში ხელშეკრულებით დასაქმების პრაქტიკა. „საჯარო მოხელეებისგან განსხვავებით, ხელშეკრულებით დასაქმების შემთხვევაში მოქმედებს უფრო მარტივი შესარჩევი პროცესი და ხშირ შემთხვევაში მათი ფუნქცია-მოვალეობებიც ბუნდოვნად არის გაწერილი. ადმინისტრაციული ხელშეკრულებით პირები ინიშნებიან უკონკურსოდ, ხოლო შრომითი ხელშეკრულებით მიღებისთვის გამარტივებული საჯარო კონკურსი ცხადდება და გადაწყვეტილება უფლებამოსილი პირის მიერ მიიღება მხოლოდ გასაუბრების საფუძველზე. შესაბამისად, ამ სფეროში უფრო მაღალია ნეპოტიზმის და საბიუჯეტო სახსრების არარაციონალური განკარგვის რისკები“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. მითების დეტექტორი აქვეყნებს ნინო კალაძის მასალას: რამდენ ტყეს ფლობენ ჩინეთის მოქალაქეები საქართველოში. „17 აგვისტოს ტელეკომპანია „ობიექტივის“ გადაცემაში „ღამის სტუდია“ „გლობალური კვლევების ცენტრის“ ხელმძღვანელმა ნანა დევდარიანმა, რომელიც ამჟამად პატრიოტთა ალიანსის საარჩევნო სიის წევრია, სახელმწიფოს მიერ ჩინეთის მოქალაქეებისთვის ტყის მასივების გადაცემაზე ისაუბრა. მისი თქმით, საქართველოში ტყის მასივების დიდი წილი ჩინეთის მოქალაქეებზე ხანგრძლივი იჯარით არის გადაცემული. დევდარიანის განცხადება, თითქოს ტყის მასივების უდიდეს ნაწილს გრძელვადიანი ლიცენზიებით ჩინეთის მოქალაქეები ფლობენ, დეზინფორმაციაა. საქართვლოში ტყეს ერთადერთი ჩინური კომპანია დროებით სარგებლობაში 2027 წლამდე ფლობს და მის სარგებლობაში არსებული ტყე ქვეყნის ტყით დაფარული ტერიტორიის მხოლოდ 1,4%-ს შეადგენს. გარემოს დაცვისა და სოფლის მეურნეობის სამინისტროს თანახმად, ბოლო ხუთი წლის მანძილზე ჩინეთის მოქალაქისთვის ტყის გადაცემა სარგებლობაში არც ერთი ფორმით არ მომხდარა“, ნათქვამია ბლოგპოსტში. სრულად... წყარო: www.mythdetector.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „ქართული ოცნების“ მაჟორიტარი კანდიდატების სამეწარმეო საქმიანობა და პოლიტიკური შემოწირულებები. „ამომრჩევლის ინფორმირების მიზნით „საერთაშორისო გამჭვირვალობა - საქართველო“ სწავლობს 2020 წლის საპარლამენტო არჩევნებისთვის პოლიტიკური პარტიების მიერ წარდგენილ მაჟორიტარობის კანდიდატებს - მათ სამეწარმეო საქმიანობასა და პოლიტიკურ შემოწირულებებს. კვლევაში იხილავთ „ქართული ოცნება - დემოკრატიული საქართველოს“ მიერ წარდგენილი კანდიდატების მონიტორინგის შედეგებს. მომავალში გამოქვეყნდება კვლევა სხვა პარტიების მაჟორიტარი დეპუტატების კანდიდატების შესახებ“, ნათქვამია ორგანიზაციის გვერდზე სოციალურ ქსელში. სრულად... წყარო: www.transparency.ge

თბილისი. სახალხო დამცველმა ნინო ლომჯარიამ ადგილობრივი სადამკვირვებლო მისიების წარმომადგენლებთან ონლაინ შეხვედრა გამართა. „შეხვედრაზე 2020 წლის საპარლამენტო არჩევნებზე ადამიანის უფლებების შესაძლო დარღვევის შემთხვევების გამოვლენისა და მათზე რეაგირების გზებზე იმსჯელეს; შესაძლო რისკები და თანამშრომლობის გეგმები განიხილეს. სახალხო დამცველი თავისი მანდატის ფარგლებში დააკვირდება საპარლამენტო არჩევნებს“, ნათქვამია ორგანიზაციის ვებგვერდზე. სრულად... წყარო: ombudsman.ge

თბილისი. საერთაშორისო გამჭვირვალობა - საქართველო" ამიერიდან სისტემატურად შემოგთავაზებთ #კორუფციისლექსიკონს. „იმისთვის რომ ვიყოთ მეტად გათვიცნობიერებულები, მნიშვნელოვანია ვიცოდეთ ტერმინების ზუსტი განმარტება. ქონების მითვისებაა, როცა თანამდებობის პირი უკანონოდ იყენებს მისთვის მინდობილ თანხებსა და ქონებას პირადი სურვილების დასაკმაყოფილებლად. ქონების მითვისება კანონით დასჯადია“. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო პლატფორმა „არა-ფობიას!“ შეშფოთებას გამოთქვამს პოლიტიკურ პარტია „პატრიოტთა ალიანსის“ ქსენოფობიური/თურქოფობიური რიტორიკის გამო და მიიჩნევს, რომ პარტიის საქმიანობა შეიცავს ეთნიკური შუღლის გაღვივების ნიშნებს, რაც საქართველოს კონსტიტუციის 23-ე მუხლის მე-3 პუნქტის თანახმად აკრძალულ ქმედებას წარმოადგენს. „პოლიტიკური პარტიები სარგებლობენ გამოხატვის თავისუფლებით და აქვთ უფლება საჯაროდ გამოხატონ საკუთარი შეხედულებები, თუნდაც ის იყოს მცდარი და შეცდომაში შემყვანი, თუმცა მათ ამავდროულად გააჩნიათ მაღალი პასუხისმგებლობა, პოლიტიკური პლატფორმა არ გამოიყენონ საზოგადოების სხვადასხვა ჯგუფებს შორის განხეთქილების ჩამოსაგდებად და კონფლიქტის ახალი კერების გასაჩენად. საქართველოს რეალობაში კი ეს უკანასკნელი განსაკუთრებით სახიფათოა“, ნათქვამია განცხადებაში.  სრულად... წყარო: gdi.ge

თბილისი. ადამიანის უფლებათა ცენტრმა სავარაუდოდ პოლიტიკურად მოტივირებული საქმეების სასამართლო პროცესებისა და საპროტესტო აქციების მონიტორინგის შუალედური ანგარიშები მოამზადა. „ამ დროისათვის ცენტრის დაკვირვების ქვეშ 20 სავარაუდოდ პოლიტიკურად მოტივირებული სასამართლო პროცესი და 19 საპროტესტო აქცია მოექცა. სასამართლო მონიტორინგის შედეგად გამოვლინდა, რომ ადამიანის უფლებათა ცენტრის დაკვირვების ქვეშ არსებულ საქმეებში რიგ შემთხვევებში არ იყო უზრუნველყოფილი სამართლიანი სასამართლოს უფლება. რაც შეეხება საპროტესტო აქციებსა, მათი უმეტესობა ატარებდა მშვიდობიან ხასიათს. თუმცა, რიგ შემთხვევებში, ადამიანის უფლებათა ცენტრის მონიტორთა მიერ იდენტიფიცირებულ შემთხვევათა შორის დაფიქსირდა არაპროპორციული ძალის მობილიზების, ასევე დაკავებისა და დაჯარიმების მუქარით დაშლის მოთხოვნებიც“. სრულად... წყარო: www.humanrights.ge

თბილისი. სამართლიანი არჩევნებისა და დემოკრატიის საერთაშორისო საზოგადოებამ (ISFED) განცხადებით მიმართა ცენტრალურ საარჩევნო კომისიას „საქართველოს პატრიოტთა ალიანსის“ Facebook გვერდზე განთავსებული 6 საარჩევნო კლიპისა და მათი გამოყენებით შექმნილი Facebook რეკლამების თაობაზე, რომლებიც ანტი-თურქულ მოწოდებებს შეიცავს.  ორგანიზაციის მოსაზრებით, ეს რეკლამები მიზნად ისახავს თურქეთის სახელმწიფოს მიმართ საქართველოს მოქალაქეებში მტრული განწყობების ჩამოყალიბებას, ასევე, შეიცავს რელიგიური და ეთნიკური შუღლის გაღვივების ნიშნებს. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, გამჭვირვალე სახელმწიფო შესყიდვების რეიტინგში უკრაინის წამყვანი პოზიცია საშიშროების წინაშე დგას. „ივლისის ბოლოს, უკრაინის უმაღლესმა რადამ პირველი მოსმენით მიიღო კანონპროექტი სახელმწიფო შესყიდვებში მექანიკური ინჟინერიის ლოკალიზების შესახებ. კანონპროექტი მიზნად ისახავს მანქანათმშენებლობის განვითარებას და ადგილობრივი პროდუქტის წარმოების ხელშეწყობას. კანონპროექტი ადგენს სახელმწიფო შესყიდვების პრეფერენციებს ადგილობრივი წარმოების 25-40%-ანი მოთხოვნით 2021 წლიდან, დამატებით 15%-იანი ზრდით 2024 წლიდან. მექანიკური ინჟინერიის ლოკალიზების შესახებ კანონპროექტი მნიშვნელოვანი კრიტიკის ობიექტი გახდა როგორ ეროვნულ, ისე საერთაშორისო დონეზე. პრეზიდენტ ტრამპის ადმინისტრაციის წერილში მითითებულია, რომ კანონპროექტის მიღებით უკრაინა დაარღვევს მსოფლიო ვაჭრობის ორგანიზაციის მიერ დადგენილ რეგულაციებს. ადმინისტრაცია ასევე შეშფოთებას გამოთქვამს იმასთან დაკავშირებით რომ ინიცირებული რეგულაციები წინააღმდეგობაში მოდიან უკრაინასა და ევროკავშირს შორის დადებულ ასოცირების ხელშეკრულებასთან“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საერთაშორისო გამჭვირვალობა - საქართველოს მოსაზრებით, ანტიკორუფციულ რეფორმაზე ახალი საკანონმდებლო ინიციატივის მხარდაჭერა მნიშვნელოვნად გაზრდის კორუფციასთან ბრძოლის ეფექტურობას. „საერთაშორისო პრაქტიკით დასტურდება, რომ დამოუკიდებელი ანტიკორუფციული სამსახური არის სისტემურ კორუფციასთან ბრძოლის ეფექტური მექანიზმი. აღნიშნული მოდელი წარმატებით არის დანერგილი არაერთ ევროპულ ქვეყანაში. შემოთავაზებული რეფორმა გულისხმობს ქვეყნის ანტიკორუფციული პოლიტიკის თვისებრივ გაუმჯობესებას; განსაკუთრებით მნიშვნელოვანია, რომ ის შესაძლებელს გახდის ე.წ. „ელიტური კორუფციის“ შემთხვევების რეალურ გამოძიებას და მათ პრევენციას“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საერთაშორისო გამჭვირვალობა - საქართველო მიიჩნევს, ტელეკომპანია „ობიექტივზე” კანონთან შეუსაბამო პოლიტიკური რეკლამები პრობლემად რჩება. „მიუხედავად იმისა, რომ რეკლამებში არ არის მითითებული წინასაარჩევნო/პოლიტიკური რეკლამისთვის საჭირო ატრიბუტები (ფასიანი/უფასო პოლიტიკური რეკლამა და საარჩევნო სუბიექტი), ვიდეორგოლები თავიანთი შინაარსით ცალსახად წარმოადგენს „საარჩევნო კოდექსით“ განსაზღვრულ პოლიტიკურ რეკლამას. შესაბამისად, აშკარაა, რომ მაუწყებლის ეთერში არასაარჩევნო პერიოდში განთავსებულია პოლიტიკური შინაარსის რეკლამები, რაც „მაუწყებლობის შესახებ“ კანონითა და საქართველოს კომუნიკაციების ეროვნული კომისიის 2017 წლის 15 ივნისის N392/18 გადაწყვეტილების თანახმად, აკრძალულია. აღსანიშნავია, რომ მსგავსი ქმედების გამო 2017 და 2018 წელს „ობიექტივი” ორჯერ უკვე იქნა გაფრთხილებული კომუნიკაციების ეროვნული კომისიის მიერ“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. „საერთაშორისო გამჭვირვალობა - საქართველოს“ სამოქალაქო საბჭოების მიერ იდენტიფიცირებული 100-მდე პრობლემის მოსაგვარებლად ყველა შესაბამისმა ადგილობრივმა თვითმმართველობამ მზაობა გამოთქვა. „ადვოკატირების კამპანია 2019 წლის ბოლოს დავიწყეთ, რის ფარგლებშიც ჩვენი სამოქალაქო საბჭოს წევრებმა 200-ზე მეტი პრობლემა და ინფრასტრუქტურული საჭიროება გამოავლინეს! პრობლემების გარკვეული ნაწილის აღმოსაფხვრელად ქვეყნის 5 რეგიონის 14-მა მუნიციპალიტეტმა (ზუგდიდი, ფოთი, ბათუმი, ქედა, შუახევი, ხულო, ქუთაისი, წყალტუბო, ტყიბული, ახალციხე, თელავი, სიღნაღი, ყვარელი, ახმეტა) და შესაბამისმა სტრუქტურებმა სახელმწიფო შესყიდვები გამოაცხადეს, გამარჯვებულმა კომპანიებმა სამუშაოების განხორციელება დაიწყეს, გარკვეული პრობლემების მოსაგვარებლად კი საპროექტო წინადადებები მოამზადეს”, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. გაეროს ქალთა ფონდი აქვეყნებს დოკუმენტს: ქვეყნის გენდერული თანასწორობის პროფილი (საქართველო). „ქვეყნის გენდერული თანასწორობის პროფილი წარმოადგენს ცნობარს გენდერული თანასწორობისა და ქალთა გაძლიერების მიმართულებით არსებული მდგომარეობის შესაფასებლად. დოკუმენტში გენდერულ თანასწორობასთან დაკავშირებული ვითარება საქართველოში მდგრადი განვითარების ინდიკატორებზე დაყრდობითა და პეკინის სამოქმედო პლატფორმისა და CEDAW-ს გათვალისწინებითაა აღწერილი“, ნათქვამია ორგანიზაციის ვებგვერდზე. სრულად... წყარო: georgia.unwomen.org

თბილისი. სახალხო დამცველმა წელს პირველად წარმოადგინა სპეციალური ანგარიში, სადაც დეტალურად არის შეფასებული საქართველოში ადამიანის უფლებათა და თავისუფლებათა დაცვის მდგომარეობის შესახებ საქართველოს სახალხო დამცველის 2018 წლის ანგარიშის საფუძველზე, პარლამენტის 2019 წლის 20 სექტემბრის დადგენილებით სახელმწიფო უწყებებისთვის მიცემული დავალებების შესრულების მდგომარეობა. სახელმწიფო უწყებებსა და ადგილობრივი თვითმმართველობის ორგანოებს სახალხო დამცველმა 2018 წლის საპარლამენტო ანგარიშში 310 რეკომენდაციით მიმართა. საქართველოს პარლამენტმა აღნიშნული რეკომენდაციების დაახლოებით 78% (244 რეკომენდაცია) გაიზიარა და მათი შესრულების უზრუნველსაყოფად 259 დავალება გასცა. სრულად...  წყარო: ორგანიზაციის ვებგვერდი

თბილისი. ადამიანის უფლებათა ცენტრი აგრძელებს საერთო სასამართლოებში მიმდინარე სავარაუდოდ პოლიტიკურად მოტივირებული საქმეების სასამართლო პროცესებზე დაკვირვებას.  ამ დროისათვის, ადამიანის უფლებათა ცენტრის დაკვირვების ქვეშ მოექცა 20 საქმე, რომელთაგან ნაწილის განხილვა სასამართლოში დასრულებულია.  სრულად...  წყარო: ორგანიზაციის ვებგვერდი